Here are some recipes which I came across through the net, books, so on and few are my own experiments..

Friday, 23 December 2011

ಒಗ್ಗರಣೆ ಅವಲಕ್ಕಿ / Poha Seasoning

Click here for English version.
 
ಈ ಅವಲಕ್ಕಿ ಮಾಡಿದಾಗಲೆಲ್ಲ ನನಗೆ ಚಿಕ್ಕಂದಿನ ದಿನಗಳ ನೆನಪಾಗುತ್ತದೆ. ನಾವೆಲ್ಲ ಸ್ಕೂಲಿಗೆ ಹೋಗುವಾಗಿನ ದಿನಗಳಲ್ಲಿ ಸಂಜೆ ಮನೆಗೆ ಬಂದ ತಕ್ಷಣ ಏನಾದರೂ ತಿಂಡಿ ಮಾಡಿಕೊಡಬೇಕಿತ್ತು. ಮನೆಯಲ್ಲಿ ನಾವು 3 - 4 ಮಕ್ಕಳು; ಎಲ್ಲರಿಗೂ ಒಗ್ಗರಣೆ ಅವಲಕ್ಕಿ ಎಂದರೆ ಇಷ್ಟ :) ಹೀಗಾಗಿ ಹೆಚ್ಚಿನ ದಿನಗಳಲ್ಲಿ ಈ ಅವಲಕ್ಕಿಯೇ ನಮ್ಮ ಸ್ನ್ಯಾಕ್ಸ್! 
ನಾನು ಆಫೀಸ್ ಗೆ ಹೋಗುವಾಗಲೂ ಮದ್ಯಾಹ್ನದ ಲಂಚ್ ಬಾಕ್ಸ್ ಗೆ ಒಮ್ಮೊಮ್ಮೆ ಒಗ್ಗರಣೆ ಅವಲಕ್ಕಿಯನ್ನು ಒಯ್ಯುತ್ತಿದ್ದೆ. ಅಲ್ಲಿ ಎಲ್ಲರಿಗೂ ಈ ಅವಲಕ್ಕಿ ಇಷ್ಟವಾಗಿಬಿಟ್ಟಿತ್ತು. ಅವಲಕ್ಕಿ ಒಯ್ದ ದಿನ ನನಗೆ ಉಳಿದವರ ಬಾಕ್ಸ್ ನ ತಿಂಡಿಯೇ ಗತಿ! ಹಾಗಂತ ಇದೇನೂ ಊಟದಂತೆ ಹೊಟ್ಟೆ ತುಂಬುವ ತಿಂಡಿಯಲ್ಲ; ನನಗೆ ಲಂಚ್ ಬಾಕ್ಸ್ ಗೆ ಏನಾದರೂ ಮಾಡಲು ಬೇಜಾರಾದಾಗ ಅವಲಕ್ಕಿ ಮಾಡಿಕೊಂಡು ಹೋಗುತ್ತಿದ್ದೆ ಅಷ್ಟೆ! ಸಂಜೆಯ ಸ್ನ್ಯಾಕ್ಸ್ ಟೈಮ್ ಗೆ ಟೀ ಅಥವಾ ಕಾಫಿಯೊಡನೆ ಈ ಅವಲಕ್ಕಿ ಸೊಗಸಾಗಿರುತ್ತದೆ. ಜೊತೆಗೆ ಏನಾದರೂ ಖಾರದ ಕುರುಕಲು ತಿಂಡಿ ಇದ್ದರೆ ಇನ್ನೂ ಚೆನ್ನ :)


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು
ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ 

ಬೇಕಾಗುವ ಸಾಮಗ್ರಿಗಳು:
ಪೇಪರ್ ಅವಲಕ್ಕಿ - 2 1/2 ಬೌಲ್ ನಷ್ಟು 
ನೆಲಗಡಲೆ - 3 ಚಮಚ 
ಉದ್ದಿನಬೇಳೆ - 1/2 ಚಮಚ  
ಒಣಮೆಣಸು - 2 ಚೂರು 
ಸಾಸಿವೆ - 1/2 ಚಮಚ    
ಕೊತ್ತಂಬರಿ - 1 1/4 ಚಮಚ  
ಅರಿಶಿನ - ಒಂದು ದೊಡ್ಡ ಚಿಟಿಕೆ 
ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ)
ಕರಿಬೇವಿನ ಎಲೆಗಳು 8 - 10 
ತುಚಿಗೆ ತಕ್ಕಷ್ಟು ಉಪ್ಪು 
ಸಕ್ಕರೆ - 2 ಚಮಚ (ರುಚಿಗೆ ತಕ್ಕಷ್ಟು)
ಎಣ್ಣೆ  - 4 ಚಮಚ (ಕೊಬ್ಬರಿ ಎಣ್ಣೆ ಬಳಸಿದರೆ ರುಚಿ ಹೆಚ್ಚು)
ತೆಂಗಿನ ತುರಿ - ಅರ್ಧ ಅಥವಾ ಮುಕ್ಕಾಲು ಕಪ್  
ಮಧ್ಯಮಗಾತ್ರದ ಈರುಳ್ಳಿ - 1 
ನೀರು - ಅರ್ಧ ಕಪ್

ಮಾಡುವ ವಿಧಾನ:
ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹಸಿಮೆಣಸನ್ನೂ ಹೆಚ್ಚಿಕೊಳ್ಳಿ.   
ಒಂದು ಪಾತ್ರೆಯಲ್ಲಿ ಅವಲಕ್ಕಿ ಹಾಕಿಕೊಂಡು ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ ಹಾಕಿಡಿ.
ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಕಾಯಿಸಿ ಅದಕ್ಕೆ ನೆಲಗಡಲೆ, ಒಣಮೆಣಸು, ಉದ್ದಿನಬೇಳೆ, ಸಾಸಿವೆ, ಕೊತ್ತಂಬರಿ, ಅರಿಶಿನ, ಹಸಿಮೆಣಸು, ಕರಿಬೇವು ಹಾಕಿ ಒಗ್ಗರಣೆ ಮಾಡಿಕೊಳ್ಳಿ.
ಈ ಒಗ್ಗರಣೆಯನ್ನು ಅವಲಕ್ಕಿಗೆ ಸೇರಿಸಿ. ಒಗ್ಗರಣೆ ಸೌಟಿಗೆ ಕಾಲು ಲೋಟದಷ್ಟು ನೀರು ಹಾಕಿ, ಅದನ್ನು ಅವಲಕ್ಕಿಗೆ ಮೇಲಿನಿಂದ ಚಿಮುಕಿಸಿ.
ತೆಂಗಿನತುರಿ, ಈರುಳ್ಳಿಯನ್ನು ಸೇರಿಸಿ ಅವಲಕ್ಕಿಯನ್ನು ಕೈಯಿಂದ ಚೆನ್ನಾಗಿ ಮಿಕ್ಸ್ ಮಾಡಿ. ಬೇಕಿದ್ದರೆ ಇನ್ನೂ ಸ್ವಲ್ಪ ನೀರು ಚಿಮುಕಿಸಿಕೊಂಡು ಕಲಸಿ. ಅವಲಕ್ಕಿಯನ್ನು ತುಂಬಾ ಮುದ್ದೆ ಮಾಡಬೇಡಿ.
ಒಮ್ಮೆ ರುಚಿ ನೋಡಿಕೊಂಡು ಉಪ್ಪು, ಸಕ್ಕರೆ ಏನಾದರೂ ಬೇಕಿದ್ದರೆ ಸೇರಿಸಿ.
ತಯಾರಾದ ಅವಲಕ್ಕಿಯನ್ನು ಏನಾದರೂ ಕುರುಕಲು ತಿಂಡಿ ಮತ್ತು ಮೊಸರಿನೊಡನೆ ಸರ್ವ್ ಮಾಡಿ.


Friday, 16 December 2011

ಗವ್ವಲು - ಆಂಧ್ರ ಸ್ಪೆಷಲ್ / Gavvalu - Sweet Shells from Andhra

Click here for English version.
ಗವ್ವಲು ಎನ್ನುವುದು ಆಂಧ್ರ ಪ್ರದೇಶದಲ್ಲಿ ಹೆಚ್ಚಾಗಿ ತಯಾರಿಸುವ ಒಂದು ಬಗೆಯ ಸಿಹಿ ತಿಂಡಿ. ನಾನು ಆಸ್ಟ್ರೇಲಿಯಾದಲ್ಲಿದ್ದಾಗ ಆಂಧ್ರ ಮೂಲದ ಫ್ರೆಂಡ್ ಒಬ್ಬರು ಈ ತಿನಿಸನ್ನು ನಮಗೆ ಕೊಟ್ಟಿದ್ದರು. ನಮಗಂತೂ ಅದರ ಆಕಾರವನ್ನು ನೋಡಿಯೇ ಆಶ್ಚರ್ಯವಾಗಿಬಿಟ್ಟಿತ್ತು! ಕಪ್ಪೆ ಚಿಪ್ಪಿನ ಆಕಾರಕ್ಕೆ ಹೇಗೆ ಮಾಡುತ್ತಾರೆಂದು ಅವರನ್ನು ಕೇಳಿದಾಗ ಅವರು ಗವ್ವಲು ತಯಾರಿಸುವ ವಿಧಾನವನ್ನು ತಿಳಿಸಿಕೊಟ್ಟರು. 
ಆದರೆ ಅವರು ಅದಕ್ಕೆ ಆಕಾರ ಕೊಡಲು ಜಿಗ್ ಜಾಗ್ ಮೇಲ್ಮೈ ಇರುವ ಒಂದು ಚಿಕ್ಕ ಬೋರ್ಡ್ ನ್ನು ಬಳಸುವರಂತೆ. ನಾನು ಗೂಗಲ್ ನಲ್ಲಿ ಒಂದಿಷ್ಟು ಹುಡುಕಿ, ಅದಕ್ಕೊಂದು ಪರಿಹಾರ ಹುಡುಕಿಕೊಂಡೆ. ಅದೇನೆಂದರೆ ಆ ಬೋರ್ಡ್ ಗೆ ಬದಲು ಬಾಚಣಿಗೆ ಅಥವಾ ಫೋರ್ಕ್ ಕೂಡ ಬಳಸಬಹುದೆಂದು! ಹೀಗಾಗಿ ಈಗ ಗವ್ವಲು ತಯಾರಿಸಲೆಂದೇ ಒಂದು ಬಾಚಣಿಗೆ ತಂದು ಇಟ್ಟುಕೊಂಡಿದ್ದೇನೆ :) 
ಗರಿಯಾಗಿ ಸಿಹಿಯಾಗಿ ಪುಟ್ಟಗಿರುವ ಈ ಗವ್ವಲು ತಿನ್ನಲು ತುಂಬ ರುಚಿ. ಟೀ ಅಥವಾ ಕಾಫಿಯೊಡನೆ ಸವಿಯಲು ಇದು ಹೇಳಿ ಮಾಡಿಸಿದ ಸ್ನ್ಯಾಕ್ಸ್. ಆದರೆ ಹುಷಾರು, ಒಮ್ಮೆ ತಿನ್ನತೊಡಗಿದರೆ ನಿಲ್ಲಿಸುವುದು ಬಹಳ ಕಷ್ಟ!! 


ತಯಾರಿಸಲು ಬೇಕಾಗುವ ಸಮಯ: 1 1/4 ಘಂಟೆ   
ಸರ್ವಿಂಗ್ಸ್: 5 - 6 (ತಿನ್ನುವವರನ್ನವಲಂಬಿಸಿ ;) )

ಬೇಕಾಗುವ ಸಾಮಗ್ರಿಗಳು:
ಮೈದಾಹಿಟ್ಟು - 2 ಕಪ್  
ಸೂಜಿ ರವೆ ಅಥವಾ ಚಿರೋಟಿ ರವೆ - 1/2 ಕಪ್ (ಕೆಳಗಿರುವ ಟಿಪ್ಸ್ ನೋಡಿ)
ಉಪ್ಪು - 1/4 ಚಮಚ 
ತುಪ್ಪ - 3 ಚಮಚ 
ನೀರು - ಹಿಟ್ಟನ್ನು ಕಲಸಲು (ಸುಮಾರು 3/4 ಕಪ್)
ಕರಿಯಲು ಎಣ್ಣೆ 
ಸಕ್ಕರೆ ಪಾಕಕ್ಕೆ: ಸಕ್ಕರೆ - 1 ಕಪ್, ನೀರು - 1/2 ಕಪ್, ಚಿಟಿಕೆ ಏಲಕ್ಕಿ ಪುಡಿ  
ಗವ್ವಲು ಮಣೆ, ಬಾಚಣಿಗೆ ಅಥವಾ ಫೋರ್ಕ್   


ಮಾಡುವ ವಿಧಾನ:
ಮೈದಾಹಿಟ್ಟಿಗೆ ರವೆ, ಉಪ್ಪು, ತುಪ್ಪ ಸೇರಿಸಿ ಚೆನ್ನಾಗಿ ಕಲಸಿಕೊಳ್ಳಿ. ನಂತರ ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಹಿಟ್ಟು ತೀರಾ ಮೆತ್ತಗೂ ಇರಬಾರದು, ತೀರಾ ಗಟ್ಟಿಯೂ ಇರಬಾರದು.
ತಯಾರಿಸಿದ ಹಿಟ್ಟಿಗೆ ಒಂದು ಪ್ಲೇಟ್ ಅಥವಾ ಒದ್ದೆ ಬಟ್ಟೆ ಮುಚ್ಚಿ 20 ನಿಮಿಷ ನೆನೆಯಲು ಬಿಡಿ. ನಂತರ ಈ ಹಿಟ್ಟಿನಿಂದ ಚಿಕ್ಕ ಚಿಕ್ಕ ಉಂಡೆಗಳನ್ನು ಮಾಡಿಕೊಳ್ಳಿ. 
ಈ ಉಂಡೆಗಳನ್ನು ಚಿತ್ರದಲ್ಲಿ ತೋರಿಸಿರುವಂತೆ ಗವ್ವಲು ಮಣೆ ಅಥವಾ ಬಾಚಣಿಗೆಯ ಹಲ್ಲಿನಮೇಲೆ ನಿಧಾನವಾಗಿ ಒತ್ತಿ. ಜಿಗ್ ಜಾಗ್ ಮೇಲ್ಮೈ ಹೊರಗೆ ಬರುವಂತೆ ಸ್ವಲ್ಪವೇ ಸುರುಳಿ ಮಾಡಿ ಕಪ್ಪೆ ಚಿಪ್ಪಿನ ಅಕಾರ ಕೊಡಿ.
ಬಾಣಲೆಯಲ್ಲಿ ಎಣ್ಣೆಯನ್ನು ಹದವಾಗಿ ಕಾಯಿಸಿಕೊಂಡು, ತಯಾರಿಸಿದ ಗವ್ವಲು ಹಾಕಿ ಮೀಡಿಯಂ ಉರಿಯಲ್ಲಿ ನಾಲ್ಕೈದು ನಿಮಿಷ ಕರಿಯಿರಿ.
ಗವ್ವಲು ಗರಿಯಾಗಿ ಹೊಂಬಣ್ಣಕ್ಕೆ ಬಂದಾಗ ಎಣ್ಣೆಯಿಂದ ಎತ್ತಿ, ಒಂದು ಟಿಶ್ಯೂ ಪೇಪರ್ ಮೇಲೆ ಹರವಿ.
ಸಕ್ಕರೆಗೆ ನೀರು ಸೇರಿಸಿ ಗಟ್ಟಿ ಪಾಕ (2 1/2 ಎಳೆ) ಮಾಡಿಕೊಳ್ಳಿ. ಇದಕ್ಕೆ ಚಿಟಿಕೆ ಏಲಕ್ಕಿ ಪುಡಿ ಹಾಕಿ ಮುಚ್ಚಿಡಿ.
ಗವ್ವಲು ವನ್ನು ಟಿಶ್ಯೂ ಪೇಪರ್ ನಿಂದ ಎತ್ತಿ ಒಂದು ಮಿಕ್ಸಿಂಗ್ ಬೌಲ್ ಗೆ ಹಾಕಿಕೊಳ್ಳಿ. 
ಇದಕ್ಕೆ ಮೇಲಿನಿಂದ ರುಚಿಗೆ ತಕ್ಕಷ್ಟು (3 - 4 ಚಮಚ) ಸಕ್ಕರೆ ಪಾಕ ಸುರಿದು, ಚೆನ್ನಾಗಿ ಮಿಕ್ಸ್ ಮಾಡಿ. ಜಾಸ್ತಿ ಸಿಹಿ ಬೇಕಿದ್ದರೆ ಇನ್ನೂ ಸ್ವಲ್ಪ ಸಕ್ಕರೆ ಪಾಕ ಹಾಕಿ ಮಿಕ್ಸ್ ಮಾಡಿ.
ಈಗ ಗವ್ವಲು ವನ್ನು ಒಂದು ಪ್ಲೇಟ್ ಮೇಲೆ ಹರವಿ 2 ನಿಮಿಷ ಬಿಡಿ. ಹೀಗೆ ಮಾಡುವುದರಿಂದ ಸಕ್ಕರೆ ಪಾಕ ಗಟ್ಟಿಯಾಗಿ, ಕೈಗೆ ಅಂಟುವುದಿಲ್ಲ.
ತಯಾರಾದ ಗವ್ವಲು ವನ್ನು ಗಾಳಿಯಾಡದ ಕಂಟೇನರ್ ನಲ್ಲಿ ಹಾಕಿಟ್ಟು, ಬೇಕಾದಾಗ ಬಳಸಿ.  


ಟಿಪ್ಸ್:
  • ಗವ್ವಲು ಗರಿಯಾಗಲು ನಾನು ಇಲ್ಲಿ ಸೂಜಿ ರವೆಯನ್ನು ಬಳಸಿದ್ದೇನೆ. ಇದರ ಬದಲು ಚಿರೋಟಿ ರವೆ ಬಳಸಿದರೂ ಬಹಳ ಚೆನ್ನಾಗಿರುತ್ತದೆ. ಚಿರೋಟಿ ರವೆ ಬಳಸುವುದಾದರೆ ಜೊತೆಗೆ 2 ಚಮಚದಷ್ಟು ಸೂಜಿ ರವೆಯನ್ನೂ ಸೇರಿಸಬಹುದು. 
  • ಕಲಸಿದ ಹಿಟ್ಟು ಸ್ವಲ್ಪ ಮೆತ್ತಗಾಗಿಬಿಟ್ಟರೆ ಚಿಂತೆ ಬೇಡ, ಅದಕ್ಕೆ ಸ್ವಲ್ಪ ರವೆ ಸೇರಿಸಿ ಕಲಸಿ :)
  • ಬೇಕಾದಷ್ಟೇ ಹಿಟ್ಟನ್ನು ಪಾತ್ರೆಯಿಂದ ತೆಗೆದುಕೊಂಡು ಬಳಸಿ; ಇಲ್ಲದಿದ್ದರೆ ಹಿಟ್ಟು ಒಣಗಿದಂತಾಗುತ್ತದೆ.

Monday, 12 December 2011

ಹಾಗಲಕಾಯಿ ಪಲ್ಯ / Bitter Gourd Palya

Click here for English version.

ಕಳೆದ ವಾರ ತರಕಾರಿ ಕೊಳ್ಳಲು ಹೋದಾಗ ಅಂಗಡಿಯಲ್ಲಿ ಆಗ ತಾನೇ ತಂದ ಹಾಗಲಕಾಯಿಗಳನ್ನು ಜೋಡಿಸಿಡುತ್ತಿದ್ದರು. ನಾನು ತಕ್ಷಣ ಹೋಗಿ ಹಾಗಲಕಾಯಿಗಳನ್ನು ಎತ್ತಿ ಬಾಸ್ಕೆಟ್ ಗೆ ಹಾಕಿಕೊಂಡೆ. ಹಾಗಲಕಾಯಿ ಪಲ್ಯ ಮಾಡದೆ ತುಂಬಾ ದಿನಗಳಾಗಿಬಿಟ್ಟಿದ್ದವು. ಆಸ್ಟ್ರೇಲಿಯಾ ಕ್ಕೆ ಹೋದ ಹೊಸದರಲ್ಲಿ ಒಮ್ಮೆ ವೀಕೆಂಡ್ ಮಾರ್ಕೆಟ್ ನಲ್ಲಿ ಹಾಗಲಕಾಯಿ ತಂದು ಪಲ್ಯ ಮಾಡಿದ್ದೆ ನಾನು. ಅಲ್ಲಿ ಸಿಗುವ ತರಕಾರಿಗಳಲ್ಲಿ ನೀರಿನಂಶ ಜಾಸ್ತಿ! ಎರಡು - ಮೂರು ಹಾಗಲಕಾಯಿ ಹೆಚ್ಚಿ ಮಾಡಿದ ಪಲ್ಯ ಪೂರ್ತಿ ಹುರಿದು ನೀರಿನಂಶವೆಲ್ಲ ಇಂಗಿದ ನಂತರ ಉಳಿದದ್ದು ಕೆಲವೇ ಚಮಚಗಳಷ್ಟು! :D ನಂತರ ಅಲ್ಲಿದ್ದಷ್ಟು ದಿನ ಎಂದೂ ಹಾಗಲಕಾಯಿ ಪಲ್ಯ ಮಾಡುವ ಗೋಜಿಗೇ ಹೋಗಲಿಲ್ಲ ನಾನು!!
ಈ ಪಲ್ಯದ ವಿಧಾನವನ್ನು ನಾನು ಕಲಿತದ್ದು ಬೆಂಗಳೂರಿನಲ್ಲಿರುವ ನಮ್ಮ ಪರಿಚಯದವರೊಬ್ಬರಿಂದ. ನಮ್ಮ ಮನೆಯಲ್ಲಿ ಈ ಪಲ್ಯವನ್ನು ಸ್ವಲ್ಪ ಬೇರೆ ವಿಧಾನದಲ್ಲಿ ತಯಾರಿಸುತ್ತಾರೆ. ಹಾಗಲಕಾಯಿ ಪಲ್ಯವನ್ನು ಚೆನ್ನಾಗಿ ಹುರಿದು ಮಾಡುವುದರಿಂದ 10 - 12 ದಿನಗಳವರೆಗೆ ಕೆಡದೆ ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 1 1/2 ಘಂಟೆ
ಸರ್ವಿಂಗ್ಸ್: 8 - 9
  
ಬೇಕಾಗುವ ಸಾಮಗ್ರಿಗಳು:
ಹಾಗಲಕಾಯಿ - 2 
ಅರಿಶಿನ - 1/2 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು
ಆಮ್ ಚೂರ್ ಪೌಡರ್ ಅಥವಾ ಹುಳಿಪುಡಿ - ರುಚಿಗೆ ತಕ್ಕಷ್ಟು
ಬೆಲ್ಲ 2 - 3 ಚಮಚ ಅಥವಾ ರುಚಿಗೆ ತಕ್ಕಷ್ಟು

- ಒಗ್ಗರಣೆಗೆ: ಎಣ್ಣೆ 2 - 3 ಚಮಚ, ಒಣಮೆಣಸು - 1, ಉದ್ದಿನಬೇಳೆ - 1 ಚಮಚ, ಸಾಸಿವೆ - 1/4 ಚಮಚ, ಹಸಿಮೆಣಸು - 2, ಅರಿಶಿನ - ಚಿಟಿಕೆ, ಕರಿಬೇವು (ಬೇಕಿದ್ದರೆ) - ಐದಾರು ಎಲೆಗಳು  
- ಮಸಾಲೆ ಪುಡಿಗೆ: ಎಣ್ಣೆ - 1 / 2 ಚಮಚ, ಒಣಮೆಣಸು - 3, ಕಡಲೆಬೇಳೆ - 2 1/2 ಟೇಬಲ್ ಚಮಚ, ಉದ್ದಿನಬೇಳೆ - 1 1/2 ಟೇಬಲ್ ಚಮಚ, ಸೋಂಪು - 1 ಚಮಚ

ಮಾಡುವ ವಿಧಾನ:
ಹಾಗಲಕಾಯಿಯ ಬೀಜ ತೆಗೆದು ಸಣ್ಣಗೆ ಹೆಚ್ಚಿಕೊಳ್ಳಿ. ಇದಕ್ಕೆ 3 - 4 ಚಮಚ ಉಪ್ಪು, ಅರ್ಧ ಚಮಚ ಅರಿಶಿನ ಸೇರಿಸಿ ಕಲಸಿ ಅರ್ಧ ಘಂಟೆ ಇಡಿ.
ಹೆಚ್ಚಿದ ಹಾಗಲಕಾಯಿಯನ್ನು ನೀರಿನಂಶ ಹೋಗುವಂತೆ ಗಟ್ಟಿಯಾಗಿ ಹಿಂಡಿ, ಒಂದು ಬೌಲ್ ನಲ್ಲಿ ಹಾಕಿಟ್ಟುಕೊಳ್ಳಿ.
ಒಂದು ಅಗಲವಾದ ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು 2 - 3 ಚಮಚ ಎಣ್ಣೆ ಬಿಸಿಮಾಡಿಕೊಳ್ಳಿ. ನಂತರ ಒಣಮೆಣಸಿನ ಚೂರುಗಳು, ಉದ್ದಿನಬೇಳೆ, ಸಾಸಿವೆ, ಅರಿಶಿನ, ಹಸಿಮೆಣಸು, ಕರಿಬೇವು ಹಾಕಿ ಚಟಪಟ ಎಂದಮೇಲೆ ಹಿಂಡಿದ ಹಾಗಲಕಾಯಿ, ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್, ಬೆಲ್ಲ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
ಈ ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತ, ಸಣ್ಣ ಉರಿಯಲ್ಲಿ ಮುಕ್ಕಾಲು ಘಂಟೆ ಚೆನ್ನಾಗಿ ಹುರಿಯಿರಿ.
ಪಲ್ಯ ಹುರಿಯುವಷ್ಟರಲ್ಲಿ ಮಸಾಲೆ ಪುಡಿ ತಯಾರಿಸಿಕೊಳ್ಳಬಹುದು: ಮಸಾಲೆ ಪುಡಿಗೆ ಮೇಲೆ ಹೇಳಿದ ಸಾಮಗ್ರಿಗಳನ್ನು ಎಣ್ಣೆಯಲ್ಲಿ ಹುರಿದುಕೊಂಡು ಮಿಕ್ಸಿಯಲ್ಲಿ ಸ್ವಲ್ಪ ತರಿಯಾಗಿ ಪುಡಿಮಾಡಿಕೊಳ್ಳಿ.
ಪಲ್ಯ ಚೆನ್ನಾಗಿ ಹುರಿದ ನಂತರ ಮಸಾಲೆ ಪುಡಿ ಸೇರಿಸಿ ಚೆನ್ನಾಗಿ ಕೈಯಾಡಿಸಿ. 4 - 5 ನಿಮಿಷ ಹುರಿದು ಉರಿಯಿಂದ ಇಳಿಸಿದರೆ ಹಾಗಲಕಾಯಿ ಪಲ್ಯ ಅನ್ನದೊಡನೆ ಸವಿಯಲು ಸಿದ್ಧ!


ಟಿಪ್ಸ್:
  • ಹಾಗಲಕಾಯಿ ಹೆಚ್ಚಿಕೊಂಡು ಉಪ್ಪು, ಅರಿಶಿನ ಹಾಕಿಟ್ಟು ನಂತರ ನೀರಿನಂಶವನ್ನು ಹಿಂಡಿ ತೆಗೆದರೆ ಹಾಗಲಕಾಯಿಯ ಕಹಿ ಅಂಶವೆಲ್ಲ ಹೋಗುತ್ತದೆ.

Thursday, 8 December 2011

ಬಾಳೆಹಣ್ಣಿನ ರೊಟ್ಟಿ / Banana Rotti

Click here for English version.

ಬಾಳೆಹಣ್ಣಿನ ರೊಟ್ಟಿ ಮಾಡಿದಾಗಲೆಲ್ಲ ನೆನಪಾಗುತ್ತಿತ್ತು, ಬ್ಲಾಗ್ ನಲ್ಲಿ ಹಾಕಬೇಕೆಂದು. ಆದರೆ ಅಳತೆ ಪ್ರಕಾರ ಮಾಡುವುದಕ್ಕಿಂತ ಅಂದಾಜಿಗೆ ಮಾಡುವುದೇ ಜಾಸ್ತಿ :) ಹೀಗಾಗಿ ಕಳೆದ ಸಲ ರೊಟ್ಟಿ ಮಾಡಿದಾಗ ಅಳತೆಗಳನ್ನು ಬರೆದುಕೊಳ್ಳುತ್ತ ಮಾಡಿದೆ! ಮನೆಯಲ್ಲಿ ಚೆನ್ನಾಗಿ ಕಳಿತ ಬಾಳೆಹಣ್ಣು ಇದ್ದರೆ ಈ ರೊಟ್ಟಿ ಮಾಡಿನೋಡಿ. ತಿನ್ನಲು ತುಂಬ ರುಚಿ ಮತ್ತು ಮಾಡುವುದೂ ತುಂಬ ಸುಲಭ! ಮೆತ್ತಗೆ, ಸಿಹಿಯಾಗಿ, ಹೋಳಿಗೆಯಂತೆಯೇ ಇರುತ್ತದೆ. ಈ ರೊಟ್ಟಿ ಬೆಳಗಿನ ತಿಂಡಿ ಅಥವಾ ಟಿಫಿನ್ ಬಾಕ್ಸ್ ಗೆ ಒಯ್ಯಲು ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು 
ಸರ್ವಿಂಗ್ಸ್: 3 

ಬೇಕಾಗುವ ಸಾಮಗ್ರಿಗಳು:
ದೊಡ್ಡ ಬಾಳೆಹಣ್ಣು - 1 1/2 
ಅಕ್ಕಿಹಿಟ್ಟು - 2 ಕಪ್ 
ಗೋಧಿಹಿಟ್ಟು - 1/2 ಕಪ್ 
ನೀರು - 1 ಕಪ್ 
ಉಪ್ಪು - 1 1/4 ಚಮಚ ಅಥವಾ ರುಚಿಗೆ ತಕ್ಕಷ್ಟು 
ಸಕ್ಕರೆ - 4 ಚಮಚ 
ಬೆಲ್ಲ - 2 ಚಮಚ   
 
ಮಾಡುವ ವಿಧಾನ:
ಬಾಳೆಹಣ್ಣಿನ ಸಿಪ್ಪೆ ತೆಗೆದು ಹಣ್ಣನ್ನು ಮಧ್ಯಮಗಾತ್ರದ ಹೋಳುಗಳಾಗಿ ಹೆಚ್ಚಿಕೊಳ್ಳಿ. ಇವನ್ನು ಮಿಕ್ಸಿಯಲ್ಲಿ ಹಾಕಿ ನುಣ್ಣಗಿನ ಪೇಸ್ಟ್ ತಯಾರಿಸಿಕೊಳ್ಳಿ.
ಬಾಳೆಹಣ್ಣಿನ ಪೇಸ್ಟ್ ಗೆ ಉಪ್ಪು, ಸಕ್ಕರೆ, ಬೆಲ್ಲ ಮತ್ತು ನೀರು ಸೇರಿಸಿ 2 ನಿಮಿಷ ಕುದಿಸಿ. 
ನಂತರ ಇದಕ್ಕೆ ಅಕ್ಕಿಹಿಟ್ಟು ಮತ್ತು ಗೋಧಿಹಿಟ್ಟನ್ನು ಸೇರಿಸಿ ಎರಡು ನಿಮಿಷ ಕೈಯಾಡಿಸಿ. ಹೀಗೆ ಮಾಡುವುದರಿಂದ ಹಿಟ್ಟು ಬೆಂದು, ಚೆನ್ನಾಗಿ ಕೂಡಿಬರುತ್ತದೆ.
ಹಿಟ್ಟು ಉಂಡೆ ಕಟ್ಟುವ ಹದಕ್ಕೆ ಬಂದಾಗ ಒಲೆಯನ್ನು ಆರಿಸಿ, ಹಿಟ್ಟಿಗೆ ಒಂದು ಪ್ಲೇಟ್ ಮುಚ್ಚಿ ತಣಿಯಲು ಬಿಡಿ. 
ಹಿಟ್ಟು ತಣ್ಣಗಾದ ನಂತರ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿಕೊಂಡು ಒಣ ಹಿಟ್ಟಿನಲ್ಲಿ ಅದ್ದಿಕೊಂಡು ತೆಳ್ಳಗೆ ಲಟ್ಟಿಸಿ.
ರೊಟ್ಟಿಯನ್ನು ಕಾದ ತವಾದ ಮೇಲೆ ಬೇಯಿಸಿ, ತುಪ್ಪ ಹಾಕಿಕೊಂಡು ತಿನ್ನಿ.
ರೊಟ್ಟಿಯನ್ನು ತವಾದಿಂದ ತೆಗೆಯುವ ಮೊದಲು ಅದರಮೇಲೆ ಸ್ವಲ್ಪ ತುಪ್ಪ ಹಾಕಿ ಮಗುಚಿ ತೆಗೆದರೆ ಒಳ್ಳೆಯ ಪರಿಮಳದೊಂದಿಗೆ ತಿನ್ನಲು ಚೆನ್ನಾಗಿರುತ್ತದೆ.


ಟಿಪ್ಸ್:
  • ಬೆಳಗಿನ ತಿಂಡಿಗೆ ಈ ರೊಟ್ಟಿಯನ್ನು ಮಾಡುವುದಾದರೆ ರಾತ್ರಿಯೇ ಹಿಟ್ಟನ್ನು ಕಲಸಿಟ್ಟುಕೊಳ್ಳಬಹುದು.

Monday, 5 December 2011

ಅಮಟೆಕಾಯಿ ಸಾರು (ಅಮಟಿ) / Amatekayi Sambar (Amati)

Click here for English version.

ಕಳೆದ ಮೂರು ವರ್ಷಗಳಿಂದ ನಮ್ಮ ಬಳಿ ಒಂದು ಬಟರ್ ಫ್ಲೈ ಮಿಕ್ಸಿ ಇತ್ತು. ಆಸ್ಟ್ರೇಲಿಯಾ ದಿಂದ ವಾಪಾಸ್ ಬರುವಾಗ ಲಗೇಜ್ ಜಾಸ್ತಿಯಾಗುವುದೆಂದು ಅದನ್ನು ಅಲ್ಲಿಯೇ ಮಾರಾಟ ಮಾಡಬೇಕಾಯಿತು. ನನಗೆ ಆ ಬ್ರಾಂಡ್ ನ ಮಿಕ್ಸಿ ತುಂಬ ಇಷ್ಟವಾಗಿಬಿಟ್ಟಿದ್ದರಿಂದ ಪುನಃ ಅದೇ ತರಹದ ಮಿಕ್ಸಿಗಾಗಿ ಬೆಂಗಳೂರಿನಲ್ಲಿ ಹುಡುಕಿದೆವು. ಹೆಚ್ಚಿನ ಅಂಗಡಿಗಳಲ್ಲಿ ಬಟರ್ ಫ್ಲೈ ಮಿಕ್ಸಿಯೇ ಇಲ್ಲ..ಇದ್ದರೂ ನನಗೆ ಬೇಕಾದ ಮಾಡೆಲ್ ಇಲ್ಲ! ನನಗಂತೂ ಯಾಕಾದರೂ ಆ ಮಿಕ್ಸಿಯನ್ನು ಬಿಟ್ಟು ಬಂದೆವೋ ಎನ್ನಿಸಿಬಿಟ್ಟಿತ್ತು! ತುಂಬ ಹುಡುಕಿ ಹುಡುಕಿ, ಕೊನೆಗೂ ಅಂಥದೇ ಮಿಕ್ಸಿ ಸಿಕ್ಕಿತು! ನನ್ನ ಅಕ್ಕ 10 ವರ್ಷಗಳಿಂದ ಬಟರ್ ಫ್ಲೈ ಮಿಕ್ಸಿ ಬಳಸುತ್ತಿದ್ದಾರೆ. ಅವರ ಸಲಹೆಯ ಮೇರೆಗೆ ನಾವು ಆ ಬ್ರಾಂಡ್ ನ ಮಿಕ್ಸಿ ತೆಗೆದುಕೊಂಡಿದ್ದೆವು. ಅದರ ಜೊತೆಗೆ ಬರುವ ಜ್ಯೂಸ್ ಜಾರ್ ಎಂದರೆ ನನಗೆ ತುಂಬ ಇಷ್ಟ! ಈಗ ಅಂಥ ಮಾಡೆಲ್ ಬರುತ್ತಿಲ್ಲ ಎಂದು ಹೇಳುತ್ತಾರೆ; ಇಷ್ಟು ಒಳ್ಳೆಯ ಮಾಡೆಲ್ ಏಕೆ ಜನಪ್ರಿಯತೆ ಕಳೆದುಕೊಳ್ಳುತ್ತಿದೆಯೆಂದು ಗೊತ್ತಿಲ್ಲ.. ನಾನಂತೂ ನಿರ್ಧಾರ ಮಾಡಿಬಿಟ್ಟಿದ್ದೇನೆ, ಆದಷ್ಟು ವರ್ಷ ಈ ಮಿಕ್ಸಿಯನ್ನು ಚೆನ್ನಾಗಿ ಇಟ್ಟುಕೊಳ್ಳಬೇಕೆಂದು! 
ನಾವು ಒಮ್ಮೆ ಊರಿಗೆ ಹೋಗಿ ಬಂದೆವೆಂದರೆ ಅಲ್ಲಿನ ತರಕಾರಿ, ಸೊಪ್ಪುಗಳ ಸ್ಟಾಕ್ ತುಂಬ ದಿನಗಳವರೆಗೆ ನಮ್ಮ ಫ್ರಿಜ್ ನಲ್ಲಿರುತ್ತದೆ. ಊರಿಗೆ ಹೋದಾಗ ನಮಗೆ ಅಪರೂಪವೆಂದು ಪರಿಚಿತರೊಬ್ಬರು ಅವರ ಮನೆಯಿಂದ ಅಮಟೆಕಾಯಿ ತಂದುಕೊಟ್ಟಿದ್ದರು. ಅಮಟೆಕಾಯಿ ಎಂದರೆ ತುಂಬಾ ಹುಳಿ ಇರುವ ಒಂದು ಬಗೆಯ ತರಕಾರಿ. ಇದನ್ನು ಅಂಬಟೆಕಾಯಿ ಎಂತಲೂ ಹೇಳುತ್ತಾರೆ. ಇದರ ಒಳಗೆ ಜಿಗುಟಿನಿಂದ ಕೂಡಿದ ದೊಡ್ಡ ಬೀಜವಿರುತ್ತದೆ. ಅಮಟೆಕಾಯಿ ಬಳಸಿ ಅನೇಕ ವಿಧದ ಅಡಿಗೆಗಳನ್ನು ಮಾಡಬಹುದು. ಅಮಟೆಕಾಯಿ ಬಳಸಿ ಮಾಡಿದ ಸಾರಿಗೆ ಅಮಟಿ ಎಂದು ಹೇಳುತ್ತಾರೆ. ಸಿಹಿ, ಹುಳಿ, ಖಾರ ಮೂರೂ ಹದವಾಗಿರುವ ಈ ಅಮಟಿ ಊಟಕ್ಕೆ ಬಹಳ ರುಚಿ.


ತಯಾರಿಸಲು ಬೇಕಾಗುವ ಸಮಯ: 25 ನಿಮಿಷಗಳು
ಸರ್ವಿಂಗ್ಸ್: 4 - 5

ಬೇಕಾಗುವ ಸಾಮಗ್ರಿಗಳು:
ಅಮಟೆ (ಅಂಬಟೆ) ಕಾಯಿ - 6
ಲವಂಗ - 3
ಕೊತ್ತಂಬರಿ - 1 1/4 ಚಮಚ
ಸಾಸಿವೆ - 1 /2 ಚಮಚ
ಒಣಮೆಣಸು - 3 (ಖಾರಕ್ಕೆ ತಕ್ಕಂತೆ)
ತೆಂಗಿನತುರಿ - 1/2 ಕಪ್
ರುಚಿಗೆ ತಕ್ಕಷ್ಟು ಉಪ್ಪು
ಬೆಲ್ಲ - 4 ಚಮಚ (ಸಿಹಿಯಾಗುವಷ್ಟು)
ಒಗ್ಗರಣೆಗೆ: ಎಣ್ಣೆ - 2 ಚಮಚ, ಉದ್ದಿನಬೇಳೆ - 1/2 ಚಮಚ, ಸಾಸಿವೆ - 1/4 ಚಮಚ, ಚಿಟಿಕೆ ಇಂಗು, ಕರಿಬೇವು

ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ 3 ಲೋಟದಷ್ಟು ನೀರು ಹಾಕಿ ಅಮಟೆಕಾಯಿಯನ್ನು ಮೆತ್ತಗೆ ಬೇಯಿಸಿ.
ಬೆಂದ ಅಮಟೆಕಾಯಿ ತಣ್ಣಗಾದ ನಂತರ ಅದಕ್ಕೆ ಉಪ್ಪು, ಬೆಲ್ಲ ಸೇರಿಸಿ. ಅಮಟೆಕಾಯಿಯನ್ನು ಹಿಂಡಿ, ಸಿಪ್ಪೆ ಹಾಗೂ ಓಟೆಯನ್ನು ಆ ಮಿಶ್ರಣದಲ್ಲೇ ಬಿಡಿ.
ಲವಂಗ, ಕೊತ್ತಂಬರಿ, ಒಣಮೆಣಸು, ಸಾಸಿವೆ ಇಷ್ಟನ್ನೂ ಒಂದು ಚಮಚ ಎಣ್ಣೆ ಹಾಕಿ ಹುರಿದುಕೊಂಡು, ತೆಂಗಿನತುರಿಯೊಡನೆ ನುಣ್ಣಗೆ ರುಬ್ಬಿಕೊಳ್ಳಿ.
ಒಂದು ದಪ್ಪ ತಳದ ಪಾತ್ರೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ, ಉದ್ದಿನಬೇಳೆ, ಸಾಸಿವೆ, ಇಂಗು, ಕರಿಬೇವಿನ ಒಗ್ಗರಣೆ ಮಾಡಿಕೊಳ್ಳಿ. ಇದಕ್ಕೆ ಅಮಟೆಕಾಯಿ ಮಿಶ್ರಣ, ರುಬ್ಬಿದ ಮಸಾಲೆ ಹಾಕಿ 4 - 5 ನಿಮಿಷ ಕುದಿಸಿ ಇಳಿಸಿ.
ಈ ಅಮಟಿ ಅನ್ನದೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ. ಫ್ರಿಜ್ ನಲ್ಲಿಟ್ಟು 1 ವಾರದವರೆಗೂ ಬಳಸಬಹುದು.  
 

Wednesday, 30 November 2011

ರಿಚ್ ಆಪಲ್ ಕಸ್ಟರ್ಡ್ / Rich Apple Custard

Click here for English version.
 
ಸೇಬು ಹಣ್ಣಿನ ಸೀಜನ್ ನಲ್ಲಿ ನಾನು ಹೆಚ್ಚಾಗಿ ತಯಾರಿಸುವ ಡೆಸರ್ಟ್ ಇದು. ಮನೆಗೆ ಯಾರಾದರೂ ಅತಿಥಿಗಳು ಬರುವರೆಂದರೆ ಇದನ್ನು ಮೊದಲೇ ತಯಾರಿಸಿ ಫ್ರಿಜ್ ನಲ್ಲಿ ಇಟ್ಟುಕೊಳ್ಳಬಹುದು. ಆಪಲ್ ಕಸ್ಟರ್ಡ್ ಜೊತೆಗೆ ವೆನಿಲ್ಲಾ ಐಸ್ ಕ್ರೀಮ್ ಒಳ್ಳೆಯ ಕಾಂಬಿನೇಶನ್. ಇದಕ್ಕೆ ಐಸ್ ಕ್ರೀಮ್ ಹಾಕದಿದ್ದರೂ ಆಗುತ್ತದೆ. ಆದರೆ ಐಸ್ ಕ್ರೀಮ್ ಸೇರಿಸಿದರೆ ರುಚಿ ಹೆಚ್ಚು. ಐಸ್ ಕ್ರೀಮ್ ಬಳಸದಿದ್ದರೆ ಹೆಚ್ಚು ಡ್ರೈ ಫ್ರೂಟ್ಸ್ ಬಳಸಿದರೆ ಒಳ್ಳೆಯದು. ನನ್ನ ಬಳಿ ವೆನಿಲ್ಲಾ ಐಸ್ ಕ್ರೀಮ್ ಸ್ಟಾಕ್ ಇರದಿದ್ದರಿಂದ ಬ್ಲಾಕ್ ಕರೆಂಟ್ ಐಸ್ ಕ್ರೀಮ್ ನ್ನು ಬಳಸಿದ್ದೇನೆ. ಡೆಕೋರೇಶನ್ ಗೆ ನಿಮ್ಮ ಇಷ್ಟದ ಡ್ರೈ ಫ್ರೂಟ್ಸ್ ಬಳಸಬಹುದು.   


ತಯಾರಿಸಲು ಬೇಕಾಗುವ ಸಮಯ: 1/2 ಘಂಟೆ
ತಣ್ಣಗಾಗಲು ಬೇಕಾಗುವ ಸಮಯ: 2 ಘಂಟೆ 
ಸರ್ವಿಂಗ್ಸ್ - 3 
   
ಬೇಕಾಗುವ ಸಾಮಗ್ರಿಗಳು:
ಹಾಲು - 2 1/2 ಕಪ್
ಅರ್ಧ ಸೇಬುಹಣ್ಣು 
ಚೆನ್ನಾಗಿ ಕಳಿತ 1 ದೊಡ್ಡ ಬಾಳೆಹಣ್ಣು 
ಕಸ್ಟರ್ಡ್ ಪೌಡರ್ - 2 ಟೇಬಲ್ ಸ್ಪೂನ್
ಸಕ್ಕರೆ - 5 ಸ್ಪೂನ್ (ಸಿಹಿಯಾಗುವಷ್ಟು) 
ಚಿಟಿಕೆ ಉಪ್ಪು
ಐಸ್ ಕ್ರೀಮ್ - 3 ಸ್ಕೂಪ್ 
ಅಲಂಕಾರಕ್ಕೆ ಗೋಡಂಬಿ, ದ್ರಾಕ್ಷಿ, ಚೆರ್ರಿ


ಮಾಡುವ ವಿಧಾನ:
ಒಂದೂವರೆ ಕಪ್ ನಷ್ಟು ಹಾಲಿಗೆ ಕಸ್ಟರ್ಡ್ ಪೌಡರ್ ಸೇರಿಸಿ ಗಂಟಿಲ್ಲದಂತೆ ಕದಡಿ. ಇದನ್ನು ಬಿಸಿಗಿಟ್ಟು ಸಣ್ಣ ಉರಿಯಲ್ಲಿ ಬಿಡದೆ ಕೈಯಾಡಿಸುತ್ತಿರಿ.
ಕಸ್ಟರ್ಡ್ ಮಿಶ್ರಣ ದೋಸೆ ಹಿಟ್ಟಿನಷ್ಟು ದಪ್ಪಗಾದಾಗ ಉರಿಯಿಂದ ಇಳಿಸಿ ತಣ್ಣಗಾಗಲು ಬಿಡಿ.
ಸೇಬು ಹಣ್ಣನ್ನು ಸಿಪ್ಪೆಸಹಿತ ಸಣ್ಣಗೆ ಹೆಚ್ಚಿಕೊಳ್ಳಿ. ಬಾಳೆಹಣ್ಣನ್ನೂ ಸಣ್ಣಗೆ ಹೆಚ್ಚಿಕೊಳ್ಳಿ. 


ಕಸ್ಟರ್ಡ್ ಮಿಶ್ರಣ ತಣ್ಣಗಾದ ನಂತರ ಅದಕ್ಕೆ ಹೆಚ್ಚಿದ ಹಣ್ಣುಗಳು, ಸಕ್ಕರೆ, ಚಿಟಿಕೆ ಉಪ್ಪು ಮತ್ತು 1 ಕಪ್ ನಷ್ಟು ಹಾಲು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ 2 - 3 ಘಂಟೆಕಾಲ ಫ್ರಿಜ್ ನಲ್ಲಿಟ್ಟು ತಣ್ಣಗಾಗಲು ಬಿಡಿ.
ಸರ್ವ್ ಮಾಡುವ ಮುನ್ನ ಕಸ್ಟರ್ಡ್ ನ್ನು 3 ಬೌಲ್ ಗಳಿಗೆ ಹಾಕಿ, ಮೇಲಿನಿಂದ ಒಂದೊಂದು ಸ್ಕೂಪ್ ಐಸ್ ಕ್ರೀಮ್ ಹಾಕಿ. ಮೇಲಿನಿಂದ ಚೆರ್ರಿ ಇಟ್ಟು ಅಲಂಕರಿಸಿ. ನಂತರ ಗೋಡಂಬಿ, ದ್ರಾಕ್ಷಿ ಉದುರಿಸಿ. ಡ್ರೈ ಫ್ರೂಟ್ಸ್ ಜಾಸ್ತಿ ಬಳಸಿದಷ್ಟೂ ರುಚಿ ಹೆಚ್ಚು.


Monday, 28 November 2011

ಸೌತೆಕಾಯಿ ಇಡ್ಲಿ / Cucumber Idli

Click here for English version.

ನನಗೆ ಹೊಸ ಅಡಿಗೆಗಳನ್ನು ಕಲಿಯುವುದೆಂದರೆ ತುಂಬ ಇಷ್ಟ. ಇದಕ್ಕೆ ನನ್ನ ಅಮ್ಮನ ಸಹಕಾರವೂ ತುಂಬ ಇದೆ. ಅವರು ಪುಸ್ತಕದಲ್ಲಿ ಎಲ್ಲಾದರೂ ಹೊಸ ಬಗೆಯ ಅಡಿಗೆ ಕಂಡರೆ, ಅಥವಾ ನೆಂಟರ ಮನೆಗೆ ಹೋದಾಗ ಏನಾದರೂ ಹೊಸ ಬಗೆಯ ತಿಂಡಿಗಳನ್ನು ಮಾಡಿದ್ದರೆ ಅದರ ವಿಧಾನವನ್ನು ತಿಳಿದುಕೊಂಡು ಬರೆದಿಟ್ಟಿರುತ್ತಾರೆ. ಅಲ್ಲದೆ ಅಡಿಗೆಯ ರುಚಿ ಹೆಚ್ಚಿಸಲು ಹೊಸ ಹೊಸ ಟಿಪ್ಸ್ ಗಳಿದ್ದರೆ ಅದನ್ನೂ ನೆನಪಿಟ್ಟುಕೊಂಡು ನಮಗೆಲ್ಲ ಹೇಳುತ್ತಾರೆ. 
ಅಮ್ಮನ ಕಲೆಕ್ಷನ್ ನಿಂದ ಕಲಿತ ಇಡ್ಲಿ ರೆಸಿಪಿ ಇಲ್ಲಿದೆ. ಇದು ಅಕ್ಕಿ ಹಾಗೂ ಸೌತೆಕಾಯಿ ಬಳಸಿ ಮಾಡುವ ಇಡ್ಲಿ. ಬೆಳಗಿನ ತಿಂಡಿಗೆ ತುಂಬ ಚೆನ್ನಾಗಿರುತ್ತದೆ. ಅಕ್ಕಿ ಹಾಕಿ ಮಾಡಿರುವುದರಿಂದ ಈ ಇಡ್ಲಿ ತಿಂದರೆ ಬೇಗ ಹಸಿವೆಯೂ ಆಗುವುದಿಲ್ಲ. ಈ ಇಡ್ಲಿಗೆ ಹಿಟ್ಟು ಹುದುಗುಬರುವ ಅಗತ್ಯವಿಲ್ಲ. ಹೀಗಾಗಿ ಆಗಿಂದಾಗ್ಗೆ ಹಿಟ್ಟನ್ನು ತಯಾರಿಸಿ ಇಡ್ಲಿ ಮಾಡಬಹುದು!


ತಯಾರಿಸಲು ಬೇಕಾಗುವ ಸಮಯ: 35 ನಿಮಿಷಗಳು 
ಬೇಯಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು 
ಸರ್ವಿಂಗ್ಸ್ : ಇಬ್ಬರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - 1 1/2 ಕಪ್ 
1 ಮಧ್ಯಮಗಾತ್ರದ ಸೌತೆಕಾಯಿ 
ತೆಂಗಿನತುರಿ - 3/4 ಕಪ್ 
ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ)
ಶುಂಠಿ - 1/2 ಇಂಚು 
ಹೆಚ್ಚಿದ ಕೊತ್ತಂಬರಿ ಸೊಪ್ಪು - 1/4 ಕಪ್   
ಜೀರಿಗೆ - 1/4 ಚಮಚ  
ಮೆಂತ್ಯ - 1/4 ಚಮಚ
ಓಮ (ಅಜವಾನ) - 1/4 ಚಮಚ
ರುಚಿಗೆ ತಕ್ಕಷ್ಟು ಉಪ್ಪು 


ಮಾಡುವ ವಿಧಾನ:
ಅಕ್ಕಿಯನ್ನು ತೊಳೆದು ನೀರನ್ನೆಲ್ಲ ಬಸಿದು ಒಂದು ಕಾಟನ್ ಬಟ್ಟೆಯಮೇಲೆ 10 - 15 ನಿಮಿಷ ಹರವಿ. ನಂತರ ಇದನ್ನು ಮಿಕ್ಸಿಯಲ್ಲಿ ಇಡ್ಲಿ ರವೆಯ ಹದಕ್ಕೆ ಪುಡಿಮಾಡಿಕೊಳ್ಳಿ. ಈ ಅಕ್ಕಿತರಿಯನ್ನು ಹಿಂದಿನ ರಾತ್ರಿಯೇ ಮಾಡಿಟ್ಟುಕೊಂಡರೂ ಆಗುತ್ತದೆ.
ಜೀರಿಗೆ, ಮೆಂತ್ಯ, ಓಮ ಇಷ್ಟನ್ನೂ ಎಣ್ಣೆ ಹಾಕದೆ ಹುರಿದು, ನುಣ್ಣಗೆ ಪುಡಿಮಾಡಿಕೊಳ್ಳಿ. ಮೂರು ಸಾಮಗ್ರಿಗಳನ್ನೂ ತಲಾ ಕಾಲು ಚಮಚ ಹಾಕಿ ಪುಡಿ ತಯಾರಿಸಿಕೊಂಡರೆ ಅದನ್ನು 2 ಸಲ ಇಡ್ಲಿ ಮಾಡಲು ಬಳಸಬಹುದು.   
ಸೌತೆಕಾಯಿಯನ್ನು ಸಿಪ್ಪೆ ತೆಗೆದು ತುರಿದುಕೊಳ್ಳಿ. ಹಸಿಮೆಣಸನ್ನು ಹೆಚ್ಚಿಕೊಳ್ಳಿ. ಶುಂಠಿ ಜಜ್ಜಿಕೊಳ್ಳಿ. 
ತುರಿದ ಸೌತೆಕಾಯಿಗೆ ಅಕ್ಕಿ ತರಿ, ತೆಂಗಿನತುರಿ, ಹೆಚ್ಚಿದ ಹಸಿಮೆಣಸು, ಜಜ್ಜಿದ ಶುಂಠಿ, ಹೆಚ್ಚಿದ ಕೊತ್ತಂಬರಿ ಸೊಪ್ಪು, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ. ಮೆಂತ್ಯ, ಜೀರಿಗೆ, ಓಮ ಪುಡಿಯನ್ನೂ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
ಇಡ್ಲಿ ಪ್ಲೇಟ್ ನ್ನು ನೀರಿನಲ್ಲಿ ತೊಳೆದುಕೊಂಡು ಅದಕ್ಕೆ ಸ್ವಲ್ಪ ಎಣ್ಣೆ ಸವರಿಕೊಂಡು ಕಲಸಿದ ಇಡ್ಲಿ ಹಿಟ್ಟನ್ನು ಹಾಕಿ 25 - 30 ನಿಮಿಷ ಬೇಯಿಸಿ. ನನ್ನ ಇಡ್ಲಿ ಕಡಾಯಿಯಲ್ಲಿ 25 ನಿಮಿಷಕ್ಕೆ ಇಡ್ಲಿ ಚೆನ್ನಾಗಿ ಬೆಂದಿರುತ್ತದೆ.
ಬಿಸಿ ಬಿಸಿ ಇಡ್ಲಿಯನ್ನು ತೆಂಗಿನತುರಿ ಚಟ್ನಿಯೊಡನೆ ತಿನ್ನಿ.
  
  

Friday, 25 November 2011

ಕನ್ನೆಕುಡಿ (ಸೊರಲೆಕುಡಿ) ಕಟ್ನೆ / Kannekudi (Soralekudi) Katne

Click here for English version.
 
ಕನ್ನೆಕುಡಿ ಅಥವಾ ಸೊರಲೆಕುಡಿ ಎಂದರೆ ಮಲೆನಾಡ ಕಡೆ ಅಡಿಗೆಗೆ ಬಳಸುವ ಒಂದು ಬಗೆಯ ಎಲೆ. ಈ ಗಿಡದ ವೈಜ್ಞಾನಿಕ ಹೆಸರು ನನಗೆ ತಿಳಿಯದು. ಇದರ ಗಿಡ ಚಿಕ್ಕ ಪೊದೆಯಂತೆ ಇರುತ್ತದೆ. ಮಳೆಗಾಲದ ಸಮಯದಲ್ಲಿ ಇದರ ಅಡಿಗೆಗಳನ್ನು ಹೆಚ್ಚಾಗಿ ತಯಾರಿಸುತ್ತಾರೆ. ಶೀತ, ಜ್ವರ ಇತ್ಯಾದಿ ಅನಾರೋಗ್ಯ ಕಾಡಿದಾಗ ಕನ್ನೆಕುಡಿಯ ಕಟ್ನೆ ಮಾಡಿಕೊಂಡು ಉಣ್ಣುವುದು ಆರೋಗ್ಯದ ದೃಷ್ಟಿಯಿಂದ ತುಂಬ ಒಳ್ಳೆಯದು.  
ಕನ್ನೆಕುಡಿಯ ಕಟ್ನೆ ಊಟಕ್ಕೆ ತುಂಬ ರುಚಿ. ಕನ್ನೆಕುಡಿಯ ಬದಲು ಪಾಲಕ್ ಸೊಪ್ಪನ್ನು ಬಳಸಿಯೂ ಕಟ್ನೆ ತಯಾರಿಸಬಹುದು. 


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಸರ್ವಿಂಗ್ಸ್ - 4 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಕನ್ನೆಕುಡಿ (ಸೊರಲೆಕುಡಿ) - 25 ಎಲೆಗಳು
ಕಾಳುಮೆಣಸು - 15 
ಜೀರಿಗೆ - 3/4 ಚಮಚ 
ಒಗ್ಗರಣೆಗೆ ಎಣ್ಣೆ 
ಬೆಳ್ಳುಳ್ಳಿ 7 - 8 ಎಸಳು 
ಸಾಸಿವೆ - 1/4 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು
ನಿಂಬೆಹಣ್ಣು - 1 
ತೆಂಗಿನತುರಿ - 1 ಕಪ್ 


ಮಾಡುವ ವಿಧಾನ:
ಕನ್ನೆಕುಡಿ ಎಲೆಗಳನ್ನು ಚೆನ್ನಾಗಿ ತೊಳೆದುಕೊಂಡು ತೊಟ್ಟು ಮತ್ತು ಎಲೆಯಲ್ಲಿರುವ ನಾರನ್ನು ತೆಗೆದುಬಿಡಿ.
ಬಾಣಲೆಯಲ್ಲಿ ಎರಡು ಚಮಚ ಎಣ್ಣೆ ಕಾಯಿಸಿ ಕಾಳುಮೆಣಸು ಹಾಕಿ ಚಟಪಟ ಸದ್ದು ಬರುವವರೆಗೆ ಹುರಿಯಿರಿ. 
ನಂತರ ಜೀರಿಗೆ ಸೇರಿಸಿ ಒಮ್ಮೆ ಕೈಯಾಡಿಸಿ, ಕನ್ನೆಕುಡಿ ಎಲೆಗಳನ್ನು ಸೇರಿಸಿ 2 - 3 ನಿಮಿಷ ಬಾಡಿಸಿ. ಎಲೆಗಳ ಬಣ್ಣ ಬದಲಾಗುತ್ತಿದ್ದಂತೆ ಉರಿಯನ್ನು ಆಫ್ ಮಾಡಿ. 
ಹುರಿದ ಸಾಮಗ್ರಿಗಳನ್ನು ತೆಂಗಿನತುರಿಯೊಡನೆ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ.    
ರುಬ್ಬಿದ ಮಿಶ್ರಣಕ್ಕೆ 3 - 4 ಕಪ್ ನೀರು ಸೇರಿಸಿ ತೆಳ್ಳಗೆ ಮಾಡಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ 5 ನಿಮಿಷ ಚೆನ್ನಾಗಿ ಕುದಿಸಿ.
ಕುದಿಸಿ ಇಳಿಸಿದ ನಂತರ ನಿಂಬೆರಸ ಸೇರಿಸಿ. ನಂತರ ಇದಕ್ಕೆ ಸಾಸಿವೆ ಮತ್ತು ಜಜ್ಜಿದ ಬೆಳ್ಳುಳ್ಳಿ ಹಾಕಿ ಒಗ್ಗರಣೆ ಮಾಡಿ. 
ಬಿಸಿ ಕಟ್ನೆಯನ್ನು ಅನ್ನದೊಡನೆ ಸರ್ವ್ ಮಾಡಿ. ಇದು ಊಟಕ್ಕೂ ರುಚಿ, ಆರೋಗ್ಯಕ್ಕೂ ಹಿತಕರ.


ಟಿಪ್ಸ್:
  • ನಿಂಬೆರಸದ ಬದಲು ಆಮ್ ಚೂರ್ ಪೌಡರ್ ನ್ನೂ ಬಳಸಬಹುದು. ಆದರೆ ನಿಂಬೆರಸ ಬಳಸುವುದರಿಂದ ಕಟ್ನೆಗೆ ವಿಶೇಷ ಪರಿಮಳ ಬರುತ್ತದೆ. 

Monday, 21 November 2011

ಸಾಂಬಾರ್ ಅಪ್ಪೆಹುಳಿ / Sambar Appehuli

Click here for English version.

ಅಂತೂ ಇಂತೂ ಇಂದು ಪೋಸ್ಟಿಂಗ್ ಮಾಡಲು ಟೈಮ್ ಸಿಕ್ಕಿತು! ಆಸ್ಟ್ರೇಲಿಯಾದಿಂದ ಭಾರತಕ್ಕೆ ವಾಪಸ್ ಬಂದು ಇಲ್ಲಿ ಸೆಟ್ ಆಗುತ್ತಿರುವುದರಿಂದ ಅದೂ ಇದೂ ಕೆಲಸಗಳು..ಜೊತೆಗೆ ಊರಿನ ಪ್ರವಾಸದಿಂದ ನಮ್ಮ ಬ್ಯುಸಿ ಲೈಫ್ ಗೆ ಒಂದಿಷ್ಟು ವಿರಾಮ. ಇನ್ನುಮೇಲೆ ಶುರುವಾಗಬೇಕು ನನ್ನ ಅಡಿಗೆ ದಿನಚರಿ!
ಹವ್ಯಕರ ಅಡಿಗೆ ಎಂದ ತಕ್ಷಣ ನೆನಪಾಗುವುದು ತಂಬುಳಿ ಮತ್ತು ಅಪ್ಪೆಹುಳಿ. ಈ ತಂಬುಳಿ ಮತ್ತು ಅಪ್ಪೆಹುಳಿಯಲ್ಲೂ ಅನೇಕ ವಿಧಗಳಿವೆ. ಅಪ್ಪೆಹುಳಿಯನ್ನು ಮಾವಿನಕಾಯಿ, ನಿಂಬೆಕಾಯಿ, ಕಂಚಿಕಾಯಿ ಇತ್ಯಾದಿ ಹುಳಿ ಅಂಶ ಹೆಚ್ಚಾಗಿರುವ ಹಣ್ಣು / ತರಕಾರಿಗಳಿಂದ ತಯಾರಿಸುತ್ತಾರೆ. ಕಂಚಿಕಾಯಿ ಎಂದರೆ ನಿಂಬೆ ಹಣ್ಣಿನ ವರ್ಗದ, ಆದರೆ ನಿಂಬೆ ಹಣ್ಣಿಗಿಂತ ದೊಡ್ಡದಾದ ಒಂದು ಹುಳಿ ಹಣ್ಣು. ಮಲೆನಾಡ ಕಡೆ ಸಾಮಾನ್ಯವಾಗಿ ಎಲ್ಲರ ಮನೆಯ ಹಿತ್ತಿಲಲ್ಲೂ ಒಂದು ಕಂಚಿಗಿಡ ಇದ್ದೇ ಇರುತ್ತದೆ. ಊರಿಂದ ತಂದ ಕಂಚಿಕಾಯಿ ತುಂಬಾ ಇತ್ತು ಮನೆಯಲ್ಲಿ. ಅದನ್ನು ಬಳಸಿ ತಯಾರಿಸಿದ ಅಪ್ಪೆಹುಳಿ ಇದು. ಇದನ್ನು  ಚೆನ್ನಾಗಿ ಕುದಿಸಿಟ್ಟು ನಾಲ್ಕೈದು ದಿನಗಳವರೆಗೂ ಬಳಸಬಹುದು.



ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಸರ್ವಿಂಗ್ಸ್: 5 - 6 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಕಂಚಿಕಾಯಿ - 2 (ಅಥವಾ ಕಂಚಿಕಾಯಿಯ ರಸ - 1 ಕಪ್)
ಲವಂಗ - 3 
ಕೊತ್ತಂಬರಿ - 1 1/2 ಚಮಚ
ಸಾಸಿವೆ - 1/2 ಚಮಚ
ಒಣಮೆಣಸು - 3 (ಖಾರಕ್ಕೆ ತಕ್ಕಂತೆ)
ತೆಂಗಿನತುರಿ - 3 ರಿಂದ 4 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಬೆಲ್ಲ - 1 ನಿಂಬೆಗಾತ್ರದಷ್ಟು ಅಥವಾ ಸಿಹಿಯಾಗುವಷ್ಟು
ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಇಂಗು, ಕರಿಬೇವು  

ಮಾಡುವ ವಿಧಾನ:
ಕಂಚಿಕಾಯಿಯ ಸಿಪ್ಪೆ ತೆಗೆದು, ಎರಡು ಭಾಗ ಮಾಡಿಕೊಳ್ಳಿ.
ಒಂದು ಬೌಲ್ ನಲ್ಲಿ ಒಂದು ಚಮಚದಷ್ಟು ಉಪ್ಪು ಹಾಕಿಕೊಂಡು, ಅದಕ್ಕೆ ಕಂಚಿಕಾಯಿಯ ರಸವನ್ನು ಹಿಂಡಿ. ಉಪ್ಪನ್ನು ಹಾಕಿಕೊಳ್ಳುವುದರಿಂದ ಕಂಚಿ ರಸ ಕಹಿಯಾಗುವುದಿಲ್ಲ.
ಬಾಣಲೆಯಲ್ಲಿ ಒಂದು ಚಮಚದಷ್ಟು ಎಣ್ಣೆ ಕಾಯಿಸಿ ಲವಂಗ, ಒಣಮೆಣಸು, ಸಾಸಿವೆ, ಕೊತ್ತಂಬರಿ ಹಾಕಿ ಪರಿಮಳ ಬರುವಂತೆ ಹುರಿದುಕೊಳ್ಳಿ.    
ಹುರಿದ ಸಾಮಗ್ರಿಗಳನ್ನು ಕಾಯಿತುರಿ ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ. ರುಬ್ಬುವಾಗ ನೀರಿನ ಬದಲು ಕಂಚಿರಸವನ್ನೇ ಬಳಸಿ.
ರುಬ್ಬಿಕೊಂಡ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಬೆಲ್ಲ ಸೇರಿಸಿ ಐದು ನಿಮಿಷ ಕುದಿಸಿ. ಅಪ್ಪೆಹುಳಿಯನ್ನು ತೆಳ್ಳಗೆ ಮಾಡಲು ಕುದಿಸುವ ಮುನ್ನ ಒಂದೂವರೆಯಿಂದ ಎರಡು ಕಪ್ ನಷ್ಟು ನೀರನ್ನು ಸೇರಿಸಿ.
ಅಪ್ಪೆಹುಳಿಯನ್ನು ಕುದಿಸಿ ಇಳಿಸಿದ ನಂತರ ಸಾಸಿವೆ, ಇಂಗು, ಕರಿಬೇವಿನ ಒಗ್ಗರಣೆ ಕೊಡಿ.
ಈ ಅಪ್ಪೆಹುಳಿ ಅನ್ನದೊಡನೆ ಹಾಕಿಕೊಳ್ಳಲು ಅಥವಾ ಹಾಗೇ ನೆಂಜಿಕೊಳ್ಳಲು ಚೆನ್ನಾಗಿರುತ್ತದೆ. ಚೆನ್ನಾಗಿ ಕುದಿಸಿ ನಾಲ್ಕೈದು ದಿನ ಇಟ್ಟುಕೊಂಡು ಬಳಸಬಹುದು.


ಟಿಪ್ಸ್:
  • ನಿಂಬೆ ಹಣ್ಣಿನಿಂದಲೂ ಈ ಅಪ್ಪೆಹುಳಿಯನ್ನು ತಯಾರಿಸಬಹುದು.

Tuesday, 8 November 2011

ಬೆಂಡೆಕಾಯಿ ರಸಂ / Okra Rasam

Click here for English version.
 
ಬಹಳ ಸುಲಭವಾಗಿ, ಕಡಿಮೆ ಸಮಯದಲ್ಲಿ ತಯಾರಿಸಬಹುದಾದ ರಸಂ ಇದು. ಆಫೀಸಿಗೆ ಹೋಗಿಬಂದು ಸುಸ್ತಾಗಿರುವಾಗ ಇಂಥ ಅಡಿಗೆಗಳಿದ್ದರೆ ಮಾಡಲು ಅನುಕೂಲ ಅಲ್ಲವೇ? ನನ್ನ ಅತ್ತಿಗೆಯ ಮನೆಗೆ ಹೋಗಿದ್ದಾಗ ಅವರು ಹತ್ತೇ ನಿಮಿಷದಲ್ಲಿ ರುಚಿಯಾದ ರಸಂ ತಯಾರಿಸಿದ್ದು ನೋಡಿ ನನಗೆ ಆಶ್ಚರ್ಯವೇ ಆಯಿತು! ಅವರು ತಯಾರಿಸಿದ ಸಾಮಗ್ರಿಗಳಲ್ಲಿ ಚಿಕ್ಕ ಪುಟ್ಟ ಬದಲಾವಣೆಗಳನ್ನು ಮಾಡಿ ನಾನು ಕಂಡುಕೊಂಡ ವಿಧಾನ ಇಲ್ಲಿದೆ..


ತಯಾರಿಸಲು ಬೇಕಾಗುವ ಸಮಯ: 10 - 15 ನಿಮಿಷಗಳು 
ಸರ್ವಿಂಗ್ಸ್ - 4 ರಿಂದ 5 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಬೆಂಡೆಕಾಯಿ 7 - 8 
ಸಾರಿನ ಪುಡಿ 2 - 3 ಚಮಚ (ಖಾರಕ್ಕೆ ತಕ್ಕಂತೆ)
ಒಗ್ಗರಣೆಗೆ - ಎಣ್ಣೆ, ಕಡಲೆಬೇಳೆ, ಸಾಸಿವೆ, ಇಂಗು, ಚಿಟಿಕೆ ಅರಿಶಿನ, ಕರಿಬೇವು
ರುಚಿಗೆ ತಕ್ಕಷ್ಟು ಉಪ್ಪು
ಬೆಲ್ಲ ಅಥವಾ ಸಕ್ಕರೆ - 1 1/2 ಚಮಚ (ರುಚಿಗೆ ತಕ್ಕಷ್ಟು) 
ಹುಣಸೆ ರಸ
ಹೆಚ್ಚಿದ ಕೊತ್ತಂಬರಿ ಸೊಪ್ಪು - 2 ಚಮಚ 


ಮಾಡುವ ವಿಧಾನ:
ಬೆಂಡೆಕಾಯಿಯನ್ನು ತೊಳೆದು ಬಟ್ಟೆಯಿಂದ ನೀರು ಹೋಗುವಂತೆ ಒರೆಸಿಕೊಂಡು, ಮಧ್ಯಮ ಗಾತ್ರದ ಹೋಳುಗಳಾಗಿ ಹೆಚ್ಚಿಕೊಳ್ಳಿ.
ಹುಣಸೆಹಣ್ಣನ್ನು 15 - 20 ನಿಮಿಷ ನೀರಿನಲ್ಲಿ ನೆನೆಸಿಟ್ಟು, ರಸ ತೆಗೆದುಕೊಳ್ಳಿ.
ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು 3 - 4 ಚಮಚ ಎಣ್ಣೆ ಕಾಯಿಸಿ ಕಡಲೆಬೇಳೆ, ಸಾಸಿವೆ, ಇಂಗು, ಅರಿಶಿನ, ಕರಿಬೇವು ಹಾಕಿ ಒಗ್ಗರಣೆ ಮಾಡಿ.
ನಂತರ ಹೆಚ್ಚಿಟ್ಟ ಬೆಂಡೆಕಾಯಿ ಹೋಳುಗಳನ್ನು ಸೇರಿಸಿ 2 - 3 ನಿಮಿಷ ಕೈಯಾಡಿಸಿ.
ಸಾರಿನ ಪುಡಿಯನ್ನು ನೀರಿನಲ್ಲಿ ಕದಡಿ, ಬೆಂಡೆಕಾಯಿ ಮಿಶ್ರಣಕ್ಕೆ ಸೇರಿಸಿ. ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ ಮತ್ತು ಹುಣಸೆರಸ ಸೇರಿಸಿ ಕೈಯಾಡಿಸಿ.
ರಸಂ ಮಿಶ್ರಣಕ್ಕೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು, 3 ಲೋಟದಷ್ಟು ನೀರು ಸೇರಿಸಿ ನಾಲೈದು ನಿಮಿಷ ಕುದಿಸಿ ಇಳಿಸಿ. ಬಿಸಿ ಅನ್ನದೊಡನೆ ಸರ್ವ್ ಮಾಡಿ. 


ಟಿಪ್ಸ್:
  • ರಸಂ ಮಿಶ್ರಣ ತುಂಬ ತೆಳ್ಳಗೆನಿಸಿದರೆ ಒಂದು ಚಮಚದಷ್ಟು ಅಕ್ಕಿಹಿಟ್ಟನ್ನು ನೀರಿನಲ್ಲಿ ಕದಡಿ, ರಸಂ ಗೆ ಸೇರಿಸಿ ಕುದಿಸಿ. ರಸಂ ಅಥವಾ ಯಾವುದೇ ಸಾಂಬಾರ್ ಗೆ ಖಾರ ಹೆಚ್ಚಾಗಿದ್ದರೂ ಅಕ್ಕಿಹಿಟ್ಟನ್ನು ಕದಡಿ ಸೇರಿಸಿದರೆ ಸರಿಹೋಗುತ್ತದೆ.

Wednesday, 2 November 2011

ಎಗ್ ಲೆಸ್ ಬರ್ತ್ ಡೇ ಕೇಕ್ / Eggless Birthday Cake

Click here for English version.

ಕಳೆದ ತಿಂಗಳು ನಮ್ಮವರ ಬರ್ತ್ ಡೇಗೆ ತಯಾರಿಸಿದ ಕೇಕ್ ಇದು. ಮೊದಲು ಅನೇಕ ಬಾರಿ ಇಂಥ ಕೇಕ್ ತಯಾರಿಸಿದ್ದರೂ ಡೆಕೋರೇಷನ್ ಮಾಡಿರಲಿಲ್ಲ. ಈ ಕೇಕ್ ತಯಾರಿಸುವ ವಿಧಾನ ಈಗಾಗಲೇ ಅನೇಕ ಬ್ಲಾಗ್ ಗಳಲ್ಲಿದೆ. ನಾನು ಅದೇ ವಿಧಾನದಲ್ಲಿ ಎರಡು ಕೇಕ್ ಗಳನ್ನು ತಯಾರಿಸಿಕೊಂಡು ಮನೆಯಲ್ಲೇ ತಯಾರಿಸಿದ ಐಸಿಂಗ್ ಬಳಸಿ ಎರಡು ಲೇಯರ್ ನ ಕೇಕ್ ಮಾಡಿದೆ. ಈ ಕೇಕ್ ನ ಸ್ಪೆಶಾಲಿಟಿ ಏನೆಂದರೆ ಇದನ್ನು ತಯಾರಿಸಲು ಬೆಣ್ಣೆ ಬೇಕಿಲ್ಲ; ಕುಕಿಂಗ್ ಆಯಿಲ್ ಮತ್ತು ಮೊಸರು ಇದ್ದರೆ ಸಾಕು!
ಕೇಕ್ ಗೆ ಡೆಕೋರೇಷನ್ ಮಾಡಲು ಸಹಕರಿಸಿದ್ದಕ್ಕೆ ಹಾರ್ಟಿ ಥ್ಯಾಂಕ್ಸ್ ಟು ಉಷಾ! :) 


ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ

ಬೇಕಾಗುವ ಸಾಮಗ್ರಿಗಳು: (1 ಕೇಕ್ ಗೆ)
ಮೈದಾಹಿಟ್ಟು - 1 1/2 ಕಪ್ 
ಸಕ್ಕರೆ - 3/4 ಕಪ್
ಬೇಕಿಂಗ್ ಪೌಡರ್ - 1 1/4 ಟೇಬಲ್ ಸ್ಪೂನ್ 
ಅಡಿಗೆ ಸೋಡಾ - 1/2 ಟೇಬಲ್ ಸ್ಪೂನ್
ಚಿಟಿಕೆ ಉಪ್ಪು 
ಗಟ್ಟಿ ಮೊಸರು - 1 ಕಪ್
ಕುಕಿಂಗ್ ಆಯಿಲ್ - 1/2 ಕಪ್
ವೆನಿಲ್ಲಾ ಎಸೆನ್ಸ್ - 1 ಟೇಬಲ್ ಸ್ಪೂನ್
ಚಿಕ್ಕ ಪೈಪಿಂಗ್ಸ್ - ಬೇಕಾದರೆ (ಅಂಗಡಿಗಳಲ್ಲಿ ದೊರೆಯುತ್ತದೆ)

ಐಸಿಂಗ್ ಗೆ :
125 ಗ್ರಾಂ ಬೆಣ್ಣೆ (ರೂಂ ಟೆಂಪರೇಚರ್ ನಲ್ಲಿ)
250 ಗ್ರಾಂ ಸಕ್ಕರೆ 
3 ಟೇಬಲ್ ಸ್ಪೂನ್ ಕಾರ್ನ್ ಫ್ಲೋರ್

ವಿಧಾನ:
ಒಂದು ಬೌಲ್ ನಲ್ಲಿ ಮೊಸರು ಮತ್ತು ಸಕ್ಕರೆಯನ್ನು ಹಾಕಿಕೊಂಡು ಸಕ್ಕರೆ ಕರಗುವವರೆಗೂ ಕದಡಿ. ಸಕ್ಕರೆಯನ್ನು ಪುಡಿಮಾಡಿಕೊಂಡರೆ ಸಕ್ಕರೆ ಸುಲಭವಾಗಿ ಕರಗುತ್ತದೆ.
ನಂತರ ಇದಕ್ಕೆ ಬೇಕಿಂಗ್ ಪೌಡರ್ ಅಡಿಗೆ ಸೋಡಾ ಸೇರಿಸಿ ಕದಡಿ, 2 - 3 ನಿಮಿಷ ಬಿಡಿ. ಅಷ್ಟರಲ್ಲಿ ಮಿಶ್ರಣ ನೊರೆಯಂತಾಗಿ ಪ್ರಮಾಣವೂ ಹೆಚ್ಚಾಗುತ್ತದೆ.
ಓವನ್ ನ್ನು 200°C /400°F ಗೆ ಪ್ರೀಹೀಟ್ ಮಾಡಿಕೊಳ್ಳಿ. ಬೇಕಿಂಗ್ ಪಾತ್ರೆಗೆ ಎಣ್ಣೆ ಸವರಿಕೊಳ್ಳಿ.
ಮೈದಾಹಿಟ್ಟನ್ನು 2 - 3 ಬಾರಿ ಜರಡಿಯಾಡಿ ಇಟ್ಟುಕೊಳ್ಳಿ.
ಮೊಸರಿನ ಮಿಶ್ರಣಕ್ಕೆ ಎಣ್ಣೆ, ಉಪ್ಪು, ವೆನಿಲ್ಲಾ ಎಸೆನ್ಸ್ ಸೇರಿಸಿ ನಿಧಾನವಾಗಿ ಮಿಕ್ಸ್ ಮಾಡಿ.   
ಇದಕ್ಕೆ ಮೈದಾಹಿಟ್ಟನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸಿ ನಿಧಾನವಾಗಿ ದೋಸೆ ಹಿಟ್ಟಿನ ಹದಕ್ಕೆ ಕದಡಿ.
ಮಿಶ್ರಣವನ್ನು ಬೇಕಿಂಗ್ ಪಾತ್ರೆಗೆ ಹಾಕಿ, ಪ್ರೀಹೀಟ್ ಮಾಡಿದ ಓವನ್ ನಲ್ಲಿ 10 ನಿಮಿಷ ಬೇಯಿಸಿ.
ನಂತರ ಟೆಂಪರೇಚರ್ ನ್ನು 180°C /350°F ಗೆ ಸೆಟ್ ಮಾಡಿಕೊಂಡು 35 - 40 ನಿಮಿಷ ಬೇಯಿಸಿ. ಸಾಮಾನ್ಯವಾಗಿ 35 ನಿಮಿಷ ಸಾಕಾಗುತ್ತದೆ.

ಹೀಗೆ ಎರಡು ಕೇಕ್ ಗಳನ್ನು ತಯಾರಿಸಿಕೊಳ್ಳಿ. ಕೇಕ್ ಬೇಯುವಷ್ಟರಲ್ಲಿ ಐಸಿಂಗ್ ತಯಾರಿಸಿಕೊಳ್ಳಿ. 
ಸಕ್ಕರೆಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ. 
ಬೆಣ್ಣೆಯನ್ನು ಚೆನ್ನಾಗಿ ಬೀಟ್ ಮಾಡಿ ಮೆತ್ತಗೆ ಕ್ರೀಮ್ ನಂತೆ ಮಾಡಿಕೊಳ್ಳಿ. ನಂತರ ಇದಕ್ಕೆ ಪುಡಿಮಾಡಿದ ಸಕ್ಕರೆ ಸೇರಿಸಿ ಚೆನ್ನಾಗಿ ಬೀಟ್ ಮಾಡಿ. ಇದು ಚೆನ್ನಾಗಿ ಮಿಕ್ಸ್ ಆದ ನಂತರ ಕಾರ್ನ್ ಫ್ಲೋರ್ ಸೇರಿಸಿ ಮಿಕ್ಸ್ ಮಾಡಿ.

ಐಸಿಂಗ್ ನ್ನು ಹಚ್ಚುವ ಮೊದಲು ಕೇಕ್ ಪೂರ್ತಿ ತಣಿದಿರಬೇಕು. ಇಲ್ಲದಿದ್ದರೆ ಐಸಿಂಗ್ ಕರಗಿಬಿಡುತ್ತದೆ.
ಎರಡನೇ ಕೇಕ್ ಬೇಯುವಷ್ಟರಲ್ಲಿ ಮೊದಲು ತಯಾರಿಸಿದ ಕೇಕ್ ಗೆ ಮೇಲ್ಭಾಗದ ಡೆಕೋರೇಷನ್ ಮುಗಿಸಿಕೊಳ್ಳಬಹುದು.
ಕೇಕ್ ನ ಮೇಲ್ಭಾಗಕ್ಕೆ ಚಾಕುವಿನಿಂದ ಒಂದು ಲೇಯರ್ ಐಸಿಂಗ್ ನ್ನು ಸವರಿಕೊಳ್ಳಿ. ನಾನು ಹೆಸರು ಬರೆಯಲು ಐಸಿಂಗ್ ಗೆ ಸ್ವಲ್ಪ ಕೊಕೋವಾ ಪೌಡರ್ ಸೇರಿಸಿ ಕಲಸಿಕೊಂಡು ಬಳಸಿದ್ದೇನೆ.  
ಇನ್ನೊಂದು ಕೇಕ್ ತಣ್ಣಗಾದ ನಂತರ ಅದರ ಮೇಲ್ಭಾಗಕ್ಕೆ ಒಂದು ಲೇಯರ್ ಐಸಿಂಗ್ ಸವರಿ. ಮೊದಲು ಡೆಕೋರೇಟ್ ಮಾಡಿದ ಕೇಕ್ ನ್ನು ನಾಜೂಕಾಗಿ ಎತ್ತಿ ಈ ಕೇಕ್ ನ ಮೇಲಿಡಿ.
ಈಗ ಕೇಕ್ ನ ಸೈಡ್ ಗಳಿಗೆ ಐಸಿಂಗ್ ಸವರಿ.   
ಬೇಕಿಂಗ್ ಪೇಪರ್ ನಿಂದ ಕೋನ್ ತಯಾರಿಸಿಕೊಂಡು ಅದರಲ್ಲಿ ಐಸಿಂಗ್ ಮಿಶ್ರಣ ತುಂಬಿಕೊಂಡು ನಿಮಗೆ ಬೇಕಾದಂತೆ ಕೇಕ್ ನ್ನು ಡೆಕೋರೇಟ್ ಮಾಡಿ. ಇಲ್ಲವೇ ಅಂಗಡಿಗಳಲ್ಲಿ ಸಿಗುವ ಐಸಿಂಗ್ ಬ್ಯಾಗ್ ನ್ನೂ ಬಳಸಬಹುದು. ಅಂಗಡಿಯಲ್ಲಿ ದೊರೆಯುವ ಪೈಪಿಂಗ್ ನ್ನು ಕೇಕ್ ನ ಮೇಲಿನಿಂದ ಉದುರಿಸಿದರೆ ಕೇಕ್ ನ ಅಂದ ಹೆಚ್ಚುತ್ತದೆ.
ತಯಾರಿಸಿದ ಕೇಕ್ ನ್ನು ಬಳಸುವ ಮೊದಲು ಫ್ರಿಡ್ಜ್ ನಲ್ಲಿ ಅರ್ಧ ಘಂಟೆ ಇಟ್ಟು ಸೆಟ್ ಆಗಲು ಬಿಡಿ.


Saturday, 29 October 2011

ಸ್ಟಫ್ಡ್ ಕ್ಯಾಪ್ಸಿಕಂ / Stuffed Capsicum

Click here for English version.

ಕ್ಯಾಪ್ಸಿಕಂ ಬಳಸಿ ಯಾವ ಅಡಿಗೆ - ತಿಂಡಿಗಳನ್ನು ತಯಾರಿಸಿದರೂ ಅದು ತುಂಬಾ ರುಚಿಯಾಗಿರುತ್ತದೆ. ಸ್ಟಫ್ಡ್ ಕ್ಯಾಪ್ಸಿಕಂ ಅಂತೂ.. ಹೆಸರು ಕೇಳಿದರೇ ಬಾಯಲ್ಲಿ ನೀರೂರುತ್ತದೆ! ಕ್ಯಾಪ್ಸಿಕಂ ಸ್ಟಫಿಂಗ್ ಗೆ ಬೇಯಿಸಿದ ಆಲೂಗಡ್ಡೆ, ಕಡಲೆಹಿಟ್ಟು, ಬ್ರೆಡ್ ಇತ್ಯಾದಿ ವಿವಿಧ ಸಾಮಗ್ರಿಗಳನ್ನು ಬಳಸುತ್ತಾರೆ. ನಮ್ಮ ಮನೆಯಲ್ಲಿ ಸ್ಟಫಿಂಗ್ ಗೆ ಕಡಲೆಬೇಳೆ ಮತ್ತು ಮಸಾಲೆ ಸಾಮಗ್ರಿಗಳನ್ನು ಹುರಿದು ಪುಡಿಮಾಡಿ ಬಳಸುತ್ತಾರೆ. ಇದು ಊಟಕ್ಕೂ ಚೆನ್ನಾಗಿರುತ್ತದೆ, ಚಪಾತಿಯೊಡನೆ ಹಾಕಿಕೊಳ್ಳಲೂ ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು
ಸರ್ವಿಂಗ್ಸ್: 2

ಬೇಕಾಗುವ ಸಾಮಗ್ರಿಗಳು:
ಮಧ್ಯಮಗಾತ್ರದ ಕ್ಯಾಪ್ಸಿಕಂ - 2
ಕಡಲೆಬೇಳೆ - 4 ಟೇಬಲ್ ಸ್ಪೂನ್
ಒಣಮೆಣಸು - 4 (ಖಾರಕ್ಕೆ ತಕ್ಕಂತೆ)
ಲವಂಗ - 3
1 ಚೂರು ಚಕ್ಕೆ
ಕೊತ್ತಂಬರಿ - 1 1/2 ಟೇಬಲ್ ಸ್ಪೂನ್
ಜೀರಿಗೆ - 1/4 ಟೇಬಲ್ ಸ್ಪೂನ್
ಸಾಸಿವೆ - 1/4 ಟೇಬಲ್ ಸ್ಪೂನ್
ಚಿಟಿಕೆ ಇಂಗು
ಚಿಟಿಕೆ ಅರಿಶಿನ
2 ರಿಂದ 3 ಸೌಟು ಎಣ್ಣೆ
ಉಪ್ಪು
ಆಮ್ ಚೂರ್ ಪೌಡರ್

ಮಾಡುವ ವಿಧಾನ:
ಮೊದಲು ಮಸಾಲೆ ಸಾಮಗ್ರಿಗಳೆಲ್ಲವನ್ನೂ ಎಣ್ಣೆ ಹಾಕದೆ ಹುರಿದು, ತರಿಯಾಗಿ ಪುಡಿಮಾಡಿಕೊಳ್ಳಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್ ಸೇರಿಸಿ ಮಿಕ್ಸ್ ಮಾಡಿ.
ಕ್ಯಾಪ್ಸಿಕಂ ನ ತೊಟ್ಟಿನ ಭಾಗವನ್ನು ಕತ್ತರಿಸಿ ತೆಗೆದು, ಒಳಗೆ ಬೀಜವೇನಾದರೂ ಇದ್ದರೆ ತೆಗೆದುಬಿಡಿ.


ಕ್ಯಾಪ್ಸಿಕಂ ಗೆ ಮಸಾಲಾ ಪುಡಿ ತುಂಬಿಸಿ, ತೊಟ್ಟನ್ನು ಪುನಃ ಮೊದಲಿದ್ದಂತೆಯೇ ಹಾಕಿ.
ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಕಾಯಲಿಟ್ಟು, ಎಣ್ಣೆ ಸ್ವಲ್ಪ ಕಾದಾಗ ಮಸಾಲಾ ತುಂಬಿದ ಕ್ಯಾಪ್ಸಿಕಂ ಗಳನ್ನು ಎಣ್ಣೆಯಲ್ಲಿ ಬೇಯಲಿಟ್ಟು ಮುಚ್ಚಳ ಮುಚ್ಚಿ.
ಕ್ಯಾಪ್ಸಿಕಂ ನ ತೊಟ್ಟಿನ ಬಳಿಯೂ ಸ್ವಲ್ಪ ಎಣ್ಣೆ ಸುರಿದು, ಎಣ್ಣೆ ಒಳಗೆ ಹೋಗುವಂತೆ ಮಾಡಿ. ಇದರಿಂದ ಒಳಗಿರುವ ಮಸಾಲೆ ಚೆನ್ನಾಗಿ ಬೇಯುತ್ತದೆ.
ಆಗಾಗ್ಗೆ ಮುಚ್ಚಳ ಸರಿಸಿ ಕ್ಯಾಪ್ಸಿಕಂ ನ್ನು ತಿರುವಿ, ಎಲ್ಲ ಕಡೆ ಬೇಯುವಂತೆ ಮಾಡಿ. ಮುಚ್ಚಳ ತೆರೆಯುವಾಗ ತುಂಬಾ ಹುಷಾರಾಗಿರಿ, ಏಕೆಂದರೆ ಕ್ಯಾಪ್ಸಿಕಂ ನಲ್ಲಿರುವ ನೀರಿನಂಶ ಹೊರಬಂದು ಎಣ್ಣೆಯೊಡನೆ ಸೇರಿ ಸಿಡಿಯುತ್ತಿರುತ್ತದೆ.
ಕ್ಯಾಪ್ಸಿಕಂ ಚೆನ್ನಾಗಿ ಬೆಂದ ನಂತರ ಎಣ್ಣೆಯಿಂದ ಎತ್ತಿಬಿಡಿ. ಇದನ್ನು ಚಪಾತಿ ಅಥವಾ ಅನ್ನದೊಡನೆ ಸರ್ವ್ ಮಾಡಿ.


ಟಿಪ್ಸ್:
  • ಸ್ಟಫ್ಡ್ ಕ್ಯಾಪ್ಸಿಕಂ ತಯಾರಿಸಲು ಮಧ್ಯಮಗಾತ್ರದ ಅಥವಾ ಚಿಕ್ಕ ಕ್ಯಾಪ್ಸಿಕಂ ಬಳಸಿದರೆ ಬೇಯಿಸುವುದು ಸುಲಭ.

Monday, 24 October 2011

ವೆಜಿಟೆಬಲ್ ಸ್ಪ್ರಿಂಗ್ ರೋಲ್ಸ್ / Vegetable Spring Rolls

Click here for English version.

ಸ್ಪ್ರಿಂಗ್ ರೋಲ್ ಎಂದರೆ ಒಳಗಡೆ ಸ್ಟಫಿಂಗ್ ತುಂಬಿ ಸುರುಳಿ ಮಾಡಿರುವ ತೆಳ್ಳಗಿನ ರೊಟ್ಟಿ. ಸ್ಟಫಿಂಗ್ ಗೆ ಬೇರೆ ಬೇರೆ ವಿಧದ ಸಾಮಗ್ರಿಗಳನ್ನು ಬಳಸುತ್ತಾರೆ. ಸ್ಪ್ರಿಂಗ್ ರೋಲ್ ಗೆ ಬಳಸುವ ತೆಳ್ಳಗಿನ ರೊಟ್ಟಿಯಂತಹ ಶೀಟ್ (ಸ್ಪ್ರಿಂಗ್ ರೋಲ್ ಶೀಟ್)ಗಳು ಸುಪರ್ ಮಾರ್ಕೆಟ್ ಗಳಲ್ಲಿ ಸಾಮಾನ್ಯವಾಗಿ ಸಿಗುತ್ತವೆ. ಈ ಶೀಟ್ ಗಳನ್ನು ಮನೆಯಲ್ಲೇ ಬೇಕಿದ್ದರೂ ತಯಾರಿಸಬಹುದು. ಸ್ಪ್ರಿಂಗ್ ರೋಲ್ ಒಂದು ಚೈನೀಸ್ ಫುಡ್. ವಿಕಿಪೀಡಿಯದಲ್ಲಿ ಹೇಳುವಂತೆ, ಚೀನಾ ದೇಶದಲ್ಲಿ ಸ್ಪ್ರಿಂಗ್ ಹಬ್ಬದ ಸಮಯದಲ್ಲಿ ಈ ತಿಂಡಿಯನ್ನು ತಿನ್ನುತ್ತಾರಂತೆ. ಹೀಗಾಗಿ ಇದಕ್ಕೆ ಸ್ಪ್ರಿಂಗ್ ರೋಲ್ ಎಂದು ಹೆಸರು!


ತಯಾರಿಸಲು ಬೇಕಾಗುವ ಸಮಯ: 1 1/4 ಘಂಟೆ 
ಇಲ್ಲಿ ಹೇಳಿರುವ ಅಳತೆಯಿಂದ 8 ಸ್ಪ್ರಿಂಗ್ ರೋಲ್ ಗಳನ್ನು ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು:
1 ) ಸ್ಪ್ರಿಂಗ್ ರೋಲ್ ಶೀಟ್ ಗೆ : (ಅಂಗಡಿಯಿಂದ ತಂದ ಶೀಟ್ ನ್ನೂ ಬಳಸಬಹುದು)
     ಮೈದಾಹಿಟ್ಟು - 1 ಕಪ್
     ಚಿಟಿಕೆ ಉಪ್ಪು 
     ಸ್ವಲ್ಪ ನೀರು 

2 ) ಸ್ಟಫಿಂಗ್ ಗೆ :
     ತೆಳ್ಳಗೆ ಉದ್ದವಾಗಿ ಹೆಚ್ಚಿದ ಈರುಳ್ಳಿ - 1 ಕಪ್
     ತುರಿದ ಕ್ಯಾರೆಟ್ - 1 ಕಪ್
     ತುರಿದ ಕ್ಯಾಪ್ಸಿಕಂ - 1 ಕಪ್
     ಸಣ್ಣಗೆ, ಉದ್ದಕ್ಕೆ ಹೆಚ್ಚಿದ ಕ್ಯಾಬೇಜ್ - 1 ಕಪ್
     ಸೋಯಾ ಸಾಸ್ - 1 ಚಮಚ
     ಟೊಮೆಟೋ ಸಾಸ್ - 1 ಚಮಚ
     ಮೆಣಸಿನ ಪುಡಿ - ರುಚಿಗೆ ತಕ್ಕಷ್ಟು
     ರುಚಿಗೆ ತಕ್ಕಷ್ಟು ಉಪ್ಪು 

3 ) ಇತರ ಸಾಮಗ್ರಿಗಳು:
     ಕರಿಯಲು ಎಣ್ಣೆ
     1 ಚಮಚ ಮೈದಾಹಿಟ್ಟು 
     ಸ್ವಲ್ಪ ನೀರು 
 
ಮಾಡುವ ವಿಧಾನ:        
1 ) ಸ್ಪ್ರಿಂಗ್ ರೋಲ್ ಶೀಟ್ :
ಮೈದಾಹಿಟ್ಟಿಗೆ ಉಪ್ಪು ಸೇರಿಸಿ ಮಿಕ್ಸ್ ಮಾಡಿಕೊಂಡು ಸ್ವಲ್ಪವೇ ನೀರು ಸೇರಿಸಿ ಚಪಾತಿ ಹಿಟ್ಟಿಗಿಂತ ಗಟ್ಟಿಯಾಗಿ ಕಲಸಿಕೊಳ್ಳಿ.    ಕಲಸಿದ ಹಿಟ್ಟಿಗೆ ಒಂದು ಪ್ಲೇಟ್ ಮುಚ್ಚಿ 10 ನಿಮಿಷ ನೆನೆಯಲು ಬಿಡಿ.
ಹಿಟ್ಟಿನಿಂದ ಒಂದೇ ಗಾತ್ರದ 8 ಉಂಡೆಗಳನ್ನು ಮಾಡಿಕೊಂಡು ಪೇಪರ್ ನಷ್ಟು ತೆಳ್ಳಗಿನ ರೊಟ್ಟಿಗಳನ್ನು ಲಟ್ಟಿಸಿ. ಲಟ್ಟಿಸುವಾಗ ಒಣ ಹಿಟ್ಟನ್ನು ಧಾರಾಳವಾಗಿ ಬಳಸಿ.
ಶೀಟ್ ನ ಆಕಾರ ಚೆನ್ನಾಗಿ ಬರದಿದ್ದರೂ ಪರವಾಗಿಲ್ಲ, ಏಕೆಂದರೆ ಸುರುಳಿ ಮಾಡಿದನಂತರ ಅದು ಗೊತ್ತಾಗುವುದಿಲ್ಲ ;) ಬೇಕಿದ್ದರೆ ಅಂಚುಗಳನ್ನು ಕಟ್ ಮಾಡಿ ಒಳ್ಳೆಯ ಆಕಾರ ಕೊಡಬಹುದು.

2 ) ಸ್ಟಫಿಂಗ್: 
ತುರಿದ ತರಕಾರಿಗಳಲ್ಲಿ ಹೆಚ್ಚಿನ ನೀರಿನಂಶವಿದ್ದರೆ ಹಿಂಡಿ ತೆಗೆದುಬಿಡಿ.
ಬಾಣಲೆಯಲ್ಲಿ 2 - 3 ಚಮಚ ಎಣ್ಣೆ ಕಾಯಿಸಿ. ಎಣ್ಣೆ ಚೆನ್ನಾಗಿ ಕಾದನಂತರ ಅದಕ್ಕೆ ಈರುಳ್ಳಿ ಸೇರಿಸಿ ಸ್ವಲ್ಪ ಹುರಿಯಿರಿ.
ನಂತರ ಕ್ಯಾರೆಟ್, ಕ್ಯಾಪ್ಸಿಕಂ ಮತ್ತು ಉಪ್ಪು ಸೇರಿಸಿ ಕೈಯಾಡಿಸುತ್ತಿರಿ.
ತರಕಾರಿಗಳು ಗರಿಯಾಗಿ ಬೆಂದಂತಾದಾಗ ಹೆಚ್ಚಿದ ಕ್ಯಾಬೇಜ್ ಸೇರಿಸಿ ಒಂದೆರಡು ನಿಮಿಷ ಹುರಿಯಿರಿ.
ನಂತರ ಇದಕ್ಕೆ ಮೆಣಸಿನ ಪುಡಿ, ಟೊಮೆಟೋ ಸಾಸ್ ಮತ್ತು ಸೋಯಾ ಸಾಸ್ ಸೇರಿಸಿ 2 - 3 ನಿಮಿಷ ಕೈಯಾಡಿಸಿ ಇಳಿಸಿ. ನೀರಿನಂಶ ಕಡಿಮೆ ಇದ್ದಷ್ಟೂ ಒಳ್ಳೆಯದು.



ಒಂದು ಚಮಚದಷ್ಟು ಮೈದಾಹಿಟ್ಟಿಗೆ ಸ್ವಲ್ಪ ನೀರು ಸೇರಿಸಿ ದಪ್ಪಗೆ ಪೇಸ್ಟ್ ನಂತೆ ಮಾಡಿಕೊಳ್ಳಿ.
ವೆಜ್ ರೋಲ್ ಶೀಟ್ ತೆಗೆದುಕೊಂಡು ಅದರ ಒಂದು ಅಂಚಿನಲ್ಲಿ 2 ಟೇಬಲ್ ಸ್ಪೂನ್ ನಷ್ಟು ಸ್ಟಫಿಂಗ್ ಮಿಶ್ರಣ ಹಾಕಿ.
ಸ್ಟಫಿಂಗ್ ಒಳಗೆ ಬರುವಂತೆ ಶೀಟ್ ನ್ನು ಅರ್ಧದವರೆಗೆ ಸುರುಳಿ ಸುತ್ತಿ. ಸುರುಳಿಯ ಪಕ್ಕದ ಎರಡೂ ಅಂಚುಗಳನ್ನು ಒಳಗೆ ಬರುವಂತೆ ಮಡಿಚಿ ಪ್ರೆಸ್ ಮಾಡಿ.
ನಂತರ ಅಂಚುಗಳಿಗೆ ಮೈದಾ ಪೇಸ್ಟ್ ಸವರಿಕೊಂಡು, ಪೂರ್ತಿ ಸುರುಳಿ ಸುತ್ತಿ. ಅಂಚುಗಳನ್ನು ಸರಿಯಾಗಿ ಕೂರಿಸಿ.
ಎಣ್ಣೆಯನ್ನು ಹದವಾಗಿ ಕಾಯಿಸಿಕೊಂಡು ಸ್ಪ್ರಿಂಗ್ ರೋಲ್ ಗಳನ್ನು ಮುಕ್ಕಾಲು ಭಾಗ ಕರಿದು ಎಣ್ಣೆಯಿಂದ ತೆಗೆಯಿರಿ. ತಣ್ಣಗಾದ ನಂತರ ಪುನಃ ಎಣ್ಣೆಯಲ್ಲಿ ಹಾಕಿ ಕೆಂಪಗೆ ಕರಿಯಿರಿ. ಹೀಗೆ ಮಾಡುವುದರಿಂದ ಸ್ಪ್ರಿಂಗ್ ರೋಲ್ ಗರಿಯಾಗುವುದಲ್ಲದೆ ಒಳ್ಳೆಯ ಬಣ್ಣವೂ ಬರುತ್ತದೆ.
ಕರಿದ ಸ್ಪ್ರಿಂಗ್ ರೋಲ್ ಗಳನ್ನು ಒಂದು ಟಿಶ್ಯೂ ಪೇಪರ್ ಮೇಲೆ ಹಾಕಿ ಎಣ್ಣೆ ಹೀರುವಂತೆ ಮಾಡಿ.
ಬಿಸಿಯಿರುವಾಗಲೇ ಟೊಮೆಟೋ ಸಾಸ್ ಜೊತೆ ತಿನ್ನಿ.


Tuesday, 18 October 2011

ಓಟ್ಸ್ ಸಮೋಸ / Oats Samosa

Click here for English version. 

ಹೈದರಾಬಾದ್ ನ ಪ್ರಸಿದ್ಧ ತಿಂಡಿಗಳಲ್ಲಿ ಈರುಳ್ಳಿ ಸಮೋಸವೂ ಒಂದು. ಹೊರಗಡೆಯಿಂದ ಗರಿಯಾಗಿ ಕಂಡರೂ, ಒಳಗಡೆ ಮೆತ್ತಗಿನ ಸ್ಟಫಿಂಗ್ ಹೊಂದಿರುವ ಈ ಸಮೋಸ ತಿನ್ನಲು ತುಂಬಾ ರುಚಿ. ವಾಹ್ ಚೆಫ್ ರವರ ವಿಡಿಯೋ ನೋಡಿ ನಾನು ಈ ಸಮೋಸ ತಯಾರಿಸುವುದನ್ನು ಕಲಿತದ್ದು. ನಂತರ ಮೂಲ ರೆಸಿಪಿಯಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಿ, ಓಟ್ಸ್ ಬಳಸಿ ಸಮೋಸ ತಯಾರಿಸಿದೆ. ತಿನ್ನುವುದಕ್ಕಂತೂ ತುಂಬಾ ತುಂಬಾ ಚೆನ್ನಾಗಿತ್ತು! ಈ ಸಮೋಸವನ್ನು ತಯಾರಿಸಿ ಒಂದೆರಡು ದಿನ ಇಟ್ಟುಕೊಳ್ಳಬಹುದು. ಯಾರಾದರೂ ಅತಿಥಿಗಳು ಬರುವರೆಂದರೆ ಮೊದಲೇ ತಯಾರಿಸಿಟ್ಟು, ಬೇಕಾದಾಗ ಬಿಸಿಮಾಡಿಕೊಡಬಹುದು. ಟೀ ಟೈಮ್ ಗೆ ಇದು ಒಳ್ಳೆಯ ಸ್ನ್ಯಾಕ್ಸ್.
 
ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ
ಸರ್ವಿಂಗ್ಸ್: 3
 
ಬೇಕಾಗುವ ಸಾಮಗ್ರಿಗಳು:
1 ) ಕಣಕಕ್ಕೆ: 
     ಗೋಧಿಹಿಟ್ಟು - 1 ಕಪ್
     ಮೈದಾಹಿಟ್ಟು - 1 ಕಪ್
     2 ಟೇಬಲ್ ಸ್ಪೂನ್ ಎಣ್ಣೆ
     ರುಚಿಗೆ ತಕ್ಕಷ್ಟು ಉಪ್ಪು     
     ಸ್ವಲ್ಪ ನೀರು 

2 ) ಸ್ಟಫಿಂಗ್ ಗೆ:
     ಹೆಚ್ಚಿದ ಈರುಳ್ಳಿ - 1 ಕಪ್ 
     ಇನ್ ಸ್ಟಂಟ್ ಓಟ್ಸ್ - 1 ಕಪ್  
     ಚಾಟ್ ಮಸಾಲಾ - 1 ಟೀ ಚಮಚ 
     ಮೆಣಸಿನಪುಡಿ - 1 ಟೀ ಚಮಚ 
     ಜೀರಿಗೆ ಪುಡಿ - 1/2 ಟೀ ಚಮಚ   
     ಹಸಿಮೆಣಸು (ಹೆಚ್ಚಿದ್ದು) - 2 
     ಹೆಚ್ಚಿದ ಕೊತ್ತಂಬರಿ ಸೊಪ್ಪು - 1 / 2 ಕಪ್ 
     ರುಚಿಗೆ ತಕ್ಕಷ್ಟು ಉಪ್ಪು 

3 ) ಇತರ ಸಾಮಗ್ರಿಗಳು:
     ಕರಿಯಲು ಎಣ್ಣೆ 
     ಮೈದಾಹಿಟ್ಟು - 3 ಟೇಬಲ್ ಚಮಚ 
     ನೀರು - ಸ್ವಲ್ಪ  

ಮಾಡುವ ವಿಧಾನ:
ಮೈದಾಹಿಟ್ಟು, ಗೋಧಿಹಿಟ್ಟು ಮತ್ತು ಉಪ್ಪು ಸೇರಿಸಿ ಮಿಕ್ಸ್ ಮಾಡಿಕೊಳ್ಳಿ. ಇದಕ್ಕೆ 2 ಟೇಬಲ್ ಸ್ಪೂನ್ ನಷ್ಟು ಎಣ್ಣೆ ಸೇರಿಸಿ ಚೆನ್ನಾಗಿ ಕಲಸಿ.
ನಂತರ ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸುತ್ತ ಮೆತ್ತಗೆ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಹಿಟ್ಟನ್ನು ಮುಚ್ಚಿ, 15 - 20 ನಿಮಿಷ ನೆನೆಯಲು ಬಿಡಿ.
ಸ್ಟಫಿಂಗ್ ಗೆ ಮೇಲೆ ಹೇಳಿರುವ ಸಾಮಗ್ರಿಗಳನ್ನೂ ಸೇರಿಸಿ ಕಲಸಿ ಇಡಿ.

ಕಲಸಿಟ್ಟ ಹಿಟ್ಟಿನಿಂದ ತೆಳ್ಳಗಿನ ರೊಟ್ಟಿಗಳನ್ನು ಲಟ್ಟಿಸಿಕೊಂಡು, ಸುಮಾರು 15 cm ಉದ್ದ, 7 cm ಅಗಲದ ಆಯತಗಳಾಗಿ ಕತ್ತರಿಸಿಕೊಳ್ಳಿ.
ಇವನ್ನು ಕಾದ ಕಾವಲಿಯ ಮೇಲೆ ಅರ್ಧ ನಿಮಿಷ ಇಟ್ಟು, ಎರಡೂ ಬದಿಗಳನ್ನು ಬಿಸಿಮಾಡಿ ತೆಗೆಯಿರಿ.
3 ಚಮಚ ಮೈದಾಹಿಟ್ಟಿಗೆ ಸ್ವಲ್ಪ ನೀರು ಸೇರಿಸಿ, ದಪ್ಪಗಿನ ಪೇಸ್ಟ್ ತಯಾರಿಸಿಕೊಳ್ಳಿ.
ಬೇಯಿಸಿಕೊಂಡ ಶೀಟ್ ನ ಒಂದು ಅಂಚಿಗೆ ಮೈದಾ ಪೇಸ್ಟ್ ಸವರಿಕೊಂಡು, ಶೀಟ್ ನ್ನು ಮಡಿಚಿ ಕೋನ್ ತಯಾರಿಸಿಕೊಳ್ಳಿ.
ಇದರೊಳಗೆ 2 ಟೇಬಲ್ ಸ್ಪೂನ್ ನಷ್ಟು ಸ್ಟಫಿಂಗ್ ತುಂಬಿ. ಮೈದಾ ಪೇಸ್ಟ್ ನ್ನು ಸವರಿಕೊಂಡು, ಸ್ಟಫಿಂಗ್ ಹೊರಬರದಂತೆ ಅಂಚುಗಳನ್ನು ಸರಿಯಾಗಿ ಅಂಟಿಸಿ.   
ಹೀಗೆ ಎಲ್ಲ ಸಮೋಸಗಳನ್ನೂ ತಯಾರಿಸಿಕೊಂಡು, ಕಾದ ಎಣ್ಣೆಯಲ್ಲಿ ಗರಿಗರಿಯಾಗಿ ಕರಿಯಿರಿ.
ಈ ಸಮೋಸಗಳನ್ನು ಹಾಗೇ ತಿನ್ನಬಹುದು ಇಲ್ಲವೇ ಸಾಸ್ ಅಥವಾ ಕೆಚಪ್ ನೊಡನೆಯೂ ಹಾಕಿಕೊಡಬಹುದು.

ಟಿಪ್ಸ್:
  • ಸಮೋಸದ ಬಣ್ಣ ಚೆನ್ನಾಗಿ ಬರಲು ಮತ್ತು ಹೆಚ್ಚು ಗರಿಗರಿಯಾಗಲು ಅದನ್ನು ಎರಡು ಬಾರಿ ಕರಿಯಿರಿ. ಆದರೆ ಎರಡು ಬಾರಿ ಕರಿಯುವುದರಿಂದ ಸಮೋಸ ಹೆಚ್ಚು ಎಣ್ಣೆ ಹೀರಿಕೊಳ್ಳುತ್ತದೆ.

Friday, 14 October 2011

ಸೆವೆನ್ ಕಪ್ ಬರ್ಫಿ (ಹಲ್ವಾ) / Seven Cup Burfi

Click here for English version. 
 
ಸೆವೆನ್ ಕಪ್ ಬರ್ಫಿ ಮಾಡಲು ಸಾಮಾನ್ಯವಾಗಿ ಕಡಲೆಹಿಟ್ಟನ್ನು ಬಳಸುತ್ತಾರೆ. ಕಡಲೆಹಿಟ್ಟಿನ ಬದಲು ಸೂಜಿ ರವೆಯನ್ನು ಬಳಸಿಯೂ ಇದನ್ನು ತಯಾರಿಸಬಹುದು. ನನ್ನ ಚಿಕ್ಕಮ್ಮ ಈ ಬರ್ಫಿಯನ್ನು ಬಹಳ ಚೆನ್ನಾಗಿ ಮಾಡುತ್ತಾರೆ. ಒಟ್ಟೂ 7 ಕಪ್ ನಷ್ಟು ಸಾಮಗ್ರಿಗಳನ್ನು ಬಳಸುವುದರಿಂದ ಈ ಬರ್ಫಿಗೆ ಸೆವೆನ್ ಕಪ್ ಬರ್ಫಿ ಎಂದು ಹೆಸರು. ಆದರೆ ನಾನು ಇಲ್ಲಿ ಸಕ್ಕರೆಯನ್ನು ಅರ್ಧ ಕಪ್ ನಷ್ಟು ಕಡಿಮೆ ಬಳಸಿದ್ದೇನೆ. ಪೂರ್ತಿ ಮೂರು ಕಪ್ ಸಕ್ಕರೆ ಸೇರಿಸಿದರೆ ಸಿಹಿ ತುಂಬ ಹೆಚ್ಚಾದಂತೆ ಅನ್ನಿಸುತ್ತದೆ. ಅದಕ್ಕೇ ಈ ಚಿಕ್ಕ ಬದಲಾವಣೆ.


ತಯಾರಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು 
ಈ ಅಳತೆಯಿಂದ ಸುಮಾರು 25 ಬರ್ಫಿಗಳನ್ನು ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು:
ಸೂಜಿ ರವಾ - 1 ಕಪ್ 
ತುಪ್ಪ - 1 ಕಪ್ 
ತೆಂಗಿನತುರಿ - 1 ಕಪ್  
ಹಾಲು - 1 ಕಪ್
ಸಕ್ಕರೆ - 2 1/2 ಕಪ್   

ಮಾಡುವ ವಿಧಾನ:
ಬಾಣಲೆ ಕಾಯಲಿಟ್ಟು ಸೂಜಿ ರವೆ ಮತ್ತು ತುಪ್ಪ ಸೇರಿಸಿ 4 - 5 ನಿಮಿಷ ಹುರಿದುಕೊಳ್ಳಿ.
ನಂತರ ಇದಕ್ಕೆ ಹಾಲು, ಸಕ್ಕರೆ ಮತ್ತು ತೆಂಗಿನತುರಿಯನ್ನು ಸೇರಿಸಿ. ಮಿಶ್ರಣವನ್ನು ಹದವಾದ ಉರಿಯಲ್ಲಿ ತಳ ಹಿಡಿಯದಂತೆ ಕೈಯಾಡಿಸುತ್ತಿರಿ.
ಬರ್ಫಿ ಮಿಶ್ರಣ ಸುರಿಯಲು ಒಂದು ಪ್ಲೇಟ್ ಗೆ ತುಪ್ಪ ಸವರಿ ಇಟ್ಟಿರಿ.
ಸ್ವಲ್ಪ ಸಮಯದ ನಂತರ ನೀರಿನಂಶವೆಲ್ಲ ಕಡಿಮೆಯಾಗಿ, ಬರ್ಫಿಯ ಮಿಶ್ರಣ ತಳ ಬಿಟ್ಟು ಮುದ್ದೆಯಂತಾಗತೊಡಗುತ್ತದೆ. ಈ ಹಂತಕ್ಕೆ ಬಂದರೆ ಬರ್ಫಿ ಮುಕ್ಕಾಲು ಭಾಗ ಆದಂತೆ.
ಕೆಲವೇ ನಿಮಿಷಗಳಲ್ಲಿ ಇದು ಸ್ವಲ್ಪ ಗುಳ್ಳೆಗಳಾಗಿ ಉಬ್ಬಿ ಬರತೊಡಗುತ್ತದೆ. ತಕ್ಷಣವೇ ಮಿಶ್ರಣವನ್ನು ಉರಿಯಿಂದ ಇಳಿಸಿ, ಜಿಡ್ಡು ಸವರಿದ ಬಟ್ಟಲಿಗೆ ಸುರಿಯಿರಿ.
ಇದನ್ನು ಲಟ್ಟಣಿಗೆಯ ಸಹಾಯದಿಂದ ಪ್ಲೇಟ್ ನಲ್ಲಿ ಸಮನಾಗಿ ಹರವಿ.
ಸ್ವಲ್ಪ ಬಿಸಿಯಿರುವಾಗಲೇ ನಿಮಗೆ ಬೇಕಾದ ಆಕಾರಕ್ಕೆ ಕತ್ತರಿಸಿ. ತಣ್ಣಗಾದ ನಂತರ ಎತ್ತಿಟ್ಟುಕೊಳ್ಳಿ.
ತುಪ್ಪದ ಪರಿಮಳದೊಂದಿಗೆ ಈ ಹಲ್ವಾ ತಿನ್ನಲು ಬಹಳ ರುಚಿ.


ಟಿಪ್ಸ್:
  • ಬರ್ಫಿ ಮಿಶ್ರಣ ಪಾತ್ರೆಯ ತಳಕ್ಕೆ ಹಿಡಿಯತೊಡಗಿದರೆ ತಕ್ಷಣವೇ ಮಿಶ್ರಣವನ್ನು ಇನ್ನೊಂದು ಪಾತ್ರೆಗೆ ಹಾಕಿಕೊಂಡು ಬಿಸಿಗಿಡಿ. 
  • ಬರ್ಫಿ ತಯಾರಿಸಲು ಒಳ್ಳೆಯ ತುಪ್ಪವನ್ನೇ ಬಳಸಿ. 
  • ಕೇಸರಿ ದಳಗಳನ್ನು ಸೇರಿಸಿದರೆ ಈ ಬರ್ಫಿ ಇನ್ನೂ ಚೆನ್ನಾಗಿರುತ್ತದೆ.

Sunday, 9 October 2011

ಗೆಣಸಿನ ಚಿಪ್ಸ್ / Sweet Potato Chips

Click here for English version.
 
ನಮ್ಮ ಮನೆಯಲ್ಲಿ ಗೆಣಸನ್ನು ತರುವುದು ಸ್ವಲ್ಪ ಕಡಿಮೆಯೇ ಎನ್ನಬಹುದು. ತಂದರೂ ಅದನ್ನು ಅಡಿಗೆಗೆ ಬಳಸುವುದಕ್ಕಿಂತ ಹೆಚ್ಚಾಗಿ ಹಾಗೇ ಬೇಯಿಸಿಕೊಂಡು ತಿನ್ನುವುದೇ ಜಾಸ್ತಿ. ಗೆಣಸನ್ನು 2 - 3 ಪೀಸ್ ಗಳಾಗಿ ಕಟ್ ಮಾಡಿಕೊಂಡು ಕುಕ್ಕರ್ ನಲ್ಲಿ ನೀರು, ಒಂದೆರಡು ಚಮಚ ಸಕ್ಕರೆ ಹಾಕಿ ಬೇಯಿಸಿದರೆ ಮೆತ್ತಗೆ, ಸಿಹಿಯಾದ ಗೆಣಸು ತಿನ್ನಲು ಬಹಳ ರುಚಿ. ಅಥವಾ ನೀರು ಸೇರಿಸದೆ, ಮೈಕ್ರೋವೇವ್ ಓವನ್ ನಲ್ಲಿ 3 - 4 ನಿಮಿಷ ಬೇಯಿಸಿಕೊಂಡರೂ ಆಯಿತು. ನಾವು ಇಷ್ಟಪಡುವ ಇನ್ನೊಂದು ವೆರೈಟಿ ಎಂದರೆ ಗೆಣಸಿನ ಚಿಪ್ಸ್. ಗೆಣಸಿನ ಚಿಪ್ಸ್ ಅಂತೂ ತಿನ್ನಲು ತುಂಬ ರುಚಿ. ತಯಾರಿಸುವುದು ಕಷ್ಟವೇನಿಲ್ಲ, ಆದರೆ ಎಷ್ಟು ಚಿಪ್ಸ್ ಮಾಡಿಟ್ಟರೂ ಬೇಗ ಬೇಗ ಖಾಲಿ ಆಗುವುದಂತೂ ನಿಜ!


ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ

ಬೇಕಾಗುವ ಸಾಮಗ್ರಿಗಳು:
2 ಮೀಡಿಯಂ ಸೈಜ್ ಗೆಣಸು
ಕರಿಯಲು ಎಣ್ಣೆ 

ಮಾಡುವ ವಿಧಾನ:
ಗೆಣಸನ್ನು ಚೆನ್ನಾಗಿ ತೊಳೆದು ಸಿಪ್ಪೆ ತೆಗೆದು, ತೆಳ್ಳಗಿನ ಸ್ಲೈಸ್ ಗಳಾಗಿ ಹೆಚ್ಚಿಕೊಳ್ಳಿ.
ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು ಗೆಣಸಿನ ಸ್ಲೈಸ್ ಗಳನ್ನು ಹದವಾದ ಉರಿಯಲ್ಲಿ ಗರಿಯಾಗುವತನಕ ಕರಿಯಿರಿ.
ಕರಿದ ಚಿಪ್ಸ್ ನ್ನು ಒಂದು ಟಿಶ್ಯೂ ಪೇಪರ್ ಮೇಲೆ ಹರವಿ ತಣ್ಣಗಾಗಲು ಬಿಡಿ.
ನಂತರ ಇದಕ್ಕೆ ರುಚಿಗೆ ತಕ್ಕಷ್ಟು (1 - 2 ಚಮಚ) ಮಸಾಲಾ ಪುಡಿ ಸೇರಿಸಿ ಮಿಕ್ಸ್ ಮಾಡಿದರೆ ಚಿಪ್ಸ್ ತಿನ್ನಲು ಸಿದ್ಧ.
ಮಸಾಲಾ ಪುಡಿಗೆ ಉಪ್ಪು ಸೇರಿಸಿರುವುದರಿಂದ ಚಿಪ್ಸ್ ಗೆ ಪುನಃ ಉಪ್ಪು ಸೇರಿಸುವ ಅಗತ್ಯವಿಲ್ಲ.



ಟಿಪ್ಸ್: 
  • ಚಿಪ್ಸ್ ನ್ನು ಗರಿಗರಿಯಾಗಿ ಮಾಡಲು ಒಂದು ಟಿಪ್: ಚಿಪ್ಸ್ ನ್ನು ಮುಕ್ಕಾಲು ಭಾಗ ಬೇಯಿಸಿ, ಎಣ್ಣೆಯಿಂದ ತೆಗೆದು ಆರಲು ಬಿಡಿ. ತಣ್ಣಗಾದ ನಂತರ ಅದನ್ನು ಪುನಃ ಎಣ್ಣೆಯಲ್ಲಿ ಹಾಕಿ 3 - 4 ನಿಮಿಷ ಕರಿದರೆ ಚಿಪ್ಸ್ ಗರಿಯಾಗುತ್ತದೆ.

ಚಿಪ್ಸ್ ಮಸಾಲಾ | Masala Powder for Chips

Click here for English version.

ಕಳೆದ ವಾರ ಗೆಣಸಿನ ಚಿಪ್ಸ್ ತಯಾರಿಸಲು ಮಸಾಲಾ ಪೌಡರ್ ಮಾಡಬೇಕಿತ್ತು. ನನಗೆ ಯಾವಾಗಲೂ ಸಾಮಗ್ರಿಗಳನ್ನು ಅಳತೆ ಮಾಡುವ ಅಭ್ಯಾಸವೇ ಇಲ್ಲ! ಆದರೆ ಅಡಿಗೆ ವಿಧಾನಗಳನ್ನು ಇತರರಿಗೆ ತಿಳಿಸಿಕೊಡಬೇಕೆಂದರೆ ಸರಿಯಾದ ಅಳತೆಗಳು ಬೇಕೇ ಬೇಕು. ಅದಕ್ಕೇ ಈ ಬಾರಿ ಅಳತೆಗಳನ್ನು ನೋಟ್ ಮಾಡಿಕೊಂಡೇ ಸಾಂಬಾರ್ ಪುಡಿಯನ್ನು ತಯಾರಿಸಿದೆ. ಇಲ್ಲಿ ನಾನು ಬಳಸಿದ ಸಾಮಗ್ರಿಗಳನ್ನು ಸ್ವಲ್ಪ ಹೆಚ್ಚು - ಕಡಿಮೆ ಬಳಸಿ ನಿಮ್ಮ ಅಭಿರುಚಿಗೆ ತಕ್ಕಂತೆ ಚಿಪ್ಸ್ ಮಸಾಲಾ ತಯಾರಿಸಬಹುದು.    


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಈಸಿ 

ಬೇಕಾಗುವ ಸಾಮಗ್ರಿಗಳು:
  • ಕಡಲೆಬೇಳೆ - 2 ಟೇಬಲ್ ಸ್ಪೂನ್
  • 5 ಲವಂಗ
  • 2 ಚೂರು ಚಕ್ಕೆ
  • 1 ಟೀ ಚಮಚ ಕೊತ್ತಂಬರಿ
  • 1/4 ಟೀ ಚಮಚ ಜೀರಿಗೆ     
  • 1/4 ಟೀ ಚಮಚ ಓಮ (ಅಜವಾನ) 
  • 1 ಟೀ ಚಮಚ ಸ್ಪೂನ್ ಸಾಸಿವೆ
  • 1/4 ಟೀ ಚಮಚ ಮೆಂತ್ಯ
  • ಒಂದು ದೊಡ್ಡ ಚಿಟಿಕೆ ಇಂಗು
  • ಅರಿಶಿನ - 1/4 ಟೀ ಚಮಚ  
  • ಮೆಣಸಿನಪುಡಿ - ಖಾರಕ್ಕೆ ತಕ್ಕಷ್ಟು 
  • ಆಮ್ ಚೂರ್ ಪೌಡರ್ - 1/2ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ಉಪ್ಪು - (ಟಿಪ್ಸ್ ನೋಡಿ)
ಮಾಡುವ ವಿಧಾನ:
  • ಮೆಣಸಿನಪುಡಿ, ಆಮ್ ಚೂರ್ ಪೌಡರ್ ಹೊರತಾಗಿ ಉಳಿದೆಲ್ಲ ಸಾಮಗ್ರಿಗಳನ್ನೂ ಬಾಣಲೆಯಲ್ಲಿ ಹುರಿದುಕೊಂಡು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿ.
  • ಇದಕ್ಕೆ ರುಚಿಗೆ ತಕ್ಕಷ್ಟು ಮೆಣಸಿನಪುಡಿ ಮತ್ತು ಆಮ್ ಚೂರ್ ಪೌಡರ್ ಸೇರಿಸಿ ಮಿಕ್ಸ್ ಮಾಡಿ. 
  • ತಯಾರಾದ ಮಸಾಲಾ ಪುಡಿಯನ್ನು ಗಾಳಿಯಾಡದ ಬಾಟಲ್ ನಲ್ಲಿ ಹಾಕಿಟ್ಟು, ಚಿಪ್ಸ್ ತಯಾರಿಸುವಾಗ ಬಳಸಿ.
  • ಇದನ್ನು ಫ್ರೆಶ್ ಆಗಿ ತಯಾರಿಸಿಕೊಂಡು ಬಳಸಿದರೆ ಹೆಚ್ಚು ಚೆನ್ನ.

ಟಿಪ್ಸ್:
  • ನಾನು ಇಲ್ಲಿ ಮಸಾಲೆ ಪುಡಿ ತಯಾರಿಸುವಾಗ ಉಪ್ಪು ಸೇರಿಸಿಲ್ಲ. ಉಪ್ಪನ್ನು ಮಸಾಲೆ ಪುಡಿ ತಯಾರಿಸುವಾಗ ಸೇರಿಸಬಹುದು ಅಥವಾ ಚಿಪ್ಸ್ ಗೆ ಮಸಾಲೆ ಪುಡಿ ಸೇರಿಸುವಾಗ ಸೇರಿಸಿ ಮಿಕ್ಸ್ ಮಾಡಬಹುದು. 
  • ಹೆಚ್ಚಿಗೆ ಉಳಿದ ಮಸಾಲೆ ಪುಡಿಯನ್ನು ಪಲ್ಯ ಇತ್ಯಾದಿ ಅಡಿಗೆಗಳಿಗೆ ಬಳಸಬಹುದು. 

    Wednesday, 5 October 2011

    ಖಾರಾ ಬೂಂದಿ / Khara (Spicy) Boondi

    Click here for English Version.

    ಸುಮಾರು ದಿನಗಳ ಹಿಂದೆ ಅಂಗಡಿಯಿಂದ ತಂದಿದ್ದ ಬಿಸಿಬೇಳೆ ಭಾತ್ ಪುಡಿ ಉಪಯೋಗಿಸಿ ಬೇಜಾರು ಬಂದು, ಯಾವಾಗ ಖಾಲಿಯಾಗುವುದೋ ಎಂದು ಎದುರುನೋಡುತ್ತಿದ್ದೆ. ಅದು ಮುಗಿದ ನಂತರ ನೆಟ್ ನಲ್ಲಿ ಜಾಲಾಡಿ, ಕೊನೆಗೂ ಒಂದು ಒಳ್ಳೆಯ ಬಿಸಿಬೇಳೆ ಭಾತ್ ಪುಡಿ ರೆಸಿಪಿ ಸಿಕ್ಕಿತು. ಬಿಸಿಬೇಳೆ ಭಾತ್ ಜೊತೆಗೆ ಕಾಂಬಿನೇಶನ್ ಗೆ ಖಾರಾ ಬೂಂದಿ ಇದ್ದರೆ ಚೆನ್ನ; ಕಡಲೆಹಿಟ್ಟು ತಂದಿದ್ದು ಹಾಗೇ ಇದ್ದದ್ದು ನೆನಪಾಗಿ, ಈ ಬಾರಿ ಮನೆಯಲ್ಲೇ ಖಾರಾ ಬೂಂದಿ ತಯಾರಿಸಿದೆ. ಬೂಂದಿ ಬಹಳವೇ ಚೆನ್ನಾಗಿ ಬಂದಿದೆ. ಇನ್ನು ಮನೆಯಲ್ಲೇ ಬೂಂದಿ ತಯಾರಿಸಬಹುದೆಂದು ಅಂದುಕೊಳ್ಳುತ್ತಿದ್ದೇನೆ.
    ಬೂಂದಿ ಲಡ್ಡು ತಯಾರಿಸುವ ಬೂಂದಿಗೂ, ಈ ಖಾರಾ ಬೂಂದಿಗೂ ಸ್ವಲ್ಪ ವ್ಯತ್ಯಾಸವಿದೆ. ಬೂಂದಿ ಲಡ್ಡು ಮಾಡಲು ಮೆತ್ತಗಿನ ಬೂಂದಿ ಬೇಕು. ಆದರೆ ಖಾರಾ ಬೂಂದಿ ತಯಾರಿಸಲು ಗರಿಯಾದ ಬೂಂದಿ ಬೇಕು. ಖಾರಾ ಬೂಂದಿ ತಯಾರಿಸಲು ಸುಲಭದ ವಿಧಾನ ಇಲ್ಲಿದೆ, ನೋಡಿ..


    ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು

    ಬೇಕಾಗುವ ಸಾಮಗ್ರಿಗಳು:
    ಕಡಲೆಹಿಟ್ಟು - 3 ಕಪ್
    ಅಕ್ಕಿಹಿಟ್ಟು - 3 ಚಮಚ
    ನೀರು - 1 1/2 ಕಪ್
    ನೆಲಗಡಲೆ - 3/4 ಕಪ್     
    ಕರಿಬೇವು - ಸ್ವಲ್ಪ
    ಉಪ್ಪು
    ಮೆಣಸಿನ ಪುಡಿ - ಖಾರಕ್ಕೆ ತಕ್ಕಂತೆ  
    ಕರಿಯಲು ಎಣ್ಣೆ
    ಬೂಂದಿ ಜಾಲರಿ 


    ಮಾಡುವ ವಿಧಾನ:
    ಕಡಲೆಹಿಟ್ಟು, ಅಕ್ಕಿಹಿಟ್ಟನ್ನು ಮಿಕ್ಸ್ ಮಾಡಿಕೊಳ್ಳಿ. ಇದಕ್ಕೆ ಸ್ವಲ್ಪ ಸ್ವಲ್ಪವೇ ನೀರು ಸೇರಿಸುತ್ತ, ಗಂಟಾಗದಂತೆ ಕಲಸಿ.
    ಹಿಟ್ಟಿನ ಮಿಶ್ರಣಕ್ಕೆ 3 - 4 ಚಮಚ ಎಣ್ಣೆ (ಬಿಸಿ ಮಾಡುವುದು ಬೇಡ) ಸೇರಿಸಿ ಕಲಸಿ. ಇದರಿಂದ ಹಿಟ್ಟು ಸರಾಗವಾಗಿ ಬೀಳಲು ಅನುಕೂಲವಾಗುತ್ತದೆ. ಇದು ವಾಹ್ ಛೆಫ್ ರವರ ಟಿಪ್!
    ಹಿಟ್ಟನ್ನು ದೋಸೆ ಹಿಟ್ಟಿಗಿಂತ ಸ್ವಲ್ಪ ತೆಳ್ಳಗೆ ಕಲಸಿಕೊಳ್ಳಿ. ಹಿಟ್ಟು ಬೂಂದಿ ಜಾಲರಿಯಿಂದ ಹನಿಗಳಾಗಿ ಕೆಳಗೆ ಬೀಳುವಂತೆ ಇರಬೇಕು.
    ಒಂದು ಅಗಲವಾದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು, ಜಾಲರಿಯ ಮೂಲಕ ಹಿಟ್ಟನ್ನು ಹನಿಹನಿಯಾಗಿ ಬಾಣಲಿಗೆ ಬೀಳುವಂತೆ ಮಾಡಿ.
    ಬೂಂದಿ ಹೊಂಬಣ್ಣಕ್ಕೆ ಬರುವತನಕ ಕರಿದು ತೆಗೆಯಿರಿ.
    ಎಲ್ಲ ಹಿಟ್ಟನ್ನೂ ಹೀಗೇ ಕರಿದು, ಬೂಂದಿ ತಯಾರಿಸಿಕೊಳ್ಳಿ.
    ನಂತರ ಅದೇ ಬಾಣಲೆಯಲ್ಲಿ ಕರಿಬೇವು ಮತ್ತು ನೆಲಗಡಲೆಯನ್ನೂ ಪ್ರತ್ಯೇಕವಾಗಿ ಕರಿದುಕೊಳ್ಳಿ.
    ಬೂಂದಿಗೆ ಕರಿಬೇವು, ನೆಲಗಡಲೆ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಮೆಣಸಿನಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿದರೆ ಖಾರಾ ಬೂಂದಿ ಸಿದ್ಧ. 
    ಇದನ್ನು ಹಾಗೇ ಸ್ನ್ಯಾಕ್ಸ್ ನಂತೆ ತಿನ್ನಬಹುದು, ಮಿಕ್ಷ್ಚರ್ ತಯಾರಿಸಬಹುದು, ಅಥವಾ ಬಿಸಿಬೇಳೆ ಭಾತ್ ನೊಡನೆ ಹಾಕಿಕೊಳ್ಳಬಹುದು. ಊಟಕ್ಕೆ ಹಾಕಿಕೊಳ್ಳಲೂ ಇದು ಚೆನ್ನಾಗಿರುತ್ತದೆ.


    ಟಿಪ್ಸ್:
    • ಬೂಂದಿಯ ಕಾಳುಗಳು ಚಪ್ಪಟೆಯಾಗಿ ಬೀಳುತ್ತಿದ್ದರೆ ಮಿಶ್ರಣಕ್ಕೆ ನೀರು ಹೆಚ್ಚಾಗಿದೆಯೆಂದರ್ಥ. ಆಗ ಒಂದೆರಡು ಚಮಚ ಕಡಲೆಹಿಟ್ಟು ಸೇರಿಸಿ ಕಲಸಿಕೊಂಡರೆ ಸರಿಹೋಗುತ್ತದೆ.

    Saturday, 1 October 2011

    ಆಲೂ ಟಿಕ್ಕಿ / Aloo Tikki

    Click here for English version.

    ಆಲೂ ಟಿಕ್ಕಿ, ಉತ್ತರ ಭಾರತದ ಫೇಮಸ್ ಸ್ನ್ಯಾಕ್ ಐಟಂ. ಸಂಜೆಯ ಹೊತ್ತಿನಲ್ಲಿ ಚಾಟ್ ಅಂಗಡಿಗೆ ಹೋಗಿ ಇಂಥ ತಿಂಡಿಗಳನ್ನು ತಿನ್ನುವುದೆಂದರೆ ಯಾರಿಗೆ ಇಷ್ಟವಿಲ್ಲ ಹೇಳಿ? ಆದರೆ ಆಲೂ ಟಿಕ್ಕಿಯನ್ನು ಕಡಿಮೆ ಸಮಯದಲ್ಲಿ ಮನೆಯಲ್ಲೇ ತಯಾರಿಸಬಹುದು. ನಮ್ಮ ರುಚಿಗೆ ತಕ್ಕಂತೆ ಸಾಮಗ್ರಿಗಳನ್ನು ಬಳಸಿಕೊಂಡರಾಯಿತು, ರುಚಿಯಾದ ಆಲೂ ಟಿಕ್ಕಿ ತಿನ್ನಲು ಸಿದ್ಧ! ಸಂಜೆಯ ಟೀ ಟೈಮ್ ಗೆ ಇದು ಚೆನ್ನಾಗಿರುತ್ತದೆ.


    ತಯಾರಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು 
    ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ.
     
    ಬೇಕಾಗುವ ಸಾಮಗ್ರಿಗಳು:
    2 ಮೀಡಿಯಂ ಸೈಜ್ ಆಲೂಗಡ್ಡೆ 
    ಬ್ರೆಡ್ ಕ್ರಂಬ್ಸ್ - ಸ್ವಲ್ಪ
    ಚಾಟ್ ಮಸಾಲಾ - ರುಚಿಗೆ ತಕ್ಕಷ್ಟು 
    ಗರಂ ಮಸಾಲಾ - 1 / 4 ಚಮಚ
    ಮೆಣಸಿನ ಪುಡಿ - ಸ್ವಲ್ಪ 
    ಹಸಿಮೆಣಸು 2 - 3 
    ಹೆಚ್ಚಿದ ಕೊತ್ತಂಬರಿ ಸೊಪ್ಪು - 3 ಚಮಚ  
    ರುಚಿಗೆ ತಕ್ಕಷ್ಟು ಉಪ್ಪು
    ಬೇಯಿಸಲು ಎಣ್ಣೆ 

    ಮಾಡುವ ವಿಧಾನ: 
    ಆಲೂಗಡ್ಡೆಯನ್ನು ಮೆತ್ತಗೆ ಬೇಯಿಸಿಕೊಂಡು ಸಿಪ್ಪೆ ತೆಗೆದು, ನುಣ್ಣಗೆ ಪುಡಿಮಾಡಿಕೊಳ್ಳಿ. ನೀರಿನಂಶ ಕಡಿಮೆ ಇದ್ದಷ್ಟೂ ಒಳ್ಳೆಯದು.
    ಎಣ್ಣೆ, ಬ್ರೆಡ್ ಕ್ರಂಬ್ಸ್ ಹೊರತಾಗಿ ಉಳಿದೆಲ್ಲ ಸಾಮಗ್ರಿಗಳನ್ನೂ ಆಲೂಗಡ್ಡೆಯೊಡನೆ ಸೇರಿಸಿ ಕಲಸಿ. ಇದಕ್ಕೆ ಸ್ವಲ್ಪ ಬ್ರೆಡ್ ಕ್ರಂಬ್ಸ್ ಸೇರಿಸಿ ಮೆತ್ತಗೆ ಚಪಾತಿ ಹಿಟ್ಟಿನಂತೆ ಕಲಸಿಕೊಳ್ಳಿ.
    ಮಿಶ್ರಣದಿಂದ ಚಿಕ್ಕ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿಕೊಂಡು ಕೈಯಿಂದ ಒತ್ತಿ ಚಪ್ಪಟೆ ಮಾಡಿ.


    ಇವನ್ನು ಬ್ರೆಡ್ ಕ್ರಂಬ್ಸ್ ನಲ್ಲಿ ಹೊರಳಿಸಿಕೊಂಡು, ದೋಸೆ ಕಾವಲಿಯಮೇಲೆ ಚೆನ್ನಾಗಿ ಎಣ್ಣೆ ಹಾಕಿ ಎರಡೂ ಕಡೆ ಕೆಂಪಗೆ ಬೇಯಿಸಿ.
    ಆಲೂ ಟಿಕ್ಕಿ ಬಿಸಿ ಇರುವಾಗಲೇ ಕೆಂಪು ಚಟ್ನಿ ಇಲ್ಲವೇ ಟೊಮೆಟೋ ಸಾಸ್ ನೊಡನೆ ತಿನ್ನಿ.

    ಟಿಪ್ಸ್:
    • ಮನೆಯಲ್ಲೇ ಬ್ರೆಡ್ ಕ್ರಂಬ್ಸ್ ತಯಾರಿಸಲು ಸುಲಭದ ಉಪಾಯ: ಬ್ರೆಡ್ ಪೀಸ್ ಗಳನ್ನು ಸ್ವಲ್ಪ ಒಣಗಿಸಿಕೊಳ್ಳಿ. ಮೈಕ್ರೋವೇವ್ ಓವನ್ ನಲ್ಲಿ ಬಿಸಿಮಾಡಿಯೂ ಒಣಗಿಸಬಹುದು. ಒಣಗಿದ ಬ್ರೆಡ್ ನ್ನು ಚೂರು ಮಾಡಿಕೊಂಡು ಮಿಕ್ಸಿಯಲ್ಲಿ ತರಿಯಾಗಿ ಪುಡಿಮಾಡಿದರೆ ಆಯಿತು, ಬ್ರೆಡ್ ಕ್ರಂಬ್ಸ್ ಸಿದ್ಧ!

    Monday, 26 September 2011

    ಸಾಟೆ / Saate

    Click here for English version.

    ಸಾಮಾನ್ಯವಾಗಿ ಮನೆಯಲ್ಲಿ ಮಹಿಳೆಯರಿಗೆ ಯಾವುದು ಇಷ್ಟವೋ ಆ ಅಡಿಗೆಗಳನ್ನು ತಯಾರಿಸುವರೆಂದು ಒಂದು ಮಾತಿದೆ. ನಮ್ಮ ಮನೆಯಲ್ಲಂತೂ ಸಿಹಿತಿಂಡಿಗಳ ಮಟ್ಟಿಗೆ ಈ ಮಾತು ನಿಜ! ನನಗೆ ಸಿಹಿತಿಂಡಿಗಳೆಂದರೆ ಬಹಳ ಇಷ್ಟ. ಅದಕ್ಕೇ ಮನೆಯಲ್ಲಿ ಒಂದಲ್ಲಾ ಒಂದು ಸಿಹಿತಿಂಡಿ ಇದ್ದೇ ಇರುತ್ತದೆ. ಇಷ್ಟೇ ಅಲ್ಲ, ಯಾರದಾದರೂ ಅಡಿಗೆ ಬ್ಲಾಗ್ / ವೆಬ್ ಸೈಟ್ ಗೆ ಹೋದರೂ ನಾನು ಮೊದಲು ನೋಡುವುದು ಸಿಹಿತಿಂಡಿಗಳನ್ನೇ! ಸಿಹಿತಿಂಡಿಗಳನ್ನು ಚೆನ್ನಾಗಿ ಹಾಕಿದ್ದಾರೆಂದರೆ ಅವರ ಬ್ಲಾಗ್ ಇಷ್ಟವಾಯಿತೆಂದೇ ಅರ್ಥ!!  
    'ಸಾಟೆ' ಎಂದರೆ ಉತ್ತರ ಕನ್ನಡದ ಸ್ಪೆಷಲ್ ಸಿಹಿತಿಂಡಿಗಳಲ್ಲಿ ಒಂದು. ನೋಡುವುದಕ್ಕೆ ಬಾದೂಷಾದಂತೆ ತೋರಿದರೂ ಇದರ ರುಚಿಯೇ ಬೇರೆ. ಬಾದೂಷಾ ಮೆತ್ತಗಿರುತ್ತದೆ, ಆದರೆ ಸಾಟೆ ಪದರು ಪದರಾಗಿ ಒಳತನಕವೂ ಗರಿಯಾಗಿರುತ್ತದೆ. ನೀವು ಉತ್ತರ ಕನ್ನಡ ಜಿಲ್ಲೆಗೆ ಹೋದರೆ ಸಾಮಾನ್ಯವಾಗಿ ಹೆಚ್ಚಿನ ಸ್ವೀಟ್ ಸ್ಟಾಲ್ ಗಳಲ್ಲಿ ಸಾಟೆ ಸಿಕ್ಕೇ ಸಿಗುತ್ತದೆ. ನಾನಂತೂ ಇಷ್ಟರೊಳಗೆ ಯಾರ ಬ್ಲಾಗ್ / ವೆಬ್ ಸೈಟ್ ನಲ್ಲೂ ಸಾಟೆ ಮಾಡುವ ವಿಧಾನವನ್ನು ಬರೆದಿದ್ದನ್ನು ನೋಡಿಲ್ಲ. ಹೀಗಾಗಿ ಸಾಟೆ ತಯಾರಿಸುವುದನ್ನು ಬರೆಯುತ್ತಿರುವವರಲ್ಲಿ ನಾನೇ ಮೊದಲಿಗಳೆನಿಸುತ್ತದೆ :) ನಾನು ಇದನ್ನು ನನ್ನ ಕಸಿನ್ ಒಬ್ಬರಿಂದ ಕಲಿತದ್ದು. 


    ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ 
    ಈ ಅಳತೆಯಿಂದ ಸುಮಾರು 13 - 14 ಸಾಟೆಗಳನ್ನು ತಯಾರಿಸಬಹುದು.
      
    ಬೇಕಾಗುವ ಸಾಮಗ್ರಿಗಳು:
    2 ದೊಡ್ಡ ಲೋಟ ಮೈದಾ
    ತುಪ್ಪ / ಡಾಲ್ಡಾ - 1/4 ಲೋಟ 
    ಚಿಟಿಕೆ ಉಪ್ಪು 
    2 ಲೋಟ ಸಕ್ಕರೆ
    ಸ್ವಲ್ಪ ನೀರು
    ಕರಿಯಲು ಎಣ್ಣೆ 
    ಒಂದು ನೈಲಾನ್ ಬಟ್ಟೆ 

    ಮಾಡುವ ವಿಧಾನ:
    ಮೈದಾಹಿಟ್ಟಿಗೆ ಚಿಟಿಕೆ ಉಪ್ಪು ಮತ್ತು ತುಪ್ಪ / ಡಾಲ್ಡಾ ಸೇರಿಸಿ ಕಲಸಿಕೊಳ್ಳಿ. ಚೆನ್ನಾಗಿ ಮಿಕ್ಸ್ ಮಾಡಿ, ಮಿಶ್ರಣ ಬ್ರೆಡ್ ಕ್ರಂಬ್ಸ್ ನಂತಾದಾಗ ಅದಕ್ಕೆ ಸ್ವಲ್ಪ ನೀರು ಸೇರಿಸಿ ಚಪಾತಿ ಹಿಟ್ಟಿನಂತೆ ಕಲಸಿಕೊಳ್ಳಿ. ಹಿಟ್ಟನ್ನು ತುಂಬ ಮೆತ್ತಗೆ ಕಲಸಬೇಡಿ.
    ಕಲಸಿದ ಹಿಟ್ಟಿಗೆ ಒಂದು ಪ್ಲೇಟ್ ಮುಚ್ಚಿ, 10 ನಿಮಿಷ ನೆನೆಯಲು ಬಿಡಿ.
    ನಂತರ ಹಿಟ್ಟಿನ ಮುದ್ದೆಯನ್ನು ಎರಡು ಭಾಗ ಮಾಡಿಕೊಳ್ಳಿ (ಬೇಕಿದ್ದರೆ ಎಲ್ಲ ಹಿಟ್ಟನ್ನೂ ಒಮ್ಮೆಲೇ ಬಳಸಬಹುದು).
    ಒಂದು ಭಾಗ ಹಿಟ್ಟನ್ನು ತೆಗೆದುಕೊಂಡು ದೊಡ್ಡ ಚಪಾತಿಯಂತೆ ಲಟ್ಟಿಸಿ.


    ಚಪಾತಿಯನ್ನು ಎರಡು ಮಡಿಕೆ ಮಡಿಚಿ, ತ್ರಿಕೋನದಂತೆ ಮಾಡಿ. ಅದನ್ನು ಪುನಃ ಚಪಾತಿಯಂತೆ ಲಟ್ಟಿಸಿ.


    ಇದೇ ರೀತಿ 15 - 16 ಬಾರಿ ಮಡಿಚಿ ಲಟ್ಟಿಸಬೇಕು. ಹೀಗೆ ಮಾಡುವುದರಿಂದ ಸಾಟೆ ಚೆನ್ನಾಗಿ ಪದರು ಪದರಾಗುತ್ತದೆ.
    ಕೊನೆಯಲ್ಲಿ ಇದನ್ನು 1 ಇಂಚು ದಪ್ಪಕ್ಕೆ ಲಟ್ಟಿಸಿಕೊಂಡು, ಚಿಕ್ಕ ವೃತ್ತಗಳಾಗಿ ಕತ್ತರಿಸಿಕೊಳ್ಳಿ.


    ಕತ್ತರಿಸಿದ ನಂತರ ಉಳಿದ ಹಿಟ್ಟನ್ನು ಇನ್ನೊಂದು ಹಿಟ್ಟಿನ ಮುದ್ದೆಯೊಡನೆ ಸೇರಿಸಿಕೊಂಡು ಪುನಃ 15 - 16 ಬಾರಿ ಲಟ್ಟಿಸಿ, ವೃತ್ತಗಳಾಗಿ ಕತ್ತರಿಸಿ.
    ಕತ್ತರಿಸಿದ ಸಾಟೆಗಳು ಉಬ್ಬದಂತೆ ಒಂದು ಫೋರ್ಕ್ ನಿಂದ ಚುಚ್ಚಿ.  ಹೀಗೆ ಮಾಡುವುದರಿಂದ ಸಾಟೆ ಒಳತನಕ ಬೇಯುವುದಕ್ಕೂ ಅನುಕೂಲವಾಗುತ್ತದೆ.
    ಸಕ್ಕರೆಗೆ ಸ್ವಲ್ಪವೇ ನೀರು ಸೇರಿಸಿ ಕುದಿಸಿ, ಗಟ್ಟಿ ಪಾಕ ಮಾಡಿಕೊಳ್ಳಿ. ಇದನ್ನು ಹಾಗೇ ತಣ್ಣಗಾಗಲು ಬಿಟ್ಟರೆ ಅಲ್ಲೇ ಗಟ್ಟಿಯಾಗುವಂತೆ ಇರಲಿ.
    ಬಾಣಲೆಯಲ್ಲಿ ಎಣ್ಣೆಯನ್ನು ಹದವಾಗಿ ಕಾಯಿಸಿಕೊಂಡು ಸಾಟೆಯನ್ನು ಕಡಿಮೆ ಉರಿಯಲ್ಲಿ ಸುಮಾರು 20 ನಿಮಿಷ ಅಥವಾ ಗರಿಗರಿಯಾಗುವತನಕ ಕರಿಯಿರಿ.
    ಹೊಂಬಣ್ಣಕ್ಕೆ ಕರಿದ ಸಾಟೆಗಳನ್ನು ಒಂದು ಟಿಶ್ಯೂ ಪೇಪರ್ ಮೇಲೆ ಹಾಕಿ ತಣ್ಣಗಾಗಲು ಬಿಡಿ.
    ತಣ್ಣಗಾದ ನಂತರ ಸಾಟೆಗಳನ್ನು ಒಂದು ನೈಲಾನ್ ಬಟ್ಟೆಯಮೇಲೆ ಜೋಡಿಸಿಕೊಳ್ಳಿ. 


    ಸಕ್ಕರೆ ಪಾಕವನ್ನು ಸ್ವಲ್ಪ ಬಿಸಿಮಾಡಿ ಕರಗಿಸಿಕೊಂಡು, ಒಂದೊಂದು ಸಾಟೆಯಮೇಲೆ 3 ಚಮಚದಷ್ಟು ಸಕ್ಕರೆ ಪಾಕವನ್ನು ಹಾಕಿ.
    ಸಕ್ಕರೆ ಪಾಕ ಗಟ್ಟಿಯಾದನಂತರ ಸಾಟೆಗಳನ್ನು ನಿಧಾನವಾಗಿ ಬಟ್ಟೆಯಿಂದ ಎತ್ತಿಕೊಳ್ಳಿ.
    ಸಿದ್ಧವಾದ ಸಾಟೆಗಳನ್ನು ಒಂದು ಕಂಟೇನರ್ ಗೆ ಹಾಕಿಡಿ. ಇದನ್ನು ಸುಮಾರು 1 ವಾರದವರೆಗೂ ಇಟ್ಟುಕೊಂಡು ತಿನ್ನಬಹುದು.


    Related Posts Plugin for WordPress, Blogger...