Here are some recipes which I came across through the net, books, so on and few are my own experiments..

Monday, 26 September 2011

ಸಾಟೆ / Saate

Click here for English version.

ಸಾಮಾನ್ಯವಾಗಿ ಮನೆಯಲ್ಲಿ ಮಹಿಳೆಯರಿಗೆ ಯಾವುದು ಇಷ್ಟವೋ ಆ ಅಡಿಗೆಗಳನ್ನು ತಯಾರಿಸುವರೆಂದು ಒಂದು ಮಾತಿದೆ. ನಮ್ಮ ಮನೆಯಲ್ಲಂತೂ ಸಿಹಿತಿಂಡಿಗಳ ಮಟ್ಟಿಗೆ ಈ ಮಾತು ನಿಜ! ನನಗೆ ಸಿಹಿತಿಂಡಿಗಳೆಂದರೆ ಬಹಳ ಇಷ್ಟ. ಅದಕ್ಕೇ ಮನೆಯಲ್ಲಿ ಒಂದಲ್ಲಾ ಒಂದು ಸಿಹಿತಿಂಡಿ ಇದ್ದೇ ಇರುತ್ತದೆ. ಇಷ್ಟೇ ಅಲ್ಲ, ಯಾರದಾದರೂ ಅಡಿಗೆ ಬ್ಲಾಗ್ / ವೆಬ್ ಸೈಟ್ ಗೆ ಹೋದರೂ ನಾನು ಮೊದಲು ನೋಡುವುದು ಸಿಹಿತಿಂಡಿಗಳನ್ನೇ! ಸಿಹಿತಿಂಡಿಗಳನ್ನು ಚೆನ್ನಾಗಿ ಹಾಕಿದ್ದಾರೆಂದರೆ ಅವರ ಬ್ಲಾಗ್ ಇಷ್ಟವಾಯಿತೆಂದೇ ಅರ್ಥ!!  
'ಸಾಟೆ' ಎಂದರೆ ಉತ್ತರ ಕನ್ನಡದ ಸ್ಪೆಷಲ್ ಸಿಹಿತಿಂಡಿಗಳಲ್ಲಿ ಒಂದು. ನೋಡುವುದಕ್ಕೆ ಬಾದೂಷಾದಂತೆ ತೋರಿದರೂ ಇದರ ರುಚಿಯೇ ಬೇರೆ. ಬಾದೂಷಾ ಮೆತ್ತಗಿರುತ್ತದೆ, ಆದರೆ ಸಾಟೆ ಪದರು ಪದರಾಗಿ ಒಳತನಕವೂ ಗರಿಯಾಗಿರುತ್ತದೆ. ನೀವು ಉತ್ತರ ಕನ್ನಡ ಜಿಲ್ಲೆಗೆ ಹೋದರೆ ಸಾಮಾನ್ಯವಾಗಿ ಹೆಚ್ಚಿನ ಸ್ವೀಟ್ ಸ್ಟಾಲ್ ಗಳಲ್ಲಿ ಸಾಟೆ ಸಿಕ್ಕೇ ಸಿಗುತ್ತದೆ. ನಾನಂತೂ ಇಷ್ಟರೊಳಗೆ ಯಾರ ಬ್ಲಾಗ್ / ವೆಬ್ ಸೈಟ್ ನಲ್ಲೂ ಸಾಟೆ ಮಾಡುವ ವಿಧಾನವನ್ನು ಬರೆದಿದ್ದನ್ನು ನೋಡಿಲ್ಲ. ಹೀಗಾಗಿ ಸಾಟೆ ತಯಾರಿಸುವುದನ್ನು ಬರೆಯುತ್ತಿರುವವರಲ್ಲಿ ನಾನೇ ಮೊದಲಿಗಳೆನಿಸುತ್ತದೆ :) ನಾನು ಇದನ್ನು ನನ್ನ ಕಸಿನ್ ಒಬ್ಬರಿಂದ ಕಲಿತದ್ದು. 


ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ 
ಈ ಅಳತೆಯಿಂದ ಸುಮಾರು 13 - 14 ಸಾಟೆಗಳನ್ನು ತಯಾರಿಸಬಹುದು.
  
ಬೇಕಾಗುವ ಸಾಮಗ್ರಿಗಳು:
2 ದೊಡ್ಡ ಲೋಟ ಮೈದಾ
ತುಪ್ಪ / ಡಾಲ್ಡಾ - 1/4 ಲೋಟ 
ಚಿಟಿಕೆ ಉಪ್ಪು 
2 ಲೋಟ ಸಕ್ಕರೆ
ಸ್ವಲ್ಪ ನೀರು
ಕರಿಯಲು ಎಣ್ಣೆ 
ಒಂದು ನೈಲಾನ್ ಬಟ್ಟೆ 

ಮಾಡುವ ವಿಧಾನ:
ಮೈದಾಹಿಟ್ಟಿಗೆ ಚಿಟಿಕೆ ಉಪ್ಪು ಮತ್ತು ತುಪ್ಪ / ಡಾಲ್ಡಾ ಸೇರಿಸಿ ಕಲಸಿಕೊಳ್ಳಿ. ಚೆನ್ನಾಗಿ ಮಿಕ್ಸ್ ಮಾಡಿ, ಮಿಶ್ರಣ ಬ್ರೆಡ್ ಕ್ರಂಬ್ಸ್ ನಂತಾದಾಗ ಅದಕ್ಕೆ ಸ್ವಲ್ಪ ನೀರು ಸೇರಿಸಿ ಚಪಾತಿ ಹಿಟ್ಟಿನಂತೆ ಕಲಸಿಕೊಳ್ಳಿ. ಹಿಟ್ಟನ್ನು ತುಂಬ ಮೆತ್ತಗೆ ಕಲಸಬೇಡಿ.
ಕಲಸಿದ ಹಿಟ್ಟಿಗೆ ಒಂದು ಪ್ಲೇಟ್ ಮುಚ್ಚಿ, 10 ನಿಮಿಷ ನೆನೆಯಲು ಬಿಡಿ.
ನಂತರ ಹಿಟ್ಟಿನ ಮುದ್ದೆಯನ್ನು ಎರಡು ಭಾಗ ಮಾಡಿಕೊಳ್ಳಿ (ಬೇಕಿದ್ದರೆ ಎಲ್ಲ ಹಿಟ್ಟನ್ನೂ ಒಮ್ಮೆಲೇ ಬಳಸಬಹುದು).
ಒಂದು ಭಾಗ ಹಿಟ್ಟನ್ನು ತೆಗೆದುಕೊಂಡು ದೊಡ್ಡ ಚಪಾತಿಯಂತೆ ಲಟ್ಟಿಸಿ.


ಚಪಾತಿಯನ್ನು ಎರಡು ಮಡಿಕೆ ಮಡಿಚಿ, ತ್ರಿಕೋನದಂತೆ ಮಾಡಿ. ಅದನ್ನು ಪುನಃ ಚಪಾತಿಯಂತೆ ಲಟ್ಟಿಸಿ.


ಇದೇ ರೀತಿ 15 - 16 ಬಾರಿ ಮಡಿಚಿ ಲಟ್ಟಿಸಬೇಕು. ಹೀಗೆ ಮಾಡುವುದರಿಂದ ಸಾಟೆ ಚೆನ್ನಾಗಿ ಪದರು ಪದರಾಗುತ್ತದೆ.
ಕೊನೆಯಲ್ಲಿ ಇದನ್ನು 1 ಇಂಚು ದಪ್ಪಕ್ಕೆ ಲಟ್ಟಿಸಿಕೊಂಡು, ಚಿಕ್ಕ ವೃತ್ತಗಳಾಗಿ ಕತ್ತರಿಸಿಕೊಳ್ಳಿ.


ಕತ್ತರಿಸಿದ ನಂತರ ಉಳಿದ ಹಿಟ್ಟನ್ನು ಇನ್ನೊಂದು ಹಿಟ್ಟಿನ ಮುದ್ದೆಯೊಡನೆ ಸೇರಿಸಿಕೊಂಡು ಪುನಃ 15 - 16 ಬಾರಿ ಲಟ್ಟಿಸಿ, ವೃತ್ತಗಳಾಗಿ ಕತ್ತರಿಸಿ.
ಕತ್ತರಿಸಿದ ಸಾಟೆಗಳು ಉಬ್ಬದಂತೆ ಒಂದು ಫೋರ್ಕ್ ನಿಂದ ಚುಚ್ಚಿ.  ಹೀಗೆ ಮಾಡುವುದರಿಂದ ಸಾಟೆ ಒಳತನಕ ಬೇಯುವುದಕ್ಕೂ ಅನುಕೂಲವಾಗುತ್ತದೆ.
ಸಕ್ಕರೆಗೆ ಸ್ವಲ್ಪವೇ ನೀರು ಸೇರಿಸಿ ಕುದಿಸಿ, ಗಟ್ಟಿ ಪಾಕ ಮಾಡಿಕೊಳ್ಳಿ. ಇದನ್ನು ಹಾಗೇ ತಣ್ಣಗಾಗಲು ಬಿಟ್ಟರೆ ಅಲ್ಲೇ ಗಟ್ಟಿಯಾಗುವಂತೆ ಇರಲಿ.
ಬಾಣಲೆಯಲ್ಲಿ ಎಣ್ಣೆಯನ್ನು ಹದವಾಗಿ ಕಾಯಿಸಿಕೊಂಡು ಸಾಟೆಯನ್ನು ಕಡಿಮೆ ಉರಿಯಲ್ಲಿ ಸುಮಾರು 20 ನಿಮಿಷ ಅಥವಾ ಗರಿಗರಿಯಾಗುವತನಕ ಕರಿಯಿರಿ.
ಹೊಂಬಣ್ಣಕ್ಕೆ ಕರಿದ ಸಾಟೆಗಳನ್ನು ಒಂದು ಟಿಶ್ಯೂ ಪೇಪರ್ ಮೇಲೆ ಹಾಕಿ ತಣ್ಣಗಾಗಲು ಬಿಡಿ.
ತಣ್ಣಗಾದ ನಂತರ ಸಾಟೆಗಳನ್ನು ಒಂದು ನೈಲಾನ್ ಬಟ್ಟೆಯಮೇಲೆ ಜೋಡಿಸಿಕೊಳ್ಳಿ. 


ಸಕ್ಕರೆ ಪಾಕವನ್ನು ಸ್ವಲ್ಪ ಬಿಸಿಮಾಡಿ ಕರಗಿಸಿಕೊಂಡು, ಒಂದೊಂದು ಸಾಟೆಯಮೇಲೆ 3 ಚಮಚದಷ್ಟು ಸಕ್ಕರೆ ಪಾಕವನ್ನು ಹಾಕಿ.
ಸಕ್ಕರೆ ಪಾಕ ಗಟ್ಟಿಯಾದನಂತರ ಸಾಟೆಗಳನ್ನು ನಿಧಾನವಾಗಿ ಬಟ್ಟೆಯಿಂದ ಎತ್ತಿಕೊಳ್ಳಿ.
ಸಿದ್ಧವಾದ ಸಾಟೆಗಳನ್ನು ಒಂದು ಕಂಟೇನರ್ ಗೆ ಹಾಕಿಡಿ. ಇದನ್ನು ಸುಮಾರು 1 ವಾರದವರೆಗೂ ಇಟ್ಟುಕೊಂಡು ತಿನ್ನಬಹುದು.


Thursday, 22 September 2011

ಝುಕಿನಿ ಪಾಯಸ / Zucchini Kheer (Payasam)

Click here for English version.

ಪಾಯಸವನ್ನು ಮುಖ್ಯವಾಗಿ ದೇವರ ನೈವೇದ್ಯಕ್ಕೆಂದು ತಯಾರಿಸುತ್ತಾರೆ. ಅಲ್ಲದೆ ಅರ್ಜೆಂಟ್ ಆಗಿ ಏನಾದರೂ ಸಿಹಿತಿಂಡಿ/ ಡೆಸರ್ಟ್ ತಯಾರಿಸಬೇಕೆಂದರೆ ಇದು ಅನುಕೂಲ. ಪಾಯಸ ತಯಾರಿಸಲು ಮುಖ್ಯವಾಗಿ ಹಾಲು ಮತ್ತು ಸಕ್ಕರೆ / ಬೆಲ್ಲ ಬೇಕು. ಇವುಗಳೊಡನೆ ಬೇರೆ ಬೇರೆ ಸಾಮಗ್ರಿಗಳನ್ನು ಸೇರಿಸಿ ಬಗೆಬಗೆಯ ಪಾಯಸಗಳನ್ನು ಮಾಡುತ್ತಾರೆ. ನಾನು ಬೆಂಗಳೂರಿನಲ್ಲಿದ್ದಾಗ 'ರಿಲಾಯನ್ಸ್ ಫ್ರೆಶ್' ಮಳಿಗೆಯಲ್ಲಿ ಯಾವಾಗಲೂ ಸಿಗುವ ಹಾಲುಗುಂಬಳ (ಸೋರೆಕಾಯಿ) ತಂದು ಆಗಾಗ್ಗೆ ಪಾಯಸ ಮಾಡುತ್ತಿದ್ದೆ. ಇಲ್ಲಿ ಆಸ್ಟ್ರೇಲಿಯಾಕ್ಕೆ ಬಂದನಂತರ ಒಮ್ಮೆ ಝುಕಿನಿಯ ಪಾಯಸ ಮಾಡಿನೋಡಿದೆ. ಈ ಪಾಯಸ ನಮಗೆ ಹಾಲುಗುಂಬಳದ ಪಾಯಸದಂತೆಯೇ ಅನಿಸಿತು. ಈಗ ಹಾಲುಗುಂಬಳ ಹುಡುಕುವ ಗೋಜಿಗೇ ಹೋಗದೆ, ಝುಕಿನಿಯ ಪಾಯಸ ಮಾಡುವುದೇ ಅಭ್ಯಾಸವಾಗಿಬಿಟ್ಟಿದೆ! 
ಈ ಪಾಯಸವನ್ನು ಫಟಾಫಟ್ ಎಂದು ತಯಾರಿಸಿಬಿಡಬಹುದು. ಮನೆಗೆ ಯಾರಾದರೂ ಬಂದರೆ ಅವರ ಜೊತೆ ಮಾತಾಡುತ್ತಲೇ ಆರಾಮಾಗಿ 20 - 25 ನಿಮಿಷದೊಳಗೆ ರುಚಿಯಾದ ಪಾಯಸ ರೆಡಿ! ಈ ಪಾಯಸ ತೆಳ್ಳೆವಿನೊಡನೆ ಹಾಕಿಕೊಳ್ಳಲೂ ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು
ಸರ್ವಿಂಗ್ಸ್ : 2 ಜನರಿಗೆ ಆಗುತ್ತದೆ.

ಬೇಕಾಗುವ ಸಾಮಗ್ರಿಗಳು:
ಝುಕಿನಿ - 1
ಹಾಲು - 1 1/2 ಕಪ್
ನೀರು - 1 1/2 ಕಪ್
ಸಕ್ಕರೆ - 1/2 ಕಪ್ 
ಸೂಜಿ ರವಾ - 3 ರಿಂದ 4 ಚಮಚ 
ಚಿಟಿಕೆ ಉಪ್ಪು
ಏಲಕ್ಕಿ - 2
ಲವಂಗ - 2
ಕೇಸರಿ ದಳಗಳು - ಬೇಕಿದ್ದರೆ

ಮಾಡುವ ವಿಧಾನ:
ಝುಕಿನಿಯ ಸಿಪ್ಪೆ ತೆಗೆದು ಮಧ್ಯಮ ಗಾತ್ರದ ಹೋಳುಗಳಾಗಿ ಹೆಚ್ಚಿಕೊಳ್ಳಿ.
ಹೆಚ್ಚಿದ ಝುಕಿನಿಗೆ ನೀರು ಸೇರಿಸಿ ಬೇಯಲಿಡಿ.
ಅರ್ಧ ಬೆಂದಾಗ ಇದಕ್ಕೆ ಚಿಟಿಕೆ ಉಪ್ಪು, ರುಚಿಗೆ ತಕ್ಕಷ್ಟು ಸಕ್ಕರೆ ಮತ್ತು ಹಾಲು ಸೇರಿಸಿ.
ರವೆಯನ್ನು ನೀರಿನಲ್ಲಿ ತೊಳೆದುಕೊಂಡು, ಕುದಿಯುತ್ತಿರುವ ಪಾಯಸಕ್ಕೆ ಸೇರಿಸಿ ಗಂಟಾಗದಂತೆ ಕೈಯಾಡಿಸಿ. 
ಪಾಯಸವನ್ನು 6 - 7 ನಿಮಿಷ ಕುದಿಸಿ. ಕುದಿಸುವಾಗ ಬೇಕಿದ್ದರೆ ಕೇಸರಿ ದಳಗಳನ್ನು ಸೇರಿಸಿ.
ಏಲಕ್ಕಿ ಮತ್ತು ಲವಂಗವನ್ನು ಪುಡಿಮಾಡಿಕೊಳ್ಳಿ.
ಪಾಯಸವನ್ನು ಉರಿಯಿಂದ ಇಳಿಸುವ ಮುನ್ನ ಇದಕ್ಕೆ ಪುಡಿಮಾಡಿದ ಏಲಕ್ಕಿ ಮತ್ತು ಲವಂಗವನ್ನು ಸೇರಿಸಿ.
ಈ ಪಾಯಸವನ್ನು ಬಿಸಿಯಾಗಿಯೂ ತಿನ್ನಬಹುದು ಇಲ್ಲವೇ ಫ್ರಿಜ್ ನಲ್ಲಿಟ್ಟು ತಣ್ಣಗಾದ ನಂತರವೂ ಸವಿಯಬಹುದು. ಬೇಕಿದ್ದರೆ ಅಲಂಕಾರಕ್ಕೆ ಡ್ರೈ ಫ್ರೂಟ್ಸ್ ಸೇರಿಸಿ.


ಟಿಪ್ಸ್:
  • ಇದೇ ರೀತಿ ಹಾಲುಗುಂಬಳ / ಸೋರೆಕಾಯಿಯಿಂದಲೂ ರುಚಿಯಾದ ಪಾಯಸ ತಯಾರಿಸಬಹುದು.
  • ಜಾಸ್ತಿ ರವೆ ಸೇರಿಸಿದಷ್ಟೂ ಪಾಯಸ ದಪ್ಪಗಾಗುತ್ತದೆ.
  • ಸಕ್ಕರೆಯ ಜೊತೆಗೆ ಒಂದೆರಡು ಚಮಚದಷ್ಟು ಬೆಲ್ಲ ಸೇರಿಸಿದರೆ ಪಾಯಸ ಇನ್ನೂ ಚೆನ್ನಾಗಿರುತ್ತದೆ.

Monday, 19 September 2011

ತೆಳ್ಳೇವು / Tellevu - ಉತ್ತರ ಕನ್ನಡ ಸ್ಪೆಷಲ್

Click here for English version.

ನೀವು ಕರ್ನಾಟಕದ ಉತ್ತರ ಕನ್ನಡ ಜಿಲ್ಲೆಗೆ ಹೋದರೆ ಅಲ್ಲಿ ಹೆಚ್ಚಿನ ಮನೆಗಳಲ್ಲಿ ಬೆಳಗಿನ ತಿಂಡಿಗೆ ಒಂದು ಬಗೆಯ ಪೇಪರ್ ನಷ್ಟು ತೆಳ್ಳಗಿನ ದೋಸೆಯನ್ನು ಹೆಚ್ಚಿನ ಮನೆಗಳಲ್ಲಿ ಕಾಣಬಹುದು. ಅದೇ ತೆಳ್ಳೇವು! ಹವ್ಯಕರ ಸ್ಪೆಷಲ್ ಅಡಿಗೆಗಳಲ್ಲಿ ಇದೂ ಒಂದು. ತೆಳ್ಳೇವು ತಯಾರಿಸುವುದೂ ಒಂದು ಕಲೆ. ದೋಸೆ ಕಾವಲಿಗೆ ಹಿಟ್ಟನ್ನು ಹಾಕಿದ ತಕ್ಷಣ ಅದನ್ನು ತೆಳ್ಳಗೆ ಹರವಬೇಕು. ಹಿಟ್ಟನ್ನು ಬೇಗಬೇಗ ಹರಡದಿದ್ದರೆ ಹಿಟ್ಟು ಅಲ್ಲೇ ಬೆಂದುಬಿಡುತ್ತದೆ. ಹಿಟ್ಟನ್ನು ತೆಳ್ಳಗೆ ಹರಡಲು ಒಂದು ವೇಸ್ಟ್ ಕ್ರೆಡಿಟ್ ಕಾರ್ಡ್ ಅಥವಾ ಪ್ಲಾಸ್ಟಿಕ್ ಪ್ಲೇಯಿಂಗ್ ಕಾರ್ಡ್ ಇದ್ದರೆ ಅನುಕೂಲ. ಹಳ್ಳಿಯ ಕಡೆ ಬಾಳೆ ಎಳೆಯನ್ನು ಮಡಿಕೆ ಮಾಡಿ ದಪ್ಪಗೆ ಮಾಡಿಕೊಂಡು ಅದರಿಂದ ಹಿಟ್ಟನ್ನು ಹರವುತ್ತಾರೆ. 
ಕಳೆದ ವಾರ ಅಪರೂಪಕ್ಕೆ ತೆಳ್ಳೇವು ಮಾಡಿದ್ದೆ. ಇದನ್ನೂ ಬ್ಲಾಗ್ ನಲ್ಲಿ ಹಾಕುತ್ತೇನೆ ಎಂದು ಹೇಳುತ್ತಿದ್ದ ಹಾಗೇ ನಮ್ಮವರಿಗೆ ಯೋಚನೆ ಬಂತು; ತೆಳ್ಳೇವು ಮಾಡುವ ವಿಧಾನವನ್ನು ವಿಡಿಯೋ ಮಾಡಿ ಹಾಕಿದರೆ ಚೆನ್ನಾಗಿರುವುದೆಂದು. ಅವರೇ ತಯಾರಿಸಿಕೊಟ್ಟದ್ದು ಇದರ ವಿಡಿಯೋ ಪ್ರೆಸೆಂಟೇಶನ್ ;) ಇದು ನಾನು ಹಾಕುತ್ತಿರುವ ಮೊದಲ ವಿಡಿಯೋ ಪ್ರೆಸೆಂಟೇಶನ್.. ನಿಮಗೆಲ್ಲ ಇಷ್ಟವಾಗಬಹುದೆಂದುಕೊಂಡಿದ್ದೇನೆ :) 
 
ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷ
ಸಾಮಗ್ರಿಗಳನ್ನು ನೆನೆಸಲು ಬೇಕಾಗುವ ಸಮಯ: 4 - 5 ಘಂಟೆ 
ಹಿಟ್ಟು ಹುದುಗುಬರಲು ಬೇಕಾಗುವ ಸಮಯ: 7 - 8 ಘಂಟೆ
ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - 1 1/2 ಕಪ್ 
ಉದ್ದಿನಬೇಳೆ - 1/4 ಕಪ್ 
ಒಂದು ಮೀಡಿಯಂ ಸೈಜ್ ಸೌತೆಕಾಯಿ
ಮೆಂತ್ಯ - 1 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು
ಸಕ್ಕರೆ / ಬೆಲ್ಲ - 1 / 2 ಚಮಚ 
ಸ್ವಲ್ಪ ಎಣ್ಣೆ 

ಮಾಡುವ ವಿಧಾನ:
ಅಕ್ಕಿ, ಉದ್ದಿನಬೇಳೆ ಮತ್ತು ಮೆಂತ್ಯವನ್ನು 4 - 5 ಘಂಟೆ ನೀರಿನಲ್ಲಿ ನೆನೆಸಿಕೊಳ್ಳಿ.  
ಸೌತೆಕಾಯಿಯ ಸಿಪ್ಪೆ ತೆಗೆದು ಹೆಚ್ಚಿಕೊಳ್ಳಿ.
ಅಕ್ಕಿ, ಉದ್ದಿನಬೇಳೆ, ಮೆಂತ್ಯ ಮತ್ತು ಹೆಚ್ಚಿದ ಸೌತೆಕಾಯಿಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ, ದೋಸೆ ಹಿಟ್ಟನ್ನು ತಯಾರಿಸಿಕೊಳ್ಳಿ.
ಸೌತೆಕಾಯಿಯಲ್ಲಿ ನೀರಿನಂಶ ಇರುವುದರಿಂದ ರುಬ್ಬಲು ನೀರನ್ನು ಸೇರಿಸಬೇಕಿಲ್ಲ. ಹಿಟ್ಟು ತುಂಬ ಗಟ್ಟಿ ಎನ್ನಿಸಿದರೆ ಸ್ವಲ್ಪ ನೀರನ್ನು ಸೇರಿಸಿ.
ತಯಾರಿಸಿದ ಹಿಟ್ಟನ್ನು 7 - 8 ಘಂಟೆಕಾಲ ಬೆಚ್ಚಗಿನ ಸ್ಥಳದಲ್ಲಿ ಇಡಿ.
ದೋಸೆ ಕಾವಲಿಯನ್ನು ಕಾಯಲಿಟ್ಟು, ತೆಳ್ಳೇವು ಹಿಟ್ಟಿಗೆ ಉಪ್ಪು, ಸಕ್ಕರೆ ಸೇರಿಸಿ ಹದಮಾಡಿಕೊಳ್ಳಿ.  
ಕಾವಲಿಗೆ ಒಂದೆರಡು ಹನಿಯಷ್ಟು ಎಣ್ಣೆ ಸವರಿಕೊಳ್ಳಿ. ಪ್ರತಿ ತೆಳ್ಳೇವು ಮಾಡುವ ಮೊದಲೂ ಕಾವಲಿಗೆ ಎಣ್ಣೆ ಸವರಿಕೊಳ್ಳಬೇಕು.
ಒಂದು ಸೌಟಿನಷ್ಟು ಹಿಟ್ಟನ್ನು ಕಾದ ಕಾವಲಿಯಮೇಲೆ ಹಾಕಿಕೊಂಡು ಕಾರ್ಡ್ ಸಹಾಯದಿಂದ ತೆಳ್ಳಗೆ ಹರವಿ.
ಬೇಯುತ್ತಿದ್ದಂತೆಯೇ ಅಂಚನ್ನು ನಿಧಾನವಾಗಿ ಬಿಡಿಸಿಕೊಂಡು ತೆಳ್ಳೇವನ್ನು ಕಾವಲಿಯಿಂದ ಎತ್ತಿ.
ಬಿಸಿಬಿಸಿ ತೆಳ್ಳೇವನ್ನು ಚಟ್ನಿ ಅಥವಾ ಬೇರೆ ಯಾವುದೇ ಸೈಡ್ ಡಿಶ್ ನೊಡನೆ ಸರ್ವ್ ಮಾಡಿ.

ತೆಳ್ಳೇವು ತಯಾರಿಸುವ ಪ್ರಾತ್ಯಕ್ಷಿಕೆಗಾಗಿ ಈ ಕೆಳಗಿನ ವಿಡಿಯೋ ಕ್ಲಿಪ್ ನೋಡಿ..


ಟಿಪ್ಸ್:
  • ಹಿಟ್ಟನ್ನು ತಯಾರಿಸಲು ಮೊಗೆಕಾಯಿ ಅಥವಾ ಝುಕಿನಿಯನ್ನೂ ಬಳಸಬಹುದು. ಇದ್ಯಾವುದನ್ನೂ ಬಳಸದಿದ್ದರೆ ಕಾಲು ಕಪ್ ನ ಬದಲು ಅರ್ಧ ಕಪ್ ಉದ್ದಿನಬೇಳೆಯನ್ನು ಸೇರಿಸಿ. 
  • ಮೆತ್ತಗಿನ ತೆಳ್ಳೇವು ಬೇಕೆಂದರೆ ಕಾವಲಿಯಿಂದ ಸ್ವಲ್ಪ ಬೇಗ ತೆಗೆದುಬಿಡಿ. ಗರಿಗರಿ ಬೇಕೆಂದರೆ ಸ್ವಲ್ಪ ಹೆಚ್ಚು ಸಮಯ ಬೇಯಿಸಿ ತೆಗೆಯಿರಿ.
  • ಕಾವಲಿಯನ್ನು ತಣ್ಣೀರಿನಲ್ಲಿ 8 - 10 ಘಂಟೆ ಮುಳುಗಿಸಿಟ್ಟು ಬಳಸಿದರೆ ದೋಸೆ / ತೆಳ್ಳೇವು ಚೆನ್ನಾಗಿ ಏಳುತ್ತದೆ.  

Thursday, 15 September 2011

ರವಾ ಕೇಸರಿ (ಶಿರಾ) / Semolina Kesari (Shira)

Click here for English version.

ರವಾ ಕೇಸರಿ ಸಾಮಾನ್ಯವಾಗಿ ಎಲ್ಲರಿಗೂ ಗೊತ್ತೇ ಇರುತ್ತದೆ. ಅರ್ಜೆಂಟಾಗಿ ಮನೆಗೆ ಯಾರಾದರೂ ಅತಿಥಿಗಳು ಬರುವರೆಂದರೆ ಬಹಳ ಸುಲಭದಲ್ಲಿ ತಯಾರಿಸಬಹುದಾದ ಸಿಹಿ ತಿಂಡಿ ಇದು. ಸೂಜಿ ರವೆಯ ಬದಲು ಗೋಧಿ ಹಿಟ್ಟಿನಿಂದಲೂ ಕೇಸರಿ ಅಥವಾ ಶಿರಾ ತಯಾರಿಸಬಹುದು. ರವೆಯಿಂದ ತಯಾರಿಸಿದ ಕೇಸರಿ ಎಂದರೆ ನಮ್ಮಿಬ್ಬರಿಗೂ ಬಹಳ ಇಷ್ಟ. ಹೀಗಾಗಿ ನಾನು ಹೆಚ್ಚಾಗಿ ತಯಾರಿಸುವುದು ಇದನ್ನೇ!


ತಯಾರಿಸಲು ಬೇಕಾಗುವ ಸಮಯ: 40 -  45 ನಿಮಿಷಗಳು
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಸೂಜಿ ರವಾ - 1 1/2 ಕಪ್   
ಸಕ್ಕರೆ - 3 ಕಪ್
ತುಪ್ಪ - 1 ಕಪ್ 
ಗೋಡಂಬಿ, ದ್ರಾಕ್ಷಿ - ಸ್ವಲ್ಪ
ಏಲಕ್ಕಿ ಪುಡಿ - 1/2 ಚಮಚ  
ಹಾಲು - 1/4 ಕಪ್ 
ಕೇಸರಿ ದಳಗಳು (ಬೇಕಿದ್ದರೆ) - ಸ್ವಲ್ಪ
ನೀರು - 3 3/4 ಕಪ್ (1 ಕಪ್ ರವೆಗೆ 2 1/2 ಕಪ್ ನಂತೆ)
ಚಿಟಿಕೆ ಉಪ್ಪು 

ಮಾಡುವ ವಿಧಾನ:
ಬಾಣಲೆ ಕಾಯಲಿಟ್ಟು ಅದಕ್ಕೆ ಅರ್ಧದಷ್ಟು ತುಪ್ಪವನ್ನು ಹಾಕಿ. ರವೆಯನ್ನು ಇದಕ್ಕೆ ಸೇರಿಸಿ, ಪರಿಮಳ ಬರುವಂತೆ ಕೆಂಪಗೆ ಹುರಿಯಿರಿ.
ಒಂದು ಪಾತ್ರೆಯಲ್ಲಿ ನೀರನ್ನು ಕುದಿಯಲಿಡಿ. ರವೆ ಹುರಿಯುವಷ್ಟರಲ್ಲಿ ನೀರು ಕಾದಿರಲಿ.
ಹುರಿದ ರವೆಗೆ ನೀರನ್ನು ಸೇರಿಸಿ ಕೈಯಾಡಿಸಿ, ಮುಚ್ಚಳ ಮುಚ್ಚಿ ಬೇಯಿಸಿ. ಜೊತೆಗೆ ಚಿಟಿಕೆ ಉಪ್ಪನ್ನೂ ಹಾಕಿ. 
5 - 6 ನಿಮಿಷಗಳ ನಂತರ ಮುಚ್ಚಳ ತೆಗೆದು ರವೆ ಬೆಂದಿದೆಯೇ ಎಂದು ನೋಡಿ. ಬೆಂದಿಲ್ಲವಾದರೆ ಇನ್ನೂ ಸ್ವಲ್ಪ ನೀರು ಸೇರಿಸಿ ಬೇಯಿಸಿ.
ರವೆ ಬೆಂದಿದೆಯೇ ಎಂದು ನೋಡಲು ಬೆರಳಿನಿಂದ ಒತ್ತಿ ಪರೀಕ್ಷಿಸಿ. ಚೆನ್ನಾಗಿ ಮೆತ್ತಗಾಗಿದ್ದರೆ ರವೆ ಬೆಂದಿದೆ ಎಂದರ್ಥ.  
ರವೆ ಬೆಂದು, ನೀರು ಆರುತ್ತಿದ್ದಂತೆ ಸಕ್ಕರೆ ಸೇರಿಸಿ. ಸಕ್ಕರೆ ಸೇರಿಸಿದಾಗ ಮಿಶ್ರಣ ಸ್ವಲ್ಪ ತೆಳ್ಳಗಾಗುತ್ತದೆ. ಇದಕ್ಕೆ ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ 7 - 8 ನಿಮಿಷ ಬೇಯಿಸಿ. ರುಚಿ ನೋಡಿಕೊಂಡು ಸಕ್ಕರೆ ಬೇಕಿದ್ದರೆ ಸೇರಿಸಿ. 
ಕೇಸರಿ ದಳ ಅಥವಾ ಫುಡ್ ಕಲರ್ ಸೇರಿಸುವುದಾದರೆ ಸೇರಿಸಿ. ಗೋಡಂಬಿ, ದ್ರಾಕ್ಷಿಯನ್ನು ತುಪ್ಪದಲ್ಲಿ ಹುರಿದು ಸೇರಿಸಿ.
ಮಿಶ್ರಣಕ್ಕೆ ಹಾಲು, ಸ್ವಲ್ಪ ತುಪ್ಪ, ಸೇರಿಸಿ ಸಣ್ಣ ಉರಿಯಲ್ಲಿ 8 - 10 ನಿಮಿಷ ಬೇಯಿಸಿ. 
ಚೆನ್ನಾಗಿ ಹದ ಬಂದಾಗ ಮಿಶ್ರಣದಿಂದ ತುಪ್ಪ ಬೇರ್ಪಡತೊಡಗುತ್ತದೆ. ಆಗ ಇದಕ್ಕೆ ಏಲಕ್ಕಿಪುಡಿ ಸೇರಿಸಿ ಕೆಳಗಿಳಿಸಿ. 
ತಯಾರಾದ ರವಾ ಕೇಸರಿಯನ್ನು ಏನಾದರೂ ಕುರುಕಲು ತಿಂಡಿಯೊಡನೆ ಹಾಕಿಕೊಡಿ.


Monday, 12 September 2011

ಖಾರದ ದೋಸೆ / Spicy Dosa

Click here for English version.

ನಮ್ಮ ಮನೆಯಲ್ಲಿ ಬೆಳಗಿನ ತಿಂಡಿಗೆ ದೋಸೆ ಮಾಡಿಯೇ ಅಭ್ಯಾಸ. ದೋಸೆಯೇ ಎಂದೇನಿಲ್ಲ, ಚಪಾತಿ ಅಥವಾ ಇಡ್ಲಿ ಆದರೂ ನಡೆಯುತ್ತದೆ. ಆದರೆ ಹೆಚ್ಚಾಗಿ ಮಾಡುವುದು ದೋಸೆಯನ್ನೇ. ಇಲ್ಲಿನ ಅಂಗಡಿಗಳಲ್ಲಿ 'ಝುಕಿನಿ' ಎನ್ನುವ ಒಂದು ಬಗೆಯ ತರಕಾರಿ ಸಿಗುತ್ತದೆ. ನೋಡುವುದಕ್ಕೆ ಸೌತೆಕಾಯಿಯಂತೆ ಕಂಡರೂ ಅದರ ರುಚಿ ಹಾಲುಗುಂಬಳ ಅಥವಾ ಸೋರೆಕಾಯಿಯಂತೆ ಇರುತ್ತದೆ. ಸುಮಾರು ದಿನಗಳ ಹಿಂದೆ ಫಾರ್ಮರ್ಸ್ ಮಾರ್ಕೆಟ್ ಗೆ ಹೋದಾಗ ತಂದಿದ್ದ 'ಝುಕಿನಿ' ಫ್ರಿಜ್ ನಲ್ಲೇ ಹಾಳಾಗತೊಡಗಿತ್ತು. ಅದನ್ನು ಬೇಗ ಬೇಗ ಖಾಲಿ ಮಾಡಬೇಕೆಂದು ದೋಸೆಗೆ ಸೌತೆಕಾಯಿಯ ಬದಲು ಝುಕಿನಿಯನ್ನೇ ಸೇರಿಸಿ ನೋಡಿದೆ.. ದೋಸೆ ಚೆನ್ನಾಗಿ ಬಂತು. ಅಂತೂ ಎರಡ್ಮೂರು ದಿನ ದೋಸೆ ಮಾಡಿ, ಝುಕಿನಿಯನ್ನು ಮುಗಿಸಿದ್ದಾಯಿತು! ಅದನ್ನು ಬಳಸಿ ತಯಾರಿಸಿದ ಖಾರಾ ದೋಸೆಯ ವಿಧಾನ ಇಲ್ಲಿದೆ.. ಇದನ್ನು ನಾನು ಅಮ್ಮನಿಂದ ಕಲಿತದ್ದು. ಈ ದೋಸೆಗೆ ಝುಕಿನಿಯ ಬದಲು ಸೌತೆಕಾಯಿ ಅಥವಾ ಮೊಗೆಕಾಯಿ (Yellow cucumber)ಯನ್ನು ಬಳಸಬಹುದು.


ತಯಾರಿಸಲು ಬೇಕಾಗುವ ಸಮಯ: ಅರ್ಧ ಘಂಟೆ
ಅಕ್ಕಿ ನೆನೆಸಲು ಬೇಕಾಗುವ ಸಮಯ - 3 ಘಂಟೆ
ಹಿಟ್ಟು ಹುದುಗು ಬರಲು ಬೇಕಾಗುವ ಸಮಯ: 7 - 8 ಘಂಟೆ
ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - 1 1/2 ಕಪ್
ಮೆಂತ್ಯ - 1 / 2 ಚಮಚ
ಒಣಮೆಣಸು 3 - 4
ಕೊತ್ತಂಬರಿ ಬೀಜ - 1 1/2 ಚಮಚ
ಜೀರಿಗೆ - 1 / 2 ಚಮಚ
ಅರಿಶಿನ - 1 / 4 ಚಮಚ
ಓಮ (ಅಜವಾನ) - 1 / 4 ಚಮಚ
ಸಾಸಿವೆ - 1 / 2 ಚಮಚ
ಎಳ್ಳು - 1 / 2 ಚಮಚ
ಚಿಟಿಕೆ ಇಂಗು
ಕರಿಬೇವು 5 - 6 ಎಸಳು
ಝುಕಿನಿ - 1 (ಅಥವಾ 1 ಸಣ್ಣ ಸೌತೆಕಾಯಿ)
1 ಮಧ್ಯಮ ಗಾತ್ರದ ಈರುಳ್ಳಿ
ರುಚಿಗೆ ತಕ್ಕಷ್ಟು ಉಪ್ಪು
ಸಕ್ಕರೆ ಅಥವಾ ಬೆಲ್ಲ - 1 / 2 ಚಮಚ
ಎಣ್ಣೆ ಅಥವಾ ಬೆಣ್ಣೆ - ಸ್ವಲ್ಪ

ಮಾಡುವ ವಿಧಾನ:
ಅಕ್ಕಿ ಮತ್ತು ಮೆಂತ್ಯವನ್ನು ನೀರಿನಲ್ಲಿ ಸುಮಾರು 3 ಘಂಟೆ ನೆನೆಸಿಕೊಳ್ಳಿ.
ಝುಕಿನಿ ಅಥವಾ ಸೌತೆಕಾಯಿಯನ್ನು ಸಿಪ್ಪೆ ತೆಗೆದು, ಹೆಚ್ಚಿಕೊಳ್ಳಿ ಇಲ್ಲವೇ ತುರಿದುಕೊಳ್ಳಿ.
ಅಕ್ಕಿ, ಮೆಂತ್ಯ, ಸೌತೆಕಾಯಿ, ಒಣಮೆಣಸು, ಕೊತ್ತಂಬರಿ, ಜೀರಿಗೆ, ಅರಿಶಿನ, ಓಮ, ಸಾಸಿವೆ, ಎಳ್ಳು, ಇಂಗು, ಕರಿಬೇವು ಇಷ್ಟನ್ನೂ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ.
ಝುಕಿನಿ ಅಥವಾ ಸೌತೆಕಾಯಿಯ ನೀರಿನಂಶವೇ ಇದಕ್ಕೆ ಸಾಕಾಗುತ್ತದೆ. ಹಿಟ್ಟು ತುಂಬಾ ದಪ್ಪಗಿದ್ದರೆ ಸ್ವಲ್ಪ ನೀರನ್ನು ಸೇರಿಸಿ ದೋಸೆ ಹಿಟ್ಟನ್ನು ತಯಾರಿಸಿ.
ದೋಸೆ ಹಿಟ್ಟನ್ನು ಏಳೆಂಟು ಘಂಟೆ ಅಥವಾ ರಾತ್ರಿಯಿಡೀ ಬೆಚ್ಚಗಿನ ಸ್ಥಳದಲ್ಲಿ ಇಡಿ.
ದೋಸೆ ತಯಾರಿಸಲು 15 ನಿಮಿಷ ಮೊದಲು ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಂಡು ಸ್ವಲ್ಪ ಉಪ್ಪು ಸೇರಿಸಿ ಕಲಸಿಡಿ. ಇದರಿಂದ ಈರುಳ್ಳಿ ಮೆತ್ತಗಾಗಿ, ದೋಸೆಯೊಡನೆ ಚೆನ್ನಾಗಿ ಸೇರಿಕೊಳ್ಳುತ್ತದೆ.
ದೋಸೆ ಕಾವಲಿಯನ್ನು ಕಾಯಲಿಟ್ಟು, ದೋಸೆ ಹಿಟ್ಟಿಗೆ ಉಪ್ಪು, ಸಕ್ಕರೆ, ಹೆಚ್ಚಿದ ಈರುಳ್ಳಿ ಸೇರಿಸಿ ಕಲಸಿ. ಬೇಕಿದ್ದರೆ 8 - 10 ಕರಿಬೇವಿನ ಎಸಳುಗಳನ್ನೂ ಹೆಚ್ಚಿ ಹಾಕಿ.
ಕಾದ ಕಾವಲಿಯಮೇಲೆ ಒಂದು ದೊಡ್ಡ ಸೌಟಿನಷ್ಟು ಹಿಟ್ಟನ್ನು ಹಾಕಿ, ಹಿಟ್ಟನ್ನು ಸ್ವಲ್ಪ ಹರವಿ. ದೋಸೆ ಸ್ವಲ್ಪ ದಪ್ಪಗೇ ಇರಲಿ.
ದೋಸೆಗೆ ಸ್ವಲ್ಪ ಎಣ್ಣೆ ಅಥವಾ ಬೆಣ್ಣೆ ಹಾಕಿ ಎರಡೂ ಕಡೆ ಬೇಯಿಸಿ ತೆಗೆಯಿರಿ.
ಬಿಸಿಬಿಸಿ ದೋಸೆಯನ್ನು ಬೆಣ್ಣೆಯೊಡನೆ ಸರ್ವ್ ಮಾಡಿ.


ಟಿಪ್ಸ್:
  • ದೋಸೆಗೆ ಹಿಟ್ಟನ್ನು ರುಬ್ಬುವಾಗ ಎರಡು ಚಮಚದಷ್ಟು ತೆಂಗಿನತುರಿಯನ್ನು ಸೇರಿಸಿ ರುಬ್ಬಿದರೆ ದೋಸೆ ಮೆತ್ತಗೆ, ಚೆನ್ನಾಗಿ ಬರುತ್ತದೆ.

Friday, 9 September 2011

ವಡೆ / Vade - ಗಣೇಶ ಚತುರ್ಥಿ ಸ್ಪೆಷಲ್

Click here for English version.

ಹವ್ಯಕರ ಸಾಂಪ್ರದಾಯಿಕ ತಿನಿಸುಗಳಲ್ಲಿ ಈ ವಡೆಯೂ ಒಂದು. ನಮ್ಮೂರ ಕಡೆ ಹವ್ಯಕರ ಮನೆಗಳಲ್ಲಿ ಗಣೇಶ ಚತುರ್ಥಿ ಹಬ್ಬಕ್ಕೆ ಚಕ್ಕುಲಿ ಹಾಗೂ ವಡೆಯನ್ನು ಯಥೇಚ್ಚವಾಗಿ ತಯಾರಿಸಿಕೊಂಡು, ತಿಂಗಳಾನುಗಟ್ಟಲೆ ಇಟ್ಟುಕೊಂಡು ತಿನ್ನುತ್ತಾರೆ. ವಡೆ ತಯಾರಿಸಲು ಹೆಚ್ಚು ಸಾಮಗ್ರಿಗಳೇನೂ ಬೇಕಿಲ್ಲ; ಆದರೆ ತಯಾರಿಸಲು ಸ್ವಲ್ಪ ಮಟ್ಟಿಗಿನ ಶ್ರಮ ಹಾಗೂ ಸಮಯ ಎರಡೂ ಅವಶ್ಯವಾಗಿ ಬೇಕೇ ಬೇಕು. ಜೊತೆಗೆ ಸಹಾಯಕ್ಕೆ ಯಾರಾದರೂ ಇದ್ದರಂತೂ ಇನ್ನೂ ಒಳ್ಳೆಯದು! 


ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ 
ಸಾಮಗ್ರಿಗಳನ್ನು ನೆನೆಸಲು ಬೇಕಾಗುವ ಸಮಯ: 5 ಘಂಟೆಗಳು
ಈ ಅಳತೆಯಿಂದ ಸುಮಾರು 24 ವಡೆಗಳನ್ನು ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - 3 ಕಪ್
ಉದ್ದಿನಬೇಳೆ - 1 / 4 ಕಪ್
ಮೆಂತ್ಯ 8 - 10 ಕಾಳುಗಳು 
ಓಮ - 1 / 4 ಚಮಚ
ಜೀರಿಗೆ - 1 ಚಮಚ
ಎಳ್ಳು - 1 ಚಮಚ
ಹಸಿಮೆಣಸು - ಚಿಕ್ಕ ಚೂರು
ಕರಿಯಲು ಎಣ್ಣೆ
ರುಚಿಗೆ ತಕ್ಕಷ್ಟು ಉಪ್ಪು 

ಮಾಡುವ ವಿಧಾನ:
ಮೆಂತ್ಯ ಮತ್ತು ಉದ್ದಿನಬೇಳೆಯನ್ನು 2 - 3 ಘಂಟೆಕಾಲ ನೀರಿನಲ್ಲಿ ನೆನೆಸಿಕೊಳ್ಳಿ.
ಅಕ್ಕಿಯನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದುಕೊಂಡು ಒಂದು ಕಾಟನ್ ಬಟ್ಟೆಯಮೇಲೆ 5 ನಿಮಿಷ ಹರವಿ. ಅಕ್ಕಿ ಸ್ವಲ್ಪ ಹಸಿ ಇರುವಾಗಲೇ ಅದನ್ನು ಮಿಕ್ಸಿಯಲ್ಲಿ ತರಿಯಾಗಿ, ಸೂಜಿ ರವೆಯ ಹದಕ್ಕೆ ಪುಡಿಮಾಡಿಕೊಳ್ಳಿ.
ಉದ್ದಿನಬೇಳೆ ಮತ್ತು ಮೆಂತ್ಯವನ್ನು ಸ್ವಲ್ಪ ನೀರು ಸೇರಿಸಿ ಮಿಕ್ಸಿಯಲ್ಲಿ ದೋಸೆ ಹಿಟ್ಟಿನ ಹದಕ್ಕೆ ರುಬ್ಬಿಕೊಳ್ಳಿ.


ಓಮ, ಜೀರಿಗೆ, ಎಳ್ಳು, ಹಸಿಮೆಣಸನ್ನು ಪುಡಿಮಾಡಿ ಸೇರಿಸಿ. ಇಲ್ಲವೇ ಉದ್ದಿನಬೇಳೆಯೊಡನೆ ಸೇರಿಸಿ ರುಬ್ಬಿ.
ರುಬ್ಬಿದ ಮಿಶ್ರಣದ ಕಾಲುಭಾಗದಷ್ಟನ್ನು ಎತ್ತಿಟ್ಟಿರಿ; ನಂತರದಲ್ಲಿ ಬೇಕಿದ್ದರೆ ಉಪಯೋಗಿಸಬಹುದು.
ರುಬ್ಬಿದ ಉದ್ದಿನಬೇಳೆಯ ಮಿಶ್ರಣಕ್ಕೆ ಉಪ್ಪು, ಅಕ್ಕಿಹಿಟ್ಟು ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿ. ಹಿಟ್ಟಿನ ಮುದ್ದೆಯನ್ನು 8 - 10 ನಿಮಿಷ ಚೆನ್ನಾಗಿ ನಾದಿ, ಮೆತ್ತಗೆ ಮಾಡಿ. 
ಕಲಸಿದ ಹಿಟ್ಟನ್ನು 2 ಘಂಟೆಕಾಲ ನೆನೆಯಲು ಬಿಡಿ.
ನೆನೆದ ಹಿಟ್ಟನ್ನು ಪುನಃ ಕೈಗಳಿಂದ ಚೆನ್ನಾಗಿ ನಾದಿ. ಹಿಟ್ಟು ಗಟ್ಟಿ ಎನಿಸಿದರೆ ರುಬ್ಬಿದ ಉದ್ದಿನ ಹಿಟ್ಟನ್ನು ಸ್ವಲ್ಪ ಸೇರಿಸಿ ಕಲಸಿ.
ಹಿಟ್ಟಿನ ಪಾತ್ರೆಗೆ ಒಂದು ಪ್ಲೇಟ್ ಮುಚ್ಚಿಡಿ, ಇಲ್ಲದಿದ್ದರೆ ಹಿಟ್ಟು ಒಣಗಿಹೋಗುತ್ತದೆ.
ಬಾಣಲೆಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಕಾಯಿಸಿಕೊಳ್ಳಿ. ವಡೆ ಕರಿಯಲು ಎಣ್ಣೆ ತುಂಬ, ಅಂದರೆ ಕುದಿಯುವಷ್ಟು ಬಿಸಿ ಇರಬೇಕು. ಇಲ್ಲದಿದ್ದರೆ ವಡೆ ಚೆನ್ನಾಗಿ ಉಬ್ಬುವುದಿಲ್ಲ.


ಚಿಕ್ಕ ನಿಂಬೆಗಾತ್ರದ ತೆಗೆದುಕೊಂಡು ಕೈಯಲ್ಲಿ ಚೆನ್ನಾಗಿ ತಿಕ್ಕಿ ಮೆತ್ತಗಿನ ಉಂಡೆ ಮಾಡಿಕೊಳ್ಳಿ. ಇದನ್ನು ಎಣ್ಣೆ ಸವರಿದ ಪ್ಲಾಸ್ಟಿಕ್ ಶೀಟ್ ಮೇಲೆ ಚಿಕ್ಕದಾಗಿ ಪೂರಿಯಂತೆ ಲಟ್ಟಿಸಿ. ಮಧ್ಯದಲ್ಲೊಂದು ತೂತು ಮಾಡಿ.
ಲಟ್ಟಿಸಿದ ವಡೆಯನ್ನು ಕಾದ ಎಣ್ಣೆಯಲ್ಲಿ ಹೊಂಬಣ್ಣಕ್ಕೆ ಕರಿಯಿರಿ. 
ಗಾಳಿಯಾಡದ ಡಬ್ಬದಲ್ಲಿ ಹಾಕಿಟ್ಟರೆ ಗರಿಯಾದ ವಡೆಗಳು ಒಂದು ತಿಂಗಳವರೆಗೂ ಚೆನ್ನಾಗಿರುತ್ತವೆ.


ಟಿಪ್ಸ್:
  • ವಡೆ ತಯಾರಿಸುವಾಗ ಉಂಡೆಗಳನ್ನು ಮೊದಲೇ ತಯಾರಿಸಿಟ್ಟರೆ ಅವು ಒಣಗಿದಂತಾಗುತ್ತವೆ. ಹೀಗಾಗಿ ಆಗಿಂದಾಗ್ಗೆ ಉಂಡೆಗಳನ್ನು ಮಾಡಿಕೊಂಡು ಲಟ್ಟಿಸಿ ಕರಿಯಿರಿ.

Tuesday, 6 September 2011

ಬೂಂದಿ ಲಾಡು / Boondi Laddoo

Click here for English version.

ಹಬ್ಬ ಅಥವಾ ವಿಶೇಷ ಸಂದರ್ಭಗಳಲ್ಲಿ ಭಾರತದಲ್ಲಿ ಸಾಮಾನ್ಯವಾಗಿ ತಯಾರಿಸುವ ಸಿಹಿತಿಂಡಿ ಇದು. ಕಡಲೆಹಿಟ್ಟಿನಿಂದ ಬೂಂದಿ (ಚಿಕ್ಕ ಕಾಳುಗಳು) ತಯಾರಿಸಿಕೊಂಡು ಅದಕ್ಕೆ ಸಕ್ಕರೆ ಪಾಕವನ್ನು ಸೇರಿಸಿ ಈ ಬೂಂದಿ ಲಾಡನ್ನು ಮಾಡುತ್ತಾರೆ. ನಮ್ಮ ಮನೆಯಲ್ಲಿ ಗಣೇಶ ಚತುರ್ಥಿಯ ದಿನ ಪೂಜೆಗೆ ಇದೇ ರೀತಿಯ ಲಾಡನ್ನು ಬೆಲ್ಲ ಹಾಕಿ ತಯಾರಿಸುತ್ತಾರೆ. ಅದಕ್ಕೆ ಲಡ್ಡಿಗೆ ಉಂಡೆ ಎಂದು ಹೆಸರು. ಇಲ್ಲಿ ನಾವು ಬೆಲ್ಲ ಹಾಕುವ ಗೋಜಿಗೆ ಹೋಗದೆ, ಸಕ್ಕರೆ ಹಾಕಿಯೇ ಲಾಡನ್ನು ತಯಾರಿಸಿ ದೇವರಿಗೆ ನೈವೇದ್ಯ ಮಾಡಿದೆವು. ನಾನು ಬೂಂದಿ ಲಾಡನ್ನು ಮೊದಲೆಂದೂ ತಯಾರಿಸಿರಲಿಲ್ಲ. ಮನೆಯಲ್ಲಿ ಇತರರು ತಯಾರಿಸಿದ್ದನ್ನು ನೋಡಿದ್ದಷ್ಟೇ ನೆನಪು. ಒಟ್ಟಿನಲ್ಲಿ ಲಾಡು ಮಾಡಿದ್ದೂ ಆಯಿತು, ಹಬ್ಬ ಮುಗಿಸಿದ್ದೂ ಆಯಿತು. ಇನ್ನೊಂದು ಸಂಗತಿ ಏನೆಂದರೆ, ಹಬ್ಬಕ್ಕೆಂದು ತಯಾರಿಸಿದ ತಿಂಡಿಗಳಲ್ಲಿ ಮೊದಲು ಖರ್ಚಾದದ್ದೇ ಈ ಲಾಡು!


ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ
ಈ ಅಳತೆಯಿಂದ ಮೀಡಿಯಂ ಗಾತ್ರದ 14 ಲಾಡುಗಳನ್ನು ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು:
ಕಡಲೆಹಿಟ್ಟು - 2 1/4 ಕಪ್
ಸಕ್ಕರೆ - 2 1/4 ಕಪ್
ಏಲಕ್ಕಿ - 3 
ಲವಂಗ - 4
ದ್ರಾಕ್ಷಿ, ಗೋಡಂಬಿ (ಬೇಕಿದ್ದರೆ) - ಸ್ವಲ್ಪ 
ನೀರು  
ಕರಿಯಲು ಎಣ್ಣೆ 
ಚಿಕ್ಕ ತೂತುಗಳಿರುವ ಜಾಲರಿ (ಬೂಂದಿ ತಯಾರಿಸಲು)

ಮಾಡುವ ವಿಧಾನ:
ಕಡಲೆಹಿಟ್ಟಿಗೆ ಸ್ವಲ್ಪ ನೀರು ಸೇರಿಸಿ ಗಂಟುಗಳಿಲ್ಲದಂತೆ ದಪ್ಪಗೆ ದೋಸೆ ಹಿಟ್ಟಿನ ಹದಕ್ಕೆ ಕದಡಿಕೊಳ್ಳಿ.
ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು, ತೂತುಗಳಿರುವ ಜಾಲರಿಯ ಮೂಲಕ ಕಡಲೆ ಹಿಟ್ಟನ್ನು ಚಿಕ್ಕ ಹನಿಗಳಾಗಿ ಬಾಣಲೆಗೆ ಬೀಳುವಂತೆ ಮಾಡಿ.
ಎಲ್ಲ ಹಿಟ್ಟನ್ನೂ ಹೀಗೇ ಕರಿದು, ಬೂಂದಿ ತಯಾರಿಸಿಕೊಳ್ಳಿ.
ಸಕ್ಕರೆಗೆ ಸ್ವಲ್ಪ ನೀರು ಸೇರಿಸಿ ಕುದಿಸಿ ದಪ್ಪಗೆ ಒಂದೆಳೆ ಪಾಕ ಮಾಡಿಕೊಳ್ಳಿ.
ಏಲಕ್ಕಿ ಮತ್ತು ಲವಂಗವನ್ನು ಪುಡಿಮಾಡಿ, ಸಕ್ಕರೆ ಪಾಕಕ್ಕೆ ಸೇರಿಸಿ.
ದ್ರಾಕ್ಷಿ, ಗೋಡಂಬಿಯನ್ನು ಎಣ್ಣೆ ಅಥವಾ ತುಪ್ಪದಲ್ಲಿ ಕರಿದುಕೊಂಡು ಸೇರಿಸಿ.
ಕರಿದ ಬೂಂದಿಯನ್ನು ಸಕ್ಕರೆ ಪಾಕಕ್ಕೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
ಮಿಶ್ರಣ ಸ್ವಲ್ಪ ಬಿಸಿಯಿರುವಾಗಲೇ ಕೈಯಿಂದ ಒತ್ತಿ ಲಾಡುಗಳನ್ನು ಕಟ್ಟಿ. ಇಲ್ಲದಿದ್ದರೆ ಮಿಶ್ರಣ ಹಾಗೇ ಗಟ್ಟಿಯಾಗಿಬಿಡುತ್ತದೆ. ಮಿಶ್ರಣ ಗಟ್ಟಿಯಾಗಿಬಿಟ್ಟರೆ ಪುನಃ ಸ್ವಲ್ಪ ಬಿಸಿಮಾಡಿಕೊಂಡು ಲಾಡುಗಳನ್ನು ಮಾಡಿ.
ಈ ಲಾಡು ಒಂದು ವಾರದವರೆಗೂ ಚೆನ್ನಾಗಿರುತ್ತದೆ.


ಟಿಪ್ಸ್:
  • ಲಾಡನ್ನು ಇನ್ನೂ ರುಚಿಕರವಾಗಿ ಮಾಡಲು ಕೇಸರಿ ದಳಗಳನ್ನು ಬೇಕಿದ್ದರೆ ಸೇರಿಸಿ.
  • ಕಡಲೆಹಿಟ್ಟಿನ ಮಿಶ್ರಣ ತುಂಬ ಗಟ್ಟಿಯಾದರೆ ಇನ್ನೂ ಸ್ವಲ್ಪ ನೀರು ಸೇರಿಸಿ ಕಲಸಿ. ಅಥವಾ ಮಿಶ್ರಣ ತೆಳ್ಳಗೆನಿಸಿದರೆ ಸ್ವಲ್ಪ ಕಡಲೆಹಿಟ್ಟನ್ನು ಸೇರಿಸಿ.
  • ಫುಡ್ ಕಲರ್ ಸೇರಿಸಿದರೆ ಲಾಡು ಇನ್ನೂ ಮೋಹಕವಾಗಿ ಕಾಣುತ್ತದೆ.

Saturday, 3 September 2011

ಮಾವಿನಕಾಯಿ ಗೊಜ್ಜು / Raw Mango Gravy (Gojju)

Click here for English version.

ಇಲ್ಲಿ ನಮ್ಮ ಮನೆಗೆ ಬಹಳ ಹತ್ತಿರದಲ್ಲೇ ಒಂದು ದೊಡ್ಡ ಶಾಪಿಂಗ್ ಕಾಂಪ್ಲೆಕ್ಸ್ ಇದೆ. ಮನೆಗೆ ಏನೇ ಬೇಕಿದ್ದರೂ ಅಲ್ಲಿಂದಲೇ ತರುವುದು ರೂಢಿ. ನಮಗೆ ಬೇಕಾಗುವ ಇಂಡಿಯನ್ ಗ್ರಾಸರಿಗಳೂ ಅಲ್ಲೇ ಒಂದೆರಡು ಅಂಗಡಿಗಳಲ್ಲಿ ಸಿಗುತ್ತವೆ. ಕಳೆದ ವಾರ ಶಾಪಿಂಗ್ ಗೆ ಹೋದಾಗ ಒಂದು ಕಡೆ ಚೆನ್ನಾಗಿರುವ ತೋತಾಪುರಿ ಮಾವಿನಕಾಯಿಗಳನ್ನು ಇಟ್ಟಿದ್ದರು. ಮಾವಿನಕಾಯಿ ಹಾಗೇ ಕಟ್ ಮಾಡಿಕೊಂಡು ತಿನ್ನಲು ಚೆನ್ನಾಗಿರುವುದೆಂದು ಕೊಂಡುತಂದೆ. ಮನೆಗೆ ತಂದು ಕಟ್ ಮಾಡಿ ನೋಡಿದರೆ ಅದು ತಿನ್ನಲು ಸಾಧ್ಯವಾಗದಷ್ಟು ಹುಳಿ ಇತ್ತು! ನಂತರ ಆ ಮಾವಿನಕಾಯಿಯನ್ನು ಬೇಯಿಸಿ ಗೊಜ್ಜು ಮಾಡಿದೆ. ತೋತಾಪುರಿ ಮಾವಿನಕಾಯಿ ಇಷ್ಟೊಂದು ಹುಳಿ ಇರುವುದೆಂದು ಗೊತ್ತೇ ಇರಲಿಲ್ಲ. 
ಗೊಜ್ಜು ಮಾಡಲು ಮಾವಿನಕಾಯಿ ಹುಳಿ ಇದ್ದಷ್ಟೂ ಒಳ್ಳೆಯದು. ಚೆನ್ನಾಗಿ ಕುದಿಸಿಟ್ಟರೆ ಈ ಗೊಜ್ಜು ನಾಲ್ಕೈದು ದಿನಗಳವರೆಗೂ ಚೆನ್ನಾಗಿರುತ್ತದೆ. ಇದಕ್ಕೆ ಫ್ರೆಶ್ ಮಾವಿನಕಾಯಿಯೇ ಬೇಕೆಂದಿಲ್ಲ, ಉಪ್ಪಿನಲ್ಲಿ ಹಾಕಿಟ್ಟ ಮಾವಿನಕಾಯಿಯಿಂದಲೂ ಈ ಗೊಜ್ಜನ್ನು ತಯಾರಿಸಬಹುದು. ಇದು ಅನ್ನದೊಡನೆ ಒಳ್ಳೆಯ ಕಾಂಬಿನೇಶನ್.


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು

ಬೇಕಾಗುವ ಸಾಮಗ್ರಿಗಳು:
ಚೆನ್ನಾಗಿ ಹುಳಿ ಇರುವ ಮಾವಿನಕಾಯಿ - 1 ದೊಡ್ಡದು
ಒಣಮೆಣಸು - 2  
ಹಸಿಮೆಣಸು - 6 (ಖಾರಕ್ಕೆ ತಕ್ಕಂತೆ)
ಉದ್ದಿನಬೇಳೆ - 1 / 2 ಚಮಚ 
ಸಾಸಿವೆ - 1 / 2 ಚಮಚ
ಇಂಗು
ಕರಿಬೇವು 
ಚಿಟಿಕೆ ಅರಿಶಿನ
ಸಕ್ಕರೆ - 1 / 2 ಚಮಚ
ರುಚಿಗೆ ತಕ್ಕಷ್ಟು ಉಪ್ಪು
ಬೆಳ್ಳುಳ್ಳಿ 8 - 10 ಎಸಳು (ಜಜ್ಜಿದ್ದು)
ಎಣ್ಣೆ - 3 ಚಮಚ 
   
ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ ಸ್ವಲ್ಪ ನೀರು ಹಾಕಿ ಮಾವಿನಕಾಯಿಯನ್ನು ಮೆತ್ತಗಾಗುವವರೆಗೆ ಬೇಯಿಸಿಕೊಳ್ಳಿ. 
ಬೆಂದ ನಂತರ ಮಾವಿನಕಾಯಿಯನ್ನು ನೀರಿನಿಂದ ತೆಗೆದು ತಣ್ಣಗಾಗಲು ಬಿಡಿ.
ಮಾವಿನಕಾಯಿಯ ಪಲ್ಪ್ ತೆಗೆದು, ಸಿಪ್ಪೆ ಮತ್ತು ಓಟೆಯನ್ನು ಎಸೆದುಬಿಡಿ. ಪಲ್ಪ್ ತೆಗೆಯುವಾಗ ಬೇಕಿದ್ದರೆ ಸ್ವಲ್ಪ ನೀರನ್ನೂ ಸೇರಿಸಬಹುದು.
ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ ಕಾದ ನಂತರ ಉದ್ದಿನಬೇಳೆ, ಒಣಮೆಣಸಿನ ಚೂರುಗಳು, ಸಾಸಿವೆ, ಇಂಗು, ಅರಿಶಿನ ಸೇರಿಸಿ ಚಟಗುಟ್ಟಿದ ನಂತರ ಕರಿಬೇವು, ಹಸಿಮೆಣಸಿನ ಚೂರುಗಳನ್ನು ಸೇರಿಸಿ.
ಇದಕ್ಕೆ ಜಜ್ಜಿದ ಬೆಳ್ಳುಳ್ಳಿಯನ್ನು ಸೇರಿಸಿ ಹಸಿ ವಾಸನೆ ಹೋಗುವಂತೆ ಹುರಿಯಿರಿ.
ನಂತರ ಇದಕ್ಕೆ ಮಾವಿನ ಪಲ್ಪ್, ಉಪ್ಪು ಮತ್ತು ಸಕ್ಕರೆ ಸೇರಿಸಿ ಕುದಿಯಲಿಡಿ. ಮಿಶ್ರಣ ತುಂಬ ಗಟ್ಟಿ ಎನಿಸಿದರೆ ಸ್ವಲ್ಪ ನೀರು ಸೇರಿಸಿಕೊಳ್ಳಿ.
ಗೊಜ್ಜು 8 - 10 ನಿಮಿಷ ಚೆನ್ನಾಗಿ ಕುದಿದ ನಂತರ ಉರಿಯಿಂದ ಇಳಿಸಿ. ತಣ್ಣಗಾದನಂತರ ಗಾಳಿಯಾಡದ ಬಾಟಲ್ ನಲ್ಲಿ ತುಂಬಿಸಿಡಿ.
ಹುಳಿ, ಖಾರ ಹದವಾಗಿರುವ ಈ ಗೊಜ್ಜು ಊಟಕ್ಕೆ ಹಾಕಿಕೊಳ್ಳಲು ಹಿತವಾಗಿರುತ್ತದೆ. ಚೆನ್ನಾಗಿ ಕುದಿಸಿಕೊಂಡರೆ 4 - 5 ದಿನವಾದರೂ ಹಾಳಾಗುವುದಿಲ್ಲ.


ಟಿಪ್ಸ್:
  • ಬೆಳ್ಳುಳ್ಳಿಯ ಪರಿಮಳ ಜಾಸ್ತಿ ಬೇಕೆಂದರೆ ಬೆಳ್ಳುಳ್ಳಿಯನ್ನು ಮೊದಲು ಸೇರಿಸದೆ, ಗೊಜ್ಜು ತಯಾರಾದ ನಂತರ ಎಣ್ಣೆಯಲ್ಲಿ ಒಗ್ಗರಣೆ ಮಾಡಿ ಹಾಕಿ.
  • ಉಪ್ಪಿನಲ್ಲಿ ಹಾಕಿಟ್ಟ ಮಾವಿನಕಾಯಿಯನ್ನು ಬಳಸುವುದಾದರೆ ಅದನ್ನು ಪುನಃ ಬೇಯಿಸುವ ಅಗತ್ಯವಿಲ್ಲ. ಏಕೆಂದರೆ ಅದನ್ನು ಬೇಯಿಸಿಯೇ ಉಪ್ಪಿನಲ್ಲಿ ಹಾಕಿರುತ್ತಾರೆ. ಹಾಗೇ ಇನ್ ಸ್ಟಂಟ್ ಆಗಿ ಇದರ ಪಲ್ಪ್ ತೆಗೆದುಕೊಂಡು ಬಳಸಬಹುದು!
Related Posts Plugin for WordPress, Blogger...