Here are some recipes which I came across through the net, books, so on and few are my own experiments..

Wednesday, 30 May 2012

ಸಾಂಬಾರ್ ಸೌತೆ ಪಲ್ಯ (ಕೊಚ್ಚುಳಿ) / Madras Cucumber Palya (Kochchuli)

Click here for English version.

ಮಲೆನಾಡಿನ ಕಡೆ ತಯಾರಿಸುವ ವಿವಿಧ ಪಲ್ಯಗಳಲ್ಲಿ ಇದೂ ಒಂದು. ಮಾಡರ್ನ್ ಅಡಿಗೆಗಳ ನಡುವೆ ಮರೆತೇ ಹೋಗುತ್ತಿರುವ ಈ ಪಲ್ಯದ ಸಾಂಪ್ರದಾಯಿಕ ಹೆಸರು 'ಕೊಚ್ಚುಳಿ'. ನನ್ನ ಅಮ್ಮನ ತವರುಮನೆಯಲ್ಲಿ ಇಂಥ ಹಲವು ಹಳೆಯ ಅಡಿಗೆಗಳು ಇನ್ನೂ ಚಾಲ್ತಿಯಲ್ಲಿವೆ. ಅಮ್ಮ ಈ ಬಾರಿ ನಮ್ಮ ಮನೆಗೆ ಬಂದಾಗ ಈ ಪಲ್ಯ ತಯಾರಿಸಿದ್ದರು. ರುಚಿ ನೋಡಿದ ತಕ್ಷಣವೇ ಅದರ ಫೊಟೋ ಕ್ಲಿಕ್ಕಿಸಿಕೊಂಡೆ ನಾನು! ಹಾಗೂ ಪಲ್ಯ ತಯಾರಿಸುವ ವಿಧಾನವನ್ನು ನೋಟ್ ಮಾಡಿಕೊಂಡೆ.
ಈ ಪಲ್ಯಕ್ಕೆ ಸಾಂಬಾರ್ ಸೌತೆಕಾಯಿಯ ಬದಲು ಸಾದಾ ಸೌತೆಕಾಯಿಯನ್ನೂ ಬಳಸಬಹುದು. ಸೌತೆಕಾಯಿ ತುಂಬಾ ಎಳಸಾಗಿದ್ದರೆ ಈ ಪಲ್ಯಕ್ಕೆ ಚೆನ್ನಾಗಿರುವುದಿಲ್ಲ. ಹಳ್ಳಿಗಳ ಕಡೆ ಸಿಗುವ ಮೊಗೆಕಾಯಿ (ಮಗೆಕಾಯಿ) ಹಾಗೂ ಚೆನ್ನಾಗಿ ಬಲಿತ ಉದ್ದದ ಸೌತೆಕಾಯಿ ಈ ಪಲ್ಯ ತಯಾರಿಸಲು ಬಹಳ ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ:  15 ನಿಮಿಷಗಳು 
ಸರ್ವಿಂಗ್ಸ್: 3 - 4 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
ಸಾಂಬಾರ್ ಸೌತೆ ಅಥವಾ ಮದ್ರಾಸ್ ಸೌತೆ - ಮೀಡಿಯಂ ಗಾತ್ರದ ಸೌತೆಕಾಯಿಯ ಅರ್ಧಭಾಗ 
ಒಣ ಮೆಣಸು - 1
ಹಸಿಮೆಣಸು - 2 
ನಿಂಬೆಹಣ್ಣು - ಅರ್ಧಭಾಗ 
ರುಚಿಗೆ ತಕ್ಕಷ್ಟು ಉಪ್ಪು 
ಒಗ್ಗರಣೆಗೆ: ಎಣ್ಣೆ - 3 ಚಮಚ, ಉದ್ದಿನಬೇಳೆ - 1/2 ಚಮಚ, ಸಾಸಿವೆ - 1/2 ಚಮಚ, ಒಂದು ದೊಡ್ಡ ಚಿಟಿಕೆ ಇಂಗು, ಕರಿಬೇವು - 1 ಎಸಳು 

ಮಾಡುವ ವಿಧಾನ:   
ಸೌತೆಕಾಯಿಯ ಬೀಜ ಮತ್ತು ಸಿಪ್ಪೆ ತೆಗೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸನ್ನು ಹೆಚ್ಚಿಟ್ಟುಕೊಳ್ಳಿ.
ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಒಣಮೆಣಸು, ಉದ್ದಿನಬೇಳೆ, ಸಾಸಿವೆ, ಇಂಗು ಹಾಕಿ ಚಟಪಟ ಎಂದಮೇಲೆ ಹಸಿಮೆಣಸು, ಕರಿಬೇವು ಸೇರಿಸಿ ಕೈಯಾಡಿಸಿ.
ನಂತರ ಇದಕ್ಕೆ ಹೆಚ್ಚಿದ ಸೌತೆಕಾಯಿ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ನಿಂಬೆರಸ ಸೇರಿಸಿ ಕೈಯಾಡಿಸಿ 3 - 4 ನಿಮಿಷ ಮುಚ್ಚಳ ಮುಚ್ಚದೆ ಬೇಯಿಸಿ, ಉರಿಯನ್ನು ಆಫ್ ಮಾಡಿ.
ಊಟಕ್ಕೆ ಈ ಪಲ್ಯ ಒಳ್ಳೆಯ ಕಾಂಬಿನೇಶನ್. ಅನ್ನದೊಡನೆ ಕಲಸಿಕೊಳ್ಳಬಹುದು ಅಥವಾ ಹಾಗೇ ತಿನ್ನಬಹುದು.


Wednesday, 23 May 2012

ರಾಗಿ ರೊಟ್ಟಿ / Finger Millet (Ragi) Rotti

Click here for English version.

ಬೇಸಿಗೆ ಕಾಲದಲ್ಲಿ ದೇಹವನ್ನು ತಂಪಾಗಿರಿಸಲು ಎಷ್ಟು ನೀರು ಕುಡಿದರೂ ಸಾಲದು. ಎಳನೀರು, ಜ್ಯೂಸ್ ಇತ್ಯಾದಿಗಳಂತೆಯೇ ರಾಗಿ ಮಾಲ್ಟ್ ನಂತಹ ಬಿಸಿ ಪೇಯಗಳೂ ಕೂಡ ದೇಹದ ಉಷ್ಣತೆಯನ್ನು ನಿಯಂತ್ರಣದಲ್ಲಿಡಲು ಸಹಾಯ ಮಾಡುತ್ತವೆ. ರಾಗಿಗೆ ತನ್ನದೇ ಆದ ರುಚಿ ಅಥವಾ ಪರಿಮಳ ಇಲ್ಲ. ಹೀಗಾಗಿ ರಾಗಿ ಬಹಳ ಜನರಿಗೆ ಇಷ್ಟವಾಗುವುದೇ ಇಲ್ಲ! 
ಒಮ್ಮೆ ಬೆಂಗಳೂರಿನ ಮಲ್ಲೇಶ್ವರಂ ಬಳಿ ಹೋಟೆಲ್ ಒಂದರಲ್ಲಿ ರಾಗಿ ರೊಟ್ಟಿಯನ್ನು ತಿಂದಿದ್ದೆ. ಅಂದಿನಿಂದ ನಾನು ರಾಗಿ ರೊಟ್ಟಿಯ ಪಕ್ಕಾ ಅಭಿಮಾನಿಯಾಗಿಬಿಟ್ಟಿ ದ್ದೇನೆ! ಆ ರೊಟ್ಟಿಯ ನೆನಪಿನಲ್ಲಿ ನಾನು ತಯಾರಿಸಿದ ರೊಟ್ಟಿಯೂ ಚೆನ್ನಾಗಿಯೇ ಬಂತು. ರುಚಿಕರವಾದ ಅಂತೆಯೇ ಆರೋಗ್ಯಕ್ಕೆ ಹಿತಕರವಾದ ರಾಗಿ ರೊಟ್ಟಿಯ ರೆಸಿಪಿ ಇಲ್ಲಿದೆ, ನೀವೂ ಟ್ರೈ ಮಾಡಿ ನೋಡಿ!
ಈ ರೊಟ್ಟಿಗೆ ಮೆಂತ್ಯ ಸೊಪ್ಪಿನ ಬದಲು ಸಬ್ಬಸಿಗೆ ಸೊಪ್ಪನ್ನೂ ಬಳಸಬಹುದು. 


ತಯಾರಿಸಲು ಬೇಕಾಗುವ ಸಮಯ: 40 - 45 ನಿಮಿಷಗಳು 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
ರಾಗಿ ಹಿಟ್ಟು - 1 3/4 ಕಪ್ 
ತುರಿದ ಕ್ಯಾರೆಟ್ - 1 
ತೆಂಗಿನತುರಿ - 1 ಕಪ್ 
1 ಮೀಡಿಯಂ ಸೈಜ್ ಈರುಳ್ಳಿ - ಸಣ್ಣಗೆ ಹೆಚ್ಚಿದ್ದು 
ಸಣ್ಣಗೆ ಹೆಚ್ಚಿದ ಹಸಿಮೆಣಸು 2 - 3
ಮೆಂತ್ಯ ಸೊಪ್ಪು - 1 ಕಟ್ಟು 
ರುಚಿಗೆ ತಕ್ಕಷ್ಟು ಉಪ್ಪು 
ಬೇಯಿಸಲು ಎಣ್ಣೆ 
ಬಿಸಿ ನೀರು - 1/2 ಅಥವಾ 3/4 ಕಪ್ 

ಮಾಡುವ ವಿಧಾನ:
ಮೆಂತ್ಯ ಸೊಪ್ಪನ್ನು ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ.
ರಾಗಿ ಹಿಟ್ಟನ್ನು ಒಂದು ಮಿಕ್ಸಿಂಗ್ ಬೌಲ್ ನಲ್ಲಿ ಹಾಕಿಕೊಂಡು ಅದಕ್ಕೆ ಎಣ್ಣೆ, ಬಿಸಿನೀರು ಹೊರತಾಗಿ ಉಳಿದೆಲ್ಲ ಸಾಮಗ್ರಿಗಳನ್ನೂ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ಒಣ ಹಿಟ್ಟಿನ ಮಿಶ್ರಣಕ್ಕೆ ಸ್ವಲ್ಪ ಸ್ವಲ್ಪವಾಗಿ ಬಿಸಿ ನೀರು ಸೇರಿಸುತ್ತ ಚಪಾತಿ ಹಿಟ್ಟಿನಂತೆ ಉಂಡೆ ಕಟ್ಟುವ ಹದಕ್ಕೆ ಕಲಸಿ.
ಹಿಟ್ಟನ್ನು 10 - 15 ನಿಮಿಷ ನೆನೆಯಲು ಬಿಟ್ಟು ನಂತರ ನಿಂಬೆ ಗಾತ್ರದ ಉಂಡೆಗಳನ್ನು ಮಾಡಿಕೊಳ್ಳಿ.
ಹಿಟ್ಟಿನ ಉಂಡೆಯನ್ನು ಎಣ್ಣೆ ಸವರಿದ ಬಾಳೆ ಎಲೆ ಅಥವಾ ಪ್ಲಾಸ್ಟಿಕ್ ಹಾಳೆಯಮೇಲೆ ತೆಳ್ಳಗೆ ತಟ್ಟಿ, ಮಧ್ಯೆ ಒಂದು ತೂತು ಮಾಡಿ.
ಕಾದ ಬಾಣಲಿಯಮೇಲೆ ಈ ರೊಟ್ಟಿಯನ್ನು ಎರಡೂ ಕಡೆ ಎಣ್ಣೆ ಹಾಕಿ ಬೇಯಿಸಿ.
ಬಿಸಿಬಿಸಿ ರೊಟ್ಟಿಯನ್ನು ಬೆಣ್ಣೆ ಅಥವಾ ನಿಮ್ಮಿಷ್ಟದ ಸೈಡ್ ಡಿಷ್ ನೊಡನೆ ಸರ್ವ್ ಮಾಡಿ.


ಟಿಪ್ಸ್:
  • ಈ ರೊಟ್ಟಿಗೆ ಮೆಂತ್ಯ ಸೊಪ್ಪಿನ ಬದಲು ಸಬ್ಬಸಿಗೆ ಸೊಪ್ಪನ್ನು ಕೂಡ ಬಳಸಬಹುದು. 

Friday, 11 May 2012

ಮಾವಿನಕಾಯಿ ಚಟ್ನಿ / Raw Mango Chutney

Click here for English version.

ಈಗಂತೂ ಎಲ್ಲ ಕಡೆ ಮಾವಿನಕಾಯಿಯ ಸೀಜನ್. ಮಾವಿನಕಾಯಿಯ ಜೊತೆಗೆ ವಿವಿಧ ಬಗೆಯ ಮಾವಿನ ಹಣ್ಣುಗಳೂ ಅಂಗಡಿಗಳಲ್ಲಿ ದೊರೆಯುತ್ತಿವೆ. ನಾವಂತೂ ಈ  ವರ್ಷ ಮಾವಿನ ಸೀಜನ್ ನ ಸಂಪೂರ್ಣ ಉಪಯೋಗ ತೆಗೆದುಕೊಳ್ಳುತ್ತಿದ್ದೇವೆ ಎಂದೇ ಹೇಳಬಹುದು! 
ಬಹಳ ಸುಲಭದಲ್ಲಿ ತಯಾರಿಸಬಹುದಾದ ಮತ್ತು ಊಟಕ್ಕೆ ಹಿತವಾದ ಮಾವಿನಕಾಯಿ ಚಟ್ನಿಯ ರೆಸಿಪಿ ಇಲ್ಲಿದೆ..ಟ್ರೈ ಮಾಡಿ ನೋಡಿ :)


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು 
ಸರ್ವಿಂಗ್ಸ್: 4 - 5 ಜನರಿಗೆ ಆಗುತ್ತದೆ 
ಬೇಕಾಗುವ ಸಾಮಗ್ರಿಗಳು:
ಸಿಪ್ಪೆ ತೆಗೆದು ಸಣ್ಣಗೆ ಹೆಚ್ಚಿದ ಹುಳಿ ಮಾವಿನಕಾಯಿ - 1/2 ಕಪ್ 
ತೆಂಗಿನತುರಿ - 1 1/2 ಕಪ್  
ಲವಂಗ - 1 ಅಥವಾ 2
ಕೊತ್ತಂಬರಿ ಬೀಜ - 1/2 ಟೀ ಸ್ಪೂನ್ 
2 - 3 ಹಸಿಮೆಣಸು (ಖಾರಕ್ಕೆ ತಕ್ಕಂತೆ)
ಎಣ್ಣೆ - 1/2 ಟೀ ಸ್ಪೂನ್ 
ರುಚಿಗೆ ಉಪ್ಪು 


ಮಾಡುವ ವಿಧಾನ: 
ಒಗ್ಗರಣೆ ಸೌಟಿನಲ್ಲಿ ಆರ್ಧ ಚಮಚದಷ್ಟು ಎಣ್ಣೆ ಕಾಯಿಸಿ ಲವಂಗ, ಕೊತ್ತಂಬರಿ ಮತ್ತು ಹೆಚ್ಚಿದ ಹಸಿಮೆಣಸನ್ನು ಸೇರಿಸಿ ಹುರಿದುಕೊಳ್ಳಿ.
ಹುರಿದ ಸಾಮಗ್ರಿಗಳನ್ನು ತೆಂಗಿನತುರಿ ಮತ್ತು ಹೆಚ್ಚಿದ ಮಾವಿನಕಾಯಿಯೊಡನೆ ಸೇರಿಸಿ ಮಿಕ್ಸಿಯಲ್ಲಿ ರುಬ್ಬಿ. 
ರುಬ್ಬುವಾಗ ಸ್ವಲ್ಪವೇ ನೀರು ಸೇರಿಸಿ. ಈ ಚಟ್ನಿ ಗಟ್ಟಿಯಾಗಿದ್ದರೆ ಚೆನ್ನ.
ತಯಾರಾದ ಚಟ್ನಿಗೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಮಿಕ್ಸ್ ಮಾಡಿ. ಬೇಕಿದ್ದರೆ ಸಾಸಿವೆಯ ಒಗ್ಗರಣೆ ಮಾಡಿ.
ಈ ಚಟ್ನಿಯನ್ನು ಉಪ್ಪಿನಕಾಯಿಯಂತೆಯೂ ಬಳಸಬಹುದು. ಊಟ ಮಾಡುವಾಗ ಅನ್ನದೊಡನೆ ಕಲೆಸಿಕೊಳ್ಳಲೂ ಚೆನ್ನಾಗಿರುತ್ತದೆ.   
Related Posts Plugin for WordPress, Blogger...