Here are some recipes which I came across through the net, books, so on and few are my own experiments..

Friday, 1 July 2011

ಕುಕ್ಕರ್ ನಲ್ಲಿ ತಯಾರಿಸಬಹುದಾದ ಎಗ್ ಲೆಸ್ ಕೇಕ್ / Eggless cake in pressure cooker

Click here for English version.

ನಾವೆಲ್ಲಾ ಚಿಕ್ಕವರಿದ್ದಾಗ ಕೇಕ್ ಇತ್ಯಾದಿ ಬೇಕರಿ ತಿಂಡಿಗಳನ್ನು ಮನೆಗೆ ತರುತ್ತಿದ್ದುದು ಬಹಳ ಅಪರೂಪ. ಮನೆಯಲ್ಲಿ ಎಷ್ಟೇ ಚೆನ್ನಾಗಿ ಬೇರೆ ತಿಂಡಿಗಳನ್ನು ಮಾಡಿಕೊಟ್ಟರೂ ಅಂಗಡಿಯಿಂದ ತಂದ ತಿಂಡಿಗಳ ಮೇಲಿನ ಪ್ರೀತಿ ಒಂದು ಕೈ ಜಾಸ್ತಿ! ನನ್ನ ಅಮ್ಮ ಒಮ್ಮೆ ಯಾರೋ ನೆಂಟರ ಮನೆಗೆ ಹೋದಾಗ ಕುಕ್ಕರ್ ಉಪಯೋಗಿಸಿ ಕೇಕ್ ಮಾಡುವುದನ್ನು ಕಲಿತುಕೊಂಡು ಬಂದರು. ಅಂದಿನಿಂದ ಮನೆಯಲ್ಲಿ ನಮಗೆ ಬೇಕೆನಿಸಿದಾಗಲೆಲ್ಲ ಕೇಕ್! ಅದರಲ್ಲೂ ಸ್ವಲ್ಪ ಸ್ವಲ್ಪವೇ ಹಿಟ್ಟಿಗೆ ಬೇರೆ ಬೇರೆ ಬಣ್ಣ ಸೇರಿಸಿ ಬಣ್ಣಬಣ್ಣದ ಕೇಕ್ ಮಾಡಿದರೆ ಎಷ್ಟೊಂದು ಖುಷಿ ನಮಗೆ :) ನಂತರದ ದಿನಗಳಲ್ಲಿ ಆ ಕೇಕ್ ಗೆ ಬೇರೆ ಬೇರೆ ಫ್ಲೇವರ್ ಗಳನ್ನು ಸೇರಿಸಿ ನೋಡಿದ್ದಾಯಿತು. ಜೊತೆಗೆ ಒಂದಿಷ್ಟು ಡ್ರೈ ಫ್ರೂಟ್ಸ್ ಸೇರಿಸುವುದು, ಇತ್ಯಾದಿ. ಇಷ್ಟು ವರ್ಷಗಳು ಕಳೆದರೂ ಆ ಕೇಕ್ ನ ಸಂತತಿ ನಮ್ಮ ಮನೆಯಲ್ಲಿ ಮುಂದುವರಿಯುತ್ತಲೇ ಇದೆ..
ಹಿಂದಿನ ವಾರ ಒಂದು ದಿನ ಈ ಕೇಕ್ ಮಾಡುವ ನೆನಪಾಯಿತು. ಆದರೆ ನನ್ನ ಬಳಿ ಕುಕ್ಕರ್ ನಲ್ಲಿ ಇಡುವ ಅಗಲವಾದ ಪಾತ್ರೆ ಇರಲಿಲ್ಲ. ಹೀಗಾಗಿ ಫಸ್ಟ್  ಟೈಮ್ ಈ ಕೇಕ್ ನ್ನು ಓವನ್ ನಲ್ಲಿ ಟ್ರೈ ಮಾಡಿದೆ. ಕೇಕ್ ಬಹಳ ಚೆನ್ನಾಗಿ ಬಂತು. ಆದರೆ ಇದಕ್ಕೆ ಓವನ್ ಬೇಕೆಂದೇ ಇಲ್ಲ, ಆರಾಮಾಗಿ ಕುಕ್ಕರ್ ನಲ್ಲಿಯೂ ಮಾಡಬಹುದು. ಒಂದೇ ವ್ಯತ್ಯಾಸವೆಂದರೆ ಓವನ್ ನಲ್ಲಿ ಮಾಡಿದಾಗ ಕೇಕ್ ನ ತಳಭಾಗದ ಬಣ್ಣ ಬದಲಾಗುವುದಿಲ್ಲ, ಕುಕ್ಕರ್ ನಲ್ಲಿ ಮಾಡಿದಾಗ ಕೇಕ್ ನ ತಳ ನಸುಗಂದು ಬಣ್ಣಕ್ಕೆ ಬಂದಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 1 1/4 ಘಂಟೆ
ಈ ಅಳತೆಯಿಂದ ಒಂದು ರೌಂಡ್ ಕೇಕ್ ತಯಾರಿಸಬಹುದು

ಕೇಕ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು:
ಮೈದಾಹಿಟ್ಟು - 2 ಕಪ್
ಸಕ್ಕರೆ ಹಿಟ್ಟು - 1 ಕಪ್
ಮಿಲ್ಕ್ ಪೌಡರ್ - 1 ಕಪ್
ಬೆಣ್ಣೆ - ನಿಂಬೆಗಾತ್ರದಷ್ಟು 
ಬೇಕಿಂಗ್ ಪೌಡರ್ - 1 ಟೀ ಚಮಚ 
ಅಡಿಗೆ ಸೋಡಾ - 1 / 2 ಟೀ ಚಮಚ
ಹಾಲು - 2 ಕಪ್
ದಾಲ್ಚಿನ್ನಿ ಪುಡಿ - 1 ಟೀ ಚಮಚ (ಅಥವಾ ವೆನಿಲ್ಲಾ ಎಸೆನ್ಸ್ ಬಳಸಬಹುದು)
 
ಮಾಡುವ ವಿಧಾನ:
ಮೈದಾಹಿಟ್ಟು ಮತ್ತು ಬೇಕಿಂಗ್ ಪೌಡರ್ ನ್ನು ಒಟ್ಟಿಗೆ ಸೇರಿಸಿ ಜರಡಿಯಾಡಿಕೊಳ್ಳಿ.  
ಸಕ್ಕರೆ ಹಿಟ್ಟು, ಮೈದಾಹಿಟ್ಟು, ಮಿಲ್ಕ್ ಪೌಡರ್ - ಇಷ್ಟನ್ನೂ ಸೇರಿಸಿ ಕೈಯಿಂದ ಮಿಕ್ಸ್ ಮಾಡಿಕೊಳ್ಳಿ. 
ಬೆಣ್ಣೆಯನ್ನು ಸ್ವಲ್ಪವೇ ಬಿಸಿಮಾಡಿ ಕರಗಿಸಿಕೊಳ್ಳಿ. ಇದನ್ನು ಹಿಟ್ಟಿನ ಮಿಶ್ರಣಕ್ಕೆ ಸೇರಿಸಿ ಚೆನ್ನಾಗಿ ಕಲಸಿ. ನಂತರ ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ಹಾಲು ಸೇರಿಸುತ್ತ ಗಂಟಿಲ್ಲದಂತೆ ದೋಸೆ ಹಿಟ್ಟಿನ ಹದಕ್ಕೆ ಕಲಸಿ. ಹಿಟ್ಟನ್ನು ಕಲಸುವಾಗ ಮುಖ್ಯವಾಗಿ ಅನುಸರಿಸಬೇಕಾದ ಅಂಶವೆಂದರೆ, ಹಿಟ್ಟನ್ನು ಒಂದೇ ನೇರದಲ್ಲಿ ಕಲಸಬೇಕು.
ಕೊನೆಯಲ್ಲಿ ಇದಕ್ಕೆ ಅಡಿಗೆ ಸೋಡಾ ಮತ್ತು ದಾಲ್ಚಿನ್ನಿ ಪುಡಿ ಅಥವಾ ವೆನಿಲ್ಲಾ ಎಸೆನ್ಸ್ ಸೇರಿಸಿ ಕಲಸಿ, ಜಿಡ್ಡು ಸವರಿದ ಅಗಲವಾದ ಪಾತ್ರೆಗೆ ಒಂದೇ ನೇರದಲ್ಲಿ ಹಾಕಿ. ಮೇಲಿನಿಂದ ಡ್ರೈ ಫ್ರೂಟ್ಸ್ ಬೇಕಿದ್ದರೆ ಸೇರಿಸಿ. ಅಲಂಕಾರಿಕವಾಗಿ ಹಾಕಬೇಕೆಂದೇನೂ ಇಲ್ಲ; ಏಕೆಂದರೆ ಬೇಯುವಷ್ಟರಲ್ಲಿ ಅವೆಲ್ಲ ಕೇಕ್ ನ ಒಳಗಡೆ ಸೇರಿಕೊಂಡುಬಿಟ್ಟಿರುತ್ತವೆ.
 

  
- ಕುಕ್ಕರ್ ನಲ್ಲಿ ಬೇಯಿಸುವುದಾದರೆ:
ತಯಾರಿಸಿದ ಹಿಟ್ಟನ್ನು ಕುಕ್ಕರ್ ನಲ್ಲಿ ಇಡಬಹುದಾದ ಅಗಲ ತಳದ ಪಾತ್ರೆಗೆ ಹಾಕಿಕೊಳ್ಳಿ. 
ಕುಕ್ಕರ್ ನ್ನು ನೀರು ಹಾಕದೆ ಕಾಯಲಿಟ್ಟು ಅದರಲ್ಲಿ ಹಿಟ್ಟು ಹಾಕಿದ ಪಾತ್ರೆಯನ್ನಿಟ್ಟು ಭದ್ರವಾಗಿ ಕುಕ್ಕರ್ ಮುಚ್ಚಳ ಮುಚ್ಚಿ. ಆದರೆ ಕುಕ್ಕರ್ ಗೆ ವೇಯ್ಟ್ ಹಾಕದೆ, ಆ ಜಾಗದಲ್ಲಿ ಒಂದು ತಟ್ಟೆಯನ್ನು ಬೋರಲು ಹಾಕಿ.
 

ಒಲೆಯ ಉರಿಯನ್ನು ಬಹಳ ಕಡಿಮೆ, ಅಂದರೆ ಸಿಮ್ ನಲ್ಲಿಡಿ. ಕೇಕ್ ಬೇಯಲು 40 ರಿಂದ 45 ನಿಮಿಷದಷ್ಟು ಸಮಯ ಬೇಕಾಗುತ್ತದೆ.
ಕುಕ್ಕರ್ ನ ತಳಕ್ಕೆ ನೀರು ಹಾಕಿಲ್ಲ; ಸೀದುಹೋಗಬಹುದೆನ್ನುವ ಹೆದರಿಕೆ ಬೇಡ. ಕಡಿಮೆ ಉರಿಯಲ್ಲಿ ಬೇಯಿಸುವುದರಿಂದ ಹಾಗಾಗುವ ಸಂಭವ ಬಹಳ ಕಡಿಮೆ.  
ಕುಕ್ಕರ್ ಗೆ ವೇಯ್ಟ್ ಹಾಕಿಲ್ಲದ ಕಾರಣ ನಿಮಗೆ ಬೇಕಾದಾಗ ಮುಚ್ಚಳ ತೆರೆದು ನೋಡಬಹುದು. 30 - 35 ನಿಮಿಷ ಬೇಯಿಸಿದ ನಂತರ ಒಮ್ಮೆ ಮುಚ್ಚಳ ತೆರೆದು ಒಂದು ಚಾಕು ಅಥವಾ ಕಡ್ಡಿಯನ್ನು ಕೇಕ್ ನೊಳಗೆ ತಳದವರೆಗೆ ಹಾಕಿ ನೋಡಿ. ಹಿಟ್ಟು ಚಾಕುವಿಗೆ ಅಂಟಿಕೊಳ್ಳದಿದ್ದರೆ ಕೇಕ್ ಬೆಂದಿದೆಯೆಂದರ್ಥ.
 
- ಓವನ್ ನಲ್ಲಿ ಬೇಯಿಸುವುದಾದರೆ:
ಜಿಡ್ಡು ಸವರಿದ ಬೇಕಿಂಗ್ ಪಾತ್ರೆಗೆ ಹಿಟ್ಟನ್ನು ವರ್ಗಾಯಿಸಿಕೊಳ್ಳಿ. 350 F ಗೆ ಪ್ರೀಹೀಟ್ ಮಾಡಿದ ಓವನ್ ನಲ್ಲಿ ಇದನ್ನು 50 - 55 ನಿಮಿಷ ಬೇಯಿಸಿ. ಆಗಾಗ್ಗೆ ಕೇಕ್ ಬೆಂದಿದೆಯೇ ಎಂದು ಪರೀಕ್ಷಿಸುತ್ತಿರಿ.

ತಯಾರಾದ ಕೇಕ್ ನ್ನು ಸ್ವಲ್ಪ ಸಮಯ ತಣ್ಣಗಾಗಲು ಬಿಟ್ಟು, ನಂತರ ಒಂದು ಪ್ಲೇಟ್ ಮೇಲೆ ಕೇಕ್ ಮಾಡಿದ ಪಾತ್ರೆಯನ್ನು ಬೋರಲು ಹಾಕಿ, ಕೇಕ್ ನ್ನು ಪಾತ್ರೆಯಿಂದ ಹೊರತೆಗೆಯಿರಿ.
 

ಐಸಿಂಗ್:
ಐಸಿಂಗ್ ಮಾಡುವುದಾದರೆ ಕೇಕ್ ಪೂರ್ತಿ ತಣ್ಣಗಾದ ನಂತರವೇ ಮಾಡಿ. ಇಲ್ಲದಿದ್ದರೆ ಐಸಿಂಗ್ ಎಲ್ಲ ಕರಗಿಬಿಡುತ್ತದೆ.
ಸ್ವಲ್ಪ ಬೆಣ್ಣೆ, ಕೊಕೋವಾ ಪೌಡರ್ ಮತ್ತು ಸ್ವಲ್ಪ ಸಿಹಿಯಾಗುವಷ್ಟು ಸಕ್ಕರೆ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ ಕ್ರೀಮ್ ನಂತೆ ಮಾಡಿಕೊಂಡು ಅದನ್ನು ಕೇಕ್ ಗೆ ಸವರಿಬಿಟ್ಟರೆ ಆಯಿತು, ಕೇಕ್ ತಿನ್ನಲು ಸಿದ್ಧ!


ಟಿಪ್ಸ್: 
  • ಕೊಕೋವಾ ಪೌಡರ್ ಬದಲು ಚಾಕೊಲೇಟ್ ಫ್ಲೇವರ್ ಉಳ್ಳ ಹಾರ್ಲಿಕ್ಸ್, ವಿನ್ನರ್ ಇತ್ಯಾದಿ ಯಾವುದಾದರೂ ಪುಡಿಯನ್ನು ಐಸಿಂಗ್ ಗೆ ಬಳಸಿದರೂ ಚೆನ್ನಾಗಿರುತ್ತದೆ.
  • ಇದಕ್ಕೆ ಫುಡ್ ಕಲರ್ ಬಳಸುವುದಾದರೆ ಹಿಟ್ಟಿನ ಮಿಶ್ರಣ ತಯಾರಾದ ನಂತರ ಅದನ್ನು ಪಾಲು ಮಾಡಿ 2 - 3 ಬೌಲ್ ಗಳಿಗೆ ಹಾಕಿಕೊಳ್ಳಿ. ಒಂದೊಂದು ಬೌಲ್ ನ ಹಿಟ್ಟಿಗೆ ಒಂದೊಂದು ಬಣ್ಣ ಸೇರಿಸಿ ಕಲಸಿಕೊಳ್ಳಿ. ನಂತರ ಒಂದೊಂದೇ ಬೌಲ್ ನ ಹಿಟ್ಟನ್ನು ಬೇಕಿಂಗ್ ಟ್ರೇಗೆ ಸಮನಾಗಿ ಹರವಿ, ವಿವಿಧ ಬಣ್ಣಗಳ ಲೇಯರ್ ಗಳನ್ನು ಮಾಡಿ. ತಳದಲ್ಲಿ ಡಾರ್ಕ್ ಕಲರ್ ಬಳಸಿದರೆ ಕೇಕ್ ನ ಬುಡ ನಸುಗಂದು ಬಣ್ಣಕ್ಕೆ ಬಂದಿರುವುದು ಗೊತ್ತೇ ಆಗುವುದಿಲ್ಲ.
 

8 comments:

  1. hey masth aaydu kaanthe, photos raashi chalo baindu!!

    ReplyDelete
  2. Very useful article..will try

    ReplyDelete
  3. cholo aadahange kantu,yanagu mada kanata iddu.thanks.

    sangeeta

    ReplyDelete
  4. Sangeeta, try madi hengittu helu :)

    ReplyDelete
  5. Naanu maadidde. Baal mast aagittu.... so e sala nan friend birthday ge naane maneli prepare madoke decide maadidini.:)

    ReplyDelete
    Replies
    1. Tumba khushi aytu nimma comment nodi..thanks for the feedback :)

      Delete

Hi, Thanks for dropping in. I will be happy to hear your feedback :)

Related Posts Plugin for WordPress, Blogger...