Here are some recipes which I came across through the net, books, so on and few are my own experiments..

Wednesday, 27 April 2011

ಕ್ಯಾರೆಟ್ ಸ್ಯಾಂಡ್ ವಿಚ್ / Carrot Sandwich

Click here for English version.

ಎಲ್ಲಾದರೂ ಪ್ರವಾಸಕ್ಕೆ ಹೋಗುವಾಗ ನಾನು ಮೊದಲು ನೆನಪಿಸಿಕೊಳ್ಳುವ ತಿಂಡಿ ಇದು. ಹಿಂದಿನ ದಿನವೇ ತಯಾರಿಸಿಟ್ಟುಕೊಂಡು ಬೆಳಿಗ್ಗೆ ತಿಂಡಿ ತಯಾರಿಸುವ ಯಾವುದೇ ಜಂಜಾಟವಿಲ್ಲದೆ ಆರಾಮಾಗಿ ಉಳಿದ ಕೆಲಸಗಳನ್ನು ಮಾಡಿಕೊಳ್ಳಬಹುದು. ಬೆಳಗಿನ ತಿಂಡಿ ಅಥವಾ ಸ್ನ್ಯಾಕ್ಸ್ ನಂತೆಯೂ ಉಪಯೋಗಿಸಬಹುದು. ನಾಲ್ಕೈದು ವರ್ಷಗಳ ಹಿಂದೆ ಯಾವುದೋ ಮ್ಯಾಗಜಿನ್ ನಲ್ಲಿ ನೋಡಿ ಕಲಿತದ್ದು ಈ ಸ್ಯಾಂಡ್ ವಿಚ್.


ಬೇಕಾಗುವ ಸಾಮಗ್ರಿಗಳು:
ಮಧ್ಯಮಗಾತ್ರದ ಕ್ಯಾರೆಟ್ - 2 
ಸಣ್ಣಗೆ ಹೆಚ್ಚಿದ ಟೊಮೆಟೋ - 2 ಟೀ ಸ್ಪೂನ್
ಮಧ್ಯಮಗಾತ್ರದ ಈರುಳ್ಳಿ - 1 (ಸಣ್ಣಗೆ ಹೆಚ್ಚಿಕೊಳ್ಳಿ)
ಸಣ್ಣಗೆ ಹೆಚ್ಚಿದ ಕರಿಬೇವು - 1 ಟೀ ಸ್ಪೂನ್
ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು - 1 ಟೀ ಸ್ಪೂನ್
ಹಸಿಮೆಣಸು ಹೆಚ್ಚಿದ್ದು - 1 ಟೀ ಸ್ಪೂನ್ (ಖಾರಕ್ಕೆ ತಕ್ಕಂತೆ)
ಶುಂಠಿ ಬೆಳ್ಳುಳ್ಳಿ ಪೇಸ್ಟ್ - 1 ಟೀ ಸ್ಪೂನ್ (ಬೆಳ್ಳುಳ್ಳಿ ಬೇಡದಿದ್ದರೆ ಶುಂಠಿ ಮಾತ್ರ ಹಾಕಿ)
ಉಪ್ಪು - ರುಚಿಗೆ ತಕ್ಕಷ್ಟು 
ನಿಂಬೆರಸ - ನಾಲ್ಕಾರು ಹನಿ 
ಬ್ರೆಡ್ - 1 ಲೋಫ್ 
ತುಪ್ಪ - ಸ್ವಲ್ಪ 
ಒಗ್ಗರಣೆಗೆ: 1 ಚಮಚ ಎಣ್ಣೆ, ಜೀರಿಗೆ - 1 / 2 ಚಮಚ, ಅರಿಶಿನ - ಚಿಟಿಕೆ 


ಮಾಡುವ ವಿಧಾನ:
ಮೊದಲು ಕ್ಯಾರೆಟ್ ತುರಿದುಕೊಳ್ಳಿ. 
ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಜೀರಿಗೆ ಅರಿಶಿನ, ಹೆಚ್ಚಿದ ಹಸಿಮೆಣಸು ಹಾಕಿ ಒಗ್ಗರಣೆ ಮಾಡಿಕೊಂಡು ಅದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿ ವಾಸನೆ ಹೋಗುವಂತೆ ಹುರಿಯಿರಿ. 
ನಂತರ ಅದಕ್ಕೆ ಹೆಚ್ಚಿದ ಟೊಮೆಟೋ ಸೇರಿಸಿ ಸ್ವಲ್ಪ ಹುರಿದು, ಹೆಚ್ಚಿದ ಈರುಳ್ಳಿ ಮತ್ತು ತುರಿದ ಕ್ಯಾರೆಟ್ ಸೇರಿಸಿ. ಬಾಣಲೆಗೆ ಒಂದು ಪ್ಲೇಟನ್ನು ಅರ್ಧಂಬರ್ಧ ಮುಚ್ಚಿ ಹದವಾದ ಉರಿಯಲ್ಲಿ ಬೇಯಲು ಬಿಡಿ. 
ಮಿಶ್ರಣ ಸ್ವಲ್ಪ ಬೆಂದ ನಂತರ ಅದಕ್ಕೆ ಹೆಚ್ಚಿದ ಕರಿಬೇವು, ಕೊತ್ತಂಬರಿ ಸೊಪ್ಪು, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಕೈಯಾಡಿಸಿ. ಮಿಶ್ರಣ ಚೆನ್ನಾಗಿ ಬೆಂದು, ನೀರಿನಂಶವೆಲ್ಲಾ ಆರಿದನಂತರ ಅದಕ್ಕೆ ನಿಂಬೆರಸ ಸೇರಿಸಿ ಕಲಸಿ ಉರಿಯಿಂದ ಇಳಿಸಿ ತಣ್ಣಗಾಗಲು ಬಿಡಿ. 
ಟೊಮೆಟೋ ಹುಳಿ ಇರುವುದರಿಂದ ನಿಂಬೆರಸ ಸೇರಿಸುವಾಗ ನೋಡಿಕೊಂಡು ಸೇರಿಸಿ.
ಕಾದ ತವಾದ ಮೇಲೆ ಬ್ರೆಡ್ ಸ್ಲೈಸ್ ಗಳನ್ನು ಇಟ್ಟು ಒಂದು ಮೇಲ್ಮೈ ಯನ್ನು ತುಪ್ಪ ಹಾಕಿ ಚೆನ್ನಾಗಿ ರೋಸ್ಟ್ ಮಾಡಿಕೊಳ್ಳಿ. ರೋಸ್ಟ್ ಮಾಡಿದ ಮೇಲ್ಮೈಯ ಮೇಲೆ ಕ್ಯಾರೆಟ್ ಮಿಶ್ರಣವನ್ನು ಸಮನಾಗಿ ಹರಡಿಕೊಂಡು, ಅದರಮೇಲೆ ಇನ್ನೊಂದು ಬ್ರೆಡ್ ನ ರೋಸ್ಟ್ ಮಾಡಿದ ಮೇಲ್ಮೈ ಬರುವಂತೆ ಇಟ್ಟು ಸ್ವಲ್ಪ ಒತ್ತಿ. 
ನಂತರ ಎರಡೂ ಬ್ರೆಡ್ ಗಳ ಹೊರಭಾಗವನ್ನೂ ಚೆನ್ನಾಗಿ ರೋಸ್ಟ್ ಮಾಡಿ ತವೆಯಿಂದ ತೆಗೆಯಿರಿ. ಇದನ್ನು ಚಾಕುವಿನಿಂದ ಕ್ರಾಸ್ ಆಗಿ ಕತ್ತರಿಸಿಕೊಂಡು ತಿನ್ನಿ. 

Sunday, 24 April 2011

ಟೊಮೆಟೋ ದೋಸೆ / Tomato Dosa

Click here for English version.

ಇದು ನನ್ನ ಈ ವೀಕ್ಎಂಡ್ ಎಕ್ಸ್ ಪರಿಮೆಂಟ್. 
ಬೆಳಿಗ್ಗೆಯೇ ದೋಸೆಗೆ ಅಕ್ಕಿ ನೆನೆಹಾಕಲು ಮರೆತುಬಿಟ್ಟಿದ್ದೀರಾ? ಚಿಂತೆ ಬೇಡ, ಈ ದೋಸೆ ಮಾಡಿನೋಡಿ!


ಸರ್ವಿಂಗ್: ಇಬ್ಬರಿಗೆ ಆಗುತ್ತದೆ
ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು ( ಅಕ್ಕಿಯನ್ನು 3 - 4 ಘಂಟೆ ನೆನೆಸಿಕೊಳ್ಳಬೇಕು)

ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - ಒಂದೂವರೆ ಲೋಟ
ಮೆಂತ್ಯ - 1 ಚಮಚ
ತೆಂಗಿನ ತುರಿ - ಮುಕ್ಕಾಲು ಲೋಟ 
ಟೊಮೆಟೋ ಹಣ್ಣು - 2
ಒಣಮೆಣಸು - 3
ರುಚಿಗೆ ತಕ್ಕಷ್ಟು ಉಪ್ಪು

ಮಾಡುವ ವಿಧಾನ:
ಅಕ್ಕಿ ಮತ್ತು ಮೆಂತ್ಯವನ್ನು ರಾತ್ರಿಯೇ (ಅಥವಾ 3 - 4 ಘಂಟೆಕಾಲ) ನೆನೆಸಿಡಿ.
ಟೊಮೆಟೋ ಹಣ್ಣು, ಒಣಮೆಣಸು ಮತ್ತು ತೆಂಗಿನತುರಿಯನ್ನು ಮೊದಲು ಮಿಕ್ಸಿಯಲ್ಲಿ ರುಬ್ಬಿಕೊಂಡು ಅದಕ್ಕೆ ನೆನೆಸಿದ ಅಕ್ಕಿ ಮತ್ತು ಮೆಂತ್ಯವನ್ನು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.
ನಂತರ ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಕಾದ ಕಾವಲಿಯಮೇಲೆ ತೆಳ್ಳಗೆ ದೋಸೆ ಎರೆಯಿರಿ.
ಬಿಸಿ ಇರುವಾಗಲೇ ಚಟ್ನಿಯೊಡನೆ ತಿನ್ನಿ.

Thursday, 21 April 2011

ಸ್ವೀಟ್ ಕಾರ್ನ್ ಸೂಪ್ / Sweet Corn Veg. Soup

Click here for English version.

ಫ್ರೆಶ್ ಸ್ವೀಟ್ ಕಾರ್ನ್ ಇಲ್ಲವೇ ಫ್ರೋಜನ್ ಸ್ವೀಟ್ ಕಾರ್ನ್ ನಿಂದ ಈ ಸೂಪ್ ತಯಾರಿಸಬಹುದು. ಊಟದ ಜೊತೆಗೆ ಒಳ್ಳೆಯ ಸ್ಟಾರ್ಟರ್. 


ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ
ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು
 
ಬೇಕಾಗುವ ಸಾಮಗ್ರಿಗಳು:
ಸ್ವೀಟ್ ಕಾರ್ನ್ - 1 ಕಪ್
ಸಣ್ಣಗೆ ಹೆಚ್ಚಿದ ಬೀನ್ಸ್ - 1 / 2 ಕಪ್
ಸಣ್ಣಗೆ ಹೆಚ್ಚಿದ ಕ್ಯಾರೆಟ್ - 1 / 2 ಕಪ್
ಸಕ್ಕರೆ - ಮುಕ್ಕಾಲು ಟೀ ಸ್ಪೂನ್
ಉಪ್ಪು - ರುಚಿಗೆ ತಕ್ಕಷ್ಟು
ಕಾಳುಮೆಣಸಿನ ಪುಡಿ - ಸ್ವಲ್ಪ 
ಕಾರ್ನ್ ಫ್ಲೋರ್ - 2 ಟೀ ಸ್ಪೂನ್
ಹಾಲು (ಬೇಕಿದ್ದರೆ) - 1 1/2 ಟೀ ಸ್ಪೂನ್
ಟೊಮೇಟೊ ಸಾಸ್ - 1 ಟೀ ಸ್ಪೂನ್

ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ ಸ್ವಲ್ಪ ನೀರು, ಅರ್ಧ ಕಪ್ ಸ್ವೀಟ್ ಕಾರ್ನ್, ಹೆಚ್ಚಿದ ಬೀನ್ಸ್ ಮತ್ತು ಹೆಚ್ಚಿದ ಕ್ಯಾರೆಟ್ ಹಾಕಿ ಉಪ್ಪು, ಸ್ವಲ್ಪ ಸಕ್ಕರೆ ಹಾಕಿ 10 - 12 ನಿಮಿಷ ಬೇಯಿಸಿ. ಉಳಿದರ್ಧ ಸ್ವೀಟ್ ಕಾರ್ನ್ ನ್ನು ಮಿಕ್ಸಿಯಲ್ಲಿ ತರಿಯಾಗಿ ರುಬ್ಬಿಕೊಳ್ಳಿ. ರುಬ್ಬಿದ ಮಿಶ್ರಣವನ್ನು ಬೆಂದ ತರಕಾರಿಯೊಡನೆ ಸೇರಿಸಿ.
ಕಾರ್ನ್ ಫ್ಲೋರ್ ಗೆ ಸ್ವಲ್ಪ ತಣ್ಣನೆಯ ನೀರು ಸೇರಿಸಿ ಗಂಟಿಲ್ಲದಂತೆ ಕದಡಿ, ಕುದಿಯುವ ಮಿಶ್ರಣಕ್ಕೆ ಸೇರಿಸಿ ತಳ ಹಿಡಿಯದಂತೆ ಕೈಯಾಡಿಸುತ್ತಿರಿ. ಬೇಕಿದ್ದರೆ 2 ಟೀ ಸ್ಪೂನ್ ಹಾಲನ್ನೂ ಸೇರಿಸಿ. ರುಚಿಗೆ ತಕ್ಕಂತೆ ಉಪ್ಪು ಮತ್ತು ಸಕ್ಕರೆಯನ್ನು ಸೇರಿಸಿ. ಸ್ವಲ್ಪ ಟೊಮೇಟೊ ಸಾಸ್ ಸೇರಿಸಿ ಕೈಯಾಡಿಸಿ ಉರಿಯಿಂದ ಇಳಿಸಿ. ಖಾರಕ್ಕೆ ತಕ್ಕಂತೆ ಕಾಳುಮೆಣಸಿನ ಪುಡಿ ಸೇರಿಸಿ ಕದಡಿ, ಬಿಸಿಯಿರುವಾಗಲೇ ಸವಿಯಿರಿ. ಬೇಕಿದ್ದರೆ ಕರಿದ ಬ್ರೆಡ್ ಚೂರುಗಳನ್ನು ಸೇರಿಸಿಕೊಳ್ಳಿ. ಈ ಸೂಪ್ ಗೆ  ಉಪ್ಪು, ಖಾರ, ಸಿಹಿ ಯಾವುದೂ ಜಾಸ್ತಿ ಇರಬಾರದು.

Monday, 18 April 2011

ಕ್ಯಾಬೇಜ್ - ಹೆಸರುಕಾಳಿನ ಪಲ್ಯ / Spiced Cabbage - Green Gram

Click here for English version.

ಸಾಮಾನ್ಯವಾಗಿ ಯಾವಾಗಲೂ ಮಾಡುವ ಕ್ಯಾಬೇಜ್ ಪಲ್ಯಕ್ಕೆ ನೆನೆಸಿದ ಹೆಸರುಕಾಳನ್ನು ಸೇರಿಸಿ ಮಾಡಿದಾಗ ಸಿದ್ಧವಾದದ್ದು ಈ ಪಲ್ಯ. ಇದಕ್ಕೆ ಮೊಳಕೆ ಬಂದ ಹೆಸರು ಕಾಳನ್ನು ಹಾಕಿದರೂ ಚೆನ್ನಾಗಿರುತ್ತದೆ, ಜೊತೆಗೆ ಆರೋಗ್ಯದ ದೃಷ್ಟಿಯಿಂದಲೂ ಒಳ್ಳೆಯದು.
 

ಸರ್ವಿಂಗ್: 3 ಜನರಿಗೆ ಆಗುತ್ತದೆ
ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು


ಬೇಕಾಗುವ ಸಾಮಗ್ರಿ:
ಸಣ್ಣಗೆ ಹೆಚ್ಚಿದ ಕ್ಯಾಬೇಜ್ - 2 ಕಪ್
ಹೆಸರುಕಾಳು - 1 / 2 ಕಪ್ (7 - 8 ಘಂಟೆಕಾಲ ನೀರಲ್ಲಿ ನೆನೆಸಿಕೊಳ್ಳಿ )  
ಚಿಕ್ಕ ಈರುಳ್ಳಿ - 1 
ಹಸಿಮೆಣಸು - 2 ರಿಂದ 3 
ಕರಿಬೇವು - ಸ್ವಲ್ಪ
ನಿಂಬೆರಸ - ಸ್ವಲ್ಪ 
ರುಚಿಗೆ ತಕ್ಕಷ್ಟು ಉಪ್ಪು 
ಒಗ್ಗರಣೆಗೆ: ಎಣ್ಣೆ - 4 ಚಮಚ, ಉದ್ದಿನ ಬೇಳೆ - 1 / 2 ಚಮಚ, ಸಾಸಿವೆ - 1 / 4 ಚಮಚ , ಅರಿಶಿನ - 1 / 4 ಚಮಚ

ಮಾಡುವ ವಿಧಾನ:
 

ಈರುಳ್ಳಿ, ಹಸಿಮೆಣಸನ್ನು ಹೆಚ್ಚಿಕೊಳ್ಳಿ.
ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಉದ್ದಿನಬೇಳೆ, ಸಾಸಿವೆ, ಅರಿಶಿನ, ಹಸಿಮೆಣಸು, ಕರಿಬೇವು ಸೇರಿಸಿ ಚಟಗುಟ್ಟಿದಮೇಲೆ ಹೆಚ್ಚಿದ ಕ್ಯಾಬೇಜ್ ಸೇರಿಸಿ ಕೈಯಾಡಿಸಿ ಒಂದು ಪ್ಲೇಟ್ ಮುಚ್ಚಿ 2 - 3 ನಿಮಿಷ ಬೇಯಿಸಿ.
ನಂತರ ನೆನೆಸಿದ ಹೆಸರುಕಾಳು, ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ ಬೇಯಿಸಿ. ಬೇಕಿದ್ದರೆ ಸ್ವಲ್ಪ ಸಕ್ಕರೆಯನ್ನೂ ಸೇರಿಸಿ. ಆಗಾಗ ಪ್ಲೇಟ್ ತೆಗೆದು ಪಲ್ಯವನ್ನು ಕೈಯಾಡಿಸುತ್ತಿರಿ.
ಪಲ್ಯದ ಮಿಶ್ರಣ ಮುಕ್ಕಾಲು ಭಾಗ ಬೆಂದಾಗ ಅದಕ್ಕೆ ಹೆಚ್ಚಿದ ಈರುಳ್ಳಿ ಸೇರಿಸಿ 3 - 4 ನಿಮಿಷ ಬೇಯಿಸಿ ಕೆಳಗಿಳಿಸಿ. ನಂತರ ಇದಕ್ಕೆ ನಿಂಬೆರಸ ಸೇರಿಸಿ ಕೈಯಾಡಿಸಿ.
ಇದು ಅನ್ನ, ರೊಟ್ಟಿ, ಚಪಾತಿ ಹಾಗೂ ದೋಸೆಯೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ.

ಪಾನಿ ಪುರಿ / Pani Puri

Click here for English version.

ಪಾನಿಪುರಿ ಯಾರಿಗೆ ತಾನೇ ಇಷ್ಟವಿಲ್ಲ? ರಸ್ತೆ ಪಕ್ಕದ ಚಾಟ್ ಅಂಗಡಿಗಳಲ್ಲಿ ಪಾನಿಪುರಿ ತಿನ್ನುವ ಗಮ್ಮತ್ತೇ ಬೇರೆ. ಹುಳಿ ಹುಳಿ, ಖಾರ ಖಾರವಾಗಿರುವ 'ಪಾನಿ' ಅಥವಾ 'ಜೀರಿಗೆ ನೀರು' ತಯಾರಿಕೆಯೇ ಇದರಲ್ಲಿ ಮುಖ್ಯವಾದುದು. ಮನೆಯಲ್ಲೇ ಪಾನಿಪುರಿ ತಯಾರಿಸಲು ಸುಲಭದ ವಿಧಾನ ಇಲ್ಲಿದೆ..


ಸರ್ವಿಂಗ್: 4 - 5 ಜನರಿಗೆ ಆಗುತ್ತದೆ 
ತಯಾರಿಸಲು ಬೇಕಾಗುವ ಸಮಯ  : 40 ನಿಮಿಷಗಳು

ಬೇಕಾಗುವ ಸಾಮಗ್ರಿ:
1 ) ಪಾನಿ ತಯಾರಿಸಲು - 
     ಕೊತ್ತಂಬರಿ ಸೊಪ್ಪು - 1 ಕಟ್ಟು
     ಪುದೀನಾ ಸೊಪ್ಪು - 1 ಕಟ್ಟು
     ಹಸಿಮೆಣಸು - 2 ರಿಂದ 3 
     ಹುಣಸೆಹಣ್ಣು - ದೊಡ್ಡ ನಿಂಬೆಗಾತ್ರದಷ್ಟು
     ನಿಂಬೆಹಣ್ಣು - 1 
     ಕಾಳುಮೆಣಸು - 2 ಟೀ ಚಮಚ 
     ಜೀರಿಗೆ - 2 ಟೀ ಚಮಚ
     ಉಪ್ಪು - ರುಚಿಗೆ ತಕ್ಕಷ್ಟು    
     ಕುದಿಸಿ ಆರಿಸಿದ ನೀರು - ಸುಮಾರು ಒಂದೂವರೆ ಲೀಟರ್
2 ) ಆಲೂ ಪಲ್ಯ ತಯಾರಿಸಲು -
     1 ದೊಡ್ಡ ಆಲೂಗಡ್ಡೆ
     ಕೆಂಪು ಮೆಣಸಿನ ಪುಡಿ - 1 / 2 ಚಮಚ
     ಕಾಳುಮೆಣಸಿನ ಪುಡಿ - 1 / 4 ಚಮಚ
     ಉಪ್ಪು - ರುಚಿಗೆ ತಕ್ಕಷ್ಟು 
     ಆಮ್ ಚೂರ್ ಪೌಡರ್ - 1 / 4 ಚಮಚ ಅಥವಾ ನಾಲ್ಕಾರು ಹನಿ ನಿಂಬೆರಸ
     ಮಧ್ಯಮಗಾತ್ರದ ಈರುಳ್ಳಿ - 1 
     ಹೆಚ್ಚಿದ ಕೊತ್ತಂಬರಿ ಸೊಪ್ಪು - 2 ಚಮಚ  

ಮಾಡುವ ವಿಧಾನ:
ಪಾನಿ
ಕರಿಮೆಣಸು, ಜೀರಿಗೆಯನ್ನು ಹುರಿದು ಪುಡಿಮಾಡಿಕೊಳ್ಳಿ. ಹರಳು ಉಪ್ಪನ್ನು ಸೇರಿಸುವುದಾದರೆ ಅದನ್ನೂ ಸ್ವಲ್ಪ ಹುರಿದುಕೊಳ್ಳಿ. 
ಕೊತ್ತಂಬರಿ ಸೊಪ್ಪು, ಪುದೀನಾ ಸೊಪ್ಪು, ಹುಣಸೆಹಣ್ಣು, ಹಸಿಮೆಣಸು ಇಷ್ಟನ್ನೂ ಸ್ವಲ್ಪ ನೀರು ಸೇರಿಸಿ ರುಬ್ಬಿ, ಚೆನ್ನಾಗಿ ಸೋಸಿಕೊಳ್ಳಿ.  
ಸೋಸಿಕೊಂಡ ರಸಕ್ಕೆ ಬೇಕಾದಷ್ಟು ನೀರನ್ನು ಸೇರಿಸಿ, ಪುಡಿಮಾಡಿದ ಜೀರಿಗೆ, ಕರಿಮೆಣಸನ್ನು ಸೇರಿಸಿ. ರುಚಿಗೆ ತಕ್ಕಂತೆ ಉಪ್ಪು ಮತ್ತು ನಿಂಬೆರಸವನ್ನು ಸೇರಿಸಿ ಕಲಕಿ. ಇದರ ರುಚಿ ಉಪ್ಪು, ಹುಳಿ, ಖಾರ ಹದವಾಗಿರಬೇಕು. 
ಆಲೂ ಪಲ್ಯ
ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. 
ಆಲೂಗಡ್ಡೆಯನ್ನು ಬೇಯಿಸಿ, ಕೈಗಳಿಂದ ಹಿಸುಕಿ ಮೆತ್ತಗೆ ಹಿಟ್ಟಿನಂತೆ ಮಾಡಿಕೊಳ್ಳಿ. 
ಇದಕ್ಕೆ ಹೆಚ್ಚಿದ ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಕೆಂಪು ಮೆಣಸಿನ ಪುಡಿ, ಪುಡಿಮಾಡಿದ ಕಾಳುಮೆಣಸು, ಉಪ್ಪು, ಹುಳಿ ಎಲ್ಲವನ್ನೂ ಸೇರಿಸಿ ಚೆನ್ನಾಗಿ ಕಲಸಿ.

ಈಗ ಗೋಲ್ ಗಪ್ಪಾ ಅಥವಾ ಪೂರಿಯನ್ನು ತೆಗೆದುಕೊಂಡು ಕೈಯಿಂದ ಒತ್ತಿ ಒಂದು ಮೇಲ್ಮೈಯಲ್ಲಿ ತೂತು ಮಾಡಿಕೊಳ್ಳಿ. ಪೂರಿಯ ಅರ್ಧಭಾಗದವರೆಗೆ ಪಲ್ಯವನ್ನು ತುಂಬಿ, ನಂತರ ಉಳಿದರ್ಧಕ್ಕೆ ಪಾನಿ  ಅಥವಾ ಜೀರಿಗೆ ನೀರನ್ನು ತುಂಬಿಸಿ ಇಡೀ ಪೂರಿಯನ್ನು ಹಾಗೇ ಬಾಯಲ್ಲಿಟ್ಟು ಸವಿಯಿರಿ.

ಗೋಲ್ ಗಪ್ಪಾ / Gol Gappa

Click here for English version.

ಗೋಲ್ ಗಪ್ಪಾ, ಚಾಟ್ ತಿಂಡಿಗಳನ್ನು ತಯಾರಿಸುವಾಗ ಬಳಸುವ ಚಿಕ್ಕ ಪೂರಿ. ಗೋಲ್ ಗಪ್ಪಾ ಮನೆಯಲ್ಲಿ ಇದೆ ಎಂದಾದರೆ ಯಾವಾಗ ಬೇಕಾದರೂ ವಿವಿಧ ಚಾಟ್  ತಿಂಡಿಗಳನ್ನು ತಯಾರಿಸಿಕೊಳ್ಳಬಹುದು. ಸಾಮಾನ್ಯವಾಗಿ ಅಂಗಡಿಯಿಂದ ಕೊಂಡುತರುವ ಈ ಪೂರಿಗಳನ್ನು ಮನೆಯಲ್ಲೇ ಬಹಳ ಸುಲಭವಾಗಿ ಮಾಡಿಕೊಳ್ಳಲು ಇಲ್ಲಿದೆ ವಿಧಾನ..

ಬೇಕಾಗುವ ಸಾಮಗ್ರಿ:
ಸೂಜಿ ರವಾ - ಒಂದೂವರೆ ಕಪ್
ಮೈದಾಹಿಟ್ಟು - 3 ರಿಂದ 4 ಟೀ ಸ್ಪೂನ್
ಉಪ್ಪು - ರುಚಿಗೆ ತಕ್ಕಷ್ಟು
ಅಡಿಗೆ ಸೋಡಾ - ಕಾಲು ಚಮಚ
ನೀರು - ಹಿಟ್ಟನ್ನು ಕಲಸಲು
ಕರಿಯಲು ಎಣ್ಣೆ 
     
ಮಾಡುವ ವಿಧಾನ:
ರವಾ, ಮೈದಾಹಿಟ್ಟು, ಉಪ್ಪು, ಸೋಡಾ ಇಷ್ಟನ್ನೂ ಸೇರಿಸಿ ಚೆನ್ನಾಗಿ ಕಲಸಿಕೊಳ್ಳಿ. ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸುತ್ತಾ ಚಪಾತಿ ಹಿಟ್ಟಿನಂತೆ ಕಲಸಿಕೊಳ್ಳಿ. ಹಿಟ್ಟು ಸ್ವಲ್ಪ ಗಟ್ಟಿಯಾಗೇ ಇರಲಿ. ಇದನ್ನು ನಾದಿ ಉಂಡೆಯಂತೆ ಮಾಡಿ, ಒದ್ದೆ ಬಟ್ಟೆಯನ್ನು ಮುಚ್ಚಿ ಅರ್ಧ ಘಂಟೆ ನೆನೆಯಲು ಬಿಡಿ. 
ನಂತರ ಹಿಟ್ಟಿನಿಂದ ಉಂಡೆಗಳನ್ನು ಮಾಡಿಕೊಂಡು, ಚಪಾತಿಯಂತೆ ಲಟ್ಟಿಸಿಕೊಳ್ಳಿ. ಬೇಕಿದ್ದರೆ ಸ್ವಲ್ಪ ಮೈದಾಹಿಟ್ಟನ್ನು ಸವರಿಕೊಳ್ಳುತ್ತ ಲಟ್ಟಿಸಿ.


ಒಂದು ಪುಟ್ಟ ಮುಚ್ಚಳ ಅಥವಾ ಯಾವುದಾದರೂ ಗೋಲಾಕಾರಕ್ಕೆ ಪುಟ್ಟದಾಗಿ ಕತ್ತರಿಸಲು ಬರುವಂಥ ಸಾಮಗ್ರಿಯಿಂದ ಚಪಾತಿಯಿಂದ ಪುಟ್ಟ ಪುಟ್ಟ ಪೂರಿಗಳನ್ನು ಕತ್ತರಿಸಿ ತೆಗೆಯಿರಿ. ಉಳಿದ ಹಿಟ್ಟನ್ನು ಪುನಃ ಚಪಾತಿಯಂತೆ ಲಟ್ಟಿಸಿ, ಪೂರಿಯಾಕಾರಕ್ಕೆ ಕತ್ತರಿಸಿಕೊಳ್ಳಿ. ಎಲ್ಲ ಪೂರಿಗಳನ್ನು ಒಮ್ಮೆಗೇ ಲಟ್ಟಿಸಿಕೊಳ್ಳುವುದಾದರೆ, ಲಟ್ಟಿಸಿದ ಪೂರಿಗಳು ಒಣಗಿಹೋಗದಂತೆ ಒಂದು ಪ್ಲೇಟ್ ಮುಚ್ಚಿಡಿ.

ಒಂದು ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ, ಪೂರಿಗಳನ್ನು ಹಾಕಿ ಕರಿಯಿರಿ. ಸ್ವಲ್ಪ ಹೊಂಬಣ್ಣ ಬರತೊಡಗಿದಾಗ ಪೂರಿಗಳನ್ನು ಎಣ್ಣೆಯಿಂದ ತೆಗೆದು, ಟಿಷ್ಯೂ ಪೇಪರ್ ಮೇಲೆ ಹರವಿ, ಎಣ್ಣೆ ಆರಲು ಬಿಡಿ. ಪೂರಿಗಳು ತಣ್ಣಗಾದನಂತರ ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ.

ಸೂಚನೆ: ಉಬ್ಬದ ಪೂರಿಗಳನ್ನೂ ಎತ್ತಿಟ್ಟುಕೊಂಡಿರಿ. ಈ ಪೂರಿಗಳಿಂದ ಟಿಕ್ಕಿ ಪೂರಿ ಇತ್ಯಾದಿ ಚಾಟ್ ಗಳನ್ನು ತಯಾರಿಸಬಹುದು.  

Tuesday, 12 April 2011

ಆಲೂ ಗ್ರೇವಿ / Aloo Gravy

Click here for English Version.

ಇದು ಸುವರ್ಣ ಚಾನೆಲ್ ನಲ್ಲಿ ಸಿಹಿ ಕಹಿ ಚಂದ್ರುರವರು ತೋರಿಸಿಕೊಟ್ಟ ಅಡಿಗೆಯಲ್ಲಿ ಚಿಕ್ಕ ಪುಟ್ಟ ಬದಲಾವಣೆಗಳನ್ನು ಮಾಡಿ ನಾನು ತಯಾರಿಸಿದ ಸಬ್ಜಿ. ಚಪಾತಿ, ರೊಟ್ಟಿ, ನಾನ್ ಇತ್ಯಾದಿಗಳೊಡನೆ ಒಳ್ಳೆಯ ಕಾಂಬಿನೇಷನ್.
                                 
ಬೇಕಾಗುವ  ಸಾಮಗ್ರಿ:
ಆಲೂಗಡ್ಡೆ - 1 (ದೊಡ್ಡದು)
ಗೋಡಂಬಿ (ನೆನೆಸಿದ್ದು) 8 - 10 
ಏಲಕ್ಕಿ - 1 
ಶುಂಠಿ - 1 ಇಂಚು
ಬೆಳ್ಳುಳ್ಳಿ - 1 ತೊಳೆ
ಜೀರಿಗೆ - 1 ಚಮಚ
ಸೋಂಪು - 1 / 2 ಚಮಚ
ಬ್ಯಾಡಗಿ ಮೆಣಸು - 3
ಗರಂ ಮಸಾಲಾ ಪುಡಿ - 1 / 2 ಚಮಚ  
ಕಸೂರಿ ಮೇಥಿ - 1 / 2 ಟೀ ಚಮಚ 
ಜೇನುತುಪ್ಪ - 3 / 4 ಟೀ ಚಮಚ
ಹೆಚ್ಚಿದ ಕೊತ್ತಂಬರಿ ಸೊಪ್ಪು - 2 ಚಮಚ
ರುಚಿಗೆ ತಕ್ಕಷ್ಟು ಉಪ್ಪು 
ಒಗ್ಗರಣೆಗೆ: ಎಣ್ಣೆ - 2 ಚಮಚ, ಜೀರಿಗೆ - 1 / 4 ಚಮಚ 
ಕರಿಯಲು ಎಣ್ಣೆ - ಸ್ವಲ್ಪ

ಮಾಡುವ ವಿಧಾನ:
ನೆನೆಸಿದ ಗೋಡಂಬಿ, ಏಲಕ್ಕಿ, ಶುಂಠಿ, ಬೆಳ್ಳುಳ್ಳಿ, ಜೀರಿಗೆ, ಸೋಂಪು, ಬ್ಯಾಡಗಿ ಮೆಣಸು - ಇಷ್ಟನ್ನೂ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. 
ಆಲೂಗಡ್ಡೆಯನ್ನು ಮಧ್ಯಮಗಾತ್ರದ ಹೋಳುಗಳಾಗಿ ಹೆಚ್ಚಿಕೊಳ್ಳಿ. ಇವನ್ನು ಚೆನ್ನಾಗಿ ಬೇಯಲು ಅನುಕೂಲವಾಗುವಂತೆ ಫೋರ್ಕ್ ನಿಂದ ಎಲ್ಲ ಕಡೆಗಳಲ್ಲೂ ಚುಚ್ಚಿಡಿ. ನಂತರ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ, ಆಲೂಗಡ್ಡೆ ಹೋಳುಗಳನ್ನು ಹಾಕಿ ಕರಿಯಿರಿ. ಬೆಂದನಂತರ ತೆಗೆದು, ಒಂದು ಬೌಲ್ ನಲ್ಲಿ ಹಾಕಿಟ್ಟುಕೊಳ್ಳಿ. 
ಬಾಣಲೆಯಲ್ಲಿ 2 ಚಮಚದಷ್ಟು ಎಣ್ಣೆ ಬಿಸಿಮಾಡಿ ಜೀರಿಗೆ ಹಾಕಿ ಒಗ್ಗರಣೆ ಮಾಡಿಕೊಳ್ಳಿ. ಇದಕ್ಕೆ ರುಬ್ಬಿದ ಮಿಶ್ರಣವನ್ನು ಸೇರಿಸಿ, ಸ್ವಲ್ಪ ನೀರನ್ನೂ ಹಾಕಿ ಹಸಿ ವಾಸನೆ ಹೋಗುವವರೆಗೆ ಕುದಿಸಿ. ನಂತರ ಇದಕ್ಕೆ ಕರಿದ ಆಲೂಗಡ್ಡೆ ಹೋಳುಗಳು, ಗರಂ ಮಸಾಲಾ ಪುಡಿ, ಕಸೂರಿ ಮೇಥಿ, ಜೇನುತುಪ್ಪ, ಉಪ್ಪು, ಕೊತ್ತಂಬರಿ ಸೊಪ್ಪು ಎಲ್ಲವನ್ನೂ ಹಾಕಿ ನಾಲ್ಕೈದು ನಿಮಿಷ ಕುದಿಸಿ ಇಳಿಸಿ.

Monday, 11 April 2011

ಕ್ಯಾರೆಟ್ ಗೊಜ್ಜು / Carrot Gojju

Click here for English version.

ಊಟದೊಡನೆ ಇಂಥದ್ದೊಂದು ಗೊಜ್ಜು ಇದ್ದರೆ ತುತ್ತು ಹೊಟ್ಟೆಗಿಳಿದದ್ದೇ ಗೊತ್ತಾಗುವುದಿಲ್ಲ! 


ಬೇಕಾಗುವ ಸಾಮಗ್ರಿ:
ಮಧ್ಯಮ ಗಾತ್ರದ ಕ್ಯಾರೆಟ್ - 1 
ಹುಣಸೆಹಣ್ಣು - ನೆಲ್ಲಿಕಾಯಿ ಗಾತ್ರದಷ್ಟು
ಒಣಮೆಣಸು - 1
ಉದ್ದಿನಬೇಳೆ - 1 / 2 ಚಮಚ
ಸಾಸಿವೆ - 1 / 4 ಚಮಚ
ಇಂಗು - ಚಿಟಿಕೆ
ಅರಿಶಿನ - 1 / 4 ಚಮಚ 
ಹಸಿಮೆಣಸು - 3
ತೆಂಗಿನತುರಿ - 1 / 2 ಕಪ್
ರುಚಿಗೆ ತಕ್ಕಷ್ಟು ಉಪ್ಪು
ಎಣ್ಣೆ - 2 ಚಮಚ

ವಿಧಾನ
ಕ್ಯಾರೆಟ್ ನ್ನು ಚಿಕ್ಕ ಚಿಕ್ಕ ಚೂರುಗಳಾಗಿ ಹೆಚ್ಚಿಕೊಳ್ಳಿ. ಬಾಣಲೆಯಲ್ಲಿ 1 ಚಮಚ ಎಣ್ಣೆ ಕಾಯಿಸಿ, ಒಣಮೆಣಸು, ಉದ್ದಿನಬೇಳೆ, ಸ್ವಲ್ಪ ಸಾಸಿವೆ, ಚಿಟಿಕೆ ಇಂಗು, ಅರಿಶಿನ, ಹಸಿಮೆಣಸು ಹಾಕಿ ಒಗ್ಗರಣೆ ಮಾಡಿಕೊಂಡು, ಕ್ಯಾರೆಟ್ ಹೋಳುಗಳನ್ನು ಸೇರಿಸಿ, ಸ್ವಲ್ಪ ನೀರು ಹಾಕಿ ಮೆತ್ತಗೆ ಬೇಯಿಸಿಕೊಳ್ಳಿ. ನಂತರ ಇದನ್ನು ತೆಂಗಿನತುರಿ, ಉಪ್ಪು, ಹುಣಸೆ ಹಣ್ಣಿನೊಂದಿಗೆ ಮಿಕ್ಸಿಯಲ್ಲಿ ಸ್ವಲ್ಪ ತರಿಯಾಗಿ ರುಬ್ಬಿಕೊಳ್ಳಿ. ಮಿಶ್ರಣ ಸ್ವಲ್ಪ ಮಂದವಾಗಿರಲಿ, ಜಾಸ್ತಿ ನೀರು ಸೇರಿಸಬೇಡಿ. ನಂತರ ಇದಕ್ಕೆ ಎಣ್ಣೆ, ಸಾಸಿವೆಯ ಒಗ್ಗರಣೆ ಕೊಡಿ.
ಇದು ಅನ್ನದೊಡನೆ ಕಲೆಸಿಕೊಳ್ಳಲು ಚೆನ್ನಾಗಿರುತ್ತದೆ.

Monday, 4 April 2011

ಕಡಲೆಬೇಳೆ ಹೋಳಿಗೆ(ಒಬ್ಬಟ್ಟು) / Kadlebele holige

Click here for English version.

ಇದು ಹಬ್ಬ - ಹರಿದಿನಗಳಲ್ಲಿ ಸಾಮಾನ್ಯವಾಗಿ ತಯಾರಿಸುವ, ಜೊತೆಗೆ ಎಲ್ಲರಿಗೂ ಇಷ್ಟವಾಗುವ ಸಿಹಿ ಕಜ್ಜಾಯ. ತಯಾರಿಸುವುದು ಸ್ವಲ್ಪ ಕಷ್ಟವಾದರೂ ಇದನ್ನು ತಿನ್ನುವಾಗಿನ ಖುಷಿಯೇ ಬೇರೆ!


ಬೇಕಾಗುವ ಸಾಮಗ್ರಿ
ಕಡಲೆಬೇಳೆ - 1 ಲೋಟ ( 2 - 3 ಘಂಟೆ ನೆನೆಸಿಕೊಳ್ಳಿ)
ಬೆಲ್ಲ ಅಥವಾ ಸಕ್ಕರೆ - ಅಂದಾಜು 1 ಲೋಟ
ಉಪ್ಪು - ಸ್ವಲ್ಪ
ಅರಿಶಿನ - 1 / 4 ಚಮಚ
ಮೈದಾಹಿಟ್ಟು - 1 ಕಪ್
ಏಲಕ್ಕಿ ಪುಡಿ - 1 ಚಮಚ 
ಎಣ್ಣೆ 4 - 5 ಟೇಬಲ್ ಚಮಚ
ನೀರು - ಸ್ವಲ್ಪ

ವಿಧಾನ
ಕಣಕಕ್ಕೆ: ಮೊದಲು 1 ಕಪ್ ಮೈದಾಹಿಟ್ಟಿಗೆ ಕಾಲು ಚಮಚ ಅರಿಶಿನ, ಚಿಟಿಕೆ ಉಪ್ಪು ಹಾಕಿ ಕಲಸಿಕೊಳ್ಳಿ. ಈ ಮಿಶ್ರಣಕ್ಕೆ ಸುಮಾರು ಕಾಲು ಕಪ್ ನೀರು ಹಾಕಿ ಜಿಗುಟಾಗುವಂತೆ ಕಲಸಿ, ನಾಲ್ಕೈದು ಚಮಚ ಎಣ್ಣೆ ಸೇರಿಸಿ ಹತ್ತು ನಿಮಿಷ ಹಿಟ್ಟನ್ನು ಚೆನ್ನಾಗಿ ನಾದಿ. ಬೇಕಿದ್ದರೆ ಇನ್ನೂ ಸ್ವಲ್ಪ ಎಣ್ಣೆ ಸೇರಿಸಿ. ಹಿಟ್ಟು ಮೆತ್ತಗಿದ್ದು, ಕೈಗೆ ಅಂಟದಂತಿರಲಿ. ಇದನ್ನು ಒಂದು ಪಾತ್ರೆಯಲ್ಲಿಟ್ಟು ಒದ್ದೆ ಬಟ್ಟೆ ಮುಚ್ಚಿ, 2 - 3 ಘಂಟೆಗಳ ಕಾಲ ನೆನೆಯಲು ಬಿಡಿ.
ಹೂರಣಕ್ಕೆ: ಕಡ್ಲೆಬೇಳೆಗೆ ನೆನೆಯುವಷ್ಟು ನೀರು ಸೇರಿಸಿ, ಸುಮಾರು ಕಾಲು ಚಮಚ ಉಪ್ಪು ಹಾಕಿ ಕುಕ್ಕರ್ ಪಾತ್ರೆಯಲ್ಲಿಟ್ಟು ಕುಕ್ಕರ್ ನಲ್ಲಿ 1 ವಿಷಲ್ ಆಗುವವರೆಗೆ ಬೇಯಿಸಿ. ಇದು ಸ್ವಲ್ಪ ತಣ್ಣಗಾದ ನಂತರ ನೀರನ್ನು ಹೊರಚೆಲ್ಲಿ, ಬೇಳೆಯೊಡನೆ ಬೆಲ್ಲ ಅಥವಾ ಸಕ್ಕರೆ ಹಾಗೂ ಚಿಟಿಕೆ ಉಪ್ಪು ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ತಿರುವಿಕೊಳ್ಳಿ. ಇದಕ್ಕೆ ಸ್ವಲ್ಪ ಬೆಲ್ಲ ಹಾಗೂ ಸ್ವಲ್ಪ ಸಕ್ಕರೆ ಎರಡನ್ನೂ ಹಾಕಿದರೆ ಚೆನ್ನಾಗಿರುತ್ತದೆ. ರುಬ್ಬಿದ ನಂತರ ರುಚಿ ನೋಡಿಕೊಂಡು, ಸಿಹಿ ಬೇಕಿದ್ದರೆ ಸೇರಿಸಿಕೊಳ್ಳಿ. ನಂತರ ಇದಕ್ಕೆ ಏಲಕ್ಕಿಪುಡಿ ಸೇರಿಸಿ ಕಲಸಿ, ಮೈಕ್ರೋವೇವ್ ಓವನ್ ನಲ್ಲಿ 2 - 3 ನಿಮಿಷ ಬಿಸಿಮಾಡಿ ಹೊರತೆಗೆಯಿರಿ. ನಂತರ ಒಮ್ಮೆ ಕೈಯಾಡಿಸಿ ಪುನಃ ಓವನ್ ನಲ್ಲಿ ಬಿಸಿಮಾಡಿ. ಇದೇ ರೀತಿ ನಾಲ್ಕೈದು ಬಾರಿ ಮಾಡಿ, ಹಿಟ್ಟು ಉಂಡೆ ಕಟ್ಟುವ ಹದಕ್ಕೆ ಬಂದಾಗ ಹೊರತೆಗೆದು ತಣ್ಣಗಾಗಲು ಬಿಡಿ. 
ಓವನ್ ಇಲ್ಲದಿದ್ದರೆ ದಪ್ಪ ತಳದ ಪಾತ್ರೆಯಲ್ಲಿ ರುಬ್ಬಿದ ಮಿಶ್ರಣವನ್ನು ಹಾಕಿಕೊಂಡು ಹದವಾದ ಉರಿಯಲ್ಲಿ ಕೈಯಾಡಿಸುತ್ತ, ಉಂಡೆ ಕಟ್ಟುವ ಹದಕ್ಕೆ ಬಂದಾಗ ಉರಿಯಿಂದ ಇಳಿಸಿ. ತಯಾರಿಸಿದ ಹೂರಣದಿಂದ ಚಿಕ್ಕ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿಕೊಳ್ಳಿ. ಕಣಕವನ್ನೂ ಪಾಲುಮಾಡಿ, ಹೂರಣದ ಉಂಡೆಯಷ್ಟೇ ಸಂಖ್ಯೆಯ, ಸ್ವಲ್ಪ ಚಿಕ್ಕದಾದ ಉಂಡೆಗಳನ್ನು ಮಾಡಿಕೊಳ್ಳಿ. ಕಣಕದೊಳಗೆ ಹೂರಣದ ಉಂಡೆಯನ್ನಿರಿಸಿ, ಹೂರಣ ಹೊರಬರದಂತೆ ಉಂಡೆ ಮಾಡಿ, ಚಪ್ಪಟೆ ಮಾಡಿಕೊಂಡು ಮೈದಾ / ಗೋಧಿ ಹಿಟ್ಟಿನಲ್ಲಿ ಹೊರಳಿಸಿಕೊಂಡು ತೆಳ್ಳಗೆ ನಾಜೂಕಾಗಿ ರೊಟ್ಟಿಯಂತೆ ಲಟ್ಟಿಸಿ. ಇದನ್ನು ಕಾವಲಿಯಮೇಲೆ ಹದವಾದ ಉರಿಯಲ್ಲಿ ಎರಡೂ ಕಡೆ ಕೆಂಪಗೆ ಬೇಯಿಸಿ ತೆಗೆಯಿರಿ.

ತೆಳ್ಳಗಿನ ತುಪ್ಪ ಮತ್ತು ಸಕ್ಕರೆ ಪಾಕ ಈ ಹೋಳಿಗೆಗೆ ಒಳ್ಳೆಯ ಕಾಂಬಿನೇಶನ್!

Friday, 1 April 2011

Tomato Rasam / ಟೊಮೇಟೊ ರಸಂ

Click here for English version.

ಮನೆಯಲ್ಲೇ ಇರಬಹುದಾದ ಸಾಮಗ್ರಿಗಳಿಂದ ಬಹಳ ಸುಲಭವಾಗಿ ತಯಾರಿಸಬಹುದಾದ ಈ ರಸಂ, ಜೀರ್ಣಕಾರಿಯೂ ಹೌದು. ಇದು ನನ್ನ ಅಕ್ಕನಿಂದ ಕಲಿತ ಅಡುಗೆ.

ಬೇಕಾಗುವ ಸಾಮಗ್ರಿ:
ಕಳಿತ ಟೊಮೇಟೊ - 1 (ದೊಡ್ಡದು)
ತೆಂಗಿನತುರಿ (ಬೇಕಿದ್ದರೆ) - 1 ಟೀ ಸ್ಪೂನ್
ಹೆಸರುಬೇಳೆ - 1 / 4 ಲೋಟ
ರಸಂ ಪುಡಿ ಅಥವಾ ಸಾರಿನ ಪುಡಿ - ಒಂದೂವರೆ ಚಮಚ (ಖಾರಕ್ಕೆ ತಕ್ಕಂತೆ)
ಹೆಚ್ಚಿದ ಕೊತ್ತಂಬರಿ ಸೊಪ್ಪು - 1 ಟೀ ಸ್ಪೂನ್
ಕರಿಬೇವಿನ ಎಲೆಗಳು - ಸ್ವಲ್ಪ
ಹುಣಸೆ ಹಣ್ಣಿನ ರಸ - ಸ್ವಲ್ಪ 
ಸಕ್ಕರೆ ಅಥವಾ ಬೆಲ್ಲ - 1 / 4 ಟೀ ಸ್ಪೂನ್
ಉಪ್ಪು - ರುಚಿಗೆ ತಕ್ಕಷ್ಟು
ಒಗ್ಗರಣೆಗೆ : ಒಣಮೆಣಸು - 1 , ಎಣ್ಣೆ - 1 ಟೀ ಸ್ಪೂನ್, ಜೀರಿಗೆ - 1 / 2 ಟೀ ಸ್ಪೂನ್, ಸಾಸಿವೆ - 1 / 2 ಟೀ ಸ್ಪೂನ್, ಅರಿಶಿನ - ಚಿಟಿಕೆ, ಇಂಗು - ಸ್ವಲ್ಪ

ಮಾಡುವ ವಿಧಾನ:
1 ಟೀ ಸ್ಪೂನ್ ನಷ್ಟು ಟೊಮೇಟೊವನ್ನು ಚಿಕ್ಕದಾಗಿ ಹೆಚ್ಚಿಟ್ಟುಕೊಳ್ಳಿ. ಉಳಿದ ಟೊಮೇಟೊವನ್ನು ದೊಡ್ಡದಾಗಿ ಹೆಚ್ಚಿಕೊಂಡು, ಹೆಸರುಬೇಳೆಯೊಡನೆ  ನೀರು, ಚಿಟಿಕೆ ಅರಿಶಿನ, ಒಂದೆರಡು ಹನಿ ಎಣ್ಣೆ ಹಾಕಿ ಕುಕ್ಕರ್ ನಲ್ಲಿ ಒಂದು ವಿಷಲ್ ಆಗುವವರೆಗೆ ಬೇಯಿಸಿಕೊಳ್ಳಿ. ಇದು ತಣ್ಣಗಾದನಂತರ ಮಿಕ್ಸಿಯಲ್ಲಿ ಒಂದು ಸುತ್ತು ತಿರುವಿ, ನುಣ್ಣಗೆ ಮಾಡಿಕೊಳ್ಳಿ.
ಬಾಣಲಿಯಲ್ಲಿ ಒಗ್ಗರಣೆಗಿಟ್ಟು, ಎಣ್ಣೆ ಕಾದನಂತರ  ಒಣಮೆಣಸು, ಸಾಸಿವೆ, ಜೀರಿಗೆ, ಇಂಗು, ಅರಿಶಿನ ಎಲ್ಲವನ್ನೂ ಹಾಕಿ, ಚಟಗುಟ್ಟಿದ ನಂತರ ಟೊಮೇಟೊ ಹೋಳುಗಳನ್ನು ಸೇರಿಸಿ ಸ್ವಲ್ಪ ಬೇಯಿಸಿಕೊಳ್ಳಿ. ಇದಕ್ಕೆ ಸಾಂಬಾರ್ ಪುಡಿ ಅಥವಾ ರಸಂ ಪುಡಿ ಸೇರಿಸಿ 1 ನಿಮಿಷ ಕೈಯಾಡಿಸಿ, ನಂತರ ರುಬ್ಬಿದ ಮಿಶ್ರಣವನ್ನು ಸೇರಿಸಿ. ಇದಕ್ಕೆ ಹುಣಸೆ ರಸ, ಉಪ್ಪು, ಸಕ್ಕರೆ ಹಾಕಿ, ಮಿಶ್ರಣ ತೆಳ್ಳಗಾಗುವಷ್ಟು ನೀರು ಸೇರಿಸಿ ಕುದಿಯಲಿಡಿ. ಟೊಮೇಟೊ ಹಣ್ಣು ಹುಳಿಯಾಗಿರುವುದರಿಂದ, ಹುಣಸೆರಸ ಸೇರಿಸುವಾಗ ನೋಡಿಕೊಂಡು ಹಾಕಿ. ಮಿಶ್ರಣ ಚೆನ್ನಾಗಿ ಕುದಿಯತೊಡಗಿದಾಗ ಅದಕ್ಕೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು, ಕರಿಬೇವಿನ ಎಲೆಗಳನ್ನು ಸೇರಿಸಿ, 5 ನಿಮಿಷ ಕುದಿಸಿ ಇಳಿಸಿ. ಕುದಿಸುವಾಗ ಸ್ವಲ್ಪ ಪುಡಿ ಇಂಗನ್ನು ಸೇರಿಸಿದರೆ ಇನ್ನೂ ಚೆನ್ನಾಗಿರುತ್ತದೆ.

Paladya / ಪಳದ್ಯ

Click here for English version.

ಇದು ಮಜ್ಜಿಗೆ ಉಪಯೋಗಿಸಿ ಮಾಡುವ ಮಲೆನಾಡ ಕಡೆಯ ಅಡಿಗೆ. ದಿನವೂ ಅನ್ನ, ಸಾರು ಊಟ ಮಾಡಿ ಬೇಜಾರಾದಾಗ ಇದು ನಾಲಿಗೆಗೆ ಹೆಚ್ಚು ಹಿತವೆನಿಸುತ್ತದೆ.. 

ಬೇಕಾಗುವ ಸಾಮಗ್ರಿ:
ಬೆಂಡೆಕಾಯಿ 5 - 6 (ಬೆಂಡೆಕಾಯಿಯ ಬದಲು ಸೌತೆಕಾಯಿ, ಆಲೂಗಡ್ಡೆ ಇತ್ಯಾದಿ ತರಕಾರಿಗಳನ್ನೂ ಬಳಸಬಹುದು)
ತೆಂಗಿನ ತುರಿ - 1 ಕಪ್
ಒಣಮೆಣಸು - 1 
ಹಸಿಮೆಣಸು - 2 
ಕೊತ್ತಂಬರಿ ಬೀಜ - ಒಂದೂವರೆ ಚಮಚ
ಸಾಸಿವೆ - ಅರ್ಧ ಚಮಚ
ಅರಿಶಿನ - ಕಾಲು ಚಮಚ
ಕರಿಬೇವಿನ ಎಲೆಗಳು - ಸ್ವಲ್ಪ 
ನಿಂಬೆಹಣ್ಣು - ಅರ್ಧ
ರುಚಿಗೆ ತಕ್ಕಷ್ಟು ಉಪ್ಪು 
ಮಜ್ಜಿಗೆ - ಸ್ವಲ್ಪ 
ಒಗ್ಗರಣೆಗೆ: ಎಣ್ಣೆ - 1 / 2 ಚಮಚ, ಉದ್ದಿನ ಬೇಳೆ - 1 / 2 ಚಮಚ, ಚಿಟಿಕೆ ಇಂಗು, ಸಾಸಿವೆ - 1 / 4 ಚಮಚ

ವಿಧಾನ:
ಬೆಂಡೆಕಾಯಿಯನ್ನು  ತೊಳೆದು, ಸ್ವಲ್ಪ ದೊಡ್ಡ ಹೋಳುಗಳಾಗಿ ಹೆಚ್ಚಿಕೊಳ್ಳಿ. ಒಂದು ಪಾತ್ರೆಯಲ್ಲಿ 2 ಕಪ್ ನೀರನ್ನು ಕುದಿಯಲಿಡಿ. ನೀರು ಹದವಾಗಿ ಬಿಸಿಯಾದಾಗ ಅದಕ್ಕೆ ಉಪ್ಪು, ನಿಂಬೆರಸ ಸೇರಿಸಿ, ಹೆಚ್ಚಿಕೊಂಡ ತರಕಾರಿಯನ್ನು ಸೇರಿಸಿ, ಬೇಯಿಸಿ. ತೆಂಗಿನತುರಿ ಮತ್ತು ಇತರ ಸಾಮಗ್ರಿಗಳನ್ನು ನುಣ್ಣಗೆ ರುಬ್ಬಿಕೊಂಡು, ಬೆಂದ ತರಕಾರಿಗೆ ಸೇರಿಸಿ, ಕರಿಬೇವಿನ ಎಸಳುಗಳನ್ನು ಹಾಕಿ 2 - 3 ನಿಮಿಷ ಕುದಿಸಿ, ಇಳಿಸಿ ಒಗ್ಗರಣೆ ಕೊಡಿ. ಬಿಸಿ ಸ್ವಲ್ಪ ತಣಿದನಂತರ ಇದಕ್ಕೆ ಮಜ್ಜಿಗೆ ಸೇರಿಸಿ, ಅನ್ನದೊಡನೆ ಊಟ ಮಾಡಿ.
Related Posts Plugin for WordPress, Blogger...