Here are some recipes which I came across through the net, books, so on and few are my own experiments..

Friday, 23 December 2016

ಕ್ಯಾಂಡೀಡ್ ಆರೆಂಜ್ ಪೀಲ್

ಕ್ರಿಸ್ ಮಸ್ ಹಬ್ಬ ಇನ್ನೇನು ಎರಡು ದಿನಗಳಿವೆ. ಮನೆಗಳು, ಶಾಪಿಂಗ್ ಮಾಲ್ ಎಲ್ಲಿ ನೋಡಿದರೂ ಹಬ್ಬದ ಸಂಭ್ರಮ ತುಳುಕಾಡುತ್ತಿದೆ. ಅಂಗಡಿಗಳಲ್ಲೆಲ್ಲ ಡಿಸ್ಕೌಂಟ್ ಮಾರಾಟ, ಅದನ್ನಂತೂ ಮಿಸ್ ಮಾಡುವ ಹಾಗೇ ಇಲ್ಲ!😁 ನಮ್ಮ ಮನೆಯಲ್ಲಿ ಕ್ರಿಸ್ ಮಸ್ ಆಚರಿಸುವ ರೂಢಿ ಇಲ್ಲ. ಆದರೆ ಕ್ರಿಸ್ ಮಸ್ ಸಮಯದಲ್ಲಿ ತಯಾರಿಸುವ ಫ್ರೂಟ್ ಕೇಕ್ ಅಥವಾ ಪ್ಲಮ್ ಕೇಕ್ ನಮಗೆಲ್ಲ ಇಷ್ಟ! ಹೀಗಾಗಿ ಕೇಕ್ ತಯಾರಿಸಲು ಬೇಕಾದ ಎಲ್ಲ ಸಿದ್ಧತೆಗಳೂ ಮನೆಯಲ್ಲಿ ನಡೆಯುತ್ತಿವೆ. 
ಕ್ಯಾಂಡೀಡ್ ಪೀಲ್ - ಇದು ಫ್ರೂಟ್ ಕೇಕ್ ತಯಾರಿಸಲು ಬೇಕಾಗುವ ಒಂದು ಪ್ರಮುಖ ಪದಾರ್ಥ. ಕಿತ್ತಳೆ, ನಿಂಬೆ ಇತ್ಯಾದಿ ಹುಳಿ ಹಣ್ಣುಗಳ ಸಿಪ್ಪೆಯನ್ನು ಬೇಯಿಸಿ ಅದರಲ್ಲಿನ ಕಹಿ ಅಂಶವನ್ನು ತೆಗೆದು ನಂತರ ಸಕ್ಕರೆ ಪಾಕದಲ್ಲಿ ಬೇಯಿಸಿ ಇದನ್ನು ತಯಾರಿಸಲಾಗುತ್ತದೆ. ಕ್ರಿಸ್ ಮಸ್ ಹಬ್ಬದ ಸಮಯದಲ್ಲಿ ಕ್ಯಾಂಡಿಡ್ ಪೀಲ್ ಹೆಚ್ಚಿನ ಅಂಗಡಿಗಳಲ್ಲಿ ಸುಲಭವಾಗಿ ಸಿಗುತ್ತದೆ. ಹಾಗೆಂದು ಇದನ್ನು ಮನೆಯಲ್ಲಿ ತಯಾರಿಸುವುದು ಕಷ್ಟವೇನಿಲ್ಲ. ನಾನು ಫ್ರೂಟ್ ಕೇಕ್ ತಯಾರಿಸುವಾಗಲೆಲ್ಲ ಕ್ಯಾಂಡೀಡ್ ಪೀಲ್ ನ್ನು ಮನೆಯಲ್ಲೇ ತಯಾರಿಸಿಕೊಳ್ಳುತ್ತೇನೆ. 
ಕ್ಯಾಂಡೀಡ್ ಆರೆಂಜ್ ಪೀಲ್ ರೆಸಿಪಿ ಈ ಕೆಳಗಿನಂತಿದೆ. ನಾನು ಇದನ್ನು ಕಲಿತದ್ದು ಸುಮಾ ಅವರ ವೆಬ್ ಸೈಟ್ ನಿಂದ. 


ತಯಾರಿಸಲು ಬೇಕಾಗುವ ಸಮಯ: 1 1/4 ಘಂಟೆ 
ಸೆಟ್ ಆಗಲು ಬೇಕಾಗುವ ಸಮಯ: 1 ಘಂಟೆ 
ಈ ಅಳತೆಯಿಂದ 30 - 32 ಒಂದೇ ಅಳತೆಯ ಕ್ಯಾಂಡೀಡ್ ಆರೆಂಜ್ ಪೀಲ್ಸ್ ತಯಾರಿಸಬಹುದು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
  • ಕಿತ್ತಳೆ ಹಣ್ಣು - 2 (ಮೀಡಿಯಮ್ ಸೈಜಿನವು)
  • ಸಕ್ಕರೆ - 1/2 ಕಪ್ 
  • ನೀರು - 1/2 ಕಪ್ + ಕಿತ್ತಳೆ ಸಿಪ್ಪೆ ಬೇಯಲು ಬೇಕಾಗುವಷ್ಟು 

ತಯಾರಿಸುವ ವಿಧಾನ:
  • ಕಿತ್ತಳೆ ಹಣ್ಣನ್ನು ಉದ್ದುದ್ದಕ್ಕೆ ನಾಲ್ಕು ಸಮಭಾಗಗಳಾಗಿ ಕತ್ತರಿಸಿ, ಸಿಪ್ಪೆಯನ್ನು ಹುಷಾರಾಗಿ ಬೇರ್ಪಡಿಸಿಕೊಳ್ಳಿ. 
  • ಸಿಪ್ಪೆಯನ್ನು ಒಂದೇ ಅಳತೆಯ ಚೂರುಗಳಾಗಿ ಹೆಚ್ಚಿಕೊಳ್ಳಿ. 
  • ಎರಡು ಕಪ್ ಅಥವಾ ಸಿಪ್ಪೆ ಮುಳುಗುವಷ್ಟು ನೀರನ್ನು ಒಂದು ಪಾತ್ರೆಯಲ್ಲಿ ಬಿಸಿಗಿಡಿ. ಇದಕ್ಕೆ ಸೀಳಿದ ಕಿತ್ತಳೆ ಸಿಪ್ಪೆ ಸೇರಿಸಿ 4 - 5 ನಿಮಿಷ ಕುದಿಸಿ. ನಂತರ ನೀರನ್ನು ಬಸಿದು ತೆಗೆಯಿರಿ. 
  • ಕಿತ್ತಳೆ ಸಿಪ್ಪೆಯ ಕಹಿ ಅಂಶ ಹೋಗಲು ಮೇಲೆ ಹೇಳಿದ ಸ್ಟೆಪ್ ನ್ನು 2 - 3 ಬಾರಿ ಪುನರಾವರ್ತನೆ ಮಾಡಿ. 
  • ಅರ್ಧ ಕಪ್ ನಷ್ಟು ನೀರಿಗೆ ಅರ್ಧ ಕಪ್ ನಷ್ಟು ಸಕ್ಕರೆ ಸೇರಿಸಿ ಬಿಸಿಗಿಡಿ. ಸಕ್ಕರೆ ಪೂರ್ತಿ ಕರಗಿದ ನಂತರ ಇದಕ್ಕೆ ಕಿತ್ತಳೆ ಸಿಪ್ಪೆಯ ಚೂರುಗಳನ್ನು ಸೇರಿಸಿ ಆದಷ್ಟು ಸಣ್ಣ ಉರಿಯಲ್ಲಿ ಬೇಯಿಸಿ. 
  • ಮುಕ್ಕಾಲು ಘಂಟೆ ಅಥವಾ ಒಂದು ಘಂಟೆಕಾಲ ಸಣ್ಣ ಉರಿಯಲ್ಲಿ ಬೇಯಿಸಿದಾಗ ಕಿತ್ತಳೆ ಸಿಪ್ಪೆಯ ಚೂರುಗಳು ಸಕ್ಕರೆ ಪಾಕವನ್ನೆಲ್ಲ ಹೀರಿಕೊಂಡು ಒಣಗಲು ಆರಂಭಿಸುತ್ತವೆ. ಸಕ್ಕರೆ ಪಾಕವೆಲ್ಲ ಒಣಗಿದ ನಂತರ ಉರಿ ಆಫ್ ಮಾಡಿ, ಕಿತ್ತಳೆ ಸಿಪ್ಪೆಯ ಚೂರುಗಳನ್ನು ಕೂಲಿಂಗ್ ಸ್ಟ್ಯಾಂಡ್ ಮೇಲೆ ಒಂದು ಘಂಟೆಕಾಲ ಹರವಿ ತಣ್ಣಗಾಗಲು ಬಿಡಿ. 
  • ತಯಾರಾದ ಕ್ಯಾಂಡೀಡ್ ಆರೆಂಜ್ ಪೀಲ್ ನ್ನು ಗಾಳಿಯಾಡದ ಕಂಟೇನರ್ ನಲ್ಲಿ ಹಾಕಿಟ್ಟು, ಬೇಕಾದಾಗ ಬಳಸಿ. 



ಟಿಪ್ಸ್:
  • ಇದೇ ವಿಧಾನದಲ್ಲೇ ಕಿತ್ತಳೆ ಸಿಪ್ಪೆಯ ಬದಲು ನಿಂಬೆಹಣ್ಣಿನ ಸಿಪ್ಪೆ ಬಳಸಿ ಕ್ಯಾಂಡೀಡ್ ಲೆಮನ್ ಪೀಲ್ ತಯಾರಿಸಬಹುದು. 

Thursday, 27 October 2016

ಡ್ರೈ ಫ್ರೂಟ್ಸ್ ಲಡ್ಡು । ಒಣ ಹಣ್ಣುಗಳ ಉಂಡೆ

ಕರ್ನಾಟಕದಲ್ಲಿ ಸಾಮಾನ್ಯವಾಗಿ ಯಾವುದೇ ಸ್ವೀಟ್ ಸ್ಟಾಲ್ ಗೆ ಹೋದರೂ ನಿಮಗೆ ಡ್ರೈ ಫ್ರೂಟ್ಸ್ ಉಂಡೆ ಕಾಣಸಿಗುತ್ತದೆ. ಗೋಡಂಬಿ, ಬಾದಾಮಿ, ಒಣದ್ರಾಕ್ಷಿ, ಗಸಗಸೆ, ಖರ್ಜೂರ ಇತ್ಯಾದಿ ಆರೋಗ್ಯಕ್ಕೆ ಉತ್ತಮವಾದ ಸಾಮಗ್ರಿಗಳನ್ನು ಬಳಸಿ ತಯಾರಿಸುವ ಈ ಉಂಡೆ ತಿನ್ನಲು ಬಹಳ ರುಚಿ! ಪುಟ್ಟ ಮಕ್ಕಳಿಂದ ವಯೋವೃದ್ಧರವರೆಗೂ ಎಲ್ಲ ವಯಸ್ಸಿನವರಿಗೂ ಈ ಉಂಡೆ ಬಹಳ ಒಳ್ಳೆಯದು. 
ನಮ್ಮ ಮನೆಯಲ್ಲಿ ಡ್ರೈ ಫ್ರೂಟ್ಸ್ ಮತ್ತು ನಟ್ಸ್ ತಿನ್ನುವುದೆಂದರೆ ಎಲ್ಲರಿಗೂ ಇಷ್ಟ. ಆದರೆ ದಿನವೂ ನಿಯಮಿತ ಪ್ರಮಾಣದಲ್ಲಿ ತಿನ್ನುವುದು ಸ್ವಲ್ಪ ಕಷ್ಟದ ವಿಷಯ; ಒಂದು ದಿನ ಜಾಸ್ತಿ ಡ್ರೈ ಫ್ರೂಟ್ಸ್ ತಿನ್ನುವುದು, ನಂತರ ಕೆಲವು ದಿನ ಅವನ್ನು ತಿನ್ನಲು ಮರೆತುಬಿಡುವುದು ಸಾಮಾನ್ಯವಾಗಿ ನಡೆಯುತ್ತಿರುತ್ತದೆ. ಅದರ ಬದಲು ಡ್ರೈ ಫ್ರೂಟ್ಸ್ ಉಂಡೆ ಮಾಡಿಟ್ಟರೆ ದಿನವೂ ಮರೆಯದೆ ಇಷ್ಟಪಟ್ಟು ತಿನ್ನುತ್ತೇವೆ! 
ನಾನು ತಯಾರಿಸುವ ಡ್ರೈ ಫ್ರೂಟ್ಸ್ ಉಂಡೆಯ ರೆಸಿಪಿ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು 
ಈ ಅಳತೆಯಿಂದ 30 ಮೀಡಿಯಂ ಅಳತೆಯ ಉಂಡೆಗಳನ್ನು ತಯಾರಿಸಬಹುದು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್  

ಬೇಕಾಗುವ ಸಾಮಗ್ರಿಗಳು:

  • ಖರ್ಜೂರ (ಬೀಜ ತೆಗೆದು ಮಾಧ್ಯಮ ಅಳತೆಯ ಚೂರುಗಳಾಗಿ ಹೆಚ್ಚಿದ್ದು) - 2 ಕಪ್ (1 ಕಪ್ = 
  • ಹೆಚ್ಚಿದ ಬಾದಾಮಿ - 1/2 ಕಪ್ 
  • ಗೋಡಂಬಿ ಚೂರುಗಳು - 1/2 ಕಪ್ 
  • ಒಣದ್ರಾಕ್ಷಿ - 1/2 ಕಪ್
  • ಒಣಕೊಬ್ಬರಿ ತುರಿ - 1/2 ಕಪ್
  • ಗಸಗಸೆ - 1/4 ಕಪ್ 
  • ತುಪ್ಪ - 4 ಟೇಬಲ್ ಸ್ಪೂನ್ 


ತಯಾರಿಸುವ ವಿಧಾನ:

  • ಒಂದು ದಪ್ಪ ತಳದ ಬಾಣಲೆಯನ್ನು ಬಿಸಿಮಾಡಿ ಬಾದಾಮಿ ಚೂರುಗಳು, ಗೋಡಂಬಿ ಚೂರುಗಳು ಮತ್ತು ಗಸಗಸೆಯನ್ನು ಪ್ರತ್ಯೇಕವಾಗಿ ಹುರಿದುಕೊಳ್ಳಿ. 
  • ಅದೇ ಬಾಣಲೆಯಲ್ಲಿ ತುಪ್ಪವನ್ನು ಬಿಸಿಗಿಡಿ. ಇದಕ್ಕೆ ಖರ್ಜೂರದ ಚೂರುಗಳು ಮತ್ತು ಒಣದ್ರಾಕ್ಷಿ ಸೇರಿಸಿ ಕೈಯಾಡಿಸುತ್ತಿರಿ. ಮಿಶ್ರಣ ಮುದ್ದೆಯಂತಾದಾಗ ಉರಿಯನ್ನು ಆಫ್ ಮಾಡಿ. 
  • ಖರ್ಜೂರ - ಒಣದ್ರಾಕ್ಷಿ ಮಿಶ್ರಣಕ್ಕೆ ಉಳಿದೆಲ್ಲ ಸಾಮಗ್ರಿಗಳನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. 
  • ಮಿಶ್ರಣದಿಂದ ಬೇಕಾದ ಅಳತೆಯ ಉಂಡೆಗಳನ್ನು ಮಾಡಿ ಗಾಳಿಯಾಡದ ಡಬ್ಬದಲ್ಲಿ ಹಾಕಿಟ್ಟು ಬಳಸಿ. 

Tuesday, 20 September 2016

ಬಾಕ್ಲವಾ

'ಬಾಕ್ಲವ' - ಇದು ಟರ್ಕಿಯ ಒಂದು ಸುಪ್ರಸಿದ್ಧ ಸಿಹಿತಿಂಡಿ. ನಾನು ಇದರ ಹೆಸರನ್ನು ಅನೇಕಬಾರಿ ಕೇಳಿದ್ದರೂ ಎಂದೂ ತಿಂದಿರಲಿಲ್ಲ. ಸುಮಾರು ದಿನಗಳ ಹಿಂದೆ ಪರಿಚಿತರೊಬ್ಬರು ನಮ್ಮ ಮನೆಗೆ ಬರುವಾಗ ಬಾಕ್ಲವಾ ವನ್ನು ತಂದಿದ್ದರು. ಅದನ್ನು ತಿಂದ ನಂತರ ನೆಟ್ ನಲ್ಲಿ ಜಾಲಾಡಿ ಬಾಕ್ಲವಾ ತಯಾರಿಸುವ ವಿಧಾನ ತಿಳಿದುಕೊಂಡೆ.
ಬಾಕ್ಲವಾ ತಯಾರಿಸಲು ನನ್ನಬಳಿ ವಾಲ್ನಟ್ ಇರಲಿಲ್ಲ. ಹೀಗಾಗಿ ಬಾದಾಮಿಯನ್ನು ಬಳಸಿ ಬಾಕ್ಲವಾ ತಯಾರಿಸಿದ್ದಾಯಿತು. ಅಳುಕುತ್ತಲೇ ಬಾದಾಮಿ ಬಳಸಿದ್ದರೂ ಬಾಕ್ಲವ ತಯಾರಾದ ನಂತರ ಅದು ಅಂಗಡಿಯಿಂದ ತಂದದ್ದರಷ್ಟೇ ಚೆನ್ನಾಗಿತ್ತು.
ನಾನು ಈ ರೆಸಿಪಿಯನ್ನು ಆಲ್ ರೆಸಿಪೀಸ್.ಕಾಮ್ ಎನ್ನುವ ವೆಬ್ ಸೈಟ್ ನಲ್ಲಿ ನೋಡಿ ಚಿಕ್ಕಪುಟ್ಟ ಬದಲಾವಣೆಗಳೊಂದಿಗೆ ಟ್ರೈ ಮಾಡಿದ್ದು. ಇಲ್ಲಿದೆ ನೋಡಿ ಬಾಕ್ಲವ ರೆಸಿಪಿ!


ತಯಾರಿಸಲು ಬೇಕಾಗುವ ಸಮಯ: 35 ನಿಮಿಷಗಳು
ಬೇಕಿಂಗ್ ಟೈಮ್: 50 - 55 ನಿಮಿಷಗಳು
ಈ ಅಳತೆಯಿಂದ 40 ಬಾಕ್ಲವಾ ಪೀಸ್ ಗಳನ್ನು ತಯಾರಿಸಬಹುದು
ಡಿಫಿಕಲ್ಟಿ ಲೆವೆಲ್: ಕಠಿಣ

ಬೇಕಾಗುವ ಸಾಮಗ್ರಿಗಳು:

  • ಫಿಲೋ ಪೇಸ್ಟ್ರಿ ಶೀಟ್ಸ್- 375 ಗ್ರಾಂ 
  • ಬೆಣ್ಣೆ - 250 ಗ್ರಾಂ 
  • ಸಕ್ಕರೆ - 1 ಕಪ್ (1 ಕಪ್ = 200 ಗ್ರಾಂ)
  • ಬಾದಾಮಿ - 2 ಕಪ್ (ಟಿಪ್ಸ್ ನೋಡಿ)
  • ಸಕ್ಕರೆಪುಡಿ - 4 ಟೇಬಲ್ ಚಮಚ 
  • ನೀರು - 1 ಕಪ್ 
  • ರಸ ತೆಗೆದ ನಿಂಬೆಹಣ್ಣಿನ ಸಿಪ್ಪೆ - ಅರ್ಧ ಹಣ್ಣಿನದು 
  • ಲವಂಗ - 2
  • ಜೇನುತುಪ್ಪ - 6 ಟೇಬಲ್ ಚಮಚ 
  • ಚಕ್ಕೆ / ದಾಲ್ಚಿನ್ನಿ ಪುಡಿ - 1 ಟೀ ಚಮಚ 


ತಯಾರಿಸುವ ವಿಧಾನ:

  • ಫಿಲೋ ಪೇಸ್ಟ್ರಿಯನ್ನು ಫ್ರಿಜ್ ನಿಂದ ಸ್ವಲ್ಪ ಮೊದಲೇ ತೆಗೆದಿಟ್ಟಿರಿ. 
  • ಬಾದಾಮಿಯನ್ನು ಸಣ್ಣಗೆ ಹೆಚ್ಚಿ, ಸಣ್ಣ ಉರಿಯಲ್ಲಿ ಪರಿಮಳ ಬರುವಂತೆ ಅಥವಾ ಹೊಂಬಣ್ಣ ಬರುವವರೆಗೆ ಹುರಿಯಿರಿ. ತಣ್ಣಗಾದ ನಂತರ ಇದಕ್ಕೆ  4 ಟೇಬಲ್ ಚಮಚದಷ್ಟು ಸಕ್ಕರೆಪುಡಿ, 1 ಟೀ ಚಮಚ ದಾಲ್ಚಿನ್ನಿ ಪುಡಿ ಸೇರಿಸಿ ಮಿಕ್ಸ್ ಮಾಡಿ ತಣಿಯಲು ಬಿಡಿ.  
  • ಬೇಕಿಂಗ್ ಟ್ರೇ ಗೆ ಬೆಣ್ಣೆ ಸವರಿಕೊಳ್ಳಿ. ನಾನು ಇಲ್ಲಿ 33*23 cm ಬೇಕಿಂಗ್ ಟ್ರೇ ಬಳಸಿದ್ದೇನೆ. 
  • ಓವನ್ ನ್ನು 180 ಡಿಗ್ರಿಗೆ ಪ್ರಿ-ಹೀಟ್ ಮಾಡಿಕೊಳ್ಳಿ. 
  • ನಾಜೂಕಾಗಿ ಫಿಲೋ ಪೇಸ್ಟ್ರಿಯ ಎರಡು ಶೀಟ್ ಗಳನ್ನು ತೆಗೆದು ಬೇಕಿಂಗ್ ಟ್ರೇಯಲ್ಲಿ ಜೋಡಿಸಿ. ಅದರಮೇಲೆ ಕರಗಿಸಿದ ಬೆಣ್ಣೆಯನ್ನು ಸವರಿ, ಮೇಲಿನಿಂದ ಇನ್ನೆರಡು ಪೇಸ್ಟ್ರಿ ಶೀಟ್ ಗಳನ್ನು ಜೋಡಿಸಿ. ಅದರಮೇಲೆ ಬೆಣ್ಣೆ ಸವರಿ ಮತ್ತೆ ಎರಡು ಶೀಟ್ ಜೋಡಿಸಿ. ಅರ್ಧಭಾಗದಷ್ಟು ಶೀಟ್ ಗಳು ಖಾಲಿಯಾಗುವವರೆಗೆ ಇದೇ ರೀತಿ ಮಾಡಿ.  
  • ಇದರಮೇಲೆ ಬೆಣ್ಣೆ ಸವರಿ, ಬಾದಾಮಿ ಮಿಶ್ರಣವನ್ನು ಹರವಿ. 
  • ಬಾದಾಮಿ ಮಿಶ್ರಣ ಹರವಿದ ನಂತರ ಮೇಲಿನಿಂದ ಎರಡು ಪೇಸ್ಟ್ರಿ ಶೀಟ್ ಜೋಡಿಸಿ ಬೆಣ್ಣೆ ಸವರಿ. ಪೇಸ್ಟ್ರಿ ಶೀಟ್ ಖಾಲಿಯಾಗುವವರೆಗೂ ಹೀಗೆಯೇ ಎರಡು ಶೀಟ್ ಇಟ್ಟು ಮೇಲಿನಿಂದ ಬೆಣ್ಣೆ ಸವರುತ್ತ ಹೋಗಿ. 
  • ಎಲ್ಲ ಶೀಟ್ ಗಳನ್ನು ಜೋಡಿಸಿದ ನಂತರ ಬಾಕ್ಲವ ವನ್ನು ಒಂದೇ ಅಳತೆಯ ವಜ್ರಾಕೃತಿ ಅಥವಾ ನಿಮ್ಮಿಷ್ಟದ ಆಕಾರಕ್ಕೆ ಕತ್ತರಿಸಿ. ಬೇಕಿಂಗ್ ಟ್ರೇಯನ್ನು ಪ್ರಿ-ಹೀಟ್ ಮಾಡಿದ ಓವನ್ ನಲ್ಲಿಟ್ಟು 50 - 55 ನಿಮಿಷ ಅಥವಾ ಹೊಂಬಣ್ಣ ಬರುವವರೆಗೆ ಬೇಯಿಸಿ. 
  • ಬಾಕ್ಲವ ಬೇಯುತ್ತಿರುವಾಗ ಸಕ್ಕರೆಪಾಕ ತಯಾರಿಸಿಕೊಳ್ಳಿ. ಒಂದು ಪಾತ್ರೆಯಲ್ಲಿ ಸಕ್ಕರೆ, ನೀರು ಸೇರಿಸಿ ಬಿಸಿಗಿಡಿ. ಸಕ್ಕರೆ ಕರಗಿದನಂತರ ಇದಕ್ಕೆ ಲವಂಗ, ಜೇನುತುಪ್ಪ, ನಿಂಬೆ ಸಿಪ್ಪೆ ಸೇರಿಸಿ ಸಣ್ಣ ಉರಿಯಲ್ಲಿ 15 - 20 ನಿಮಿಷ ಕುದಿಸಿ ಉರಿ ಆಫ್ ಮಾಡಿ. ನಂತರ ಇದರಲ್ಲಿರುವ ಲವಂಗ ಮತ್ತು ನಿಂಬೆ ಸಿಪ್ಪೆಯನ್ನು ತೆಗೆದುಬಿಡಿ. 
  • ಬೆಂದ ಬಾಕ್ಲವ ಬಿಸಿ ಇರುವಾಗಲೇ ಅದರಮೇಲೆ ಮೊದಲೇ ತಯಾರಿಸಿಟ್ಟ ಸಕ್ಕರೆಪಾಕವನ್ನು ಸುರಿಯಿರಿ. ಸರ್ವ್ ಮಾಡುವ ಮೊದಲು ಇದನ್ನು 2 ಘಂಟೆಕಾಲ ಸೆಟ್ ಆಗಲು ಬಿಡಿ. 



ಟಿಪ್ಸ್: 
  • ನನ್ನ ಬಳಿ ವಾಲ್ನಟ್ ಇರದಿದ್ದರಿಂದ ಇಲ್ಲಿ ಬಾದಾಮಿ ಬಳಸಿದ್ದೇನೆ. ವಾಲ್ನಟ್ ಇದ್ದರೆ ಬಾಕ್ಲವ ತಯಾರಿಸಲು ಅದನ್ನೇ ಬಳಸಿ. 

Monday, 15 August 2016

ವೆಜ್ ಪಫ್ । ಬೇಕರಿ ಸ್ಟೈಲ್ ವೆಜಿಟೆಬಲ್ ಪಫ್ಸ್

ನಾವು ಚಿಕ್ಕವರಾಗಿದ್ದ ದಿನಗಳಲ್ಲಿ ಮನೆಯಲ್ಲಿ ಬೇಕರಿ ತಿಂಡಿಗಳನ್ನು ತರುತ್ತಿದ್ದುದೇ ಅಪರೂಪವಾಗಿತ್ತು. ನಮಗೆ ಗೊತ್ತಿದ್ದ ಬೇಕರಿ ತಿನಿಸು ಎಂದರೆ ಬ್ರೆಡ್ ಒಂದೇ. ಮನೆಯಲ್ಲಿ ಓವನ್ ಇಲ್ಲದ ಕಾರಣ ಬೇಕರಿ ಖಾದ್ಯಗಳನ್ನು ಮನೆಯಲ್ಲಿ ತಯಾರಿಸುವ ಸಾಧ್ಯತೆಯೇ ಇರಲಿಲ್ಲ. ಕಾಲೇಜು ಜೀವನ ಶುರುವಾದಮೇಲೆ ಗೊತ್ತಾಗಿದ್ದು, ಪಫ್ಸ್ ಎಂಬ ಒಂದು ರುಚಿಕರವಾದ ತಿಂಡಿ ಬೇಕರಿಗಳಲ್ಲಿ ಸಿಗುತ್ತದೆ ಎಂದು! ಸಾಯಂಕಾಲದ ಹೊತ್ತು ಬೇಕರಿಗೆ ಹೋಗಿ ಬಿಸಿಬಿಸಿ ಪಫ್ಸ್ ತಿನ್ನುವ ಗಮ್ಮತ್ತೇ ಬೇರೆ. 
ಈಗ ಸಾಮಾನ್ಯವಾಗಿ ಎಲ್ಲರ ಮನೆಗಳಲ್ಲೂ ಓವನ್ ಇದ್ದೇ ಇರುತ್ತದೆ. ಸುಪರ್ ಮಾರ್ಕೆಟ್ ಗೆ ಹೋಗಿ ಪಫ್ ಪೇಸ್ಟ್ರಿ ಶೀಟ್ ಗಳನ್ನು ತಂದು ಬೇಕೆಂದಾಗ ಆರಾಮಾಗಿ ಮನೆಯಲ್ಲೇ ಪಫ್ ಗಳನ್ನು ತಯಾರಿಸಿಕೊಳ್ಳಬಹುದು. ಸ್ಟಫಿಂಗ್ ಗೆ ಪಲ್ಯವೊಂದಿದ್ದರೆ ಸಾಕು, ಪಫ್ಸ್ ತಯಾರಿಸುವುದು ಬಹಳ ಸುಲಭ. ಸ್ಟಫಿಂಗ್ ಗೆ ಬೇರೆ ಬೇರೆ ಪಲ್ಯಗಳನ್ನು ಹಾಕಿ ಬಗೆಬಗೆಯ ಪಫ್ಸ್ ತಯಾರಿಸಬಹುದು. 
ವೆಜಿಟೆಬಲ್ ಪಫ್ಸ್ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ.


ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು
ಬೇಕಿಂಗ್ ಟೈಮ್: 25 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಈ ಅಳತೆಯಿಂದ 6 ವೆಜ್ ಪಫ್ಸ್ ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:

  • ಬದನೇಕಾಯಿ (ಚಿಕ್ಕದು) - 1
  • ಆಲೂಗಡ್ಡೆ / ಬಟಾಟೆ - 1 ಮೀಡಿಯಮ್ ಸೈಜಿನದು
  • ಕ್ಯಾಪ್ಸಿಕಂ - ಅರ್ಧ ಭಾಗ
  • ಬೀನ್ಸ್ - 4 ಅಥವಾ 5
  • ಹಸಿರು ಬಟಾಣಿ - 1/2 ಕಪ್ (* ಟಿಪ್ಸ್ ನೋಡಿ)
  • ಈರುಳ್ಳಿ - 1 ದೊಡ್ಡದು
  • ಉಪ್ಪು - ರುಚಿಗೆ ತಕ್ಕಷ್ಟು
  • ಆಮ್ ಚೂರ್ ಪೌಡರ್ - 1/2 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು
  • ಅಚ್ಚಮೆಣಸಿನ ಪುಡಿ - 1/2 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು
  • ಗರಮ್ ಮಸಾಲಾ ಪೌಡರ್ - 1/4 ಟೀ ಸ್ಪೂನ್
  • ಎಣ್ಣೆ - 3 ಟೇಬಲ್ ಸ್ಪೂನ್ (+ ಪಫ್ ಗೆ ಸವರಲು 2 ಟೇಬಲ್ ಸ್ಪೂನ್)
  • ಪಫ್ ಪೇಸ್ಟ್ರಿ ಶೀಟ್ - 1 1/2 (1 ಶೀಟ್ ನಿಂದ 4 ಪಫ್ಸ್ ತಯಾರಿಸಬಹುದು)


ತಯಾರಿಸುವ ವಿಧಾನ:

  • ಆಲೂಗಡ್ಡೆಯನ್ನು ಮಧ್ಯೆ ಕತ್ತರಿಸಿ ಎರಡು ಭಾಗಗಳನ್ನಾಗಿ ಮಾಡಿಕೊಳ್ಳಿ. ಇವಕ್ಕೆ ಮುಳುಗುವಷ್ಟು ನೀರು ಹಾಕಿ ಪ್ರೆಷರ್ ಕುಕ್ಕರ್ ನಲ್ಲಿ ಎರಡು ವಿಸಿಲ್ ಆಗುವವರೆಗೆ ಬೇಯಿಸಿ. ತಣ್ಣಗಾದ ನಂತರ ನೀರು ಬಸಿದು ಬಟಾಟೆಯ ಸಿಪ್ಪೆ ತೆಗೆದು ಮೀಡಿಯಂ ಅಳತೆಯ ಹೋಳುಗಳಾಗಿ ಹೆಚ್ಚಿಕೊಳ್ಳಿ.
  • ಬದನೇಕಾಯಿ, ಕ್ಯಾಪ್ಸಿಕಂ, ಬೀನ್ಸ್, ಈರುಳ್ಳಿ ಇಷ್ಟನ್ನೂ ಸಣ್ಣದಾಗಿ ಹೆಚ್ಚಿ, ಎಲ್ಲವನ್ನೂ ಪ್ರತ್ಯೇಕವಾಗಿ ಇಟ್ಟುಕೊಳ್ಳಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಬಿಸಿಮಾಡಿಕೊಳ್ಳಿ. ಇದಕ್ಕೆ ಸಣ್ಣಗೆ ಹೆಚ್ಚಿದ ಬದನೆ ಮತ್ತು ಬೀನ್ಸ್ ಸೇರಿಸಿ ಮುಚ್ಚಳ ಮುಚ್ಚಿ  ಸಣ್ಣ ಉರಿಯಲ್ಲಿ ಬೇಯಿಸಿ. ಬೇಯಿಸುವಾಗ ಬೇಕಿದ್ದರೆ ಸ್ವಲ್ಪವೇ ನೀರು ಸೇರಿಸಿ.
  • ಮಿಶ್ರಣ ಮುಕ್ಕಾಲುಭಾಗ ಬೆಂದಾಗ ಇದಕ್ಕೆ ಹಸಿರು ಬಟಾಣಿ, ಹೆಚ್ಚಿದ ಕ್ಯಾಪ್ಸಿಕಂ ಸೇರಿಸಿ ಕೈಯಾಡಿಸಿ.
  • ಒಂದು ನಿಮಿಷದ ನಂತರ ಇದಕ್ಕೆ ಹೆಚ್ಚಿದ ಈರುಳ್ಳಿ ಸೇರಿಸಿ 4 - 5 ನಿಮಿಷ ಬೇಯಿಸಿ.
  • ಪಲ್ಯದ ಮಿಶ್ರಣಕ್ಕೆ ಹೆಚ್ಚಿದ ಆಲೂಗಡ್ಡೆ ಸೇರಿಸಿ ಒಮ್ಮೆ ಕೈಯಾಡಿಸಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್, ಅಚ್ಚಮೆಣಸಿನಪುಡಿ, ಗರಂ ಮಸಾಲಾ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ ಉರಿಯನ್ನು ಆಫ್ ಮಾಡಿ.
  • ಓವನ್ ನ್ನು 200°C ಗೆ ಪ್ರಿ-ಹೀಟ್ ಮಾಡಿಕೊಳ್ಳಿ.
  • ಪೇಸ್ಟ್ರಿ ಶೀಟ್ ಗಳನ್ನು ಬಳಸಲು 15 - 20 ನಿಮಿಷ ಮೊದಲೇ ಫ್ರೀಜರ್ ನಿಂದ ಹೊರಗೆ ತೆಗೆದಿಟ್ಟಿರಿ.
  • ಒಂದು ಪೇಸ್ಟ್ರಿ ಶೀಟ್ ನ್ನು ತೆಗೆದುಕೊಂಡು ಒಂದೇ ಅಳತೆಯ ನಾಲ್ಕು ಚೌಕಗಳಾಗಿ ಕತ್ತರಿಸಿ. ಅದರಲ್ಲಿ ಒಂದು ಭಾಗವನ್ನು ತೆಗೆದುಕೊಂಡು ಒಂದು ಸಮತಟ್ಟಾದ ಜಾಗದಲ್ಲಿ ಇಟ್ಟುಕೊಳ್ಳಿ. ಇದರಮೇಲೆ 2 ಅಥವಾ 2 1/2 ಟೇಬಲ್ ಸ್ಪೂನ್ ನಷ್ಟು ಪಲ್ಯದ ಮಿಶ್ರಣವನ್ನು ಹಾಕಿ. ಶೀಟ್ ನ ಅಂಚುಗಳಿಗೆ ನೀರು ಸವರಿಕೊಂಡು ಪಲ್ಯ ಒಳಗೆ ಬರುವಂತೆ ಶೀಟ್ ನ್ನು ಮಡಿಚಿ ಅಂಚುಗಳನ್ನು ಪ್ರೆಸ್ ಮಾಡಿ ಕೂಡಿಸಿ.
  • ಕತ್ತರಿಸಿದ ಎಲ್ಲ ಶೀಟ್ ಗಳಲ್ಲೂ ಇದೇ ರೀತಿ ಪಲ್ಯ ಹಾಕಿ ಮಡಿಚಿ ಅಂಚುಗಳನ್ನು ಬಿಡದಂತೆ ಜೋಡಿಸಿ.
  • ಬೇಕಿಂಗ್ ಟ್ರೇ ಗೆ ಅಲ್ಯೂಮಿನಿಯಂ ಫಾಯಿಲ್ ಅಥವಾ ಬೇಕಿಂಗ್ ಶೀಟ್ ಹಾಕಿ ಅದರಮೇಲೆ ಪಲ್ಯ ತುಂಬಿದ ಎಲ್ಲ ಪೇಸ್ಟ್ರಿ ಶೀಟ್ ಗಳನ್ನೂ ಜೋಡಿಸಿಕೊಳ್ಳಿ. ಪಫ್ಸ್ ಬೇಯುವಾಗ ಹಿಗ್ಗುವುದರಿಂದ ಸ್ವಲ್ಪ ಅಂತರ ಇಟ್ಟು ಜೋಡಿಸಿ.
  • ಜೋಡಿಸಿಟ್ಟ ಪಫ್ಸ್ ಗಳಿಗೆ ಎಣ್ಣೆ ಅಥವಾ ಬೆಣ್ಣೆ ಸವರಿ, ಪ್ರಿ-ಹೀಟ್ ಮಾಡಿದ ಓವನ್ ನಲ್ಲಿ 25 ನಿಮಿಷ ಅಥವಾ ಹೊಂಬಣ್ಣಕ್ಕೆ ಬರುವವರೆಗೆ ಬೇಯಿಸಿ.
  • ಸಂಜೆಯ ಟೀ ಯೊಡನೆ ಬಿಸಿಬಿಸಿ ಪಫ್ಸ್ ತಿನ್ನಲು ಬಹಳ ಚೆನ್ನಾಗಿರುತ್ತದೆ.



ಟಿಪ್ಸ್:
  • ಒಣಗಿಸಿದ ಬಟಾಣಿ ಬಳಸುವುದಾದರೆ 4 - 5 ಘಂಟೆಕಾಲ ನೆನೆಸಿಟ್ಟು ಬಟಾಟೆ ಬೇಯಿಸುವಾಗ ಇದನ್ನೂ ಬೇಯಿಸಿಕೊಳ್ಳಿ. ನಾನು ಇಲ್ಲಿ ಫ್ರೆಶ್ ಆಗಿ ಸಿಗುವ ಹಸಿರು ಬಟಾಣಿ ಬಳಸಿರುವುದರಿಂದ ಬೇಯಿಸುವ ಅಗತ್ಯವಿಲ್ಲ.
  • ಸ್ಟಫಿಂಗ್ ಗೆ ನೀರಿನಂಶ ಕಡಿಮೆ ಇರುವ ನಿಮ್ಮಿಷ್ಟದ ಯಾವುದೇ ತರಕಾರಿಗಳನ್ನು ಬಳಸಬಹುದು. ಕ್ಯಾರೆಟ್, ಬೀಟ್ ರೂಟ್, ಸ್ವೀಟ್ ಕಾರ್ನ್, ಕ್ಯಾಬೇಜ್ ಇತ್ಯಾದಿ ತರಕಾರಿಗಳನ್ನು ಹಾಕಿದರೂ ಚೆನ್ನಾಗಿರುತ್ತದೆ. ಮನೆಯಲ್ಲಿ ಚಪಾತಿಗೆ ತಯಾರಿಸಿದ ಪಲ್ಯ ಮಿಕ್ಕಿದ್ದರೆ ಅದನ್ನೂ ಬಳಸಬಹುದು!

English version

Wednesday, 27 July 2016

ಕೆಸುವಿನ ದಂಟಿನ ದೋಸೆ । ಕೆಸುವಿನ ದಡಿ ದೋಸೆ | ಕೆಸುವಿನ ದೊಡ್ನ

ನಮ್ಮೂರ ಕಡೆ ಬೆಳಗ್ಗಿನ ತಿಂಡಿಗೆ ಥರಾವರಿ ದೋಸೆಗಳನ್ನು ತಯಾರಿಸುತ್ತಾರೆ. ಹಳ್ಳಿಗಳ ಕಡೆ ಸಿಗುವ ಅನೇಕ ಬಗೆಯ ಸೊಪ್ಪು-ತರಕಾರಿಗಳನ್ನು ದೋಸೆ ತಯಾರಿಸಲು ಬಳಸುತ್ತಾರೆ. ಮಳೆಗಾಲದಲ್ಲಿ ಎಲ್ಲೆಡೆ ಬೆಳೆಯುವ ಕೆಸುವಿನ ದಂಟು ಬಳಸಿ ರುಚಿಕರವಾದ ದೋಸೆ ತಯಾರಿಸಬಹುದು. ಊರಲ್ಲಿ ನಮ್ಮ ಮನೆಯಲ್ಲಿ ಪ್ರತಿ ವರ್ಷವೂ ಗಂಗಾಷ್ಟಮಿ ಹಬ್ಬಕ್ಕೆ ಕೆಸುವಿನ ದಂಟಿನ ದೋಸೆ ಮಾಡುತ್ತಾರೆ.
ಇಲ್ಲಿ ಆಸ್ಟ್ರೇಲಿಯಾದಲ್ಲಿ ನಮಗೆ ಫಾರ್ಮರ್ಸ್ ಮಾರ್ಕೆಟ್ ಗೆ ಹೋದಾಗ ಕೆಲವೊಮ್ಮೆ ಕೆಸುವಿನ ಗಿಡಗಳು ಸಿಗುತ್ತವೆ. ಅವನ್ನು ತಂದಾಗ ನಮ್ಮ ಮನೆಯಲ್ಲಿ ಕೆಸುವಿನ ದಂಟಿನ ದೋಸೆ ತಯಾರಾಗುತ್ತದೆ. ಸಿಹಿಯಾದ ದೋಸೆಯ ಜೊತೆ ಬೆಣ್ಣೆ ಹಾಕಿಕೊಂಡು ತಿಂದರೆ ಬಹಳ ರುಚಿ!


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು
ಅಕ್ಕಿ/ಹಿಟ್ಟು ನೆನೆಹಾಕುವ ಸಮಯ: 4 - 5 ಘಂಟೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಈ ಅಳತೆಯಿಂದ 10 - 11 ದೋಸೆಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:

  • ಅಕ್ಕಿ - 3 ಕಪ್ (1 ಕಪ್ = 110 ಗ್ರಾಮ್)
  • ಮೀಡಿಯಮ್ ಸೈಜಿಗೆ ಹೆಚ್ಚಿದ ಕೆಸುವಿನ ದಂಟು - 7 ಕಪ್ ಅಥವಾ ಸ್ವಲ್ಪ ಜಾಸ್ತಿ 
  • ಬೆಲ್ಲ - 1/2 ಕಪ್ ಅಥವಾ ರುಚಿಗೆ ತಕ್ಕಷ್ಟು 
  • ಉಪ್ಪು - ರುಚಿಗೆ ತಕ್ಕಷ್ಟು  

ತಯಾರಿಸುವ ವಿಧಾನ:

  • ಅಕ್ಕಿಯನ್ನು ತೊಳೆದು 2 - 3 ಘಂಟೆಕಾಲ ನೆನೆಸಿಡಿ. 
  • ಕೆಸುವಿನ ದಂಟನ್ನು ಮೀಡಿಯಮ್ ಸೈಜಿನ ಹೋಳುಗಳಾಗಿ ಹೆಚ್ಚಿಕೊಳ್ಳಿ. 
  • ಈ ಹೋಳುಗಳನ್ನು ಒಂದು ಪಾತ್ರೆಯಲ್ಲಿ ಹಾಕಿ ಉಪ್ಪು, ಬೆಲ್ಲ ಸೇರಿಸಿ ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ ಮೆತ್ತಗಾಗುವವರೆಗೆ ಬೇಯಿಸಿ. ಬೇಯಿಸಲು ನೀರು ಸೇರಿಸಬೇಡಿ, ಕೆಸುವಿನ ದಂಟಿನಲ್ಲಿರುವ ನೀರಿನಂಶವೇ ಹೋಳು ಬೇಯಲು ಸಾಕಾಗುತ್ತದೆ.  
  • ಬೇಯಿಸಿದ ಹೋಳಿನ ಮಿಶ್ರಣ ತಣ್ಣಗಾದ ನಂತರ ಇದಕ್ಕೆ ನೀರು ಬಸಿದ ಅಕ್ಕಿಯನ್ನು ಸೇರಿಸಿ ನುಣ್ಣಗೆ ರುಬ್ಬಿ. ರುಬ್ಬುವಾಗಲೂ ನೀರು ಸೇರಿಸಬೇಡಿ; ಕೆಸುವಿನ ಮಿಶ್ರಣ ನೀರಾಗಿರುವುದರಿಂದ ಅದರಲ್ಲೇ ಅಕ್ಕಿ ರುಬ್ಬಬಹುದು. 
  • ತಯಾರಾದ ಹಿಟ್ಟನ್ನು 1 - 2 ಘಂಟೆಕಾಲ ಹಾಗೇ ಸೆಟ್ ಆಗಲು ಬಿಡಿ. 
  • ನಂತರ ಬಿಸಿ ಕಾವಲಿಯಮೇಲೆ ಒಂದು ಸೌಟಿನಷ್ಟು ಹಿಟ್ಟನ್ನು ಹಾಕಿ ಸಣ್ಣ ವೃತ್ತಾಕಾರಕ್ಕೆ ಹರವಿ ಎರಡೂ ಕಡೆ ಬೇಯಿಸಿ. ದೋಸೆ ಕಾವಲಿಗೆ ಅಂಟದಂತೆ ಬೇಯಿಸುವಾಗ ನಾಲ್ಕೈದು ಹನಿ ಎಣ್ಣೆ ಹಾಕಿ.  
  • ಬಿಸಿಬಿಸಿ ದೋಸೆಯನ್ನು ಬೆಣ್ಣೆ ಹಾಕಿಕೊಂಡು ತಿನ್ನಿ!


English version

Monday, 4 July 2016

ಬೇಸನ್ ಲಾಡು । ಕಡ್ಲೆಹಿಟ್ಟಿನ ಲಾಡು

ಹಬ್ಬ ಹಾಗೂ ವಿಶೇಷ ಸಮಾರಂಭಗಳಲ್ಲಿ ಸಾಮಾನ್ಯವಾಗಿ ತಯಾರಿಸುವ ಸಿಹಿತಿಂಡಿಗಳ ಸಾಲಿನಲ್ಲಿ ಬೇಸನ್ ಲಾಡು ಕೂಡ ಒಂದು. ಬಾಯಲ್ಲಿಟ್ಟರೆ ಕರಗುವ ಈ ಲಾಡು ನಮ್ಮ ಮನೆಯಲ್ಲಿ ಎಲ್ಲರಿಗೂ ಇಷ್ಟ! ತುಪ್ಪ, ಸಕ್ಕರೆ, ಡ್ರೈ ಫ್ರೂಟ್ಸ್ ಎಲ್ಲವನ್ನೂ ಧಾರಾಳವಾಗಿ ಬಳಸಿ ತಯಾರಿಸುವ ಬೇಸನ್ ಲಾಡು ಆರೋಗ್ಯದ ದೃಷ್ಟಿಯಿಂದಲೂ ಒಳ್ಳೆಯದು. ಹಬ್ಬ - ಹರಿದಿನಗಳಲ್ಲಿ, ಮನೆಗೆ ಅತಿಥಿಗಳು ಬಂದಾಗ ತಯಾರಿಸಲು ಈ ಲಾಡು ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಈ ಅಳತೆಯಿಂದ 8 ಲಾಡುಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:

  • ಕಡ್ಲೆಹಿಟ್ಟು - 2 ಕಪ್ (1 ಕಪ್ = 125 ಗ್ರಾಮ್)
  • ಸಕ್ಕರೆ - 1 ಕಪ್ 
  • ತುಪ್ಪ - 3/4 ಕಪ್ ಗಿಂತ 1 ಟೇಬಲ್ ಸ್ಪೂನ್ ಕಮ್ಮಿ 
  • ಏಲಕ್ಕಿಪುಡಿ - 1 ಟೀ ಸ್ಪೂನ್ (ಟಿಪ್ಸ್ ನೋಡಿ)
  • ಒಣದ್ರಾಕ್ಷಿ - 15
  • ಗೋಡಂಬಿ ಚೂರು - 2 ಟೇಬಲ್ ಸ್ಪೂನ್ 


ತಯಾರಿಸುವ ವಿಧಾನ:

  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಕಡ್ಲೆಹಿಟ್ಟಿಗೆ ಮೇಲೆ ಹೇಳಿದಷ್ಟು ತುಪ್ಪ ಸೇರಿಸಿ ಸಣ್ಣ ಉರಿಯಲ್ಲಿ ಚೆನ್ನಾಗಿ ಪರಿಮಳ ಬರುವಂತೆ ಹುರಿಯಿರಿ. 
  • ಹಿಟ್ಟು ಅರ್ಧದಷ್ಟು ಹುರಿದನಂತರ ಇದಕ್ಕೆ ದ್ರಾಕ್ಷಿ, ಗೋಡಂಬಿ ಚೂರುಗಳನ್ನು ಸೇರಿಸಿ ಎಲ್ಲವನ್ನೂ ಒಟ್ಟಿಗೇ ಹುರಿಯಿರಿ. ಇಲ್ಲವೇ ಇವನ್ನು ಪ್ರತ್ಯೇಕವಾಗಿ ಹುರಿದು ಸೇರಿಸಿದರೂ ಆಯಿತು. 
  • ಸಕ್ಕರೆಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ. 
  • ಹುರಿದ ಹಿಟ್ಟನ್ನು ಸ್ವಲ್ಪ ಸಮಯ ತಣಿಯಲು ಬಿಡಿ. ಹಿಟ್ಟು ಉಗುರುಬೆಚ್ಚಗೆ ಇರುವಾಗ ಇದಕ್ಕೆ ಸಕ್ಕರೆಪುಡಿ, ಏಲಕ್ಕಿಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. 
  • ತಯಾರಾದ ಹಿಟ್ಟಿನಿಂದ ಒಂದೇ ಅಳತೆಯ ಉಂಡೆಗಳನ್ನು ಮಾಡಿ. 



ಟಿಪ್ಸ್:

  • ಹಿಟ್ಟಿಗೆ ತುಪ್ಪ ಜಾಸ್ತಿ ಹಾಕಿದರೆ ಮೆತ್ತಗಾಗಿಬಿಡುತ್ತದೆ. ಹೀಗಾದರೆ ಉಂಡೆಗಳನ್ನು ಕಟ್ಟಿದ ತಕ್ಷಣ 15 - 20 ನಿಮಿಷ ಫ್ರಿಜ್ ನಲ್ಲಿಟ್ಟು ತೆಗೆಯಿರಿ. ಹೀಗೆ ಮಾಡುವುದರಿಂದ ಉಂಡೆಗಳು ಗಟ್ಟಿಯಾಗುತ್ತವೆ. 
  • ಏಲಕ್ಕಿಪುಡಿ ಇಲ್ಲದಿದ್ದರೆ ಸಕ್ಕರೆಯೊಡನೆ ಏಲಕ್ಕಿಯನ್ನೂ ಸೇರಿಸಿ ಪುಡಿಮಾಡಿಕೊಳ್ಳಿ. 


English version

Friday, 10 June 2016

ಮಾವಿನಹಣ್ಣಿನ ನೀರ್ ಗೊಜ್ಜು

ಈಗ ಬೇಸಿಗೆ, ಮಾವಿನ ಸೀಜನ್! ಈ ವರ್ಷ ಮಾವಿನ ಫಸಲು ಚೆನ್ನಾಗಿರುವುದರಿಂದ ಎಲ್ಲರ ಮನೆಯಲ್ಲೂ ಬೇರೆಬೇರೆ ವೆರೈಟಿಯ ಮಾವಿನ ಹಣ್ಣುಗಳನ್ನು ಕಾಣಬಹುದು. ಊರಲ್ಲಿ ನಮ್ಮ ಮನೆಯಲ್ಲಂತೂ ದಿನವೂ ಊಟಕ್ಕೆ ಮಾವಿನಕಾಯಿ ಅಥವಾ ಮಾವಿನಹಣ್ಣಿನ ಒಂದು ಅಡುಗೆಯಾದರೂ ಇದ್ದೇ ಇರುತ್ತದೆ. 
ಹಳ್ಳಿಗಳ ಕಡೆ ಸಿಗುವ 'ಸಾಸಿವೆ ಮಾವಿನಹಣ್ಣು' ಸಿಹಿ - ಹುಳಿ ರುಚಿ ಹೊಂದಿದ್ದು ಅಡುಗೆಗೆ ಬಳಸಲು ಚೆನ್ನಾಗಿರುತ್ತದೆ.  ಸಾಸಿವೆ, ನೀರ್ ಗೊಜ್ಜು ಇತ್ಯಾದಿ ಅಡುಗೆಗಳಿಗೆ ಸಾಸಿವೆ ಮಾವಿನಹಣ್ಣು ಇದ್ದರೇನೇ ಚೆನ್ನ! ಮಾವಿನಹಣ್ಣಿನ ನೀರ್ಗೊಜ್ಜು ತಯಾರಿಸುವ ವಿಧಾನ ಈ ಕೆಳಗಿನಂತಿದೆ..


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಂ

ಬೇಕಾಗುವ ಸಾಮಗ್ರಿಗಳು:

  • ಸಾಸಿವೆ ಮಾವಿನಹಣ್ಣು (ಅಥವಾ ಸಣ್ಣ ಮಾವಿನಹಣ್ಣು) - 5 ಅಥವಾ 6
  • ಜೋನಿ ಬೆಲ್ಲ - 7 ಟೇಬಲ್ ಸ್ಪೂನ್ ಅಥವಾ ಸಿಹಿಯಾಗುವಷ್ಟು  
  • ಉಪ್ಪು - 1 1/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 
  • ನೀರು - 2 ಕಪ್ 

ಒಗ್ಗರಣೆಗೆ: ಎಣ್ಣೆ - 3 ಟೀ ಸ್ಪೂನ್, ಒಣಮೆಣಸು - 1, ಉದ್ದಿನಬೇಳೆ - 1 ಟೀ ಸ್ಪೂನ್, ಸಾಸಿವೆ - 1 1/4 ಟೀ ಸ್ಪೂನ್, ಇಂಗು - ಚಿಟಿಕೆ, ಹಸಿಮೆಣಸು - 1, ಕರಿಬೇವು - 4 ಎಲೆಗಳು

ತಯಾರಿಸುವ ವಿಧಾನ:

  • ಮಾವಿನಹಣ್ಣು ನೀರಿನಲ್ಲಿ ಸ್ವಚ್ಛವಾಗಿ ತೊಳೆದುಕೊಂಡು ಸಿಪ್ಪೆ ಬಿಡಿಸಿ ಒಂದು ಪಾತ್ರೆಯಲ್ಲಿ ಹಾಕಿಕೊಳ್ಳಿ. 
  • ಇದಕ್ಕೆ ಉಪ್ಪು, ಬೆಲ್ಲ ಸೇರಿಸಿ ಕೈಯಲ್ಲಿ ಚೆನ್ನಾಗಿ ಕಿವುಚಿ. ಮಿಶ್ರಣಕ್ಕೆ 2 ಕಪ್ ನಷ್ಟು ನೀರು ಸೇರಿಸಿಕೊಂಡು ಮಿಕ್ಸ್ ಮಾಡಿ 10 ನಿಮಿಷ ಹಾಗೆಯೇ ಇಡಿ. ನಂತರ ರುಚಿ ನೋಡಿಕೊಂಡು ಉಪ್ಪು, ಬೆಲ್ಲ ಏನಾದರೂ ಬೇಕಿದ್ದರೆ ಸೇರಿಸಿ. 
  • ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಕಾಯಿಸಿ ಒಣಮೆಣಸು, ಉದ್ದಿನಬೇಳೆ, ಸಾಸಿವೆ, ಇಂಗು ಸೇರಿಸಿ ಕೈಯಾಡಿಸಿ. ಸಾಸಿವೆ ಚಟಪಟ ಎಂದನಂತರ ಕರಿಬೇವು, ಸೀಳಿದ ಹಸಿಮೆಣಸು ಸೇರಿಸಿ ಒಂದು ನಿಮಿಷ ಕೈಯಾಡಿಸಿ ಒಲೆಯಿಂದ ಇಳಿಸಿ. ಒಗ್ಗರಣೆ ಮಿಶ್ರಣವನ್ನು ಕಿವುಚಿದ ಮಾವಿನಹಣ್ಣಿಗೆ ಸೇರಿಸಿ ಮಿಕ್ಸ್ ಮಾಡಿ. 
  • ಸಿಹಿ - ಹುಳಿಯಾದ ನೀರ್ಗೊಜ್ಜನ್ನು ಅನ್ನದೊಡನೆ ಸವಿಯಿರಿ!

English version

Friday, 20 May 2016

ನೆಲ್ಲಿಕಾಯಿ ಉಪ್ಪಿನಕಾಯಿ

ದಿನಕ್ಕೊಂದು ನೆಲ್ಲಿಕಾಯಿ ಸೇವಿಸುವುದು ಆರೋಗ್ಯಕ್ಕೆ ಒಳ್ಳೆಯದು ಎಂದು ಹೇಳುತ್ತಾರೆ. ಆರೋಗ್ಯಕ್ಕೆ ಹಿತಕರವಾದ ನೆಲ್ಲಿಕಾಯಿ ಉಪ್ಪಿನಕಾಯಿ, ಮುರಬ್ಬ, ಚ್ಯವನ್ ಪ್ರಾಶ್, ನೀರುನೆಲ್ಲಿಕಾಯಿ, ಜ್ಯೂಸ್, ನೆಲ್ಲಿಸಟ್ಟು, ಚಟ್ನಿ, ತಂಬ್ಳಿ ಇತ್ಯಾದಿಗಳ ತಯಾರಿಕೆಗೆ ಪ್ರಶಸ್ತವಾಗಿದೆ. ಆಯುರ್ವೇದದಲ್ಲಿಯೂ ನೆಲ್ಲಿಕಾಯಿಗೆ ಪ್ರಮುಖ ಸ್ಥಾನವಿದೆ. ಕೂದಲು ಮತ್ತು ಚರ್ಮದ ಉತ್ತಮ ಬೆಳವಣಿಗೆಗೆ ನೆಲ್ಲಿಕಾಯಿ ಸಹಕಾರಿ. ಅಜೀರ್ಣ ಇತ್ಯಾದಿ ಹೊಟ್ಟೆಯ ತೊಂದರೆಗಳಿಗೆ ನೆಲ್ಲಿಕಾಯಿಯ ಸೇವನೆ ಬಹಳ ಒಳ್ಳೆಯದು. 
ನಾವೆಲ್ಲ ಚಿಕ್ಕವರಿದ್ದಾಗ ಬೆಟ್ಟದ ನೆಲ್ಲಿಕಾಯನ್ನು ಕೊಯ್ದು ತಂದು ಉಪ್ಪು, ಮೆಣಸು ಜಜ್ಜಿಹಾಕಿದ ನೀರಿನಲ್ಲಿ ಅದನ್ನು ಮುಳುಗಿಸಿ ಇಡುತ್ತಿದ್ದೆವು. ಉಪ್ಪು, ಖಾರ ಕುಡಿದ ಆ ನೆಲ್ಲಿಕಾಯಿಗಳು ತಿನ್ನಲು ಅದೆಷ್ಟು ರುಚಿ! ಉಪ್ಪುನೀರಿನಲ್ಲಿ ಹಾಕಿದ ನೆಲ್ಲಿಕಾಯಿಗಳನ್ನು ತಿನ್ನದೆ ವರ್ಷಗಳೇ ಕಳೆದುಹೋಗಿವೆ. 
ನೆಲ್ಲಿಕಾಯಿ ಉಪ್ಪಿನಕಾಯಿ ತಯಾರಿಸುವ ವಿಧಾನವನ್ನು ಬ್ಲಾಗ್ ನಲ್ಲಿ ಬರೆಯಲು ನನ್ನ ಫ್ರೆಂಡ್ ಒಬ್ಬರು ಕೆಲದಿನಗಳ ಹಿಂದೆ ಹೇಳಿದ್ದರು. ಉಪ್ಪಿನಕಾಯಿ ತಯಾರಿಸಿ ಫೋಟೋ ಕ್ಲಿಕ್ಕಿಸಿದ್ದರೂ ಊರಿನ ಪ್ರವಾಸದ ಗಡಿಬಿಡಿಯಲ್ಲಿ ಬ್ಲಾಗ್ ಕಡೆ ಗಮನ ಕೊಡಲು ಸಾಧ್ಯವಾಗಲೇ ಇಲ್ಲ. ಕೊನೆಗೂ ಬಿಡುವು ಮಾಡಿಕೊಂಡು ರೆಸಿಪಿಯನ್ನು ಹಾಕುತ್ತಿದ್ದೇನೆ..ಇನ್ನೂ ಕೆಲವು ರೆಸಿಪಿ ಫೋಟೋಗಳು ಬರವಣಿಗೆಗಾಗಿ ಕಾದು ಕುಳಿತಿವೆ. ಆದಷ್ಟು ಬೇಗ ಅವನ್ನೆಲ್ಲ ನಿಮ್ಮೊಡನೆ ಹಂಚಿಕೊಳ್ಳುವ ಇರಾದೆ ನನ್ನದು. ಯಾವುದಕ್ಕೂ ಕಾದುನೋಡಿ!


ತಯಾರಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಈ ಅಳತೆಯಿಂದ 400ರಿಂದ 450 ಗ್ರಾಂ ನಷ್ಟು ಉಪ್ಪಿನಕಾಯಿ ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:

  • ನೆಲ್ಲಿಕಾಯಿ - 340 ಗ್ರಾಂ (14 - 15 ದೊಡ್ಡ ಸೈಜಿನ ನೆಲ್ಲಿಕಾಯಿಗಳು)
  • ನೀರು - 2 ಕಪ್ (1 ಕಪ್ = 180 ml)
  • ಉಪ್ಪು - 10 ಟೇಬಲ್ ಸ್ಪೂನ್ (ಅಂದಾಜು)
  • ಇಂಗು - 1/2 ಟೀ ಸ್ಪೂನ್ 
  • ಜೀರಿಗೆ - 1 1/2 ಟೀ ಸ್ಪೂನ್ 
  • ಅರಿಶಿನ - 1/2 ಟೀ ಸ್ಪೂನ್ 
  • ಸಾಸಿವೆ - 3 1/2 ಟೀ ಸ್ಪೂನ್ 
  • ಅಚ್ಚಮೆಣಸಿನ ಪುಡಿ - 6 ಟೇಬಲ್ ಸ್ಪೂನ್ (ಖಾರಕ್ಕೆ ತಕ್ಕಂತೆ)
  • ನಿಂಬೆಹಣ್ಣು - 1 ದೊಡ್ಡದು 

ಒಗ್ಗರಣೆಗೆ: ಎಣ್ಣೆ - 5 ಟೇಬಲ್ ಸ್ಪೂನ್, ಸಾಸಿವೆ - 1 ಟೀ ಸ್ಪೂನ್, ಇಂಗು - ದೊಡ್ಡ ಚಿಟಿಕೆ

ತಯಾರಿಸುವ ವಿಧಾನ:

  • ಎರಡು ಕಪ್ ನಷ್ಟು ನೀರಿಗೆ 4 ಟೇಬಲ್ ಸ್ಪೂನ್ ನಷ್ಟು ಉಪ್ಪು ಸೇರಿಸಿ ಬಿಸಿಗಿಡಿ. ಇದು 4 - 5 ನಿಮಿಷ ಚೆನ್ನಾಗಿ ಕುದಿದ ನಂತರ ನೆಲ್ಲಿಕಾಯಿಗಳನ್ನು ಕುದಿಯುತ್ತಿರುವ ನೀರಿಗೆ ಸೇರಿಸಿ. ಇದನ್ನು 4ರಿಂದ 5 ನಿಮಿಷ ಅಥವಾ ನೆಲ್ಲಿಕಾಯಿ ಬೇಯುವವರೆಗೆ ಕುದಿಸಿ ಉರಿ ಆಫ್ ಮಾಡಿ. ಪಾತ್ರೆಗೆ ಮುಚ್ಚಳ ಮುಚ್ಚಿ ತಣ್ಣಗಾಗಲು ಬಿಡಿ. 
  • ಜೀರಿಗೆ, ಸಾಸಿವೆ ಹಾಗೂ ಇಂಗು ಇಷ್ಟನ್ನೂ ಎಣ್ಣೆ ಹಾಕದೆ, ಪರಿಮಳ ಬರುವಂತೆ ಹುರಿದುಕೊಳ್ಳಿ. ಕೊನೆಯಲ್ಲಿ ಅರಿಶಿನ ಸೇರಿಸಿ ಉರಿಯನ್ನು ಆಫ್ ಮಾಡಿ. ತಣ್ಣಗಾದ ನಂತರ ಇದಕ್ಕೆ 2 ಟೀ ಸ್ಪೂನ್ ನಷ್ಟು ಉಪ್ಪು ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿ. 
  • ನೆಲ್ಲಿಕಾಯಿ ತಣ್ಣಗಾದ ನಂತರ ನೀರಿನಿಂದ ತೆಗೆದು ಚಾಕುವಿನಿಂದ ಕತ್ತರಿಸಿ ಬೀಜವನ್ನು ಬೇರ್ಪಡಿಸಿ. 
  • ಚೂರುಮಾಡಿದ ನೆಲ್ಲಿಕಾಯಿಗೆ ಮೇಲೆ ಮೊದಲೇ ತಯಾರಿಸಿಟ್ಟ ಮಸಾಲೆಪುಡಿ, ಅಚ್ಚಮೆಣಸಿನಪುಡಿ ಸೇರಿಸಿ. ಜೊತೆಗೆ 7 ಟೇಬಲ್ ಸ್ಪೂನ್ ನಷ್ಟು ಉಪ್ಪುನೀರು (ನೆಲ್ಲಿಕಾಯಿ ಬೇಯಿಸಿದ ನೀರು), ನಿಂಬೆರಸ  ಸೇರಿಸಿ ಮಿಕ್ಸ್ ಮಾಡಿ. ರುಚಿ ನೋಡಿಕೊಂಡು ಉಪ್ಪು, ಖಾರ ಬೇಕಿದ್ದರೆ ಸೇರಿಸಿ. 
  • ಎಣ್ಣೆ ಕಾಯಿಸಿ ಸಾಸಿವೆ, ಇಂಗಿನ ಒಗ್ಗರಣೆ ಮಾಡಿ. ತಣ್ಣಗಾದ ನಂತರ ಉಪ್ಪಿನಕಾಯಿಗೆ ಸೇರಿಸಿ ಮಿಕ್ಸ್ ಮಾಡಿ. 
  • ಮೊಸರನ್ನದೊಡನೆ ನೆಲ್ಲಿಕಾಯಿ ಉಪ್ಪಿನಕಾಯಿ ಒಳ್ಳೆಯ ಕಾಂಬಿನೇಶನ್!


ಟಿಪ್ಸ್:

  • ಫ್ರೆಶ್ ನೆಲ್ಲಿಕಾಯಿ ಸಿಗದಿದ್ದರೆ ಫ್ರೋಜನ್ ನೆಲ್ಲಿಕಾಯಿ ಬಳಸಿದರೂ ಆಗುತ್ತದೆ. ನಾನು ಇಲ್ಲಿ ಫ್ರೋಜನ್ ನೆಲ್ಲಿಕಾಯಿಗಳನ್ನು ಬಳಸಿದ್ದೇನೆ. 

English version

Thursday, 25 February 2016

ಸ್ಟ್ರಾಬೆರಿ ಮಿಲ್ಕ್ ಶೇಕ್

ಬೇಸಿಗೆಯ ಧಗೆಗೆ ಎಷ್ಟು ಪಾನೀಯಗಳನ್ನು ಕುಡಿದರೂ ದಾಹ ಇಂಗುವುದೇ ಇಲ್ಲ. ನಮ್ಮ ಮನೆಯಲ್ಲಂತೂ ಬೇಸಿಗೆಯಲ್ಲಿ ಟೀ, ಕಾಫಿ ತಯಾರಿಸುವುದೇ ಅಪರೂಪವಾಗಿಬಿಟ್ಟಿದೆ. ಬೇಕು ಎಂದೆನಿಸಿದಾಗಲೆಲ್ಲ ಮನೆಯಲ್ಲಿರುವ ಹಣ್ಣುಗಳನ್ನು ಬಳಸಿ ಜ್ಯೂಸ್, ಮಿಲ್ಕ್ ಶೇಕ್, ಸ್ಮೂದಿ ಇತ್ಯಾದಿ ಪಾನೀಯಗಳನ್ನು ತಯಾರಿಸಿ ಕುಡಿಯುತ್ತೇವೆ. ಟೀ, ಕಾಫಿಗಳಿಗಿಂತ ಇವು ಆರೋಗ್ಯಕ್ಕೂ ಒಳ್ಳೆಯದು..ಅಲ್ಲವೆ?
ನನ್ನ ಮಗಳಿಗೆ ಸ್ಟ್ರಾಬೆರಿ ಹಣ್ಣೆಂದರೆ ಬಹಳ ಇಷ್ಟ. ಫ್ರೆಶ್ ಹಣ್ಣು ಸಿಗದಿದ್ದರೆ ಫ್ರೋಜನ್ ಹಣ್ಣಾದರೂ ಸರಿಯೇ..ಹೀಗಾಗಿ ಸ್ಟ್ರಾಬೆರಿ ಹಣ್ಣುಗಳನ್ನು ಜಾಸ್ತಿ ತಂದಾಗ ಅದರ ತೊಟ್ಟು ತೆಗೆದು ಕ್ಲೀನ್ ಮಾಡಿ ಫ್ರೀಜರ್ ನಲ್ಲಿ ಇಟ್ಟಿರುತ್ತೇನೆ. ಯಾವಾಗಲಾದರೊಮ್ಮೆ ಮಿಲ್ಕ್ ಶೇಕ್ ತಯಾರಿಸುವುದಕ್ಕೂ ಈ ಹಣ್ಣುಗಳು ಉಪಯೋಗವಾಗುತ್ತವೆ. 


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಸುಲಭ 

ಬೇಕಾಗುವ ಸಾಮಗ್ರಿಗಳು:
ಸ್ಟ್ರಾಬೆರಿ ಹಣ್ಣುಗಳು (ಫ್ರೆಶ್ / ಫ್ರೋಜನ್) - 250 ಗ್ರಾಂ 
ತಣ್ಣನೆಯ ಹಾಲು: 300 ml 
ಸಕ್ಕರೆ - 2 ರಿಂದ 3 ಟೇಬಲ್ ಸ್ಪೂನ್ (ರುಚಿಗೆ ತಕ್ಕಷ್ಟು)
ಐಸ್ ಕ್ರೀಮ್ - 2 ಟೇಬಲ್ ಸ್ಪೂನ್ 

ತಯಾರಿಸುವ ವಿಧಾನ:
ಸ್ಟ್ರಾಬೆರಿ ಹಣ್ಣುಗಳನ್ನು ತೊಳೆದುಕೊಂಡು ಮೀಡಿಯಮ್ ಸೈಜಿನ ಹೋಳುಗಳಾಗಿ ಹೆಚ್ಚಿಕೊಳ್ಳಿ. 
ಹೆಚ್ಚಿದ ಸ್ಟ್ರಾಬೆರಿ ಹೋಳುಗಳನ್ನು ಸಕ್ಕರೆಯೊಡನೆ ಮಿಕ್ಸಿಯಲ್ಲಿ ನುಣ್ಣಗಿನ ಪೇಸ್ಟ್ ಆಗುವವರೆಗೆ ತಿರುವಿ. ಬೇಕಿದ್ದರೆ ಸ್ವಲ್ಪ ಹಾಲು ಸೇರಿಸಿ. 
ಮಿಶ್ರಣ ನುಣ್ಣಗಾದ ನಂತರ ಇದಕ್ಕೆ ಉಳಿದ ಹಾಲನ್ನು ಸೇರಿಸಿ ಎಲ್ಲವೂ ಚೆನ್ನಾಗಿ ಮಿಕ್ಸ್ ಆಗುವವರೆಗೆ ತಿರುವಿ. 
ಕೊನೆಯಲ್ಲಿ ಇದಕ್ಕೆ ಐಸ್ ಕ್ರೀಮ್ ಸೇರಿಸಿ ಅರ್ಧ ನಿಮಿಷ ತಿರುವಿ. 
ತಯಾರಾದ ಮಿಲ್ಕ್ ಶೇಕ್ ನ್ನು ಗ್ಲಾಸುಗಳಲ್ಲಿ ಹಾಕಿ ಸರ್ವ್ ಮಾಡಿ. 
  

ಟಿಪ್ಸ್:
ಹಾಲನ್ನು ಕಡಿಮೆ ಬಳಸುವುದಾದರೆ 200 ml ಹಾಲು ಹಾಗೂ 100 ml ನೀರು ಬಳಸಿ.


Saturday, 30 January 2016

ಗಡ್ ಬಡ್ ಐಸ್ ಕ್ರೀಮ್

ಗಡ್ ಬಡ್ ಐಸ್ ಕ್ರೀಮ್ - ಇದು ಕರ್ನಾಟಕದ ಸ್ಪೆಶಲ್ ಡೆಸರ್ಟ್ ತಿಂಡಿಗಳಲ್ಲಿ ಒಂದು. ಮಂಗಳೂರು ಮೂಲದ ಐಸ್ ಕ್ರೀಮ್ ಪಾರ್ಲರ್ ನ ಈ ಸೂಪರ್ ಹಿಟ್ ಡೆಸರ್ಟ್ ಸಾಮಾನ್ಯವಾಗಿ ಎಲ್ಲರಿಗೂ ಇಷ್ಟವಾಗುತ್ತದೆ. ನಮ್ಮೂರು ಶಿರಸಿಯಲ್ಲೂ ಐಸ್ ಕ್ರೀಮ್ ಪಾರ್ಲರ್ ಗಳಲ್ಲಿ ಸಿಗುವ ಗಡ್ ಬಡ್ ಐಸ್ ಕ್ರೀಮ್ ತುಂಬಾ ಚೆನ್ನಾಗಿರುತ್ತದೆ. ನಾವು ಊರಿಗೆ ಹೋದಾಗಲೆಲ್ಲ ಒಂದೆರಡು ಬಾರಿಯಾದರೂ ಈ ಐಸ್ ಕ್ರೀಮ್ ಸವಿಯಲೆಂದೇ ಐಸ್ ಕ್ರೀಮ್ ಪಾರ್ಲರ್ ಗೆ ಭೇಟಿ ಕೊಡುತ್ತೇವೆ.
ವಿವಿಧ ಹಣ್ಣುಗಳು, ಐಸ್ ಕ್ರೀಮ್, ಜೆಲ್ಲಿ, ಡ್ರೈ ಫ್ರೂಟ್ಸ್ ಗಳನ್ನು ಬಳಸಿ ತಯಾರಿಸುವ ಗಡ್ ಬಡ್ ಐಸ್ ಕ್ರೀಮ್ ನ್ನು ಸುಲಭದಲ್ಲಿ ಮನೆಯಲ್ಲೇ ತಯಾರಿಸಬಹುದು. ನಾನು ಸೆಖೆಗಾಲದಲ್ಲಿ ಮನೆಯಲ್ಲಿ ಮಾವಿನಹಣ್ಣು ಇದ್ದಾಗಲೆಲ್ಲ ಈ ಐಸ್ ಕ್ರೀಮ್ ತಯಾರಿಸುತ್ತಿರುತ್ತೇನೆ.


ತಯಾರಿಸಲು ಬೇಕಾಗುವ ಸಮಯ: 30 - 35ನಿಮಿಷಗಳು 
ಫ್ರಿಜ್ ನಲ್ಲಿಡಬೇಕಾದ ಸಮಯ: 1 ಘಂಟೆ 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
  • ಮಾವಿನಹಣ್ಣು - 1 
  • ಸೇಬುಹಣ್ಣು - ಅರ್ಧಭಾಗ 
  • ಬಾಳೆಹಣ್ಣು - 1
  • ಸಕ್ಕರೆ - 2 ಟೇಬಲ್ ಸ್ಪೂನ್ 
  • ಒಣದ್ರಾಕ್ಷಿ - 3 ಟೇಬಲ್ ಸ್ಪೂನ್
  • ಗೋಡಂಬಿ ಚೂರುಗಳು - 4 ರಿಂದ 5 ಟೇಬಲ್ ಸ್ಪೂನ್
  • ಚೆರ್ರಿ ಹಣ್ಣು (ಬೇಕಿದ್ದರೆ) - 2
  • ಟೂಟಿ ಫ್ರೂಟಿ (ಬೇಕಿದ್ದರೆ) - 2 ರಿಂದ 3 ಟೇಬಲ್ ಸ್ಪೂನ್ 
  • ಐಸ್ ಕ್ರೀಮ್ - ಬೇಕಾದಷ್ಟು

ತಯಾರಿಸುವ ವಿಧಾನ:
  • ಮಾವು, ಸೇಬು ಹಾಗೂ ಬಾಳೆಹಣ್ಣುಗಳನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಹೆಚ್ಚಿರುವ ಹಣ್ಣುಗಳನ್ನು ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಇದಕ್ಕೆ 2 ಟೇಬಲ್ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು ಸಕ್ಕರೆ ಸೇರಿಸಿ. ಚೆನ್ನಾಗಿ ಮಿಕ್ಸ್ ಮಾಡಿ ಇದನ್ನು ತಣ್ಣಗಾಗಲು 1 ಘಂಟೆಕಾಲ ಫ್ರಿಜ್ ನಲ್ಲಿಡಿ.
  • ಗೋಡಂಬಿ ಚೂರುಗಳನ್ನು ಎಣ್ಣೆ ಹಾಕದೆ ಹೊಂಬಣ್ಣಕ್ಕೆ ಹುರಿಯಿರಿ. 
  • ಎರಡು ಗ್ಲಾಸ್ ಕಪ್ ಗಳನ್ನು ತೆಗೆದುಕೊಂಡು ಪ್ರತಿ ಗ್ಲಾಸ್ ನಲ್ಲೂ ಒಂದು ಲೇಯರ್ ಹೆಚ್ಚಿದ ಹಣ್ಣಿನ ಮಿಶ್ರಣವನ್ನು ಹಾಕಿ. ಇದರಮೇಲೆ ಸ್ವಲ್ಪ ದ್ರಾಕ್ಷಿ, ಗೋಡಂಬಿ ಉದುರಿಸಿ ಎರಡು ಟೇಬಲ್ ಸ್ಪೂನ್ ನಷ್ಟು ಐಸ್ ಕ್ರೀಮ್ ಹಾಕಿ. ಪುನಃ ಇದರಮೇಲೆ ಹಣ್ಣಿನ ಮಿಶ್ರಣ ಹಾಕಿ ದ್ರಾಕ್ಷಿ, ಗೋಡಂಬಿ ಉದುರಿಸಿ ಇನ್ನೊಂದು ಲೇಯರ್ ಐಸ್ ಕ್ರೀಮ್ ಹಾಕಿ. ಈ ರೀತಿ ಎರಡು ಅಥವಾ ಮೂರು ಬಾರಿ ಮಾಡಿ.
  • ಕೊನೆಯಲ್ಲಿ ಐಸ್ ಕ್ರೀಮ್ ನ ಮೇಲೆ ಗೋಡಂಬಿ, ದ್ರಾಕ್ಷಿ , ಟೂಟಿ ಫ್ರೂಟಿ ಉದುರಿಸಿ ಚೆರ್ರಿ ಹಣ್ಣಿನಿಂದ ಅಲಂಕರಿಸಿ.


ಟಿಪ್ಸ್:
  • ಗಡ್ ಬಡ್ ಐಸ್ ಕ್ರೀಮ್ ಗೆ ಕಿತ್ತಳೆ, ಪೈನಾಪಲ್ ಅಥವಾ ಸಪೋಟ ಹಣ್ಣುಗಳನ್ನು ಹಾಕಿದರೂ ಚೆನ್ನಾಗಿರುತ್ತದೆ. ಈ ರೆಸಿಪಿಯಲ್ಲಿ ಹೇಳಿರುವ ಹಣ್ಣುಗಳನ್ನೇ ಬಳಸಬೇಕೆಂದೇನೂ ಇಲ್ಲ; ನಿಮ್ಮಿಷ್ಟದ ಯಾವುದೇ ಹಣ್ಣುಗಳನ್ನು ಬಳಸಬಹುದು.
  • ಪ್ರತಿ ಲೇಯರ್ ಗೂ ಬೇರೆಬೇರೆ ಫ್ಲೇವರ್ ನ ಐಸ್ ಕ್ರೀಮ್ ಬಳಸಿದರೆ ಇನ್ನೂ ಚೆನ್ನಾಗಿರುತ್ತದೆ.

English version

Saturday, 23 January 2016

ಹರಿವೆ ಸೊಪ್ಪಿನ ಪಲ್ಯ

ಸೊಪ್ಪಿನಿಂದ ತಯಾರಿಸುವ ಅಡುಗೆಗಳು ಆರೋಗ್ಯಕ್ಕೆ ಎಷ್ಟು ಒಳ್ಳೆಯದೋ ತಿನ್ನಲೂ ಅಷ್ಟೇ ರುಚಿಕರ. ಹರಿವೆ ಸೊಪ್ಪಂತೂ ನಮಗಿಬ್ಬರಿಗೂ ಬಹಳ ಪ್ರಿಯ. ನಮಗಿಲ್ಲಿ ತರಕಾರಿ ತರಲು ಹೋದಾಗ ಆಗಾಗ್ಗೆ ಹರಿವೆಸೊಪ್ಪು ಸಿಗುತ್ತದೆ. ಕ್ಯಾಲ್ಸಿಯಂ, ಕಬ್ಬಿಣ ಹಾಗೂ ವಿವಿಧ ವಿಟಮಿನ್ ಗಳ ಆಗರವಾದ ಈ ಸೊಪ್ಪು ಪಲ್ಯ, ಸಾಂಬಾರ್, ಹಶಿ, ಸಾಸಿವೆ ಇತ್ಯಾದಿ ಅಡುಗೆಗಳನ್ನು ತಯಾರಿಸಲು ಚೆನ್ನಾಗಿರುತ್ತದೆ.
ಹರಿವೆ ಸೊಪ್ಪಿನ ಪಲ್ಯ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
  • ಹರಿವೆ ಸೊಪ್ಪು - 1 ಕಟ್ಟು 
  • ಒಣಮೆಣಸು - 2 ರಿಂದ 3 (ಖಾರಕ್ಕೆ ತಕ್ಕಂತೆ)
  • ಉದ್ದಿನಬೇಳೆ - 1 ಟೀ ಸ್ಪೂನ್ 
  • ಸಾಸಿವೆ - 1 ಟೀ ಸ್ಪೂನ್ 
  • ಇಂಗು - ಚಿಟಿಕೆ 
  • ಅರಿಶಿನ - 1/8 ಟೀ ಸ್ಪೂನ್ 
  • ಎಣ್ಣೆ - 3 ಟೇಬಲ್ ಸ್ಪೂನ್
  • ತೆಂಗಿನತುರಿ - 1/2 ಕಪ್
  • ಉಪ್ಪು - ರುಚಿಗೆ ತಕ್ಕಷ್ಟು
  • ಆಮ್ ಚೂರ್ ಪೌಡರ್ - ರುಚಿಗೆ ತಕ್ಕಷ್ಟು
  • ಬೆಲ್ಲ / ಸಕ್ಕರೆ - 1/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು (ಟಿಪ್ಸ್ ನೋಡಿ)
  • ಈರುಳ್ಳಿ (ಬೇಕಿದ್ದರೆ) - 1 

ತಯಾರಿಸುವ ವಿಧಾನ:
  • ಹರಿವೆ ಸೊಪ್ಪನ್ನು ನೀರಿನಲ್ಲಿ ಸ್ವಚ್ಚವಾಗಿ ತೊಳೆಯಿರಿ. ಹರಿವೆಯ ದಂಟು ಬೆಳೆದಿದ್ದರೆ ಅದನ್ನು ಕತ್ತರಿಸಿ ತೆಗೆದುಬಿಡಿ. ದಂಟು ಎಳಸಾಗಿದ್ದರೆ ಅದನ್ನೂ ಹರಿವೆ ಎಲೆಗಳೊಡನೆ ಸಣ್ಣದಾಗಿ ಹೆಚ್ಚಿಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಬಿಸಿಮಾಡಿ ಒಣಮೆಣಸು, ಉದ್ದಿನಬೇಳೆ ಹಾಕಿ ಒಂದು ನಿಮಿಷ ಹುರಿಯಿರಿ. ಉದ್ದಿನಬೇಳೆ ನಸು ಹೊಂಬಣ್ಣಕ್ಕೆ ತಿರುಗಿದಾಗ ಇದಕ್ಕೆ ಸಾಸಿವೆ, ಇಂಗು ಸೇರಿಸಿ. ಸಾಸಿವೆ ಸಿಡಿಯ ತೊಡಗಿದಾಗ ಇದಕ್ಕೆ ಅರಿಶಿನ ಸೇರಿಸಿ ಒಮ್ಮೆ ಕೈಯಾಡಿಸಿ, ಮೊದಲೇ ಹೆಚ್ಚಿಟ್ಟ ಹರಿವೆಸೊಪ್ಪು ಸೇರಿಸಿ. ಒಗ್ಗರಣೆಗೆ ಹಾಕಿದ ಒಣಮೆಣಸನ್ನು ಕೈಯಲ್ಲಿ ಅಥವಾ ಸೌಟಿನ ಸಹಾಯದಿಂದ ಪುಡಿಮಾಡಿ ಪುನಃ ಪಲ್ಯದ ಮಿಶ್ರಣಕ್ಕೆ ಸೇರಿಸಿ.
  • ಪಲ್ಯದ ಮಿಶ್ರಣವನ್ನು ಚೆನ್ನಾಗಿ ಮಿಕ್ಸ್ ಮಾಡಿ ಮೀಡಿಯಮ್ ಉರಿಯಲ್ಲಿ ಮುಚ್ಚಳ ಮುಚ್ಚಿ ಬೇಯಿಸಿ. ನೀರು ಸೇರಿಸಬೇಡಿ. ಸೊಪ್ಪಿನಲ್ಲಿರುವ ನೀರಿನಂಶವೇ ಪಲ್ಯ ಬೇಯಲು ಸಾಕಾಗುತ್ತದೆ.
  • ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತಿರಿ. ಸೊಪ್ಪು ಮುಕ್ಕಾಲು ಭಾಗ ಬೆಂದ ನಂತರ ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್, ಬೆಲ್ಲ / ಸಕ್ಕರೆ ಸೇರಿಸಿ ಕೈಯಾಡಿಸಿ.
  • 2 - 3 ನಿಮಿಷ ಬೇಯಿಸಿದ ನಂತರ ಇದಕ್ಕೆ ತೆಂಗಿನತುರಿ ಸೇರಿಸಿ. ಈರುಳ್ಳಿ ಹಾಕುವುದಾದರೆ ಸಣ್ಣಗೆ ಹೆಚ್ಚಿದ ಈರುಳ್ಳಿಯನ್ನೂ ಸೇರಿಸಿ ಕೈಯಾಡಿಸಿ 5 ನಿಮಿಷ ಬೇಯಿಸಿ ಉರಿ ಆಫ್ ಮಾಡಿ. ನಾನು ಈ ಪಲ್ಯಕ್ಕೆ ಈರುಳ್ಳಿ ಸೇರಿಸಿದ್ದೇನೆ.
  • ಈ ಪಲ್ಯ ಅನ್ನ, ಚಪಾತಿ, ಪೂರಿಯೊಡನೆ ಚೆನ್ನಾಗಿರುತ್ತದೆ. 


ಟಿಪ್ಸ್:
  • ಈ ಪಲ್ಯವನ್ನು ಸಿಹಿ ಮಾಡುವುದಾದರೆ ಜಾಸ್ತಿ (ಸಿಹಿಯಾಗುವಷ್ಟು) ಬೆಲ್ಲ / ಸಕ್ಕರೆ ಸೇರಿಸಿ. ಸಿಹಿ ಬೇಡವೆಂದರೆ ರುಚಿಗಾಗಿ 1/4 ಟೀ ಸ್ಪೂನ್ ನಷ್ಟು ಬೆಲ್ಲ / ಸಕ್ಕರೆ ಸೇರಿಸಿ. ಸಿಹಿ ಪಲ್ಯ ಮಾಡಿದರೆ ಈರುಳ್ಳಿ ಸೇರಿಸಬೇಡಿ.

English version

Thursday, 14 January 2016

ಸಂಕ್ರಾಂತಿ ಕಾಳು । ಕುಸುರಿ ಕಾಳು


ಹಿಂದೂಗಳು ಆಚರಿಸುವ ಪ್ರಮುಖ ಹಬ್ಬಗಳಲ್ಲಿ ಮಕರ ಸಂಕ್ರಾಂತಿಯೂ ಒಂದು. ಜನವರಿ ತಿಂಗಳೆಂದರೆ ರೈತರು ಹೊಲ - ತೋಟಗಳಲ್ಲಿ ಬೆಳೆದ ದವಸಧಾನ್ಯ ಹಾಗೂ ಇತರ ಬೆಳೆಗಳು ಕೊಯ್ಲಿಗೆ ಬರುವ ಸಮಯ. ಬೆಳೆ ಕೊಯ್ಲನ್ನು ಮುಗಿಸಿದ ಖುಷಿಯಲ್ಲಿ ಆಚರಿಸುವ ಹಬ್ಬ ಇದು! ಭಾರತದ ವಿವಿಧೆಡೆ ಈ ಹಬ್ಬವನ್ನು ಪೊಂಗಲ್, ಭೋಗಿ ಪಲ್ಲು ಇತ್ಯಾದಿ ಹೆಸರುಗಳಿಂದ ಆಚರಿಸುತ್ತಾರೆ.
ನಮ್ಮೂರ ಕಡೆ ಸಂಕ್ರಾಂತಿ ಹಬ್ಬಕ್ಕೆ 'ಸಂಕ್ರಾಂತಿ ಕಾಳು' ಎಂಬ ವಿಶಿಷ್ಟ ತಿಂಡಿಯನ್ನು ತಯಾರಿಸುತ್ತಾರೆ. ಎಳ್ಳನ್ನು ಸಕ್ಕರೆಪಾಕದಲ್ಲಿ ಅದ್ದಿ ತಯಾರಿಸುವ ಈ ಕಾಳುಗಳು ಮಕ್ಕಳಿಗೆ ಬಹಳ ಪ್ರಿಯ! ಸಂಕ್ರಾಂತಿ ಹಬ್ಬದ ದಿನ ಮನೆಮಂದಿಗೆ ಹಾಗೂ ಬಂಧುಗಳಿಗೆಲ್ಲ ಸಂಕ್ರಾಂತಿ ಕಾಳನ್ನು ಹಂಚಿ 'ಎಳ್ಳು ಬೆಲ್ಲ ತಿಂದು ಒಳ್ಳೊಳ್ಳೆ ಮಾತಾಡಿ' ಎಂದು ಹೇಳುವುದು ವಾಡಿಕೆ.
ಸಂಕ್ರಾಂತಿ ಕಾಳನ್ನು ಮನೆಯಲ್ಲಿ ತಯಾರಿಸುವುದು ಕಷ್ಟದ ಕೆಲಸ ಹಾಗೂ ಸಮಯವೂ ಬಹಳ ಬೇಕು. ಹೀಗಾಗಿ ಮನೆಯಲ್ಲಿ ತಯಾರಿಸುವುದಕ್ಕಿಂತ ಅಂಗಡಿಯಿಂದ ಕೊಂಡು ತರುವುದೇ ಸುಲಭ. ನನ್ನ ಅಮ್ಮನ ಮನೆಯಲ್ಲಿ ಈಗಲೂ ಮನೆಯಲ್ಲಿ ಸ್ವಲ್ಪವಾದರೂ ಸಂಕ್ರಾಂತಿ ಕಾಳನ್ನು ತಯಾರಿಸುವ ವಾಡಿಕೆಯಿದೆ.
ಸಂಕ್ರಾಂತಿ ಕಾಳು ತಯಾರಿಸುವ ವಿಧಾನ ಇಂತಿದೆ:

ತಯಾರಿಸಲು ಬೇಕಾಗುವ ಸಮಯ: 4 ಘಂಟೆ 
ಡಿಫಿಕಲ್ಟಿ ಲೆವೆಲ್: ಕಷ್ಟಕರ 
ಈ ಅಳತೆಯಿಂದ ಒಂದು ಪುಟ್ಟ ಬೌಲ್ ನಷ್ಟು ಸಂಕ್ರಾಂತಿ ಕಾಳುಗಳನ್ನು ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:
  • ಬಿಳಿ ಎಳ್ಳು - 4 ಟೀ ಸ್ಪೂನ್ 
  • ಸಕ್ಕರೆ - 3 ಕಪ್ (1 ಕಪ್ = 110 ಗ್ರಾಂ)
  • ನೀರು - 1 1/4 ಕಪ್ 
  • ಹಾಲು - 4 ಟೇಬಲ್ ಸ್ಪೂನ್ 
  • ನಿಂಬೆರಸ - 1 ಟೀ ಸ್ಪೂನ್ 
  • ಒಂದು ಮಸ್ಲಿನ್ ಬಟ್ಟೆ 
  • ಫುಡ್ ಕಲರ್ (ಬೇಕಿದ್ದರೆ) - ಸ್ವಲ್ಪ

ತಯಾರಿಸುವ ವಿಧಾನ: 
  • ಸಕ್ಕರೆಗೆ ನೀರು ಸೇರಿಸಿ ಬಿಸಿಗಿಡಿ. ನೀರು ಕುದಿಯತೊಡಗಿದಾಗ ಇದಕ್ಕೆ 2 ಟೇಬಲ್ ಸ್ಪೂನ್ ಹಾಲು, 1/2 ಟೀ ಸ್ಪೂನ್ ನಷ್ಟು ನಿಂಬೆರಸ ಸೇರಿಸಿ.
  • 3 - 4 ನಿಮಿಷ ಕುದಿಸಿದ ನಂತರ ಮೊಸರಿನಂತಹ ಬಿಳಿ ಮಿಶ್ರಣ ಮೇಲೆ ತೇಲತೊಡಗುತ್ತದೆ. ಈಗ ಸಕ್ಕರೆ ಪಾಕವನ್ನು ಮಸ್ಲಿನ್ ಬಟ್ಟೆಯಲ್ಲಿ ಶೋಧಿಸಿ ಪುನಃ ಕುದಿಯಲಿಡಿ. 
  • ಸಕ್ಕರೆ ಪಾಕಕ್ಕೆ ಇನ್ನೊಮ್ಮೆ 2 ಟೇಬಲ್ ಸ್ಪೂನ್ ಹಾಲು, 1/2 ಟೀ ಸ್ಪೂನ್ ನಷ್ಟು ನಿಂಬೆರಸ ಸೇರಿಸಿ 3 - 4 ನಿಮಿಷ ಕುದಿಸಿ, ಮೊಸರಿನಂತಹ ಮಿಶ್ರಣ ಪಾತ್ರೆಯ ಮೇಲ್ಭಾಗದಲ್ಲಿ ಕಂಡಾಗ ಇದನ್ನು ಮಸ್ಲಿನ್ ಬಟ್ಟೆಯಲ್ಲಿ ಶೋಧಿಸಿ. 
  • ಸಕ್ಕರೆ ಒಂದೆಳೆ ಪಾಕ ಬಂದಾಗ ಉರಿಯನ್ನು ಆಫ್ ಮಾಡಿ ಪಾಕವನ್ನು ತಣಿಯಲು ಬಿಡಿ. ಈಗ ಶುದ್ಧವಾದ ಸಕ್ಕರೆಪಾಕ ಸಂಕ್ರಾಂತಿ ಕಾಳು ತಯಾರಿಸಲು ಸಿದ್ಧವಾಯಿತು. 
  • ಯಾವ ಹಂತದಲ್ಲಾದರೂ ಸಕ್ಕರೆಪಾಕ ದಪ್ಪಗಾಗಿಬಿಟ್ಟಿದ್ದರೆ ಇದಕ್ಕೆ ಸ್ವಲ್ಪ ನೀರು ಸೇರಿಸಿ ಬಿಸಿಮಾಡಿ ಒಂದೆಳೆ ಪಾಕ ಮಾಡಿಕೊಳ್ಳಬಹುದು. 
  • ಒಂದು ಅಗಲವಾದ ಬಾಣಲೆಯನ್ನು ಸಣ್ಣ ಉರಿಯಲ್ಲಿ ಬಿಸಿಗಿಡಿ. ಇದಕ್ಕೆ 4 ಟೀ ಸ್ಪೂನ್ ನಷ್ಟು ಬಿಳಿ ಎಳ್ಳನ್ನು ಹಾಕಿ. ಇದಕ್ಕೆ 3 ಹನಿಯಷ್ಟು ಸಕ್ಕರೆಪಾಕ ಸೇರಿಸಿ ಕೈಯಲ್ಲಿ ಚೆನ್ನಾಗಿ ಮಿಕ್ಸ್ ಮಾಡಿ. ಎಳ್ಳು ಒಂದಕ್ಕೊಂದು ಅಂಟದಂತೆ ಎಚ್ಚರಿಕೆ ವಹಿಸಿ. ಸಕ್ಕರೆಪಾಕ ಪೂರ್ತಿ ಒಣಗಿ ಎಳ್ಳು ಗರಿಯಾಗುವವರೆಗೂ ಹೀಗೇ ಕೈಯಾಡಿಸುತ್ತಿರಿ. ಕೈ ಸುಡದಂತೆ ಹುಷಾರಾಗಿ ಕೆಲಸ ಮಾಡಿ. 
  • ಬಾಣಲಿ ಜಾಸ್ತಿ ಬಿಸಿಯಾಗದಂತೆ ಎಚ್ಚರಿಕೆವಹಿಸಿ. ಕೈಗೆ ಜಾಸ್ತಿ ಬಿಸಿ ಎನಿಸಿದರೆ ಆಗಾಗ ಬಾಣಲಿಯನ್ನು ಉರಿಯಿಂದ ಕೆಳಗಿಸಿಕೊಂಡು, ಬಾಣಲಿ ಸ್ವಲ್ಪ ತಣಿಯುವ ತನಕ ಹಾಗೇ ಕೈಯಾಡಿಸುತ್ತಿರಿ. 
  • ಎಳ್ಳು ಪೂರ್ತಿ ಒಣಗಿದ ನಂತರ ಪುನಃ ಇದಕ್ಕೆ 3 - 4 ಹನಿಯಷ್ಟು ಸಕ್ಕರೆಪಾಕ ಸೇರಿಸಿ ಎಳ್ಳು ಒಂದಕ್ಕೊಂದು ಅಂಟದಂತೆ, ಪಾಕ ಪೂರ್ತಿ ಒಣಗುವವರೆಗೂ ಕೈಯಾಡಿಸಿ. ಸಂಕ್ರಾಂತಿ ಕಾಳು ಕೊತ್ತಂಬರಿ ಬೀಜದಷ್ಟು ದೊಡ್ದದಾಗುವವರೆಗೂ ಇದೇ ರೀತಿ ಮಾಡಿ.
  • ಸಂಕ್ರಾಂತಿ ಕಾಳಿಗೆ ಬಣ್ಣ ಹಾಕುವುದಾದರೆ ಕಾಳು ಪೂರ್ತಿ ರೆಡಿಯಾದ ನಂತರ ಅರ್ಧ ಟೀ ಚಮಚದಷ್ಟು ಸಕ್ಕರೆ ಪಾಕಕ್ಕೆ ನಿಮಗಿಷ್ಟವಾದ ಬಣ್ಣವನ್ನು ಸೇರಿಸಿ ಮಿಕ್ಸ್ ಮಾಡಿ. ಬಾಣಲೆಯಲ್ಲಿ ಒಂದೆರಡು ಚಮಚದಷ್ಟು ಸಂಕ್ರಾಂತಿ ಕಾಳನ್ನು ಹಾಕಿಕೊಂಡು ಅದಕ್ಕೆ 2 - 3 ಹನಿಯಷ್ಟು ಕಲರ್ ಸೇರಿಸಿದ ಸಕ್ಕರೆಪಾಕ ಹಾಕಿ ಪಾಕ ಆರುವವರೆಗೆ ಕೈಯಲ್ಲಿ ಮಿಕ್ಸ್ ಮಾಡಿ. ಇದೇ ರೀತಿ ಎರಡು ಬಾರಿ ಬಣ್ಣದ ಪಾಕ ಹಾಕಿ ಕೈಯಾಡಿಸಿದರೆ ಬಣ್ಣ ಚೆನ್ನಾಗಿ ಹಿಡಿಯುತ್ತದೆ. ಇದೇ ವಿಧಾನದಲ್ಲಿ ನಿಮಗಿಷ್ಟವಾದ ಬೇರೆಬೇರೆ ಬಣ್ಣಗಳನ್ನು ಸೇರಿಸಬಹುದು. 


ಟಿಪ್ಸ್:
  • ಸಂಕ್ರಾಂತಿ ಕಾಳು ತಯಾರಿಸಲು ಎಳ್ಳು ಹಾಕುವಂತೆಯೇ ಸೋಂಪು, ನೆಲಗಡಲೆ ಇವನ್ನು ಬಳಸಿಯೂ ತಯಾರಿಸಬಹುದು. ನಾನು ಒಂದು ಬ್ಯಾಚ್ ಎಳ್ಳಿನ ಕಾಳುಗಳು ಹಾಗೂ ಒಂದು ಬ್ಯಾಚ್ ಸೋಂಪಿನ ಕಾಳುಗಳನ್ನು ತಯಾರಿಸಿ ಎರಡನ್ನೂ ಮಿಕ್ಸ್ ಮಾಡಿದ್ದೇನೆ.
  • ಸಂಕ್ರಾಂತಿ ಕಾಳುಗಳನ್ನು ತಯಾರಿಸಲು ಬಹಳ ಸಮಯ ಬೇಕು. ಸಕ್ಕರೆಪಾಕ ತಯಾರಿಸಿ ಇಟ್ಟುಕೊಂಡರೆ ದಿನವೂ ಅರ್ಧ ಘಂಟೆ, ಮುಕ್ಕಾಲು ಘಂಟೆ ಹೀಗೆ ಕೆಲಸಮಾಡಿ 4 - 5 ದಿನಗಳಲ್ಲಿ ಕಾಳನ್ನು ಮಾಡಿ ಮುಗಿಸಬಹುದು. 
  • ಸಂಕ್ರಾಂತಿ ಕಾಳಿಗೆ ಕಲರ್ ಹಾಕಲು ಕೃತಕ ಬಣ್ಣಗಳ ಬದಲು ಅರಿಶಿನ, ಬೀಟ್ರೂಟ್ ರಸ, ಕೇಸರಿ ದಳ ನೆನೆಸಿದ ನೀರು ಇವನ್ನು ಬಳಸಬಹುದು.

Monday, 11 January 2016

ಬಾಳೆಕಾಯಿ ಚಿಪ್ಸ್


ನಮ್ಮೂರ ಕಡೆ ಟೀ ಟೈಮ್ ಸ್ನ್ಯಾಕ್ಸ್ ಗೆಂದು ಬಗೆಬಗೆಯ ಚಿಪ್ಸ್ ಗಳನ್ನು ತಯಾರಿಸುತ್ತಾರೆ. ಬಾಳೆಕಾಯಿ ಚಿಪ್ಸ್, ಹಲಸಿನಕಾಯಿ ಚಿಪ್ಸ್, ದೀವಿಹಲಸು (ಬೇರುಹಲಸು) ಚಿಪ್ಸ್, ಗೆಣಸಿನ ಚಿಪ್ಸ್, ಮುಂತಾಗಿ ಆಯಾ ಸೀಜನ್ ನಲ್ಲಿ ಲಭ್ಯವಿರುವ ತರಕಾರಿಗಳನ್ನು ಬಳಸಿ ಚಿಪ್ಸ್ ರೆಡಿಯಾಗುತ್ತದೆ. ಬಾಳೆಕಾಯಿಯಂತೂ ವರ್ಷದ ಎಲ್ಲಾ ಕಾಲದಲ್ಲೂ ಸಿಗುವುದರಿಂದ ಬಾಳೆಕಾಯಿ ಚಿಪ್ಸ್ ತಯಾರಿಸುವುದು ಸರ್ವೇ ಸಾಮಾನ್ಯ. ಬಾಳೆಯಲ್ಲಿ ವಿವಿಧ ತಳಿಗಳಿವೆ. ಅದರಲ್ಲಿ ನೇಂದ್ರ ಬಾಳೆಕಾಯಿ ಚಿಪ್ಸ್ ತಯಾರಿಸಲು ಪ್ರಶಸ್ತವಾದುದು. 
ನಾವು ಊರು ಕಡೆಯ ಬಾಳೆಕಾಯಿ ಚಿಪ್ಸ್ ತಿನ್ನದೇ ವರ್ಷಗಳೇ ಆಗಿಬಿಟ್ಟಿತ್ತು. ಕೆಲ ದಿನಗಳ ಹಿಂದೆ ನಾನು ಇಂಡಿಯನ್ ಸ್ಟೋರ್ ನಿಂದ ಅಡುಗೆಗೆಂದು ತಂದಿದ್ದ ಬಾಳೆಕಾಯಿಯಲ್ಲಿ ಸ್ವಲ್ಪ ಚಿಪ್ಸ್ ತಯಾರಿಸಿದ್ದೆ. ಅಮ್ಮ ತಯಾರಿಸುವಂಥ ಮಸಾಲೆ ಪುಡಿ ಹಾಕಿದಮೇಲಂತೂ ಊರಲ್ಲಿ ತಯಾರಿಸುವ ಚಿಪ್ಸ್ ನಂತೆಯೇ ಅನಿಸಿತು. ಒಮ್ಮೆ ಚಿಪ್ಸ್ ತಯಾರಿಸಿದ ನಂತರ ಇನ್ನು ಬೇಕೆನಿಸಿದಾಗಲೆಲ್ಲ ಮನೆಯಲ್ಲೇ ಬಾಳೆಕಾಯಿ ಚಿಪ್ಸ್ ತಯಾರಿಸಬಹುದೆಂಬ ಕಾನ್ಫಿಡೆನ್ಸ್ ಬಂದಿದೆ!


ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ 
ಸರ್ವಿಂಗ್ಸ್: 5 - 6
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
ಬಲಿತ ಬಾಳೆಕಾಯಿ - 5
ಚಿಪ್ಸ್ ಮಸಾಲಾ ಪೌಡರ್ - 4 ಟೇಬಲ್ ಸ್ಪೂನ್ 
ಉಪ್ಪು - ರುಚಿಗೆ ತಕ್ಕಷ್ಟು 
ಕರಿಯಲು ಎಣ್ಣೆ 

ತಯಾರಿಸುವ ವಿಧಾನ:
ಒಂದು ಅಗಲವಾದ ಪಾತ್ರೆಯಲ್ಲಿ 5 ಕಪ್ ನಷ್ಟು ನೀರು ಹಾಕಿ ಇದಕ್ಕೆ 4 - 5 ಹನಿಗಳಷ್ಟು ಎಣ್ಣೆ ಹಾಕಿಟ್ಟಿರಿ. ಸಿಪ್ಪೆ ತೆಗೆದ ಬಾಳೆಕಾಯಿಗಳನ್ನು ನೀರಿನ ಪಾತ್ರೆಯಲ್ಲಿ ಮುಳುಗಿಸಿಡಿ. 
ಒಂದೊಂದೇ ಬಾಳೆಕಾಯಿಯನ್ನು ನೀರಿನಿಂದ ತೆಗೆದು ಒಣಬಟ್ಟೆಯಲ್ಲಿ ಒರೆಸಿಕೊಂಡು, ತೆಳ್ಳಗಿನ ಸ್ಲೈಸ್ ಗಳಾಗಿ ಹೆಚ್ಚಿಕೊಳ್ಳಿ. 
ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು ಬಾಳೆಕಾಯಿ ಸ್ಲೈಸ್ ಗಳನ್ನು ಹಾಕಿ ಹೊಂಬಣ್ಣಕ್ಕೆ ಅಥವಾ ಗರಿಯಾಗುವತನಕ ಕರಿಯಿರಿ. 
ಕರಿದ ಚಿಪ್ಸ್ ನ್ನು ಒಂದು ಟಿಶ್ಯೂ ಪೇಪರ್ ಮೇಲೆ ಎರಡು ನಿಮಿಷ ಹರವಿ. ನಂತರ ಚಿಪ್ಸ್ ನ್ನು ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಅದಕ್ಕೆ ರುಚಿಗೆ ತಕ್ಕಷ್ಟು ಮಸಾಲಾ ಪೌಡರ್ ಹಾಗೂ ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. 
ತಯಾರಾದ ಚಿಪ್ಸ್ ನ್ನು ಬಿಸಿಬಿಸಿ ಟೀ ಅಥವಾ ಕಾಫಿ ಯೊಡನೆ ಸವಿಯಿರಿ. 


ಟಿಪ್ಸ್:
 ಬಾಳೆಕಾಯಿ ಚಿಪ್ಸ್ ಗೆ ಮಸಾಲಾ ಪೌಡರ್ ಬದಲಾಗಿ ಇಂಗು ಹಾಗೂ ಅರಿಶಿನ ವನ್ನು ಹಾಕಿದರೂ ಚೆನ್ನಾಗಿರುತ್ತದೆ.
ಸೂರ್ಯಕಾಂತಿ ಎಣ್ಣೆ ಅಥವಾ ತೆಂಗಿನೆಣ್ಣೆಯಲ್ಲಿ ಬಾಳೆಕಾಯಿ ಚಿಪ್ಸ್ ಕರಿದರೆ ರುಚಿ ಹೆಚ್ಚು.
ಬಲಿತ ಬಾಳೆಕಾಯಿಗಳು ಇಟ್ಟಲ್ಲೇ ಬಹುಬೇಗ ಹಣ್ಣಾಗಿಬಿಡುತ್ತವೆ. ಸಿಪ್ಪೆ ತೆಗೆದ ಕಾಯಿಗಳು ಹಣ್ಣಾಗದಂತೆ ತಡೆಯಲು ಇವನ್ನು ನೀರಿನಲ್ಲಿ ನೆನೆಸಿಡಲಾಗುತ್ತದೆ. ಸಿಪ್ಪೆತೆಗೆದ ಬಾಳೆಕಾಯಿಗಳನ್ನು ತಕ್ಷಣವೇ ಬಳಸುವುದಾದರೆ ನೀರಿನಲ್ಲಿ ನೆನೆಸಿಡುವ ಅಗತ್ಯವಿಲ್ಲ.

Friday, 1 January 2016

ಪಾಲಕ್ ಪನೀರ್

English version

ಪಾಲಕ್ ಪನೀರ್ - ಇದು ಭಾರತದಲ್ಲಿ ಸಾಮಾನ್ಯವಾಗಿ ಎಲ್ಲರಿಗೂ ಚಿರಪರಿಚಿತವಾದ ಸೈಡ್ ಡಿಶ್. ಪಾಲಕ್ ಸೊಪ್ಪಿನ ಗ್ರೇವಿಯಲ್ಲಿ ಪನೀರ್ ಪೀಸ್ ಗಳನ್ನು ಸೇರಿಸಿ ತಯಾರಿಸುವ ಈ ಸೈಡ್ ಡಿಶ್ ಚಪಾತಿ, ರೊಟ್ಟಿ, ಪೂರಿಯೊಡನೆ ತಿನ್ನಲು ಬಹಳ ಚೆನ್ನಾಗಿರುತ್ತದೆ.
ಪಾಲಕ್ ಸೊಪ್ಪನ್ನು ಮನೆಯಲ್ಲೇ ಪಾಟ್ ಗಳಲ್ಲಿ ಬೆಳೆಸಬಹುದು. ನನ್ನ ಫ್ರೆಂಡ್ ಒಬ್ಬರು ರಜಕ್ಕೆ ಊರಿಗೆ ಹೋಗುವಾಗ ಅವರ ಮನೆಯಲ್ಲಿದ್ದ ಪಾಲಕ್ ಗಿಡಗಳ ಪಾಟ್ ನ್ನು ನಮ್ಮ ಮನೆಯಲ್ಲಿಟ್ಟು ಹೋಗಿದ್ದಾರೆ. ಅವರು ಹೇಳುವ ಪ್ರಕಾರ, ಪಾಲಕ್ ಗಿಡವನ್ನು ಬೇರುಸಹಿತ ಕೀಳಬಾರದಂತೆ. ಬದಲಾಗಿ ಚೆನ್ನಾಗಿ ಬಲಿತ ಎಲೆಗಳನ್ನು ಮಾತ್ರ ಕೀಳುತ್ತಿದ್ದರೆ ಪುನಃ ಅದೇ ಗಿಡದಲ್ಲೇ ಹೊಸ ಎಲೆಗಳು ಬೆಳೆಯುತ್ತಿರುತ್ತವೆ. ಒಂದೊಂದು ಗಿಡವನ್ನೂ ಐದಾರು ತಿಂಗಳತನಕ ಬಳಸಬಹುದು. ಇಲ್ಲಿ ಈಗ ಬೇಸಿಗೆ ಕಾಲವಾದ್ದರಿಂದ ಮೂರು ವಾರಕ್ಕೆ ಒಮ್ಮೆ ಪಾಲಕ್ ಸೊಪ್ಪು ಕೊಯ್ಲಿಗೆ ಸಿಗುತ್ತಿದೆ. ನಾನು ಅಡಿಲೇಡ್ ನಲ್ಲಿದ್ದಾಗ ಮನೆಯ ಹಿತ್ತಿಲಲ್ಲಿ ಪಾಲಕ್ ಗಿಡಗಳನ್ನು ಹಾಕಿಕೊಂಡಿದ್ದೆ. ಆದರೆ ಈ ರೀತಿ ಬಲಿತ ಎಲೆಗಳನ್ನು ಮಾತ್ರ ಕಿತ್ತು ಗಿಡವನ್ನು ಹಾಗೇ ಬಿಡಬೇಕೆಂದು ಗೊತ್ತಿರಲಿಲ್ಲ. ಇದು ಒಳ್ಳೆಯ ಟ್ರಿಕ್ ಅಲ್ಲವೆ?
ಎಲ್ಲರಿಗೂ ಹೊಸ ವರ್ಷದ ಶುಭಾಶಯಗಳು! ಹೊಸ ವರ್ಷ ನಿಮಗೆಲ್ಲರಿಗೂ ಸಂತೋಷ, ನೆಮ್ಮದಿಗಳನ್ನು ತರಲೆಂದು ಹಾರೈಸುವೆ!
ಪಾಲಕ್ ಪನೀರ್ ರೆಸಿಪಿ ಈ ಕೆಳಗಿನಂತಿದೆ:

ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು 
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್


ಬೇಕಾಗುವ ಸಾಮಗ್ರಿಗಳು: 
  • ಪಾಲಕ್ ಸೊಪ್ಪು - 1 ದೊಡ್ಡ ಕಟ್ಟು 
  • ಟೊಮೆಟೋ - 1 
  • ಈರುಳ್ಳಿ - 1, ಮೀಡಿಯಮ್ ಸೈಜಿನದು 
  • ತುರಿದ ಬೆಳ್ಳುಳ್ಳಿ - 1 ಟೀ ಸ್ಪೂನ್ 
  • ತುರಿದ ಶುಂಟಿ - 1 ಟೀ ಸ್ಪೂನ್ 
  • ಜೀರಿಗೆ - 1 ಟೀ ಸ್ಪೂನ್
  • ಕೊತ್ತಂಬರಿ ಪುಡಿ - 1 1/2 ಟೀ ಸ್ಪೂನ್ 
  • ಗರಮ್ ಮಸಾಲಾ ಪುಡಿ - 1/2 ಟೀ ಸ್ಪೂನ್ 
  • ಅಚ್ಚಮೆಣಸಿನಪುಡಿ - 1 1/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ನಿಂಬೆರಸ - 1 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 
  • ಪನೀರ್ - 300 ಗ್ರಾಂ
  • ಎಣ್ಣೆ - 7 ಟೇಬಲ್ ಸ್ಪೂನ್ 
  • ನೀರು - 3 ಕಪ್ 


ತಯಾರಿಸುವ ವಿಧಾನ:
  • ಟೊಮೆಟೋ ಹಣ್ಣನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಈರುಳ್ಳಿಯನ್ನು ತುರಿದುಕೊಳ್ಳಿ.
  • ಪಾಲಕ್ ಸೊಪ್ಪನ್ನು ಸ್ವಚ್ಛವಾಗಿ ತೊಳೆದುಕೊಂಡು 1 1/2 ಕಪ್ ಅಥವಾ ಅಗತ್ಯವಿರುವಷ್ಟು ನೀರು ಸೇರಿಸಿ ಬೇಯಿಸಿಕೊಳ್ಳಿ. ಸೊಪ್ಪು ಬೇಯಿಸಿದ ನೀರನ್ನು ಎತ್ತಿಟ್ಟುಕೊಂಡು, ಸೊಪ್ಪನ್ನು ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. 
  • ಪನೀರ್ ನ್ನು ಬೇಕಾದ ಸೈಜಿಗೆ ಕತ್ತರಿಸಿಕೊಂಡು ತವಾದ ಮೇಲೆ ಸ್ವಲ್ಪ ಎಣ್ಣೆ ಹಾಕಿ ಹೊಂಬಣ್ಣಕ್ಕೆ ಬೇಯಿಸಿಕೊಳ್ಳಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ 5 - 6 ಟೇಬಲ್ ಸ್ಪೂನ್ ನಷ್ಟು ಎಣ್ಣೆ ಬಿಸಿಮಾಡಿ ಜೀರಿಗೆ ಸೇರಿಸಿ ಒಗ್ಗರಣೆ ಮಾಡಿಕೊಂಡು ತುರಿದ ಶುಂಟಿ - ಬೆಳ್ಳುಳ್ಳಿ ಸೇರಿಸಿ ಹಸಿ ವಾಸನೆ ಹೋಗುವಂತೆ ಹುರಿಯಿರಿ. 
  • ಇದಕ್ಕೆ ತುರಿದ ಈರುಳ್ಳಿ ಸೇರಿಸಿ ನಸು ಕಂದುಬಣ್ಣ ಬರುವವರೆಗೆ ಹುರಿಯಿರಿ. 
  • ನಂತರ ಇದಕ್ಕೆ ಸಣ್ಣಗೆ ಹೆಚ್ಚಿದ ಟೊಮೆಟೋ, 1/4 ಟೀ ಸ್ಪೂನ್ ಉಪ್ಪು ಸೇರಿಸಿ ಮಿಕ್ಸ್ ಮಾಡಿ, ಮುಚ್ಚಳ ಮುಚ್ಚಿ ಬೇಯಿಸಿ. 
  • ಇದನ್ನು ಆಗಾಗ್ಗೆ ಕೈಯಾಡಿಸುತ್ತಿದ್ದು, ಮಿಶ್ರಣ ಎಣ್ಣೆ ಬಿಡತೊಡಗಿದಾಗ ಪಾಲಕ್ ಪೇಸ್ಟ್ ಸೇರಿಸಿ. ಬೇಕಾದಷ್ಟು ನೀರು, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಕುದಿಯಲು ಬಿಡಿ. ಪಾಲಕ್ ಸೊಪ್ಪು ಬೇಯಿಸಿದ ನೀರನ್ನೇ ಇಲ್ಲಿ ಬಳಸಬಹುದು. 
  • ಪಾಲಕ್ ಮಿಶ್ರಣಕ್ಕೆ ಕೊತ್ತಂಬರಿ ಪುಡಿ, ಗರಂ ಮಸಾಲಾ ಪುಡಿ ಹಾಗೂ ಅಚ್ಚಮೆಣಸಿನಪುಡಿ ಸೇರಿಸಿ ಕೈಯಾಡಿಸಿ 3 - 4 ನಿಮಿಷ ಕುದಿಸಿ ಇಳಿಸಿ.
  • ತಯಾರಾದ ಪಾಲಕ್ ಗ್ರೇವಿಗೆ ರುಚಿಗೆ ತಕ್ಕಷ್ಟು ನಿಂಬೆರಸ ಸೇರಿಸಿ ಮಿಕ್ಸ್ ಮಾಡಿಕೊಂಡು ಪನೀರ್ ಪೀಸ್ ಗಳನ್ನು ಸೇರಿಸಿ ನಿಧಾನವಾಗಿ ಮಿಕ್ಸ್ ಮಾಡಿ. 
  • ಹಬೆಯಾಡುವ ಪಾಲಕ್ ಪನೀರ್ ನ್ನು ರೊಟ್ಟಿ, ಚಪಾತಿ ಅಥವಾ ಪೂರಿಯೊಡನೆ ಸರ್ವ್ ಮಾಡಿ. 


ಟಿಪ್ಸ್: 
  • ಪನೀರ್ ತಯಾರಿಸುವಾಗ ಉಳಿಯುವ ನೀರನ್ನು ಚೆಲ್ಲದೆ ಇಟ್ಟರೆ ವಿವಿಧ ಗ್ರೇವಿಗಳಲ್ಲಿ ಬಳಸಲು ಚೆನ್ನಾಗಿರುತ್ತದೆ. ನಾನು ಇಲ್ಲಿ ಪನೀರ್ ತಯಾರಿಸಿದ ನೀರನ್ನೇ ಬಳಸಿದ್ದೇನೆ. 
  • ಅಚ್ಚಮೆಣಸಿನಪುಡಿಯ ಬದಲು ಹಸಿಮೆಣಸನ್ನು ಬೇಕಿದ್ದರೂ ಬಳಸಬಹುದು. ಹಸಿಮೆಣಸು ಬಳಸುವುದಾದರೆ ಶುಂಟಿ - ಬೆಳ್ಳುಳ್ಳಿ - ಹಸಿಮೆಣಸು ಇಷ್ಟನ್ನೂ ಸೇರಿಸಿ ನುಣ್ಣಗೆ ಪೇಸ್ಟ್ ಮಾಡಿಕೊಂಡು ಬಳಸಿ.

Related Posts Plugin for WordPress, Blogger...