Here are some recipes which I came across through the net, books, so on and few are my own experiments..

Thursday, 12 December 2013

ಫ್ರೂಟ್ ಯೋಗರ್ಟ್ | Fruit Yogurt

Click here for English version.

ನನ್ನ ಗಡಿಬಿಡಿಯ ದಿನಚರಿಯಲ್ಲಿ ಇತ್ತೀಚಿಗೆ ಅಡಿಗೆ ಪೋಸ್ಟ್ ಮಾಡಲು ಸಮಯ ಸಿಗುವುದೇ ಕಷ್ಟವಾಗಿಬಿಟ್ಟಿದೆ. ಯಾವುದಾದರೂ ಹೊಸ ತಿಂಡಿ ಮಾಡಿ, ಅದರ ಫೊಟೋ ಕ್ಲಿಕ್ಕಿಸಬೇಕೆನ್ನುವಷ್ಟರಲ್ಲಿ ಮಗಳ ಗಲಾಟೆ ಶುರುವಾಗಿರುತ್ತದೆ! ಹಾಗೂ ಹೀಗೂ ಸಿಕ್ಕ ಸಮಯದಲ್ಲೇ ತೆಗೆದಿಟ್ಟ ಅನೇಕ ಅಡಿಗೆ ಫೊಟೋಗಳು ನಾನು ಪೋಸ್ಟ್ ಮಾಡುವುದನ್ನೇ ಕಾಯುತ್ತ ಕುಳಿತಿವೆ. ಈ ರೆಸಿಪಿಯ ಫೊಟೋ ಕೂಡ ಅಷ್ಟೇ, ಕಡಿಮೆ ಎಂದರೂ ಮೂರು ತಿಂಗಳು ಹಳೆಯದು! 
ಫ್ರೂಟ್ ಯೋಗರ್ಟ್ ಎಂದರೆ ಗಟ್ಟಿ ಮೊಸರಿನ ಜತೆ ಹಣ್ಣುಗಳನ್ನು ರುಬ್ಬಿ ಹಾಕಿ ತಯಾರಿಸುವ ಒಂದು ಸಿಹಿ ತಿಂಡಿ. ಭಾರತೀಯರ ಪ್ರಕಾರ ಇದನ್ನು 'ಹಣ್ಣುಗಳನ್ನು ಹಾಕಿ ಮಾಡುವ ಶ್ರೀಖಂಡ' ಎಂದು ವ್ಯಾಖ್ಯಾನಿಸಬಹುದು. ಸುಪರ್ ಮಾರ್ಕೆಟ್ ಗಳಲ್ಲಿ ಸಿಗುವ ಬೇರೆ ಬೇರೆ ಹಣ್ಣುಗಳನ್ನು ಹಾಕಿ ತಯಾರಿಸಿದ ಸ್ಟ್ರಾಬೆರಿ ಯೋಗರ್ಟ್, ಮ್ಯಾಂಗೋ ಯೋಗರ್ಟ್, ಮಿಕ್ಸೆಡ್ ಬೆರ್ರಿ ಯೋಗರ್ಟ್, ಇವರಲ್ಲಿ ಒಬ್ಬರಾದರೂ ನಮ್ಮ ಮನೆಯ ಫ್ರಿಜ್ ನ ಖಾಯಂ ಸದಸ್ಯರು! ಇವನ್ನೆಲ್ಲ ಸವಿದ ನಂತರ ನಾನು ಟ್ರೈ ಮಾಡಿ ಕಲಿತ ಸ್ಟ್ರಾಬೆರಿ ಯೋಗರ್ಟ್ ರೆಸಿಪಿ ಇಲ್ಲಿದೆ. ಮೊಸರು ತಿನ್ನಲು ಇಷ್ಟಪಡದ ಮಕ್ಕಳಿಗೆ ಹಣ್ಣು ಸೇರಿಸಿ ತಯಾರಿಸುವ ಈ ಫ್ರೂಟ್ ಯೋಗರ್ಟ್ ಒಳ್ಳೆಯ ಸ್ನ್ಯಾಕ್ಸ್.


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು   
ತಂಪಾಗಲು ಬೇಕಾಗುವ ಸಮಯ: 1 - 2 ಘಂಟೆ 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು: 
  • ಸ್ಟ್ರಾಬೆರಿ ಹಣ್ಣುಗಳು - 4 ರಿಂದ 5
  • ಸಕ್ಕರೆ - 7 ಟೀ ಚಮಚ ಅಥವಾ ಸಿಹಿಗೆ ತಕ್ಕಷ್ಟು 
  • ಬಟ್ಟೆಯಲ್ಲಿ ನೇತುಹಾಕಿದ ಗಟ್ಟಿ ಮೊಸರು - 1 ಕಪ್ 
  • ವೆನಿಲ್ಲಾ ಎಸೆನ್ಸ್ (ಬೇಕಿದ್ದರೆ) - ಒಂದೆರಡು ಹನಿ 


ತಯಾರಿಸುವ ವಿಧಾನ:
  • ಸ್ಟ್ರಾಬೆರಿ ಹಣ್ಣುಗಳನ್ನು ಸಣ್ಣ ಹೋಳುಗಳಾಗಿ ಹೆಚ್ಚಿಕೊಳ್ಳಿ. 
  • ಮೊಸರು ಮತ್ತು ಸಕ್ಕರೆಯನ್ನು ಮಿಕ್ಸಿಯಲ್ಲಿ 1 ನಿಮಿಷ ತಿರುವಿ, ನುಣ್ಣಗಿನ ಪೇಸ್ಟ್ ತಯಾರಿಸಿಕೊಳ್ಳಿ. 
  • ಹೆಚ್ಚಿದ ಸ್ಟ್ರಾಬೆರಿಯನ್ನು ಎರಡು ಚಮಚದಷ್ಟು ತೆಗೆದಿಟ್ಟು ಉಳಿದೆಲ್ಲವನ್ನೂ ಮೊಸರು - ಸಕ್ಕರೆ ಮಿಶ್ರಣಕ್ಕೆ ಸೇರಿಸಿ ಅರ್ಧ ನಿಮಿಷ ತಿರುವಿ. 
  • ಉಳಿದ ಸ್ಟ್ರಾಬೆರಿ ಹೋಳುಗಳನ್ನು ಕೊನೆಯಲ್ಲಿ ಸೇರಿಸಿ. ಬೇಕಿದ್ದರೆ ಒಂದೆರಡು ಹನಿ ವೆನಿಲ್ಲಾ ಎಸೆನ್ಸ್ ಸೇರಿಸಿ ಮಿಕ್ಸಿಯನ್ನು 4 - 5 ಸೆಕೆಂಡ್ ಕಾಲ ಹಾಕಿ ಆಫ್ ಮಾಡಿ.
  • ತಯಾರಾದ ಸ್ಟ್ರಾಬೆರಿ ಯೋಗರ್ಟ್ ನ್ನು ಫ್ರಿಜ್ ನಲ್ಲಿ 2 ಘಂಟೆ ಸೆಟ್ ಆಗಲು ಬಿಡಿ. 
  • ಹಣ್ಣಿನ ಸ್ವಾದದ ತಂಪಾದ ಮೊಸರನ್ನು ಸರ್ವಿಂಗ್ ಬೌಲ್ ಗೆ ಹಾಕಿ ಸವಿಯಿರಿ!


ಟಿಪ್ಸ್:
  • ತಯಾರಿಸಿದ 1 - 2 ದಿನದೊಳಗೆ ಈ ಯೋಗರ್ಟ್ ನ್ನು ಖಾಲಿ ಮಾಡಿ. ನಾವು ಇಲ್ಲಿ ಯಾವುದೇ ಪ್ರಿಸರ್ವೇಟಿವ್ಸ್ ಸೇರಿಸದ ಕಾರಣ ಫ್ರೂಟ್ ಯೋಗರ್ಟ್ ಬೇಗ ತಾಜಾತನ ಕಳೆದುಕೊಳ್ಳುತ್ತದೆ.

Thursday, 14 November 2013

ನವಿಲುಕೋಸು ಪರೋಟ | ಟರ್ನಿಪ್ ಪರೋಟ | Turnip Paratha | Navilukosu Paratha

Click here for English version.

ನಾವು ಆಸ್ಟ್ರೇಲಿಯಾಕ್ಕೆ ಬಂದ ಹೊಸದರಲ್ಲಿ ಒಮ್ಮೆ ನಮ್ಮವರು ಇಲ್ಲಿ ಸಿಗುವ 'ಟರ್ನಿಪ್' ಎನ್ನುವ ತರಕಾರಿಯನ್ನು ತಂದಿದ್ದರು. ಅಡಿಗೆ ಮಾಡಲು ಅದನ್ನು ಕತ್ತರಿಸಿದಾಗ ನನಗೆ ಇದು ನಮ್ಮ ಕಡೆ ಸಿಗುವ ನವಿಲುಕೋಸಿನಂತೆ ಎನ್ನಿಸಿತು. ಆದರೆ ನವಿಲುಕೋಸಿನಂತೆ ತಿಳಿ ಹಸಿರು ಬಣ್ಣದ್ದಾಗಿರದೆ ಇದರ ಸಿಪ್ಪೆ ನೇರಳೆ ಮಿಶ್ರಿತ ಬಿಳಿ ಬಣ್ಣದ್ದಾಗಿತ್ತು. ಕೊನೆಗೆ ವಿಕಿಪೀಡಿಯಾ ನೋಡಿದಾಗ ಗೊತ್ತಾಯಿತು, ಇದು ನಮ್ಮಲ್ಲಿಯ ನವಿಲುಕೋಸಿನ ಇನ್ನೊಂದು ಬಗೆ ಎಂದು! ಈ ತರಕಾರಿ ಸಾಂಬಾರ್, ಹಶಿ, ಪರೋಟ, ಇತ್ಯಾದಿ ಭಾರತೀಯ ಅಡಿಗೆಗಳಿಗೆ ಬಹಳ ಚೆನ್ನಾಗಿರುತ್ತದೆ.
ನನ್ನ ಪುಟ್ಟ ಮಗಳಿಗೆ ರೊಟ್ಟಿ, ಚಪಾತಿ, ಪರೋಟ - ಇವೆಲ್ಲ ಪ್ರಿಯವಾದ ತಿಂಡಿಗಳು! ನಾವು ತಿಂಡಿಗೆ ಕುಳಿತರೆ ನಮ್ಮ ಜತೆ ಅವಳೂ ರೊಟ್ಟಿಯ ಪುಟ್ಟ ಪುಟ್ಟ ಚೂರುಗಳನ್ನು ನಿಧಾನವಾಗಿ ತಿನ್ನುತ್ತಾಳೆ. ಜೊತೆಗೆ ನಮ್ಮವರೂ ರೊಟ್ಟಿ ಪ್ರಿಯರು! ಹೀಗಾಗಿ ವಾರದ ಹೆಚ್ಚು ದಿನಗಳಲ್ಲಿ ನಮ್ಮ ಸಂಜೆ ಊಟಕ್ಕೆ ರೊಟ್ಟಿ ಅಥವಾ ಪರೋಟ ಮಾಡುವುದು ಇತ್ತೀಚೆಗೆ ಸಾಮಾನ್ಯವಾಗಿದೆ. 
ಪರೋಟ ತಯಾರಿಸಲು ನಾನು ಸಾಮಾನ್ಯವಾಗಿ ಬಳಸುವ ತರಕಾರಿಗಳಲ್ಲಿ 'ಟರ್ನಿಪ್' ಅಥವಾ 'ನವಿಲುಕೋಸು' ಕೂಡ ಒಂದು. ನವಿಲುಕೋಸು ಅಥವಾ ಟರ್ನಿಪ್ ಪರೋಟ ಮಾಡುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಕಠಿಣ

ಬೇಕಾಗುವ ಸಾಮಗ್ರಿಗಳು:
- ಹೂರಣಕ್ಕೆ:
  • ನವಿಲುಕೋಸು (ಟರ್ನಿಪ್) - 3 ದೊಡ್ಡ ಗಡ್ಡೆಗಳು
  • ಜೀರಿಗೆ - 1 1/2 ಟೀ ಚಮಚ
  • ಹಸಿಮೆಣಸು - 2 (ಖಾರಕ್ಕೆ ತಕ್ಕಂತೆ)
  • ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು - 1/2 ಕಪ್
  • ಉಪ್ಪು - 1 3/4 ಟೀ ಚಮಚ 

- ಕಣಕಕ್ಕೆ:
  • ಗೋಧಿ ಹಿಟ್ಟು - 5 ಕಪ್
  • ನೀರು - 2 1/2 ಕಪ್
  • ಉಪ್ಪು - 1 1/2 ಟೀ ಚಮಚ
  • ಎಣ್ಣೆ - 4ರಿಂದ 5 ಚಮಚ

ಮಾಡುವ ವಿಧಾನ:
  • ನವಿಲುಕೋಸನ್ನು ತುರಿದು ಅದಕ್ಕೆ ಜೀರಿಗೆ, ಹೆಚ್ಚಿದ ಕೊತ್ತಂಬರಿ ಸೊಪ್ಪು, ಉಪ್ಪು ಸೇರಿಸಿ ಕಲಸಿ 10 ನಿಮಿಷ ಬಿಡಿ. ನಂತರ ಈ ಮಿಶ್ರಣವನ್ನು ಸ್ವಲ್ಪ ಸ್ವಲ್ಪವೇ ತೆಗೆದುಕೊಂಡು ಕೈಯಲ್ಲಿ ಗಟ್ಟಿಯಾಗಿ ಹಿಂಡಿ ಅದರಲ್ಲಿರುವ ನೀರನ್ನು ಹೊರತೆಗೆಯಿರಿ. ಈ ನೀರನ್ನು ಹಾಗೇ ಇಟ್ಟುಕೊಂಡು ಕಣಕಕ್ಕೆ ಹಿಟ್ಟು ಕಲಸುವಾಗ ಬಳಸಬಹುದು. 
  • ನವಿಲುಕೋಸಿನ ಮಿಶ್ರಣಕ್ಕೆ ಜಜ್ಜಿದ ಹಸಿಮೆಣಸು ಸೇರಿಸಿ ಮಿಕ್ಸ್ ಮಾಡಿ. ರುಚಿ ನೋಡಿಕೊಂಡು ಉಪ್ಪು ಬೇಕಿದ್ದರೆ ಸ್ವಲ್ಪ ಸೇರಿಸಿ.   
  • ಗೋಧಿಹಿಟ್ಟಿಗೆ ಉಪ್ಪು, ಎಣ್ಣೆ ಸೇರಿಸಿ ಕೈಯಿಂದ ಚೆನ್ನಾಗಿ ಮಿಕ್ಸ್ ಮಾಡಿ. ಇದಕ್ಕೆ ಸ್ವಲ್ಪ ಸ್ವಲ್ಪವೇ ನೀರನ್ನು ಸೇರಿಸಿ ಮೆತ್ತಗಿನ ಹಿಟ್ಟನ್ನು ತಯಾರಿಸಿಕೊಳ್ಳಿ. ಬಳಸುವ ಮೊದಲು ಇದನ್ನು 10 ನಿಮಿಷ ಸೆಟ್ ಆಗಲು ಬಿಡಿ. 
  • ನವಿಲುಕೋಸಿನ ಮಿಶ್ರಣವನ್ನು 9 ಅಥವಾ 10 ಸಮಪಾಲುಗಳಾಗಿ ಮಾಡಿಕೊಳ್ಳಿ. ಹಿಟ್ಟನ್ನೂ ಅಷ್ಟೇ ಸಂಖ್ಯೆಯ ಸಮ ಭಾಗಳಾಗಿ ಮಾಡಿಕೊಂಡು ಉಂಡೆ ಮಾಡಿಕೊಳ್ಳಿ. 
  • ಗೋಧಿಹಿಟ್ಟಿನ ಉಂಡೆಯನ್ನು ಲಟ್ಟಿಸಿಕೊಂಡು ಅದರ ಮಧ್ಯೆ ಸ್ಟಫಿಂಗ್ ಮಿಶ್ರಣವನ್ನು ಇಟ್ಟು, ಸ್ಟಫಿಂಗ್ ಮಿಶ್ರಣ ಹೊರಗೆ ಬರದಂತೆ ಮುಚ್ಚಿ ಉಂಡೆ ತಯಾರಿಸಿ. ಉಂಡೆಯನ್ನು ಬೆರಳಿನಿಂದ ಸ್ವಲ್ಪ ಪ್ರೆಸ್ ಮಾಡಿ ಚಪ್ಪಟೆ ಮಾಡಿ, 2 ನಿಮಿಷ ಹಾಗೇ ಬಿಡಿ.
  • ಚಪ್ಪಟೆ ಮಾಡಿಟ್ಟ ಉಂಡೆಗಳನ್ನು ಒಣ ಹಿಟ್ಟಿನಲ್ಲಿ ಹೊರಳಿಸಿಕೊಂಡು ನಿಧಾನವಾಗಿ ವೃತ್ತಾಕಾರಕ್ಕೆ ಲಟ್ಟಿಸಿ. ಪರೋಟವನ್ನು ಚಪಾತಿಗಿಂತ ಸ್ವಲ್ಪ ದಪ್ಪಗೆ ಲಟ್ಟಿಸಬೇಕು; ಇಲ್ಲದಿದ್ದರೆ ಸ್ಟಫಿಂಗ್ ಹೊರಗೆ ಬಂದುಬಿಡುತ್ತದೆ. 
  • ಲಟ್ಟಿಸಿದ ಪರೋಟವನ್ನು ಹದವಾಗಿ ಕಾದ ಕಾವಲಿಯಮೇಲೆ ಎರಡೂ ಕಡೆ ಹೊಂಬಣ್ಣ ಬರುವವರೆಗೆ ಬೇಯಿಸಿ. ಬೇಯಿಸುವಾಗ ಎಣ್ಣೆ ಅಥವಾ ತುಪ್ಪ ಸೇರಿಸಿ. 
  • ಬಿಸಿ ಬಿಸಿ ಪರೋಟವನ್ನು ನಿಮ್ಮಿಷ್ಟದ ಸೈಡ್ ಡಿಶ್ ನೊಡನೆ ಸವಿಯಿರಿ!

ಟಿಪ್ಸ್:
  • ಪರೋಟವನ್ನು ಅರೆಬರೆ ಬೇಯಿಸಿ, ಪೂರ್ತಿ ತಣ್ಣಗಾದ ನಂತರ ಜಿಪ್ ಲಾಕ್ ಬ್ಯಾಗ್ ನಲ್ಲಿ ಹಾಕಿ ಫ್ರೀಜರ್ ನಲ್ಲಿ ಇಟ್ಟುಕೊಂಡರೆ ಬೇಕಾದಾಗ ಹೊರತೆಗೆದು ಪೂರ್ತಿ ಬೇಯಿಸಿ ಬಳಸಬಹುದು. ಮನೆಯವರ ಲಂಚ್ ಬಾಕ್ಸ್ ರೆಡಿ ಮಾಡಲು ಬೆಳಿಗ್ಗೆ ಬೇಗ ಎದ್ದು ಪರದಾಡುವ ತೊಂದರೆ ತಪ್ಪಿಸಿಕೊಳ್ಳಲು ಇದು ನಾನು ಕಂಡುಕೊಂಡ ಉಪಾಯ!

Friday, 20 September 2013

ಕಾರ್ನ್ ಮತ್ತು ಮೊಳಕೆ ಕಾಳಿನ ಸಲಾಡ್ (ಕೋಸಂಬರಿ) | Corn and Sprouts Salad

Click here for English version.

ನಮ್ಮ ಮನೆಯಲ್ಲಿ ಪ್ರತಿ ವಾರ ತರಕಾರಿಗೆ ಹೋದಾಗ ತರುವ ಐಟಂ ಗಳಲ್ಲಿ ಸ್ವೀಟ್ ಕಾರ್ನ್ ಕೂಡ ಒಂದು. ಸಾಯಂಕಾಲದ ಸ್ನ್ಯಾಕ್ಸ್ ಅಥವಾ ಕೋಸಂಬರಿ ಇಲ್ಲವೇ ಸೂಪ್ - ಹೀಗೆ ಯಾವುದಾದರೊಂದು ವಿಧದಲ್ಲಿ ಇದು ಬಳಕೆಯಾಗುತ್ತಿರುತ್ತದೆ. ಮೊಳಕೆ ಕಾಳುಗಳು ಇದ್ದಾಗ ಅದರ ಜೊತೆ ಸ್ವೀಟ್ ಕಾರ್ನ್, ದಾಳಿಂಬೆ ಬೀಜ ಹಾಗೂ ನಮ್ಮಿಷ್ಟದ ತರಕಾರಿಗಳನ್ನು ಬಳಸಿ ಕೋಸಂಬರಿ ಅಥವಾ ಸಲಾಡ್ ಮಾಡಿದರೆ ತಿನ್ನಲು ಬಹಳ ಚೆನ್ನಾಗಿರುತ್ತದೆ. ಹಣ್ಣು, ತರಕಾರಿಗಳನ್ನು ತಿನ್ನಲು ಬೇಸರಿಸುವ ಮಕ್ಕಳಿಗೆ ಇಂಥ ಸಲಾಡ್ ಗಳನ್ನು ನೀಡಿದರೆ ಆರೋಗ್ಯಕ್ಕೂ ಒಳ್ಳೆಯದು!


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಸುಲಭ 

ಬೇಕಾಗುವ ಸಾಮಗ್ರಿಗಳು:
  • ಮೊಳಕೆಯೊಡೆದ ಹೆಸರುಕಾಳು - 4 ಟೇಬಲ್ ಸ್ಪೂನ್
  • ಮೊಳಕೆಯೊಡೆದ ನೆಲಗಡಲೆ (ಶೇಂಗಾ) - 4 ಟೇಬಲ್ ಸ್ಪೂನ್
  • ಸ್ವೀಟ್ ಕಾರ್ನ್ - 4 ಟೇಬಲ್ ಸ್ಪೂನ್
  • ದಾಳಿಂಬೆ ಬೀಜ - 4 ಟೇಬಲ್ ಸ್ಪೂನ್
  • ತುರಿದ ಕ್ಯಾರೆಟ್ - 4 ಟೇಬಲ್ ಸ್ಪೂನ್
  • ರುಚಿಗೆ ಉಪ್ಪು 
ಮಾಡುವ ವಿಧಾನ:
  • ಒಂದು ಮಿಕ್ಸಿಂಗ್ ಬೌಲ್ ನಲ್ಲಿ ಹೆಸರುಕಾಳು, ನೆಲಗಡಲೆ, ಸ್ವೀಟ್ ಕಾರ್ನ್, ದಾಳಿಂಬೆ, ಕ್ಯಾರೆಟ್ ತುರಿ - ಎಲ್ಲವನ್ನೂ ಸೇರಿಸಿ. 
  • ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. 
  • ಖಾರಕ್ಕೆ ಬೇಕಿದ್ದರೆ ಸ್ವಲ್ಪ ಕಾಳುಮೆಣಸಿನ ಪುಡಿಯನ್ನೂ ಸೇರಿಸಬಹುದು.
  • ತಯಾರಾದ ಸಲಾಡ್ ನ್ನು ಸರ್ವಿಂಗ್ ಬೌಲ್ ಗೆ ಹಾಕಿಕೊಂಡು ಸವಿಯಿರಿ!


ಟಿಪ್ಸ್:
  • ಈ ಸಲಾಡ್ ನ್ನು ನಿಮ್ಮಿಷ್ಟದ ಯಾವುದೇ ತರಕಾರಿ ಹಾಗೂ ಮೊಳಕೆ ಕಾಳುಗಳನ್ನು ಸೇರಿಸಿ ತಯಾರಿಸಬಹುದು. 

Friday, 30 August 2013

ಹಲಸಿನ ಹಣ್ಣಿನ ಪಾಯಸ | Jack Fruit Kheer | Jack Fruit Payasa

Click here for English version.

ಹಲಸಿನ ಹಣ್ಣಿನಿಂದ ತಯಾರಿಸುವ ಸಿಹಿ ತಿಂಡಿಗಳಲ್ಲಿ ಇದೂ ಒಂದು. ನಿಜ ಹೇಳಬೇಕೆಂದರೆ ನಾನು ಹಲಸಿನ ಸೀಜನ್ ನಲ್ಲೇ ಈ ರೆಸಿಪಿಯನ್ನು ಬರೆಯಬೇಕೆಂದುಕೊಂಡಿದ್ದೆ. ಆದರೆ ನನ್ನ ಪುಟ್ಟ ಮಗಳ ಲಾಲನೆ ಪಾಲನೆಯಲ್ಲಿ ನನಗೆ ಬ್ಲಾಗ್ ಕಡೆ ಗಮನ ಹರಿಸಲು ಸಮಯವೇ ಸಿಗಲಿಲ್ಲ. ಹೆಚ್ಚಿನ ಮಹಿಳಾ ಬ್ಲಾಗಿಗರು ಮಕ್ಕಳಾದ ನಂತರ ಬರವಣಿಗೆ ನಿಲ್ಲಿಸುವುದು ಇದೇ ಕಾರಣಕ್ಕೆ ಇರಬಹುದೆಂದು ನನಗೆ ಈಗ ಅನ್ನಿಸುತ್ತಿದೆ :)
ರುಚಿಕರವಾದ ಹಾಗೂ ಬಹಳ ಸುಲಭದಲ್ಲಿ ತಯಾರಿಸಬಹುದಾದ ಈ ಪಾಯಸವನ್ನು ಹಲಸಿನ ಹಣ್ಣು ಸಿಕ್ಕಾಗ ತಯಾರಿಸಿ ಸವಿಯಿರಿ! ಹಲಸಿನ ಹಣ್ಣಿನ ಪಾಯಸ ತಯಾರಿಸುವ ವಿಧಾನ ಹೀಗಿದೆ.. 


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು 
ಸರ್ವಿಂಗ್ಸ್ : 4 - 5 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು:
  • ಮೀಡಿಯಮ್ ಸೈಜ್ ಗೆ ಹೆಚ್ಚಿದ ಹಲಸಿನ ಹಣ್ಣಿನ ತೊಳೆ - 2 ಕಪ್
  • ಹಾಲು - 2 ಕಪ್
  • ನೀರು - 2 ಕಪ್ 
  • ರುಚಿಗೆ ಉಪ್ಪು (ಒಂದು ಚಿಟಿಕೆ)
  • ಸಕ್ಕರೆ - 1 ಕಪ್ ಅಥವಾ ರುಚಿಗೆ ತಕ್ಕಷ್ಟು 
  • ಬೆಲ್ಲ - 2 ಚಮಚ (ಬೇಕಿದ್ದರೆ)
  • ಸೂಜಿ ರವಾ - 1/4 ಕಪ್
  • ಏಲಕ್ಕಿಪುಡಿ - 1/4 ಚಮಚ

ಮಾಡುವ ವಿಧಾನ:
  • ಸೂಜಿ ರವೆಯನ್ನು ಸ್ವಲ್ಪ ನೀರು ಸೇರಿಸಿ ಕೈಯಾಡಿಸಿ ನೀರನ್ನು ಬಸಿದು, 10 ನಿಮಿಷ ನೆನೆಯಲು ಬಿಡಿ.
  • ಒಂದು ಪಾತ್ರೆಯಲ್ಲಿ 2 ಕಪ್ ನಷ್ಟು ನೀರನ್ನು ಕಾಯಲಿಡಿ. ನೀರು ಬಿಸಿಯಾದಾಗ ಅದಕ್ಕೆ ಉಪ್ಪು ಮತ್ತು ಸಕ್ಕರೆ ಸೇರಿಸಿ ಎರಡು ನಿಮಿಷ ಕುದಿಸಿ. ನಂತರ ಇದಕ್ಕೆ ಹೆಚ್ಚಿದ ಹಲಸಿನ ಹಣ್ಣಿನ ತೊಳೆಗಳನ್ನು ಹಾಕಿ ಒಂದು ನಿಮಿಷ ಬೇಯಿಸಿ. 
  • ಹಲಸಿನ ತೊಳೆ ಬೇಯುತ್ತಿದ್ದಂತೆ ಇದಕ್ಕೆ ರವೆ ಸೇರಿಸಿ ಬಿಡದೆ ಕೈಯಾಡಿಸಿ. ಇಲ್ಲದಿದ್ದರೆ ರವೆ ಗಂಟಾಗಿಬಿಡುತ್ತದೆ. 
  • ರವೆ ಬೆಂದು ಮಿಶ್ರಣ ದಪ್ಪಗಾದಾಗ ಇದಕ್ಕೆ ಹಾಲು, ಏಲಕ್ಕಿಪುಡಿ ಸೇರಿಸಿ ಎರಡು ನಿಮಿಷ ಕುದಿಸಿದರೆ ಹಲಸಿನ ಹಣ್ಣಿನ ಪಾಯಸ ಸವಿಯಲು ಸಿದ್ಧ!   

 ಟಿಪ್ಸ್:
  • ಹಲಸಿನ ಹಣ್ಣಿನ ತೊಳೆ ಬೇಗ ಬೇಯುತ್ತದೆ. ಜಾಸ್ತಿ ಹೊತ್ತು ಬೇಯಿಸಿದರೆ ತೊಳೆ ಕರಗಿ ಮುದ್ದೆಯಾಗಿಬಿಡುತ್ತದೆ. 

Thursday, 8 August 2013

ಮಾವಿನಕಾಯಿ ಸಿಹಿ ಉಪ್ಪಿನಕಾಯಿ | Mango Sweet Pickle

Click here for English version.

ಈ ವರ್ಷ ನಮ್ಮೂರ ಕಡೆ ಮಾವಿನ ಫಸಲು ಚೆನ್ನಾಗಿ ಬರಬೇಕಾದ ವರ್ಷವಾಗಿತ್ತು. ಆದರೆ ನಮ್ಮ ಮನೆಯೂ ಸೇರಿದಂತೆ ಹೆಚ್ಚಿನ ಮನೆಗಳಲ್ಲಿ ಮಾವಿನ ಬೆಳೆ ಚೆನ್ನಾಗಿರಲಿಲ್ಲ. ನನ್ನ ತವರುಮನೆಯಲ್ಲಿ ಬೇರೆ ಬೇರೆ ಜಾತಿಯ ಮಾವಿನ ಮರಗಳು ಬಹಳ ಇದ್ದಿದ್ದರಿಂದ ನಾವೆಲ್ಲ ಚಿಕ್ಕಂದಿನಿಂದಲೂ ಮಾವಿನ ಹಣ್ಣನ್ನು ಸವಿಯುತ್ತ ಬೆಳೆದವರು. ಮನೆಯವರೆಲ್ಲ ಎಷ್ಟು ತಿಂದರೂ, ಪರಿಚಯದವರಿಗೆ ಕೊಟ್ಟರೂ ಖರ್ಚಾಗುತ್ತಿರಲಿಲ್ಲ ಮಾವಿನ ಹಣ್ಣುಗಳು! ಈ ವರ್ಷದ ಮಾವಿನ ಸೀಜನ್ ಗೆ ಬರೀ ಅಂಗಡಿಯಿಂದ ಕೊಂಡುತಂದ ಮಾವಿನ ಹಣ್ಣನ್ನೇ ತಿನ್ನುವುದಾಯಿತು ಅಂದುಕೊಂಡಿದ್ದೆವು ಮನೆಯವರೆಲ್ಲರೂ.. ಆದರೆ ಕೊನೆಗೂ ಮನೆಯಲ್ಲಿ ಬೆಳೆದ ಉತ್ತಮ ಜಾತಿಯ ಮಾವಿನ ಹಣ್ಣುಗಳನ್ನು ಸಖತ್ ಆಗಿ ತಿನ್ನುವ ಅವಕಾಶ ದೊರಕಿಬಿಟ್ಟಿತು!
ನನ್ನ ಅಮ್ಮನ ತವರುಮನೆಯಲ್ಲಿ ಈ ವರ್ಷ ಮಾವಿನ ಹಣ್ಣುಗಳು ಚೆನ್ನಾಗಿ ಬಿಟ್ಟಿದ್ದವಂತೆ. ಅವರ ಮನೆಯವರು ಮಾವಿನ ಹಣ್ಣನ್ನು ತಿನ್ನಲು ನಮ್ಮ ಮನೆಯವರನ್ನು ಪ್ರತಿ ವರ್ಷವೂ ಕರೆಯುವುದು ವಾಡಿಕೆ. ಈ ವರ್ಷ ಮನೆ ಕಡೆ ತೊಂದರೆಗಳಿಂದಾಗಿ ಅಮ್ಮನ ಅಣ್ಣಂದಿರು ನಾಲ್ಕೈದು ಬಾರಿ ಫೋನ್ ಮಾಡಿ ಕರೆದರೂ ಅವರ ಮನೆಗೆ ಯಾರಿಗೂ ಹೋಗಲಾಗಿರಲಿಲ್ಲ. ಕರೆದು ಕರೆದು ಬೇಸತ್ತು ಅವರೇ ಕೊನೆಗೆ ಅಮ್ಮನ ಮನೆಗೆ ಒಂದಿಷ್ಟು ಮಾವಿನ ಹಣ್ಣು ಮತ್ತು ಮಾವಿನ ಕಾಯಿಗಳನ್ನು ತಂದುಕೊಟ್ಟರು! ಬೇರೆ ಬೇರೆ ವೆರೈಟಿಯ ಸವಿಯಾದ ಮಾವಿನ ಹಣ್ಣುಗಳನ್ನು ನಾವೆಲ್ಲ ವಾರಗಟ್ಟಲೆ ತಿಂದೆವು!
ಸಾಮಾನ್ಯವಾಗಿ ಮಾವಿನಹಣ್ಣು ಇದ್ದಾಗಲೆಲ್ಲ ನಮ್ಮ ಮನೆಯಲ್ಲಿ ಮಾವಿನ ಸೀಕರಣೆ (ರಸಾಯನ) ಮಾಡುತ್ತಾರೆ. ಇದನ್ನು ಡೆಸರ್ಟ್ ನಂತೆಯೂ ತಿನ್ನಬಹುದು ಅಥವಾ ಸಿಹಿ ಪ್ರಿಯರು ದೋಸೆ ಅಥವಾ ರೊಟ್ಟಿಯೊಡನೆ ಸೈಡ್ ಡಿಶ್ ನಂತೆಯೂ ಬಳಸಬಹುದು. ಮಾವಿನ ಸೀಕರಣೆ ಮಾಡುವುದು ಹೇಗೆಂದು ತಿಳಿಯಲು ಇಲ್ಲಿ ಕ್ಲಿಕ್ ಮಾಡಿ.
ಈಗ ನಾನು ಹೇಳ ಹೊರಟಿರುವುದು ಮಾವಿನಕಾಯಿಯ ಒಂದು ಹೊಸ ಅಡಿಗೆಯ ಬಗ್ಗೆ! ಇತ್ತೀಚೆಗೆ ನಾನು ನಮ್ಮ ಅಕ್ಕನ ಮನೆಗೆ ಹೋದಾಗ ಅಲ್ಲಿ ಮಾವಿನಕಾಯಿಯ ಸಿಹಿ ಉಪ್ಪಿನಕಾಯಿ ಮಾಡಿದ್ದರು. ಸ್ವಲ್ಪ ಸಿಹಿ, ಸ್ವಲ್ಪ ಹುಳಿಯಾದ ಉಪ್ಪಿನಕಾಯಿ ಬಹಳ ಚೆನ್ನಾಗಿತ್ತು. ಅವರ ಮನೆಯವರಿಂದ ಕಲಿತ ಮಾವಿನಕಾಯಿ ಸಿಹಿ ಉಪ್ಪಿನಕಾಯಿ ಮಾಡುವ ವಿಧಾನ ಇಂತಿದೆ:


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು:
  • 1 ದೊಡ್ಡ ಮಾವಿನಕಾಯಿ (ತೋತಾಪುರಿ ಮಾವಿನಕಾಯಿ ಆದರೆ ಒಳ್ಳೆಯದು)
  • ಜೋನಿ ಬೆಲ್ಲ - 1 ರಿಂದ 1 1/2 ಕಪ್
  • ಉಪ್ಪು - 1 ಚಮಚ
  • ಹಸಿಮೆಣಸು - 2 (ಖಾರಕ್ಕೆ ತಕ್ಕಂತೆ)
  • ನೀರು - 1/2 ಕಪ್

ಮಾಡುವ ವಿಧಾನ:
  • ಮಾವಿನಕಾಯಿಯ ಸಿಪ್ಪೆ ತೆಗೆದು ಮಧ್ಯಮ ಗಾತ್ರದ ಸ್ವಲ್ಪ ತೆಳ್ಳಗಿನ ಸ್ಲೈಸ್ ಗಳಾಗಿ ಹೆಚ್ಚಿಕೊಳ್ಳಿ. 
  • ಒಂದು ಪಾತ್ರೆಯಲ್ಲಿ ಅರ್ಧ ಕಪ್ ನಷ್ಟು ನೀರು ಬಿಸಿಗಿಟ್ಟು, ನೀರು ಬಿಸಿಯಾದಾಗ ಅದಕ್ಕೆ ಮಾವಿನ ಸ್ಲೈಸ್ ಗಳನ್ನು ಹಾಕಿ ಒಂದು ನಿಮಿಷ ಬೇಯಿಸಿ. 
  • ಅರ್ಧ ಬೆಂದ ಮಾವಿನ ಹೋಳಿಗೆ ರುಚಿಗೆ ತಕ್ಕಷ್ಟು ಉಪ್ಪು, ಚೆನ್ನಾಗಿ ಸಿಹಿಯಾಗುವಷ್ಟು ಬೆಲ್ಲ, ಸೀಳಿದ ಹಸಿಮೆಣಸು ಸೇರಿಸಿ ದಪ್ಪ ಪಾಕ (ಜೇನುತುಪ್ಪದ ಹದ) ಬರುವವರೆಗೆ ಕುದಿಸಿ ಉರಿ ಆಫ್ ಮಾಡಿ. ಈ ಮಿಶ್ರಣ ದಪ್ಪವಾಗುವಷ್ಟರಲ್ಲಿ ಮಾವಿನ ಸ್ಲೈಸ್ ಗಳೂ ಚೆನ್ನಾಗಿ ಬೆಂದು ಟ್ರಾನ್ಸ್ ಪರೆಂಟ್ ಆಗಿರುತ್ತವೆ. 
  • ಈ ಉಪ್ಪಿನಕಾಯಿ ಊಟಕ್ಕೆ ನೆಂಜಿಕೊಳ್ಳಲು ಚೆನ್ನಾಗಿರುತ್ತದೆ. ಇದನ್ನು 2 - 3 ವಾರದವರೆಗೂ ಇಟ್ಟುಕೊಂಡು ಬಳಸಬಹುದು. 


ಟಿಪ್ಸ್:
  • ಈ ಉಪ್ಪಿನಕಾಯಿಗೆ ಯಾವ ಮಾವಿನಕಾಯಿ ಬಳಸಿದರೂ ಅಗುತ್ತದೆ. ತೋತಾಪುರಿ ಮಾವಿನಕಾಯಿ ಆದರೆ ಉತ್ತಮ.
  • ಖಾರಕ್ಕೆ ಹಸಿಮೆಣಸಿನ ಬದಲು ಮೆಣಸಿನಪುಡಿಯನ್ನೂ ಬಳಸಬಹುದು. 
  • ಈ ಉಪ್ಪಿನಕಾಯಿ ಹುಳಿ - ಸಿಹಿ ಎರಡೂ ಆಗಿದ್ದರೆ ರುಚಿ. ಒಲೆಯ ಉರಿ ಆಫ್ ಮಾಡುವ ಮುನ್ನ ಒಮ್ಮೆ ಉಪ್ಪಿನಕಾಯಿಯ ರುಚಿ ನೋಡಿ ಸಿಹಿ, ಹುಳಿ, ಖಾರ ಏನಾದರೂ ಬೇಕಿದ್ದರೆ ಸೇರಿಸಿ. ಹುಳಿ ಕಡಿಮೆ ಎನ್ನಿಸಿದರೆ ನಿಂಬೆರಸ ಸೇರಿಸಬಹುದು.

Saturday, 18 May 2013

ಹಲಸಿನಕಾಯಿ ಚಿಪ್ಸ್ । ಹಲಸಿನಕಾಯಿ ಸಂಡಿಗೆ | Jack Fruit Chips

Click here for English version.

ಹಲಸಿನ ಸೀಜನ್ ಶುರುವಾಗಿರುವುದರಿಂದ ನಮ್ಮ ಮನೆಯಲ್ಲೀಗ ಹಲಸಿನ ಚಿಪ್ಸ್, ಹಪ್ಪಳ ತಯಾರಿಸುವ ಸಂಭ್ರಮ. ಜೊತೆಗೆ ದಿನವೂ ಬಾಯಲ್ಲಿ ನೀರೂರಿಸುವ ಹಲಸಿನ ಥರಾವರಿ ಅಡಿಗೆಗಳು! ಅದರ ಜೊತೆಗೇ ಹಲಸಿನ ಹಣ್ಣಿನ ಹಣ್ಣಿನ ಕಡುಬು, ಹಲ್ವಾ ಇತ್ಯಾದಿ ಸಿಹಿ ತಿಂಡಿಗಳೂ ಆಗಾಗ ತಯಾರಾಗುತ್ತಿರುತ್ತವೆ.  
ಹಲಸಿನ ಚಿಪ್ಸ್ ಎಂದ ತಕ್ಷಣ ನನಗೆ ಚಿಕ್ಕಂದಿನ ದಿನಗಳ ನೆನಪಾಗುತ್ತದೆ. ನನ್ನ ತವರುಮನೆಯಲ್ಲಿ ಹಲಸಿನ ಚಿಪ್ಸ್ ನ್ನು ತಯಾರಿಸಿ ಒಂದು ವರ್ಷದವರೆಗೂ ಇಟ್ಟು ಬಳಸುತ್ತಾರೆ. ಮನೆಯಲ್ಲಿ ನಾವು ನಾಲ್ಕೈದು ಜನ ಒಂದೇ ವಾರಿಗೆಯ ಮಕ್ಕಳು. ನಮ್ಮ ಕಣ್ಣು ತಪ್ಪಿಸಿ ಚಿಪ್ಸ್ ಕಾಯ್ದಿಡುವುದೆಂದರೆ ಅಮ್ಮ - ಚಿಕ್ಕಮ್ಮಂದಿರಿಗೆ ದೊಡ್ಡ ಸವಾಲ್! ಅವರು ಚಿಪ್ಸ್ ತುಂಬಿದ ಡಬ್ಬಗಳನ್ನು ಎಷ್ಟೇ ಜಾಗ್ರತೆಯಿಂದ ಅಡಗಿಸಿಟ್ಟರೂ ನಾವುಗಳು ಅದನ್ನು ಹುಡುಕಿ ಖಾಲಿ ಮಾಡಿಬಿಡುತ್ತಿದ್ದೆವು! ಈಗಲೂ ಹಲಸಿನ ಚಿಪ್ಸ್ ಮಾಡುವಾಗ ಅವರು ನಮ್ಮ ನೆನಪು ಮಾಡಿಕೊಂಡು ನಗುತ್ತಿರುತ್ತಾರೆ :)
ಒಳ್ಳೆಯ ಎಣ್ಣೆ ಬಳಸಿ ಗರಿಯಾಗಿ ಕರಿದರೆ ಚಿಪ್ಸ್ ಬಹಳ ದಿನಗಳವರೆಗೆ ಫ್ರೆಶ್ ಆಗಿ ಚೆನ್ನಾಗಿರುತ್ತದೆ. ಹಲಸಿನ ಚಿಪ್ಸ್ ತಯಾರಿಸುವ ವಿಧಾನ ಇಂತಿದೆ:


ತಯಾರಿಸಲು ಬೇಕಾಗುವ ಸಮಯ: 2 1/2 ಘಂಟೆ
ಡಿಫಿಕಲ್ಟಿ ಲೆವೆಲ್: ಡಿಫಿಕಲ್ಟ್ 

ಬೇಕಾಗುವ ಸಾಮಗ್ರಿಗಳು:
  • ಚೆನ್ನಾಗಿ ಬೆಳೆದ ಮೀಡಿಯಂ ಸೈಜ್ ನ ಹಲಸಿನಕಾಯಿ - 1 
  • ಕರಿಯಲು ಎಣ್ಣೆ
  • ಉಪ್ಪು - 4 ಟೀ ಸ್ಪೂನ್
  • ನೀರು - 1 ಕಪ್
  • ಚಿಪ್ಸ್ ಮಸಾಲಾ - ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
  • ಹಲಸಿನಕಾಯಿಯ ತೊಳೆಗಳನ್ನು ಬಿಡಿಸಿ ಬೀಜವನ್ನು ಬೇರ್ಪಡಿಸಿಕೊಳ್ಳಿ. ಬಿಡಿಸಿದ ತೊಳೆಗಳನ್ನು ತೆಳ್ಳಗೆ ಉದ್ದುದ್ದಕ್ಕೆ ಹೆಚ್ಚಿಕೊಳ್ಳಿ. 
  • ಒಂದು ಕಪ್ ನೀರಿಗೆ 3 ರಿಂದ 4 ಚಮಚ ಉಪ್ಪು ಸೇರಿಸಿ ಉಪ್ಪುನೀರು ತಯಾರಿಸಿಕೊಳ್ಳಿ. 
  • ಒಂದು ದಪ್ಪ ತಳದ ಅಗಲವಾದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು ಉದ್ದವಾಗಿ ಹೆಚ್ಚಿದ ಹಲಸಿನ ತೊಳೆಗಳನ್ನು ಹಾಕಿ 1 - 2 ಚಮಚ ಉಪ್ಪುನೀರು ಸೇರಿಸಿ ಮಧ್ಯಮ ಉರಿಯಲ್ಲಿ  ಗರಿಯಾಗುವತನಕ ಕರಿಯಿರಿ.  
  • ಕರಿದ ಚಿಪ್ಸ್ ನ್ನು ಒಂದು ಜಾಲರಿ ಅಥವಾ ಟಿಶ್ಯೂ ಪೇಪರ್ ಮೇಲೆ 5 ನಿಮಿಷ ಹರವಿ ಎಣ್ಣೆ ಆರಲು ಬಿಡಿ.
  • ಒಂದು ಪಾತ್ರೆಯಲ್ಲಿ ಕರಿದ ಚಿಪ್ಸ್ ನ್ನು ಹಾಕಿ, ಮೇಲಿನಿಂದ ರುಚಿಗೆ ತಕ್ಕಂತೆ ಅರ್ಧ ಚಮಚ ಅಥವಾ ಒಂದು ಚಮಚ ಚಿಪ್ಸ್ ಮಸಾಲಾ ಪುಡಿ ಉದುರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಒಮ್ಮೆ ರುಚಿ ನೋಡಿಕೊಂಡು ಇನ್ನೂ ಸ್ವಲ್ಪ ಮಸಾಲಾ ಪುಡಿ ಬೇಕಿದ್ದರೆ ಸೇರಿಸಿ ಮಿಕ್ಸ್ ಮಾಡಿ.
  • ಹಲಸಿನ ತೊಳೆಗಳು ಖಾಲಿಯಾಗುವವರೆಗೂ ಈ ಮೇಲೆ ಹೇಳಿದ ಸ್ಟೆಪ್ ಗಳನ್ನು ಮುಂದುವರೆಸಿ. 
  • ತಯಾರಾದ ಹಲಸಿನ ಚಿಪ್ಸ್ ನ್ನು ಗಾಳಿಯಾಡದ ಡಬ್ಬದಲ್ಲಿ ತುಂಬಿಟ್ಟು ಬಳಸಿ. ಬಿಸಿ ಬಿಸಿ ಟೀ ಅಥವಾ ಕಾಫಿಯೊಡನೆ ಸವಿಯಲು ಈ ಚಿಪ್ಸ್ ತುಂಬಾ ಚೆನ್ನಾಗಿರುತ್ತದೆ. 

ಟಿಪ್ಸ್:
  • ಚಿಪ್ಸ್ ಕರಿದಾಗ ಗರಿಯಾಗದಿದ್ದರೆ ಅದನ್ನು ತಣ್ಣಗಾದ ನಂತರ ಇನ್ನೊಮ್ಮೆ ಕರಿದರೆ ಗರಿಯಾಗುತ್ತದೆ. ಅಥವಾ ಕರಿಯುವಾಗ ಸ್ವಲ್ಪ ವಿನೆಗರ್ ಸೇರಿಸಿದರೂ ಚಿಪ್ಸ್ ಗರಿಗರಿಯಾಗುತ್ತದೆ. 
  • ತುಂಬಾ ದಿನಗಳವರೆಗೆ ಚಿಪ್ಸ್ ನ್ನು ಫ್ರೆಷ್ ಆಗಿಡಲು ಒಂದು ಉಪಾಯ: ಚಿಪ್ಸ್ ನ್ನು ಉಪ್ಪುನೀರು ಸೇರಿಸಿ ಗರಿಯಾಗಿ ಕರಿದು ಮಸಾಲಾ ಪುಡಿ ಸೇರಿಸದೆ ಹಾಗೆಯೇ ಡಬ್ಬದಲ್ಲಿ ತುಂಬಿಡಿ. ನಿಮಗೆ ಬೇಕೆನಿಸಿದಾಗ ಬಾಣಲೆಯಲ್ಲಿ ಸ್ವಲ್ಪ (4 - 5 ಚಮಚ) ಎಣ್ಣೆ ಕಾಯಿಸಿ ಅದಕ್ಕೆ ಸ್ವಲ್ಪ ಚಿಪ್ಸ್ ಮತ್ತು ರುಚಿಗೆ ತಕ್ಕಷ್ಟು ಚಿಪ್ಸ್ ಮಸಾಲಾ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿದರೆ ತಾಜಾ ಚಿಪ್ಸ್ ಸವಿಯಲು ಸಿದ್ಧ!            

Thursday, 7 March 2013

ಗಿಣ್ಣು | Ginnu | Junnu | Posu | Kharvas

Click here for English version.

ಗಿಣ್ಣು ಎಂದರೆ ಸಾಮಾನ್ಯವಾಗಿ ಹಳ್ಳಿಗಳ ಕಡೆ ಬೆಳೆದವರಿಗೆ ಪರಿಚಿತವಾದ ಸಿಹಿ ತಿನಿಸು. ಆಕಳು ಅಥವಾ ಎಮ್ಮೆ ಕರು ಹಾಕಿದಾಗ ಅದರ ಮೊದಲ ದಿನದ ಹಾಲಿನಿಂದ ಈ ಸಿಹಿ ತಿಂಡಿಯನ್ನು ತಯಾರಿಸುತ್ತಾರೆ. ನಮ್ಮ ಕಡೆ ಇದನ್ನು ಬಟ್ಟಲು ಗಿಣ್ಣು ಎಂದು ಕರೆಯುತ್ತಾರೆ. ಬೇರೆ ಬೇರೆ ಭಾಷೆಗಳಲ್ಲಿ ಇದನ್ನು ಜುನ್ನು, ಪೋಸು, ಖಾರ್ವಾಸ್ ಇತ್ಯಾದಿ ಹೆಸರುಗಳಿಂದ ಕರೆಯಲಾಗುತ್ತದೆ. 
ನಮ್ಮ ಮನೆಯಲ್ಲಿ ನಮಗಿಬ್ಬರಿಗೂ ಗಿಣ್ಣು ಎಂದರೆ ತುಂಬ ಇಷ್ಟ. ಆದರೆ ಊರಿಗೆ ಬರುವುದು ಅಪರೂಪವಾದ ಕಾರಣ ಗಿಣ್ಣು ಸವಿಯುವ ಅವಕಾಶ ಸಿಗುವುದು ಕಡಿಮೆ. ಹೈದರಾಬಾದ್ ನಲ್ಲಿರುವ ನನ್ನ ಅಕ್ಕ ಅಲ್ಲಿ ಅಂಗಡಿಯಲ್ಲಿ ಸಿಗುವ ಗಿಣ್ಣು ಮಿಕ್ಸ್ ಬಳಸಿ ಬೇಕೆನಿಸಿದಾಗಲೆಲ್ಲ ಗಿಣ್ಣು ತಯಾರಿಸುತ್ತಿರುತ್ತಾಳೆ. ಬೆಂಗಳೂರಿನಲ್ಲಿ ನಾನು ಅಂಥ ಮಿಕ್ಸ್ ಗಾಗಿ ಅನೇಕ ಸುಪರ್ ಮಾರ್ಕೆಟ್ ಗಳಲ್ಲಿ ಹುಡುಕಿದರೂ ಇಲ್ಲೆಲ್ಲೂ ಅದು ಸಿಗಲಿಲ್ಲ. ಸಾದಾ ಹಾಲಿನಿಂದ ಗಿಣ್ಣು ತಯಾರಿಸಲು ಎರಡ್ಮೂರು ಬಾರಿ ಪ್ರಯತ್ನಿಸಿದರೂ ಅದು ನಮಗೆ ಅಷ್ಟೇನೂ ಇಷ್ಟವಾಗಲಿಲ್ಲ. ಹೀಗಾಗಿ ಊರಿನಲ್ಲಿ ತಯಾರಿಸುವ ಗಿಣ್ಣು ಸವಿಯಲು ಕಾಯುತ್ತಿರುತ್ತೇವೆ!
ಕಳೆದ ವಾರ ಅಮ್ಮನ ಮನೆಯಲ್ಲಿ ಗಿಣ್ಣು ತಯಾರಿಸಿದಾಗ ನನಗೆ ಅದನ್ನು ಸವಿಯುವ ಅವಕಾಶ ಸಿಕ್ಕಿತು. ಗಿಣ್ಣು ತಯಾರಿಸುವುದು ಬಹಳ ಸುಲಭ; ತಯಾರಿಸಲು ಬೇಕಾಗುವ ಸಮಯವೂ ಬಹಳ ಕಡಿಮೆ. ಗಿಣ್ಣು ಹಾಲು ಸಿಕ್ಕಾಗ ಈ ರೆಸಿಪಿ ಟ್ರೈ ಮಾಡಿ ನೋಡಿ!


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್ : ಸುಲಭ
ಈ ಅಳತೆಯಿಂದ 10 ಗಿಣ್ಣು ಪೀಸ್ ಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:
  • ಕರು ಹಾಕಿದ ಹಸು / ಎಮ್ಮೆಯ ಮೊದಲ ದಿನದ ಹಾಲು - 3 ಕಪ್ (ಟಿಪ್ಸ್ ನೋಡಿ)
  • ಸಕ್ಕರೆ - 2 ಕಪ್
  • ಕೇಸರಿ ದಳಗಳು - 15


ಮಾಡುವ ವಿಧಾನ:
  • ಹಾಲಿಗೆ ಸಕ್ಕರೆ ಸೇರಿಸಿ ಸಕ್ಕರೆ ಪೂರ್ತಿ ಕರಗುವವರೆಗೆ ಚೆನ್ನಾಗಿ ಕದಡಿ. 
  • ಪ್ರೆಷರ್ ಕುಕ್ಕರ್ ನ ತಳಕ್ಕೆ ಸ್ವಲ್ಪ ನೀರು ಹಾಕಿ ಕಾಯಲಿಡಿ. 
  • ಹಾಲನ್ನು ಪ್ರೆಷರ್ ಕುಕ್ಕರ್ ಒಳಗೆ ಇಡಬಹುದಾದ ಅಗಲವಾದ ಪಾತ್ರೆಯಲ್ಲಿ 1 ಇಂಚು ದಪ್ಪಗೆ ಬರುವಂತೆ ಹಾಕಿ, ಕೇಸರಿ ದಳಗಳನ್ನು ಸೇರಿಸಿ. 
  • ಪಾತ್ರೆಯನ್ನು ಕುಕ್ಕರ್ ನಲ್ಲಿಟ್ಟು ಎರಡು ವಿಸಿಲ್ ಆಗುವವರೆಗೆ ಗಿಣ್ಣನ್ನು ಬೇಯಿಸಿ. 
  • ಕುಕ್ಕರ್ ಸ್ವಲ್ಪ ತಣ್ಣಗಾದ ನಂತರ ಪಾತ್ರೆಯನ್ನು ಹೊರತೆಗೆದು ಗಿಣ್ಣುವನ್ನು ಬೇಕಾದ ಆಕಾರಕ್ಕೆ ಕತ್ತರಿಸಿ ಸವಿಯಿರಿ!


ಟಿಪ್ಸ್:
  • ಕರು ಹಾಕಿದ ತಕ್ಷಣ ಕರೆದ ಎಮ್ಮೆಯ ಹಾಲಾದರೆ ಹಾಲಿಗೆ ಅಷ್ಟೇ ಪ್ರಮಾಣದ ನೀರನ್ನು ಸೇರಿಸಿ ಗಿಣ್ಣು ತಯಾರಿಸಿ. ಇಲ್ಲದಿದ್ದರೆ ಗಿಣ್ಣು ತುಂಬಾ ಗಟ್ಟಿಯಾಗಿಬಿಡುತ್ತದೆ. ಎರಡನೇ ಸಾರಿ ಕರೆದ ಹಾಲಾದರೆ ನೀರು ಸೇರಿಸುವುದು ಬೇಡ. ಆಕಳ ಹಾಲಿನಿಂದ ಗಿಣ್ಣು ತಯಾರಿಸುವಾಗ ನೀರು ಸೇರಿಸಬೇಡಿ. 
  • ಹಾಲಿನಲ್ಲಿ ಸಕ್ಕರೆ ಪೂರ್ತಿಯಾಗಿ ಕರಗಿದ ನಂತರವೇ ಅದನ್ನು ಬೇಯಲಿಡಿ. ಬೇಯಲಿಟ್ಟ ನಂತರ ಸಕ್ಕರೆ ಕರಗದೆ ಹಾಗೇ ಉಳಿದುಬಿಡುತ್ತದೆ. 
  • ಕೇಸರಿ ದಳದ ಬದಲು ಏಲಕ್ಕಿ ಪುಡಿ ಅಥವಾ ಜಾಯಿಕಾಯಿ ಸೇರಿಸಿಯೂ ಗಿಣ್ಣು ತಯಾರಿಸಬಹುದು. 
  • ಸಕ್ಕರೆಯ ಬದಲು ಬೆಲ್ಲ ಬಳಸಿಯೂ ಗಿಣ್ಣು ತಯಾರಿಸುತ್ತಾರೆ.       

Wednesday, 13 February 2013

ಸಕ್ಕರೆ ಹೋಳಿಗೆ (ಒಬ್ಬಟ್ಟು) | Sakkare Holige (Obbattu)

Click here for English version.

ತುಂಬಾ ದಿನಗಳ ನಂತರ ಹೊಸ ರೆಸಿಪಿಯೊಡನೆ ನಾನು ಬ್ಲಾಗಿಂಗ್ ಗೆ ಮರಳುತ್ತಿದ್ದೇನೆ. ಹೊಸ ವರ್ಷದ ಮೊದಲ ಪೋಸ್ಟ್ ನ್ನು ಸಿಹಿಯೊಡನೆ ಪ್ರಾರಂಭ ಮಾಡೋಣ ಅಲ್ಲವೆ? ನಮ್ಮ ಪುಟ್ಟ ಕಂದಮ್ಮನ ಆರೈಕೆಯಲ್ಲಿ ನನಗೆ ಬ್ಲಾಗ್ ಕಡೆ ಗಮನ ಕೊಡಲು ಸಮಯವೇ ಸಿಗುತ್ತಿಲ್ಲ. ಹೀಗಾಗಿ ಅಡಿಗೆ ಮನೆಗೆ ಮರಳುವ ತನಕ ಅಮ್ಮನ ಪಾಕಶಾಲೆಯಿಂದ ಕೆಲವು ಅಡಿಗೆಗಳನ್ನು ನಿಮ್ಮ ಮುಂದಿರಿಸಲು ಪ್ರಯತ್ನಿಸುತ್ತೇನೆ.
ಬಿಡುವಾದಾಗ ಅಮ್ಮನ ಜೊತೆ ಸೇರಿಕೊಂಡು ಅವರು ಸಕ್ಕರೆ ಹೋಳಿಗೆ (ಒಬ್ಬಟ್ಟು) ಮಾಡುವಾಗ ಕೆಲವು ಫೊಟೋಗಳನ್ನು ಕ್ಲಿಕ್ಕಿಸಿಕೊಂಡಿದ್ದೆ. ಅಮ್ಮ ಹೇಳಿಕೊಟ್ಟ ಸಕ್ಕರೆ ಹೋಳಿಗೆಯ ರೆಸಿಪಿ ಇಲ್ಲಿದೆ. ನಾವು ತಯಾರಿಸುವ ಇತರ ಹೋಳಿಗೆಗಳಂತಲ್ಲದೆ ಈ ಹೋಳಿಗೆ ಸ್ವಲ್ಪ ಗರಿಯಾಗಿರುತ್ತದೆ. ಅಲ್ಲದೆ ಈ ಹೋಳಿಗೆ ತಯಾರಿಸಿದ 15 ದಿನಗಳವರೆಗೂ ಕೆಡದೆ ಚೆನ್ನಾಗಿರುತ್ತದೆ!
ಸಕ್ಕರೆ ಹೋಳಿಗೆ ಊಟದೊಡನೆಯೂ ಚೆನ್ನಾಗಿರುತ್ತದೆ, ಅಲ್ಲದೆ ಯಾರಾದರೂ ಅತಿಥಿಗಳು ಬರುವವರಿದ್ದರೆ ಮೊದಲೇ ತಯಾರಿಸಿಟ್ಟುಕೊಂಡು ಟೀ ಅಥವಾ ಕಾಫಿಯೊಡನೆ ಸರ್ವ್ ಮಾಡಬಹುದು.


ತಯಾರಿಸಲು ಬೇಕಾಗುವ ಸಮಯ: 1 1/2 ಘಂಟೆ
ಹಿಟ್ಟನ್ನು ಕಲಸಿಡುವ ಸಮಯ: 1 ಘಂಟೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಈ ಅಳತೆಯಿಂದ 40 ಹೋಳಿಗೆಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:
ಹೂರಣಕ್ಕೆ:
  • ಸೂಜಿ ರವಾ - 2 1/4 ಕಪ್
  • ಸಕ್ಕರೆ - 2 3/4 ಕಪ್
  • ತೆಂಗಿನತುರಿ - 10 ಕಪ್
  • ಉಪ್ಪು - 1 1/2 ಟೀ ಸ್ಪೂನ್
  • ಏಲಕ್ಕಿಪುಡಿ - 1 ಟೀ ಸ್ಪೂನ್
  • ತುಪ್ಪ - 2 ಟೀ ಸ್ಪೂನ್

ಕಣಕಕ್ಕೆ:
  • ಗೋಧಿಹಿಟ್ಟು - 1 ಕಪ್
  • ಮೈದಾಹಿಟ್ಟು - 1 ಕಪ್
  • ಉಪ್ಪು - 1 ಟೀ ಸ್ಪೂನ್
  • ಅರಿಶಿನ - 1 ಟೀ ಸ್ಪೂನ್
  • ನೀರು - 1 ಕಪ್ (ಅಂದಾಜು)
  • ಎಣ್ಣೆ - 1 ಕಪ್ (ಅಂದಾಜು)


ತಯಾರಿಸುವ ವಿಧಾನ:
  • ಮೈದಾಹಿಟ್ಟು, ಗೋಧಿಹಿಟ್ಟು, ಅರಿಶಿನ ಇಷ್ಟನ್ನೂ ಒಂದು ಪಾತ್ರೆಯಲ್ಲಿ ಮಿಕ್ಸ್ ಮಾಡಿಕೊಳ್ಳಿ. 1 ಕಪ್ ನಷ್ಟು ನೀರಿಗೆ 1 ಟೀ ಸ್ಪೂನ್ ಉಪ್ಪು ಸೇರಿಸಿ ಕದಡಿ. ಉಪ್ಪುನೀರಿಗೆ ಹಿಟ್ಟಿನ ಮಿಶ್ರಣವನ್ನು ಸೇರಿಸಿ ಚೆನ್ನಾಗಿ ನಾದಿ. ಇದಕ್ಕೆ ಮುಕ್ಕಾಲು ಭಾಗ ಎಣ್ಣೆ ಸೇರಿಸಿ ಗಂಟಿಲ್ಲದಂತೆ ಚೆನ್ನಾಗಿ ನಾದಿ. ಇದರಮೇಲೆ ಉಳಿದ ಎಣ್ಣೆಯನ್ನು ಸುರುವಿ ಕೈಯಿಂದ ಸ್ವಲ್ಪ ಪ್ರೆಸ್ ಮಾಡಿ. ಕಣಕದ ಮಿಶ್ರಣಕ್ಕೆ ಒಂದು ಪ್ಲೇಟ್ ಮುಚ್ಚಿ ಒಂದು ಘಂಟೆ ನೆನೆಯಲು ಬಿಡಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ತುಪ್ಪವನ್ನು ಬಿಸಿಮಾಡಿಕೊಂಡು ಸೂಜಿ ರವೆಯನ್ನು ಸ್ವಲ್ಪ ಪರಿಮಳ ಬರುವವರೆಗೆ ಹುರಿಯಿರಿ. ಉರಿಯನ್ನು ಆಫ್ ಮಾಡಿದ ತಕ್ಷಣ ಇದಕ್ಕೆ ಸಕ್ಕರೆ, ತೆಂಗಿನತುರಿ, ಏಲಕ್ಕಿಪುಡಿ ಮತ್ತು ಉಪ್ಪನ್ನು ಸೇರಿಸಿ ಮಿಕ್ಸ್ ಮಾಡಿ.
  • ರವಾ - ತೆಂಗಿನತುರಿ ಮಿಶ್ರಣವನ್ನು ನೀರು ಸೇರಿಸದೆ ಗಟ್ಟಿಯಾಗಿ ರುಬ್ಬಿ. ಕಡಿಮೆ ಪ್ರಮಾಣದಲ್ಲಿ ಮಾಡುವುದಾದರೆ ಮಿಕ್ಸಿಯ ಚಿಕ್ಕ ಜಾರ್ ನಲ್ಲಿ ರುಬ್ಬಿ. ಮಿಶ್ರಣ ಜಾಸ್ತಿ ಇದ್ದರೆ ಗ್ರೈಂಡರ್ ಬಳಸಬಹುದು. ಒರಳಿನಲ್ಲಿ ರುಬ್ಬಿ ಅಭ್ಯಾಸವಿದ್ದರೆ ಅದರಲ್ಲಿ ರುಬ್ಬುವುದು ಎಲ್ಲಕ್ಕಿಂತ ಉತ್ತಮ. ಮಿಶ್ರಣ ಸ್ವಲ್ಪ ಅಂಟಾಗುವುದರಿಂದ ಮಿಕ್ಸಿ ಅಥವಾ ಗ್ರೈಂಡರ್ ನಲ್ಲಿ ರುಬ್ಬುವುದು ಸ್ವಲ್ಪ ಕಷ್ಟ. ಮಿಶ್ರಣವನ್ನು ತುಂಬ ನುಣ್ಣಗೆ ರುಬ್ಬಬೇಡಿ; ಸೂಜಿ ರವೆಯ ಹದಕ್ಕೆ ರುಬ್ಬಿದರೆ ಚೆನ್ನಾಗಿರುತ್ತದೆ.
  • ರುಬ್ಬಿದ ಮಿಶ್ರಣದಿಂದ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿ. ಕಣಕದಲ್ಲೂ ಅಷ್ಟೇ ಸಂಖ್ಯೆಯ, ಸ್ವಲ್ಪ ಚಿಕ್ಕದಾದ ಉಂಡೆಗಳನ್ನು ಮಾಡಿಕೊಳ್ಳಿ. ಕೈಗಳಿಗೆ ಚೆನ್ನಾಗಿ ಎಣ್ಣೆ ಸವರಿಕೊಂಡು ಕಣಕದೊಳಗೆ ಹೂರಣವನ್ನಿರಿಸಿ, ಹೂರಣ ಹೊರಬರದಂತೆ ಕವರ್ ಮಾಡಿ. 
  • ಎಣ್ಣೆ ಸವರಿದ ಪ್ಲಾಸ್ಟಿಕ್ ಹಾಳೆ ಅಥವಾ ಬಾಳೆ ಎಲೆಯಮೇಲೆ ಉಂಡೆಯನ್ನು ವೃತ್ತಾಕಾರಕ್ಕೆ ಲಟ್ಟಿಸಿ. ಲಟ್ಟಿಸಿದ ಹೋಳಿಗೆಯನ್ನು ಕಾದ ಕಾವಲಿಯಮೇಲೆ ಎರಡೂ ಕಡೆ ಚೆನ್ನಾಗಿ ಬೇಯಿಸಿ ತೆಗೆಯಿರಿ. 
  • ರುಚಿಕರವಾದ ಸಕ್ಕರೆ ಹೋಳಿಗೆಯನ್ನು ತುಪ್ಪದೊಡನೆ ಸವಿಯಿರಿ. ಈ ಹೋಳಿಗೆ ತುಪ್ಪವಿಲ್ಲದೆ ಹಾಗೇ ತಿನ್ನಲೂ ಚೆನ್ನಾಗಿರುತ್ತದೆ. 
 

ಟಿಪ್ಸ್:
  • ಈ ಹೋಳಿಗೆಗೆ ತುಂಬಾ ಸಕ್ಕರೆ ಹಾಕಿ ಮಾಡಿದರೆ ಮಿಶ್ರಣ ತುಂಬಾ ಅಂಟಾಗಿ ಹೋಳಿಗೆ ಮಾಡುವುದು ಕಷ್ಟವಾಗುತ್ತದೆ. ಹೀಗಾಗಿ ಮೇಲೆ ಹೇಳಿದ ಅಳತೆಯಷ್ಟೇ ಸಕ್ಕರೆ ಹಾಕಿ. 
Related Posts Plugin for WordPress, Blogger...