Here are some recipes which I came across through the net, books, so on and few are my own experiments..

Wednesday, 3 June 2020

ಕ್ಯಾಬೇಜ್ - ಮೊಳಕೆ ಹೆಸರುಕಾಳು ಮಸಾಲೆ ಪಲ್ಯ

ನಮ್ಮ ಮನೆಯಲ್ಲಿ ಸಾಮಾನ್ಯವಾಗಿ ಮಧ್ಯಾಹ್ನ ಊಟಕ್ಕೆ ಅನ್ನ ಮಾಡಿದರೆ, ಸಂಜೆ ಊಟಕ್ಕೆ ಚಪಾತಿ. ಹೀಗಾಗಿ ಅಡುಗೆ ಮಾಡುವಾಗ ನಾನು ಸಾಂಬಾರ್, ದಾಲ್ ಅಥವಾ ಪಲ್ಯ ಯಾವುದಾದರೊಂದು ಐಟಮ್ ಅನ್ನ ಹಾಗೂ ಚಪಾತಿ ಇವೆರಡಕ್ಕೂ ಸೂಟ್ ಆಗುವಂತೆ ಪ್ಲಾನ್ ಮಾಡಿಕೊಳ್ಳುತ್ತೇನೆ. 
ಈಗ ನಾನು ಶೇರ್ ಮಾಡುತ್ತಿರುವ ಕ್ಯಾಬೇಜ್ - ಮೊಳಕೆ ಹೆಸರುಕಾಳು ಮಸಾಲೆ ಪಲ್ಯ ಅನ್ನ, ಚಪಾತಿ, ದೋಸೆ, ಪೂರಿ ಇವೆಲ್ಲದರೊಡನೆಯೂ ಒಳ್ಳೆಯ ಕಾಂಬಿನೇಷನ್. 


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
  • ಸಣ್ಣಗೆ ಹೆಚ್ಚಿದ ಕ್ಯಾಬೇಜ್ - 3 ಕಪ್ 
  • ಮೊಳಕೆಬಂದ ಹೆಸರುಕಾಳು - 1/2 ಕಪ್ (ಜಾಸ್ತಿ ಬೇಕಿದ್ದರೂ ಬಳಸಬಹುದು)
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಆಮಚೂರ್ ಪುಡಿ / ಹುಳಿಪುಡಿ - 3/4 ಟೀ ಚಮಚ 
  • ಸಕ್ಕರೆ - 1/3 ಟೀ ಚಮಚ 
  • ಪಾವ್ ಭಾಜಿ ಮಸಾಲಾ ಪುಡಿ - 1 ಟೀ ಚಮಚ 
  • ಅಚ್ಚ ಖಾರದ ಪುಡಿ - 1/4 ಟೀ ಚಮಚ (ಖಾರಕ್ಕೆ ತಕ್ಕಷ್ಟು)
 - ಒಗ್ಗರಣೆಗೆ:
  • ಎಣ್ಣೆ - 1 1/2 ಟೇಬಲ್ ಚಮಚ 
  • ಒಣಮೆಣಸು - 1 ಇಂಚು ಚೂರು 
  • ಉದ್ದಿನಬೇಳೆ - 1 ಟೀ ಚಮಚ 
  • ಸಾಸಿವೆ - 1 ಟೀ ಚಮಚ 
  • ಅರಿಶಿನ - 1/3 ಟೀ ಚಮಚ 
  • ಹಸಿಮೆಣಸು - 1
  • ಕರಿಬೇವು - 5ರಿಂದ 6 ಎಲೆಗಳು 

ತಯಾರಿಸುವ ವಿಧಾನ:
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಒಂದೂವರೆ ಟೇಬಲ್ ಚಮಚದಷ್ಟು ಎಣ್ಣೆ ಬಿಸಿಮಾಡಿ. ಇದಕ್ಕೆ ಒಣಮೆಣಸಿನ ಚೂರು, ಉದ್ದಿನಬೇಳೆ, ಸಾಸಿವೆ ಸೇರಿಸಿ ಹುರಿಯಿರಿ. 
  • ಸಾಸಿವೆ ಚಟಪಟ ಎಂದಾಗ ಅರಿಶಿನ, ಹಸಿಮೆಣಸಿನ ಚೂರು, ಕರಿಬೇವು ಸೇರಿಸಿ ಕೈಯಾಡಿಸಿ. 
  • ನಂತರ ಇದಕ್ಕೆ ಸಣ್ಣಗೆ ಹೆಚ್ಚಿದ ಕ್ಯಾಬೇಜ್, ಮೊಳಕೆಬಂದ ಹೆಸರುಕಾಳು ಸೇರಿಸಿ ಕೈಯಾಡಿಸಿ, ಬಾಣಲೆಗೆ ಮುಚ್ಚಳ ಮುಚ್ಚಿ ಬೇಯಿಸಿ. 
  • ಮಿಶ್ರಣ ತಳ ಹಿಡಿಯದಂತೆ ಆಗಾಗ ಕೈಯಾಡಿಸುತ್ತಿರಿ. ಈ ಪಲ್ಯಕ್ಕೆ ನಾನು ನೀರು ಸೇರಿಸಿಲ್ಲ. ಪಲ್ಯದ ಮಿಶ್ರಣ ತೀರಾ ಡ್ರೈ ಎನಿಸಿದರೆ 2ಅಥವಾ 3 ಚಮಚದಷ್ಟು ನೀರು ಸೇರಿಸಬಹುದು. 
  • ಮಿಶ್ರಣ ಮುಕ್ಕಾಲುಭಾಗ ಬೆಂದಾಗ ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, ಆಮಚೂರ್ ಪೌಡರ್ / ಹುಳಿಪುಡಿ, ಪಾವ್ ಭಾಜಿ ಮಸಾಲಾ, ಅಚ್ಚ ಮೆಣಸಿನ ಪುಡಿ - ಇಷ್ಟನ್ನೂ ಸೇರಿಸಿ ಕೈಯಾಡಿಸಿ, ಮಿಶ್ರಣ ಪೂರ್ತಿ ಬೇಯುವವರೆಗೆ ಬೇಯಿಸಿ. 
  • ಈ ಪಲ್ಯ ಅನ್ನ, ಚಪಾತಿ, ಪೂರಿ, ದೋಸೆಯೊಡನೆ ಚೆನ್ನಾಗಿರುತ್ತದೆ. 

ಟಿಪ್ಸ್:
  • ಹಸಿಮೆಣಸು ಬಳಸದಿದ್ದರೆ ಅಚ್ಚಖಾರದ ಪುಡಿಯನ್ನು ಸ್ವಲ್ಪ ಜಾಸ್ತಿ ಹಾಕಿ. 
  • ಸಿಹಿ ಇಷ್ಟವಾಗದಿದ್ದರೆ ಸಕ್ಕರೆ ಬಳಸಬೇಡಿ. 
  • ಪಾವ್ ಭಾಜಿ ಮಸಾಲಾ ಬದಲು ಸಾಂಬಾರ್ ಪುಡಿ ಅಥವಾ ಇನ್ಯಾವುದೇ ಮಸಾಲಾ ಪುಡಿ ಬಳಸಬಹುದು. 

Wednesday, 20 May 2020

ಎಗ್ ಲೆಸ್ ಆರೆಂಜ್ ಕೇಕ್ । ಮೊಟ್ಟೆ ಬಳಸದ ಕಿತ್ತಳೆ ಹಣ್ಣಿನ ಕೇಕ್ । ಐಯಂಗಾರ್ ಬೇಕರಿ ಸ್ಟೈಲ್ ಎಗ್ ಲೆಸ್ ಕೇಕ್

ಚಿಕ್ಕವರಿದ್ದಾಗ ನಮಗೆಲ್ಲ ಕೇಕ್ ಎಂದರೆ ಬಹಳ ಅಪರೂಪದ ತಿನಿಸು ಆಗಿತ್ತು. ಎಲ್ಲೋ ಒಮ್ಮೆ ಬೇಕರಿಯಿಂದ ತರುತ್ತಿದ್ದ ಈ ತಿನಿಸು ಮನೆಯಲ್ಲಿ ತಯಾರಿಸುವ ಎಲ್ಲ ತಿಂಡಿಗಳಿಗಿಂತ ರುಚಿ ಎನ್ನಿಸಿಬಿಡುತ್ತಿತ್ತು! ಈಗ ಸಾಮಾನ್ಯವಾಗಿ ಹೆಚ್ಚಿನ ಮನೆಗಳಲ್ಲಿ ಓವನ್ ಇರುವುದರಿಂದ ಬೇಕರಿ ತಿಂಡಿಗಳಾದ ಕೇಕ್, ಬಿಸ್ಕಿಟ್ ಇವೆಲ್ಲವನ್ನೂ ಬೇಕೆನಿಸಿದಾಗಲೆಲ್ಲ ತಯಾರಿಸಬಹುದು. 
ನಮ್ಮ ಮನೆಯಲ್ಲಿ ವಿವಿಧ ಬಗೆಯ ಎಗ್ ಲೆಸ್ ಕೇಕ್ ಗಳನ್ನು ತಯಾರಿಸುತ್ತಿರುತ್ತೇವೆ. ಮಕ್ಕಳಿರುವಾಗ ಎಷ್ಟು ಬಗೆಯ ತಿಂಡಿಗಳನ್ನು ತಯಾರಿಸಿದರೂ ಬೇಗ ಬೇಗ ಖಾಲಿಯಾಗಿಬಿಡುತ್ತದೆ. ಮೊದಲೆಲ್ಲ ವೆನಿಲ್ಲಾ ಕೇಕ್, ಚಾಕೊಲೇಟ್ ಕೇಕ್ ತಯಾರಿಸಲು ಹೇಳುತ್ತಿದ್ದ ನನ್ನ ಮಗಳು ಇತ್ತೀಚೆಗೆ ಯಾವಾಗಲೂ ಎಗ್ ಲೆಸ್ ಆರೆಂಜ್ ಕೇಕ್ ತಯಾರಿಸೋಣ ಎನ್ನುತ್ತಾಳೆ. ಈಗ ಟ್ರೆಂಡ್ ನಲ್ಲಿರುವ ಹಾಟ್ ಮಿಲ್ಕ್ ಕೇಕ್ ತಯಾರಿಸಿದ ನಂತರ ಅದೇ ಟೆಕ್ನಿಕ್ ಬಳಸಿ ಆರೆಂಜ್ ಕೇಕ್ ತಯಾರಿಸಿದಾಗ ಬಹಳ ಚೆನ್ನಾಗಿ ಬಂತು. ಐಯಂಗಾರ್ ಬೇಕರಿಗಳಲ್ಲಿ ಸಿಗುವ ಪ್ಲೇನ್ ಕೇಕ್ ನ ರುಚಿಯನ್ನೇ ಹೋಲುತ್ತದೆ ಈ ಕೇಕ್. ಎಗ್ ಲೆಸ್ ಆರೆಂಜ್ ಕೇಕ್ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು 
ಬೇಕಿಂಗ್ ಟೈಮ್: 25 - 30 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಸರ್ವಿಂಗ್ಸ್: ಈ ಅಳತೆಯಿಂದ ಒಂದು ಲೋಫ್ ಕೇಕ್ ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:
  • ಮೈದಾ ಹಿಟ್ಟು (ಅಥವಾ ಅರ್ಧ ಮೈದಾ, ಅರ್ಧ ಗೋಧಿಹಿಟ್ಟು) - 1 1/2 ಕಪ್ 
  • ಬೇಕಿಂಗ್ ಪೌಡರ್ - 1 1/2 ಟೀ ಚಮಚ 
  • ಬೇಕಿಂಗ್ ಸೋಡಾ - 1/8 ಟೀ ಚಮಚ 
  • ಉಪ್ಪು - ಚಿಟಿಕೆ 
  • ಫ್ರೆಶ್ ಆರೆಂಜ್ ಜ್ಯೂಸ್ (ಕಿತ್ತಳೆ ರಸ) - 1/4 ಕಪ್ 
  • ಸಕ್ಕರೆ - 1/3 ಕಪ್ 
  • ಆರೆಂಜ್ ಝೆಸ್ಟ್ (ಕಿತ್ತಳೆ ಸಿಪ್ಪೆ ತುರಿದದ್ದು) - 1 1/2 ಟೇಬಲ್ ಚಮಚ 
  • ಹಾಲು - 1/2 ಕಪ್ 
  • ಮೊಸರು - 1/4 ಕಪ್ 
  • ಎಣ್ಣೆ - 1/2 ಕಪ್ 

ತಯಾರಿಸುವ ವಿಧಾನ: 
  • ಓವನ್ ನ್ನು 175C ಗೆ ಪ್ರೀ-ಹೀಟ್ ಮಾಡಿಕೊಳ್ಳಿ. 
  • ಬೇಕಿಂಗ್ ಪಾತ್ರೆಯ ಒಳಭಾಗಕ್ಕೆ ಎಣ್ಣೆ ಸವರಿ ಅದರಮೇಲೆ ಒಣ ಹಿಟ್ಟು ಉದುರಿಸಿ. ಬೇಕಿಂಗ್ ಪೇಪರ್ ನ್ನು ಬೇಕಿಂಗ್ ಪಾತ್ರೆಯ ತಳಭಾಗದ ಅಳತೆಗೆ ಕಟ್ ಮಾಡಿ ಹಾಕಿ. 
  • ಹಿಟ್ಟು, ಬೇಕಿಂಗ್ ಪೌಡರ್ ಮತ್ತು ಬೇಕಿಂಗ್ ಸೋಡಾ - ಇಷ್ಟನ್ನೂ 2 - 3 ಬಾರಿ ಜರಡಿಯಾಡಿಕೊಳ್ಳಿ. 
  • ಸಕ್ಕರೆ, ಮೊಸರು ಮತ್ತು ಉಪ್ಪನ್ನು ಒಂದು ಒಂದು ಮಿಕ್ಸಿಂಗ್ ಬೌಲ್ ನಲ್ಲಿ ಹಾಕಿ ಮಿಕ್ಸ್ ಮಾಡಿ. 
  • ಸಕ್ಕರೆ ಕರಗಿದ ನಂತರ ಇದಕ್ಕೆ ಆರೆಂಜ್ ಜ್ಯೂಸ್, ಝೆಸ್ಟ್ ಮತ್ತು ಎಣ್ಣೆ ಸೇರಿಸಿ ಮಿಕ್ಸ್ ಮಾಡಿ. 
  • ಮಿಶ್ರಣಕ್ಕೆ ಹಿಟ್ಟನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತ ನಿಧಾನವಾಗಿ ಮಿಕ್ಸ್ ಮಾಡಿ. 
  • ಈ ಮಿಶ್ರಣಕ್ಕೆ ಬಿಸಿ ಹಾಲನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತ ದೋಸೆ ಹಿಟ್ಟಿನ ಹದಕ್ಕೆ ಹಿಟ್ಟನ್ನು ತಯಾರಿಸಿಕೊಳ್ಳಿ. 
  • ತಯಾರಾದ ಹಿಟ್ಟನ್ನು ಬೇಕಿಂಗ್ ಪಾತ್ರೆಯಲ್ಲಿ ಹಾಕಿ ಪ್ರೀ-ಹೀಟ್ ಮಾಡಿದ ಓವನ್ ನಲ್ಲಿಟ್ಟು 25 - 30 ನಿಮಿಷ ಬೇಯಿಸಿ. ಕೇಕ್ ಬೆಂದಿದೆಯೇ ಎಂದು ನೋಡಲು ಒಂದು ಟೂತ್ ಪಿಕ್ ನ್ನು ಕೇಕ್ ನ ಒಳಭಾಗದವರೆಗೆ ಚುಚ್ಚಿ ನೋಡಿ; ಹಿಟ್ಟು ಅಂಟಿಲ್ಲವೆಂದರೆ ಕೇಕ್ ಬೆಂದಿದೆ ಎಂದರ್ಥ. ನಾನು ತಯಾರಿಸಿದ ಕೇಕ್ ಸರಿಯಾಗಿ 25 ನಿಮಿಷಕ್ಕೆ ಬೆಂದಿದೆ. 
  • ಕೇಕ್ ನ್ನು ಓವನ್ ನಿಂದ ಹೊರತೆಗೆದು ತಣ್ಣಗಾಗಲು ಬಿಡಿ. ಕೇಕ್ ಸ್ವಲ್ಪ ತಣ್ಣಗಾದ ನಂತರ ಅದನ್ನು ಬೇಕಿಂಗ್ ಪಾತ್ರೆಯಿಂದ ಹೊರತೆಗೆದು ಪೂರ್ತಿ ತಣ್ಣಗಾಗುವತನಕ ಕೂಲಿಂಗ್ ರ್ಯಾಕ್ ಮೇಲಿಡಿ. 
  • ತಣ್ಣಗಾದ ಕೇಕ್ ನ್ನು ಕತ್ತರಿಸಿ ತಿನ್ನಿ. ಬೇಕಿದ್ದರೆ ಐಸಿಂಗ್ ಹಾಕಿಕೊಳ್ಳಬಹುದು. 

ಟಿಪ್ಸ್:
  • ಈ ಕೇಕ್ ಗೆ ಟೂಟಿ ಫ್ರುಟಿ ಬೇಕಿದ್ದರೆ ಸೇರಿಸಬಹುದು. ಇದರಿಂದ ರುಚಿಯೂ ಹೆಚ್ಚು, ನೋಡುವುದಕ್ಕೂ ಚೆಂದ. 


Wednesday, 13 May 2020

ಒಣಗಿಸಿಟ್ಟ ಹಲಸಿನ ಸೊಳೆ ಬಜ್ಜಿ | ಒಣ ಹಲಸಿನ ತೊಳೆಯ ರಾಯಿತ

ಹಲಸಿನ ಸೀಜನ್ ಬಂತೆಂದರೆ ಸಾಕು, ನಮ್ಮೂರ ಕಡೆ ಬಗೆ ಬಗೆ ಖಾದ್ಯ ತಯಾರಿಸುವ ಸಂಭ್ರಮ! ಹಲಸಿನ ಗುಜ್ಜು ಬಿಟ್ಟಾಗ ಶುರುವಾಗುವ ಖಾದ್ಯ ತಯಾರಿ ಹಲಸು ಹಣ್ಣಾಗಿ ಖಾಲಿಯಾಗುವವರೆಗೂ ನಡೆಯುತ್ತದೆ. ನನ್ನ ತವರುಮನೆಯಲ್ಲಿ ಹಲಸಿನ ಚಿಪ್ಸ್, ಒಣಗಿಸಿದ ಹಲಸಿನ ಕಾಯಿ ತೊಳೆ, ಇತ್ಯಾದಿಗಳನ್ನು ಸೀಜನ್ ನಲ್ಲಿ ತಯಾರಿಸಿಟ್ಟು ವರ್ಷವಿಡೀ ಬಳಸುತ್ತಾರೆ. ನಾವು ಕಳೆದ ವರ್ಷ ಊರಿಗೆ ಹೋದಾಗ ತಂದಿದ್ದ ಒಣಗಿಸಿಟ್ಟ ಹಲಸಿನ ತೊಳೆ ಚೂರುಗಳು ನನ್ನ ಬಳಿ ಇನ್ನೂ ಇವೆ. ಅಪರೂಪಕ್ಕೊಮ್ಮೆ ಊರು ಕಡೆಯ ಅಡುಗೆ ಮಾಡಲು ಇವು ಬಹಳ ಚೆನ್ನ.
ಒಣಗಿಸಿದ ಹಲಸಿನ ಸೊಳೆ ಚೂರು ತಯಾರಿಸುವುದು ಹೇಗೆಂದು ನೋಡಲು ಇಲ್ಲಿ ಕ್ಲಿಕ್ ಮಾಡಿ.


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ತೊಳೆ ನೆನೆಸಿಡುವ ಸಮಯ: 20 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
  • ಒಣಗಿಸಿದ ಹಲಸಿನ ಸೊಳೆ ಚೂರುಗಳು - 1/2 ಕಪ್ 
  • ನೀರು - 3/4 ಕಪ್ 
  • ಉಪ್ಪು - ರುಚಿಗೆ ತಕ್ಕಷ್ಟು (ಟಿಪ್ಸ್ ನೋಡಿ)
  • ನಿಂಬೆರಸ - 1 ಟೇಬಲ್ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ಮೊಸರು - 1 ಕಪ್ 
 - ಒಗ್ಗರಣೆಗೆ: 
  • ಎಣ್ಣೆ - 1 1/2 ಟೇಬಲ್ ಚಮಚ  
  • ಒಣಮೆಣಸು - ಒಂದು ಮೆಣಸಿನ ಅರ್ಧಭಾಗ 
  • ಉದ್ದಿನಬೇಳೆ - 1 ಟೀ ಚಮಚ
  • ಸಾಸಿವೆ - 3/4 ಟೀ ಚಮಚ
  • ಹೆಚ್ಚಿದ ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ)
  • ಜಜ್ಜಿದ ಬೆಳ್ಳುಳ್ಳಿ - 1 ಟೀ ಚಮಚದಷ್ಟು 

ತಯಾರಿಸುವ ವಿಧಾನ:
  • ಒಣ ಹಲಸಿನ ತೊಳೆಯ ಚೂರುಗಳನ್ನು ಮುಕ್ಕಾಲು ಕಪ್ ನಷ್ಟು ನೀರಿನಲ್ಲಿ 20 ನಿಮಿಷ ನೆನೆಸಿಡಿ. 
  • ನೆನೆಸಿಟ್ಟ ಹಲಸಿನ ಚೂರುಗಳನ್ನು ನೆನೆಸಲು ಬಳಸಿದ ನೀರಿನೊಂದಿಗೆ ಕುಕ್ಕರ್ ನಲ್ಲಿ ಎರಡು ವಿಸಿಲ್ ಆಗುವವರೆಗೆ ಬೇಯಿಸಿ. 
  • ಸ್ವಲ್ಪ ತಣ್ಣಗಾದ ನಂತರ ಬೆಂದ ಹಲಸಿನ ಚೂರುಗಳನ್ನು ಹೊರತೆಗೆದು ಅದಲ್ಲಿರುವ ಹೆಚ್ಚಿನ ನೀರನ್ನು ತೆಗೆದುಬಿಡಿ. 
  • ಬೆಂದ ಹಲಸಿನ ತೊಳೆ ಚೂರುಗಳನ್ನು ಸೌಟಿನಿಂದ ಸ್ವಲ್ಪ ಮ್ಯಾಶ್ ಮಾಡಿಕೊಳ್ಳಿ. 
  • ಮ್ಯಾಶ್ ಮಾಡಿದ ಹಲಸಿನ ತೊಳೆಗೆ ಒಂದು ಕಪ್ ನಷ್ಟು ಮೊಸರು ಸೇರಿಸಿ ಮಿಕ್ಸ್ ಮಾಡಿ. ರುಚಿಗೆ ತಕ್ಕಷ್ಟು ಉಪ್ಪು, ನಿಂಬೆರಸ ಸೇರಿಸಿ. 
  • ಒಗ್ಗರಣೆ ಸೌಟು ಅಥವಾ ಒಂದು ದಪ್ಪ ತಳದ ಪಾತ್ರೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ ಕಾದ ನಂತರ ಒಣಮೆಣಸು, ಉದ್ದಿನಬೇಳೆ, ಸಾಸಿವೆ ಹಾಕಿ. 
  • ಸಾಸಿವೆ ಸಿಡಿಯತೊಡಗಿದಾಗ ಹಸಿಮೆಣಸಿನ ಚೂರುಗಳು, ಜಜ್ಜಿದ ಬೆಳ್ಳುಳ್ಳಿ ಸೇರಿಸಿ 1- 2 ನಿಮಿಷ ಕೈಯಾಡಿಸಿ. 
  • ಈ ಒಗ್ಗರಣೆಯನ್ನು ಮ್ಯಾಶ್ ಮಾಡಿದ ಹಲಸಿನ ತೊಳೆಗೆ ಸೇರಿಸಿ. ಮೆಣಸನ್ನು ಸೌಟಿನಲ್ಲಿ ಅಥವಾ ಕೈಯಲ್ಲಿ ಮ್ಯಾಶ್ ಮಾಡಿ ಮಿಕ್ಸ್ ಮಾಡಿ. 
  • ಬಿಸಿ ಬಿಸಿ ಅನ್ನದೊಡನೆ ಹಾಕಿಕೊಳ್ಳಲು ಹಲಸಿನ ತೊಳೆಯ ಬಜ್ಜಿ ಬಹಳ ರುಚಿ. 

ಟಿಪ್ಸ್:
  • ಹಲಸಿನ ತೊಳೆಯನ್ನು ಉಪ್ಪು ಸೇರಿಸಿ ಒಣಗಿಸಿರುವುದರಿಂದ ಮೇಲೋಗರದ ರುಚಿ ನೋಡಿಕೊಂಡು ಉಪ್ಪು ಸೇರಿಸಿ. ಉಪ್ಪು ಜಾಸ್ತಿ ಆಗಿಬಿಟ್ಟರೆ ಅಂಗೈ ಅಗಲದ ಬಾಳೆ ಎಲೆ ಚೂರನ್ನು 15 - 20 ನಿಮಿಷ ಮೇಲೋಗರದಲ್ಲಿ ಹಾಕಿಟ್ಟು ತೆಗೆದರೆ ಉಪ್ಪಿನಂಶವನ್ನು ಬಾಳೆ ಎಲೆ ಹೀರಿಕೊಳ್ಳುತ್ತದೆ. 

Click here for English version.

Sunday, 10 May 2020

ಆಲೂಗಡ್ಡೆ - ಸ್ನೋ ಪೀಸ್ ಪಲ್ಯ । ಮಿಶ್ರ ತರಕಾರಿಗಳ ಸಬ್ಜಿ

ನಾವು ಈ ವರ್ಷ ಹಿತ್ತಿಲಲ್ಲಿ ಸ್ನೋ ಪೀಸ್ ಗಿಡಗಳನ್ನು ಹಾಕಿದ್ದೆವು. ಹಾಕಿರುವ ಐದಾರು ಗಿಡದಲ್ಲೇ ನಮ್ಮ ಪುಟ್ಟ ಸಂಸಾರಕ್ಕೆ ಸಾಕಾಗುವಷ್ಟು ಬೀನ್ಸ್ ಸಿಗುತ್ತಿವೆ. ಸುಲಭದಲ್ಲಿ ಬೆಳೆಯಬಹುದಾದ ಈ ಬೀನ್ಸ್ ಸಾಂಬಾರ್, ಪಲ್ಯ, ರೈಸ್ ಐಟಮ್ಸ್, ಸಲಾಡ್ ಎಲ್ಲಕ್ಕೂ ಚೆನ್ನಾಗಿರುತ್ತದೆ. ಸಿಹಿ ಯಾಗಿರುವ ಸ್ನೋ ಪೀಸ್ ನ್ನು ನನ್ನ ಮಕ್ಕಳು ಗಿಡದಿಂದ ಕಿತ್ತು ಹಾಗೆಯೇ ತಿನ್ನುತ್ತಾರೆ. 
ಆಲೂಗಡ್ಡೆ, ಸ್ನೋ ಪೀಸ್, ಕ್ಯಾಪ್ಸಿಕಂ, ಹಸಿ ಬಟಾಣಿ - ಇಷ್ಟನ್ನೂ ಬಳಸಿ ತಯಾರಿಸಬಹುದಾದ ಪಲ್ಯದ ರೆಸಿಪಿ ಇಲ್ಲಿದೆ. ಕ್ಯಾಪ್ಸಿಕಂ ಅಥವಾ ಹಸಿ ಬಟಾಣಿ ಇಲ್ಲದೆಯೂ ಈ ಪಲ್ಯ ತಯಾರಿಸಬಹುದು. 


ತಯಾರಿಸಲು ಬೇಕಾಗುವ ಸಮಯ: 25 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
  • ದೊಡ್ಡ ಆಲೂಗಡ್ಡೆ  - 2 
  • ಸ್ನೋ ಪೀಸ್ - 8ರಿಂದ 10
  • ಹೆಚ್ಚಿದ ಕ್ಯಾಪ್ಸಿಕಂ - 3/4 ಕಪ್ 
  • ಹಸಿ ಬಟಾಣಿ - 3/4 ಕಪ್ (ನಾನು ಫ್ರೋಜನ್ ಪೀಸ್ ಬಳಸಿದ್ದೇನೆ)
  • ಕಸೂರಿ ಮೇಥಿ - 1 ಟೇಬಲ್ ಚಮಚ 
  • ಕೊತ್ತಂಬರಿ ಜೀರಿಗೆ ಪುಡಿ - 1 ಟೀ ಚಮಚ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಪೆಪ್ಪರ್ (ಕಾಳುಮೆಣಸು) ಪುಡಿ - 1 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 

 - ಒಗ್ಗರಣೆಗೆ:
  • ಎಣ್ಣೆ - 2 ಟೇಬಲ್ ಚಮಚ 
  • ಮೆಂತ್ಯ - 1/4 ಟೀ ಚಮಚ 


ತಯಾರಿಸುವ ವಿಧಾನ:
  • ಎಲ್ಲ ತರಕಾರಿಗಳನ್ನು ನೀರಿನಲ್ಲಿ ಸ್ವಚ್ಛವಾಗಿ ತೊಳೆದುಕೊಳ್ಳಿ. 
  • ಕ್ಯಾಪ್ಸಿಕಂ ಮತ್ತು ಸ್ನೋ ಪೀಸ್ ನ್ನು ಮೀಡಿಯಮ್ ಅಳತೆಯ ಚೂರುಗಳಾಗಿ ಕತ್ತರಿಸಿಕೊಳ್ಳಿ. 
  • ಆಲೂಗಡ್ಡೆಯನ್ನು ಸಿಪ್ಪೆ ತೆಗೆದು ಚಿಕ್ಕ , ಉದ್ದನೆಯ ಚೂರುಗಳಾಗಿ ಹೆಚ್ಚಿಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ 2 ಟೇಬಲ್ ಚಮಚದಷ್ಟು ಎಣ್ಣೆ ಬಿಸಿಮಾಡಿ ಮೆಂತ್ಯ ಸೇರಿಸಿ ಪರಿಮಳ ಬರುವಂತೆ ಹುರಿಯಿರಿ. 
  • ನಂತರ ಇದಕ್ಕೆ ಹೆಚ್ಚಿದ ಆಲೂಗಡ್ಡೆ ಸೇರಿಸಿ ಕೈಯಾಡಿಸಿ, ಮುಚ್ಚಳ ಮುಚ್ಚಿ ಬೇಯಿಸಿ. ಆಲೂಗಡ್ಡೆ ತಳ ಹಿಡಿಯದಂತೆ ಆಗಾಗ ಕೈಯಾಡಿಸುತ್ತಿರಿ. 
  • ಆಲೂಗಡ್ಡೆ ಚೂರುಗಳು ಅರ್ಧ ಬೆಂದಾಗ ಇದಕ್ಕೆ ಹೆಚ್ಚಿದ ಸ್ನೋ ಪೀಸ್, ಕ್ಯಾಪ್ಸಿಕಮ್, ಹಸಿ ಬಟಾಣಿ ಮತ್ತು ಕಸೂರಿ ಮೇಥಿ ಸೇರಿಸಿ ಮುಚ್ಚಳ ಮುಚ್ಚಿ 8 - 10 ನಿಮಿಷ ಬೇಯಿಸಿ. ಮಿಶ್ರಣವನ್ನು ಆಗಾಗ ಕೈಯಾಡಿಸುತ್ತಿರಿ. 
  • ಆಲೂಗಡ್ಡೆ ಚೂರುಗಳು ಮುಕ್ಕಾಲುಭಾಗ ಬೆಂದಾಗ ಇದಕ್ಕೆ ಪೆಪ್ಪರ್ ಪೌಡರ್, ಕೊತ್ತಂಬರಿ - ಜೀರಿಗೆ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಕೈಯಾಡಿಸಿ ಇನ್ನೂ 3 - 4 ನಿಮಿಷ ಬೇಯಿಸಿ ಉರಿ ಆಫ್ ಮಾಡಿ. 
  • ಈ ಪಲ್ಯ ಅನ್ನ, ಚಪಾತಿ, ಪೂರಿಯೊಡನೆ ಸೈಡ್ ಡಿಶ್ ಆಗಿ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ. 

Click here for English version.

Monday, 4 May 2020

ಕ್ರಿಸ್ಪಿ ಚಾಕೊಲೇಟ್ ಬೈಟ್ಸ್ । ಚಾಕೊಲೇಟ್ ಕ್ರಾಕಲ್ಸ್ । ಚಾಕೋ ಕೋಟೆಡ್ ರೈಸ್ ಬಬಲ್ಸ್

ಚಾಕೊಲೇಟ್ ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ? ಮಕ್ಕಳಿಂದ ದೊಡ್ಡವರವರೆಗೂ ಸಾಮಾನ್ಯವಾಗಿ ಎಲ್ಲರಿಗೂ ಚಾಕೊಲೇಟ್ ಇಷ್ಟ. ನಾನು ಇಂದು ಶೇರ್ ಮಾಡುತ್ತಿರುವುದು ಚಾಕೊಲೇಟ್ ಬಳಸಿ ತಯಾರಿಸುವ ಒಂದು ಬಗೆಯ ಸ್ನ್ಯಾಕ್ಸ್. ಈ ರೆಸಿಪಿಗೆ ಬೇಕಿರುವುದು ಬರೀ ಮೂರೇ ಪದಾರ್ಥಗಳು - ಕುಕಿಂಗ್ ಚಾಕೊಲೇಟ್, ರೈಸ್ ಬಬಲ್ಸ್ ಮತ್ತು ಕೊಬ್ಬರಿ ಎಣ್ಣೆ. ರೈಸ್ ಬಬಲ್ಸ್ ಸಿಗದಿದ್ದರೆ ಉಪ್ಪಿನಂಶ ಕಡಿಮೆ ಇರುವ ಮಂಡಕ್ಕಿ ಬಳಸಬಹುದೆಂದು ನನ್ನ ಅನಿಸಿಕೆ; ಆದರೆ ನಾನಿನ್ನೂ ಮಂಡಕ್ಕಿ ಬಳಸಿ ನೋಡಿಲ್ಲ. 
ನಮ್ಮ ಮನೆಯಲ್ಲಿ ಮಕ್ಕಳಿಗೆ (ಮತ್ತು ದೊಡ್ಡವರಿಗೂ ಸಹ) ಈ ಸ್ನ್ಯಾಕ್ಸ್ ಬಹಳ ಇಷ್ಟ. ಗರಿಗರಿಯಾದ ಈ ಚಾಕೊಲೇಟ್ ಟ್ರೀಟ್ ಮಕ್ಕಳ ಪಾರ್ಟಿ, ಫುಡ್ ಸ್ಟಾಲ್, ಪ್ರವಾಸ, ಪಿಕ್ನಿಕ್ ಎಲ್ಲಕ್ಕೂ ಚೆನ್ನಾಗಿರುತ್ತದೆ. 


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಸುಲಭ 
ಸರ್ವಿಂಗ್ಸ್: 27 ಚಿಕ್ಕ ಚಾಕೊಲೇಟ್ ಕಪ್ ಗಳು 

ಬೇಕಾಗುವ ಸಾಮಗ್ರಿಗಳು:
  • ಕುಕಿಂಗ್ ಚಾಕೊಲೇಟ್ (ನಾನು ಡಾರ್ಕ್ ಕುಕಿಂಗ್ ಚಾಕೊಲೇಟ್ ಬಳಸಿದ್ದೇನೆ) - 100 ಗ್ರಾಂ 
  • ರೈಸ್ ಬಬಲ್ಸ್ (ಬಿಳಿಯದು) - 2 1/2 ಕಪ್ 
  • ಕೊಬ್ಬರಿ ಎಣ್ಣೆ (ಅಥವಾ ಕೋಫಾ) - 1 1/2 ಟೇಬಲ್ ಚಮಚ 


ತಯಾರಿಸುವ ವಿಧಾನ:
  • ಡಬಲ್ ಬಾಯ್ಲರ್ ನಲ್ಲಿ ಕುಕಿಂಗ್ ಚಾಕೊಲೇಟ್ ಮತ್ತು ಕೊಬ್ಬರಿ ಎಣ್ಣೆ ಹಾಕಿ ಬಿಸಿಗಿಡಿ. ಡಬಲ್ ಬಾಯ್ಲರ್ ಇಲ್ಲದಿದ್ದರೆ ಒಂದು ಅಗಲದ ಬಾಣಲೆಯಲ್ಲಿ ಕಾಲುಭಾಗದವರೆಗೆ ನೀರು ಹಾಕಿ ಬಿಸಿಗಿಡಿ. ಈ ಪಾತ್ರೆಯೊಳಗೆ ಇನ್ನೊಂದು ಪಾತ್ರೆಯನ್ನಿಟ್ಟು ಅದರಲ್ಲಿ ಕುಕಿಂಗ್ ಚಾಕೊಲೇಟ್ ಮತ್ತು ಕೊಬ್ಬರಿ ಎಣ್ಣೆ ಹಾಕಿ ಬಿಸಿಗಿಡಿ. 
  • ಮಿಶ್ರಣವನ್ನು ಆಗಾಗ ಕಲಕುತ್ತಿರಿ. 
  • ಚಾಕೊಲೇಟ್ ಎಣ್ಣೆ ಕರಗಿ ನುಣ್ಣಗಿನ ಪೇಸ್ಟ್ ನಂತಾದಾಗ ಇದಕ್ಕೆ ರೈಸ್ ಬಬಲ್ಸ್ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
  • ಮಿಶ್ರಣವನ್ನು ಒಂದು ಅಗಲದ ಪ್ಲೇಟ್ ನಲ್ಲಿ ಸ್ವಲ್ಪ ಅಂತರದಲ್ಲಿ ಗೋಪುರದಂತೆ ಒಂದೊಂದು ದೊಡ್ಡ ಚಮಚದಷ್ಟು ಹಾಕುತ್ತ ಹೋಗಿ. ನಾನು ಇದಕ್ಕೆ ಚಿಕ್ಕ ಕಪ್ ಕೇಕ್ ತಯಾರಿಸುವ ಟ್ರೇ ಬಳಸಿದ್ದೇನೆ. 
  • ಚಾಕೊಲೇಟ್ ಮಿಶ್ರಣ ಹಾಕಿದ ಟ್ರೇಯನ್ನು ಫ್ರಿಜ್ ನಲ್ಲಿಟ್ಟು 10 ನಿಮಿಷ ಸೆಟ್ ಆಗಲು ಬಿಡಿ. 
  • ಟ್ರೇ ಯನ್ನು ಫ್ರಿಜ್ ನಿಂದ ಹೊರತೆಗೆದು ಟ್ರೇಯ ತಳವನ್ನು ಒಂದು ಅಥವಾ ಎರಡು ಸೆಕೆಂಡ್ ಕಾಲ ಬಿಸಿಮಾಡಿದರೆ ಚಾಕೋ ಕ್ರಿಸ್ಪೀಸ್ ಸುಲಭದಲ್ಲಿ ತಳ ಬಿಡುತ್ತವೆ. 
  • ತಯಾರಾದ ಚಾಕೊಲೇಟ್ ಕ್ರಾಕಲ್ಸ್ ನ್ನು ಬೇಕಾದಷ್ಟು ತಿಂದು, ಉಳಿದದ್ದನ್ನು ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ. 



Thursday, 30 April 2020

ಹುಣಸೆಹಣ್ಣಿನ ಅಪ್ಪೆಹುಳಿ | ಸಿಹಿ - ಹುಳಿ ಅಪ್ಪೆಹುಳಿ

ಅಪ್ಪೆಹುಳಿ - ಇದು ಮಲೆನಾಡಿನ ಹವ್ಯಕರ ಮನೆಗಳಲ್ಲಿ ಸಾಮಾನ್ಯವಾಗಿ ತಯಾರಿಸುವ ಒಂದು ಮೇಲೋಗರ.  ಹವ್ಯಕರಿಗೂ ಅಪ್ಪೆಹುಳಿಗೂ ಅವಿನಾಭಾವ ಸಂಬಂಧ. ಬಹಳ ಸುಲಭದಲ್ಲಿ ತಯಾರಸಬಹುದಾದ ಈ ಮೇಲೋಗರ ಊಟಕ್ಕೆ ರುಚಿ. ಕೆಲವರು ಅಪ್ಪೆಹುಳಿಯನ್ನು ಕುಡಿಯಲೂ ಇಷ್ಟಪಡುತ್ತಾರೆ.
ಒಳ್ಳೆಯ ಪರಿಮಳ ಇರುವ ಮಾವಿನಕಾಯಿ ಅಪ್ಪೆಹುಳಿಗೆ ಉತ್ತಮ. ಹುಳಿ ಅಂಶ ಇರುವ ಮಾವಿನಕಾಯಿ, ಕಂಚಿಕಾಯಿ, ನಿಂಬೆ, ಕರಿಮದ್ದಲು (ಸ್ಟಾರ್ ಫ್ರೂಟ್), ಹುಣಸೆಕಾಯಿ / ಹಣ್ಣು ಇವೆಲ್ಲದರಿಂದಲೂ ಅಪ್ಪೆಹುಳಿ ತಯಾರಿಸಬಹುದು.
ನಾನು ಈಗ ಶೇರ್ ಮಾಡುತ್ತಿರುವುದು ಹುಣಸೆಹಣ್ಣಿನ ಅಪ್ಪೆಹುಳಿ ತಯಾರಿಸುವ ವಿಧಾನ. ಸ್ವಲ್ಪ ಸಿಹಿ ಇರುವ ಹೊಸ ಹುಣಸೆಹಣ್ಣು ಅಪ್ಪೆಹುಳಿಗೆ ಚೆನ್ನಾಗಿರುತ್ತದೆ. ಹುಣಸೆಹಣ್ಣಿನ ಅಪ್ಪೆಹುಳಿ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಸುಲಭ 
ಸರ್ವಿಂಗ್ಸ್: 5 - 6 ಜನರಿಗೆ ಆಗುತ್ತದೆ  

ಬೇಕಾಗುವ ಸಾಮಗ್ರಿಗಳು:
  • ಹುಣಸೆಹಣ್ಣು - 2 ಟೇಬಲ್ ಚಮಚ 
  • ನೀರು - 1 1/4 ಕಪ್ 
  • ಉಪ್ಪು - 1 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ಸಕ್ಕರೆ - 1 ಟೇಬಲ್ ಚಮಚ ಅಥವಾ ರುಚಿಗೆ ತಕ್ಕಷ್ಟು 
 - ಒಗ್ಗರಣೆಗೆ:
  • ಎಣ್ಣೆ - 2 ಟೀ ಚಮಚ 
  • ಒಣಮೆಣಸು - ಒಂದು ಮೆಣಸಿನ ಅರ್ಧಭಾಗ 
  • ಸಾಸಿವೆ - 3/4 ಟೀ ಚಮಚ  
  • ಇಂಗು - ಚಿಟಿಕೆ 
  • ಅರಿಶಿನ - ಚಿಟಿಕೆ 
  • ಹಸಿಮೆಣಸು - 1 
  • ಕರಿಬೇವು - 5ರಿಂದ 6 ಎಲೆಗಳು 
  • ಜಜ್ಜಿದ ಬೆಳ್ಳುಳ್ಳಿ - 1 ಟೀ ಚಮಚ 

ತಯಾರಿಸುವ ವಿಧಾನ:
  • ಹುಣಸೆಹಣ್ಣಿಗೆ ಸ್ವಲ್ಪ ನೀರು ಸೇರಿಸಿ 10 ನಿಮಿಷ ನೆನೆಸಿ. ಬೆಚ್ಚಗಿನ ನೀರು ಸೇರಿಸಿದರೆ ಬೇಗ ನೆನೆದು ಮೆತ್ತಗಾಗುತ್ತದೆ. 
  • ನೆನೆದ ಹುಣಸೆಹಣ್ಣನ್ನು ಹಿಂಡಿ ರಸ ತೆಗೆಯಿರಿ. ಇದಕ್ಕೆ ಇನ್ನೂ ಸ್ವಲ್ಪ ನೀರು ಸೇರಿಸಿ 1 ಕಪ್ ನಷ್ಟು ಹದವಾಗಿ ಹುಳಿ ಇರುವ ಮಿಶ್ರಣ ತಯಾರಿಸಿಕೊಳ್ಳಿ. 
  • ಹುಣಸೆ ನೀರಿಗೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ ಸೇರಿಸಿ. ಈ ಅಪ್ಪೆಹುಳಿ ಸಿಹಿ - ಹುಳಿ ಮಿಶ್ರಿತವಾಗಿದ್ದರೆ ಚೆನ್ನಾಗಿರುತ್ತದೆ. 
  • ಒಗ್ಗರಣೆ ಸೌಟು ಅಥವಾ ಚಿಕ್ಕ ಬಾಣಲೆಯಲ್ಲಿ ಎಣ್ಣೆ ಬಿಸಿಗಿಡಿ. ಎಣ್ಣೆ ಸ್ವಲ್ಪ ಬಿಸಿಯಾದಾಗ ಒಣಮೆಣಸಿನ ಚೂರು, ಸಾಸಿವೆ, ಇಂಗು ಸೇರಿಸಿ ಕೈಯಾಡಿಸಿ. 
  • ಸಾಸಿವೆ ಸಿಡಿಯತೊಡಗಿದಾಗ ಚಿಟಿಕೆ ಅರಿಶಿನ, ಕರಿಬೇವು, ಹಸಿಮೆಣಸು ಹಾಕಿ ಒಮ್ಮೆ ಕೈಯಾಡಿಸಿ, ನಂತರ ಜಜ್ಜಿದ ಬೆಳ್ಳುಳ್ಳಿ ಸೇರಿಸಿ ಪರಿಮಳ ಬರುವಂತೆ ಒಂದು ನಿಮಿಷ ಹುರಿಯಿರಿ. 
  • ಬಿಸಿಬಿಸಿ ಒಗ್ಗರಣೆಯನ್ನು ಮೊದಲೇ ತಯಾರಿಸಿಟ್ಟ ಹುಣಸೆ ರಸಕ್ಕೆ ಸೇರಿಸಿ. ಮೆಣಸು ಹಾಗೂ ಕರಿಬೇವನ್ನು ಕೈಬೆರಳಿನಿಂದ ಸ್ವಲ್ಪ ಹಿಚುಕಿ ಚೆನ್ನಾಗಿ ಮಿಕ್ಸ್ ಮಾಡಿ. 
  • ರುಚಿಯಾದ ಅಪ್ಪೆಹುಳಿಯನ್ನು ಅನ್ನದೊಡನೆ ಸರ್ವ್ ಮಾಡಿ.   

Click here for English version

Sunday, 26 April 2020

ಬದನೇಕಾಯಿ ಹಿಂಡಿ | ಬದನೇಕಾಯಿ ಸುಟ್ಟ ಬಜ್ಜಿ (ಗೊಜ್ಜು)। ಬದನೇಕಾಯಿ ಬರ್ತ

ವರ್ಷದ ಎಲ್ಲ ಕಾಲದಲ್ಲೂ ಸಿಗುವ ತರಕಾರಿಗಳಲ್ಲೊಂದಾದ ಬದನೇಕಾಯಿ ಅನೇಕ ಬಗೆಯ ಅಡುಗೆಗಳನ್ನು ತಯಾರಿಸಲು ಉಪಯುಕ್ತ. ಆರೋಗ್ಯಕ್ಕೆ ಅಷ್ಟೇನೂ ಒಳ್ಳೆಯದಲ್ಲದಿದ್ದರೂ ಅಡುಗೆಗಂತೂ ಈ ತರಕಾರಿ ತುಂಬ ರುಚಿ! ಬದನೆಕಾಯಿಯಲ್ಲೂ ಅನೇಕ ಬಗೆ; ಯಾವ ಬಗೆಯ ಬದನೇಕಾಯಿ ಮನೆಗೆ ಬಂದಿದೆ ಎನ್ನುವುದನ್ನು ನೋಡಿಕೊಂಡು ಅಡುಗೆ ನಿರ್ಧರಿಸಬೇಕು. ಉದಾಹರಣೆಗೆ: ದೊಡ್ಡ ಬದನೇಕಾಯಿ ತಂದಾಗ ನಾನು ತಯಾರಿಸುವ ಸೈಡ್ ಡಿಶ್ ಗಳಲ್ಲಿ ಬದನೇಕಾಯಿ ಸುಟ್ಟ ಗೊಜ್ಜು ಕೂಡ ಒಂದು. 
ನನ್ನ ತಂಗಿಗೆ ಬದನೇಕಾಯಿ ಹಿಂಡಿ / ಸುಟ್ಟ ಬಜ್ಜಿ ತುಂಬಾ ಇಷ್ಟ. ಬದನೇಕಾಯಿ ಹಿಂಡಿಯನ್ನು ತಯಾರಿಸಿದ್ದಾರೆಂದರೆ ಅವಳ ಊಟವೆಲ್ಲ ಅದರಲ್ಲೇ ಮುಗಿಯುತ್ತದೆ. ಅವಳಿಗೆ ಇಷ್ಟವಾದ್ದರಿಂದ ಈ ಬಜ್ಜಿಯನ್ನು ತಯಾರಿಸುವುದರಲ್ಲೂ ಅವಳು ಎಕ್ಸ್ಪರ್ಟ್! ತಂಗಿಯಿಂದ ಕಲಿತ ಬದನೇಕಾಯಿ ಹಿಂಡಿ ಅಥವಾ ಸುಟ್ಟ ಬಜ್ಜಿಯ ರೆಸಿಪಿ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
  • ಬದನೇಕಾಯಿ - 1 (ಮೀಡಿಯಮ್ ಸೈಜಿನದು)  
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಆಮಚೂರ್ ಪೌಡರ್ (ಹುಳಿಪುಡಿ) - 1 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ಸಕ್ಕರೆ / ಬೆಲ್ಲ - ದೊಡ್ಡ ಚಿಟಿಕೆ  
  • ಈರುಳ್ಳಿ (ಚಿಕ್ಕದು) - 1
  • ತೆಂಗಿನತುರಿ (ಬೇಕಿದ್ದರೆ) - 2 ಅಥವಾ 3 ಟೇಬಲ್ ಚಮಚ  
 - ಒಗ್ಗರಣೆಗೆ:
  • ಎಣ್ಣೆ - 1 1/2 ಟೇಬಲ್ ಚಮಚ 
  • ಒಣಮೆಣಸು - 1 
  • ಉದ್ದಿನಬೇಳೆ - 1 ಟೀ ಚಮಚ
  • ಇಂಗು - ದೊಡ್ಡ ಚಿಟಿಕೆ 
  • ಸಾಸಿವೆ - 1/2 ಟೀ ಚಮಚ  
  • ಅರಿಶಿನ - ಚಿಟಿಕೆ 
  • ಹಸಿಮೆಣಸು - 1 
  • ಕರಿಬೇವು - 5 ಅಥವಾ 6 ಎಲೆಗಳು 

ತಯಾರಿಸುವ ವಿಧಾನ:
  • ಬದನೆಕಾಯಿಯನ್ನು ಒಲೆ ಅಥವಾ ಸ್ಟವ್ ನ ಬೆಂಕಿಯಲ್ಲಿ ಮೆತ್ತಗಾಗುವಂತೆ ಸುಟ್ಟುಕೊಳ್ಳಿ. ಸಣ್ಣ ಉರಿಯಲ್ಲಿ ಬದನೇಕಾಯಿ ಸುಡಲು ಸುಮಾರು 15 ನಿಮಿಷ ಬೇಕು. 
  • ಸುಟ್ಟ ಬದನೇಕಾಯಿ ಸ್ವಲ್ಪ ತಣ್ಣಗಾದ ನಂತರ ಇದರ ಹೊರಭಾಗದ ಕಪ್ಪಗಿನ ಸಿಪ್ಪೆಯನ್ನು ತೆಗೆದುಬಿಡಿ. ಕೈಯನ್ನು ಆಗಾಗ ನೀರಿನಲ್ಲಿ ಅದ್ದಿಕೊಳ್ಳುವುದರಿಂದ ಕಪ್ಪಗಿನ ಸಿಪ್ಪೆ ಬದನೇಕಾಯಿ ಮಿಶ್ರಣಕ್ಕೆ ಸೇರುವುದು ತಪ್ಪುತ್ತದೆ. 
  • ಸಿಪ್ಪೆ ತೆಗೆದ ಬದನೆಕಾಯಿಯನ್ನು ಸೌಟಿನ ಸಹಾಯದಿಂದ ಚೆನ್ನಾಗಿ ಮ್ಯಾಶ್ ಮಾಡಿಕೊಳ್ಳಿ. 
  • ಒಂದು ಚಿಕ್ಕ ಬಾಣಲೆ ಅಥವಾ ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಬಿಸಿಮಾಡಿ ಉದ್ದಿನಬೇಳೆ, ಒಣಮೆಣಸು, ಇಂಗು, ಸಾಸಿವೆ ಸೇರಿಸಿ ಹುರಿಯಿರಿ. ಸಾಸಿವೆ ಸಿಡಿಯತೊಡಗಿದಾಗ ಅರಿಶಿನ, ಹಸಿಮೆಣಸಿನ ಚೂರುಗಳು, ಕರಿಬೇವು ಸೇರಿಸಿ ಹುರಿದು ಇದನ್ನು ಬದನೇಕಾಯಿ ಮಿಶ್ರಣಕ್ಕೆ ಸೇರಿಸಿ. ಮೆಣಸಿನ ಚೂರುಗಳನ್ನು ಮ್ಯಾಶ್ ಮಾಡಿ. 
  • ರುಚಿಗೆ ತಕ್ಕಷ್ಟು ಉಪ್ಪು, ಆಮಚೂರ ಪೌಡರ್ ಹಾಗೂ ಒಂದು ದೊಡ್ಡ ಚಿಟಿಕೆಯಷ್ಟು ಸಕ್ಕರೆ ಸೇರಿಸಿ ಮಿಕ್ಸ್ ಮಾಡಿ. 
  • ಸರ್ವ್ ಮಾಡುವ ಮೊದಲು ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಂಡು ಬದನೇಕಾಯಿ ಮಿಶ್ರಣಕ್ಕೆ ಸೇರಿಸಿ. 
  • ಬೇಕಿದ್ದರೆ ಸ್ವಲ್ಪ ತೆಂಗಿನತುರಿಯನ್ನೂ ಸೇರಿಸಬಹುದು. ನಾನು ತೆಂಗಿನತುರಿ ಸೇರಿಸಿಲ್ಲ. 

ಟಿಪ್ಸ್:
  • ಬದನೇಕಾಯಿ ಹಿಂಡಿಯನ್ನು ಜಾಸ್ತಿ ತಯಾರಿಸಿದ್ದರೆ ಸರ್ವ್ ಮಾಡುವಷ್ಟನ್ನೇ ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಅದಕ್ಕೆ ಮಾತ್ರ ಈರುಳ್ಳಿ ಸೇರಿಸಿ. ಈ ಸೈಡ್ ಡಿಶ್ ಗೆ ಈರುಳ್ಳಿಯನ್ನು ಫ್ರೆಶ್ ಆಗಿ ಸೇರಿಸಿದಾಗಲೇ ಚೆನ್ನ. 


Friday, 24 April 2020

ಒಣಗಿಸಿದ ಹಲಸಿನ ತೊಳೆ । ಹಲಸಿನ ಸೊಳೆ ಒಣಗಿಸುವ ವಿಧಾನ

ಬೇಸಿಗೆ ಸಮಯ ಬಂದಾಗ ನಮ್ಮೂರ ಕಡೆ ಹಲಸಿನ ಕಾಯಿ ಮತ್ತು ಹಲಸಿನ ಹಣ್ಣಿನ ಖಾದ್ಯಗಳ ತಯಾರಿ ಜೋರು. ನನ್ನ ತವರುಮನೆಯಲ್ಲಿ ಹಲಸಿನ ಕಾಯಿಯ ಚಿಪ್ಸ್, ಹಪ್ಪಳ ಮಾಡುವ ಸಮಯದಲ್ಲಿ ಹಲಸಿನ ತೊಳೆಗಳನ್ನು ಚೂರು ಮಾಡಿ ಒಣಗಿಸಿ ಇಟ್ಟುಕೊಳ್ಳುತ್ತಾರೆ. ಇದು ಸೀಜನ್ ಮುಗಿದ ನಂತರ ಯಾವಾಗಲಾದರೊಮ್ಮೆ ಹಲಸಿನ ಮೇಲೋಗರ ಮಾಡಲು ಚೆನ್ನಾಗಿರುತ್ತದೆ. ಹಲಸಿನ ತೊಳೆ ಒಣಗಿಸುವ ವಿಧಾನ ಇಂತಿದೆ: 


ತಯಾರಿಸಲು ಬೇಕಾಗುವ ಸಮಯ: 3 ಘಂಟೆ 
ಒಣಗಲು ಬೇಕಾಗುವ ಸಮಯ: 1 ವಾರ 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 

ಬೇಕಾಗುವ ಸಾಮಗ್ರಿಗಳು:

  • ಬಲಿತ ಹಲಸಿನ ಕಾಯಿ - 1
  • ಉಪ್ಪು - ರುಚಿಗೆ ತಕ್ಕಷ್ಟು 
ತಯಾರಿಸುವ ವಿಧಾನ:

  • ಹಲಸಿನ ಕಾಯಿ ಕತ್ತರಿಸಿ, ತೊಳೆಗಳನ್ನು ಬೇರ್ಪಡಿಸಿಕೊಳ್ಳಿ. 
  • ತೊಳೆಗಳನ್ನು ಚಿಕ್ಕ ಚೂರುಗಳಾಗಿ ಕತ್ತರಿಸಿಕೊಳ್ಳಿ. 
  • ಕತ್ತರಿಸಿದ ಹಲಸಿನ ತೊಳೆಗಳನ್ನು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಕಲಸಿ, 1 - 2 ಘಂಟೆಕಾಲ ನೆನೆಯಲು ಬಿಡಿ. 
  • ನಂತರ ಹೆಚ್ಚಿನ ನೀರನ್ನು ಹಿಂಡಿ ತೆಗೆದು, ತೊಳೆಗಳನ್ನು ಒಂದು ಪ್ಲೇಟ್ ನಲ್ಲಿ ಹರವಿ ಮೇಲಿನಿಂದ ಬಟ್ಟೆ ಮುಚ್ಚಿ ಬಿಸಿಲಿನಲ್ಲಿ ಒಣಗಿಸಿ. 
  • 5 - 6 ದಿನ ಅಥವಾ ಹಲಸಿನ ತೊಳೆ ಚೂರುಗಳು ನೀರಿನಂಶವೆಲ್ಲ ಒಣಗಿ ಗರಿಯಾಗುವತನಕ ಬಿಸಿಲಿನಲ್ಲಿ ಒಣಗಿಸಿ ನಂತರ ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ. 
  • ಅಡುಗೆಗೆ ಬಳಸಲು ಅರ್ಧ ಘಂಟೆ ಮೊದಲು ಬೇಕಾದಷ್ಟು ಹಲಸಿನ ಚೂರುಗಳನ್ನು ನೀರಿನಲ್ಲಿ ನೆನೆಸಿಟ್ಟು ಬಳಸಿ. 
  • ಒಣಗಿಸಿಟ್ಟ ಹಲಸಿನ ತೊಳೆಯಿಂದ ತಯಾರಿಸುವ ಅಡುಗೆಗಳನ್ನು ಮುಂದಿನ ಪೋಸ್ಟ್ ಗಳಲ್ಲಿ ನಿಮ್ಮೊಂದಿಗೆ ಹಂಚಿಕೊಳ್ಳುತ್ತೇನೆ. 


Click here for English version 

Friday, 17 April 2020

ಸಂಡಿಗೆ ಮೆಣಸು । ಮಜ್ಜಿಗೆ ಮೆಣಸು (ಬಾಳಕ)

ನಾವು ಕಳೆದ ವರ್ಷ ಊರಿಗೆ ಹೋದಾಗ ನನ್ನ ಅಕ್ಕ ಅವರ ಮನೆಯಲ್ಲಿ ತಯಾರಿಸಿದ ಸಂಡಿಗೆ ಮೆಣಸನ್ನು ಪ್ಯಾಕ್ ಮಾಡಿ ಕಳಿಸಿದ್ದಳು. ಊರಲ್ಲಿ ಸಿಗುವ ಗೋಕರ್ಣ ಮೆಣಸು ಸಂಡಿಗೆ ಮೆಣಸು ತಯಾರಿಸಲು ಬಹಳ ಚೆನ್ನಾಗಿರುತ್ತದೆ. ಖಾರ ಬಹಳ ಕಡಿಮೆ ಇದ್ದುದರಿಂದ ನಮ್ಮ ಮನೆಯಲ್ಲಿ ಮಕ್ಕಳಿಗೂ ಈ ಮೆಣಸು ಇಷ್ಟವಾಯಿತು. ಮಾರ್ಕೆಟ್ ನಿಂದ ಜಾಸ್ತಿ ಮೆಣಸನ್ನು ತಂದಾಗ ಅಕ್ಕನ ಬಳಿ ರೆಸಿಪಿ ಕೇಳಿಕೊಂಡು ನಾನೂ ಸ್ವಲ್ಪ ಸಂಡಿಗೆ ಮೆಣಸು ತಯಾರಿಸಿದೆ. ಊರಿನ ಮೆಣಸಿಗಿಂತ ಸ್ವಲ್ಪ ಖಾರವೆನ್ನಿಸಿದರೂ, ಸಂಡಿಗೆ ಮೆಣಸು ಚೆನ್ನಾಗಿ ಬಂದಿವೆ.
ಸಂಡಿಗೆ ಮೆಣಸು ರೆಸಿಪಿ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 45 ನಿಮಿಷಗಳು
ಒಣಗಿಸಲು ಬೇಕಾಗುವ ಸಮಯ: 1 ವಾರ
ಡಿಫಿಕಲ್ಟಿ ಲೆವೆಲ್: ಕಷ್ಟಕರ

ಬೇಕಾಗುವ ಸಾಮಗ್ರಿಗಳು:
  • ಹಸಿಮೆಣಸು - 1/2 kg (ಖಾರ ಕಡಿಮೆ ಇದ್ದರೆ ಒಳ್ಳೆಯದು)
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಗಟ್ಟಿ ಮೊಸರು ಅಥವಾ ದಪ್ಪ ಮಜ್ಜಿಗೆ - 2 ಕಪ್ (ಅಂದಾಜು)
  • ಉದ್ದಿನಬೇಳೆ - 2 ಟೀ ಚಮಚ 
  • ಮೆಂತ್ಯ - 4 ಅಥವಾ 5 ಕಾಳುಗಳು 
  • ಜೀರಿಗೆ - 1/2 ಟೀ ಚಮಚ 
  • ಇಂಗು - 1/4 ಟೀ ಚಮಚ 
  • ನಿಂಬೆರಸ (ಬೇಕಿದ್ದರೆ) - ರುಚಿಗೆ ತಕ್ಕಷ್ಟು 
  • ನೀರು - ಸ್ವಲ್ಪ 

ತಯಾರಿಸುವ ವಿಧಾನ:
  • ಹಸಿಮೆಣಸನ್ನು ನೀರಿನಲ್ಲಿ ಸ್ವಚ್ಛವಾಗಿ ತೊಳೆದುಕೊಳ್ಳಿ. 
  • ಒಂದೊಂದೇ ಹಸಿಮೆಣಸನ್ನು ತೆಗೆದುಕೊಂಡು ಚಾಕುವಿನಿಂದ ಮೆಣಸಿನ ಮಧ್ಯಭಾಗದಲ್ಲಿ ಮಾತ್ರ ಸೀಳು ಮಾಡಿಕೊಳ್ಳಿ. ಹೀಗೆ ಸೀಳುವುದರಿಂದ ಮಜ್ಜಿಗೆ ಮಿಶ್ರಣವನ್ನು ಹೀರಿಕೊಳ್ಳಲು ಸುಲಭವಾಗುತ್ತದೆ.    
  • ಒಂದು ಪಾತ್ರೆಯಲ್ಲಿ 4 - 5 ಕಪ್ ಅಥವಾ ಎಲ್ಲ ಹಸಿಮೆಣಸು ಮುಳುಗುವಷ್ಟು ನೀರು ಹಾಕಿಕೊಳ್ಳಿ. 
  • ನೀರು ಬಿಸಿಯಾಗಿ ಕುದಿಯತೊಡಗಿದಾಗ ಇದಕ್ಕೆ ಸೀಳಿದ ಹಸಿಮೆಣಸನ್ನು ಹಾಕಿ ಕೈಯಾಡಿಸಿ. ಅರ್ಧ ನಿಮಿಷದ ನಂತರ ನೀರನ್ನು ಬಸಿದು, ಹಸಿಮೆಣಸನ್ನು ಒಣ ಬಟ್ಟೆ ಅಥವಾ ಪೇಪರ್ ಟವೆಲ್ ಮೇಲೆ 15 ನಿಮಿಷ ಹರವಿ.   
  • ಹಸಿಮೆಣಸನ್ನು ಒಂದು ಪ್ಲೇಟ್ ನಲ್ಲಿ ಹರವಿ ಮೇಲಿನಿಂದ ಒಂದು ತೆಳ್ಳಗಿನ ಬಟ್ಟೆ ಮುಚ್ಚಿ ಎರಡು ದಿನ ಬಿಸಿಲಿನಲ್ಲಿ ಒಣಗಿಸಿ, ನಂತರ ಮಜ್ಜಿಗೆಯಲ್ಲಿ ನೆನೆಸಿ. 

ಮಜ್ಜಿಗೆ ತಯಾರಿಕೆ: ಎರಡನೇ ದಿನ ಈ ಕೆಳಗಿನಂತೆ ಮಜ್ಜಿಗೆ ತಯಾರಿಸಿಕೊಳ್ಳಿ: 
ಉದ್ದಿನಬೇಳೆ, ಮೆಂತ್ಯ, ಇಂಗು ಮತ್ತು ಜೀರಿಗೆಯನ್ನು ಪರಿಮಳ ಬರುವಂತೆ ಹುರಿದು ನುಣ್ಣಗೆ ಪುಡಿಮಾಡಿಕೊಳ್ಳಿ.
ಈ ಮಸಾಲೆ ಪುಡಿಯನ್ನು ಮೊಸರಿಗೆ ಸೇರಿಸಿ. ಮೊಸರನ್ನು ಮಿಕ್ಸಿಯಲ್ಲಿ ಎರಡು ನಿಮಿಷ ತಿರುವಿಕೊಳ್ಳಿ.
ತಯಾರಾದ ದಪ್ಪನೆಯ ಮಜ್ಜಿಗೆಗೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ.
ಮೊಸರು ಹುಳಿ ಇದ್ದಷ್ಟು ಉತ್ತಮ; ಹುಳಿ ಕಡಿಮೆ ಇದ್ದರೆ ಸ್ವಲ್ಪ ನಿಂಬೆರಸ ಸೇರಿಸಿ. 
  • ಎರಡು ದಿನ ಬಿಸಿಲಿನಲ್ಲಿ ಒಣಗಿಸಿದ ಹಸಿಮೆಣಸನ್ನು ಎರಡನೇ ದಿನ ಸಂಜೆ ಮಜ್ಜಿಗೆ ಮಿಶ್ರಣದಲ್ಲಿ ನೆನೆಸಿ. 
  • ಮಾರನೇದಿನ ಬೆಳಿಗ್ಗೆ ಮೆಣಸನ್ನು ಮಜ್ಜಿಗೆಯಿಂದ ತೆಗೆದು ಪ್ಲೇಟ್ ನಲ್ಲಿ ಹರವಿ, ತೆಳ್ಳಗಿನ ಬಟ್ಟೆ ಮುಚ್ಚಿ ಬಿಸಿಲಿನಲ್ಲಿ ಒಣಗಿಸಿ. ಮಜ್ಜಿಗೆಯನ್ನು ಹಾಗೇ ಇಡಿ. 
  • ಸಂಜೆ ಪುನಃ ಮೆಣಸನ್ನು ಮಜ್ಜಿಗೆ ಮಿಶ್ರಣದಲ್ಲಿ ನೆನೆಸಿಡಿ. ಮಜ್ಜಿಗೆ ಮಿಶ್ರಣ ಖಾಲಿಯಾಗುವವರೆಗೂ ಹೀಗೇ ಮಾಡಿ. 
  • ಮಜ್ಜಿಗೆಯೆಲ್ಲ ಖಾಲಿಯಾಗಿ ಮೆಣಸು ಒಣಗಿ ಗರಿಗರಿಯಾಗುವವರೆಗೂ ಚೆನ್ನಾಗಿ ಒಣಗಿಸಿ. 
  • ತಯಾರಾದ ಸಂಡಿಗೆ ಮೆಣಸನ್ನು ಗಾಳಿಯಾಡದ ಡಬ್ಬದಲ್ಲಿ ಹಾಕಿಟ್ಟರೆ ವರ್ಷಗಟ್ಟಲೆ ಚೆನ್ನಾಗಿರುತ್ತದೆ. 

ಮೆಣಸನ್ನು ಕರಿಯುವ ಬಗೆ: 
  • ಒಂದು ಚಿಕ್ಕ ಬಾಣಲೆಯಲ್ಲಿ 3 - 4 ಚಮಚ ಎಣ್ಣೆ ಬಿಸಿಮಾಡಿ ಇದಕ್ಕೆ 5 - 6 ಸಂಡಿಗೆ ಮೆಣಸು ಹಾಕಿ ಸಣ್ಣ ಉರಿಯಲ್ಲಿ ಕೆಂಪಗೆ ಹುರಿಯಿರಿ. 
  • ಅನ್ನ - ಮೊಸರಿನೊಡನೆ ಸಂಡಿಗೆ ಮೆಣಸು ಬಹಳ ರುಚಿ! 


Monday, 13 April 2020

ಮೂಲಂಗಿ ಎಲೆಯ ತೇಪ್ಲಾ । ಮೂಲಂಗಿ ಎಲೆ ಪರೋಟ | ಮೂಲಂಗಿ ಎಲೆಯ ರೊಟ್ಟಿ

ಈ ವರ್ಷ ಬೇಸಿಗೆಯಲ್ಲಿ ನಮ್ಮ ಹಿತ್ತಿಲಲ್ಲಿ ಅನೇಕ ತರಕಾರಿಗಳನ್ನು ಬೆಳೆದಿದ್ದೆವು. ಬೀಜ ಹಾಕಿದಷ್ಟೂ ಮೂಲಂಗಿ ಗಿಡಗಳು ಹುಟ್ಟಿದ್ದವು. ಎಲ್ಲವೂ ಬೆಳೆಯುವಷ್ಟರಲ್ಲಿ ಕೋವಿಡ್ ಲಾಕ್ ಡೌನ್ ಶುರುವಾಯಿತು. ತರಕಾರಿಗಳ ಬೆಲೆ ಹೆಚ್ಚಾಗಿರುವ ಸಮಯದಲ್ಲಿ ಮನೆಯ ಹಿತ್ತಿಲಲ್ಲೇ ಬೆಳೆದ ತರಕಾರಿಗಳು ನಮ್ಮ ಗ್ರಾಸರಿ ಬಿಲ್ ನ್ನು ಸ್ವಲ್ಪ ಮಟ್ಟಿಗೆ ಕಡಿಮೆ ಮಾಡಿವೆ. ಇನ್ನೇನು, ಚಳಿಗಾಲ ಶುರುವಾಯಿತು. ಚಳಿಗಾಲ ಮುಗಿದಮೇಲೆ ನಮ್ಮ ಹಿತ್ತಿಲು ಪುನರಾರಂಭವಾಗಬೇಕು. 
ಮೂಲಂಗಿ ಎಲೆಗಳನ್ನು ಬಳಸಿ ತಯಾರಿಸಬಹುದಾದ ತೇಪ್ಲ ಅಥವಾ ಪರೋಟದ ರೆಸಿಪಿ ಇಲ್ಲಿದೆ:


ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಸರ್ವಿಂಗ್ಸ್: ಈ ಅಳತೆಯಿಂದ 10 - 11 ಪರೋಟಗಳನ್ನು ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:

  • ಮೂಲಂಗಿ ಎಲೆಗಳು - 1 ಚಿಕ್ಕ ಕಟ್ಟು 
  • ಗೋಧಿ ಹಿಟ್ಟು - 2 1/4 ಕಪ್ 
  • ಕಡ್ಲೆ ಹಿಟ್ಟು - 2 ಟೇಬಲ್ ಚಮಚ 
  • ಎಣ್ಣೆ - ಸ್ವಲ್ಪ 
  • ಕೊತ್ತಂಬರಿ ಜೀರಿಗೆ ಪುಡಿ - 1 ಟೀ ಚಮಚ 
  • ಗರಂ ಮಸಾಲೆ ಪುಡಿ - 1/2 ಟೀ ಚಮಚ 
  • ಅರಿಶಿನ - 1/4 ಟೀ ಚಮಚ 
  • ಅಚ್ಚಮೆಣಸಿನ ಪುಡಿ - 1 ಟೀ ಚಮಚ ಅಥವಾ ಖಾರಕ್ಕೆ ತಕ್ಕಷ್ಟು 
  • ಚಿಲ್ಲಿ ಫ್ಲೇಕ್ಸ್ (ಬೇಕಿದ್ದರೆ) - 1/2 ಟೀ ಚಮಚ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಸಕ್ಕರೆ - 1 1/2 ಟೀ ಚಮಚ 
  • ಆಮಚೂರ್ ಪೌಡರ್ - 1/3 ಟೀ ಚಮಚ 
  • ಬೆಚ್ಚಗಿನ ನೀರು - 1 ಕಪ್ 

ತಯಾರಿಸುವ ವಿಧಾನ:

  • ಮೂಲಂಗಿ ಎಲೆಗಳನ್ನು ನೀರಿನಲ್ಲಿ ಸ್ವಚ್ಛವಾಗಿ ತೊಳೆದು ಸಣ್ಣಗೆ ಹೆಚ್ಚಿಕೊಳ್ಳಿ. Pull Chopper ಬಳಸಿದರೆ ಹೆಚ್ಚುವುದು ಬಹಳ ಸುಲಭ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ 1 1/2 ಟೇಬಲ್ ಚಮಚದಷ್ಟು ಎಣ್ಣೆ ಬಿಸಿಗಿಡಿ. ಇದಕ್ಕೆ ಸಣ್ಣಗೆ ಹೆಚ್ಚಿದ ಮೂಲಂಗಿ ಎಲೆಗಳನ್ನು ಸೇರಿಸಿ 5 - 8 ನಿಮಿಷ ಅಥವಾ ಎಲೆಯ ಬಣ್ಣ ಬದಲಾಗುವವರೆಗೆ ಹುರಿಯಿರಿ.   
  • ಉರಿ ಆಫ್ ಮಾಡಿ ಮತ್ತು ಇದಕ್ಕೆ ಅರಿಶಿನ, ಕೊತ್ತಂಬರಿ - ಜೀರಿಗೆ ಪುಡಿ, ಗರಂ ಮಸಾಲೆ ಪುಡಿ, ಅಚ್ಚಮೆಣಸಿನ ಪುಡಿ, ಚಿಲ್ಲಿ ಫ್ಲೇಕ್ಸ್ ಸೇರಿಸಿ ಕೈಯಾಡಿಸಿ.
  • ನಂತರ ಇದಕ್ಕೆ ಗೋಧಿಹಿಟ್ಟು, ಕಡ್ಲೆ ಹಿಟ್ಟು, ರುಚಿಗೆ ತಕ್ಕಷ್ಟು ಉಪ್ಪು, ಆಮಚೂರ್ ಪೌಡರ್ ಮತ್ತು ಸಕ್ಕರೆ ಸೇರಿಸಿ ಮಿಕ್ಸ್ ಮಾಡಿ.
  • ಮಿಶ್ರಣಕ್ಕೆ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸುತ್ತ ಉಂಡೆ ಕಟ್ಟುವ ಹದಕ್ಕೆ ಹಿಟ್ಟನ್ನು ತಯಾರಿಸಿ.
  • ಮೆತ್ತಗಿನ ಆದರೆ ಕೈಗೆ ಅಂಟದ ಹಿಟ್ಟನ್ನು ಒಮ್ಮೆ ನಾದಿ, ಮೇಲಿನಿಂದ ಎಣ್ಣೆ ಸವರಿ 5 ನಿಮಿಷ ಪಾತ್ರೆಯಲ್ಲಿ ಮುಚ್ಚಿಟ್ಟು ಸೆಟ್ ಆಗಲು ಬಿಡಿ. ಸಮಯ ಜಾಸ್ತಿ ಇಲ್ಲದಿದ್ದರೆ ಹಾಗೆಯೇ ತೇಪ್ಲ ತಯಾರಿಸಬಹುದು.
  • ತಯಾರಿಸಿದ ಹಿಟ್ಟಿನಿಂದ ನಿಂಬೆಗಾತ್ರದ 10 - 11 ಉಂಡೆಗಳನ್ನು ಮಾಡಿಕೊಳ್ಳಿ.
  • ಒಂದೊಂದೇ ಉಂಡೆಯನ್ನು ತೆಗೆದುಕೊಂಡು ಒಣ ಹಿಟ್ಟಿನಲ್ಲಿ ಒಮ್ಮೆ ಹೊರಳಿಸಿ ತೆಳ್ಳಗೆ ಗೋಲಾಕಾರಕ್ಕೆ ಲಟ್ಟಿಸಿ.
  • ಲಟ್ಟಿಸಿದ ತೇಪ್ಲ ವನ್ನು ಕಾದ ತವಾದ ಮೇಲೆ ಎರಡೂ ಕಡೆ ಎಣ್ಣೆ ಅಥವಾ ತುಪ್ಪ ಹಾಕಿ ಬೇಯಿಸಿ.
  • ಬಿಸಿ ಬಿಸಿ ತೇಪ್ಲ ವನ್ನು ನಿಮ್ಮಿಷ್ಟದ ಸೈಡ್ ಡಿಶ್ ನೊಡನೆ ಸರ್ವ್ ಮಾಡಿ. 
  • ಮೂಲಂಗಿ ಎಲೆಯ ತೇಪ್ಲಾ ಅಥವಾ ಪರೋಟ ಬೆಳಗಿನ ತಿಂಡಿ, ಲಂಚ್ ಬಾಕ್ಸ್, ಊಟ ಎಲ್ಲಕ್ಕೂ ಚೆನ್ನಾಗಿರುತ್ತದೆ. 

Thursday, 9 April 2020

ಪಾಲಕ್ ಸೊಪ್ಪಿನ ಕಟ್ನೆ । ಪಾಲಕ್ ಎಲೆಯ ಮೇಲೋಗರ

ಕಟ್ನೆ - ಇದು ಮಲೆನಾಡ ಕಡೆ ತಯಾರಿಸುವ ಒಂದು ವಿಶಿಷ್ಟ ಮೇಲೋಗರ. ಮಲೆನಾಡಿನಲ್ಲಿ ಸಿಗುವ ಕನ್ನೆಕುಡಿ ಎನ್ನುವ ಎಲೆಗಳನ್ನು ಬಳಸಿ ಈ ಮೇಲೋಗರ ತಯಾರಿಸಲಾಗುತ್ತದೆ. ಧೋ ಎಂದು ಮಳೆ ಸುರಿಯುವಾಗ ಬಿಸಿ ಅನ್ನದ ಜೊತೆಗೆ ಕಟ್ನೆ ಇದ್ದುಬಿಟ್ಟರೆ ಊಟದ ರುಚಿ ಇನ್ನೂ ಹೆಚ್ಚು. ಮಳೆಗಾಲದಲ್ಲಿ ಸಾಮಾನ್ಯವಾಗಿ ಬರುವ ಶೀತ, ಜ್ವರಕ್ಕೂ ಇದರ ಸೇವನೆ ಒಳ್ಳೆಯದು. ನಮಗೆ ಇಲ್ಲಿ ಕನ್ನೆಕುಡಿ ಸಿಗದಿದ್ದರೂ, ಪಾಲಕ್ ಸೊಪ್ಪು ಬಳಸಿ ಕಟ್ನೆ ತಯಾರಿಸುತ್ತಿರುತ್ತೇನೆ ನಾನು. ರುಚಿಕರವಾದ ಈ ಮೇಲೋಗರವನ್ನು ನೀವೂ ತಯಾರಿಸಿ ನೋಡಿ.. 


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಸರ್ವಿಂಗ್ಸ್: 5 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:

  • ಪಾಲಕ್ ಸೊಪ್ಪು - 1 ಕಟ್ಟು 
  • ಕಾಳುಮೆಣಸು - 10 ರಿಂದ 12 (ಖಾರಕ್ಕೆ ತಕ್ಕಂತೆ)
  • ಜೀರಿಗೆ - 1 ಟೀ ಚಮಚ 
  • ತೆಂಗಿನತುರಿ - 1 ಕಪ್ 
  • ಆಮಚೂರ್ ಪುಡಿ (ಹುಳಿಪುಡಿ) - 3/4 ಟೀ ಚಮಚ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ನಿಂಬೆರಸ - ರುಚಿಗೆ ತಕ್ಕಷ್ಟು (ಟಿಪ್ಸ್ ನೋಡಿ)
  • ಎಣ್ಣೆ - ಒಗ್ಗರಣೆಗೆ 
  • ಜಜ್ಜಿದ ಬೆಳ್ಳುಳ್ಳಿ - 1 1/2 ಟೀ ಚಮಚ 
  • ನೀರು - ಸ್ವಲ್ಪ 

ತಯಾರಿಸುವ ವಿಧಾನ:

  • ಪಾಲಕ್ ಸೊಪ್ಪನ್ನು ನೀರಿನಲ್ಲಿ ಸ್ವಚ್ಛವಾಗಿ ತೊಳೆದು, ಹೆಚ್ಚಿಕೊಳ್ಳಿ. 
  • ಒಂದು ಬಾಣಲೆಯಲ್ಲಿ 1 1/2 ಟೀ ಚಮಚದಷ್ಟು ಎಣ್ಣೆ ಬಿಸಿಮಾಡಿ. ಇದಕ್ಕೆ ಕಾಳುಮೆಣಸು ಸೇರಿಸಿ ಚಟಪಟ ಎನ್ನುವತನಕ ಹುರಿಯಿರಿ. ನಂತರ ಇದಕ್ಕೆ ಜೀರಿಗೆ ಸೇರಿಸಿ ಕೈಯಾಡಿಸಿ ಪಾಲಕ್ ಸೊಪ್ಪು ಸೇರಿಸಿ ಬಾಡಿಸಿ ಉರಿ ಆಫ್ ಮಾಡಿ. 
  • ಸೊಪ್ಪಿನ ಮಿಶ್ರಣಕ್ಕೆ ತೆಂಗಿನತುರಿ, ಆಮಚೂರ್ ಪೌಡರ್ ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ. ರುಬ್ಬುವಾಗ ಸ್ವಲ್ಪ ನೀರು ಸೇರಿಸಿ. 
  • ರುಬ್ಬಿದ ಮಿಶ್ರಣಕ್ಕೆ ಉಪ್ಪು, ರುಚಿಗೆ ತಕ್ಕಷ್ಟು ನಿಂಬೆರಸ ಸೇರಿಸಿ ಬಿಸಿಗಿಡಿ. ಜೊತೆಗೆ, ನೀರು ಬೇಕಿದ್ದರೆ ಸೇರಿಸಿ. ಕಟ್ನೆ ಮಿಶ್ರಣ ತಿಳಿಸಾರಿನ ಹದಕ್ಕಿರಲಿ. 
  • ಕಟ್ನೆ ಮಿಶ್ರಣವನ್ನು 5 ನಿಮಿಷ ಚೆನ್ನಾಗಿ ಕುದಿಸಿ. 
  • ಒಗ್ಗರಣೆ ಸೌಟಿನಲ್ಲಿ 1 1/2 ಟೀ ಚಮಚದಷ್ಟು ಎಣ್ಣೆ ಬಿಸಿಮಾಡಿ. ಇದಕ್ಕೆ ಜಜ್ಜಿದ ಬೆಳ್ಳುಳ್ಳಿ ಸೇರಿಸಿ ಪರಿಮಳ ಬರುವಂತೆ ಹುರಿದು ಕಟ್ನೆ ಮಿಶ್ರಣಕ್ಕೆ ಸೇರಿಸಿ. 
  • ಬಿಸಿಬಿಸಿ ಕಟ್ನೆಯನ್ನು ಅನ್ನದೊಡನೆ ಸರ್ವ್ ಮಾಡಿ. 

ಟಿಪ್ಸ್:

  • ನಿಂಬೆರಸ ಬಳಸದಿದ್ದರೆ ಆಮಚೂರ್ ಪುಡಿಯನ್ನು ಜಾಸ್ತಿ ಬಳಸಿ ರುಚಿ ಅಡ್ಜಸ್ಟ್ ಮಾಡಿ. 
  • ಮಹಿಳೆಯರಿಗೆ ಹೆರಿಗೆಯ ನಂತರದ ಪಥ್ಯದ ಊಟಕ್ಕೆ ಈ ಕಟ್ನೆ ಬಹಳ ಒಳ್ಳೆಯದು. ಆದರೆ ನಿಂಬೆರಸದ ಬದಲು ಆಮಚೂರ್ ಪೌಡರ್ ನ್ನು ಬಳಸಿ. 

Sunday, 5 April 2020

ಆಲೂಗಡ್ಡೆ ಪೋಡಿ - ಓವನ್ ಹಾಗೂ ತವಾದಲ್ಲಿ ತಯಾರಿಸುವ ವಿಧಾನ

ಕೋವಿಡ್ - 2019 ನಿಂದಾಗಿ ಹೊರಗೆಲ್ಲೂ ಹೋಗುವ ಹಾಗಿಲ್ಲ. ಎಲ್ಲರೂ ಮನೆಯಲ್ಲೇ ಇದ್ದಾಗ ಊಟ, ತಿಂಡಿ, ಟೀ ಎಂದು ಕೆಲಸವೂ ಜಾಸ್ತಿ. ಮನೆಯಲ್ಲಿ ಆಲೂಗಡ್ಡೆ ಇದ್ದರೆ ಸುಲಭದಲ್ಲಿ ತಯಾರಿಸಬಹುದಾದ ಪೋಡಿ ರೆಸಿಪಿ ಇಲ್ಲಿದೆ. ಊಟಕ್ಕೆ ಸೈಡ್ ಡಿಶ್ ನಂತೆಯೂ ಹಾಕಿಕೊಳ್ಳಬಹುದು ಅಥವಾ ಸಂಜೆಯ ಸ್ನ್ಯಾಕ್ಸ್ ಗೂ ಚೆನ್ನಾಗಿರುತ್ತದೆ. 


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
  • ಆಲೂಗಡ್ಡೆ - 2 ದೊಡ್ಡದು 
  • ಸೂಜಿ ರವಾ - 3 ಟೇಬಲ್ ಚಮಚ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಅಚ್ಚ ಖಾರದ ಪುಡಿ - 3/4 ಟೀ ಚಮಚ ಅಥವಾ ಖಾರಕ್ಕೆ ತಕ್ಕಷ್ಟು 
  • ಎಣ್ಣೆ  - ಸ್ವಲ್ಪ 

ತಯಾರಿಸುವ ವಿಧಾನ:
  • ಆಲೂಗಡ್ಡೆಯನ್ನು ಸಿಪ್ಪೆ ತೆಗೆದು ತೆಳ್ಳಗಿನ ವೃತ್ತಗಳಾಗಿ ಕತ್ತರಿಸಿಕೊಳ್ಳಿ. 
  • ಸೂಜಿ ರವೆ, ಉಪ್ಪು, ಅಚ್ಚ ಖಾರದ ಪುಡಿ ಇಷ್ಟನ್ನೂ ಒಂದು ಬೌಲ್ ನಲ್ಲಿ ಮಿಕ್ಸ್ ಮಾಡಿಕೊಳ್ಳಿ. 
  • ಆಲೂಗಡ್ಡೆ ಪೀಸ್ ಗಳನ್ನು ರವಾ ಮಿಶ್ರಣದಲ್ಲಿ ಎರಡೂ ಕಡೆ ಅದ್ದಿ, ಕಾದ ತವಾದ ಮೇಲೆ ಸಣ್ಣ ಉರಿಯಲ್ಲಿ ಬೇಯಿಸಿ. 
  • ಬೇಯಿಸುವಾಗ ಸ್ವಲ್ಪ ಎಣ್ಣೆ ಹಾಕಿ ಬೇಯಿಸಿ. 


ಓವನ್ ನಲ್ಲಿ ಬೇಯಿಸುವುದಾದರೆ:

  • ಓವನ್ ನ್ನು 175C ಗೆ ಪ್ರಿ-ಹೀಟ್ ಮಾಡಿಕೊಳ್ಳಿ. 
  • ಬೇಕಿಂಗ್ ಟ್ರೇ ಗೆ ಬೇಕಿಂಗ್ ಶೀಟ್ ಹಾಕಿಕೊಂಡು ಅದರಮೇಲೆ ರವಾ ದಲ್ಲಿ ಅದ್ದಿದ ಆಲೂಗಡ್ಡೆ ಪೀಸ್ ಗಳನ್ನು ಒಂದರ ಪಕ್ಕ ಒಂದರಂತೆ ಇಡುತ್ತಾ ಹೋಗಿ. 
  • ಪ್ರತಿ ಆಲೂಗಡ್ಡೆ ಆಲೂಗಡ್ಡೆ ಪೀಸ್ ಪೀಸ್ ನ ಮೇಲೆಯೂ 4 - 5 ಹನಿಯಷ್ಟು ಎಣ್ಣೆ ಹಾಕಿ. 
  • ಪ್ರಿ-ಹೀಟ್ ಮಾಡಿದ ಓವನ್ ನಲ್ಲಿ ಆಲೂಗಡ್ಡೆ ಪೀಸ್ ಗಳನ್ನು 15 ನಿಮಿಷ ಬೇಯಿಸಿ. 
  • 5 ನಿಮಿಷದ ನಂತರ ಟ್ರೇ ಯನ್ನು ಹೊರತೆಗೆದು ಬಿಸಿ ಬಿಸಿ ಆಲೂಗಡ್ಡೆ ಪೋಡಿಯನ್ನು ಸರ್ವ್ ಮಾಡಿ. 
  • ಆಲೂಗಡ್ಡೆ ಪೋಡಿ ಸ್ನ್ಯಾಕ್ಸ್ ಅಥವಾ ಊಟಕ್ಕೆ ಸೈಡ್ ಡಿಶ್ ನಂತೆಯೂ ಚೆನ್ನಾಗಿರುತ್ತದೆ. 

Wednesday, 1 April 2020

ದೊಡ್ಡಪತ್ರೆ ಎಲೆಯ ಸಿಹಿ ಗೊಜ್ಜು । ಸಾಂಬಾರ್ ಸೊಪ್ಪಿನ ಗೊಜ್ಜು

ದೊಡ್ಡಪತ್ರೆ ಗಿಡ ಸಾಮಾನ್ಯವಾಗಿ ಎಲ್ಲರಿಗೂ ಚಿರಪರಿಚಿತ. ಶಹರದಲ್ಲಿರುವವರೂ ಸುಲಭದಲ್ಲಿ ಪಾಟ್ ನಲ್ಲಿ ಬೆಳೆಸಬಹುದಾದ ಈ ಗಿಡ ಅಡುಗೆಗೂ ಸೈ, ಔಷಧಕ್ಕೂ ಸೈ! ಶೀತಕ್ಕಂತೂ ಇದರ ಸೇವನೆ ಬಹಳ ಒಳ್ಳೆಯದು. ನಮ್ಮ ಮನೆಯಲ್ಲಿ ನೆಗಡಿ, ಜ್ವರ ಆದಾಗ ಡಾಕ್ಟರ್ ಬಳಿ ಹೋಗುವುದು ಬಹಳ ಕಮ್ಮಿ. ಮನೆಯಲ್ಲೇ ಇರುವ ಸಂಬಾರ ಎಲೆ, ಜೇನುತುಪ್ಪ, ಅರಿಶಿನ, ಕಾಳುಮೆಣಸು ಇವೆಲ್ಲದರ ಬಳಕೆಯಿಂದ ಶೀತ, ಜ್ವರ ಎಲ್ಲವೂ ಬೇಗ ವಾಸಿಯಾಗಿಬಿಡುತ್ತದೆ. ಚಟ್ನಿ, ಗೊಜ್ಜು ಇತ್ಯಾದಿ ಅಡುಗೆಗೂ ದೊಡ್ಡಪತ್ರೆ ಚೆನ್ನಾಗಿರುತ್ತದೆ. 
ದೊಡ್ಡಪತ್ರೆ ಎಲೆಯಿಂದ ಸಿಹಿ ಗೊಜ್ಜು ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಂ
ಸರ್ವಿಂಗ್ಸ್: 4 ರಿಂದ 5 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
  • ದೊಡ್ಡಪತ್ರೆ ಎಲೆಗಳು - 7 ರಿಂದ 8
  • ಕಡ್ಲೆಬೇಳೆ - 2 ಟೇಬಲ್ ಚಮಚ
  • ಒಣಮೆಣಸು - 2
  • ಉದ್ದಿನಬೇಳೆ - 1 ಟೀ ಚಮಚ
  • ಸಾಸಿವೆ - 1/2 ಟೀ ಚಮಚ 
  • ಇಂಗು - ಚಿಟಿಕೆ 
  • ಕೊತ್ತಂಬರಿ - 3/4 ಟೀ ಚಮಚ 
  • ಜೀರಿಗೆ - 1/4 ಟೀ  ಚಮಚ 
  • ಎಳ್ಳು - 1/2 ಟೀ ಚಮಚ 
  • ಅರಿಶಿನ - 1/2 ಟೀ ಚಮಚ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಹುಣಸೆಹಣ್ಣು - 1 1/2 ಟೇಬಲ್ ಚಮಚ ಅಥವಾ ರುಚಿಗೆ ತಕ್ಕಷ್ಟು
  • ಬೆಲ್ಲ / ಸಕ್ಕರೆ - 3 ಟೇಬಲ್ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ತೆಂಗಿನತುರಿ - 1 ಕಪ್ 
  • ಎಣ್ಣೆ - 1 1/2 ಟೀ ಚಮಚ 
- ಒಗ್ಗರಣೆಗೆ: 
  • ಉದ್ದಿನಬೇಳೆ - 1/2 ಟೀ ಚಮಚ
  • ಸಾಸಿವೆ - 1/2 ಟೀ ಚಮಚ 
  • ಎಣ್ಣೆ - 1 ಟೀ ಚಮಚ 

ತಯಾರಿಸುವ ವಿಧಾನ:
  • ದೊಡ್ಡಪತ್ರೆ ಎಲೆಗಳನ್ನು ನೀರಿನಲ್ಲಿ ಸ್ವಚ್ಛವಾಗಿ ತೊಳೆಯಿರಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಒಂದೂವರೆ ಚಮಚದಷ್ಟು ಎಣ್ಣೆ ಬಿಸಿಮಾಡಿ. 
  • ಎಣ್ಣೆ ಬಿಸಿಯಾಗುತ್ತಿದ್ದಂತೆ ಇದಕ್ಕೆ ಕಡ್ಲೆಬೇಳೆ ಸೇರಿಸಿ ಸಣ್ಣ ಅಥವಾ ಮಾಧ್ಯಮ ಉರಿಯಲ್ಲಿ ಒಂದು ನಿಮಿಷ ಹುರಿಯಿರಿ. 
  • ನಂತರ ಇದಕ್ಕೆ ಉದ್ದಿನಬೇಳೆ, ಒಣಮೆಣಸು ಸೇರಿಸಿ ಕೈಯಾಡಿಸಿ. ನಂತರ ಕೊತ್ತಂಬರಿ, ಜೀರಿಗೆ, ಸಾಸಿವೆ, ಎಳ್ಳು, ಚಿಟಿಕೆ ಇಂಗು ಸೇರಿಸಿ ಹುರಿಯಿರಿ. 
  • ಸಾಸಿವೆ ಚಟಪಟ ಎಂದಾಗ ಅರಿಶಿನ ಸೇರಿಸಿ ಒಮ್ಮೆ ಕೈಯಾಡಿಸಿ, ದೊಡ್ಡಪತ್ರೆ ಎಲೆಗಳನ್ನು ಸೇರಿಸಿ. 
  • ಮಿಶ್ರಣವನ್ನು ಕೈಯಾಡಿಸುತ್ತಿದ್ದು, ದೊಡ್ಡಪತ್ರೆ ಎಲೆಗಳು ಬಾಡಿದ ನಂತರ ಉರಿ ಆಫ್ ಮಾಡಿ. 
  • ಮಿಕ್ಸಿ ಜಾರ್ ನಲ್ಲಿ ತೆಂಗಿನತುರಿ, ಒಗ್ಗರಣೆ ಮಿಶ್ರಣ, ರುಚಿಗೆ ತಕ್ಕಷ್ಟು ಹುಣಸೆಹಣ್ಣು ಸೇರಿಸಿ ಸ್ವಲ್ಪ ತರಿಯಾಗಿ ರುಬ್ಬಿ. ರುಬ್ಬುವಾಗ ಸ್ವಲ್ಪ ನೀರು ಸೇರಿಸಿ; ಮಿಶ್ರಣ ಚಟ್ನಿಯ ಹದಕ್ಕಿರಲಿ.  
  • ಬಾಣಲಿಯಲ್ಲಿ ಒಂದು ಚಮಚ ಎಣ್ಣೆ ಬಿಸಿಮಾಡಿ ಉದ್ದಿನಬೇಳೆ, ಸಾಸಿವೆ ಸೇರಿಸಿ ಚಟಗುಟ್ಟಿದ ನಂತರ ರುಬ್ಬಿದ ಮಿಶ್ರಣ ಸೇರಿಸಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಬೆಲ್ಲ / ಸಕ್ಕರೆ ಸೇರಿಸಿ ಕೈಯಾಡಿಸಿ. 
  • ಗೊಜ್ಜು ಮಿಶ್ರಣ ಬಿಸಿಯಾಗಿ ಗುಳ್ಳೆಗಳು ಬರತೊಡಗಿದಾಗ ಉರಿ ಆಫ್ ಮಾಡಿ. 
  • ರುಚಿಕರವಾದ ಈ ಗೊಜ್ಜನ್ನು ಅನ್ನದೊಡನೆ ಮಿಕ್ಸ್ ಮಾಡಿ ಸವಿಯಿರಿ. 


Sunday, 29 March 2020

ಕಡ್ಲೆಬೇಳೆ ಚಟ್ನಿ

ಈಗಂತೂ ಎಲ್ಲ ಕಡೆ ಕೊರೋನಾ ವೈರಸ್ ನ ಭೀತಿ, ಕರ್ಫ್ಯು..ಒಟ್ಟಿನಲ್ಲಿ ಮನೆಯಿಂದ ಹೊರಗೆ ಹೋಗಲು ಹೆದರಬೇಕಾದ ಪರಿಸ್ಥಿತಿ. ನಾವು ಇರುವ ಜಾಗದಲ್ಲೂ ನಿಧಾನಕ್ಕೆ ಕೊರೋನಾ ವೈರಸ್ ಹರಡುತ್ತಿದೆ. ಹೀಗಾಗಿ ಮಗಳ ಸ್ಕೂಲ್, ಮನೆಯವರ ಆಫೀಸ್ ಎಲ್ಲವೂ ಮನೆಯಿಂದಲೇ ನಡೆಯುತ್ತಿದೆ. ಎರಡು ವಾರಕ್ಕೊಮ್ಮೆ ಸೂಪರ್ ಮಾರ್ಕೆಟ್ ಗೆ ಗ್ರಾಸರಿ ಶಾಪಿಂಗ್ ಗೆ ಹೋಗುವುದನ್ನು ಬಿಟ್ಟರೆ ಹೊರಗಿನ ಓಡಾಟ ಸಂಪೂರ್ಣ ಕಟ್. ಆದಷ್ಟು ಬೇಗ ಈ ವೈರಸ್ ದೂರವಾಗಿ ವಾತಾವರಣ ಮೊದಲಿನಂತೆ ಆಗಲೆಂದು ನಾವೆಲ್ಲ ಆಶಿಸೋಣ ಅಲ್ಲವೆ?
ಮನೆಯಲ್ಲೇ ಇರುವ ಸಿಂಪಲ್ ಪದಾರ್ಥಗಳನ್ನು ಬಳಸಿ ತಯಾರಿಸಬಹುದಾದ ಒಂದು ಚಟ್ನಿಯ ರೆಸಿಪಿ ಇಲ್ಲಿದೆ. ನನ್ನ ಅಕ್ಕ ನಿಂದ ಕಲಿತ ಈ ಚಟ್ನಿ ಊಟಕ್ಕೆ ಬಹಳ ರುಚಿ. ಇಡ್ಲಿಯೊಡನೆಯೂ ಒಳ್ಳೆಯ ಕಾಂಬಿನೇಷನ್! ಸುಲಭದಲ್ಲಿ ತಯಾರಿಸಬಹುದಾದ ಕಡ್ಲೆಬೇಳೆ ಚಟ್ನಿ ಅಥವಾ ಕಡ್ಲೆಕಾಳಿನ ಗೊಜ್ಜು ರೆಸಿಪಿಯನ್ನು ನೀವೂ ಟ್ರೈ ಮಾಡಿ ನೋಡಿ:


ತಯಾರಿಸಲು ಬೇಕಾಗುವ ಸಮಯ: 10 - 12 ನಿಮಿಷಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಂ 
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 

ಬೇಕಾಗುವ ದಮಗ್ರಿಗಳು:

  • ಕಡಲೆಬೇಳೆ - 2 ಟೇಬಲ್ ಚಮಚ  
  • ಒಣಮೆಣಸು - 1 ಅಥವಾ 2  (ಖಾರಕ್ಕೆ ತಕ್ಕಂತೆ)
  • ಉದ್ದಿನಬೇಳೆ: 1 ಟೀ ಚಮಚ 
  • ಇಂಗು - ದೊಡ್ಡ ಚಿಟಿಕೆ 
  • ಸಾಸಿವೆ - 1 ಟೀ ಚಮಚ + 1 ಟೀ ಚಮಚ 
  • ಅರಿಶಿನ - 1/4 ಟೀ ಚಮಚ 
  • ಹಸಿಮೆಣಸು (ಬೇಕಿದ್ದರೆ) - 1 
  • ಹುಣಸೆಹಣ್ಣು - 1 1/2 ಟೇಬಲ್ ಚಮಚ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ಸಕ್ಕರೆ - 1/4 ಟೀ ಚಮಚ 
  • ತೆಂಗಿನತುರಿ - 1 ಕಪ್ 
  • ಕರಿಬೇವು (ಬೇಕಿದ್ದರೆ) - 4 ಎಲೆಗಳು 
  • ಎಣ್ಣೆ - 1 1/2 ಟೀ ಚಮಚ + 1 ಟೀ ಚಮಚ 

ತಯಾರಿಸುವ ವಿಧಾನ:

  • ಒಂದು ದಪ್ಪ ತಳದ ಬಾಣಲಿ ಅಥವಾ ಒಗ್ಗರಣೆ ಸೌಟಿನಲ್ಲಿ ಒಂದೂವರೆ ಚಮಚದಷ್ಟು ಎಣ್ಣೆ ಬಿಸಿಮಾಡಿ ಇದಕ್ಕೆ ಕಡ್ಲೆಬೇಳೆ ಸೇರಿಸಿ 1 - 2 ನಿಮಿಷ ಹುರಿಯಿರಿ. 
  • ಇದಕ್ಕೆ ಒಣಮೆಣಸು, ಉದ್ದಿನಬೇಳೆ, ಸಾಸಿವೆ, ಇಂಗು ಸೇರಿಸಿ. ಸಾಸಿವೆ ಚಟಪಟ ಎಂದಾಗ ಕಾಲು ಚಮಚ ಅರಿಶಿನ, ಕರಿಬೇವು (ಬೇಕಿದ್ದರೆ), ಹಸಿಮೆಣಸು ಸೇರಿಸಿ ಒಂದು ನಿಮಿಷ ಹುರಿದು ಉರಿ ಆಫ್ ಮಾಡಿ. 
  • ಮಿಕ್ಸಿ ಜಾರ್ ನಲ್ಲಿ ಹುರಿದ ಮಿಶ್ರಣ, ತೆಂಗಿನತುರಿ, ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, ಹುಣಸೆಹಣ್ಣು ಸೇರಿಸಿ ಸ್ವಲ್ಪ ನೀರು ಸೇರಿಸಿ ತರಿಯಾಗಿ ರುಬ್ಬಿ. ಜಾಸ್ತಿ ನೀರು ಸೇರಿಸಿದರೆ ಚಟ್ನಿ ತೆಳ್ಳಗಾಗಿಬಿಡುತ್ತದೆ. ಹೀಗಾಗಿ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸಿ. 
  • ಬಾಣಲೆಯಲ್ಲಿ ಒಂದು ಟೀ ಚಮಚದಷ್ಟು ಎಣ್ಣೆ ಬಿಸಿಮಾಡಿ ಒಂದು ಚಮಚ ಸಾಸಿವೆ, ಚಿಟಿಕೆ ಇಂಗು ಸೇರಿಸಿ ಸಿಡಿಸಿ ಚಟ್ನಿಗೆ ಸೇರಿಸಿ ಮಿಕ್ಸ್ ಮಾಡಿ. 
  • ಈ ಚಟ್ನಿ ಅನ್ನ ಹಾಗೂ ಇಡ್ಲಿಯೊಡನೆ ಒಳ್ಳೆಯ ಕಾಂಬಿನೇಷನ್. 

ಟಿಪ್ಸ್:

  • ಹಸಿಮೆಣಸು ಬಳಸಲು ಇಷ್ಟಪಡದವರು ಖಾರಕ್ಕೆ ಬರೀ ಒಣಮೆಣಸನ್ನು ಬಳಸಬಹುದು 

Wednesday, 11 March 2020

ಗೆಣಸಲೆ | ಸಿಹಿ ಕಡುಬು

ಗೆಣಸಲೆ - ಇದು ನಮ್ಮೂರ ಕಡೆ ತಯಾರಿಸುವ ಒಂದು ಬಗೆಯ ಸಿಹಿ ಕಡುಬು. ದಾಲ್ಚಿನ್ನಿ ಎಲೆಯಮೇಲೆ ಹಿಟ್ಟನ್ನು ಹಚ್ಚಿ, ನಡುವೆ ಸಿಹಿ ಹೂರಣವನ್ನಿಟ್ಟು ಹಬೆಯಲ್ಲಿ ಬೇಯಿಸುವ ಈ ಖಾದ್ಯ ಪರಿಮಳ ಭರಿತವಾಗಿ ಬಹಳ ರುಚಿಯಾಗಿರುತ್ತದೆ.
ನಮ್ಮ ಮನೆಯ ಹತ್ತಿರವೇ ಇರುವ ಒಬ್ಬರು ಇತ್ತೀಚೆಗೆ ಒಂದಿಷ್ಟು ತಾಜಾ ದಾಲ್ಚಿನ್ನಿ ಎಲೆಗಳನ್ನು ಕೊಟ್ಟಿದ್ದರು. ಹೀಗಾಗಿ ಅಪರೂಪಕ್ಕೆ ದಾಲ್ಚಿನ್ನಿ ಎಲೆ ಸಿಕ್ಕಾಗ ತಯಾರಾದ ಬಹು ಅಪರೂಪದ ಖಾದ್ಯ ಇದು! ದಾಲ್ಚಿನ್ನಿ ಎಲೆಯ ಬದಲು ಅರಿಶಿನ ಎಲೆ ಬಳಸಿಯೂ ಈ ಕಡುಬನ್ನು ತಯಾರಿಸಬಹುದು.


ತಯಾರಿಸಲು ಬೇಕಾಗುವ ಸಮಯ: 45 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಕಷ್ಟಕರ
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
  • ಮೀಡಿಯಮ್ ಸೈಜಿನ ದಾಲ್ಚಿನ್ನಿ ಎಲೆ (ಬೇ ಲೀಫ್) - 15ರಿಂದ 20
- ಕಣಕಕ್ಕೆ:
  • ಸೂಜಿ ರವಾ - 3/4 ಕಪ್ 
  • ಉಪ್ಪು - 1/3 ಟೀ ಸ್ಪೂನ್
  • ಬೆಲ್ಲ - 1 1/2 ಟೇಬಲ್ ಸ್ಪೂನ್
  • ಅರಿಶಿನ - 1/4 ಟೀ ಸ್ಪೂನ್
  • ನೀರು - ಸ್ವಲ್ಪ
- ಹೂರಣಕ್ಕೆ:
  • ತೆಂಗಿನತುರಿ - 1/2 ಕಪ್ (ಅಳತೆ ಮಾಡುವಾಗ ತುರಿಯನ್ನು ಕಪ್ ನಲ್ಲಿ ಪ್ರೆಸ್ ಮಾಡಿ ತುಂಬಿ)
  • ಬೆಲ್ಲ - 1/3 ಕಪ್ ಅಥವಾ ರುಚಿಗೆ ತಕ್ಕಷ್ಟು
  • ಏಲಕ್ಕಿಪುಡಿ - 1/2 ಟೀ ಸ್ಪೂನ್
  • ನೀರು - 1 ಟೇಬಲ್ ಸ್ಪೂನ್ (ಟಿಪ್ಸ್ ನೋಡಿ)

ತಯಾರಿಸುವ ವಿಧಾನ:
  • ದಾಲ್ಚಿನ್ನಿ ಎಲೆಗಳನ್ನು ನೀರಿನಲ್ಲಿ ಸ್ವಚ್ಛವಾಗಿ ತೊಳೆಯಿರಿ. 
  • ತೆಂಗಿನತುರಿಯನ್ನು ಮಿಕ್ಸಿಯಲ್ಲಿ ಅರ್ಧ ನಿಮಿಷ ರುಬ್ಬಿ ತೆಗೆಯಿರಿ. 
  • ಒಂದು ದಪ್ಪ ತಳದ ಬಾಣಲಿಯಲ್ಲಿ ತೆಂಗಿನತುರಿ, ಬೆಲ್ಲ, 1- 2 ಟೇಬಲ್ ಸ್ಪೂನ್ ನಷ್ಟು ನೀರು ಸೇರಿಸಿ ಬಿಸಿಗಿಡಿ. 
  • ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತ ಚೆನ್ನಾಗಿ ಮಿಕ್ಸ್ ಮಾಡಿ. 
  • 10 - 12 ನಿಮಿಷಕ್ಕೆ ಈ ಮಿಶ್ರಣ ನೀರಿನಂಶ ಆರಿ, ಸ್ವಲ್ಪ ಗಟ್ಟಿಯಾಗತೊಡಗುತ್ತದೆ. ಆಗ ಏಲಕ್ಕಿಪುಡಿ ಸೇರಿಸಿ ಉರಿ ಆಫ್ ಮಾಡಿ, ಮಿಶ್ರಣ ತಣ್ಣಗಾಗಲು ಬಿಡಿ. 
  • ಸೂಜಿ ರವೆಯನ್ನು ಒಂದು ಪಾತ್ರೆಯಲ್ಲಿ ಹಾಕಿ, ಇದಕ್ಕೆ ನೆನೆಯಲು ಬೇಕಾಗುವಷ್ಟು ನೀರು ಸೇರಿಸಿ ಮಿಕ್ಸ್ ಮಾಡಿ, 5 ನಿಮಿಷ ನೆನೆಯಲು ಬಿಡಿ. 
  • ಐದು ನಿಮಿಷದ ನಂತರ ಹೆಚ್ಚಿನ ನೀರನ್ನು ತೆಗೆದುಬಿಡಿ. ಆದರೆ ಗಟ್ಟಿಯಾಗಿ ಹಿಂಡಬೇಡಿ. 
  • ನೆನೆದ ರವೆಯನ್ನು ಮಿಕ್ಸಿ ಜಾರ್ ನಲ್ಲಿ ಹಾಕಿ ಒಂದು ನಿಮಿಷಕಾಲ ತಿರುವಿ. ಮಿಶ್ರಣ ಗಟ್ಟಿ ಎನಿಸಿದರೆ ಸ್ವಲ್ಪ ನೀರು ಸೇರಿಸಿ. ರುಬ್ಬಿದ ಮಿಶ್ರಣ ದೋಸೆ ಹಿಟ್ಟಿನ ಹದಕ್ಕೆ ಇರಲಿ. 
  • ಒಂದು ದಪ್ಪ ತಳದ ಪಾತ್ರೆಯಲ್ಲಿ ರುಬ್ಬಿದ ರವೆ, ಉಪ್ಪು, ಬೆಲ್ಲ, ಅರಿಶಿನ ಸೇರಿಸಿ ಮಿಕ್ಸ್ ಮಾಡಿ. 
  • ಮಿಶ್ರಣವನ್ನು ಸಣ್ಣ ಅಥವಾ ಮಾಧ್ಯಮ ಉರಿಯಲ್ಲಿ ಬಿಡದೆ ಕೈಯಾಡಿಸಿ. ಮಿಶ್ರಣ ದಪ್ಪಗಾಗಿ, ಹಿಟ್ಟಿನ ಬಣ್ಣ ಬದಲಾದಾಗ ಉರಿ ಆಫ್ ಮಾಡಿ ತಣ್ಣಗಾಗಲು ಬಿಡಿ. ಮಿಶ್ರಣ ಚಪಾತಿ ಹಿಟ್ಟಿನ ಹದಕ್ಕಿರಲಿ; ಒಮ್ಮೆ ಕೈಯಲ್ಲಿ ನಾದಿಕೊಂಡರೆ ಉತ್ತಮ.  
  • ಒಂದು ಅಗಲವಾದ ಪಾತ್ರೆಯಲ್ಲಿ 3 - 4 ಕಪ್ ನಷ್ಟು ನೀರು ಹಾಕಿ ಇದಕ್ಕೆ ಕಾಲು ಚಮಚದಷ್ಟು ಎಣ್ಣೆ ಸೇರಿಸಿ ಮಿಕ್ಸ್ ಮಾಡಿ. ಎಣ್ಣೆ ಹಾಕಿದ ನೀರಿನಲ್ಲಿ ಎಲೆಗಳನ್ನು ಅದ್ದಿಕೊಳ್ಳುವುದರಿಂದ ಗೆಣಸಲೆ ಬೆಂದ ನಂತರ ಎಲೆಗೆ ಅಂಟುವುದಿಲ್ಲ. 
  • ದಾಲ್ಚಿನ್ನಿ ಎಲೆಯನ್ನು ಒಂದೊಂದಾಗಿ ತೆಗೆದುಕೊಂಡು ನೀರಿನಲ್ಲಿ ಒದ್ದೆ ಮಾಡಿಕೊಳ್ಳಿ. 
  • ರವಾ ಮಿಶ್ರಣವನ್ನು ಚಿಕ್ಕ ಉಂಡೆಯಷ್ಟು ತೆಗೆದುಕೊಂಡು, ದಾಲ್ಚಿನ್ನಿ ಎಲೆಯ ಮೇಲ್ಭಾಗಕ್ಕೆ ತೆಳ್ಳಗೆ ಹಚ್ಚಿ. 
  • ಇದರಮೇಲೆ ಒಂದು ಟೀ ಚಮಚದಷ್ಟು (ಅಥವಾ ಹೆಚ್ಚು) ತೆಂಗಿನತುರಿ ಮಿಶ್ರಣ ಹಾಕಿ, ಹೂರಣ ಒಳಗೆ ಬರುವಂತೆ ಎಲೆಯನ್ನು ಅರ್ಧಕ್ಕೆ ಮಡಿಚಿ. ಹೂರಣ ಹೊರಬರದಂತೆ ಅಂಚುಗಳನ್ನು ನಾಜೂಕಾಗಿ ಪ್ರೆಸ್ ಮಾಡಿ. 
  • ಇದೇ ರೀತಿ ಬೇಕಾದಷ್ಟು ಎಲೆಗಳನ್ನು ರೆಡಿ ಮಾಡಿಕೊಂಡು ಒಂದು ಪ್ಲೇಟ್ ನಲ್ಲಿಟ್ಟು ಸ್ಟೀಮರ್ ನಲ್ಲಿ ಇಟ್ಟು 5 ನಿಮಿಷ ಬೇಯಿಸಿ. ಪ್ರೆಶರ್ ಕುಕ್ಕರ್ ನಲ್ಲಿ ಬೇಯಿಸುವುದಾದರೆ ವಿಸಿಲ್ ತೆಗೆದಿಟ್ಟು ಬೇಯಿಸಿ. 
  • ದಾಲ್ಚಿನ್ನಿ ಎಲೆಯನ್ನು ಬೇರ್ಪಡಿಸಿ, ಬಿಸಿಯಾದ ಪರಿಮಳ ಭರಿತ ಗೆಣಸಲೆ ಯನ್ನು ತುಪ್ಪದೊಡನೆ ಸವಿಯಿರಿ. 

ಟಿಪ್ಸ್:
  • ನಾನು ತುರಿದ ಬೆಲ್ಲ ಬಳಸಿರುವುದರಿಂದ, ಬೆಲ್ಲ ಕರಗಲು ಒಂದು ಟೇಬಲ್ ಸ್ಪೂನ್ ನಷ್ಟು ನೀರು ಸೇರಿಸಿದ್ದೇನೆ. ಜೋನಿ ಬೆಲ್ಲ ಬಳಸಿದರೆ ನೀರು ಹಾಕಬೇಕಿಲ್ಲ. 
  • ದಾಲ್ಚಿನ್ನಿ ಎಲೆಯ ಬದಲು ಅರಿಶಿನ ಎಲೆ ಬಳಸಿಯೂ ಈ ಕಡುಬನ್ನು ತಯಾರಿಸಬಹುದು. 
  • ಎಲೆಯಮೇಲೆ ಹಚ್ಚುವುದು ಕಷ್ಟವೆನಿಸಿದರೆ ಕಡುಬನ್ನು ಹಾಗೆಯೇ ತಯಾರಿಸಿ, ಬೇಯಿಸುವಾಗ ಗೆಣಸಲೆಯ ಮೇಲ್ಭಾಗಕ್ಕೆ ದಾಲ್ಚಿನ್ನಿ ಎಲೆಗಳನ್ನಿಟ್ಟು ಬೇಯಿಸಿ. 
English version

Wednesday, 26 February 2020

ಹನಿ ಡ್ಯೂ ಮೆಲನ್ ಪೇಯ | ಹನಿ ಡ್ಯೂ ಮೆಲನ್ ಕೂಲರ್

ಹನಿ ಡ್ಯೂ ಮೆಲನ್ - ಇದು ಕರಬೂಜ ಹಣ್ಣಿನ ತರಹದ್ದೇ ತಳಿಗೆ ಸೇರಿದ ಹಣ್ಣು. ಸಿಹಿಯಾಗಿ, ರುಚಿಕರವಾಗಿರುವ ಈ ಹಣ್ಣು ನಮ್ಮ ಮನೆಯಲ್ಲಿ ಎಲ್ಲರಿಗೂ ಇಷ್ಟ. ಈ ಹಣ್ಣನ್ನು ನಾವು ಸಾಮಾನ್ಯವಾಗಿ ಹಾಗೆಯೇ ಕತ್ತರಿಸಿ ತಿನ್ನುತ್ತೇವೆ. ತಂದಿಟ್ಟ ಹಣ್ಣು ಖಾಲಿಯಾಗದೇ ಫ್ರಿಡ್ಜ್ ನಲ್ಲಿ ಉಳಿದಾಗ ಏನಾದರೂ ಮಾಡಲೇಬೇಕಲ್ಲವೇ? ಆಗ ನೆನಪಾದದ್ದು ಈ ಪೇಯ! 


ತಯಾರಿಸಲು ಬೇಕಾಗುವ ಸಮಯ: 15 - 20 ನಿಮಿಷಗಳು  
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
  • ಹನಿ ಡ್ಯೂ ಮೆಲನ್ - ಒಂದು ಹಣ್ಣಿನ ಕಾಲುಭಾಗ 
  • ಹಾಲು - 1 ಕಪ್ 
  • ಸಿಹಿಗೆ - ಬೆಲ್ಲ, ಸಕ್ಕರೆ ಅಥವಾ ಮೇಪಲ್ ಸಿರಪ್ - ಸಿಹಿಯಾಗುವಷ್ಟು (ನಾನು 5 ಟೇಬಲ್ ಚಮಚದಷ್ಟು ಬೆಲ್ಲ ಬಳಸಿದ್ದೇನೆ)
  • ಉಪ್ಪು - ಚಿಟಿಕೆ 
  • ಏಲಕ್ಕಿ ಪುಡಿ  - ಕಾಲು ಟೀ ಚಮಚ 

ತಯಾರಿಸುವ ವಿಧಾನ:
  • ಹನಿ ಡ್ಯೂ ಮೆಲನ್ ನ ಬೀಜ ಮತ್ತು ಸಿಪ್ಪೆ ಬೇರ್ಪಡಿಸಿ ಉಳಿದ ಭಾಗವನ್ನು ತುರಿದುಕೊಳ್ಳಿ. ಹಣ್ಣಿನ ತುರಿ ಮತ್ತು ರಸ ಎರಡೂ ಸೇರಿಸಿ ಒಂದೂವರೆ ಕಪ್ ನಷ್ಟು ಆದರೆ ಸಾಕು. 
  • ತುರಿದ ಹಣ್ಣನ್ನು ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಚಿಟಿಕೆ ಉಪ್ಪು, ಸಿಹಿಯಾಗುವಷ್ಟು ಬೆಲ್ಲ, ಸಕ್ಕರೆ ಅಥವಾ ಮೇಪಲ್ ಸಿರಪ್ ಹಾಕಿ ಮಿಕ್ಸ್ ಮಾಡಿ. 
  • ನಂತರ ಹಾಲು, ಏಲಕ್ಕಿ ಪುಡಿ ಹಾಕಿ ಮಿಕ್ಸ್ ಮಾಡಿ, ಅರ್ಧ ಘಂಟೆ ಫ್ರಿಡ್ಜ್ ನಲ್ಲಿಟ್ಟು ತಣ್ಣಗಾದ ನಂತರ ಸವಿಯಿರಿ. 
  • ಸರ್ವಿಂಗ್ ಬೌಲ್ ಗೆ ಹಾಕುವಾಗ ರಸ ಹಾಗೂ ಹಣ್ಣಿನ ತುರಿ ಎರಡೂ ಬರುವಂತೆ ಮಿಕ್ಸ್ ಮಾಡಿ ಹಾಕಿ. 

ಟಿಪ್ಸ್:
  • ತಕ್ಷಣ ಸರ್ವ್ ಮಾಡಬೇಕು ಅಂದರೆ ಫ್ರಿಡ್ಜ್ ನಲ್ಲಿಟ್ಟು ತಣ್ಣಗಾದ ಹಣ್ಣು ಮತ್ತು ತಣ್ಣಗಿನ ಹಾಲು ಉಪಯೋಗಿಸಿ. 

Related Posts Plugin for WordPress, Blogger...