ಬಾಕರ್ ವಡಿ / Bakarwadi

Click here for English version.

ಮಹಾರಾಷ್ಟ್ರದ ಸುಪ್ರಸಿದ್ಧ ಸ್ನ್ಯಾಕ್ಸ್ ಐಟಂ ಈ ಬಾಕರ್ ವಡಿ. ಸಿಹಿ ಮತ್ತು ಖಾರ ಮಿಶ್ರಿತವಾದ ಗರಿಗರಿಯಾದ ಬಾಕರ್ ವಡಿ ಯಾರಿಗಾದರೂ ಇಷ್ಟವಾಗುವಂಥ ಕುರುಕಲು ತಿಂಡಿ. ಬಾಕರ್ ವಡಿಯನ್ನು ತಯಾರಿಸಲು ನಾನು ಈವರೆಗೆ ಅನೇಕ ಪ್ರಯೋಗಗಳನ್ನು ಮಾಡಿ, ಇತ್ತೀಚಿನ ದಿನಗಳಲ್ಲಿ ಯಶಸ್ಸನ್ನು ಕಂಡಿದ್ದೇನೆ :)


ತಯಾರಿಸಲು ಬೇಕಾಗುವ ಸಮಯ: ಒಂದೂವರೆಯಿಂದ ಎರಡು ಘಂಟೆ
 
ಬೇಕಾಗುವ ಸಾಮಗ್ರಿಗಳು:
1 ) ಕಣಕ ತಯಾರಿಸಲು:
     ಮೈದಾಹಿಟ್ಟು  - 1 ಕಪ್ 
     ಕಡಲೆಹಿಟ್ಟು - 2 ಟೇಬಲ್ ಸ್ಪೂನ್ 
     ಉಪ್ಪು - ರುಚಿಗೆ ತಕ್ಕಷ್ಟು 
     ಮೆಣಸಿನಪುಡಿ - 1 / 2 ಚಮಚ 
     ನೀರು - 1 / 4 ಲೋಟಕ್ಕಿಂತ ಸ್ವಲ್ಪ ಜಾಸ್ತಿ 
     ಎಣ್ಣೆ - 1 ಚಮಚ 

2 ) ಹೂರಣ ತಯಾರಿಸಲು: 
     ಒಣಕೊಬ್ಬರಿ ತುರಿ - 3 ಟೇಬಲ್ ಸ್ಪೂನ್ 
     ಗಸಗಸೆ - 1 ಟೇಬಲ್ ಸ್ಪೂನ್
     ಕೆಂಪುಮೆಣಸಿನ ಪುಡಿ -  2 ಚಮಚ (ಖಾರಕ್ಕೆ ತಕ್ಕಷ್ಟು)
     ಸಕ್ಕರೆ - 2 ಚಮಚ 
     ಉಪ್ಪು - ರುಚಿಗೆ ತಕ್ಕಷ್ಟು 
     ಆಮ್ ಚೂರ್ ಪುಡಿ - 1 / 2 ಚಮಚ 
     ಲವಂಗ - 1 
     1 / 2 ಚಮಚದಷ್ಟು ಕೊತ್ತಂಬರಿ - ಜೀರಿಗೆ ಪುಡಿ  
     ಸೋಂಪು - 1 ಚಮಚ 

3 ) ಇತರ ಸಾಮಗ್ರಿಗಳು:
     ಚಿಕ್ಕ ಗೋಲಿಗಾತ್ರದಷ್ಟು ಹುಣಸೆಹಣ್ಣು (ಸ್ವಲ್ಪ ನೀರು ಸೇರಿಸಿ ನೆನೆಸಿಡಿ) 
     ಕರಿಯಲು ಎಣ್ಣೆ
     1 ಚಮಚದಷ್ಟು ಮೈದಾಹಿಟ್ಟು, ಸ್ವಲ್ಪ ನೀರು

ಮಾಡುವ ವಿಧಾನ:
ಮೊದಲು ಕಣಕ ತಯಾರಿಸಿಕೊಂಡು ಸ್ವಲ್ಪ ಸಮಯ ನೆನೆಯಲು ಬಿಡಬೇಕು. ಮೈದಾಹಿಟ್ಟು, ಕಡಲೆಹಿಟ್ಟು, ಉಪ್ಪು, ಮೆಣಸಿನಪುಡಿ ಇಷ್ಟನ್ನೂ ಕೈಯಿಂದ ಚೆನ್ನಾಗಿ ಮಿಕ್ಸ್ ಮಾಡಿಕೊಂಡು ಅದಕ್ಕೆ ಎಣ್ಣೆ ಸೇರಿಸಿ ಚೆನ್ನಾಗಿ ಕಲಸಿ.
ನಂತರ ಈ ಮಿಶ್ರಣಕ್ಕೆ ನೀರನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತ ಕಲಸಿ ಮುದ್ದೆಯಂತೆ ಮಾಡಿ. ಹಿಟ್ಟು ಚಪಾತಿ ಹಿಟ್ಟಿಗಿಂತ ಗಟ್ಟಿಯಾಗಿರಲಿ. ನೀರಿನಂಶ ಕಡಿಮೆ ಇದ್ದಷ್ಟೂ ಒಳ್ಳೆಯದು.
ಈ ಹಿಟ್ಟನ್ನು ಒಮ್ಮೆ ಚೆನ್ನಾಗಿ ನಾದಿ, ಹಿಟ್ಟಿನ ಮುದ್ದೆಗೆ ಸ್ವಲ್ಪ ಎಣ್ಣೆ ಸವರಿ ಒಂದು ಪಾತ್ರೆಯಲ್ಲಿ ಹಾಕಿ ಮುಚ್ಚಿ 20 ನಿಮಿಷ ನೆನೆಯಲು ಬಿಡಿ. 


ಹೂರಣಕ್ಕೆ ಮೇಲೆ ಹೇಳಿದ ಎಲ್ಲ ಸಾಮಗ್ರಿಗಳನ್ನೂ ಒಟ್ಟಿಗೆ ಸೇರಿಸಿ ಮಿಕ್ಸಿಯಲ್ಲಿ ತರಿಯಾಗಿ ಪುಡಿಮಾಡಿಕೊಳ್ಳಿ. ಒಮ್ಮೆ ರುಚಿ ನೋಡಿಕೊಂಡು ಏನಾದರೂ ಬೇಕಿದ್ದರೆ ಸೇರಿಸಿಕೊಳ್ಳಿ.


ಕಲಸಿಟ್ಟ ಹಿಟ್ಟಿನಿಂದ ಚಿಕ್ಕ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿಕೊಂಡು ಅದಷ್ಟೂ ತೆಳ್ಳಗೆ ರೊಟ್ಟಿಯಂತೆ ಲಟ್ಟಿಸಿ. ಲಟ್ಟಿಸುವಾಗ ಒಣಹಿಟ್ಟು ಬೇಕಿದ್ದರೆ ಸ್ವಲ್ಪ ಮೈದಾಹಿಟ್ಟು ಸವರಿಕೊಳ್ಳಿ.
ಇದರಮೇಲೆ ಹುಣಸೆಹಣ್ಣಿನ ರಸವನ್ನು ಸವರಿಕೊಂಡು, ಮೇಲಿನಿಂದ ಪುಡಿಮಾಡಿಕೊಂಡ ಹೂರಣವನ್ನು ಉದುರಿಸಿಕೊಂಡು ರೊಟ್ಟಿಯಮೇಲೆ ಒಂದೇ ಸಮನಾಗಿ ಹರಡಿ, ಮಿಶ್ರಣ ಚೆನ್ನಾಗಿ ಸೆಟ್ ಆಗುವಂತೆ ಕೈಬೆರಳಿನಿಂದ ಸ್ವಲ್ಪ ಪ್ರೆಸ್ ಮಾಡಿ. ಹೂರಣವನ್ನು ತೀರಾ ಅಂಚಿನವರೆಗೆ ಹಾಕಲು ಹೋಗಬೇಡಿ. 


ರೊಟ್ಟಿಯ ಅಂಚುಗಳಿಗೆ ಪುನಃ ಹುಣಸೆ ರಸವನ್ನು ಸವರಿಕೊಂಡು, ರೊಟ್ಟಿಯನ್ನು ಕಣಕದ ಮಿಶ್ರಣ ಒಳಭಾಗಕ್ಕೆ ಬರುವಂತೆ ನಾಜೂಕಾಗಿ ಸುರುಳಿ ಸುತ್ತಿ. ಹೀಗೆ ಸುತ್ತುವಾಗ ಅದಷ್ಟೂ ಬಿಗಿಯಾಗಿ ಸುತ್ತಬೇಕು; ಇಲ್ಲದಿದ್ದರೆ ಕರಿಯುವಾಗ ಕಣಕವೆಲ್ಲ ಹೊರಗೆ ಬಂದುಬಿಡುತ್ತದೆ. 
ರೊಟ್ಟಿಯ ಸುರುಳಿಯನ್ನು ಕೈಯಿಂದ ಪ್ರೆಸ್ ಮಾಡಿ, ಸ್ವಲ್ಪ ಆಚೀಚೆ ಹೊರಳಿಸಿ, ಕಣಕದ ಮಿಶ್ರಣ ಚೆನ್ನಾಗಿ ಹಿಡಿದುಕೊಳ್ಳುವಂತೆ ಮಾಡಿ. ನಂತರ ಚಾಕುವಿನಿಂದ ರೊಟ್ಟಿಯ ಸುರುಳಿಯನ್ನು ನಿಧಾನವಾಗಿ 1 ಸೆಂ.ಮೀ.ನಷ್ಟು ಅಳತೆಯ ಚೂರುಗಳಾಗಿ ಕತ್ತರಿಸಿಕೊಳ್ಳಿ.

ಒಂದು ಚಮಚದಷ್ಟು ಮೈದಾಹಿಟ್ಟಿಗೆ ಸ್ವಲ್ಪ ನೀರು ಸೇರಿಸಿ ತೆಳ್ಳಗೆ ಕಲಸಿಕೊಳ್ಳಿ.
ಬಾಣಲೆಯಲ್ಲಿ ಎಣ್ಣೆಯನ್ನು ಹದವಾಗಿ ಕಾಯಿಸಿಕೊಂಡು, ಬಾಕರ್ ವಡಿಯ ಕತ್ತರಿಸಿದ ಎರಡೂ ಅಂಚುಗಳನ್ನು ಕಲಸಿಟ್ಟ ಮೈದಾಹಿಟ್ಟಿನಲ್ಲಿ ಒಮ್ಮೆ ಅದ್ದಿಕೊಂಡು ಕಾದ ಎಣ್ಣೆಯಲ್ಲಿ ಹಾಕಿ. ಹೀಗೆ ಮಾಡುವುದರಿಂದ ಒಳಗಿನ ಹೂರಣ ಕರಿಯುವಾಗ ಹೊರಬರುವುದನ್ನು ತಪ್ಪಿಸಬಹುದು.
ಜಾಮೂನ್ ಕರಿಯುವಂತೆಯೇ ಇದನ್ನೂ ಸಣ್ಣ ಉರಿಯಲ್ಲಿ ಸುಮಾರು 10 ರಿಂದ 15 ನಿಮಿಷ ಕರಿಯಬೇಕು. ಉರಿ ತುಂಬಾ ಜೋರಾಗಿದ್ದರೆ ಬಾಕರ್ ವಡಿ ಬೇಗ ಕೆಂಪಾಗಿಬಿಡುತ್ತದೆ. ಚೆನ್ನಾಗಿ ಬೆಂದನಂತರ ಉರಿಯಿಂದ ಇಳಿಸುವುದಕ್ಕೆ 3 - 4 ನಿಮಿಷ ಮೊದಲು ಉರಿಯನ್ನು ಸ್ವಲ್ಪ ಹೆಚ್ಚು ಮಾಡಿ ಕರಿದರೆ ಒಳ್ಳೆಯ ಹೊಂಬಣ್ಣ ಬರುತ್ತದೆ.


ಹೊಂಬಣ್ಣಕ್ಕೆ ಕರಿದ ಬಾಕರ್ ವಡಿಯನ್ನು  ಒಂದು ಟಿಶ್ಯೂ ಪೇಪರ್ ಮೇಲೆ ಹರವಿ, ತಣ್ಣಗಾದಮೇಲೆ ತೆಗೆದು ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ. ಟೀ ಅಥವಾ ಕಾಫಿಯೊಡನೆ ತಿನ್ನಿ. 
ಬಾಕರ್ ವಡಿ ಎಷ್ಟು ದಿನಗಳವರೆಗೆ ಚೆನ್ನಾಗಿರುವುದೋ ಗೊತ್ತಿಲ್ಲ...ಏಕೆಂದರೆ ನಮ್ಮ ಮನೆಯಲ್ಲಂತೂ ಇದು ಮಾಡಿಟ್ಟ ಎರಡು ದಿನದೊಳಗೇ ಖರ್ಚಾಗಿಬಿಡುತ್ತದೆ!

ಕಾಮೆಂಟ್‌ಗಳು

  1. ನನ್ನ ಮಗ ಪುಣೆಯಿಂದ ತರುತ್ತ ಇದ್ದ.ತಯಾರಿಸುವದು ಇಷ್ಟು ಸರಳ ಅಂತ ಗೊತ್ತಿರಲ್ಲಿಲ್ಲ.ಮಾಡಿ ಖಂಡಿತ್ ನಿಮಗೆ ತಿಳಿಸುತ್ತೇನೆ

    ಪ್ರತ್ಯುತ್ತರಅಳಿಸಿ
  2. ಹೌದು ಗೀತಾರವರೆ, ಇದನ್ನು ಸುಲಭವಾಗಿ ಮನೆಯಲ್ಲೇ ತಯಾರಿಸಬಹುದು. ಟ್ರೈ ಮಾಡಿದರೆ ಹೇಗೆ ಬಂತು ಅಂತಾ ಹೇಳಿ :)

    ಪ್ರತ್ಯುತ್ತರಅಳಿಸಿ

ಕಾಮೆಂಟ್‌‌ ಪೋಸ್ಟ್‌ ಮಾಡಿ

Hi, Thanks for dropping in. I will be happy to hear your feedback :)