Here are some recipes which I came across through the net, books, so on and few are my own experiments..

Wednesday, 29 February 2012

ಪಡ್ಡು (ಗುಳಿಯಪ್ಪ) / Paddu (Guliyappa)

Click here for English version.

ಅಂತೂ ಪಡ್ಡು ಮಾಡುವ ನನ್ನ ಆಸೆ ಈಡೇರಿತು! ಪಡ್ಡು ಕಾವಲಿಯನ್ನು ಕೊಳ್ಳಬೇಕೆಂದು ತುಂಬಾ ದಿನಗಳಿಂದ ನಮ್ಮವರ ಬಳಿ ಹೇಳುತ್ತಿದ್ದೆ. ಹಿಂದಿನ ತಿಂಗಳು ಪಾತ್ರೆ ಅಂಗಡಿಗೆ ಹೋದಾಗ ಪಡ್ಡು ಕಾವಲಿಯನ್ನು ಕೊಂಡೆವು. ಅದನ್ನು ಕೊಂಡಮೇಲೆ ಆಗಲೇ ಸುಮಾರು ಬಾರಿ ಪಡ್ಡು ತಯಾರಿಸಿಯಾಯಿತು. ಪಡ್ಡು ತಯಾರಿಕೆಗೆಂದೇ ಬೇರೆ ಹಿಟ್ಟನ್ನೇನೂ ನಾನು ಮಾಡಿಲ್ಲ. ಯಾವಾಗಲೂ ತಯಾರಿಸುವ ಸೆಟ್ ದೋಸೆ ಹಿಟ್ಟಿನ ವಿಧಾನದಲ್ಲೇ ಹಿಟ್ಟನ್ನು ತಯಾರಿಸಿ ಅದಕ್ಕೆ ಈರುಳ್ಳಿ, ಹಸಿಮೆಣಸು ಇತ್ಯಾದಿಗಳನ್ನು ಸೇರಿಸಿರುವುದಷ್ಟೆ. ಪಡ್ಡು ಬೆಳಗಿನ ತಿಂಡಿ, ಟಿಫಿನ್ ಬಾಕ್ಸ್, ಸಂಜೆಯ ಸ್ನ್ಯಾಕ್ಸ್ ಎಲ್ಲಕ್ಕೂ ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು 
ಸರ್ವಿಂಗ್ಸ್: 5 - 6 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
ಸೆಟ್ ದೋಸೆ ಹಿಟ್ಟು - ಸೆಟ್ ದೋಸೆಗೆ ಹೇಳಿದಷ್ಟೇ ಅಳತೆ 
ಸಣ್ಣಗೆ ಹೆಚ್ಚಿದ ಈರುಳ್ಳಿ - 5
ಸಣ್ಣಗೆ ಹೆಚ್ಚಿದ ಹಸಿಮೆಣಸು 6 - 7 
ಸಣ್ಣಗೆ ಹೆಚ್ಚಿದ ಕರಿಬೇವಿನ ಎಲೆಗಳು 15 - 20 
ಬೇಯಿಸಲು ಎಣ್ಣೆ 


ಮಾಡುವ ವಿಧಾನ:
ಸೆಟ್ ದೋಸೆಯ ವಿಧಾನದಲ್ಲಿಯೇ ಹಿಟ್ಟು ತಯಾರಿಸಿಕೊಂಡು 7 - 8 ಘಂಟೆ ಹುದುಗು ಬರಲು ಬಿಟ್ಟು, ನಂತರ ರುಚಿಗೆ ತಕ್ಕಷ್ಟು ಉಪ್ಪು, 1 ಚಮಚ ಸಕ್ಕರೆ ಸೇರಿಸಿ ಮಿಕ್ಸ್ ಮಾಡಿ.
ನಂತರ ಈ ಹಿಟ್ಟಿಗೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸು, ಕರಿಬೇವಿನ ಎಲೆಗಳನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ.
ಪಡ್ಡು ಕಾವಲಿಯನ್ನು ಕಾಯಲಿಟ್ಟು, ಪ್ರತಿ ತೂತಿನಲ್ಲೂ 1 ಚಮಚದಷ್ಟು ಎಣ್ಣೆ ಹಾಕಿ. 
ಒಂದು ದೊಡ್ಡ ಚಮಚದಲ್ಲಿ ಪಡ್ಡು ಹಿಟ್ಟನ್ನು ತೆಗೆದುಕೊಂಡು, ಎಲ್ಲ ತೂತುಗಳಲ್ಲೂ ಮುಕ್ಕಾಲು ಭಾಗದವರೆಗೆ ಹಾಕಿ. ಪಡ್ಡು ಉಬ್ಬಿ ಬರಲು ಸ್ವಲ್ಪ ಜಾಗ ಬಿಡಿ.
ಪಡ್ಡುವಿನ ತಳಭಾಗ ಹೊಂಬಣ್ಣಕ್ಕೆ ಬರುತ್ತಿದ್ದಂತೆ, ಸ್ಪೂನ್ ಸಹಾಯದಿಂದ ಪಡ್ಡುವನ್ನು ನಿಧಾನಕ್ಕೆ ಮಗುಚಿ ಇನ್ನೊಂದು ಕಡೆಯೂ ಬೇಯಿಸಿ.
ಬಿಸಿ ಬಿಸಿ ಪಡ್ಡುವನ್ನು ತೆಂಗಿನತುರಿ ಚಟ್ನಿಯೊಡನೆ ಸವಿಯಿರಿ.   


ಟಿಪ್ಸ್:
  • ಬೆಳಗ್ಗಿನ ದೋಸೆ ಹಿಟ್ಟು ಉಳಿದಿದ್ದರೆ ಅದನ್ನು ಹಾಗೇ ಫ್ರಿಜ್ ನಲ್ಲಿಟ್ಟು, ಸಾಯಂಕಾಲ ಅಥವಾ ಮರುದಿನ ಬೆಳಗ್ಗಿನ ತಿಂಡಿಗೆ ಪಡ್ಡು ತಯಾರಿಸಬಹುದು.

Friday, 17 February 2012

ಕರಿಬೇವಿನ ಸೊಪ್ಪಿನ ಚಟ್ನಿಪುಡಿ / Curry Leaves Chutney Powder

Click here for English version.

ಕರಿಬೇವು ಆರೋಗ್ಯದ ದೃಷ್ಟಿಯಿಂದ ತುಂಬ ಮಹತ್ವ ಪಡೆದಿದೆ. ಭಾರತೀಯ ಶೈಲಿಯ ಅಡಿಗೆಯಲ್ಲಿ ಹೆಚ್ಚಿನ ಅಡಿಗೆ ಪದಾರ್ಥಗಳಲ್ಲಿ ಕರಿಬೇವನ್ನು ಬಳಸುತ್ತಾರೆ. ಕರಿಬೇವು ಆಹಾರದೊಡನೆ ನಮ್ಮ ದೇಹಕ್ಕೆ ಹೋಗಲೆಂದು ಕೆಲವರು ಇದನ್ನು ಪುಡಿಮಾಡಿಟ್ಟುಕೊಂಡು ಅಡಿಗೆಯಲ್ಲಿ ಬಳಸುತ್ತಾರೆ. ಡಯಾಬಿಟಿಸ್ ಇರುವವರಿಗಂತೂ ಇದು ಒಳ್ಳೆಯ ಔಷಧ. ಇದನ್ನು ಅಡಿಗೆಯಲ್ಲಿ ಬಳಸುವುದರೊಂದಿಗೆ ಚಟ್ನಿಪುಡಿ, ಅನ್ನದೊಡನೆ ಕಲೆಸಿಕೊಳ್ಳುವ ಪುಡಿ, ಇತ್ಯಾದಿಗಳನ್ನೂ ತಯಾರಿಸಬಹುದು. ಆರೋಗ್ಯಕರವಾದ ಕರಿಬೇವಿನ ಚಟ್ನಿಪುಡಿ ತಯಾರಿಸುವ ವಿಧಾನ ಇಲ್ಲಿದೆ. ಇದನ್ನು ನಾನು ಅಡಿಗೆ ಪುಸ್ತಕವೊಂದರಿಂದ ಕಲಿತದ್ದು.


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು 

ಬೇಕಾಗುವ ಸಾಮಗ್ರಿಗಳು:
ಒಣಗಿದ ಕರಿಬೇವಿನ ಸೊಪ್ಪು - 10 ದಂಟು (ಕೆಳಗಡೆ ಸೂಚನೆ ನೋಡಿ)    
ಕಡಲೆಬೇಳೆ - 1/4 ಕಪ್ 
ಉದ್ದಿನಬೇಳೆ - 1/4 ಕಪ್
ಕೊಬ್ಬರಿತುರಿ - 1 ಟೇಬಲ್ ಚಮಚ   
ಒಣಮೆಣಸು 6 - 7 
ಆಮ್ ಚೂರ್ ಪೌಡರ್ - 1/2 ಚಮಚ ಅಥವಾ ರುಚಿಗೆ ತಕ್ಕಷ್ಟು 
ಸಕ್ಕರೆ - 1/2 ಚಮಚ ಅಥವಾ ರುಚಿಗೆ ತಕ್ಕಷ್ಟು  
ಉಪ್ಪು - ರುಚಿಗೆ ತಕ್ಕಷ್ಟು 
ಒಗ್ಗರಣೆಗೆ: ಎಣ್ಣೆ - 2 ಚಮಚ, ಸಾಸಿವೆ - 1 ಚಮಚ, ಚಿಟಿಕೆ ಇಂಗು 

ಮಾಡುವ ವಿಧಾನ:
ಬಾಣಲೆಯನ್ನು ಕಾಯಲಿಟ್ಟು ಕರಿಬೇವಿನ ಸೊಪ್ಪನ್ನು 4 - 5 ನಿಮಿಷ ಹುರಿಯಿರಿ.
ಕಡಲೆಬೇಳೆ ಮತ್ತು ಉದ್ದಿನಬೇಳೆಯನ್ನು ಪ್ರತ್ಯೇಕವಾಗಿ ಕೆಂಪಗೆ ಹುರಿದುಕೊಳ್ಳಿ.
ಒಣಮೆಣಸನ್ನು ಚೆನ್ನಾಗಿ ಹುರಿದುಕೊಂಡು, ಕೊನೆಯಲ್ಲಿ ಕೊಬ್ಬರಿತುರಿ ಸೇರಿಸಿ ಎರಡು ನಿಮಿಷ ಹುರಿಯಿರಿ.
ಹುರಿದ ಸಾಮಗ್ರಿಗಳು, ಸಕ್ಕರೆ, ಉಪ್ಪು, ಆಮ್ ಚೂರ್ ಪೌಡರ್ ಎಲ್ಲವನ್ನೂ ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ.
ಎಣ್ಣೆ ಕಾಯಿಸಿ ಸಾಸಿವೆ, ಇಂಗಿನ ಒಗ್ಗರಣೆ ಮಾಡಿ ಚಟ್ನಿಪುಡಿಗೆ ಸೇರಿಸಿ ಮಿಕ್ಸ್ ಮಾಡಿ.
ಈ ಚಟ್ನಿಪುಡಿಯನ್ನು ದೋಸೆ, ಚಪಾತಿಯೊಡನೆ ಹಾಕಿಕೊಳ್ಳಬಹುದು. 
ಹೆಚ್ಚು ದಿನ ಇಟ್ಟು ಬಳಸುವುದಾದರೆ ಈ ಚಟ್ನಿಪುಡಿಯನ್ನು ಫ್ರಿಜ್ ನಲ್ಲಿಟ್ಟು ಬಳಸಿ.  


ಸೂಚನೆ: ಕರಿಬೇವಿನ ಸೊಪ್ಪನ್ನು ನೆರಳಿನಲ್ಲಿ ಒಣಗಿಸಿಕೊಳ್ಳಿ. ಇಲ್ಲವೇ ಓವನ್ ನಲ್ಲೂ ಡ್ರೈ ಮಾಡಬಹುದು.

Monday, 13 February 2012

ಮೊಳಕೆ ಹೆಸರುಕಾಳಿನ ಪಲ್ಯ (ಉತ್ತರ ಕರ್ನಾಟಕ ಸ್ಟೈಲ್) / Moong Sprouts Palya (North Karnataka Style)

Click here for English version.

ಉತ್ತರ ಕರ್ನಾಟಕದ ಊಟವೆಂದರೆ ಬಹಳ ಗಮ್ಮತ್ತು. ನೀವು ಉತ್ತರ ಕರ್ನಾಟಕದ ಹುಬ್ಬಳ್ಳಿ, ಧಾರವಾಡ, ಹಾವೇರಿ ಮುಂತಾದ ಊರುಗಳಿಗೆ ಹೋದರೆ ಅಲ್ಲಿ ರೊಟ್ಟಿಯ ಊಟವೇ ಜಾಸ್ತಿ. ಜೋಳದ ರೊಟ್ಟಿ, ಅದರ ಜೊತೆಗೆ ಕೊಡುವ ರುಚಿರುಚಿಯಾದ ಸೈಡ್ ಡಿಶ್ ಗಳು, ವಿವಿಧ ಚಟ್ನಿ ಪುಡಿಗಳು.. ಆಹಾ! ಅವನ್ನೆಲ್ಲ ನೆನೆಸಿಕೊಂಡರೆ ಈಗಲೂ ಬಾಯಲ್ಲಿ ನೀರೂರುತ್ತದೆ! 
ಬೆಂಗಳೂರಿನಲ್ಲಿ ವಿಜಯನಗರದ ಬಸ್ ಸ್ಟ್ಯಾಂಡ್ ಬಳಿ ಒಂದು ಚಿಕ್ಕ ಅಂಗಡಿಯಿದೆ. ಅಲ್ಲಿ ವಿವಿಧ ಬಗೆಯ ರೊಟ್ಟಿಗಳು, ಸಬ್ಜಿ, ಚಟ್ನಿಪುಡಿಗಳು ಸಿಗುತ್ತವೆ. ಸಾಮಾನ್ಯವಾಗಿ ದಿನದ ಯಾವುದೇ ಟೈಮ್ ನಲ್ಲಿ ಆ ಅಂಗಡಿಗೆ ಹೋದರೂ ರೊಟ್ಟಿಯ ಪಾರ್ಸೆಲ್ ಒಯ್ಯಲು ಬಹಳ ಜನ ಬರುವುದನ್ನು ಕಾಣಬಹುದು. ಹಾಸ್ಟೆಲ್ ಊಟ ಮಾಡಲು ಬೇಜಾರಾದಾಗಲೆಲ್ಲ ನಾವು ಅಲ್ಲಿಂದ ರೊಟ್ಟಿಯ ಪಾರ್ಸೆಲ್ ತಂದು ತಿನ್ನುತ್ತಿದ್ದೆವು. ಅವರು ಕೊಡುವ ಹೆಸರುಕಾಳಿನ ಪಲ್ಯ ಮತ್ತು ಬದನೆಕಾಯಿ ಎಣ್ಣೆಗಾಯಿ ರೊಟ್ಟಿಯೊಡನೆ ಸೂಪರ್ಬ್ ಕಾಂಬಿನೇಶನ್! 
ನನಗೆ ಉತ್ತರ ಕರ್ನಾಟಕದ ಕಡೆಯ ಕಾಳಿನ ಪಲ್ಯವೆಂದರೆ ಬಹಳ ಇಷ್ಟ. ಮೊಳಕೆ ಹೆಸರುಕಾಳಿನ ಪಲ್ಯ ಮಾಡುವ ವಿಧಾನವನ್ನು ಟಿ.ವಿ. ಷೋ ಒಂದರಲ್ಲಿ ನೋಡಿದ್ದೆ. ನಂತರ ನಮ್ಮ ಅಭಿರುಚಿಗೆ ತಕ್ಕಂತೆ ಸಾಮಗ್ರಿಗಳನ್ನು ಅಡ್ಜಸ್ಟ್ ಮಾಡಿಕೊಂಡು ಪಲ್ಯ ತಯಾರಿಸಲು ಕಲಿತೆ. ಈ ಪಲ್ಯ ರೊಟ್ಟಿಯೊಡನೆ ಹಾಕಿಕೊಳ್ಳಲು ತುಂಬ ಚೆನ್ನಾಗಿರುತ್ತದೆ.  


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
ಮೊಳಕೆಬಂದ ಹೆಸರುಕಾಳು - 1 1/2 ಕಪ್ 
ಹಸಿಮೆಣಸು, ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ - 1 1/2 ಚಮಚ
ಜೀರಿಗೆ - 1/2 ಚಮಚ
ಸಾಸಿವೆ - 1/2 ಚಮಚ  
ಈರುಳ್ಳಿ (ಹೆಚ್ಚಿದ್ದು) - 1
ಅಚ್ಚಮೆಣಸಿನಪುಡಿ - 1/2 ಚಮಚ (ಖಾರಕ್ಕೆ ತಕ್ಕಂತೆ)
ಪುಡಿಮಾಡಿದ ಕರಿ ಎಳ್ಳು (ಬೇಕಿದ್ದರೆ) - 2 ಚಮಚ
ಆಮ್ ಚೂರ್ ಪೌಡರ್ (ಹುಳಿಪುಡಿ) - 1/2 ಚಮಚ (ರುಚಿಗೆ ತಕ್ಕಷ್ಟು)
ರುಚಿಗೆ ತಕ್ಕಷ್ಟು ಉಪ್ಪು
3 - 4 ಚಮಚ ಎಣ್ಣೆ


ಮಾಡುವ ವಿಧಾನ:
ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಸಾಸಿವೆ, ಜೀರಿಗೆ ಹಾಕಿ ಒಗ್ಗರಣೆ ಮಾಡಿಕೊಳ್ಳಿ.
ಇದಕ್ಕೆ ಹಸಿಮೆಣಸು-ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿ ವಾಸನೆ ಹೋಗುವಂತೆ ಹುರಿದು, ಹೆಚ್ಚಿದ ಈರುಳ್ಳಿ ಸೇರಿಸಿ 2 - 3 ನಿಮಿಷ ಹುರಿಯಿರಿ.
ನಂತರ ಇದಕ್ಕೆ ಮೊಳಕೆಬಂದ ಹೆಸರುಕಾಳು ಸೇರಿಸಿ ಜೊತೆಗೆ ಉಪ್ಪು, ಮೆಣಸಿನಪುಡಿ, ಆಮ್ ಚೂರ್ ಪೌಡರ್ ಸೇರಿಸಿ ಕೈಯಾಡಿಸಿ. ಬೇಯುವುದಕ್ಕೆ ಕಾಲು ಕಪ್ ನಷ್ಟು ನೀರು ಸೇರಿಸಿ ಒಂದು ಪ್ಲೇಟ್ ಮುಚ್ಚಿ ಬೇಯಿಸಿ.
ಪಲ್ಯ ಚೆನ್ನಾಗಿ ಬೆಂದ ನಂತರ ಪುಡಿಮಾಡಿದ ಕರಿ ಎಳ್ಳು ಸೇರಿಸಿ ಎರಡು ನಿಮಿಷ ಕೈಯಾಡಿಸಿ ಉರಿಯಿಂದ ಇಳಿಸಿ.
ಚಪಾತಿ ಅಥವಾ ರೊಟ್ಟಿಯೊಡನೆ ಈ ಪಲ್ಯವನ್ನು ಸರ್ವ್ ಮಾಡಿ.


ಟಿಪ್ಸ್:
  • ಈ ಪಲ್ಯವನ್ನು ಕರಿ ಎಳ್ಳಿನ ಪುಡಿ ಸೇರಿಸದೆಯೂ ಮಾಡಬಹುದು
  • ಪಲ್ಯಕ್ಕೆ ಕೊನೆಯಲ್ಲಿ ಬೇಕಿದ್ದರೆ ಕಾಲು ಚಮಚದಷ್ಟು ಗರಂ ಮಸಾಲಾ ಪುಡಿ ಸೇರಿಸಬಹುದು

Monday, 6 February 2012

100ನೇ ಪೋಸ್ಟ್: ಕಲ್ಲಂಗಡಿ ಹಣ್ಣಿನ ಜ್ಯೂಸ್ / Watermelon Juice

Click here for English version.

ಬೆಂಗಳೂರಿನಲ್ಲಿ ಈಗ ಕಲ್ಲಂಗಡಿ ಹಣ್ಣಿನ ಸೀಸನ್ ಶುರುವಾದಂತೆ ಕಾಣುತ್ತದೆ. ಹೊರಗಡೆ ತಿರುಗಾಡಲು ಹೋದರೆ ರಸ್ತೆಯ ಪಕ್ಕದಲ್ಲಿ ಕಲ್ಲಂಗಡಿ ಹಣ್ಣುಗಳ ರಾಶಿಗಳು ಅಲ್ಲಲ್ಲಿ ಕಾಣಸಿಗುತ್ತವೆ. ಕಳೆದ ವಾರ ತರಕಾರಿ ಕೊಳ್ಳಲು ಹೋದಾಗ ಅಲ್ಲಿ ದೊಡ್ಡ ದೊಡ್ಡ ಕಲ್ಲಂಗಡಿ ಹಣ್ಣುಗಳನ್ನಿಟ್ಟಿದ್ದರು. ಈ ಕಲ್ಲಂಗಡಿ ಹಣ್ಣು ಅರಿಸುವುದೆಂದರೆ ಬಹಳ ಕಷ್ಟದ ಕೆಲಸವೇ ಸರಿ! ಅಲ್ಲಿ ಕಟ್ ಮಾಡಿಟ್ಟ ಹಣ್ಣುಗಳೆಲ್ಲ ಕೆಂಪಗೆ ಚೆನ್ನಾಗಿರುತ್ತವೆ. ಆದರೆ ನಾವು ಕೊಳ್ಳುವ ಹಣ್ಣು ಮಾತ್ರ ಯಾವಾಗಲೂ ಚೆನ್ನಾಗಿರುವುದಿಲ್ಲ!! :D
ಈ ಬಾರಿ ತಂದ ಹಣ್ಣನ್ನು ಕಟ್ ಮಾಡಿದ ತಕ್ಷಣ ಅದರ ಕೆಂಪಗಿನ ಬಣ್ಣ ನೋಡಿ ನಾವು ಖುಷಿಪಟ್ಟೆವು. ಆದರೆ ಹಣ್ಣು ಸಿಹಿಯಾಗಿರದೆ ಸಪ್ಪೆಯಾಗಿತ್ತು. :( ಹಣ್ಣನ್ನು ಹಾಗೇ ತಿನ್ನುವುದಂತೂ ಆಗದ ಕೆಲಸ. ಹೀಗಾಗಿ ಜ್ಯೂಸ್ ಮಾಡಿ ಕುಡಿದು, ಹಣ್ಣನ್ನು ಖಾಲಿ ಮಾಡಿದೆವು! ತಯಾರಿಸಲು ತುಂಬ ಸುಲಭವಾದ ಈ ಜ್ಯೂಸ್ ಕುಡಿಯಲೂ ಚೆನ್ನಾಗಿರುತ್ತದೆ. ಹಾಗಂತ ಜ್ಯೂಸ್ ಮಾಡಲು ಸಪ್ಪೆ ಕಲ್ಲಂಗಡಿ ಹಣ್ಣನ್ನೇ ಬಳಸಬೇಕೆಂದಿಲ್ಲ..ಸಿಹಿಯಾಗಿರುವ ಹಣ್ಣಿನಲ್ಲೂ ಜ್ಯೂಸ್ ತಯಾರಿಸಬಹುದು. ಸಕ್ಕರೆ ಸ್ವಲ್ಪ ಕಡಿಮೆ ಸಾಕು ಅಷ್ಟೇ! :D
ಇದು ಬ್ಲಾಗ್ ನಲ್ಲಿ ನಾನು ಬರೆಯುತ್ತಿರುವ 100 ನೇ ಅಡಿಗೆ. ಸುಮ್ಮನೆ ಟೈಮ್ ಪಾಸ್ ಗೆ ಎಂದು ಶುರುಮಾಡಿದ ಬ್ಲಾಗ್ ನಿಮ್ಮೆಲ್ಲರ ಅಭಿಮಾನ ಗಳಿಸಿರುವುದು ತುಂಬ ಸಂತೋಷವೆನಿಸುತ್ತದೆ. ಮುಂಬರುವ ದಿನಗಳಲ್ಲೂ ನಿಮ್ಮ ಪ್ರೀತಿ - ವಿಶ್ವಾಸ ಹೀಗೇ ಮುಂದುವರಿಯಲೆಂದು ಆಶಿಸುತ್ತೇನೆ :)


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು: 
ಮೀಡಿಯಂ ಸೈಜ್ ಗೆ ಹೆಚ್ಚಿದ ಕಲ್ಲಂಗಡಿ ಹೋಳುಗಳು - 4 ಗ್ಲಾಸ್ ನಷ್ಟು (ನಾನು ಸರ್ವಿಂಗ್ ಗ್ಲಾಸ್ ನಲ್ಲೇ ಅಳತೆ ಮಾಡಿದ್ದೇನೆ)
ಸಕ್ಕರೆ - 4 ರಿಂದ 5 ಚಮಚ (ಸಿಹಿಯಾಗುವಷ್ಟು)
ಚಿಟಿಕೆ ಉಪ್ಪು
ಕಾಳುಮೆಣಸಿನ ಪುಡಿ - 1/2 ಚಮಚ
ಐಸ್ ಕ್ಯೂಬ್ಸ್ - ಬೇಕಿದ್ದರೆ

ಮಾಡುವ ವಿಧಾನ:
ಕಲ್ಲಂಗಡಿ ಹೋಳುಗಳನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. ರುಬ್ಬಿದ ಮಿಶ್ರಣವನ್ನು ಸೋಸಿಕೊಂಡು ಚರಟವನ್ನು ಬೇರ್ಪಡಿಸಿ.
ತಯಾರಾದ ಜ್ಯೂಸ್ ಗೆ ರುಚಿಗೆ ತಕ್ಕಷ್ಟು ಸಕ್ಕರೆ, ಚಿಟಿಕೆ ಉಪ್ಪು ಮತ್ತು ಕಾಳುಮೆಣಸಿನ ಪುಡಿಯನ್ನು ಸೇರಿಸಿ ಕದಡಿ.
ಬೇಕಿದ್ದರೆ ಇದನ್ನು ಸ್ವಲ್ಪ ಸಮಯ ಫ್ರಿಜ್ ನಲ್ಲಿಟ್ಟು ತಣ್ಣಗೆ ಮಾಡಿ ಕುಡಿಯಬಹುದು.
ಈ ಜ್ಯೂಸ್ ನ್ನು ಸರ್ವಿಂಗ್ ಗ್ಲಾಸ್ ಗೆ ಹಾಕಿ, ಒಂದೆರಡು ಐಸ್ ಕ್ಯೂಬ್ಸ್ ಸೇರಿಸಿ ಕುಡಿಯಲು ಕೊಡಿ.
ಬಿಸಿಲಿನಲ್ಲಿ ದಣಿದು ಬಂದಾಗ ತಣ್ಣಗಿನ ಜ್ಯೂಸ್ ಕುಡಿಯಲು ಬಹಳ ಚೆನ್ನಾಗಿರುತ್ತದೆ.


ಟಿಪ್ಸ್:
  • ಫ್ರಿಜ್ ನಲ್ಲಿಟ್ಟು ತಣ್ಣಗಾದ ಕಲ್ಲಂಗಡಿ ಹಣ್ಣಿನಿಂದ ಜ್ಯೂಸ್ ಮಾಡಿದರೆ ತಕ್ಷಣ ಕುಡಿಯಲು ತಣ್ಣಗೆ ಚೆನ್ನಾಗಿರುತ್ತದೆ. ಮತ್ತೆ ಐಸ್ ಕ್ಯೂಬ್ಸ್ ಸೇರಿಸಬೇಕೆಂದಿಲ್ಲ.

Wednesday, 1 February 2012

ಪಾಪಡ್ ಡಿಲೈಟ್ / Papad Delight

Click here for English version.

ವೀಕೆಂಡ್ ಊಟವೆಂದರೆ ನಮ್ಮ ಮನೆಯಲ್ಲಿ ಸ್ವಲ್ಪ ಸ್ಪೆಷಲ್. ಏಕೆಂದರೆ ಉಳಿದ ದಿನಗಳಲ್ಲಿ ಯಜಮಾನರು ಆಫೀಸಿಗೆ ಊಟದ ಡಬ್ಬ ತೆಗೆದುಕೊಂಡು ಹೋದರೆ ಬರುವುದು ಸಂಜೆಯೇ. ಸಂಜೆಯ ಊಟಕ್ಕೆ ಚಪಾತಿ, ಸಬ್ಜಿ ಮಾಡಿಬಿಟ್ಟರೆ ಅದರಲ್ಲೇ ಅವರ ಊಟ ಮುಗಿದುಹೋಗುತ್ತದೆ. ಸಂಜೆಯ ಊಟ ಲೈಟ್ ಆಗಿದ್ದಷ್ಟೂ ಒಳ್ಳೆಯದೇ! ಹೀಗಾಗಿ ಏನಾದರೂ ಊಟಕ್ಕೆ ಏನಾದರೂ ಸ್ಪೆಷಲ್ ಐಟಂಗಳನ್ನು ಮಾಡುವುದಾದರೆ ಅದು ವೀಕೆಂಡ್ ಗೇ ಸರಿ! 
ಹೋಟೆಲ್ ಗಳಲ್ಲಿ ಸಾಮಾನ್ಯವಾಗಿ ಸ್ಟಾರ್ಟರ್ ಗೆ ಹಪ್ಪಳ ಆರ್ಡರ್ ಮಾಡಿದರೆ ಹಪ್ಪಳದಮೇಲೆ ಈರುಳ್ಳಿ, ತುರಿದ ಕ್ಯಾರೆಟ್ ಇತ್ಯಾದಿಗಳನ್ನು ಹಾಕಿ ಸರ್ವ್ ಮಾಡುತ್ತಾರೆ. ಊಟಕ್ಕೆ ಹಪ್ಪಳ ಇದ್ದಾಗಲೆಲ್ಲ ಇಂಥ ಸ್ಟಾರ್ಟರ್ ನ್ನು ನಾನು ತಯಾರಿಸುತ್ತಿರುತ್ತೇನೆ. ವೀಕೆಂಡ್ ಊಟಕ್ಕೆ ಇಂಥ ಐಟಂಗಳಿದ್ದರೆ ನಮ್ಮವರಿಗೂ ತುಂಬ ಖುಷಿ! :) ಹಸಿ ತರಕಾರಿಗಳನ್ನು ಹಾಗೇ ತಿನ್ನಲು ಬೇಸರಪಡುವವರು ಹೀಗೆ ಪಾಪಡ್ ಡಿಲೈಟ್ ಮಾಡಿಕೊಂಡು ತಿಂದರೆ ನಾಲಿಗೆಗೂ ರುಚಿ, ಆರೋಗ್ಯಕ್ಕೂ ಒಳ್ಳೆಯದು. 
ನಾನು ಹೆಚ್ಚಾಗಿ ಹಪ್ಪಳವನ್ನು ಕರಿಯುವ ಗೋಜಿಗೆ ಹೋಗದೆ, ಹಾಗೇ ಸುಟ್ಟುಕೊಂಡು ಬಳಸುತ್ತೇನೆ. ಓವನ್ ಇದ್ದರಂತೂ ಹಪ್ಪಳ ಸುಡುವುದು ಬಹಳ ಸುಲಭ. ಮೈಕ್ರೋವೇವ್ ಮೋಡ್ (ಹೈ ಟೆಂಪರೇಚರ್)ನಲ್ಲಿ ಇಟ್ಟರೆ 30 - 40 ಸೆಕೆಂಡುಗಳಲ್ಲಿ ಹಪ್ಪಳ ರೆಡಿಯಾಗಿಬಿಡುತ್ತದೆ! 


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು 
ಸರ್ವಿಂಗ್ಸ್: 3 
   
ಬೇಕಾಗುವ ಸಾಮಗ್ರಿಗಳು:
ಲಿಜ್ಜತ್ ಹಪ್ಪಳ - 3 
ಈರುಳ್ಳಿ - 1 
ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು - 2 ಚಮಚ 
1 ಚಿಕ್ಕ ಕ್ಯಾರೆಟ್   
ಮೆಣಸಿನಪುಡಿ - 1 ಚಮಚ (ರುಚಿಗೆ ತಕ್ಕಷ್ಟು)
ತೆಂಗಿನತುರಿ 3 - 4 ಚಮಚ 
1 ಚಿಕ್ಕ ಟೊಮೆಟೋ
ನಿಂಬೆರಸ - ರುಚಿಗೆ ತಕ್ಕಷ್ಟು 
ರುಚಿಗೆ ಉಪ್ಪು 
ಕಾಳುಮೆಣಸಿನ ಪುಡಿ (ಬೇಕಿದ್ದರೆ) - ಸ್ವಲ್ಪ 


ಮಾಡುವ ವಿಧಾನ:
ಟೊಮೆಟೋ ಮತ್ತು ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಕ್ಯಾರೆಟ್ ತುರಿದುಕೊಳ್ಳಿ.
ಹಪ್ಪಳವನ್ನು ಕರಿದು ಅಥವಾ ಸುಟ್ಟು ರೆಡಿಮಾಡಿಕೊಳ್ಳಿ.
ಹಪ್ಪಳವನ್ನು ಸರ್ವ್ ಮಾಡುವ ಮುನ್ನ ಹೆಚ್ಚಿದ ಈರುಳ್ಳಿ, ಟೊಮೆಟೋ, ತುರಿದ ಕ್ಯಾರೆಟ್, ತೆಂಗಿನತುರಿ, ಹೆಚ್ಚಿದ ಕೊತ್ತಂಬರಿಸೊಪ್ಪು ಇಷ್ಟನ್ನೂ ಒಂದು ಬೌಲ್ ನಲ್ಲಿ ಹಾಕಿಕೊಂಡು ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸಿನಪುಡಿ ಸೇರಿಸಿ ಮಿಕ್ಸ್ ಮಾಡಿಕೊಳ್ಳಿ.
ಹಪ್ಪಳ ಖಾರವಿದ್ದರೆ ಮೆಣಸಿನ ಪುಡಿಯನ್ನು ಸ್ವಲ್ಪ ಕಡಿಮೆ ಬಳಸಿ.
ಹಪ್ಪಳದಮೇಲೆ ತಯಾರಿಸಿದ ಮಿಶ್ರಣವನ್ನು ಹರವಿ, ಮೇಲಿನಿಂದ ಸ್ವಲ್ಪ ನಿಂಬೆರಸ ಹಾಕಿ ತಕ್ಷಣ ಸರ್ವ್ ಮಾಡಿ. ರುಚಿಗೆ ಬೇಕಿದ್ದರೆ ಸ್ವಲ್ಪ ಕಾಳುಮೆಣಸಿನ ಪುಡಿ ಹಾಕಿಕೊಳ್ಳಬಹುದು.


ಟಿಪ್ಸ್:
  • ನಿಮ್ಮ ಅಭಿರುಚಿಗೆ ತಕ್ಕಂತೆ ಬೇರೆ ತರಕಾರಿಗಳು ಅಥವಾ ಚಾಟ್ ಮಸಾಲಾ ಇತ್ಯಾದಿಗಳನ್ನು ಬಳಸಬಹುದು.
  • ಹಪ್ಪಳದಮೇಲೆ ತರಕಾರಿ ಮಿಶ್ರಣವನ್ನು ಹಾಕಿದ ತಕ್ಷಣ ತಿಂದುಬಿಡಿ. ಹೆಚ್ಚು ಹೊತ್ತು ಹಾಗೇ ಇಟ್ಟರೆ ಹಪ್ಪಳ ಮೆತ್ತಗಾಗಿಬಿಡುತ್ತದೆ.
Related Posts Plugin for WordPress, Blogger...