Here are some recipes which I came across through the net, books, so on and few are my own experiments..

Monday, 22 October 2018

ಅಕ್ಕಿ - ಪುಟಾಣಿಬೇಳೆ ಚಕ್ಲಿ । ಮೊಸರು ಬಳಸಿ ಮಾಡುವ ಚಕ್ಲಿ

ನಾನು ಮನೆಯಲ್ಲಿ ಕರಿದ ತಿಂಡಿಗಳನ್ನು ತಯಾರಿಸುವುದು ಬಹಳ ಕಡಿಮೆ. ಬಜ್ಜಿ, ಬೋಂಡಾ, ಪೂರಿ ಇಂಥ ತಿಂಡಿಗಳನ್ನು ಯಾವಾಗಲೋ ಒಮ್ಮೆ ಮನೆಗೆ ಅತಿಥಿಗಳು ಬಂದಾಗ ತಯಾರಿಸುವುದಷ್ಟೆ. ನನ್ನ ಮಗಳಿಗೆ ಚಕ್ಲಿ ಎಂದರೆ ತುಂಬಾ ಇಷ್ಟ. ಸ್ನ್ಯಾಕ್ಸ್ ಗೆ ಏನು ಬೇಕೆಂದರೆ ಯಾವಾಗಲೂ ಬರುವ ಉತ್ತರ 'ಚಕ್ಲಿ'. ಹೀಗಾಗಿ ಚಕ್ಲಿ ಕಂಬಳ ನಮ್ಮ ಮನೆಯಲ್ಲಿ ಆಗಾಗ ಆಗುತ್ತಿರುತ್ತದೆ.
ಒಮ್ಮೆ ನನ್ನ ಪರಿಚಯದ ಆಂಟಿಯೊಬ್ಬರ ಮನೆಯಲ್ಲಿ ಮಜ್ಜಿಗೆ/ಮೊಸರು ಬಳಸಿ ತಯಾರಿಸಿದ ಚಕ್ಲಿಯನ್ನು ತಿಂದಿದ್ದೆ. ನಾನು ತಯಾರಿಸುವ ಚಕ್ಲಿ ರೆಸಿಪಿಯಲ್ಲಿ ಸ್ವಲ್ಪ ಬದಲಾವಣೆ ಮಾಡಿ, ಮೊಸರು ಸೇರಿಸಿ ಚಕ್ಲಿ ತಯಾರಿಸಿದೆ. ಗರಿಗರಿಯಾಗಿ ರುಚಿಕರವಾದ ಈ ಚಕ್ಲಿಗಳು ನಮಗೆಲ್ಲ ಇಷ್ಟವಾದವು. ಈಗ ಚಕ್ಲಿ ಮಾಡಬೇಕೆಂದಾಗಲೆಲ್ಲ ಈ ರೆಸಿಪಿಯೇ ಸುಲಭ ಮತ್ತು ಅನುಕೂಲವೆನಿಸುತ್ತದೆ!


ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಈ ಅಳತೆಯಿಂದ ಸುಮಾರು 60 ಚಕ್ಲಿಗಳನ್ನು ತಯಾರಿಸಬಹುದು  

ಬೇಕಾಗುವ ಸಾಮಗ್ರಿಗಳು:

  • ಅಕ್ಕಿಹಿಟ್ಟು - 4 ಕಪ್  
  • ಪುಟಾಣಿಬೇಳೆ - 1/2 ಕಪ್ 
  • ಬೆಣ್ಣೆ - ನಿಂಬೇಗಾತ್ರ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಸಕ್ಕರೆ - 1 1/2 ಟೀ ಸ್ಪೂನ್ 
  • ಮೆಣಸಿನಪುಡಿ - 2 ಟೀ ಸ್ಪೂನ್ ಅಥವಾ ಖಾರಕ್ಕೆ ತಕ್ಕಷ್ಟು 
  • ಓಮ - 1 ಟೀ ಸ್ಪೂನ್ 
  • ಎಳ್ಳು - 1 ಟೇಬಲ್ ಸ್ಪೂನ್ 
  • ಜೀರಿಗೆ - 1 ಟೀ ಸ್ಪೂನ್ 
  • ಮೊಸರು - 1/2 ಕಪ್ 
  • ನೀರು - 2 1/4 ಕಪ್ (ಅಂದಾಜು)
  • ಕರಿಯಲು ಎಣ್ಣೆ 


ತಯಾರಿಸುವ ವಿಧಾನ:

  • ಮಿಕ್ಸಿ ಜಾರ್ ನಲ್ಲಿ ಪುಟಾಣಿಬೇಳೆ, ಓಮ, ಜೀರಿಗೆ, ಎಳ್ಳು ಸೇರಿಸಿ ನುಣ್ಣಗೆ ಪುಡಿಮಾಡಿಕೊಳ್ಳಿ. 
  • ಅಕ್ಕಿಹಿಟ್ಟು, ಪುಟಾಣಿಹಿಟ್ಟು, ಉಪ್ಪು, ಸಕ್ಕರೆ, ಮೆಣಸಿನಪುಡಿ ಇಷ್ಟನ್ನೂ ಒಂದು ಪಾತ್ರೆಯಲ್ಲಿ ಹಾಕಿ ಮಿಕ್ಸ್ ಮಾಡಿ. 
  • ಬೆಣ್ಣೆಯನ್ನು ಬಿಸಿಮಾಡಿ, ಅದನ್ನು ಹಿಟ್ಟಿನ ಮಿಶ್ರಣಕ್ಕೆ ಸೇರಿಸಿ ಕೈಯಾಡಿಸಿ. 
  • ಹಿಟ್ಟಿಗೆ ಅರ್ಧ ಕಪ್ ನಷ್ಟು ಮೊಸರು ಸೇರಿಸಿ ಕಲಸಿ. 
  • ಹಿಟ್ಟಿನ ಮಿಶ್ರಣಕ್ಕೆ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸುತ್ತ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿ. 
  • ಚಕ್ಲಿ ಒರಳಿನಲ್ಲಿ ಹಿಟ್ಟನ್ನು ಹಾಕಿ ಪ್ರೆಸ್ ಮಾಡಿ, ಚಕ್ಲಿ ಸುತ್ತಿ ಕಾದ ಎಣ್ಣೆಯಲ್ಲಿ ಗರಿಯಾಗುವವರೆಗೆ ಕರಿಯಿರಿ. 

English version

Friday, 7 September 2018

ಬೀನ್ಸ್ - ಹಿತಿಕಿದ ಅವರೇಕಾಳು ಪಲ್ಯ

ಅವರೇಕಾಳು ಎಂದತಕ್ಷಣ ನನಗೆ ನೆನಪಾಗುವುದು ಬೆಂಗಳೂರು. ಅವರೇಕಾಳಿನ ಸೀಸನ್ ನಲ್ಲಿ ಎಲ್ಲ ಕಡೆಯೂ ಅವರೆಕಾಳಿನ ರಾಶಿಯೇ ಕಾಣಸಿಗುತ್ತದೆ. ಸಾಂಬಾರು, ರೊಟ್ಟಿ, ಪಲ್ಯ, ಉಪ್ಪಿಟ್ಟು, ಹೀಗೆ ಬಗೆಬಗೆಯಾದ ಅಡುಗೆಗಳನ್ನು ಅವರೇಕಾಳು ಬಳಸಿ ತಯಾರಿಸುತ್ತಾರೆ. ನಾನು ಇಂಡಿಯನ್ ಸ್ಟೋರ್ ನಲ್ಲಿ ಸಿಗುವ ಹಿತಿಕಿದ ಅವರೆಕಾಳಿನ ಪ್ಯಾಕೆಟ್ ನ್ನು ಆಗಾಗ್ಗೆ ತರುತ್ತಿರುತ್ತೇನೆ. ಸಾಂಬಾರ್, ರೈಸ್ ಐಟಮ್ಸ್, ಪಲ್ಯ ಎಲ್ಲವಕ್ಕೂ ಇದು ಚೆನ್ನ. 
ಬೀನ್ಸ್ ಒಟ್ಟಿಗೆ ಹಿತಿಕಿದ ಅವರೇಕಾಳು ಬಳಸಿ ಪಲ್ಯ ತಯಾರಿಸುವ ವಿಧಾನ ಇಂತಿದೆ: 


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಸರ್ವಿಂಗ್ಸ್: ಈ ಅಳತೆಯಿಂದ 3 ಜನರಿಗೆ ಆಗುವಷ್ಟು ಪಲ್ಯ ತಯಾರಿಸಬಹುದು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 

ಬೇಕಾಗುವ ಸಾಮಗ್ರಿಗಳು:
  • ಬೀನ್ಸ್ - 200 ಗ್ರಾಂ 
  • ಹಿತಿಕಿದ ಅವರೇಕಾಳು(ಫ್ರೆಶ್ ಅಥವಾ ಫ್ರೋಜನ್): 1/2 ಕಪ್ (ಜಾಸ್ತಿ ಬೇಕಿದ್ದರೆ ಹಾಕಬಹುದು)
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಹುಳಿಪುಡಿ / ಆಮಚೂರ್ ಪೌಡರ್ - 2/3 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ತೆಂಗಿನತುರಿ (ಬೇಕಿದ್ದರೆ) - 2 ಟೇಬಲ್ ಚಮಚ 
          ಒಗ್ಗರಣೆಗೆ: 
  • ಎಣ್ಣೆ - 2 ಟೇಬಲ್ ಚಮಚ 
  • ಒಣಮೆಣಸು - ಒಂದು ಚೂರು 
  • ಉದ್ದಿನಬೇಳೆ - 1 ಟೀ ಚಮಚ
  • ಇಂಗು - ದೊಡ್ಡ ಚಿಟಿಕೆಯಷ್ಟು 
  • ಸಾಸಿವೆ - 1 ಟೀ ಚಮಚ
  • ಅರಿಶಿನ - 1/4 ಟೀ ಚಮಚ 
  • ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ) 
  • ಕರಿಬೇವು - 8ರಿಂದ 10 ಎಲೆಗಳು 


ತಯಾರಿಸುವ ವಿಧಾನ:
  • ಬೀನ್ಸ್ ನ್ನು ಸ್ವಚ್ಛವಾಗಿ ತೊಳೆದುಕೊಂಡು ತೊಟ್ಟು ಮತ್ತು ನಾರನ್ನು ಬೇರ್ಪಡಿಸಿ. ನಂತರ ಇವನ್ನು ಆದಷ್ಟೂ ತೆಳ್ಳಗೆ ಹೆಚ್ಚಿಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಉದ್ದಿನಬೇಳೆ, ಒಣಮೆಣಸು, ಸಾಸಿವೆ, ಇಂಗು ಹಾಕಿ ಹುರಿಯಿರಿ. ಸಾಸಿವೆ ಸಿಡಿಯತೊಡಗಿದಾಗ ಅರಿಶಿನ, ಹಸಿಮೆಣಸು, ಕರಿಬೇವು ಸೇರಿಸಿ ಒಂದು ನಿಮಿಷ ಕೈಯಾಡಿಸಿ. 
  • ನಂತರ ಇದಕ್ಕೆ ಹೆಚ್ಚಿದ ಬೀನ್ಸ್ ಸೇರಿಸಿ ಮಿಕ್ಸ್ ಮಾಡಿ. ಬಾಣಲೆಗೆ ಮುಚ್ಚಳ ಮುಚ್ಚಿ 5 - 6 ನಿಮಿಷ ಬೇಯಿಸಿ. ಮಧ್ಯೆ ಒಮ್ಮೆ ಮುಚ್ಚಳ ತೆಗೆದು ಕೈಯಾಡಿಸಿ. 
  • ಅರ್ಧ ಬೆಂದ ಪಲ್ಯಕ್ಕೆ ಹಿತಿಕಿದ ಅವರೇಕಾಳು ಸೇರಿಸಿ 5 ನಿಮಿಷ ಬೇಯಿಸಿ. 
  • ನಂತರ ಪಲ್ಯಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಹುಳಿಪುಡಿ, ತೆಂಗಿನತುರಿ ಸೇರಿಸಿ ಮಿಕ್ಸ್ ಮಾಡಿ 5 ನಿಮಿಷ ಅಥವಾ ಪೂರ್ತಿ ಬೇಯುವವರೆಗೆ ಬೇಯಿಸಿ. 
  • ಊಟಕ್ಕೆ ಸೈಡ್ ಡಿಶ್ ಆಗಿ ಹಾಕಿಕೊಳ್ಳಲು ಈ ಪಲ್ಯ ಚೆನ್ನಾಗಿರುತ್ತದೆ. 


ಟಿಪ್ಸ್:
  • ಈ ಪಲ್ಯ ಬೇಯಿಸುವಾಗ ನೀರು ಸೇರಿಸಬೇಡಿ. ತರಕಾರಿಯಲ್ಲಿರುವ ನೀರಿನಂಶವೇ ಬೇಯಲು ಸಾಕಾಗುತ್ತದೆ. 

Sunday, 12 August 2018

ಬದನೇಕಾಯಿ ಹುಡಿ ಪಲ್ಯ

ಬದನೆಕಾಯಿಯಿಂದ ವಿವಿಧ ಬಗೆಯ ಮೇಲೋಗರ ಹಾಗೂ ಸೈಡ್ ಡಿಶ್ ಗಳನ್ನು ತಯಾರಿಸಬಹುದು. ಊರಲ್ಲಿ ನಮ್ಮ ಮನೆಯಲ್ಲಿ ಬದನೇಕಾಯಿ ಬಳಸಿ ಒಂದು ಬಗೆಯ ಪಲ್ಯ ತಯಾರಿಸುತ್ತಾರೆ. ಸಾಮಾನ್ಯವಾಗಿ ಬದನೆಕಾಯಿಯಿಂದ ತಯಾರಿಸುವ ಅಡುಗೆ ಪದಾರ್ಥಗಳು ಈರುಳ್ಳಿ / ಬೆಳ್ಳುಳ್ಳಿ ಇಲ್ಲದೆ ರುಚಿ ಎನ್ನಿಸುವುದೇ ಇಲ್ಲ. ಆದರೆ ನಾನು ಈಗ ಹೇಳ ಹೊರಟಿರುವ ಪಲ್ಯ ಈರುಳ್ಳಿ / ಬೆಳ್ಳುಳ್ಳಿ ಬಳಸದೆಯೇ ತಯಾರಿಸಿದರೂ ಬಹಳ ಚೆನ್ನಾಗಿರುತ್ತದೆ. ಉದುರಾಗಿರುವ ಈ ಪಲ್ಯಕ್ಕೆ ಹುಡಿ ಪಲ್ಯ ಎಂತಲೇ ಹೆಸರು!


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷ 
ಮಿಶ್ರಣ ನೆನೆಸಿಡುವ ಸಮಯ: 15 ನಿಮಿಷ
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:

  • ಬದನೇಕಾಯಿ - 1 ದೊಡ್ಡದು (ಸಣ್ಣಗೆ ಹೆಚ್ಚಿಕೊಳ್ಳಿ)
  • ಒಣಮೆಣಸು (ಬೇಕಿದ್ದರೆ) - ಒಂದು ಚಿಕ್ಕ ಚೂರು 
  • ಎಣ್ಣೆ - 5 ರಿಂದ 6 ಟೇಬಲ್ ಚಮಚದಷ್ಟು 
  • ಉದ್ದಿನಬೇಳೆ - 1 ಟೀ ಚಮಚ 
  • ಸಾಸಿವೆ - 1 ಟೀ ಚಮಚ 
  • ಇಂಗು - ಒಂದು ದೊಡ್ಡ ಚಿಟಿಕೆ 
  • ಅರಿಶಿನ - 1/4 ಟೀ ಚಮಚ 
  • ಹಸಿಮೆಣಸು - 2 (ಖಾರಕ್ಕೆ ತಕ್ಕಂತೆ)
  • ಕರಿಬೇವು - 1 ಎಸಳು 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಆಮ್ ಚೂರ್ ಪೌಡರ್ / ಹುಳಿಪುಡಿ - 1 1/2 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು  
  • ತೆಂಗಿನತುರಿ - 4 ಟೇಬಲ್ ಚಮಚ 

ತಯಾರಿಸುವ ವಿಧಾನ:

  • ಸಣ್ಣಗೆ ಹೆಚ್ಚಿಕೊಂಡ ಬದನೆಕಾಯಿಗೆ 1 1/2 ಟೀ ಚಮಚದಷ್ಟು ಉಪ್ಪು, 1 ಟೀ ಚಮಚದಷ್ಟು ಆಮ್ ಚೂರ್ ಪೌಡರ್ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ 15 ನಿಮಿಷ ನೆನೆಯಲು ಬಿಡಿ. 
  • ನಂತರ ಸ್ವಲ್ಪ ಸ್ವಲ್ಪವೇ ಮಿಶ್ರಣವನ್ನು ಕೈಯಲ್ಲಿ ತೆಗೆದುಕೊಂಡು ಅದರಲ್ಲಿರುವ ನೀರಿನಂಶವನ್ನು ಹಿಂಡಿ ತೆಗೆಯಿರಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಬಿಸಿಗಿಡಿ. ಎಣ್ಣೆ ಕಾದ ನಂತರ ಒಣಮೆಣಸು, ಉದ್ದಿನಬೇಳೆ, ಇಂಗು, ಸಾಸಿವೆ, ಅರಿಶಿನ ಸೇರಿಸಿ ಕೈಯಾಡಿಸಿ. 
  • ಸಾಸಿವೆ ಚಟಪಟ ಎಂದ ನಂತರ ಸೀಳಿದ ಹಸಿಮೆಣಸು, ಕರಿಬೇವು ಹಾಕಿ ಒಂದು ನಿಮಿಷ ಕೈಯಾಡಿಸಿ. 
  • ನಂತರ ಇದಕ್ಕೆ ಬದನೇಕಾಯಿ ಮಿಶ್ರಣ ಸೇರಿಸಿ. ರುಚಿ ನೋಡಿಕೊಂಡು ಉಪ್ಪು, ಹುಳಿಪುಡಿ ಸೇರಿಸಿ. 
  • ಈ ಪಲ್ಯವನ್ನು ಮುಚ್ಚಳ ಮುಚ್ಚದೆ ಸಣ್ಣ ಉರಿಯಲ್ಲಿ 8 - 10 ನಿಮಿಷ ಬೇಯಿಸಿ. 
  • ಮಿಶ್ರಣ ಅರ್ಧ ಬೆಂದಾಗ ಇದಕ್ಕೆ ತೆಂಗಿನತುರಿ ಸೇರಿಸಿ. ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತಿರಿ. 
  • ಬದನೇಕಾಯಿ ಹೋಳುಗಳು ಮೆತ್ತಗೆ ಬೆಂದಾಗ ಉರಿ ಆಫ್ ಮಾಡಿ. 
  • ಅನ್ನದೊಡನೆ ಸೈಡ್ ಡಿಶ್ ಆಗಿ ಹಾಕಿಕೊಳ್ಳಲು ಈ ಪಲ್ಯ ಚೆನ್ನಾಗಿರುತ್ತದೆ. ಚೆನ್ನಾಗಿ ಹುರಿದು ಇಟ್ಟುಕೊಂಡರೆ 2 - 3 ದಿನದವರೆಗೂ ಕೆಡುವುದಿಲ್ಲ. 


ಟಿಪ್ಸ್:

  • ಈರುಳ್ಳಿ ಇಷ್ಟಪಡುವವರು ತೆಂಗಿನತುರಿ ಸೇರಿಸುವಾಗ ಹೆಚ್ಚಿದ ಈರುಳ್ಳಿಯನ್ನೂ ಸೇರಿಸಬಹುದು. 
  • ಈ ಪಲ್ಯಕ್ಕೆ ಬದನೆಕಾಯನ್ನು ಸಣ್ಣಗೆ ಹೆಚ್ಚಿದಷ್ಟೂ ಒಳ್ಳೆಯದು. 

Wednesday, 25 July 2018

ಲೋಟಸ್ ಸೀಡ್ಸ್ ಸ್ನ್ಯಾಕ್ । ಫೂಲ್ ಮಖಾನಾ ಒಗ್ಗರಣೆ । ಫಾಕ್ಸ್ ನಟ್ ಸ್ನಾಕ್ಸ್

ಮನೆಯಲ್ಲಿ ಸ್ಕೂಲ್ ಗೆ ಹೋಗುವ ಮಕ್ಕಳಿದ್ದಾಗ ಎಷ್ಟು ಬಗೆಯ ತಿಂಡಿಗಳನ್ನು ಮಾಡಿಟ್ಟರೂ ಕಡಿಮೆಯೇ. ನನ್ನ ಮಗಳು ಇತ್ತೀಚೆಗೆ ದಿನವೂ ಸ್ಕೂಲ್ ನಿಂದ ಬಂದ ನಂತರ ಏನಾದರೂ ಕುರುಮ್ ಕುರುಮ್ ತಿಂಡಿ ಬೇಕೆಂದು ಕೇಳುತ್ತಾಳೆ. ಅಂಗಡಿಯಿಂದ ತರುವ ಸ್ನ್ಯಾಕ್ಸ್ ಗಳಿಗಿಂತ ಮನೆಯಲ್ಲೇ ಏನಾದರೂ ತಿಂಡಿಗಳನ್ನು ಮಾಡಿಟ್ಟಿರುತ್ತೇನೆ ನಾನು. ಅವಳಿಷ್ಟದ ತಿಂಡಿಗಳಲ್ಲಿ ಲೋಟಸ್ ಸೀಡ್ (ಕಮಲದ ಬೀಜ) ಸ್ನ್ಯಾಕ್ಸ್ ಕೂಡ ಒಂದು. 
ಇಂಡಿಯನ್ ಸ್ಟೋರ್ ನಲ್ಲಿ ಸಿಗುವ ಹುರಿದ ಲೋಟಸ್ ಸೀಡ್ಸ್ ಅಥವಾ ಫೂಲ್ ಮಖಾನಾ ಪ್ಯಾಕೆಟ್ ಇದ್ದುಬಿಟ್ಟರೆ 10-15 ನಿಮಿಷದಲ್ಲಿ ರುಚಿರುಚಿಯಾದ ಸ್ನ್ಯಾಕ್ಸ್ ರೆಡಿ! ಲೋಟಸ್ ಸೀಡ್ ಅಥವಾ ಫೂಲ್ ಮಖಾನ - ಇದು ಪ್ರೊಟೀನ್ ಮತ್ತು ವಿಟಮಿನ್ ಬಿ ಯ ಆಗರವೆಂದು ಹೇಳಲಾಗುತ್ತದೆ. ಲೋಟಸ್ ಸೀಡ್ಸ್ ಸ್ನ್ಯಾಕ್ ರೆಸಿಪಿ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಸರ್ವಿಂಗ್ಸ್: 8 - 10
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
  • ಹುರಿದ ಲೋಟಸ್ ಸೀಡ್ಸ್ (ಫೂಲ್ ಮಖಾನಾ) - 100 ಗ್ರಾಂ 
  • ಎಣ್ಣೆ - 4 1/2 ಟೇಬಲ್ ಸ್ಪೂನ್ 
  • ಅರಿಶಿನ - 1/2 ಟೀ ಸ್ಪೂನ್ 
  • ಮೆಣಸಿನಪುಡಿ - 1 ಟೀ ಸ್ಪೂನ್ ಅಥವಾ ಖಾರಕ್ಕೆ ತಕ್ಕಷ್ಟು 
  • ಚಾಟ್ ಮಸಾಲಾ - 1 1/2 ಟೀ ಸ್ಪೂನ್ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಸಕ್ಕರೆ ಪುಡಿ (ಬೇಕಿದ್ದರೆ) - 1 1/2 ಟೀ ಸ್ಪೂನ್ 



ತಯಾರಿಸುವ ವಿಧಾನ:
  • ಒಂದು ಅಗಲವಾದ ಬಾಣಲೆಯಲ್ಲಿ ಲೋಟಸ್ ಸೀಡ್ಸ್ ನ್ನು ಹಾಕಿಕೊಂಡು ಸಣ್ಣ ಅಥವಾ ಮೀಡಿಯಂ ಉರಿಯಲ್ಲಿ 8 - 10 ನಿಮಿಷ ಅಥವಾ ಗರಿಯಾಗುವತನಕ ಹುರಿಯಿರಿ. 
  • ನಂತರ ಅದೇ ಬಾಣಲೆಯಲ್ಲಿ ಎಣ್ಣೆ ಬಿಸಿಮಾಡಿ, ಅದಕ್ಕೆ ಅರಿಶಿನ, ಮೆಣಸಿನಪುಡಿ, ಸೇರಿಸಿ ಉರಿ ಆಫ್ ಮಾಡಿ. ಇದಕ್ಕೆ ಚಾಟ್ ಮಸಾಲಾ, ಉಪ್ಪು, ಸಕ್ಕರೆಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. 
  • ಮೊದಲೇ ಹುರಿದಿಟ್ಟ ಲೋಟಸ್ ಸೀಡ್ಸ್ ನ್ನು ಒಗ್ಗರಣೆ ಮಿಶ್ರಣಕ್ಕೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿದರೆ ಲೋಟಸ್ ಸೀಡ್ಸ್ ಸ್ನ್ಯಾಕ್ ಸವಿಯಲು ಸಿದ್ಧ!


ಟಿಪ್ಸ್:
  • ಚಾಟ್ ಮಸಾಲಾ ಬೇಡ ಎಂದರೆ ಆಮ್ ಚೂರ್ ಪೌಡರ್ ಬಳಸಬಹುದು. 
  • ಒಗ್ಗರಣೆಗೆ ಲೋಟಸ್ ಸೀಡ್ಸ್ ಹಾಕಿದ ನಂತರ ಸೌಟಿನ ಬದಲು ಕೈಗಳಿಂದ ಮಿಕ್ಸ್ ಮಾಡಿದರೆ ಮಸಾಲೆ ಚೆನ್ನಾಗಿ ಮತ್ತು ಬೇಗ ಅಂಟಿಕೊಳ್ಳುತ್ತದೆ. 

Thursday, 5 July 2018

ಪೈನಾಪಲ್ ಸಾಸಿವೆ | ಅನಾನಸ್ ಸಾಸಿವೆ

ನಮ್ಮ ಊರ ಕಡೆ ಹಿತ್ತಿಲಲ್ಲಿ ಬೆಳೆಯುವ ಹೆಚ್ಚಿನ ಎಲ್ಲ ಬಗೆಯ ತರಕಾರಿ, ಸೊಪ್ಪು ಮತ್ತು ಹಣ್ಣುಗಳಿಂದಲೂ ಒಂದಿಲ್ಲೊಂದು ಬಗೆಯ ಮೇಲೋಗರ ತಯಾರಿಸುತ್ತಾರೆ. ಜೂನ್ - ಜುಲೈ ತಿಂಗಳು ಧಾರಾಕಾರವಾಗಿ ಮಳೆ ಸುರಿಯುವಾಗ ಮಾವು, ಹಲಸು, ಪೈನಾಪಲ್ ಇತ್ಯಾದಿ ಹಣ್ಣುಗಳ ಅಬ್ಬರವೂ ಜೋರು. ಇವನ್ನು ಬಳಸಿ ಕಡುಬು, ಜ್ಯಾಮ್, ಹಲ್ವಾ, ಪಾಯಸ, ನೀರ್ಗೊಜ್ಜು, ಸಾಸಿವೆ, ಹೀಗೆ ಎಷ್ಟೊಂದು ಬಗೆಯ ಮೇಲೋಗರ, ಸಿಹಿತಿಂಡಿ ಗಳನ್ನು ತಯಾರಿಸಬಹುದು. ಇವುಗಳಲ್ಲಿ ಹಲವು ರೆಸಿಪಿ ಗಳನ್ನು ಈಗಾಗಲೇ ಬ್ಲಾಗ್ ನಲ್ಲಿ ಹಾಕಿದ್ದಾಗಿದೆ. ಲಿಂಕ್ ಗಾಗಿ ಈ ಕೆಳಗಿನ ರೆಸಿಪಿ ಹೆಸರುಗಳನ್ನು ಕ್ಲಿಕ್ ಮಾಡಿ.

ಪೈನಾಪಲ್ ಬಳಸಿ ಜ್ಯಾಮ್, ಕೇಕ್, ಕೇಸರಿ ಇತ್ಯಾದಿ ಸಿಹಿ ತಿಂಡಿಗಳನ್ನು ತಯಾರಿಸುವುದು ಎಲ್ಲರಿಗೂ ಗೊತ್ತೇ ಇದೆ. ನಮ್ಮ ಮನೆಯಲ್ಲಿ ಪೈನಾಪಲ್ ಸಾಸಿವೆಯನ್ನು ತಯಾರಿಸುತ್ತಾರೆ. ಪೈನಾಪಲ್ ಪರಿಮಳದ ಈ ಮೇಲೋಗರವನ್ನು ಅನ್ನದೊಡನೆ ಹಾಕಿಕೊಳ್ಳಲು ಬಹಳ ಚೆನ್ನಾಗಿರುತ್ತದೆ.    


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು 
ಸರ್ವಿಂಗ್ಸ್: 4 - 5
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 

ಬೇಕಾಗುವ ಸಾಮಗ್ರಿಗಳು:

  • ಸಿಪ್ಪೆ ತೆಗೆದು ಹೆಚ್ಚಿದ ಪೈನಾಪಲ್ - 1 1/4 ಕಪ್ 
  • ತೆಂಗಿನತುರಿ - 1/2 ಕಪ್ 
  • ಎಳ್ಳು - 1 1/4 ಟೀ ಸ್ಪೂನ್ 
  • ಸಾಸಿವೆ - 3/4 ಟೀ ಸ್ಪೂನ್ 
  • ಒಣಮೆಣಸು ಅಥವಾ ಹಸಿಮೆಣಸು - ಒಂದು ಚಿಕ್ಕ ಚೂರು 
  • ಅರಿಶಿನ - 1/4 ಟೀ ಸ್ಪೂನ್ 
  • ಉಪ್ಪು - 1/2 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 
  • ಬೆಲ್ಲ / ಸಕ್ಕರೆ - 4 ಟೇಬಲ್ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 
  • ನೀರು - ಅರ್ಧ ಕಪ್ 
  • ಮೊಸರು - ಅರ್ಧ ಕಪ್   
ಒಗ್ಗರಣೆಗೆ: ಎಣ್ಣೆ (ತೆಂಗಿನೆಣ್ಣೆ ಉತ್ತಮ) - 1 ಟೀ ಸ್ಪೂನ್, ಸಾಸಿವೆ - 1 ಟೀ ಸ್ಪೂನ್  


ತಯಾರಿಸುವ ವಿಧಾನ:

  • ಪೈನಾಪಲ್ ಚೂರುಗಳನ್ನು ಒಂದು ಪಾತ್ರೆಯಲ್ಲಿ ಹಾಕಿ ಉಪ್ಪು, ಬೆಲ್ಲ, ಅರ್ಧ ಕಪ್ ನೀರು ಸೇರಿಸಿ ಮುಚ್ಚಳ ಮುಚ್ಚಿ ಬೇಯಿಸಿ. 5 ನಿಮಿಷ ಕುದಿಸಿ ಉರಿ ಆಫ್ ಮಾಡಿ, ಮಿಶ್ರಣ ತಣ್ಣಗಾಗಲು ಬಿಡಿ. 
  • ಪೈನಾಪಲ್ ಬೇಯಿಸಿದ ನೀರನ್ನು ಪ್ರತ್ಯೇಕವಾಗಿ ತೆಗೆದಿಡಿ. 
  • ತಣ್ಣಗಾದ ಪೈನಾಪಲ್ ಚೂರುಗಳನ್ನು ತೆಂಗಿನತುರಿ, ಎಳ್ಳು, ಸಾಸಿವೆ, ಮೆಣಸು, ಅರಿಶಿನದೊಡನೆ ನುಣ್ಣಗೆ ರುಬ್ಬಿ. ಪೈನಾಪಲ್ ಬೇಯಿಸಿದ ನೀರನ್ನೇ ರುಬ್ಬುವಾಗ ಬಳಸಿ. 
  • ರುಬ್ಬಿದ ಮಿಶ್ರಣಕ್ಕೆ ಅರ್ಧ ಕಪ್ ನಷ್ಟು ಮೊಸರು ಸೇರಿಸಿ, ರುಚಿ ನೋಡಿ ಉಪ್ಪು ಅಥವಾ ಸಿಹಿ ಬೇಕಿದ್ದರೆ ಸೇರಿಸಿ. ಮಿಶ್ರಣ ತುಂಬಾ ದಪ್ಪವೆನಿಸಿದರೆ ಸ್ವಲ್ಪ ನೀರು ಸೇರಿಸಿ. ಆದರೆ ತುಂಬಾ ತೆಳ್ಳಗಾದರೆ ಚೆನ್ನಾಗಿರುವುದಿಲ್ಲ. 
  • ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಬಿಸಿಮಾಡಿ ಸಾಸಿವೆ ಹಾಕಿ ಚಟಪಟ ಎಂದಾಗ ಅದನ್ನು ಸಾಸಿವೆ ರುಬ್ಬಿದ ಮಿಶ್ರಣಕ್ಕೆ ಸೇರಿಸಿದರೆ ರುಚಿಯಾದ ಪೈನಾಪಲ್ ಸಾಸಿವೆ ಅನ್ನದೊಡನೆ ಸವಿಯಲು ಸಿದ್ಧ! 

Friday, 4 May 2018

ಬೆಂಡೆಕಾಯಿ ಪಲ್ಯ

ನಮ್ಮ ಮನೆಯಲ್ಲಿ ತಯಾರಿಸುವ ಸಿಂಪಲ್ ಅಡುಗೆಗಳಲ್ಲಿ ಈ ಪಲ್ಯವೂ ಒಂದು. ಅಡುಗೆಮನೆಯಲ್ಲಿ ಸಾಮಾನ್ಯವಾಗಿ ಇರುವ ಕೆಲವೇ ಸಾಮಗ್ರಿಗಳನ್ನು ಬಳಸಿ ಜಟ್ ಪಟ್ ಎಂದು ಮಾಡಿಬಿಡಬಹುದಾದ ಸೈಡ್ ಡಿಶ್ ಇದು. 
ತುಂಬಾ ಜನರಿಗೆ ಬೆಂಡೆಕಾಯಿ ಇದರ ಲೋಳೆ ಗುಣದಿಂದಾಗಿ ಇಷ್ಟವಾಗುವುದಿಲ್ಲ. ಆದರೆ ಲೋಳೆ ಆಗದಂತೆ ಕ್ರಮಬದ್ಧವಾಗಿ ಅಡುಗೆ ಮಾಡಿದರೆ ಅದರ ರುಚಿಯೇ ಬೇರೆ. ನಮ್ಮ ಆರೋಗ್ಯದ ದೃಷ್ಟಿಯಿಂದಲೂ ಬೆಂಡೆಕಾಯಿಯ ಸೇವನೆ ಬಹಳ ಒಳ್ಳೆಯದು. 
ಸಿಂಪಲ್ ಆಗಿ ತಯಾರಿಸಬಹುದಾದ ಬೆಂಡೆಕಾಯಿ ಪಲ್ಯದ ರೆಸಿಪಿ ಇಲ್ಲಿದೆ:


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು:

  • ಬೆಂಡೆಕಾಯಿ - 15
  • ಆಮ್ ಚೂರ್ ಪೌಡರ್ (ಹುಳಿಪುಡಿ) - 3/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು
  • ಉಪ್ಪು - ರುಚಿಗೆ ತಕ್ಕಷ್ಟು
  • ತೆಂಗಿನತುರಿ - 2ರಿಂದ 3 ಟೇಬಲ್ ಸ್ಪೂನ್
  • ಒಗ್ಗರಣೆಗೆ: 
        ಎಣ್ಣೆ - 2 ಟೇಬಲ್ ಸ್ಪೂನ್,
        ಒಣಮೆಣಸು - ಒಂದು ಚೂರು,
        ಉದ್ದಿನಬೇಳೆ - 1 ಟೀ ಸ್ಪೂನ್,
        ಸಾಸಿವೆ - 1 ಟೀ ಸ್ಪೂನ್,
        ಇಂಗು - ಚಿಟಿಕೆ,
        ಅರಿಶಿನ - 1/4 ಟೀ ಸ್ಪೂನ್,
        ಕರಿಬೇವು - 7ರಿಂದ 8 ಎಲೆಗಳು,
        ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ)

ತಯಾರಿಸುವ ವಿಧಾನ:

  • ಬೆಂಡೆಕಾಯಿಯನ್ನು ತೊಳೆದು ಬಟ್ಟೆ ಅಥವಾ ಪೇಪರ್ ಟವೆಲ್ ನಿಂದ ಚೆನ್ನಾಗಿ ಒರೆಸಿಕೊಳ್ಳಿ. ನಂತರ ಇವನ್ನು ಆದಷ್ಟು ತೆಳ್ಳಗೆ ಹೆಚ್ಚಿಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆ ಬಿಸಿಗಿಟ್ಟು ಎಣ್ಣೆ, ಒಣಮೆಣಸು, ಉದ್ದಿನಬೇಳೆ, ಸಾಸಿವೆ ಸೇರಿಸಿ. ಸಾಸಿವೆ ಚಟಪಟ ಎನ್ನುತ್ತಿದ್ದಂತೆ ಇಂಗು, ಅರಿಶಿನ, ಸೀಳಿದ ಹಸಿಮೆಣಸು, ಕರಿಬೇವು ಹಾಕಿ ಕೈಯಾಡಿಸಿ ಒಂದು ನಿಮಿಷ ಹುರಿಯಿರಿ.  
  • ನಂತರ ಇದಕ್ಕೆ ಹೆಚ್ಚಿದ ಬೆಂಡೆಕಾಯಿ ಸೇರಿಸಿ ಕೈಯಾಡಿಸಿ. 
  • ಪಲ್ಯದ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್ ಸೇರಿಸಿ ಮಿಕ್ಸ್ ಮಾಡಿ, ಮುಚ್ಚಳ ಮುಚ್ಚದೆ ಬೇಯಿಸಿ. ತಳ ಹಿಡಿಯದಂತೆ ಆಗಾಗ ಕೈಯಾಡಿಸುತ್ತಿರಿ. ಬೆಂಡೆಕಾಯಿ ತೆಳ್ಳಗೆ ಹೆಚ್ಚಿರುವುದರಿಂದ ಬೇಯಲು ಹೆಚ್ಚು ಸಮಯ ಬೇಕಾಗುವುದಿಲ್ಲ.  
  • ಪಲ್ಯದ ಮಿಶ್ರಣ ಮುಕ್ಕಾಲುಭಾಗ ಬೆಂದಾಗ ಇದಕ್ಕೆ ತೆಂಗಿನತುರಿ ಸೇರಿಸಿ. ಮಿಶ್ರಣ ಪೂರ್ತಿ ಬೆಂದನಂತರ ಉರಿ ಆಫ್ ಮಾಡಿ. 
  • ಈ ಪಲ್ಯ ಅನ್ನ, ಚಪಾತಿಯೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ. 


ಟಿಪ್ಸ್:

  • ಈ ಪಲ್ಯಕ್ಕೆ ಬೆಂಡೆಕಾಯಿಯನ್ನು ತೆಳ್ಳಗೆ ಹೆಚ್ಚಿದಷ್ಟೂ ಚೆನ್ನ. 
  • ಈ ಪಲ್ಯ ಬೇಯಿಸುವಾಗ ನೀರು ಸೇರಿಸಬೇಡಿ. 
  • ಈರುಳ್ಳಿ ಇಷ್ಟಪಡುವವರು ಪಲ್ಯ ಮುಕ್ಕಾಲುಭಾಗ ಬೆಂದಾಗ ಹೆಚ್ಚಿದ ಈರುಳ್ಳಿ ಸೇರಿಸಿಕೊಳ್ಳಬಹುದು. 
  • ಪಲ್ಯವನ್ನು ತುಂಬಾ ಸಲ ಕೈಯಾಡಿಸಿದರೆ ಮಿಶ್ರಣ ಮುದ್ದೆಯಾಗಿಬಿಡುತ್ತದೆ. 

Tuesday, 27 March 2018

ಕಡ್ಲೇಬೀಜದ ಕಟ್ಲಿ । 10 ನಿಮಿಷದಲ್ಲಿ ಶೇಂಗಾ ಬರ್ಫಿ । ಪ್ರೆಷರ್ ಕುಕರ್ ನಲ್ಲಿ ತಯಾರಿಸಬಹುದಾದ ನೆಲಗಡಲೆ ಬರ್ಫಿ | ಒಪೋಸ್ ಕಡ್ಲೆಕಾಯಿ ಬರ್ಫಿ

ಕಾಜು ಕಟ್ಲಿ ಅಥವಾ ಕಾಜು ಬರ್ಫಿಯ ಹೆಸರನ್ನು ಸಾಮಾನ್ಯವಾಗಿ ಎಲ್ಲರೂ ಕೇಳಿಯೇ ಇರುತ್ತೀರಿ. ಅದರಂತೆಯೇ ಬಾದಾಮ್ ಕಟ್ಲಿಯೂ ಸಿಹಿ ಪ್ರಿಯರಿಗೆಲ್ಲ ಚಿರಪರಿಚಿತ. ಮೊದಲೆಲ್ಲ ಸ್ವೀಟ್ ಸ್ಟಾಲ್ ನಿಂದ ತಂದು ತಿನ್ನುತ್ತಿದ್ದ ಈ ಸಿಹಿತಿಂಡಿಗಳನ್ನು ಈಗ ತುಂಬಾ ಜನ ಮನೆಯಲ್ಲೇ ಬಹಳ ಚೆನ್ನಾಗಿ ತಯಾರಿಸುತ್ತಾರೆ. ಒಪೋಸ್ (One Pot One Shot) ಅಡುಗೆ ವಿಧಾನ ಬಂದಮೇಲಂತೂ ಅಡುಗೆ ಬರದಿದ್ದವರೂ ಥರಾವರಿ ಅಡುಗೆ, ಸ್ವೀಟ್ಸ್ ಮಾಡುವುದು ಸಾಧ್ಯವಾಗಿದೆ.
ಈಗ ಕೆಲವು ತಿಂಗಳುಗಳ ಹಿಂದೆ ನನ್ನ ಫ್ರೆಂಡ್ ಒಬ್ಬರು ಒಪೋಸ್ ಅಡುಗೆ ಪದ್ಧತಿಯನ್ನು ನನಗೆ ಪರಿಚಯಿಸಿದರು. ಒಪೋಸ್ ರೂವಾರಿಯಾದ ರಾಮಕೃಷ್ಣನ್ ರವರು ಯೂಟ್ಯೂಬ್ ನಲ್ಲಿ ಒಪೋಸ್ ವಿಧಾನದಲ್ಲಿ ಅಡುಗೆ ಮಾಡುವುದರ ಬಗ್ಗೆ ಅನೇಕ ವಿಡಿಯೋ ಗಳನ್ನು ಹಾಕಿದ್ದಾರೆ. ಕಷ್ಟದ ಅಡುಗೆಗಳನ್ನೂ ಈ ವಿಧಾನದಲ್ಲಿ ಎಷ್ಟು ಸುಲಭದಲ್ಲಿ ತಯಾರಿಸಬಹುದೆಂದು ನೋಡಿದರೆ ಆಶ್ಚರ್ಯವಾಗುತ್ತದೆ!
ಒಪೋಸ್ ವಿಧಾನ ಕಲಿತಮೇಲೆ ನನಗೆ ಬೇಗ ಅಡುಗೆ ಕೆಲಸ ಮುಗಿಸಲು ಸಾಧ್ಯವಾಗುತ್ತಿದೆ. ದಿನನಿತ್ಯ ತಯಾರಿಸುವ ಸೈಡ್ ಡಿಶ್ ಗಳಿಗೆ ಹೆಚ್ಚಾಗಿ ಒಪೋಸ್ ವಿಧಾನವನ್ನೇ ಅನುಸರಿಸುತ್ತೇನೆ. ಒಪೋಸ್ ಅಡುಗೆಗೆ ಎರಡು ಲೀಟರ್ ನ ಪ್ರೆಷರ್ ಕುಕರ್ ನನ್ನ ಬಳಿ ಇಲ್ಲ. ಭಯಪಡುತ್ತಲೇ ನನ್ನಲ್ಲಿರುವ 3 ಲೀಟರ್ ಕುಕರ್ ನಲ್ಲಿ ಶುರುವಾದವು ನನ್ನ ಪ್ರಯೋಗಗಳು. ಮೊದಲ ಪ್ರಯೋಗ ಸಕ್ಸೆಸ್ ಆದದ್ದರಿಂದ ಹಾಗೇ ಮುಂದುವರಿಯತೊಡಗಿದೆ ಈ ಅಡುಗೆ ವಿಧಾನ! ಇತ್ತೀಚೆಗೆ ಒಪೋಸ್ ಕಾಜು ಕಟ್ಲಿಯ ರೆಸಿಪಿ ನೋಡಿದಾಗ ಯೋಚನೆ ಬಂತು ಇದೇ ವಿಧದಲ್ಲಿ ಶೇಂಗಾ ಕಟ್ಲಿ ತಯಾರಿಸಿದರೆ ಚೆನ್ನಾಗಿ ಬರಬಹುದೆಂದು. ನನ್ನ ಅಮ್ಮ ಶೇಂಗಾ ಬರ್ಫಿಯನ್ನು ಬಹಳ ಚೆನ್ನಾಗಿ ತಯಾರಿಸುತ್ತಾರೆ. ಆದರೆ ಬರ್ಫಿ ಎಂದರೆ ಕೇಳಬೇಕೆ? ಮಿಶ್ರಣವನ್ನು ತಾಸುಗಟ್ಟಲೆ ಒಲೆಯಮೇಲೆ ಕೈಯಾಡಿಸುತ್ತ ಕಷ್ಟಪಡಬೇಕು. ನಾನು ಅಮ್ಮನ ರೆಸಿಪಿಯ ಅಳತೆಗಳನ್ನು ಒಪೋಸ್ ವಿಧಾನಕ್ಕೆ ಅನುಕೂಲವಾಗುವಂತೆ ಮಾರ್ಪಾಡು ಮಾಡಿಕೊಂಡು ಶೇಂಗಾ ಕಟ್ಲಿ ತಯಾರಿಸಿದ್ದಾಯಿತು. ಈ ಸ್ವೀಟ್ ಇಷ್ಟು ಚೆನ್ನಾಗಿ ಬರಬಹುದೆಂದು ನಾನೂ ನಿರೀಕ್ಷಿಸಿರಲಿಲ್ಲ! ನನ್ನ ಮಗಳಂತೂ ಈಗ ಶೇಂಗಾ ಕಟ್ಲಿಯ ದೊಡ್ಡ ಫ್ಯಾನ್ ಆಗಿಬಿಟ್ಟಿದ್ದಾಳೆ.
ಶೇಂಗಾ ಕಟ್ಲಿಯ ರೆಸಿಪಿ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 7 - 8 ನಿಮಿಷಗಳು
ಸೆಟ್ ಆಗಲು ಬೇಕಾಗುವ ಸಮಯ: 20 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಸುಲಭ
ಈ ಅಳತೆಯಿಂದ 35 ಕಟ್ಲಿ / ಬರ್ಫಿ ಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:

  • ಸಕ್ಕರೆ - 1 ಕಪ್ ಗಿಂತ 1 ಟೇಬಲ್ ಸ್ಪೂನ್ ಕಡಿಮೆ (1 ಕಪ್ = 200 ಗ್ರಾಂ)
  • ಹಾಲು - 1/2 ಕಪ್ 
  • ಶೇಂಗಾ ಪುಡಿ (ಹುರಿದು ಸಿಪ್ಪೆ ತೆಗೆದು ಪುಡಿಮಾಡಿದ್ದು) - 1 ಕಪ್ 
  • ತುಪ್ಪ - 1 ಟೀ ಚಮಚ 
  • ಪ್ರೆಶರ್ ಕುಕ್ಕರ್ 2 ಅಥವಾ 3 ಲೀಟರ್ ನದು (ನಾನು 3 ಲೀಟರ್ ನ ಕುಕ್ಕರ್ ಬಳಸಿದ್ದೇನೆ)

ತಯಾರಿಸುವ ವಿಧಾನ:
  • ಪ್ರೆಷರ್ ಕುಕ್ಕರ್ ನಲ್ಲಿ ಸಕ್ಕರೆ, ಹಾಲು ಸೇರಿಸಿ ಒಮ್ಮೆ ಮಿಕ್ಸ್ ಮಾಡಿ. ಸಕ್ಕರೆ ಹರಳುಗಳು ದೊಡ್ಡದಾಗಿದ್ದರೆ ಕರಗುವತನಕ ಕದಡಿ. 
  • ಕುಕ್ಕರ್ ನ ಮುಚ್ಚಳ ಮುಚ್ಚಿ ಸ್ವಲ್ಪ ದೊಡ್ಡ ಉರಿಯಲ್ಲಿ 6 ವಿಸಿಲ್ ಕೂಗಿಸಿ. ಪ್ರತಿ ವಿಸಿಲ್ ಆದಾಗಲೂ ಹೊರಚಿಮ್ಮುವ ನೀರನ್ನು ಸ್ವಚ್ಛಮಾಡಲು ಮರೆಯದಿರಿ. ಇಲ್ಲದಿದ್ದರೆ ವಿಸಿಲ್ ಸರಿಯಾಗಿ ಆಗುವುದಿಲ್ಲ. 
  • ಉರಿ ಆಫ್ ಮಾಡಿದ ತಕ್ಷಣ ಕುಕರ್ ನ ವೇಯ್ಟ್ ನ್ನು ಸ್ಪೂನ್ ನಿಂದ ಸ್ವಲ್ಪವೇ ಎತ್ತಿ ಪ್ರೆಷರ್ ಎಲ್ಲ ಹೋಗುವಂತೆ ಮಾಡಿ. 
  • ಪ್ರೆಷರ್ ಇಳಿದನಂತರ ಕುಕರ್ ಮುಚ್ಚಳ ತೆಗೆದು ಇದಕ್ಕೆ ಶೇಂಗಾಪುಡಿ ಸೇರಿಸಿ ಗಂಟಿಲ್ಲದಂತೆ ಬೇಗ ಮಿಕ್ಸ್ ಮಾಡಿ, ಮತ್ತೆ ಮುಚ್ಚಳ ಮುಚ್ಚಿ 20 ನಿಮಿಷ ಸೆಟ್ ಆಗಲು ಬಿಡಿ. 
  • 20 ನಿಮಿಷದ ನಂತರ ಕುಕ್ಕರ್ ಮುಚ್ಚಳ ತೆಗೆದು, ಕೈಗೆ ತುಪ್ಪ ಸವರಿಕೊಂಡು ಮಿಶ್ರಣವನ್ನು ಒಮ್ಮೆ ಮಿಕ್ಸ್ ಮಾಡಿಕೊಳ್ಳಿ. 
  • ತಯಾರಾದ ಮಿಶ್ರಣವನ್ನು ಜಿಡ್ಡು ಸವರಿದ ಪ್ಲೇಟ್ ನ ಮೇಲೆ ತೆಳ್ಳಗೆ ಹರಡಿ. ಬೇಕಾದ ಆಕಾರಕ್ಕೆ ಕತ್ತರಿಸಿ ಸವಿಯಿರಿ. 


ಟಿಪ್ಸ್:
  • ಈ ವಿಧಾನ ಅನುಸರಿಸಲು ಗ್ಯಾಸ್ ಸ್ಟವ್ ಅಥವಾ ಇಂಡಕ್ಷನ್ ಸ್ಟವ್ ಅಗತ್ಯ.    
  • ಶೇಂಗಾ ಪುಡಿ ಮಾಡುವಾಗ ಒಂದೇ ಸಮನೆ ತಿರುವಿಬಿಟ್ಟರೆ ಎಣ್ಣೆ ಬಿಟ್ಟುಕೊಳ್ಳುತ್ತದೆ. ಅದರ ಬದಲು ವಿಪ್ ಮಾಡುತ್ತ ಪೌಡರ್ ಮಾಡಿದರೆ ಚೆನ್ನಾಗಿ ಬರುತ್ತದೆ. 

Tuesday, 6 March 2018

ಅಕ್ಕಿಹಿಟ್ಟಿನ ಚಕ್ಲಿ

ಎಲ್ಲರಿಗೂ ನಮಸ್ಕಾರ!
ಇಷ್ಟು ದಿನವಾದರೂ ರೆಸಿಪಿ ಹಾಕದ ಕಾರಣ ನನ್ನ ಬರವಣಿಗೆ ನಿಂತುಹೋಯಿತೇನೋ ಎಂದು ಪರಿಚಯದವರೆಲ್ಲ ಕೇಳತೊಡಗಿದ್ದರು. ನಿಜ ಹೇಳಬೇಕೆಂದರೆ ನನಗೂ ಹಾಗೇ ಅನ್ನಿಸಿಬಿಟ್ಟಿತ್ತು! ಅಂತೂ ಇಂತೂ ತುಂಬಾ ದಿನಗಳ ನಂತರ ಬ್ಲಾಗ್ ಕಡೆಗೆ ನೋಡಲು ಸಮಯ ಸಿಕ್ಕಿದೆ. ನಮ್ಮ ಎರಡನೇ ಮಗುವಿನ ಆಗಮನ, ಊರು ಪ್ರಯಾಣ, ಮಕ್ಕಳ ಆರೈಕೆ ಇವುಗಳ ನಡುವೆ ಬರವಣಿಗೆಗೆ ಸಮಯವೇ ಸಿಗದಂತಾಗಿಬಿಟ್ಟಿದೆ. ಇನ್ನಾದರೂ ನಿಯಮಿತವಾಗಿ ಬ್ಲಾಗ್ ಕಡೆ ಸ್ವಲ್ಪ ಸಮಯ ಹೊಂದಿಸಿಕೊಳ್ಳೋಣವೆಂದುಕೊಂಡಿದ್ದೇನೆ, ಏನಾಗುವುದೋ ನೋಡೋಣ!
ಈಗ ನಾನು ಬರೆಯ ಹೊರಟಿರುವ ಚಕ್ಲಿ ರೆಸಿಪಿ ನನ್ನ ಅಮ್ಮನಿಂದ ಕಲಿತದ್ದು. ನನ್ನ ಬಾಳಂತನಕ್ಕೆ ಅಮ್ಮ ನಮ್ಮಲ್ಲಿಗೆ ಬಂದಾಗ ಮೊಮ್ಮಗಳಿಗೆ ಇಷ್ಟವೆಂದು ಚಕ್ಲಿ ಮಾಡಿದ್ದರು. ಗರಿಯಾಗಿ, ಬಾಯಲ್ಲಿಟ್ಟರೆ ಕರಗುವಂತಿದ್ದ ಚಕ್ಲಿ ಮಾಡಿದಷ್ಟೇ ಬೇಗ ಖಾಲಿಯೂ ಆಯಿತು. ರುಚಿಕರವಾದ ಈ ಚಕ್ಲಿಯನ್ನು ನೀವೂ ತಯಾರಿಸಿ ನೋಡಿ!


ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ
ಅಕ್ಕಿ ನೆನೆಸುವ ಸಮಯ: 2 - 3 ಘಂಟೆ 
ಡಿಫಿಕಲ್ಟಿ ಲೆವೆಲ್: ಕಷ್ಟಕರ 
ಈ ಅಳತೆಯಿಂದ ಸುಮಾರು 60 ಚಕ್ಲಿಗಳನ್ನು ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:

  • ಅಕ್ಕಿ - 1 ದೊಡ್ಡ ಕಪ್ ನಷ್ಟು (1 ಕಪ್ = 175ಗ್ರಾಂ)
  • ಹುರಿದ ಅಕ್ಕಿಹಿಟ್ಟು - 3 1/2 ಕಪ್ (ಅಂದಾಜು)
  • ಎಳ್ಳು - 4 ಟೀ ಸ್ಪೂನ್ 
  • ಜೀರಿಗೆ - 2 ಟೀ ಸ್ಪೂನ್ 
  • ಓಮ - 2 ಟೇಬಲ್ ಸ್ಪೂನ್ 
  • ಬೆಣ್ಣೆ - ನಿಂಬೆಗಾತ್ರ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ನೀರು - ಹಿಟ್ಟು ರುಬ್ಬಲು 
  • ಕರಿಯಲು ಎಣ್ಣೆ 


ತಯಾರಿಸುವ ವಿಧಾನ:

  • ಅಕ್ಕಿಯನ್ನು ಎರಡುಸಲ ತೊಳೆದು, 2 - 3 ಘಂಟೆಕಾಲ ನೀರಿನಲ್ಲಿ ನೆನೆಸಿಡಿ. 
  • ನೆನೆಸಿದ ಅಕ್ಕಿಯ ನೀರನ್ನು ಬಸಿದುಕೊಳ್ಳಿ. ಅಕ್ಕಿ, ಎಳ್ಳು, ಜೀರಿಗೆ, ಓಮ ಇಷ್ಟನ್ನೂ ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ನುಣ್ಣಗೆ ರುಬ್ಬಿ. ರುಬ್ಬಲು ಬೇಕಾಗುವಷ್ಟು ನೀರು ಸೇರಿಸಿಕೊಳ್ಳಿ. 
  • ರುಬ್ಬಿಕೊಂಡ ಹಿಟ್ಟಿಗೆ 2 1/2 ಟೀ ಸ್ಪೂನ್ ನಷ್ಟು ಉಪ್ಪು, ಎರಡು ಕಪ್ ನಷ್ಟು ನೀರು ಸೇರಿಸಿ ಮಿಕ್ಸ್ ಮಾಡಿ. 
  • ರುಬ್ಬಿಕೊಂಡ ಹಿಟ್ಟನ್ನು ಒಂದು ದಪ್ಪ ತಳದ ಪಾತ್ರೆಯಲ್ಲಿ ಹಾಕಿ ಕಾಯಲಿಡಿ. 
  • ಇದಕ್ಕೆ ನಿಂಬೆಗಾತ್ರದಷ್ಟು ಬೆಣ್ಣೆಯನ್ನು ಸೇರಿಸಿ ಹಿಟ್ಟು ದಪ್ಪಗಾಗುವವರೆಗೆ ಬಿಡದೇ ಕೈಯಾಡಿಸುತ್ತಿರಿ. 
  • ಹಿಟ್ಟು ದಪ್ಪಗಾದಾಗ ಇದಕ್ಕೆ 3 1/2 ಕಪ್ ನಷ್ಟು ಹುರಿದ ಅಕ್ಕಿಹಿಟ್ಟನ್ನು ಸೇರಿಸಿ ಬಿಸಿ ಇರುವಾಗಲೇ ಚೆನ್ನಾಗಿ ಮಿಕ್ಸ್ ಮಾಡಿ. 
  • ಮಿಶ್ರಣವನ್ನು ಚೆನ್ನಾಗಿ ನಾದಿ ಮೆತ್ತಗಿನ ಆದರೆ ಕೈಗೆ ಅಂಟದ ಹದಕ್ಕೆ ಹಿಟ್ಟನ್ನು ರೆಡಿಮಾಡಿಕೊಳ್ಳಿ. 
  • ಚಕ್ಲಿ ಹಿಟ್ಟನ್ನು ಒದ್ದೆ ಬಟ್ಟೆ ಮುಚ್ಚಿ ಇಟ್ಟು, ಬೇಕಾದಷ್ಟೇ ಹಿಟ್ಟನ್ನು ತೆಗೆದುಕೊಂಡು ಚಕ್ಲಿ ಒರಳಿನಲ್ಲಿ ಹಾಕಿ ಒತ್ತಿ ಚಕ್ಲಿ ಆಕಾರಕ್ಕೆ ಸುತ್ತಿಕೊಂಡು ಕಾದ ಎಣ್ಣೆಯಲ್ಲಿ ಗರಿಯಾಗುವಂತೆ ಕರಿಯಿರಿ.   
Related Posts Plugin for WordPress, Blogger...