Here are some recipes which I came across through the net, books, so on and few are my own experiments..

Saturday, 28 May 2011

ಅಲಸಂದೆ ಕಾಳಿನ ಪಲ್ಯ / Black-eyed peas palya

Click here for English version.

ಯಾವುದೇ ಬಗೆಯ ರೊಟ್ಟಿಯೊಡನೆ ಈ ಪಲ್ಯ ಚೆನ್ನಾಗಿರುತ್ತದೆ. ಜೊತೆಗೆ ಕಾಳಿನ ಪಲ್ಯ ಆರೋಗ್ಯಕ್ಕೂ ಬಹಳ ಒಳ್ಳೆಯದು.


ಬೇಕಾಗುವ ಸಾಮಗ್ರಿಗಳು:
ಅಲಸಂದೆ ಕಾಳು - 2 ಕಪ್ (ನಾಲ್ಕೈದು ಘಂಟೆ ನೀರಿನಲ್ಲಿ ನೆನೆಸಿಕೊಂಡಿರಿ)
ಉದ್ದಿನಬೇಳೆ - 1 ಚಮಚ 
ಸಾಸಿವೆ - 1 / 4 ಚಮಚ 
ಇಂಗು - ಚಿಟಿಕೆ
ಹೆಚ್ಚಿದ ಹಸಿಮೆಣಸು - 2 
ಕರಿಬೇವಿನ ಎಲೆಗಳು - 10 ರಿಂದ 12 
ಈರುಳ್ಳಿ ಹೆಚ್ಚಿದ್ದು - 1
ಸಾರಿನ ಪುಡಿ - ಒಂದೂವರೆ ಚಮಚ (ಖಾರಕ್ಕೆ ತಕ್ಕಂತೆ)
ರುಚಿಗೆ ತಕ್ಕಷ್ಟು ಉಪ್ಪು 
ಆಮ್ ಚೂರ್ ಪುಡಿ ಅಥವಾ ಹುಳಿಪುಡಿ -  1 / 2 ಚಮಚ 
ಸಕ್ಕರೆ - 1 ಚಮಚದಷ್ಟು 
ಎಣ್ಣೆ - 3 ಚಮಚ (ಒಗ್ಗರಣೆಗೆ)

ಮಾಡುವ ವಿಧಾನ:
ಒಂದು ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು ಅದಕ್ಕೆ ಉದ್ದಿನಬೇಳೆ, ಸಾಸಿವೆ, ಇಂಗು ಹಾಕಿ ಚಟಗುಟ್ಟಿದ ನಂತರ ಕರಿಬೇವು, ಹೆಚ್ಚಿದ ಹಸಿಮೆಣಸನ್ನು ಸೇರಿಸಿ ಸ್ವಲ್ಪ ಹುರಿಯಿರಿ.
ನಂತರ ಇದಕ್ಕೆ ನೀರಿನಲ್ಲಿ ನೆನೆಸಿದ ಅಲಸಂದೆ ಕಾಳು, ರುಚಿಗೆ ತಕ್ಕಷ್ಟು ಉಪ್ಪು, ಸಾರಿನ ಪುಡಿ, ಆಮ್ ಚೂರ್ ಪುಡಿ, ಸಕ್ಕರೆ ಸೇರಿಸಿ, ಪಲ್ಯದ ಮಿಶ್ರಣ ಮುಳುಗುವಷ್ಟು ನೀರು ಸೇರಿಸಿ, ಒಂದು ಪ್ಲೇಟ್ ಮುಚ್ಚಿ ಹದವಾದ ಉರಿಯಲ್ಲಿ ಬೇಯಿಸಿ.
ಆಗಾಗ ಕೈಯಾಡಿಸುತ್ತಿದ್ದು, ನೀರು ಕಡಿಮೆಯಾದರೆ ಸೇರಿಸಿ. ಮಿಶ್ರಣ ಮುಕ್ಕಾಲು ಭಾಗ ಬೆಂದಾಗ ಹೆಚ್ಚಿದ ಈರುಳ್ಳಿ ಸೇರಿಸಿ.
ನೀರಿನಂಶವೆಲ್ಲ ಇಂಗಿ, ಕಾಳುಗಳು ಮೆತ್ತಗೆ ಬೆಂದಂತಾದಾಗ ಪಲ್ಯದ ಮಿಶ್ರಣವನ್ನು ಕೆಳಗಿಳಿಸಿ. ಬೇಕಿದ್ದರೆ ಕೊನೆಯಲ್ಲಿ ಸ್ವಲ್ಪ ತೆಂಗಿನತುರಿ ಸೇರಿಸಿ.
ದೋಸೆ, ರೊಟ್ಟಿ ಅಥವಾ ಚಪಾತಿಯೊಡನೆ ಇದು ಚೆನ್ನಾಗಿರುತ್ತದೆ.

Friday, 27 May 2011

ಅಡೈ ದೋಸೆ / Adai Dosa

Click here for English version.

ಈಗೀಗ ನಾನು ಅಡಿಗೆಯ ವಿಷಯದಲ್ಲಿ 'ಇಂಟರ್ನೆಟ್ ಅಡಿಕ್ಟ್' ಆಗಿಬಿಟ್ಟಿದ್ದೇನೆನೆನಿಸುತ್ತಿದೆ .ಬೆಂಗಳೂರಿನಲ್ಲಿದ್ದಾಗ ಇಂಟರ್ನೆಟ್ ನೋಡಿ ಅಡಿಗೆಗಳನ್ನು ಮಾಡುತ್ತಿದ್ದುದು ಬಹಳವೇ ಕಡಿಮೆಯಾಗಿತ್ತು. ಏನಾದರೂ ಅಡಿಗೆ ಗೊತ್ತಾಗಿಲ್ಲವೆಂದರೆ ಅಕ್ಕನನ್ನೋ, ಅಮ್ಮನನ್ನೋ ಇಲ್ಲ ಅತ್ತೆಯನ್ನೋ ಕೇಳಿದ್ದರೆ ಆಗಿಬಿಡುತ್ತಿತ್ತು. ಅಲ್ಲದೆ ಅವರುಗಳು ಕಳಿಸುವ ತಿಂಡಿಯ ಸ್ಟಾಕ್ ಯಾವಾಗಲೂ ಮನೆಯಲ್ಲಿ ಇದ್ದೇ ಇರುತ್ತಿತ್ತು. ಅವರಿಂದ ದೂರವಾಗಿ ದೂರ ದೇಶದಲ್ಲಿರುವುದರಿಂದ ನನ್ನ ಗಮನ ಅಡಿಗೆಯೆಡೆಗೆ ಸ್ವಲ್ಪ ಸ್ವಲ್ಪವಾಗಿ ಹೆಚ್ಚಾಗುತ್ತಿದೆ.
ಈಗ ಚಳಿಗಾಲದ ಸಮಯವಾದ್ದರಿಂದ ದೋಸೆ ಹಿಟ್ಟನ್ನು ರುಬ್ಬಿ ಬೆಚ್ಚಗಿನ ಜಾಗದಲ್ಲಿಟ್ಟರೂ ಚೆನ್ನಾಗಿ ಫರ್ಮೆಂಟ್ ಆಗುವುದೇ ಇಲ್ಲ. ಹೀಗಾಗಿ ಹಿಟ್ಟನ್ನು ರುಬ್ಬಿದ ತಕ್ಷಣ ಮಾಡಬಹುದಾದ ದೋಸೆಗಳಿಗಾಗಿ ನನ್ನ ಹುಡುಕಾಟ ನಡೆಯುತ್ತಲೇ ಇತ್ತು. ರಶ್ಮಿಯವರ ಬ್ಲಾಗ್ ನೋಡಿ ತಯಾರಿಸಿದ ಅಡೈ ದೋಸೆ ನಮಗೆ ಬಹಳವೇ ಇಷ್ಟವಾಯಿತು. ಶಿರಸಿಯ ಕಡೆ ದೀಪಾವಳಿ ಹಬ್ಬದ ದಿನ ಬಾಳೆಕಾಯಿ, ತೊಂಡೆಕಾಯಿ, ಮೊಗೆಕಾಯಿ, ಅರಿಶಿನ ಕೊಂಬು ಇತ್ಯಾದಿಗಳನ್ನು ರುಬ್ಬಿ ಹಾಕಿ ತಯಾರಿಸುವ ದೋಸೆಯ ರುಚಿಯನ್ನು ಇದು ನೆನಪಿಸಿತು. ಈ ಅಡೈ ದೋಸೆ ಮಾಡುವ ವಿಧಾನ ಇಂತಿದೆ..


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಸಾಮಗ್ರಿಗಳನ್ನು ನೆನೆಸುವ ಸಮಯ: 4 - 5 ಘಂಟೆ
  
ಬೇಕಾಗುವ ಸಾಮಗ್ರಿಗಳು:
ಹೆಸರುಬೇಳೆ - 1 ಕಪ್
ತೊಗರಿಬೇಳೆ - 3 / 4 ಕಪ್
ಕಡಲೆಬೇಳೆ - 3 / 4 ಕಪ್
ಉದ್ದಿನಬೇಳೆ - 1 / 2 ಕಪ್
ಅಕ್ಕಿ - 1 ಕಪ್ 
ಮೆಂತ್ಯ - 1 ಟೇಬಲ್ ಸ್ಪೂನ್ 
ಇಂಗು - 1 / 4 ಟೀ ಸ್ಪೂನ್
ಕರಿಬೇವು - 1 / 4 ಕಪ್
ಶುಂಠಿ - 1 ಇಂಚು 
ಕೊತ್ತಂಬರಿ ಸೊಪ್ಪು - 1 / 2 ಕಪ್
ಹಸಿಮೆಣಸು - 3
ಉಪ್ಪು - ರುಚಿಗೆ ತಕ್ಕಷ್ಟು 
ಎಣ್ಣೆ - ಸ್ವಲ್ಪ
 
ಮಾಡುವ ವಿಧಾನ:
ಎಲ್ಲ ಬೇಳೆಗಳು, ಮೆಂತ್ಯ ಮತ್ತು ಅಕ್ಕಿಯನ್ನು ನಾಲ್ಕೈದು ಘಂಟೆಕಾಲ ಇಲ್ಲವೇ ರಾತ್ರಿಯಿಡೀ ನೀರಿನಲ್ಲಿ ನೆನೆಸಿಡಿ.
ನಂತರ ನೆನೆಸಿಟ್ಟ ಎಲ್ಲ ಸಾಮಗ್ರಿಗಳನ್ನು ಇಂಗು, ಕರಿಬೇವು, ಶುಂಠಿ, ಕೊತ್ತಂಬರಿ ಸೊಪ್ಪು ಮತ್ತು ಹಸಿಮೆಣಸಿನೊಂದಿಗೆ ಸೇರಿಸಿ, ಮಿಕ್ಸಿಯಲ್ಲಿ ದೋಸೆ ಹಿಟ್ಟಿಗಿಂತ ಸ್ವಲ್ಪ ದಪ್ಪಗೆ ರುಬ್ಬಿಕೊಳ್ಳಿ.
ಹಿಟ್ಟಿಗೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿಕೊಂಡು, ಕಾದ ದೋಸೆ ಕಾವಲಿಯ ಮೇಲೆ ಸೌಟಿನಿಂದ ಬೇಕಾದಷ್ಟು ಹಿಟ್ಟನ್ನು ಹಾಕಿಕೊಂಡು ಮಸಾಲೆ ದೋಸೆಯಂತೆಯೇ ದೊಡ್ಡದಾಗಿ ದೋಸೆಗಳನ್ನು ಹಾಕಿ, ಎಣ್ಣೆ ಹಾಕಿ ದೋಸೆಯ ಎರಡೂ ಕಡೆಗಳನ್ನು ಬೇಯಿಸಿ ತೆಗೆಯಿರಿ.
ಬಿಸಿ ಇರುವಾಗಲೇ ಚಟ್ನಿಯೊಡನೆ ತಿನ್ನಿ.

Monday, 23 May 2011

ಕಿತ್ತಳೆ ಸಿಪ್ಪೆಯ ಗೊಜ್ಜು / Orange Peel Gojju

Click here for English version.

ಇದು ನಾನು ಅಮ್ಮನಿಂದ ಕಲಿತ ಮಲೆನಾಡಿನ ಒಂದು ಸಾಂಪ್ರದಾಯಿಕ ಅಡುಗೆ. ಕಿತ್ತಳೆ ಸಿಪ್ಪೆಯನ್ನು ಫೇಸ್ ಪ್ಯಾಕ್ ಗೆ ಬಳಸುವುದು ನಮಗೆಲ್ಲ ಗೊತ್ತೇ ಇದೆ. ಆದರೆ ಇದರಿಂದ ಗೊಜ್ಜನ್ನೂ ಮಾಡಬಹುದೆಂದರೆ ವಿಚಿತ್ರವೆನ್ನಿಸುವುದಲ್ಲವೇ? ಕಿತ್ತಳೆ ಸಿಪ್ಪೆಯ ನಾನಾ ಉಪಯೋಗಗಳಲ್ಲಿ ಈ ಗೊಜ್ಜೂ ಒಂದು. ಕಿತ್ತಳೆ ಹಣ್ಣಿನ ಪರಿಮಳದೊಂದಿಗೆ ಸಿಹಿ, ಹುಳಿ, ಖಾರಮಿಶ್ರಿತವಾದ ಈ ಗೊಜ್ಜು ಅನ್ನದೊಡನೆ ಕಲಸಿಕೊಳ್ಳಲು, ಇಲ್ಲವೇ ಹಾಗೇ ನೆಂಜಿಕೊಳ್ಳಲೂ ಚೆನ್ನಾಗಿರುತ್ತದೆ. 
 

ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು
ಸರ್ವಿಂಗ್ಸ್: 4 - 5 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು: 
ಕಿತ್ತಳೆ ಸಿಪ್ಪೆ - 1 ಮಧ್ಯಮ ಗಾತ್ರದ ಕಿತ್ತಳೆ ಹಣ್ಣಿನ ಸಿಪ್ಪೆಯ ಕಾಲು ಭಾಗದಷ್ಟು  
ತೆಂಗಿನತುರಿ - ಮುಕ್ಕಾಲು ಕಪ್ 
ಒಣಮೆಣಸು - 3 
ಉದ್ದಿನ ಬೇಳೆ - 1 ಚಮಚ 
ಸಾಸಿವೆ - 1 / 4 ಚಮಚ
ಎಳ್ಳು - 1 ಚಮಚ 
ಚಿಟಿಕೆ ಇಂಗು
ಎಣ್ಣೆ - 2 ಚಮಚ 
ಹುಣಸೆ ಹಣ್ಣು - ದೊಡ್ಡ ಗೋಲಿಗಾತ್ರದಷ್ಟು
ಬೆಲ್ಲ - 3 ಟೇಬಲ್ ಚಮಚ ಅಥವಾ ಜಾಸ್ತಿ
ನೀರು 

ಮಾಡುವ ವಿಧಾನ:
ಕಿತ್ತಳೆ ಸಿಪ್ಪೆಯನ್ನು 1 ಲೋಟದಷ್ಟು ಬಿಸಿನೀರಿನಲ್ಲಿ 5 ನಿಮಿಷ ಬೇಯಿಸಿಕೊಂಡು, ನೀರಿನಂಶವನ್ನು ಹಿಂಡಿ ತೆಗೆಯಿರಿ.
ಎಣ್ಣೆ ಕಾಯಿಸಿ ಅದಕ್ಕೆ ಒಣಮೆಣಸು, ಉದ್ದಿನಬೇಳೆ, ಸಾಸಿವೆ, ಎಳ್ಳು, ಇಂಗು ಹಾಕಿ ಒಗ್ಗರಣೆ ಮಾಡಿಕೊಳ್ಳಿ. ಇದರೊಡನೆ ಬೇಯಿಸಿದ ಕಿತ್ತಳೆ ಸಿಪ್ಪೆ, ತೆಂಗಿನತುರಿ, ಹುಣಸೆಹಣ್ಣು ಸೇರಿಸಿ, ಮಿಕ್ಸಿಯಲ್ಲಿ ಚಟ್ನಿಯ ಹದಕ್ಕೆ ರುಬ್ಬಿಕೊಳ್ಳಿ.
ನಂತರ ರುಬ್ಬಿಕೊಂಡ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸ್ವಲ್ಪ ಸಿಹಿಯಾಗುವಷ್ಟು ಬೆಲ್ಲ ಸೇರಿಸಿ ಐದು ನಿಮಿಷ ಚೆನ್ನಾಗಿ ಕುದಿಸಿ ಇಳಿಸಿ.
ಈ ಗೊಜ್ಜು ಹಾಗೆಯೇ ಇಟ್ಟರೂ 2 ದಿನ ಕೆಡದೆ ಚೆನ್ನಾಗಿರುತ್ತದೆ. ಫ್ರಿಜ್ ನಲ್ಲಿಟ್ಟುಕೊಂಡರೆ ಒಂದು ವಾರದವರೆಗೂ ಉಪಯೋಗಿಸಬಹುದು.


Wednesday, 18 May 2011

ಚಕ್ಕುಲಿ ಮುರುಕು / Chakkuli Muruku

Click here for English version.

ಚಕ್ಕುಲಿ ಎಂದೊಡನೆ ನೆನಪಾಗುವುದು ಗಣೇಶ ಚತುರ್ಥಿ. ಮೊದಲೆಲ್ಲ ಚಿಕ್ಕವರಿದ್ದಾಗ ಗಣೇಶ ಚತುರ್ಥಿಯ ಸಮಯದಲ್ಲಿ ಮನೆಯಲ್ಲಿ ದೊಡ್ಡ ದೊಡ್ಡ ಡಬ್ಬಗಳಲ್ಲಿ ತುಂಬಿಸಿಟ್ಟ ಚಕ್ಕುಲಿಯನ್ನು ತಿಂಗಳಾನುಗಟ್ಟಲೆ ತಿನ್ನುತ್ತಿದ್ದುದು ನೆನಪಾಗುತ್ತದೆ. 
ನೋಡಿದೊಡನೆಯೇ ಬಾಯಲ್ಲಿ ನೀರೂರಿಸುವ ಈ ಚಕ್ಕುಲಿ ಮುರುಕು ಅಥವಾ ಬೆಣ್ಣೆ ಮುರುಕು ತಮಿಳುನಾಡಿನಲ್ಲಿ ಬಹಳ ಜನಪ್ರಿಯವಾದ ತಿನಿಸು. ಬಾಯಲ್ಲಿಟ್ಟರೆ ಕರಗಿಯೇ ಹೋಗುವುದೇನೋ ಎನ್ನುವಷ್ಟು ಗರಿಗರಿ. ಚಕ್ಕುಲಿ ಮುರುಕನ್ನು ತಯಾರಿಸುವಾಗ ಡಬ್ಬದ ತುಂಬ ತಯಾರಿಸಿದಂತೆ ಅನ್ನಿಸಿದರೂ ನೋಡ-ನೋಡುತ್ತಿದ್ದಂತೆಯೇ ಖರ್ಚಾಗಿಬಿಡುತ್ತದೆ! 


ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ

ಬೇಕಾಗುವ ಸಾಮಗ್ರಿಗಳು:
ಅಕ್ಕಿಹಿಟ್ಟು - 1 ಲೋಟ
ಮೈದಾಹಿಟ್ಟು - 1 ಲೋಟ
ಕಡಲೆಹಿಟ್ಟು - 1 ಲೋಟ
ಪುಟಾಣಿ ಹಿಟ್ಟು - 1 ಲೋಟ
ಕೆಂಪು ಮೆಣಸಿನ ಪುಡಿ - ಒಂದೂವರೆ ಟೀ ಚಮಚದಷ್ಟು (ಖಾರಕ್ಕೆ ತಕ್ಕಂತೆ)
ಜೀರಿಗೆ - 1 ಟೀ ಚಮಚ (ಓಮ ಸೇರಿಸಿದರೂ ಚೆನ್ನಾಗಿರುತ್ತದೆ)
ಬಿಳಿ ಎಳ್ಳು - 1 ಟೀ ಚಮಚ 
ಉಪ್ಪು - ರುಚಿಗೆ ತಕ್ಕಷ್ಟು
ಅಡುಗೆ ಸೋಡಾ - 1 ಚಿಟಿಕೆ
ಬೆಣ್ಣೆ - 1 ನಿಂಬೆಗಾತ್ರದಷ್ಟು
ನೀರು - ಸ್ವಲ್ಪ (ಹಿಟ್ಟನ್ನು ಕಲಸಲು)
ಕರಿಯಲು ಎಣ್ಣೆ
 
ಮಾಡುವ ವಿಧಾನ:
ಎಲ್ಲ ಬಗೆಯ ಹಿಟ್ಟುಗಳು, ಮೆಣಸಿನ ಪುಡಿ, ಉಪ್ಪು, ಎಳ್ಳು, ಜೀರಿಗೆ, ಸೋಡಾ - ಇಷ್ಟನ್ನೂ ಒಂದು ಪಾತ್ರೆಯಲ್ಲಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ.
ನಂತರ ಬೆಣ್ಣೆಯನ್ನು ಚೆನ್ನಾಗಿ ಕಾಯಿಸಿಕೊಂಡು ಹಿಟ್ಟಿನ ಮಿಶ್ರಣದ ಮೇಲೆ ಸುರಿಯಿರಿ.
ಹಿಟ್ಟನ್ನು ಒಮ್ಮೆ ಕಲಸಿಕೊಂಡು, ನಂತರ ಸ್ವಲ್ಪ ಸ್ವಲ್ಪವಾಗಿ ನೀರನ್ನು ಸೇರಿಸಿಕೊಳ್ಳುತ್ತ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ.
ಕಲಸಿದ ಹಿಟ್ಟನ್ನು ಚಕ್ಕುಲಿ ಒರಳಿನಲ್ಲಿ ಹಾಕಿಕೊಂಡು ಕಾದ ಎಣ್ಣೆಯಲ್ಲಿ ಹಿಟ್ಟನ್ನು ಚಕ್ಕುಲಿ ಒರಳಿನಿಂದ ಒತ್ತುತ್ತಾ ಹೋಗಿ.
ಉರಿ ತುಂಬಾ ಜೋರಾಗಿದ್ದರೆ ಮುರುಕು ಚೆನ್ನಾಗಿ ಬೇಯುವುದಿಲ್ಲ. ಮಧ್ಯಮ ಉರಿಯಲ್ಲಿ ಕೆಂಪಗೆ ಕರಿದು ಒಂದು ಟಿಶ್ಯೂ ಪೇಪರ್ ಮೇಲೆ ಹರವಿ, ತಣ್ಣಗಾದ ನಂತರ ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ.


ಟಿಪ್ಸ್: 

  • ಹಿಟ್ಟಿಗೆ ಬೆಣ್ಣೆ ಸೇರಿಸುವಾಗ ತುಂಬ ಜಾಸ್ತಿ ಬೆಣ್ಣೆ ಸೇರಿಸಲು ಹೋಗಬೇಡಿ. ಬೆಣ್ಣೆಯ ಪ್ರಮಾಣ ಹೆಚ್ಚಾದರೆ ಚಕ್ಕುಲಿ ಮುರುಕು ಪುಡಿಪುಡಿಯಾಗಿಬಿಡುತ್ತದೆ.
ನನ್ನ ಈ ಚಕ್ಕುಲಿ ತಯಾರಿಕಾ ವಿಧಾನವನ್ನು ಮೇ 31 2011 ರ ದಟ್ಸ್ ಕನ್ನಡ ನ್ಯೂಸ್ ಪೇಪರ್ ನಲ್ಲಿ ಪ್ರಕಟಿಸಲಾಗಿದೆ. ಥ್ಯಾಂಕ್ಸ್ ಟು ದಟ್ಸ್ ಕನ್ನಡ! :)

Monday, 16 May 2011

ಸ್ವೀಟ್ ಕಾರ್ನ್ ಚಿತ್ರಾನ್ನ / Lemon Rice with Sweetcorn

Click here for English version.

ಯಾವಾಗಲೂ ಮನೆಯಲ್ಲಿ ಮಾಡುವ ಚಿತ್ರಾನ್ನಕ್ಕಿಂತ ಇದು ಸ್ವಲ್ಪ ಡಿಫರೆಂಟ್. ಸ್ವೀಟ್ ಕಾರ್ನ್ ಹಾಕಿರುವುದರಿಂದ ಕಲರ್ ಫುಲ್ ಆಗಿ ಕಾಣುವ ಈ ಚಿತ್ರಾನ್ನ ಮಕ್ಕಳಿಗಂತೂ ತುಂಬಾ ಇಷ್ಟವಾಗುತ್ತದೆ. ನಾವು ಒಮ್ಮೆ ನನ್ನ ಅತ್ತಿಗೆ ವಿನುತಾರ ಮನೆಗೆ ಹೋಗಿದ್ದಾಗ ಅವರು ಇಂಥ ಚಿತ್ರಾನ್ನವನ್ನು ಮಾಡಿದ್ದರು. ಅವರಿಂದ ಕಲಿತ ಈ ಚಿತ್ರಾನ್ನವನ್ನು ನಾನು ಸಾಮಾನ್ಯವಾಗಿ ನಮ್ಮವರ ಮದ್ಯಾಹ್ನದ ಲಂಚ್ ಬಾಕ್ಸ್ ಗೆ ಕಳಿಸಲು ತಯಾರಿಸುತ್ತಿರುತ್ತೇನೆ.


ತಯಾರಿಸಲು ಬೇಕಾಗುವ ಸಮಯ: 40 - 45 ನಿಮಿಷಗಳು 
ಸರ್ವಿಂಗ್ಸ್: 2 
 

ಬೇಕಾಗುವ ಸಾಮಗ್ರಿಗಳು: 
ಅಕ್ಕಿ - ಒಂದೂವರೆ ಕಪ್
ಸ್ವೀಟ್ ಕಾರ್ನ್ - ಮುಕ್ಕಾಲು ಕಪ್
ಲಿಂಬೆ ಹಣ್ಣು - 1 
ಉಪ್ಪು - ರುಚಿಗೆ ತಕ್ಕಷ್ಟು
ಸಕ್ಕರೆ - 1 / 4 ಚಮಚ
ಒಗ್ಗರಣೆಗೆ: ಎಣ್ಣೆ - 3 ಚಮಚ, ಉದ್ದಿನ ಬೇಳೆ - 1 ಚಮಚ, ಸಾಸಿವೆ - 1 / 2 ಚಮಚ, ಚಿಟಿಕೆ ಇಂಗು, ಅರಿಶಿನ - 1 / 4 ಚಮಚ, ಹಸಿಮೆಣಸು (ಹೆಚ್ಚಿದ್ದು) - 3 , ಕರಿಬೇವು - ಸ್ವಲ್ಪ 

ಮಾಡುವ ವಿಧಾನ:
ಅಕ್ಕಿಯನ್ನು ಚೆನ್ನಾಗಿ ತೊಳೆದು, ಉದುರಾಗಿ ಅನ್ನ ಮಾಡಿಕೊಳ್ಳಿ. 
ಅನ್ನವನ್ನು ಒಂದು ಪ್ಲೇಟ್ ನಲ್ಲಿ ಹರವಿ, ತಣ್ಣಗಾಗಲು ಬಿಡಿ. 
ಒಂದು ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಉದ್ದಿನ ಬೇಳೆ, ಸಾಸಿವೆ, ಇಂಗು ಹಾಕಿ ಸಾಸಿವೆ ಚಟಗುಟ್ಟಿದ ನಂತರ ಅರಿಶಿನ, ಹಸಿಮೆಣಸು, ಕರಿಬೇವು ಹಾಕಿ ಕೈಯಾಡಿಸಿ. 
ಇದಕ್ಕೆ ಸ್ವೀಟ್ ಕಾರ್ನ್ ಸೇರಿಸಿ 2 - 3 ನಿಮಿಷ ಬೇಯಲು ಬಿಡಿ. 
ನಂತರ ಅನ್ನ ಸೇರಿಸಿ ಸ್ವಲ್ಪ ಕೈಯಾಡಿಸಿ, ಅದಕ್ಕೆ ಉಪ್ಪು, ಸಕ್ಕರೆ ಮತ್ತು ನಿಂಬೆರಸವನ್ನು ಸೇರಿಸಿ ಚೆನ್ನಾಗಿ ಕಲಸಿ. 
ರುಚಿ ನೋಡಿಕೊಂಡು ಉಪ್ಪು ಅಥವಾ ನಿಂಬೆರಸ ಜಾಸ್ತಿ ಬೇಕಿದ್ದರೆ ಸೇರಿಸಿಕೊಳ್ಳಿ.  

Set Dosa / ಸೆಟ್ ದೋಸೆ

Click here for English version.

ನಾನು ಬಹಳ ಇಷ್ಟಪಡುವ ದೋಸೆ ಇದು. ಮನೆಗೆ ಯಾರಾದರೂ ನೆಂಟರು ಬರುತ್ತಾರೆಂದರೆ ಬೆಳಗಿನ ತಿಂಡಿಗೆ ಏನು ಮಾಡಲಿ? ಎನ್ನುವುದೇ ದೊಡ್ಡ ಯೋಚನೆಯಾಗಿರುತ್ತದೆ(!) ಅದಕ್ಕೇ, ಹೆಚ್ಚಿನ ಸಂದರ್ಭಗಳಲ್ಲಿ ನಾನು ಆಯ್ಕೆ ಮಾಡಿಕೊಳ್ಳುವುದು ಈ ಸೆಟ್ ದೋಸೆಯನ್ನೇ.. ಏಕೆಂದರೆ ದೋಸೆ ಹೇಗೂ ಚೆನ್ನಾಗಿ ಬಂದೇ ಬರುತ್ತದೆ, ಕೆಟ್ಟು ಹೋಗಬಹುದೆನ್ನುವ ಭಯವಿಲ್ಲ. ಒಟ್ಟಿನಲ್ಲಿ ಹೇಳುವುದಾದರೆ ರಿಸ್ಕ್ ಬಹಳ ಕಡಿಮೆ!
ಈ ದೋಸೆಗೆ ಮುಖ್ಯವಾಗಿ ಹಿಟ್ಟು ಫರ್ಮೆಂಟ್ ಆಗಲು ಸ್ವಲ್ಪ ಬೆಚ್ಚಗಿನ ವಾತಾವರಣ ಬೇಕು. ಚಳಿಗಾಲದಲ್ಲಿ ಹಿಟ್ಟು ಹುದುಗು ಬರುವುದು ಸ್ವಲ್ಪ ಕಷ್ಟವೇ.. ನಾನು ಅದಕ್ಕೆ ಕಂಡುಕೊಂಡ ಪರಿಹಾರವೇನೆಂದರೆ, ಹಿಟ್ಟನ್ನು ಹಾಕಿಟ್ಟ ಪಾತ್ರೆಗೆ ಅದಕ್ಕಿಂತ ದೊಡ್ಡದಾದ ಇನ್ನೊಂದು ಪಾತ್ರೆಯನ್ನು ಬೋರಲು ಹಾಕಿಟ್ಟುಬಿಡುವುದು.
ಇನ್ನೊಂದು ಟಿಪ್ಸ್ ಏನೆಂದರೆ, ದೋಸೆಗೆ ಅಕ್ಕಿ ಇತ್ಯಾದಿಗಳನ್ನು ಐದಾರು ಘಂಟೆ ನೆನೆಹಾಕಲು ಸಮಯವಿಲ್ಲದಿದ್ದರೆ, ಅವನ್ನು ಬಿಸಿನೀರಿನಲ್ಲಿ ಸುಮಾರು 3 ಘಂಟೆಕಾಲ ನೆನೆಸಿದರೂ ಆಗುತ್ತದೆ.


ದೋಸೆ ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು
ಹಿಟ್ಟು ಹುದುಗುಬರಲು ಬೇಕಾಗುವ ಸಮಯ: 7 - 8 ಘಂಟೆ
ಅಕ್ಕಿ ನೆನೆಸಲು ಬೇಕಾಗುವ ಸಮಯ: 5 - 6 ಘಂಟೆ
ಸರ್ವಿಂಗ್ಸ್: 3 - 4 ಜನರಿಗೆ ಆಗುತ್ತದೆ
  
ಸೆಟ್ ದೋಸೆಗೆ ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - 3 ಲೋಟ 
ಉದ್ದಿನಬೇಳೆ - 1 ಲೋಟ 
ಮೆಂತ್ಯ - 1 ಟೀ ಚಮಚ 
ಪೇಪರ್ ಅವಲಕ್ಕಿ ಅಥವಾ ಅನ್ನ - ಕಾಲು ಲೋಟಕ್ಕಿಂತ ಸ್ವಲ್ಪ ಕಡಿಮೆ 
ಉಪ್ಪು - ರುಚಿಗೆ ತಕ್ಕಷ್ಟು 
ಸಕ್ಕರೆ - 1 ಟೀ ಚಮಚ
ಎಣ್ಣೆ 

ಮಾಡುವ ವಿಧಾನ:
ಅಕ್ಕಿ, ಮೆಂತ್ಯ ಮತ್ತು ಉದ್ದಿನಬೇಳೆಯನ್ನು 5 - 6 ಘಂಟೆಕಾಲ ನೀರಿನಲ್ಲಿ ನೆನೆಸಿಕೊಳ್ಳಿ.
ನಂತರ ಇದನ್ನು ಅವಲಕ್ಕಿ ಅಥವಾ ಅನ್ನದೊಂದಿಗೆ ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ನುಣ್ಣಗೆ ರುಬ್ಬಿಕೊಳ್ಳಿ.
ಹಿಟ್ಟನ್ನು 7 - 8 ಘಂಟೆಕಾಲ ಬೆಚ್ಚಗಿನ ಜಾಗದಲ್ಲಿ ಹುದುಗುಬರಲು ಬಿಡಿ.
ನಂತರ ಹಿಟ್ಟಿಗೆ ಸಕ್ಕರೆ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ ಕಲಸಿಕೊಂಡು ಕಾದ ಕಾವಲಿಯಮೇಲೆ ಸ್ವಲ್ಪ ದಪ್ಪಗೆ ದೋಸೆ ಹಾಕಿ, ಎಣ್ಣೆ ಅಥವಾ ತುಪ್ಪ ಹಾಕಿ ಬೇಯಿಸಿ.
ದೋಸೆ ಬಿಸಿ ಇರುವಾಗಲೇ ನಿಮ್ಮಿಷ್ಟದ ಯಾವುದೇ ಬಗೆಯ ಚಟ್ನಿಯೊಡನೆ ತಿನ್ನಿ.
 

Wednesday, 11 May 2011

ಶೇಂಗಾ(ನೆಲಗಡಲೆ) ಹಲ್ವಾ / Groundnut Burfi

Click here for English version.

ಇದು ನನ್ನ ಅಮ್ಮ ಮಾಡುವ ಸ್ಪೆಷಲ್ ತಿಂಡಿಗಳಲ್ಲಿ ಒಂದು. ನಮ್ಮ ಮನೆಯಲ್ಲಂತೂ ಈ ತಿಂಡಿಯನ್ನು ಮಾಡಿಟ್ಟರೆ ಒಂದೇ ದಿನದಲ್ಲಿ ಖಾಲಿಯಾಗಿಬಿಡುತ್ತದೆ! ತಿನ್ನಲು ಬಹಳ ರುಚಿಕರವಾದ ಈ 'ತ್ರೀ ಕಪ್' ಹಲ್ವಾವನ್ನು ನೀವೂ ಮಾಡಿನೋಡಿ.


ಬೇಕಾಗುವ ಸಾಮಗ್ರಿಗಳು:
ಶೇಂಗಾ (ನೆಲಗಡಲೆ) - 1 ಕಪ್
ಸಕ್ಕರೆ - 1 ಕಪ್
ಹಾಲು - 1 ಕಪ್

ಮಾಡುವ ವಿಧಾನ:
ಶೇಂಗಾ ಹುರಿದು, ಸಿಪ್ಪೆಯನ್ನೆಲ್ಲ ಬೇರ್ಪಡಿಸಿಕೊಳ್ಳಿ.
ಸಿಪ್ಪೆ ತೆಗೆದ ಶೇಂಗಾವನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ.
ಒಂದು ಬಾಣಲೆ ಅಥವಾ ದಪ್ಪ ತಳದ ಪಾತ್ರೆಯಲ್ಲಿ ಹಾಲು, ಸಕ್ಕರೆ ಸೇರಿಸಿ ಕುದಿಯಲಿಡಿ.
ಸಕ್ಕರೆ ಕರಗಿದ ನಂತರ ಅದಕ್ಕೆ ಪುಡಿಮಾಡಿದ ಶೇಂಗಾ ಸೇರಿಸಿ ಹದವಾದ ಉರಿಯಲ್ಲಿ ಕೈಯಾಡಿಸುತ್ತಿರಿ.
ಮಿಶ್ರಣ ತಳ ಬಿಡತೊಡಗಿ ಗಟ್ಟಿಯಾಗಿ ಹಲ್ವಾದ ಹದಕ್ಕೆ ಬಂದಾಗ ಅದನ್ನು ಜಿಡ್ಡು ಸವರಿದ ಬಟ್ಟಲಿಗೆ ಸುರಿದು, ಲಟ್ಟಣಿಗೆಯಿಂದ ಒತ್ತಿ ಒಂದೇ ಸಮನಾಗಿ ಹರವಿ. ಆರಿದ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ.

ಟಿಪ್ಸ್: 
  • ಹಲ್ವಾ ಮಿಶ್ರಣವನ್ನು ಉರಿಯಿಂದ ಇಳಿಸುವ ಹದ ಗೊತ್ತಾಗದಿದ್ದರೆ, ಮಿಶ್ರಣ ಸ್ವಲ್ಪ ಗಟ್ಟಿಯಾಗತೊಡಗಿದನಂತರ ಒಂದು ಚಿಕ್ಕ ಹನಿಯಷ್ಟನ್ನು ಬಟ್ಟಲಿಗೆ ಹಾಕಿ, ಆರುತ್ತಿದ್ದಂತೆ ಗಟ್ಟಿಯಾಗುವುದೇ ಎಂದು ಪರೀಕ್ಷಿಸಿಕೊಳ್ಳಿ.

Tuesday, 10 May 2011

ಶುಂಠಿ ತಂಬುಳಿ / Shunthi ( Ginger) Tambuli

Click here for English version.


ತಂಬುಳಿ, ಮಜ್ಜಿಗೆ ಉಪಯೋಗಿಸಿ ಮಾಡುವ ಒಂದು ಬಗೆಯ ಮೇಲೋಗರ. ನಮ್ಮ ಮನೆಯಲ್ಲಂತೂ ಬೇಸಿಗೆ ಬಂದರೆ ಸಾಕು, ದಿನವೂ ಒಂದೊಂದು ಬಗೆಯ ತಂಬುಳಿ..ಶುಂಠಿ ತಂಬುಳಿ , ಎಳ್ಳು - ಜೀರಿಗೆ ತಂಬುಳಿ, ಮೆಂತೆ ತಂಬುಳಿ, ಮಜ್ಜಿಗೆ ಹುಲ್ಲಿನ ತಂಬುಳಿ, ಹಸಿ ಅರಿಶಿನದ ತಂಬುಳಿ, ಅಂಬೆ ಕೊಂಬಿನ ತಂಬುಳಿ, ಮಾವಿನಕಾಯಿ ತಂಬುಳಿ, ಒಂದೆಲಗದ ತಂಬುಳಿ, ಎಲವರಿಗೆ ಸೊಪ್ಪಿನ ತಂಬುಳಿ, ಹೀಗೆ. 
ನನ್ನ ಬ್ಲಾಗ್ ನೋಡಿದ ಕೆಲವರು ಹೇಳುತ್ತಿದ್ದರು, ಮಲೆನಾಡಿನ ಹವ್ಯಕ ಅಡಿಗೆ - ತಿಂಡಿಗಳನ್ನೇ ಮೊದಲು ತಿಳಿಸಿಕೊಡು ಎಂದು. ಆದರೆ ಇಲ್ಲಿ ಆಸ್ಟ್ರೇಲಿಯಾದಲ್ಲಿ ಹವ್ಯಕ ಅಡಿಗೆಗೆ ಬೇಕಾಗುವ ಎಲ್ಲ ಸಾಮಗ್ರಿಗಳೂ ಸಮರ್ಪಕವಾಗಿ ಸಿಗದಿರುವುದರಿಂದ ಎಲ್ಲವನ್ನೂ ಇಲ್ಲಿ ತೋರಿಸಿಕೊಡಲು ಸಾಧ್ಯವಾಗುತ್ತಿಲ್ಲ. 
ಬಹಳ ಸುಲಭದಲ್ಲಿ ತಯಾರಿಸಬಹುದಾದ ಶುಂಠಿ ತಂಬುಳಿಯಿಂದ ಈಗ ಪ್ರಾರಂಭಿಸೋಣ..


ಬೇಕಾಗುವ ಸಾಮಗ್ರಿಗಳು:
ಶುಂಠಿ - ಒಂದೂವರೆ ಇಂಚು
ಹಸಿಮೆಣಸು - ಚಿಕ್ಕ ಚೂರು
ತೆಂಗಿನತುರಿ - ಮುಕ್ಕಾಲು ಕಪ್
ಮಜ್ಜಿಗೆ - 1 ಕಪ್
ಉಪ್ಪು - ರುಚಿಗೆ ತಕ್ಕಷ್ಟು 
ಒಗ್ಗರಣೆಗೆ: ಎಣ್ಣೆ - 1 ಚಮಚ, ಸಾಸಿವೆ - ಅರ್ಧ ಚಮಚ, ಜೀರಿಗೆ - ಅರ್ಧ ಚಮಚ, ನಾಲ್ಕೈದು ಎಸಳು ಕರಿಬೇವು


ಮಾಡುವ ವಿಧಾನ:
ಮೊದಲು ಶುಂಠಿ ಮತ್ತು ಹಸಿಮೆಣಸನ್ನು ತೆಂಗಿನತುರಿಯೊಡನೆ ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. ರುಬ್ಬುವಾಗ ಬೇಕಾದಷ್ಟು ನೀರು ಸೇರಿಸಿಕೊಳ್ಳಿ.
ರುಬ್ಬಿಕೊಂಡ ಮಿಶ್ರಣವನ್ನು ಒಂದು ಚಿಕ್ಕ ಪಾತ್ರೆಯಲ್ಲಿ ಹಾಕಿ ಅದಕ್ಕೆ ಮಜ್ಜಿಗೆ, ಉಪ್ಪು ಸೇರಿಸಿ ಕಲಕಿ. ಮಿಶ್ರಣ ಮಂದವೆನಿಸಿದರೆ ಇನ್ನೂ ಸ್ವಲ್ಪ ನೀರು ಸೇರಿಸಿ.
ನಂತರ ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಕಾಯಿಸಿ ಸಾಸಿವೆ, ಜೀರಿಗೆ, ಕರಿಬೇವಿನ ಒಗ್ಗರಣೆ ಮಾಡಿ ತಂಬುಳಿ ಮಿಶ್ರಣಕ್ಕೆ ಸೇರಿಸಿ.
ಈ ತಂಬುಳಿ ಅನ್ನದೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ. ಊಟದ ಮಧ್ಯೆ ಹಾಗೇ ಕುಡಿಯಲೂಬಹುದು.


ಟಿಪ್ಸ್:
  • ತಂಬುಳಿಗೆ ತೆಂಗಿನತುರಿ ಮತ್ತು ಮಜ್ಜಿಗೆ ಸೇರಿಸಿರುವುದರಿಂದ ಹೆಚ್ಚು ಸಮಯ ಹಾಗೇ ಇಟ್ಟರೆ ಕೆಟ್ಟುಹೋಗುತ್ತದೆ. ಮದ್ಯಾಹ್ನಕ್ಕೆ ಮಾಡಿದ್ದನ್ನು ಸಂಜೆಗೂ ಇಡುವುದಾದರೆ ಫ್ರಿಜ್ ನಲ್ಲಿಟ್ಟು ಉಪಯೋಗಿಸಿ.

Friday, 6 May 2011

ಮಂಡಕ್ಕಿ ಚುಡುವಾ (ಚುರುಮುರಿ) / Puffed Rice Churumuri

Click here for English version.

ಇದು ಮಂಡಕ್ಕಿ ಅಥವಾ ಕಡ್ಲೆಪುರಿಯಿಂದ ತಯಾರಿಸುವ ಸ್ನ್ಯಾಕ್ಸ್. ಟೀ ಅಥವಾ ಕಾಫಿಯೊಡನೆ ತಿನ್ನಲು ಬಹಳ ಚೆನ್ನಾಗಿರುತ್ತದೆ. ನಮ್ಮೂರಿನ ಕಡೆಯ ಹಳ್ಳಿಗಳಲ್ಲಿ ಅಂಗಡಿಯಿಂದ ತಿಂಡಿಗಳನ್ನು ಕೊಂಡು ತರುವ ಪರಿಪಾಠ ಬಹಳ ಕಡಿಮೆ. ಆಯಾ ಕಾಲದಲ್ಲಿ ಸಿಗುವ ಹಲಸಿನಕಾಯಿ (Jackfruit), ಬಾಳೆಕಾಯಿ (Raw banana), ಗೆಣಸು (Sweet potato) ಬೇರುಹಲಸಿನಕಾಯಿ (Breadfruit) ಮುಂತಾದವುಗಳಿಂದ ತಯಾರಿಸುವ ಚಿಪ್ಸ್, ಅಥವಾ ಅವ್ಯಾವುದೂ ಸಿಗದಿದ್ದಾಗ ಕಡಲೆಪುರಿ ಅಥವಾ ಅವಲಕ್ಕಿಯಿಂದ ತಯಾರಿಸುವ ಚುಡುವಾ ಎಲ್ಲರ ಮನೆಯ ಸ್ನ್ಯಾಕ್ಸ್ ಟೈಮ್ ಟ್ರೀಟ್. ನಮ್ಮ ಮನೆಯಲ್ಲಿ ಮಾಡುವ ಚುಡುವಾದಲ್ಲಿ ಚಿಕ್ಕಪುಟ್ಟ ಬದಲಾವಣೆಗಳೊಂದಿಗೆ ನಾನು ಮಾಡಿದ ಕಡ್ಲೆಪುರಿ ಚುಡುವಾ ತಯಾರಿಕಾ ವಿಧಾನ ಇಲ್ಲಿದೆ..



ತಯಾರಿಸಲು ಬೇಕಾಗುವ ಸಮಯ: 25 ನಿಮಿಷಗಳು 

ಬೇಕಾಗುವ  ಸಾಮಗ್ರಿ:
ಮಂಡಕ್ಕಿ(ಕಡ್ಲೆಪುರಿ) - 1 ದೊಡ್ಡ ಬಟ್ಟಲು 
ಶೇಂಗಾ (ಹುರಿಗಡಲೆ) - 1/ 2 ಕಪ್
ಪುಟಾಣಿ - 1/ 2 ಕಪ್  
ಸಾಸಿವೆ - 1 / 2 ಚಮಚ 
ಜಜ್ಜಿದ ಬೆಳ್ಳುಳ್ಳಿ - 1 ಚಮಚ (ಬೆಳ್ಳುಳ್ಳಿ ಇಷ್ಟವಾಗದಿದ್ದರೆ ಅದರ ಬದಲು ಇಂಗು ಬಳಸಬಹುದು)
ಸಣ್ಣಗೆ ಹೆಚ್ಚಿದ ಹಸಿಮೆಣಸು - 1 
ಅರಿಶಿನ - 1 / 4 ಚಮಚ    
ಮೆಣಸಿನಪುಡಿ - 1 / 2 ಚಮಚ (ಖಾರಕ್ಕೆ ತಕ್ಕಂತೆ)
ಕರಿಬೇವು ಹೆಚ್ಚಿದ್ದು - ಸ್ವಲ್ಪ 
ಎಣ್ಣೆ - 4 ರಿಂದ 5 ಚಮಚ
ಪುಡಿ ಉಪ್ಪು - ರುಚಿಗೆ ತಕ್ಕಷ್ಟು 
ಆಮ್ ಚೂರ್ ಪುಡಿ - ಒಂದು ದೊಡ್ಡ ಚಿಟಿಕೆ 
ಸಕ್ಕರೆ ಪುಡಿ - 1 / 2 ಚಮಚ

ಮಾಡುವ ವಿಧಾನ:
ಮೊದಲು ಮಂಡಕ್ಕಿಯನ್ನು ಕಾದ ಬಾಣಲೆಯಲ್ಲಿ ಹಾಕಿ 5 ನಿಮಿಷ ಸಣ್ಣ ಬೆಂಕಿಯಲ್ಲಿ ಹುರಿದು ಗರಿಗರಿಯಾಗಿ ಮಾಡಿ ತೆಗೆದಿಟ್ಟುಕೊಳ್ಳಿ. 
ನಂತರ ಅದೇ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ, ಶೇಂಗಾ, ಪುಟಾಣಿ, ಸಾಸಿವೆ, ಹಸಿಮೆಣಸು ಹಾಕಿ ಎಲ್ಲವನ್ನೂ ಚೆನ್ನಾಗಿ ಹುರಿಯಿರಿ. ನಂತರ ಇದಕ್ಕೆ ಮೆಣಸಿನಪುಡಿ, ಅರಿಶಿನ, ಕರಿಬೇವು ಹಾಕಿ, ಜಜ್ಜಿಕೊಂಡ ಬೆಳ್ಳುಳ್ಳಿಯನ್ನು ಸೇರಿಸಿ. ಬೆಳ್ಳುಳ್ಳಿ ಚೆನ್ನಾಗಿ ಹುರಿದನಂತರ ಉರಿಯಿಂದ ಇಳಿಸಿ. 
ಈ ಮಿಶ್ರಣಕ್ಕೆ ಉಪ್ಪು, ಸಕ್ಕರೆ, ಆಮ್ ಚೂರ್ ಪುಡಿ ಸೇರಿಸಿ ಕಲಸಿಕೊಂಡು, ಕೊನೆಯಲ್ಲಿ ಹುರಿದಿಟ್ಟ ಮಂಡಕ್ಕಿ ಸೇರಿಸಿ ಚೆನ್ನಾಗಿ ಕಲಸಿ. 
ಸೌಟಿಗಿಂತ ಕೈಗಳ ಸಹಾಯದಿಂದ ಕಲಸಿದರೆ ಮಿಶ್ರಣ ಚೆನ್ನಾಗಿ ಕೂಡಿ ಬರುತ್ತದೆ. 
ಕಲಸಿದ ನಂತರ ರುಚಿ ನೋಡಿಕೊಂಡು ಉಪ್ಪು ಅಥವಾ ಸಕ್ಕರೆ ಬೇಕಿದ್ದರೆ ಸೇರಿಸಿ. 
ಬಿಸಿ ಬಿಸಿ ಟೀಯೊಡನೆ ಇದನ್ನು ತಿಂದುನೋಡಿ. 

Monday, 2 May 2011

ಅಕ್ಕಿಹಿಟ್ಟಿನ ರೊಟ್ಟಿ / Rice Flour Rotti

Click here for English version.

ಇದು ತರಕಾರಿ, ಖಾರ ಇತ್ಯಾದಿ ಏನನ್ನೂ ಬಳಸದೆ ಬರೀ ಹಿಟ್ಟಿನಿಂದ ಮಾಡುವ ರೊಟ್ಟಿ. ಇದನ್ನು ಮಾಡುವಾಗ ಗಮನಿಸಬೇಕಾದ ಮುಖ್ಯ ಅಂಶವೆಂದರೆ, ಹಿಟ್ಟನ್ನು ಕಲಸಿದ ಸ್ವಲ್ಪ ಸಮಯದಲ್ಲೇ ರೊಟ್ಟಿಗಳನ್ನು ಮಾಡಿಬಿಡಬೇಕು. ಕಲಸಿದ ಹಿಟ್ಟನ್ನು ಜಾಸ್ತಿ ಹೊತ್ತು ಹಾಗೇ ಇಟ್ಟರೆ ಹಿಟ್ಟು ಒಣಗಿದಂತಾಗಿ, ರೊಟ್ಟಿಗಳನ್ನು ಲಟ್ಟಿಸಲು ಕಷ್ಟವಾಗುತ್ತದೆ.


ಬೇಕಾಗುವ ಸಮಯ: 40 ನಿಮಿಷಗಳು 
ಈ ಅಳತೆಯಿಂದ ಸುಮಾರು 5 ರೊಟ್ಟಿಗಳನ್ನು ತಯಾರಿಸಬಹುದು.


ಬೇಕಾಗುವ ಸಾಮಗ್ರಿಗಳು: 
ಅಕ್ಕಿಹಿಟ್ಟು - 1 ಲೋಟ 
ಮೈದಾಹಿಟ್ಟು - 1 / 4 ಲೋಟ
ನೀರು - 2 ಲೋಟ 
ಎಣ್ಣೆ - 2 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು 

ಮಾಡುವ ವಿಧಾನ:
ಅಕ್ಕಿಹಿಟ್ಟು, ಮೈದಾಹಿಟ್ಟು, ಉಪ್ಪನ್ನು ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. 
ಒಂದು ಪಾತ್ರೆಯಲ್ಲಿ ನೀರನ್ನು ಹಾಕಿ ಒಲೆಯಮೇಲೆ ಕಾಯಲು ಇಡಿ. 
ನೀರು ಕುದಿಯತೊಡಗಿದಾಗ ಅದಕ್ಕೆ ಹಿಟ್ಟಿನ ಮಿಶ್ರಣವನ್ನು ಗೋಪುರಾಕಾರದಲ್ಲಿ ಹಾಕಿ. ಹಿಟ್ಟನ್ನು ನೀರಿನೊಡನೆ ಕಲಸಬೇಡಿ. 
ಪಾತ್ರೆಗೆ ಒಂದು ಬಟ್ಟಲನ್ನು ಅರೆಬರೆ ಮುಚ್ಚಿ, 15 ನಿಮಿಷ ಹಿಟ್ಟನ್ನು ಬೇಯಿಸಿ. 
ನಂತರ ಸೌಟಿನಿಂದ ಹಿಟ್ಟನ್ನು ಕಲಕಿ, ನೀರು ಮತ್ತು ಹಿಟ್ಟನ್ನು ಸರಿಯಾಗಿ ಕಲಸಿ. 


ಮಿಶ್ರಣವು ಚಪಾತಿ ಹಿಟ್ಟಿನ ಹದಕ್ಕೆ ಬಂದಿಲ್ಲವಾದರೆ ಒಲೆಯಮೇಲೆ ಪಾತ್ರೆಯನ್ನು ಹಾಗೇ ಇಟ್ಟು ಹಿಟ್ಟನ್ನು ತಳ ಹಿಡಿಯದಂತೆ ಕೈಯಾಡಿಸುತ್ತಿದ್ದು, ಚಪಾತಿ ಹಿಟ್ಟಿನ ಹದಕ್ಕೆ ಬಂದಾಗ ಉರಿಯಿಂದ ಇಳಿಸಿ, ತಣಿಯಲು ಬಿಡಿ. 
ಹಿಟ್ಟಿನಿಂದ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿ, ಅಕ್ಕಿಹಿಟ್ಟು ಅಥವಾ ಮೈದಾಹಿಟ್ಟಿನಲ್ಲಿ ಹೊರಳಿಸಿಕೊಂಡು ರೊಟ್ಟಿಗಳನ್ನು ಲಟ್ಟಿಸಿ, ಕಾವಲಿಯಮೇಲೆ ಹಾಕಿ ಬೇಯಿಸಿ. 
ಕೆಂಡದ ಒಲೆಯಮೇಲೆ ಹಾಕಿ ಬೇಯಿಸಿದರೆ ಈ ರೊಟ್ಟಿ ಇನ್ನೂ ಚೆನ್ನಾಗಿರುತ್ತದೆ. 
ಬಿಸಿಯಾಗಿರುವಾಗಲೇ ತೆಂಗಿನತುರಿ ಚಟ್ನಿ, ಉಪ್ಪಿನಕಾಯಿ ಅಥವಾ ಖಾರದ ಪುಡಿಯೊಡನೆ ತಿನ್ನಿ.

ಖಾರದ ಪುಡಿ / Kharada Pudi

Click here for English version.

ಖಾರದ ಪುಡಿ, ದೋಸೆ ಅಥವಾ ರೊಟ್ಟಿಯಂಥ ತಿಂಡಿಗಳನ್ನು ತಿನ್ನುವಾಗ ಬಳಸುವ ಒಂದು ಬಗೆಯ ಪುಡಿ. ಇದನ್ನು ಹಾಗೇ ಉಪಯೋಗಿಸಬಹುದು, ಅಥವಾ ಸ್ವಲ್ಪ ಎಣ್ಣೆಯೊಡನೆ ಮಿಕ್ಸ್ ಮಾಡಿಯೂ ಬಳಸಬಹುದು. ಮಲೆನಾಡಿನ ಕಡೆ ಸಾಮಾನ್ಯವಾಗಿ ಎಲ್ಲರ ಮನೆಯಲ್ಲೂ ಇಂಥದ್ದೊಂದು ಪುಡಿ ಇದ್ದೇ ಇರುತ್ತದೆ. ನಾನು ಇದನ್ನು ಕಲಿತದ್ದು ಅಮ್ಮನಿಂದ. 


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು 
 

ಬೇಕಾಗುವ ಸಾಮಗ್ರಿಗಳು:
ಒಣಮೆಣಸು -  10 ರಿಂದ 12 (ಇದರ ಬದಲು ಮೆಣಸಿನ ಪುಡಿಯನ್ನೂ ಬಳಸಬಹುದು)
ಕಡ್ಲೆಬೇಳೆ - 1 ಚಿಕ್ಕ ಲೋಟದಷ್ಟು 
ಉದ್ದಿನಬೇಳೆ - ಕಡ್ಲೆಬೇಳೆಯ ಅರ್ಧದಷ್ಟು 
ಲವಂಗ - 5
ಕೊತ್ತಂಬರಿ ಬೀಜ - ಚಿಕ್ಕ ಲೋಟದಲ್ಲಿ ಅರ್ಧದಷ್ಟು 
ಜೀರಿಗೆ - 1 ಚಮಚ 
ಸಾಸಿವೆ - ಕಾಲು ಚಮಚ 
ಅರಿಶಿನ - 1 ದೊಡ್ಡ ಚಿಟಿಕೆ 
ಕರಿಬೇವಿನ ದಳಗಳು - 15 ರಿಂದ 20 
ಆಮ್ ಚೂರ್ ಪೌಡರ್ ಅಥವಾ ಹುಳಿಪುಡಿ - 1 / 2 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು 

ಮಾಡುವ ವಿಧಾನ:

ಉಪ್ಪು ಮತ್ತು ಆಮ್ ಚೂರ್ ಪೌಡರ್ ಹೊರತಾಗಿ ಉಳಿದೆಲ್ಲ ಸಾಮಗ್ರಿಗಳನ್ನೂ ಎಣ್ಣೆ ಹಾಕದೆ ಹುರಿದು, ಉಪ್ಪು ಮತ್ತು ಆಮ್ ಚೂರ್ ಪೌಡರ್ ನೊಡನೆ ಮಿಕ್ಸಿಯಲ್ಲಿ ಪುಡಿಮಾಡಿಕೊಂಡು, ಗಾಳಿಯಾಡದಂತೆ ಡಬ್ಬದಲ್ಲಿ ಶೇಖರಿಸಿಟ್ಟುಕೊಳ್ಳಿ.
ದೋಸೆ, ರೊಟ್ಟಿಗಳೊಡನೆ ಹಾಕಿಕೊಳ್ಳುವಾಗ ಕೆಲವು ಹನಿ ಎಣ್ಣೆಯೊಡನೆ ಒಂದು ಚಮಚದಷ್ಟು ಖಾರದ ಪುಡಿಯನ್ನು ಕಲಸಿಕೊಂಡು ಬಳಸಿ.
ಯಾವಾಗಲೂ ಒಂದೇ ರೀತಿಯಲ್ಲಿ ಖಾರದ ಪುಡಿ ತಯಾರಿಸಲು ಬೇಸರವಾದರೆ ಇದರಲ್ಲಿ ಬಳಸಿರುವ ಸಾಮಗ್ರಿಗಳ ಪ್ರಮಾಣವನ್ನು ಸ್ವಲ್ಪ ಹೆಚ್ಚು-ಕಡಿಮೆ ಮಾಡಿಯೂ ನೋಡಬಹುದು.
Related Posts Plugin for WordPress, Blogger...