Recipe world

Here are some recipes which I came across through the net, books, so on and few are my own experiments..

ಬುಧವಾರ, ಅಕ್ಟೋಬರ್ 6, 2021

ಝುಕಿನಿ - ಅಕ್ಕಿ ರೊಟ್ಟಿ । ಝುಕಿನಿ ವಡಪೆ

Click here for English version. 

ಝುಕಿನಿ - ಇಟಲಿ ಮೂಲದ ಈ ತರಕಾರಿ ನೋಡುವುದಕ್ಕೆ ಸವತೆ ಕಾಯಿಯಂತಿದ್ದು, ರುಚಿಯಲ್ಲಿ ಸೋರೆಕಾಯನ್ನು ಹೋಲುತ್ತದೆ. ಈ ತರಕಾರಿ ಯಾವುದೇ ವಿಶೇಷ ವಾಸನೆ ಹೊಂದಿಲ್ಲ ಹಾಗೂ ಅಡುಗೆ ಪದಾರ್ಥಗಳಲ್ಲಿ ಇತರ ಅನೇಕ ಬಗೆಯ ತರಕಾರಿಗಳೊಡನೆ ಚೆನ್ನಾಗಿ ಹೊಂದಿಕೆಯಾಗುತ್ತದೆ. 

ಆಸ್ಟ್ರೇಲಿಯಾ ಗೆ ಬಂದ ಹೊಸತರಲ್ಲಿ ಒಮ್ಮೆ ನಮ್ಮೆಜಮಾನರು ಫಾರ್ಮರ್ಸ್ ಮಾರ್ಕೆಟ್ ನಿಂದ ಸವತೆ ಕಾಯಿ ಎಂದು ಭಾವಿಸಿ ಒಂದು ದೊಡ್ಡ ಬಾಕ್ಸ್ ನಷ್ಟು ಝುಕಿನಿ ತಂದುಬಿಟ್ಟಿದ್ದರು! ಮನೆಯಲ್ಲಿ ಇರುವದೇ ಇಬ್ಬರು. ತೋಚಿದ ಅಡುಗೆ ಪದಾರ್ಥಗಳಲ್ಲೆಲ್ಲ ಝುಕಿನಿ ಬಳಸಿ, ಅಂತೂ ಇಂತೂ ಬಾಕ್ಸ್ ಖಾಲಿ ಮಾಡುವಷ್ಟರಲ್ಲಿ ಸುಸ್ತಾಗಿಬಿಟ್ಟಿದ್ದೆವು 😅. ಆದರೆ ಈಗ ಹಾಗಿಲ್ಲ, ಝುಕಿನಿ ನಮ್ಮ ದಿನನಿತ್ಯದ ಅಡುಗೆಯಲ್ಲಿ ಧಾರಾಳವಾಗಿ ಬಳಕೆಯಾಗುತ್ತದೆ. ವಾರದ ಗ್ರಾಸರಿ ಲಿಸ್ಟ್ ನಲ್ಲಿ ಈ ತರಕಾರಿ ಸಾಮಾನ್ಯವಾಗಿ ಇದ್ದೇ ಇರುತ್ತದೆ. 

ಸವತೇಕಾಯಿ ಬಳಸಿ ಅಕ್ಕಿರೊಟ್ಟಿ ತಯಾರಿಸುವಂತೆಯೇ ಝುಕಿನಿ ಬಳಸಿಯೂ ರುಚಿಕರವಾಗಿ ಅಕ್ಕಿರೊಟ್ಟಿ ತಯಾರಿಸಬಹುದು. ಬೆಳಗಿನ ಉಪಹಾರ ಅಥವಾ ಸಂಜೆಯ ತಿಂಡಿ / ಊಟಕ್ಕೆ ಈ ರೊಟ್ಟಿ ಚೆನ್ನಾಗಿರುತ್ತದೆ. ಝುಕಿನಿ - ಅಕ್ಕಿರೊಟ್ಟಿ ಅಥವಾ ಝುಕಿನಿ ವಡಪೆ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:

  • ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
  • ಬೇಯಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು 
  • ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 
  • ಸರ್ವಿಂಗ್ಸ್: ಈ ಅಳತೆಯಿಂದ 7 ದೊಡ್ಡ ರೊಟ್ಟಿಗಳನ್ನು ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:

  • ಝುಕಿನಿ - 1 ಮೀಡಿಯಮ್ ಸೈಜಿನದು (ಅಥವಾ ತುರಿದ ಝುಕಿನಿ 1 1/4 ಕಪ್)
  • ಈರುಳ್ಳಿ - 1 ಮೀಡಿಯಮ್ ಸೈಜಿನದು 
  • ಹಸಿಮೆಣಸು - 2 ರಿಂದ 3 (ಖಾರಕ್ಕೆ ತಕ್ಕಂತೆ - ಟಿಪ್ಸ್ ನೋಡಿ)
  • ಕ್ಯಾಪ್ಸಿಕಂ (ಡೊಳ್ಳುಮೆಣಸು) - 1 
  • ಕರಿಬೇವು - 10 ರಿಂದ 12 ಎಲೆಗಳು 
  • ಹಸಿ ಶುಂಠಿ - 1/2 ಇಂಚು 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಸಕ್ಕರೆ - 1/2 ಟೀ ಚಮಚ 
  • ಮೊಸರು - 2 ಟೇಬಲ್ ಚಮಚ 
  • ಅಕ್ಕಿಹಿಟ್ಟು - 2 1/2 ಕಪ್ ನಷ್ಟು  

ತಯಾರಿಸುವ ವಿಧಾನ:

  • ಝುಕಿನಿಯನ್ನು ಸಣ್ಣಗೆ ತುರಿದು ಒಂದು ಮಿಕ್ಸಿಂಗ್ ಪಾತ್ರೆಗೆ ಹಾಕಿಕೊಳ್ಳಿ. 
  • ಇದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿಯನ್ನು ಸೇರಿಸಿ. ನಾನು ಇಲ್ಲಿ ಈರುಳ್ಳಿ ಹೆಚ್ಚಲು (ಪುಲ್ ಚಾಪರ್) Pull chopper ಬಳಸಿದ್ದೇನೆ. 
  • ನಂತರ ಇದಕ್ಕೆ ಸಣ್ಣಗೆ ಹೆಚ್ಚಿದ ಕ್ಯಾಪ್ಸಿಕಮ್, ಹೆಚ್ಚಿದ ಕರಿಬೇವಿನ ಎಲೆಗಳನ್ನು ಸೇರಿಸಿ. ಶುಂಠಿಯನ್ನು ಜಜ್ಜಿ ಸೇರಿಸಿ.  
  • ಹಸಿಮೆಣಸನ್ನು ಸಣ್ಣಗೆ ಹೆಚ್ಚಿ, ಸ್ವಲ್ಪ ಜಜ್ಜಿ ಅಥವಾ ಬಾಯಿಗೆ ಸಿಗದಂತೆ ಪೇಸ್ಟ್ ಮಾಡಿ ಸೇರಿಸಿ. 
  • ಹೆಚ್ಚಿದ ತರಕಾರಿ ಮಿಶ್ರಣಕ್ಕೆ ಅರ್ಧ ಟೀ ಚಮಚ ಸಕ್ಕರೆ, ರುಚಿಗೆ ತಕ್ಕಷ್ಟು ಉಪ್ಪು, 2 ಟೇಬಲ್ ಚಮಚದಷ್ಟು ಮೊಸರು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ 10 ನಿಮಿಷ ಬಿಡಿ. ಹೀಗೆ ಮಾಡುವುದರಿಂದ ತರಕಾರಿಯಲ್ಲಿರುವ ನೀರು ಬಿಟ್ಟುಕೊಂಡು, ಹಿಟ್ಟನ್ನು ಕಲಸಲು ಅನುಕೂಲವಾಗುತ್ತದೆ. 
  • ತರಕಾರಿ ಮಿಶ್ರಣಕ್ಕೆ ಸ್ವಲ್ಪ ಸ್ವಲ್ಪವಾಗಿ ಹಿಟ್ಟನ್ನು ಸೇರಿಸುತ್ತ ಮಿಕ್ಸ್ ಮಾಡಿ. ಮಿಶ್ರಣ ಮೆತ್ತಗೆ, ಚಪಾತಿ ಹಿಟ್ಟಿನ ಹದಕ್ಕಿರಲಿ.  
  • ಈಗ, ನಿಂಬೆಗಾತ್ರದಷ್ಟು ಹಿಟ್ಟನ್ನು ತೆಗೆದುಕೊಂಡು ಎಣ್ಣೆ ಹಚ್ಚಿದ ಬಾಳೆಎಲೆ ಅಥವಾ ಪ್ಲಾಸ್ಟಿಕ್ ಶೀಟ್ ಮೇಲೆ ಇಟ್ಟುಕೊಂಡು ಕೈಯಲ್ಲಿ ತಟ್ಟಿ ತೆಳ್ಳಗೆ ರೊಟ್ಟಿಯಂತೆ ಮಾಡಿ. ಬೇಕಿದ್ದರೆ ರೊಟ್ಟಿಯ ಮಧ್ಯೆ ತೂತು ಮಾಡಿ (ಟಿಪ್ಸ್ ನೋಡಿ). 
  • ತೆಳ್ಳಗೆ ತಟ್ಟಿದ ರೊಟ್ಟಿಯನ್ನು ಹದವಾಗಿ ಕಾದ ಕಾವಲಿಗೆ ವರ್ಗಾಯಿಸಿ, ಮೇಲಿನಿಂದ ಒಂದೆರಡು ಚಮಚದಷ್ಟು ಎಣ್ಣೆ / ಬೆಣ್ಣೆ ಹಾಕಿ. ಎಣ್ಣೆ ಧಾರಾಳವಾಗಿ ಬಳಸಿದಷ್ಟೂ ರುಚಿ ಹೆಚ್ಚು!
  • ಈ ರೊಟ್ಟಿಯನ್ನು ಸಣ್ಣ ಅಥವಾ ಮೀಡಿಯಮ್ ಉರಿಯಲ್ಲಿ ಎರಡೂ ಕಡೆ ಬೇಯಿಸಿ. ರೊಟ್ಟಿ ಗರಿಯಾಗಬೇಕೆಂದರೆ ಸಣ್ಣ ಉರಿಯಲ್ಲಿ ಹೆಚ್ಚು ಸಮಯ ಬೇಯಿಸಿ. 
  • ಬಿಸಿಬಿಸಿ ರೊಟ್ಟಿಯನ್ನು ಬೆಣ್ಣೆ ಅಥವಾ ಚಟ್ನಿಯೊಡನೆ ಸರ್ವ್ ಮಾಡಿ. 

ಟಿಪ್ಸ್:

  • ಹಸಿಮೆಣಸಿನ ಬದಲು ಅಚ್ಚಮೆಣಸಿನ ಪುಡಿಯನ್ನೂ ಬಳಸಬಹುದು.  
  • ಬಾಳೆಎಲೆ ಅಥವಾ ನಾನ್ ಸ್ಟಿಕ್ ಶೀಟ್ ಬಳಸುವ ಬದಲು, ರೊಟ್ಟಿ ಬೇಯಿಸುವ ಕಾವಲಿ ತಣ್ಣಗಿದ್ದಾಗಲೇ ಅದಕ್ಕೆ ಎಣ್ಣೆ ಸವರಿಕೊಂಡು ಡೈರೆಕ್ಟ್ ಆಗಿ ಕಾವಲಿಯ ಮೇಲೆಯೇ ರೊಟ್ಟಿ ತಟ್ಟಲೂಬಹುದು. 

ಶುಕ್ರವಾರ, ನವೆಂಬರ್ 6, 2020

ಹವ್ಯಕ ಸ್ಟೈಲ್ ಬಾಳೆಕಾಯಿ ಪಲ್ಯ

ಬಾಳೆಕಾಯಿ ನಮ್ಮ ಮನೆಯಲ್ಲಿ ಎಲ್ಲರಿಗೂ ಇಷ್ಟವಾಗುವ ತರಕಾರಿಗಳಲ್ಲೊಂದು. ನಮಗಿಲ್ಲಿ ಯಾವಾಗಲಾದರೊಮ್ಮೆ ಫ್ರೆಶ್ ಬಾಳೆಕಾಯಿ ಇಂಡಿಯನ್ ಸ್ಟೋರ್ ನಲ್ಲಿ ಸಿಗುತ್ತದೆ. ಕಳೆದ ಬಾರಿ ಗ್ರಾಸರಿ ಸ್ಟೋರ್ ಗೆ ಹೋದಾಗ ಬಹಳ ದಿನಗಳ ನಂತರ ಬಾಳೆಕಾಯಿ ಸಿಕ್ಕಿತ್ತು. ನನ್ನ ಮಗಳು ಬಾಳೆಕಾಯಿ ನೋಡಿದವಳೇ ಬಾಳೆಕಾಯಿ ಚಿಪ್ಸ್ ಮಾಡು ಎಂದು ದುಂಬಾಲು ಬಿದ್ದಳು. ಚಿಪ್ಸ್ ತಯಾರಿಸಿ ಉಳಿದ ಬಾಳೆಕಾಯಿಯಲ್ಲಿ ಪಲ್ಯ ತಯಾರಿಸಿದ್ದಾಯಿತು. ನಮ್ಮ ಮನೆಯಲ್ಲಿ ಬಾಳೆಕಾಯಿ ಪಲ್ಯಕ್ಕೆ ಬೇಡಿಕೆ ಹೆಚ್ಚು. ರುಚಿಯಾದ ಹಾಗೂ ಸುಲಭದಲ್ಲಿ ತಯಾರಿಸಬಹುದಾದ ಈ ಹವ್ಯಕ ಸ್ಟೈಲ್ ಬಾಳೆಕಾಯಿ ಪಲ್ಯವನ್ನು ನೀವೂ ಟ್ರೈ ಮಾಡಿ. 



ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಸರ್ವಿಂಗ್ಸ್: 4 - 5 ಜನರಿಗೆ ಆಗುತ್ತದೆ 


ಬೇಕಾಗುವ ಸಾಮಗ್ರಿಗಳು:

  • ಮೀಡಿಯಂ ಸೈಜಿನ ಬಾಳೆಕಾಯಿ - 3
  • ತೆಂಗಿನತುರಿ - 3 ಟೇಬಲ್ ಚಮಚ 
  • ಹಸಿಮೆಣಸು - 1 (ಖಾರಕ್ಕೆ ತಕ್ಕಷ್ಟು)
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಸಕ್ಕರೆ - ದೊಡ್ಡ ಚಿಟಿಕೆಯಷ್ಟು  
  • ನಿಂಬೆರಸ - 2 ಟೇಬಲ್ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ಕರಿಬೇವು - ಒಂದು ಎಸಳು
  • ಒಣಮೆಣಸು - 1 ಚಿಕ್ಕ ಚೂರು 
  • ಉದ್ದಿನಬೇಳೆ - 1 ಟೀ ಚಮಚ 
  • ಸಾಸಿವೆ - 3/4 ಟೀ ಚಮಚ 
  • ಇಂಗು - ದೊಡ್ಡ ಚಿಟಿಕೆ 
  • ಅರಿಶಿನ - 3/4 ಟೀ ಚಮಚ 
  • ಎಣ್ಣೆ - 2 1/2 ಟೇಬಲ್ ಚಮಚ (ಕೊಬ್ಬರಿ ಎಣ್ಣೆ ಆದರೆ ಉತ್ತಮ)
  • ನೀರು - 4 ರಿಂದ 5 ಕಪ್ (ಬಾಳೆಕಾಯಿ ಬೇಯಿಸಲು) 


ತಯಾರಿಸುವ ವಿಧಾನ: 

  • ಒಂದು ಪಾತ್ರೆಯಲ್ಲಿ ಬಾಳೆಕಾಯಿ ಮುಳುಗುವಷ್ಟು ನೀರು, ಒಂದೆರಡು ಹನಿಯಷ್ಟು ಎಣ್ಣೆ ಹಾಕಿ ಬಿಸಿಗಿಡಿ. ನೀರು ಬಿಸಿಯಾದಾಗ ಇದಕ್ಕೆ ಬಾಳೆಕಾಯಿಗಳನ್ನು  ಇಡಿಯಾಗಿ ಹಾಕಿ 8 - 10 ನಿಮಿಷ ಅಥವಾ ಮುಕ್ಕಾಲುಭಾಗ ಬೇಯುವಷ್ಟು ಬೇಯಿಸಿ. ಬೆಂದಾಗ ಬಾಳೆಕಾಯಿಯ ಸಿಪ್ಪೆ ಕಂದು ಬಣ್ಣಕ್ಕೆ ತಿರುಗಿ, ಬಾಳೆಕಾಯಿ ಸ್ವಲ್ಪ ಮೆತ್ತಗಾಗಿರುತ್ತದೆ. 
  • ಬೆಂದ ಬಾಳೆಕಾಯಿಗಳನ್ನು ನೀರಿನಿಂದ ಹೊರತೆಗೆದು ತಣ್ಣಗಾಗಲು ಬಿಡಿ. 
  • ಬಾಳೆಕಾಯಿ ಸ್ವಲ್ಪ ತಣ್ಣಗಾದ ನಂತರ ಅದರ ಸಿಪ್ಪೆ ತೆಗೆಯಿರಿ. ಸಿಪ್ಪೆ ತೆಗೆದ ಬಾಳೆಕಾಯನ್ನು ಗ್ರೇಟರ್ (ಮಾಂದ್ರಿ) ಬಳಸಿ ತುರಿದುಕೊಳ್ಳಿ. 
  • ತುರಿದ ಬಾಳೆಕಾಯಿಗೆ ತೆಂಗಿನತುರಿ, ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, ನಿಂಬೆರಸ ಸೇರಿಸಿ ಮಿಕ್ಸ್ ಮಾಡಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಒಗ್ಗರಣೆಗಿಡಿ. ಎರಡೂವರೆ ಟೇಬಲ್ ಚಮಚದಷ್ಟು ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದ ನಂತರ ಒಣಮೆಣಸಿನ ಚೂರು, ಉದ್ದಿನಬೇಳೆ, ಸಾಸಿವೆ, ಇಂಗು ಹಾಕಿ ಕೈಯಾಡಿಸಿ. ಸಾಸಿವೆ ಸಿಡಿಯತೊಡಗಿದಾಗ ಇದಕ್ಕೆ ಅರಿಶಿನ, ಸೀಳಿದ ಹಸಿಮೆಣಸು, ಕರಿಬೇವಿನ ಎಲೆಗಳನ್ನು ಸೇರಿಸಿ ಒಮ್ಮೆ ಕೈಯಾಡಿಸಿ. 
  • ತುರಿದ ಬಾಳೆಕಾಯಿಯನ್ನು ಒಗ್ಗರಣೆಗೆ ಸೇರಿಸಿ ಕೈಯಾಡಿಸಿ. ಬಾಣಲೆಗೆ ಮುಚ್ಚಳವನ್ನು ಅರೆಬರೆ ಮುಚ್ಚಿ ಪಲ್ಯವನ್ನು ಚೆನ್ನಾಗಿ ಬಿಸಿಮಾಡಿ ಉರಿಯನ್ನು ಆಫ್ ಮಾಡಿ. ಬಿಸಿಮಾಡುವಾಗ ಪಲ್ಯವನ್ನು ಒಂದೆರಡು ಬಾರಿ ಕೈಯಾಡಿಸಲು ಮರೆಯಬೇಡಿ. 


ಟಿಪ್ಸ್:

  • ಬಾಳೆಕಾಯಿ ಜಾಸ್ತಿ ಬೆಂದುಬಿಟ್ಟರೆ ತಕ್ಷಣ ತಣ್ಣನೆಯ ನೀರಿನಲ್ಲಿ ತೊಳೆಯಿರಿ. ಇದರಿಂದ ಬಾಳೆಕಾಯಿ ಇನ್ನೂ ಮೆತ್ತಗಾಗುವುದು ತಪ್ಪುತ್ತದೆ.    
  • ನಿಂಬೆರಸದ ಬದಲು ಆಮಚೂರ್ ಪೌಡರ್ (ಹುಳಿಪುಡಿ) ಬಳಸಬಹುದು. 


Click here for English version

ಭಾನುವಾರ, ಸೆಪ್ಟೆಂಬರ್ 20, 2020

ಬೀಟ್ರೂಟ್ ಬರ್ಫಿ

ತರಕಾರಿ ಬಳಸಿ ತಯಾರಿಸುವ ಸಿಹಿ ತಿಂಡಿಗಳಲ್ಲಿ ಬೀಟ್ರೂಟ್ ಬರ್ಫಿಯೂ ಒಂದು. ನಮ್ಮ ಮನೆಯಲ್ಲಿ ಮಕ್ಕಳಿಗೆ ಕೈಗೆ ಅಂಟದ ತಿಂಡಿಗಳು ಇಷ್ಟ. ಚಂದದ ಬಣ್ಣದೊಂದಿಗೆ ರುಚಿಕರವಾಗಿರುವ ಈ ಬರ್ಫಿ ಸಾಮಾನ್ಯವಾಗಿ ಎಲ್ಲರಿಗೂ ಇಷ್ಟವಾಗುತ್ತದೆ. ಬೀಟ್ರೂಟ್ ಬರ್ಫಿ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:



ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು 

ಡಿಫಿಕಲ್ಟಿ ಲೆವೆಲ್: ಕಷ್ಟಕರ 

ಸರ್ವಿಂಗ್ಸ್: ಈ ಅಳತೆಯಿಂದ 12 ಬರ್ಫಿಗಳನ್ನು ತಯಾರಿಸಬಹುದು 


ಬೇಕಾಗುವ ಸಾಮಗ್ರಿಗಳು:

ಬೀಟ್ ರೂಟ್ ತುರಿದದ್ದು - 1 ಕಪ್ 

ತೆಂಗಿನತುರಿ - 1 ಕಪ್ 

ಸಕ್ಕರೆ - 1 ಕಪ್ 

ತುಪ್ಪ - 3 ಟೇಬಲ್ ಚಮಚ 

ಏಲಕ್ಕಿ ಪುಡಿ - 1/2 ಟೀ ಚಮಚ 


ತಯಾರಿಸುವ ವಿಧಾನ: 

  • ತೆಂಗಿನ ತುರಿಯನ್ನು ಮಿಕ್ಸಿ ಅಥವಾ ಬ್ಲೆಂಡರ್ ನಲ್ಲಿ 2 - 3 ಸೆಕೆಂಡ್ ತಿರುವಿ ತರಿಯಾಗಿ ಮಾಡಿಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆಯನ್ನು ಬಿಸಿಗಿಟ್ಟು 2 ಟೇಬಲ್ ಚಮಚದಷ್ಟು ತುಪ್ಪ, ಬೀಟ್ ರೂಟ್ ತುರಿ ಸೇರಿಸಿ ಎರಡು ನಿಮಿಷ ಅಥವಾ ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ. 
  • ನಂತರ ಈ ಮಿಶ್ರಣಕ್ಕೆ ತೆಂಗಿನತುರಿ, ಸಕ್ಕರೆ ಸೇರಿಸಿ ಮಾಧ್ಯಮ ಉರಿಯಲ್ಲಿ ಮಿಶ್ರಣ ಗಟ್ಟಿಯಾಗುವತನಕ ಕೈಯಾಡಿಸುತ್ತಿರಿ. 
  • ಮಿಶ್ರಣ ಗಟ್ಟಿಯಾಗಿ ಪಾತ್ರೆಯ ಅಂಚು ಬಿಟ್ಟು, ಮುದ್ದೆಯಂತೆ ಆಗತೊಡಗಿದಾಗ ಇದಕ್ಕೆ ಒಂದು ಟೇಬಲ್ ಚಮಚದಷ್ಟು ತುಪ್ಪ ಸೇರಿಸಿ.  ಬರ್ಫಿ ಮಿಶ್ರಣ ಗಟ್ಟಿಯಾಗುವ ಹದ ಬರಲು ನನಗೆ ಸುಮಾರು 30 ನಿಮಿಷ ತೆಗೆದುಕೊಂಡಿದೆ. ಹೆಚ್ಚು ಬರ್ಫಿ ತಯಾರಿಸುವುದಾದರೆ ಇನ್ನೂ ಸ್ವಲ್ಪ ಹೆಚ್ಚು ಸಮಯ ಬೇಕಾಗುತ್ತದೆ. 
  • ಬರ್ಫಿ ಮಿಶ್ರಣ ತಳ ಬಿಟ್ಟು, ಕೈಯಾಡಿಸಲು ತುಂಬಾ ಗಟ್ಟಿ ಎನ್ನಿಸುವಂತಾದಾಗ ಏಲಕ್ಕಿ ಪುಡಿ ಸೇರಿಸಿ ಮಿಕ್ಸ್ ಮಾಡಿ ಇದನ್ನು ಜಿಡ್ಡು ಸವರಿದ ಪ್ಲೇಟ್ ಮೇಲೆ ಹರವಿ. 
  • ಬರ್ಫಿ ಮಿಶ್ರಣ ಬೆಚ್ಚಗಿರುವಾಗಲೇ ಬೇಕಾದ ಆಕಾರಕ್ಕೆ ಕತ್ತರಿಸಿ, ಪೂರ್ತಿ ತಣ್ಣಗಾದ ನಂತರ ಪ್ಲೇಟ್ ನಿಂದ ತೆಗೆಯಿರಿ. 


Click here for English version

ಸೋಮವಾರ, ಆಗಸ್ಟ್ 17, 2020

ಬ್ರೋಕ್ಲಿ - ಆಲೂಗಡ್ಡೆ ಕಟ್ಲೆಟ್ | ಬ್ರಾಕ್ಲಿ - ಆಲೂ ಕಟ್ಲೆಟ್ | ಬ್ರಾಕ್ಲಿ ಟಿಕ್ಕಿ

ನಮ್ಮ ಮನೆಯಲ್ಲಿ ಎಲ್ಲರಿಗೂ ಪ್ರಿಯವಾದ ತರಕಾರಿಗಳಲ್ಲಿ ಬ್ರೋಕ್ಲಿ ಅಥವಾ ಬ್ರಾಕ್ಲಿಯೂ ಒಂದು. ಕೆಲವರಿಗೆ ಇದರ ವಾಸನೆ ಸಹ್ಯವಾಗುವುದಿಲ್ಲ ಎನ್ನುವುದನ್ನು ಕೇಳಿದ್ದೇನೆ ನಾನು. ಆದರೆ ನಮಗಂತೂ ಬ್ರಾಕ್ಲಿಯಿಂದ ತಯಾರಿಸುವ ಎಲ್ಲ ಬಗೆಯ ತಿನಿಸುಗಳೂ ಇಷ್ಟವಾಗುತ್ತವೆ. 
ಈಗ ಮೂರು ವರ್ಷಗಳ ಹಿಂದೆ ಊರಿನಿಂದ ನನ್ನ ಅಮ್ಮ - ಅಪ್ಪ ಬಂದಾಗ, ನಾವು ತರಕಾರಿ ತರುವಾಗ ಅವರಿಗೆ ಇಷ್ಟವಾಗುವುದೋ ಇಲ್ಲವೋ ಎಂದು ಯೋಚಿಸಿ ಯೋಚಿಸಿ ತರುತ್ತಿದ್ದೆವು. ತರಕಾರಿಗಳನ್ನು ತರಲು ಮಾರ್ಕೆಟ್ ಗೆ ಹೋದರೆ ನನ್ನಮ್ಮನ ಕಣ್ಣುಗಳು ಊರಲ್ಲಿ ಸಿಗುವ ತರಕಾರಿಗಳನ್ನೇ ಹುಡುಕುತ್ತಿದ್ದವು! ಅದು ಹೇಗೋ ಗೊತ್ತಿಲ್ಲ, ಬ್ರಾಕ್ಲಿ ಅವರಿಗೆ ಬಹಳವೇ ಇಷ್ಟವಾಗಿಬಿಟ್ಟಿತ್ತು. ಬ್ರಾಕ್ಲಿ ಪಲ್ಯವನ್ನು ಅವರೇ ವಾರದಲ್ಲಿ 2 - 3 ಬಾರಿ ತಯಾರಿಸುತ್ತಿದ್ದರು.  
ನಾನು ಈಗ ಹೇಳ ಹೊರಟಿರುವುದು ಬ್ರಾಕ್ಲಿ ಬಳಸಿ ತಯಾರಿಸುವ ಕಟ್ಲೆಟ್ ಬಗ್ಗೆ. ಈ ಕಟ್ಲೆಟ್ ಬೆಳಗ್ಗಿನ ಉಪಾಹಾರ, ಮಕ್ಕಳ ಲಂಚ್ ಬಾಕ್ಸ್, ಸ್ನ್ಯಾಕ್ಸ್, ಸ್ಟಾರ್ಟರ್ ಎಲ್ಲಕ್ಕೂ ಚೆನ್ನಾಗಿರುತ್ತದೆ. ಬ್ರಾಕ್ಲಿ - ಆಲೂ ಕಟ್ಲೆಟ್ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:  


ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
  • ಬ್ರೋಕ್ಲಿ ಚೂರುಗಳು - 2ಕಪ್ ನಷ್ಟು 
  • ಆಲೂಗಡ್ಡೆ - 1 ಮೀಡಿಯಮ್ ಸೈಜಿನದು
  • ಚಾಟ್ ಮಸಾಲಾ ಪೌಡರ್ - 1 ಟೀ ಸ್ಪೂನ್
  • ಹಸಿಮೆಣಸು - 2 (ಖಾರಕ್ಕೆ ತಕ್ಕಂತೆ)
  • ಈರುಳ್ಳಿ - 1 ಚಿಕ್ಕದು 
  • ಆಮಚೂರ್ ಪೌಡರ್ / ನಿಂಬೆರಸ - 1/2 ಟೀ ಸ್ಪೂನ್
  • ಉಪ್ಪು - ರುಚಿಗೆ ತಕ್ಕಷ್ಟು
  • ಬ್ರೆಡ್ ಕ್ರಂಬ್ಸ್ - 1 ಕಪ್ ಅಥವಾ ಬೇಕಾದಷ್ಟು 
  • ಎಣ್ಣೆ - ಕಟ್ಲೆಟ್ ಬೇಯಿಸಲು

ತಯಾರಿಸುವ ವಿಧಾನ: 
  • ಆಲೂಗಡ್ಡೆಯನ್ನು ಮೆತ್ತಗೆ ಬೇಯಿಸಿಕೊಳ್ಳಿ. ನಾನು ಪ್ರೆಶರ್ ಕುಕ್ಕರ್ ನಲ್ಲಿ ಎರಡು ವಿಸಿಲ್ ಆಗುವವರೆಗೆ ಬೇಯಿಸಿದ್ದೇನೆ.
  • ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ.
  • ಹಸಿಮೆಣಸನ್ನು ಜಜ್ಜಿ ಪೇಸ್ಟ್ ಮಾಡಿಕೊಳ್ಳಿ.
  • ತೊಳೆದ ಬ್ರೋಕ್ಲಿ ಪೀಸ್ ಗಳನ್ನು ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಅದಕ್ಕೆ ಒಂದು ಟೀ ಸ್ಪೂನ್ ನಷ್ಟು ಉಪ್ಪು ಸೇರಿಸಿ. ಇದಕ್ಕೆ 4 ಕಪ್ ನಷ್ಟು ಬಿಸಿಬಿಸಿ ನೀರು ಸೇರಿಸಿ 5 ನಿಮಿಷ ಬಿಡಿ. 
  • ನಂತರ ನೀರನ್ನು ಪೂರ್ತಿ ಸೋಸಿ ತೆಗೆದು ಬ್ರೋಕ್ಲಿ ಪೀಸ್ ಗಳನ್ನು ಒಂದು ದಪ್ಪನೆಯ ಟಿಷ್ಯು ಪೇಪರ್ ನ ಮೇಲೆ 4 - 5 ನಿಮಿಷ ಹರವಿ ನೀರು ಆರಲು ಬಿಡಿ.
  • ಬ್ರೋಕ್ಲಿ ಪೀಸ್ ಗಳನ್ನು ಮಿಕ್ಸಿ / ಬ್ಲೆಂಡರ್ ನಲ್ಲಿ ಒಮ್ಮೆ ತಿರುವಿ ತರಿತರಿ ಆಗುವಂತೆ ಮಾಡಿಕೊಳ್ಳಿ.
  • ಬೇಯಿಸಿದ ಆಲೂಗಡ್ಡೆಯ ಸಿಪ್ಪೆ ತೆಗೆದು ಮ್ಯಾಶ್ ಮಾಡಿಕೊಳ್ಳಿ.
  • ನಂತರ ಮಿಕ್ಸಿಂಗ್ ಬೌಲ್ ನಲ್ಲಿ ಬ್ರೋಕ್ಲಿ, ಮ್ಯಾಶ್ ಮಾಡಿದ ಆಲೂಗಡ್ಡೆ, ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನ ಪೇಸ್ಟ್, ಚಾಟ್ ಮಸಾಲಾ ಪೌಡರ್, ಆಮಚೂರ್ ಪೌಡರ್ / ನಿಂಬೆರಸ, ರುಚಿಗೆ ತಕ್ಕಷ್ಟು ಉಪ್ಪು ಇಷ್ಟನ್ನೂ ಸೇರಿಸಿ ಮಿಕ್ಸ್ ಮಾಡಿ.
  • ಇದಕ್ಕೆ 2 - 3 ಟೇಬಲ್ ಚಮಚದಷ್ಟು ಬ್ರೆಡ್ ಕ್ರಂಬ್ಸ್ ಸೇರಿಸಿ ಮಿಕ್ಸ್ ಮಾಡಿ. 
  • ತಯಾರಾದ ಹಿಟ್ಟಿನಿಂದ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿ ಅಂಗೈಯಲ್ಲಿ ಅಗಲವಾಗಿ ತಟ್ಟಿ. 
  • ಎಲ್ಲ ಉಂಡೆಗಳನ್ನೂ ಹೀಗೆಯೇ ಮಾಡಿಕೊಂಡು ಬ್ರೆಡ್ ಕ್ರಂಬ್ಸ್ ನಲ್ಲಿ ಒಮ್ಮೆ ಹೊರಳಿಸಿ, ಕಾದ ತವಾದ ಮೇಲೆ ಎಣ್ಣೆ ಹಾಕಿ ಎರಡೂ ಕಡೆ ಹೊಂಬಣ್ಣಕ್ಕೆ ಬೇಯಿಸಿ(ಶಾಲೋ ಫ್ರೈ).  
  • ಬಿಸಿ ಬಿಸಿ ಕಟ್ಲೆಟ್ ನ್ನು ಟೊಮ್ಯಾಟೋ ಸಾಸ್ ಅಥವಾ ಚಟ್ನಿಯೊಡನೆ ಸರ್ವ್ ಮಾಡಿ. 

ಟಿಪ್ಸ್:
  • ಖಾರಕ್ಕೆ ಹಸಿಮೆಣಸಿನ ಬದಲು ಮೆಣಸಿನ ಪುಡಿ ಬಳಸಬಹುದು

ಸೋಮವಾರ, ಜೂನ್ 29, 2020

ಪುದೀನಾ ಎಲೆಯ ತೊಕ್ಕು | ತೆಂಗಿನತುರಿ ಹಾಕದ ಪುದೀನಾ ಚಟ್ನಿ

ನಮ್ಮ ಮನೆಯಲ್ಲಿ ಎಲ್ಲರಿಗೂ ಊಟಕ್ಕೆ ಮೇಲೋಗರದ ಜೊತೆಗೆ ಚಟ್ನಿ, ಗೊಜ್ಜು, ತೊಕ್ಕು ಇತ್ಯಾದಿ ಅನ್ನಕ್ಕೆ ಕಳಸಿಕೊಳ್ಳುವ ಅಥವಾ ನೆಂಜಿಕೊಳ್ಳಬಹುದಾದ ಸೈಡ್ ಡಿಶ್ ಗಳು ಇಷ್ಟ. ಹೀಗಾಗಿ ಬಗೆಬಗೆಯ ಗೊಜ್ಜು, ತೊಕ್ಕು, ಉಪ್ಪಿನಕಾಯಿ ಇವೆಲ್ಲ ನಮ್ಮ ಅಡುಗೆಮನೆಯಲ್ಲಿ ಯಾವಾಗಲೂ ಇರುತ್ತವೆ. ಒಮ್ಮೊಮ್ಮೆ ಅಡುಗೆ ಮಾಡಲು ಜಾಸ್ತಿ ಸಮಯ ಇಲ್ಲದಿದ್ದಾಗ ಅಥವಾ ಬೋರ್ ಆದಾಗ ಇವು ಊಟದ ರುಚಿ ಹೆಚ್ಚಿಸುತ್ತವೆ. 
ನಾವು ಕಳೆದ ವರ್ಷ ಊರಿಗೆ ಹೋದಾಗ ಪುದೀನಾ ತೊಕ್ಕು ತಯಾರಿಸುವ ವಿಧಾನವನ್ನು ಕಲಿತಿದ್ದೆ. ಈಗ ಪಾಟ್ ನಲ್ಲಿರುವ ಪುದೀನಾ ಗಿಡ ಚೆನ್ನಾಗಿ ಎಲೆ ಬಿಡುವುದೇ ತಡ, ಪುದೀನಾ ತೊಕ್ಕು ತಯಾರಿಸುವ ನೆನಪಾಗುತ್ತದೆ. ಉಪ್ಪು, ಹುಳಿ, ಖಾರದೊಂದಿಗೆ ರುಚಿಕಟ್ಟಾದ ಈ ತೊಕ್ಕು ಅನ್ನ, ದೋಸೆ, ಚಪಾತಿ ಇವೆಲ್ಲದರೊಡನೆಯೂ ಚೆನ್ನಾಗಿರುತ್ತದೆ. 


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಸರ್ವಿಂಗ್ಸ್: 20 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
  • ಪುದೀನಾ ಎಲೆಗಳು - 50 ಗ್ರಾಂ 
  • ಒಣಮೆಣಸು - 50 ಗ್ರಾಂ
  • ಸಿಪ್ಪೆ ತೆಗೆದ ಬೆಳ್ಳುಳ್ಳಿ - 50 ಗ್ರಾಂ
  • ಹುಣಸೆಹಣ್ಣು - 50 ಗ್ರಾಂ
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಬೆಲ್ಲ / ಸಕ್ಕರೆ - 1/2 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ನೀರು - 1/4 ಕಪ್ (ಬೇಕಿದ್ದರೆ)
 - ಒಗ್ಗರಣೆಗೆ:
  • ಎಣ್ಣೆ - 5ರಿಂದ 6 ಟೇಬಲ್ ಚಮಚ 
  • ಸಾಸಿವೆ - 1 ಟೀ ಚಮಚ 

ತಯಾರಿಸುವ ವಿಧಾನ:
  • ಬ್ಲೆಂಡರ್ ಅಥವಾ ಮಿಕ್ಸಿ ಜಾರ್ ನಲ್ಲಿ ಪುದೀನಾ ಎಲೆಗಳು, ಒಣಮೆಣಸು, ಬೆಳ್ಳುಳ್ಳಿ, ಹುಣಸೆಹಣ್ಣು ಇಷ್ಟನ್ನೂ ರುಬ್ಬಿ ನುಣ್ಣಗಿನ ಪೇಸ್ಟ್ ತಯಾರಿಸಿಕೊಳ್ಳಿ. ರುಬ್ಬುವಾಗ ಸ್ವಲ್ಪ ನೀರು ಬೇಕಿದ್ದರೆ ಸೇರಿಸಿ, ಆದರೆ ಮಿಶ್ರಣವನ್ನು ಆದಷ್ಟೂ ಗಟ್ಟಿ ಇದ್ದರೆ ಉತ್ತಮ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಒಗ್ಗರಣೆಗೆ ಎಣ್ಣೆ ಬಿಸಿಮಾಡಿ ಸಾಸಿವೆ ಸೇರಿಸಿ. 
  • ಸಾಸಿವೆ ಸಿಡಿಯತೊಡಗಿದಾಗ ರುಬ್ಬಿದ ಪುದೀನಾ ಮಿಶ್ರಣವನ್ನು ಒಗ್ಗರಣೆ ಬಾಣಲಿಗೆ ನಿಧಾನವಾಗಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ರುಚಿಗೆ ತಕ್ಕಷ್ಟು ಉಪ್ಪು, ಬೆಲ್ಲ / ಸಕ್ಕರೆ ಯನ್ನೂ ಸೇರಿಸಿ. 
  • ತೊಕ್ಕು ಮಿಶ್ರಣವನ್ನು ನೀರಿನಂಶ ಆರಿ ದಪ್ಪಗಾಗುವವರೆಗೆ ಕುದಿಸಿ. ತಳ ಹಿಡಿಯದಂತೆ ಆಗಾಗ ಕೈಯಾಡಿಸುತ್ತಿರಿ. 
  • ಮಿಶ್ರಣ ಗಟ್ಟಿಯಾಗಿ ತಳ ಬಿಡತೊಡಗಿದಾಗ ಉರಿ ಆಫ್ ಮಾಡಿ, ಮಿಶ್ರಣ ತಣ್ಣಗಾಗಲು ಬಿಡಿ. 
  • ತೊಕ್ಕು ಮಿಶ್ರಣ ಪೂರ್ತಿ ತಣ್ಣಗಾದ ನಂತರ ಇದನ್ನು ಗಾಳಿಯಾಡದ ಜಾರ್ ನಲ್ಲಿ ಹಾಕಿಡಿ. ಈ ತೊಕ್ಕು ರೂಮ್ ಟೆಂಪರೇಚರ್ ನಲ್ಲಿ 3 - 4 ದಿನ ಚೆನ್ನಾಗಿರುತ್ತದೆ. ಫ್ರಿಜ್ ನಲ್ಲಾದರೆ ತಿಂಗಳುಗಟ್ಟಲೆ ಇಡಬಹುದು. 
  • ಉಪ್ಪು, ಹುಳಿ, ಖಾರದೊಂದಿಗೆ ರುಚಿಕಟ್ಟಾದ ಈ ತೊಕ್ಕು ಅನ್ನ, ದೋಸೆ, ಚಪಾತಿ ಇವೆಲ್ಲದರೊಡನೆಯೂ ಚೆನ್ನಾಗಿರುತ್ತದೆ.  


ಟಿಪ್ಸ್:
  • ಹುಳಿ ಜಾಸ್ತಿ ಬೇಡ ಎಂದರೆ ಕಡಿಮೆ ಹುಣಸೆಹಣ್ಣು ಬಳಸಿ. 


Related Posts Plugin for WordPress, Blogger...