Here are some recipes which I came across through the net, books, so on and few are my own experiments..

Thursday, 25 December 2014

ಕ್ಯಾಶ್ಯೂ ಬಿಸ್ಕಿಟ್ । ಗೇರುಬೀಜದ ಬಿಸ್ಕಿಟ್ | ಗೋಡಂಬಿ ಬಿಸ್ಕಿಟ್


ಬಿಸ್ಕಿಟ್ - ಇದು ಮಕ್ಕಳಿಂದ ದೊಡ್ದವರವರೆಗೂ ಎಲ್ಲರಿಗೂ ಇಷ್ಟವಾಗುವ ತಿಂಡಿ. ನಮ್ಮ ಮನೆಯಲ್ಲೂ ಎಲ್ಲರೂ ಬಿಸ್ಕಿಟ್ ಪ್ರಿಯರು. ಅಂಗಡಿಯಿಂದ ಬಿಸ್ಕಿಟ್ ತರುವುದಷ್ಟೇ ಅಲ್ಲದೆ, ನಾನೂ ಮನೆಯಲ್ಲಿ ವಿವಿಧ ಬಿಸ್ಕಿಟ್ ಗಳನ್ನು ತಯಾರಿಸುತ್ತಿರುತ್ತೇನೆ. ಮನೆಯಲ್ಲಿ ತಯಾರಿಸುವ ಬೆಣ್ಣೆ ಬಿಸ್ಕಿಟ್, ನಿಪ್ಪಟ್ಟು ಇತ್ಯಾದಿ ಬೇಕರಿ ಸ್ಟೈಲ್ ತಿಂಡಿಗಳು ನಮ್ಮವರಿಗೆ ಬಹಳ ಇಷ್ಟ.
ಹೈದರಾಬಾದ್ ನಲ್ಲಿರುವ ಕರಾಚಿ ಬೇಕರಿಯ ಬಗ್ಗೆ ನಿಮಗೆ ಗೊತ್ತಿರಬಹುದು. ಅಲ್ಲಿ ಸಿಗುವ ಫ್ರೂಟ್ ಬಿಸ್ಕಿಟ್ ಮತ್ತು ಕ್ಯಾಶ್ಯೂ ಬಿಸ್ಕಿಟ್ ಬಹಳ ಚೆನ್ನಾಗಿರುತ್ತವೆ. ಹೈದರಾಬಾದ್ ನಲ್ಲಿರುವ ನನ್ನ ಅಕ್ಕ - ಭಾವ ಊರಿಗೆ ಬರುವಾಗಲೆಲ್ಲ ಕರಾಚಿ ಬೇಕರಿಯ ಬಿಸ್ಕಿಟ್ ನ್ನು ಮರೆಯದೇ ತರುತ್ತಾರೆ. ಇತ್ತೀಚೆಗೆ ಬೆಂಗಳೂರಿನಲ್ಲೂ ಕೆಲವು ಅಂಗಡಿಗಳಲ್ಲಿ ಕರಾಚಿ ಬಿಸ್ಕಿಟ್ ಪ್ಯಾಕೆಟ್ ಗಳನ್ನು ಕಾಣಬಹುದು.
ಕರಾಚಿ ಬೇಕರಿಯ ಬಿಸ್ಕಿಟ್ ಗಳೆಂದರೆ ನಮಗೆಲ್ಲ ಇಷ್ಟ. ಈ ಬಿಸ್ಕಿಟ್ ನ್ನು ಮನೆಯಲ್ಲಿ ತಯಾರಿಸಿ ನೋಡೋಣವೆಂದು ನಾನು ಯಾವಾಗಲೂ ತಯಾರಿಸುವ ಆರೇಂಜ್ ಬಿಸ್ಕಿಟ್ ರೆಸಿಪಿಯಲ್ಲಿ ಸ್ವಲ್ಪ ಬದಲಾವಣೆಗಳನ್ನು ಮಾಡಿ ಕ್ಯಾಶ್ಯೂ ಬಿಸ್ಕಿಟ್ ತಯಾರಿಸಿದೆ. ಪ್ರತಿ ಬಾರಿ ತಯಾರಿಸಿದಾಗಲೂ ಎರಡು ದಿನದೊಳಗೆ ಖಾಲಿಯಾಗಿಬಿಡುವ ಈ ಕ್ಯಾಶ್ಯೂ ಬಿಸ್ಕಿಟ್ ಬಹಳ ಅಡಿಕ್ಟಿವ್!


ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷ 
ಬೇಕಿಂಗ್ ಟೈಮ್: 20 ನಿಮಿಷ 
ಈ ಅಳತೆಯಿಂದ ಸುಮಾರು 30 ಬಿಸ್ಕಿಟ್ ಗಳನ್ನು ತಯಾರಿಸಬಹುದು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:
  • ಮೈದಾಹಿಟ್ಟು - 4 1/2 ಕಪ್ 
  • ಬೆಣ್ಣೆ - 185 ಗ್ರಾಂ (ರೂಮ್ ಟೆಂಪರೇಚರ್ ನಲ್ಲಿ)
  • ಸಕ್ಕರೆ - 3/4 ಕಪ್ + 1 ಟೇಬಲ್ ಸ್ಪೂನ್
  • ವೆನಿಲ್ಲಾ ಎಸೆನ್ಸ್ - 3/4 ಟೀ ಸ್ಪೂನ್ 
  • ಗೋಡಂಬಿ ಚೂರುಗಳು - 1 1/4 ಕಪ್ 


ತಯಾರಿಸುವ ವಿಧಾನ:
  • ಸಕ್ಕರೆಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ.
  • ಬೆಣ್ಣೆಯನ್ನು ಒಂದು ದೊಡ್ಡ ಪಾತ್ರೆಯಲ್ಲಿ ಹಾಕಿಕೊಂಡು ಚೆನ್ನಾಗಿ ಬೀಟ್ ಮಾಡಿ. ಬೀಟ್ ಮಾಡಲು ಹ್ಯಾಂಡ್ ಮಿಕ್ಸರ್ ಬಳಸಿದರೆ ಉತ್ತಮ, ಇಲ್ಲವೇ ಹಾಗೇ ಬೀಟ್ ಮಾಡಬಹುದು. 
  • ಬೀಟ್ ಮಾಡಿದ ಬೆಣ್ಣೆಗೆ ಸಕ್ಕರೆ ಪುಡಿಯನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತ ಚೆನ್ನಾಗಿ ಬೀಟ್ ಮಾಡಿ ಕ್ರೀಮ್ ನಂತೆ ಮಾಡಿ. ಕೊನೆಯಲ್ಲಿ ವೆನಿಲ್ಲಾ ಎಸೆನ್ಸ್ ಸೇರಿಸಿ ಒಂದು ನಿಮಿಷ ಬೀಟ್ ಮಾಡಿ. 
  • ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ಮೈದಾಹಿಟ್ಟು ಸೇರಿಸಿ ಮೆತ್ತಗಿನ, ಕೈಗೆ ಅಂಟದ ಹಿಟ್ಟಿನ ಉಂಡೆಯನ್ನು ತಯಾರಿಸಿಕೊಳ್ಳಿ.
  • ಓವನ್ ನ್ನು 170°C ಗೆ ಪ್ರಿ-ಹೀಟ್ ಮಾಡಿಕೊಳ್ಳಿ. 
  • ಮೈದಾಹಿಟ್ಟಿನ ಉಂಡೆಯನ್ನು ನಿಮ್ಮ ಅನುಕೂಲಕ್ಕೆ ತಕ್ಕಂತೆ ಎರಡು ಅಥವಾ ಮೂರು ಭಾಗಗಳಾಗಿ ಮಾಡಿಕೊಳ್ಳಿ. ಪ್ರತಿಯೊಂದು ಉಂಡೆಯನ್ನೂ ಅರ್ಧ ಇಂಚು ದಪ್ಪಕ್ಕೆ ದೊಡ್ಡದಾಗಿ ಚೌಕ ಅಥವಾ ಆಯತಾಕಾರಕ್ಕೆ ಲಟ್ಟಿಸಿಕೊಳ್ಳಿ. 
  • ಇದರಮೇಲೆ ಗೋಡಂಬಿ ಚೂರುಗಳನ್ನು ಉದುರಿಸಿಕೊಂಡು ಲಟ್ಟಣಿಗೆಯಲ್ಲಿ ನಾಜೂಕಾಗಿ ಸ್ವಲ್ಪ ಲಟ್ಟಿಸಿ ಗೋಡಂಬಿ ಚೂರುಗಳು ಸರಿಯಾಗಿ ಕೂರುವಂತೆ ಮಾಡಿ. ಇದನ್ನು ಚಿಕ್ಕ ಚೌಕಗಳಾಗಿ ಅಥವಾ ಬೇಕಾದ ಆಕಾರಕ್ಕೆ ಕತ್ತರಿಸಿ ಬೇಕಿಂಗ್ ಶೀಟ್ ಹಾಕಿದ ಬೇಕಿಂಗ್ ಟ್ರೇಯಲ್ಲಿ ಜೋಡಿಸಿ. 
  • ಬೇಕಿಂಗ್ ಟ್ರೇಯನ್ನು ಪ್ರೀ-ಹೀಟ್ ಮಾಡಿದ ಓವನ್ ನಲ್ಲಿಟ್ಟು 18 - 20 ನಿಮಿಷ ಬೇಯಿಸಿ. ನಮ್ಮ ಮನೆಯ ಓವನ್ ನಲ್ಲಿ ಸಾಮಾನ್ಯವಾಗಿ 20 ನಿಮಿಷಕ್ಕೆ ಬಿಸ್ಕಿಟ್ ಬೆಂದಿರುತ್ತದೆ. ಬೆಂದಾಗ ಬಿಸ್ಕಿಟ್ ತಿಳಿಹೊಂಬಣ್ಣಕ್ಕೆ ಬರುತ್ತದೆ. 
  • ಬೆಂದ ಬಿಸ್ಕಿಟ್ ನ್ನು 4 - 5 ನಿಮಿಷ ಓವನ್ ನಲ್ಲಿ ಹಾಗೇ ಇಟ್ಟು ಹೊರತೆಗೆದು ತಣ್ಣಗಾಗಲು ಬಿಡಿ. 
  • ಗರಿಗರಿಯಾದ ಗೋಡಂಬಿ ಬಿಸ್ಕಿಟ್ ನ್ನು ಟೀಯೊಡನೆ ಸವಿಯಿರಿ.


Monday, 15 December 2014

ಈರುಳ್ಳಿ ಸೊಪ್ಪಿನ ರೊಟ್ಟಿ । ಸ್ಪ್ರಿಂಗ್ ಆನಿಯನ್ ರೊಟ್ಟಿ


ಮನೆಯಲ್ಲಿ ಈರುಳ್ಳಿ ತಂದಿಟ್ಟು ತುಂಬಾ ದಿನಗಳಾಗಿದ್ದರಿಂದ ಅವು ಅಲ್ಲೇ ಮೊಳಕೆಯೊಡೆಯತೊಡಗಿದ್ದವು. ಅವನ್ನು ಹಾಗೇ ತೆಗೆದುಕೊಂಡು ಹೋಗಿ ಹಿತ್ತಿಲಲ್ಲಿ ನೆಟ್ಟಿದ್ದೆ. ಈಗ ಅವೆಲ್ಲ ಚೆನ್ನಾಗಿ ಬೆಳೆದು ನಮ್ಮ ಅಡುಗೆಗೆ ಬಳಕೆಯಾಗುತ್ತಿವೆ. ಮನೆಯಲ್ಲೇ ಬೆಳೆದ ತರಕಾರಿ, ಹಣ್ಣುಗಳನ್ನು ಬಳಸುವುದರಲ್ಲಿ ಇರುವ ಖುಷಿಯೇ ಬೇರೆ.. ಅಲ್ಲವೆ?
ಈ ರೊಟ್ಟಿ ನನ್ನ ಇತ್ತೀಚಿನ ಎಕ್ಸ್ ಪರಿಮೆಂಟ್. ಬೇರೆ ತರಕಾರಿಗಳನ್ನು ಬಳಸಿ ರೊಟ್ಟಿ ತಯಾರಿಸುವಂತೆಯೇ ಈರುಳ್ಳಿ ಸೊಪ್ಪಿನಲ್ಲೂ ರೊಟ್ಟಿ ಮಾಡಬಹುದೆನಿಸಿತು. ನನ್ನ ಶ್ರಮ ವ್ಯರ್ಥವಾಗಲಿಲ್ಲ, ರೊಟ್ಟಿ ಬಹಳ ಚೆನ್ನಾಗಿ ಬಂತು! ಸುಲಭದಲ್ಲಿ ತಯಾರಿಸಬಹುದಾದ ಈರುಳ್ಳಿ ಸೊಪ್ಪಿನ ರೊಟ್ಟಿಯ ರೆಸಿಪಿ ಈ ಕೆಳಗಿನಂತಿದೆ..


ತಯಾರಿಸಲು ಬೇಕಾಗುವ ಸಮಯ: 1 ಘಂಟೆ
ಈ ಅಳತೆಯಿಂದ 8 ಮೀಡಿಯಮ್ ಸೈಜಿನ ರೊಟ್ಟಿಗಳನ್ನು ತಯಾರಿಸಬಹುದು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು:
  • ಈರುಳ್ಳಿ ಸೊಪ್ಪು / ಸ್ಪ್ರಿಂಗ್ ಆನಿಯನ್ - 1 ಕಟ್ಟು
  • ಈರುಳ್ಳಿ - 2 (ದೊಡ್ಡದು)
  • ಅಕ್ಕಿಹಿಟ್ಟು - 1 1/2 ಕಪ್ (1 ಕಪ್ = 200 ಗ್ರಾಂ ಅಂದಾಜು)
  • ಹಸಿಮೆಣಸು - 2 ಅಥವಾ ಅಚ್ಚಮೆಣಸಿನಪುಡಿ - 1 1/2 ಟೀ ಸ್ಪೂನ್ (ಖಾರಕ್ಕೆ ತಕ್ಕಂತೆ)
  • ಮೊಸರು - 3/4 ಕಪ್ (ಟಿಪ್ಸ್ ನೋಡಿ)
  • ಉಪ್ಪು - ರುಚಿಗೆ ತಕ್ಕಷ್ಟು
  • ಸಕ್ಕರೆ (ಬೇಕಿದ್ದರೆ) - 3/4 ಟೀ ಸ್ಪೂನ್
  • ನೀರು - 1/4 ಕಪ್
  • ಬೇಯಿಸಲು ಎಣ್ಣೆ ಅಥವಾ ಬೆಣ್ಣೆ - ಸ್ವಲ್ಪ

ತಯಾರಿಸುವ ವಿಧಾನ:
  • ಈರುಳ್ಳಿ ಸೊಪ್ಪು, ಈರುಳ್ಳಿ ಹಾಗೂ ಹಸಿಮೆಣಸನ್ನು ಸಣ್ಣದಾಗಿ ಹೆಚ್ಚಿ ಒಂದು ಮಿಕ್ಸಿಂಗ್ ಬೌಲ್ ನಲ್ಲಿ ಹಾಕಿಕೊಳ್ಳಿ. ಇದಕ್ಕೆ ಉಪ್ಪು ಹಾಗೂ ಸಕ್ಕರೆ ಸೇರಿಸಿ ಕಲಸಿ 10 ನಿಮಿಷ ಹಾಗೇ ಇಡಿ. ಅಷ್ಟರಲ್ಲಿ ಮಿಶ್ರಣ ಸ್ವಲ್ಪ ನೀರೊಡೆದು ಹಿಟ್ಟನ್ನು ಕಲಸಲು ಅನುಕೂಲವಾಗುತ್ತದೆ.
  • 10 ನಿಮಿಷದ ನಂತರ ಈ ಮಿಶ್ರಣಕ್ಕೆ ಒಂದೂವರೆ ಕಪ್ ನಷ್ಟು ಅಕ್ಕಿಹಿಟ್ಟು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಹಸಿಮೆಣಸು ಬಳಸದಿದ್ದರೆ ಅಕ್ಕಿಹಿಟ್ಟಿನ ಜೊತೆಗೆ ಖಾರಕ್ಕೆ ತಕ್ಕಷ್ಟು ಮೆಣಸಿನ ಪುಡಿಯನ್ನೂ ಸೇರಿಸಿ.
  • ಅಕ್ಕಿಹಿಟ್ಟಿಗೆ ಮೊಸರನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತ ಮೆತ್ತಗೆ ರೊಟ್ಟಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಹಿಟ್ಟು ಗಟ್ಟಿ ಎನಿಸಿದರೆ ಸ್ವಲ್ಪ ನೀರು ಸೇರಿಸಿ ಕಲಸಿ.
  • ಕಲಸಿದ ಹಿಟ್ಟನ್ನು 10 ನಿಮಿಷ ನೆನೆಯಲು ಬಿಡಿ. ಇಲ್ಲವೇ ಹಾಗೇ ಬೇಕಿದ್ದರೂ ಬಳಸಬಹುದು.
  • ತಯಾರಾದ ಹಿಟ್ಟಿನಿಂದ ದೊಡ್ಡ ನಿಂಬೆಗಾತ್ರದ ಉಂಡೆಗಳನ್ನು ಮಾಡಿಕೊಂಡು ಎಣ್ಣೆ ಸವರಿದ ಬಾಳೆಯೆಲೆ ಅಥವಾ ಪ್ಲಾಸ್ಟಿಕ್ ಶೀಟ್ ನ ಮೇಲೆ ಆದಷ್ಟು ತೆಳ್ಳಗೆ ತಟ್ಟಿ, ಕಾದ ಕಾವಲಿಯಮೇಲೆ ಹಾಕಿ ಎರಡೂ ಕಡೆ ಕೆಂಪಗೆ ಬೇಯಿಸಿ.
  • ರೊಟ್ಟಿ ಬೇಯಿಸುವಾಗ ಮೇಲಿನಿಂದ ಸ್ವಲ್ಪ ಎಣ್ಣೆ ಅಥವಾ ಬೆಣ್ಣೆ ಹಾಕಿದರೆ ಚೆನ್ನಾಗಿರುತ್ತದೆ.
  • ರೊಟ್ಟಿ ಬಿಸಿ ಇರುವಾಗಲೇ ಬೆಣ್ಣೆ ಹಾಕಿಕೊಂಡು ತಿನ್ನಿ.


ಟಿಪ್ಸ್:
  • ಮೊಸರು ಹುಳಿ ಇದ್ದರೆ ಇಲ್ಲಿ ಹೇಳಿದ ಪ್ರಮಾಣಕ್ಕಿಂತ ಕಡಿಮೆ ಬಳಸಿ, ಸ್ವಲ್ಪ ಹೆಚ್ಚು ನೀರು ಸೇರಿಸಿ ಕಲಸಿ.

Friday, 5 December 2014

ಎಗ್ ಲೆಸ್ ಮ್ಯಾಂಗೋ ಲೋಫ್ ಕೇಕ್ । ಮಾವಿನಹಣ್ಣಿನ ಬ್ರೆಡ್


ಕಳೆದ ವಾರ ಹಣ್ಣು ತರಲು ಹೋದಾಗ ಒಳ್ಳೆಯ ಮಾವಿನ ಹಣ್ಣುಗಳು ಕಂಡವು. ಸೀದಾ ಹೋಗಿ ಒಂದಷ್ಟು ಹಣ್ಣುಗಳನ್ನು ತಂದೆ. ಮಾವಿನ ಹಣ್ಣು ತಂದಮೇಲೆ ರಸಾಯನ (ಸೀಕರಣೆ) ಮಾಡದೇ ಇರಲು ಸಾಧ್ಯವೆ? ರಸಾಯನ ಮಾಡಿ ನಾವಿಬ್ಬರು ಸವಿದರೆ, ನನ್ನ ಮಗಳು ಅಮ್ಮಾ, ಕೇಕ್ ಬೇಕು! ಎಂದಳು. ಅವಳಿಗಾಗಿ ಮ್ಯಾಂಗೋ ಕೇಕ್ ತಯಾರಿಸಿದ್ದಾಯಿತು. ಮಾವಿನಹಣ್ಣಿನ ಪರಿಮಳದ ಕೇಕ್ ನಮಗೆಲ್ಲ ಬಹಳ ಇಷ್ಟವಾಯಿತು.
ಮಾವಿನಹಣ್ಣು ಬಳಸಿ ನಾನು ಕೇಕ್ ತಯಾರಿಸಿದ್ದು ಇದೇ ಮೊದಲು. ರೆಸಿಪಿಗಾಗಿ ಇಂಟರ್ ನೆಟ್ ನಲ್ಲಿ ಹುಡುಕಿದಾಗ ನನ್ನ ಬ್ಲಾಗ್ ಫ್ರೆಂಡ್ ಜೂಲಿಯ ಮ್ಯಾಂಗೋ ಕೇಕ್ ರೆಸಿಪಿ ಬಹಳ ಇಷ್ಟವಾಯಿತು. ಆ ರೆಸಿಪಿಯಲ್ಲಿ ನನ್ನ ಅನುಕೂಲಕ್ಕೆ ತಕ್ಕಂತೆ ಕೆಲವು ಬದಲಾವಣೆಗಳನ್ನು ಮಾಡಿಕೊಂಡು ತಯಾರಿಸಿದ್ದು ಈ ಕೇಕ್! ಸಂಜೆಯ ಟೀಯೊಡನೆ ಸವಿಯಲು ಅಥವಾ ಮಕ್ಕಳ ಸ್ನ್ಯಾಕ್ಸ್ ಗೆ ಈ ಕೇಕ್ ಬಹಳ ಚೆನ್ನಾಗಿರುತ್ತದೆ.
ಮ್ಯಾಂಗೋ ಲೋಫ್ ಕೇಕ್ ತಯಾರಿಸುವ ವಿಧಾನ ಇಂತಿದೆ..


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು
ಬೇಕಿಂಗ್ ಟೈಮ್: 35 - 40 ನಿಮಿಷಗಳು
ಈ ಅಳತೆಯಿಂದ 1 ಲೋಫ್ ಕೇಕ್ ತಯಾರಿಸಬಹುದು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು:
  • ಮೈದಾಹಿಟ್ಟು - 2 ಕಪ್ (1 ಕಪ್ = 75 ಗ್ರಾಂ ಅಂದಾಜು)
  • ಸಣ್ಣ ರವೆ - 1/2 ಕಪ್ 
  • 1 ದೊಡ್ಡ ಮಾವಿನಹಣ್ಣು ( 2 ಕಪ್ ನಷ್ಟು ಮಾವಿನ ಪಲ್ಪ್ ಅಥವಾ ಪ್ಯೂರಿ)
  • 1 1/2 ಕಪ್ ಸಕ್ಕರೆ
  • ದೊಡ್ಡ ಚಿಟಿಕೆ ಉಪ್ಪು
  • ಹಾಲು - 1/2 ಕಪ್ 
  • ಎಣ್ಣೆ - 1/2 ಕಪ್ 
  • ಬೇಕಿಂಗ್ ಪೌಡರ್ - 2 ಟೀ ಸ್ಪೂನ್ 
  • ಬೇಕಿಂಗ್ ಸೋಡಾ - 1 ಟೀ ಸ್ಪೂನ್ 
  • ಕೇಸರಿ ದಳಗಳು (ಬೇಕಿದ್ದರೆ) - 8ರಿಂದ 10 

ತಯಾರಿಸುವ ವಿಧಾನ:
  • ಮೈದಾಹಿಟ್ಟು ಮತ್ತು ಬೇಕಿಂಗ್ ಪೌಡರ್ ನ್ನು ಮಿಕ್ಸ್ ಮಾಡಿ 2 - 3 ಬಾರಿ ಜರಡಿಯಾಡಿಕೊಳ್ಳಿ. ಇದಕ್ಕೆ ರವಾ ಸೇರಿಸಿ ಮಿಕ್ಸ್ ಮಾಡಿ. 
  • ಓವನ್ ನ್ನು 175 °C ಗೆ ಪ್ರಿ-ಹೀಟ್ ಮಾಡಿಕೊಳ್ಳಿ. ಬೇಕಿಂಗ್ ಪಾತ್ರೆಗೆ ಜಿಡ್ಡು ಸವರಿಡಿ. 
  • ಮಾವಿನಹಣ್ಣಿನ ಸಿಪ್ಪೆ ಮತ್ತು ಓಟೆ ಬೇರ್ಪಡಿಸಿ. ಹಣ್ಣನ್ನು ಹೆಚ್ಚಿ ಮಿಕ್ಸಿಯಲ್ಲಿ ತಿರುವಿ 2 ಕಪ್ ನಷ್ಟು ಹಣ್ಣಿನ ಪ್ಯೂರಿ/ ಪಲ್ಪ್ ತಯಾರಿಸಿಕೊಳ್ಳಿ. ಕೇಸರಿ ದಳಗಳನ್ನು ಹಾಕುವುದಾದರೆ ರುಬ್ಬುವಾಗಲೇ ಸೇರಿಸಿ.
  • ಮಾವಿನ ಪ್ಯೂರಿಗೆ ಉಪ್ಪು, ಸಕ್ಕರೆ ಮತ್ತು ಹಾಲು ಸೇರಿಸಿ, ಸಕ್ಕರೆ ಕರಗುವತನಕ ಕದಡಿ. ಇದಕ್ಕೆ ಎಣ್ಣೆ, ಬೇಕಿಂಗ್ ಸೋಡಾ ಸೇರಿಸಿ ಮಿಕ್ಸ್ ಮಾಡಿ. 
  • ಇದಕ್ಕೆ ಮೈದಾಹಿಟ್ಟನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತ ಚೆನ್ನಾಗಿ ಮಿಕ್ಸ್ ಮಾಡಿ ಹಿಟ್ಟನ್ನು ತಯಾರಿಸಿಕೊಳ್ಳಿ. 
  • ತಯಾರಾದ ಹಿಟ್ಟನ್ನು ಜಿಡ್ಡು ಸವರಿದ ಲೋಫ್ ಪಾತ್ರೆಯಲ್ಲಿ ಹಾಕಿ 35 - 40 ನಿಮಿಷ ಬೇಯಿಸಿ. 
  • ಕೇಕ್ ತಣ್ಣಗಾದ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ ಸವಿಯಿರಿ. 


ಟಿಪ್ಸ್:
  • ಮಾವಿನಹಣ್ಣು ಸಿಗದಿದ್ದರೆ ಅಂಗಡಿಯಲ್ಲಿ ಸಿಗುವ ಮಾವಿನ ಪಲ್ಪ್ ಬಳಸಬಹುದು. ಪಲ್ಪ್ ನ ಸಿಹಿ ನೋಡಿಕೊಂಡು ಸಕ್ಕರೆಯ ಪ್ರಮಾಣವನ್ನು ಅಡ್ಜಸ್ಟ್ ಮಾಡಿ.

Tuesday, 18 November 2014

ಮೈದಾ ಹಲ್ವಾ | Maida Halwa | All Purpose Flour Halwa

Click here for English version.

ನಾವು ಆಚರಿಸುವ ಪ್ರಮುಖ ಹಬ್ಬಗಳಲ್ಲಿ ದೀಪಾವಳಿಯೂ ಒಂದು. ಇನ್ನೂ ಎರಡು ವರ್ಷದ ತುಂಬದ ನನ್ನ ಮಗಳಿಗೆ ಇದು ಎರಡನೇ ದೀಪಾವಳಿ ಹಬ್ಬ. ನಾವು ಹಿಂದೂ ಹಬ್ಬಗಳಾದ ನಾಗರ ಪಂಚಮಿ, ಗಣೇಶ ಚತುರ್ಥಿ, ನವರಾತ್ರಿ, ಇತ್ಯಾದಿಗಳನ್ನು ಆಚರಿಸಿದರೂ ಅವಳಿಗೆ ಯಾವ ಹಬ್ಬವೂ ದೀಪಾವಳಿಯಷ್ಟು ಸ್ಪೆಷಲ್ ಅನಿಸಿರಲಿಲ್ಲ. ವಿವಿಧ ತಿಂಡಿಗಳು, ಪೂಜೆ, ಸಂಜೆಯ ವೇಳೆ ಮನೆಯಲ್ಲಿ ಮೋಂಬತ್ತಿಗಳನ್ನು ಹಚ್ಚಿದ್ದು, ಇವೆಲ್ಲ ಅವಳಿಗೆ ಬಹಳ ಇಷ್ಟವಾಯಿತು. ಹಬ್ಬದ ಮರುದಿನ ನಾನು ಅವಳನ್ನು 'ಪುಟ್ಟಾ, ಹಬ್ಬ ಹೇಗಿತ್ತು?' ಎಂದು ಕೇಳಿದ್ದಕ್ಕೆ, 'ಅಮ್ಮಾ, ನಾವು ಇಂದೂ ಹಬ್ಬ ಮಾಡೋಣ' ಎಂದಳು ನನ್ನ ಮಗಳು! ಇನ್ನೊಂದು ದಿನ ಹಬ್ಬ ಮಾಡೋಣ ಎಂದು ಹೇಗೋ ಸಮಾಧಾನ ಮಾಡಿದ್ದಾಯಿತು ಅವಳನ್ನು.
ನನ್ನ ಅಮ್ಮನ ಮನೆಯಲ್ಲಿ ಸಾಮಾನ್ಯವಾಗಿ ದೀಪಾವಳಿ ಹಬ್ಬಕ್ಕೆ ಗೋಧಿಯ ಹಲ್ವಾ ತಯಾರಿಸುತ್ತಾರೆ. ಈ ಹಲ್ವಾ ಎಷ್ಟು ರುಚಿಯೋ ಹಾಗೇ ಅದನ್ನು ತಯಾರಿಸುವುದೂ ಬಹಳ ಕಷ್ಟದ ಕೆಲಸವೇ ಸರಿ! ಗೋಧಿ ಕಾಳುಗಳನ್ನು ಎರಡು ದಿನ ಮೊದಲೇ ನೆನೆಸಿಟ್ಟು ನಂತರ ಅದನ್ನು ನೀರು ಸೇರಿಸಿ ರುಬ್ಬಿ ಹಿಟ್ಟು ತಯಾರಿಸಿಕೊಳ್ಳುತ್ತಾರೆ. ಆ ಹಿಟ್ಟನ್ನು ಬಟ್ಟೆಯಲ್ಲಿ ಶೋಧಿಸಿ, ಸಿಗುವ ನುಣ್ಣಗಿನ ಹಿಟ್ಟನ್ನು ಬಾಣಲೆಯಲ್ಲಿ ಹಾಕಿಕೊಂಡು ತಾಸುಗಟ್ಟಲೆ ಒಲೆಯಮೇಲಿಟ್ಟು ಕೈಯಾಡಿಸುತ್ತ..ಅಬ್ಬ! ಹಲ್ವಾ ತಯಾರಾಗುವಷ್ಟರಲ್ಲಿ ತಯಾರಿಸುವವರು ಸುಸ್ತು!
ಇಷ್ಟೆಲ್ಲಾ ಕಷ್ಟವಿಲ್ಲದೆ ಮೈದಾ ಹಿಟ್ಟು ಬಳಸಿ ಅಂಥದೇ ರುಚಿಕರ ಹಲ್ವಾ ತಯಾರಿಸಬಹುದೆಂದು ಗೊತ್ತಾಗಿದ್ದು ನನ್ನ ಅಕ್ಕನಿಂದ. ಅಡುಗೆ ಪುಸ್ತಕವೊಂದರಲ್ಲಿ ಸಿಕ್ಕ ಮೈದಾ ಹಲ್ವಾ ರೆಸಿಪಿಯನ್ನು ನನ್ನ ಅಕ್ಕ ಟ್ರೈ ಮಾಡಿದಾಗ ಅದು ಎಷ್ಟು ಚೆನ್ನಾಗಿ ಬಂತೆಂದರೆ ಎಲ್ಲರೂ ಅದು ಗೋಧಿಯಿಂದ ತಯಾರಿಸಿದ್ದು ಎಂದೇ ಭಾವಿಸಿದ್ದರು! ಅಂದಿನಿಂದ ನಮ್ಮ ಮನೆಗಳಲ್ಲಿ ಈ ಹಲ್ವಾ ರೆಸಿಪಿ ಬಹಳ ಜನಪ್ರಿಯವಾಗಿದೆ.
ಈ ವರ್ಷ ದೀಪಾವಳಿ ಹಬ್ಬಕ್ಕೆ ನಾನು ಮೈದಾ ಹಲ್ವಾ ತಯಾರಿಸಿದ್ದೆ. ರುಚಿಯಾದ ಹಲ್ವಾವನ್ನು ಎಲ್ಲರೂ ಇಷ್ಟಪಟ್ಟು ತಿಂದೆವು. ತಯಾರಿಸಲು ಸ್ವಲ್ಪ ಶ್ರಮವೆನಿಸಿದರೂ ಇದರ ರುಚಿ ಮಾತ್ರ ಬೊಂಬಾಟ್!


ತಯಾರಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು
ಈ ಅಳತೆಯಿಂದ ಸುಮಾರು 33 ಹಲ್ವಾ ಪೀಸ್ ಗಳನ್ನು ತಯಾರಿಸಬಹುದು
ಡಿಫಿಕಲ್ಟಿ ಲೆವೆಲ್: ಕಷ್ಟಕರ

ಬೇಕಾಗುವ ಸಾಮಗ್ರಿಗಳು:
  • ಮೈದಾಹಿಟ್ಟು - 1 ದೊಡ್ಡ ಕಪ್
  • ಸಕ್ಕರೆ - 1 1/2 ಕಪ್
  • ಚಿಟಿಕೆ ಉಪ್ಪು
  • ನೀರು - 1 3/4 ಕಪ್
  • ತುಪ್ಪ - 1/2 ಕಪ್ ಅಥವಾ ಸ್ವಲ್ಪ ಜಾಸ್ತಿ
  • ಗೋಡಂಬಿ ಚೂರುಗಳು - 2 ಟೇಬಲ್ ಸ್ಪೂನ್
  • ಒಣದ್ರಾಕ್ಷಿ - 2 ರಿಂದ 3 ಟೇಬಲ್ ಸ್ಪೂನ್
  • ಕೇಸರಿ ದಳಗಳು - 1/2 ಟೀ ಸ್ಪೂನ್ (ಅಥವಾ 3/4 ಟೀ ಸ್ಪೂನ್ ಏಲಕ್ಕಿ ಪುಡಿ)


ತಯಾರಿಸುವ ವಿಧಾನ:
  • ಕೇಸರಿ ದಳಗಳನ್ನು 2 ಟೇಬಲ್ ಸ್ಪೂನ್ ನಷ್ಟು ಬಿಸಿನೀರಿನಲ್ಲಿ ನೆನೆಸಿಡಿ.
  • ಮೈದಾ ಹಿಟ್ಟಿಗೆ 1 1/4 ಕಪ್ ನಷ್ಟು ನೀರು ಸೇರಿಸಿ ಗಂಟಿಲ್ಲದಂತೆ ಕದಡಿ ದೋಸೆ ಹಿಟ್ಟಿನ ಹದಕ್ಕೆ ಹಿಟ್ಟನ್ನು ತಯಾರಿಸಿಕೊಳ್ಳಿ.
  • ಗೋಡಂಬಿ ಚೂರುಗಳು ಮತ್ತು ದ್ರಾಕ್ಷಿಯನ್ನು ತುಪ್ಪದಲ್ಲಿ ಹುರಿದಿಟ್ಟುಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಸಕ್ಕರೆ ಹಾಕಿ ಅದಕ್ಕೆ ಅರ್ಧ ಕಪ್ ನಷ್ಟು ನೀರು ಸೇರಿಸಿ ಕುದಿಯಲಿಡಿ.
  • ಸಕ್ಕರೆ ಎರಡೆಳೆ ಪಾಕ ಬಂದಾಗ ಇದಕ್ಕೆ ಮೈದಾ ಹಿಟ್ಟಿನ ಮಿಶ್ರಣ ಸೇರಿಸಿ, ಎರಡು ನಿಮಿಷ ಬಿಡದೆ ಕೈಯಾಡಿಸಿ.
  • ನಂತರ ಇದಕ್ಕೆ ಕೇಸರಿ ದಳಗಳು (ನೀರು ಸಹಿತ), ಉಪ್ಪು ಹಾಗೂ ತುಪ್ಪ ಸೇರಿಸಿ ಸಣ್ಣ ಉರಿಯಲ್ಲಿ ಬಿಡದೆ ಕೈಯಾಡಿಸುತ್ತಿರಿ.
  • ಹಲ್ವಾ ಮಿಶ್ರಣ ನಿಧಾನವಾಗಿ ದಪ್ಪಗಾದಂತೆ ಮಿಶ್ರಣ ಕೈಯಾಡಿಸುವುದು ಸ್ವಲ್ಪ ಕಷ್ಟವೆನಿಸುತ್ತದೆ. ಮಿಶ್ರಣ ಪಾತ್ರೆಯ ತಳ ಬಿಡತೊಡಗಿದಾಗ ಒಂದು ಸ್ಪೂನ್ ನಷ್ಟು ಹಲ್ವಾ ಮಿಶ್ರಣವನ್ನು ಹೊರಗೆ ತೆಗೆದು ತಣಿಸಿ, ಉಂಡೆ ಕಟ್ಟುವ ಹದಕ್ಕೆ ಬಂದಿದೆಯೋ ನೋಡಿ. 
  • ಉರಿಯಿಂದ ಮಿಶ್ರಣವನ್ನು ಇಳಿಸುವ ಮೊದಲು ಗೋಡಂಬಿ, ದ್ರಾಕ್ಷಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
  • ಹಲ್ವಾ ಮಿಶ್ರಣವನ್ನು ತುಪ್ಪ ಸವರಿದ ಪ್ಲೇಟ್ ನಲ್ಲಿ ಸಮತಟ್ಟಾಗಿ ಹರವಿ. ಹಲ್ವಾ ಪೂರ್ತಿ ತಣ್ಣಗಾದ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ.


ಟಿಪ್ಸ್:
  • ತುಪ್ಪವನ್ನು ಇಷ್ಟಪಡುವವರು ಇಲ್ಲಿ ಹೇಳಿದ ಅಳತೆಗಿಂತ ಸ್ವಲ್ಪ ಹೆಚ್ಚು ಬಳಸಬಹುದು. ಧಾರಾಳವಾಗಿ ತುಪ್ಪ ಬಳಸಿದರೆ ಹಲ್ವಾ ಇನ್ನೂ ರುಚಿಯಾಗಿರುತ್ತದೆ. 
  • ಹಲ್ವಾವನ್ನು ಫ್ರಿಜ್ ನಲ್ಲಿಟ್ಟು ಬಳಸಿದರೆ ರುಚಿ ಬದಲಾಗುತ್ತದೆ. ಸಾಧ್ಯವಾದಷ್ಟು ಫ್ರಿಜ್ ನಲ್ಲಿಡದೆ ಹಾಗೇ ಬಳಸಿದರೆ ಉತ್ತಮ.

Friday, 7 November 2014

ರಾಗಿ ಮಾಲ್ಟ್ | ರಾಗಿ ಸರಿ | ಬೇಬಿ ಫುಡ್ | Ragi Malt | Ragi Sari | Mixed Grains Powder for Kids | Baby Food Recipes

Click here for English version.

ಪುಟ್ಟ ಕಂದಮ್ಮಗಳಿಗೆ ಸಾಮಾನ್ಯವಾಗಿ 6ನೇ ತಿಂಗಳಿನ ನಂತರ ಹಣ್ಣು, ಸೆರಿಲಾಕ್ ಇತ್ಯಾದಿ ಆಹಾರಗಳನ್ನು ಸ್ವಲ್ಪ ಸ್ವಲ್ಪವಾಗಿ ಅಭ್ಯಾಸ ಮಾಡಿಸಲಾಗುತ್ತದೆ. ಇನ್ನೂ ಹಲ್ಲು ಬಂದಿರದ ಕಾರಣ ಅವರಿಗೆ ಸುಲಭದಲ್ಲಿ ಜೀರ್ಣವಾಗುವ, ಜೊತೆಗೇ ಒಳ್ಳೆಯ ಪೌಷ್ಟಿಕಾಂಶವುಳ್ಳ ಆಹಾರ ಬೇಕು. ಬೇಯಿಸಿದ ಹಾಗೂ ಮ್ಯಾಶ್ ಮಾಡಿದ ಹಣ್ಣುಗಳು, ರಾಗಿ ಮಾಲ್ಟ್, ತಾಜಾ ಹಣ್ಣಿನ ಜ್ಯೂಸ್, ಓಟ್ಸ್ ಗಂಜಿ, ಇವೆಲ್ಲ ಮಕ್ಕಳಿಗೆ ಸಾಮಾನ್ಯವಾಗಿ ಇಷ್ಟವಾಗುತ್ತವೆ. 
ಪುಟ್ಟ ಮಕ್ಕಳ ಆಹಾರದ ಬಗ್ಗೆ ನಾನು ಬೇರೆಯಬೇಕೆಂದು ಎಷ್ಟೋ ದಿನಗಳಿಂದ ಅಂದುಕೊಂಡಿದ್ದರೂ ಬರೆಯಲು ಸಾಧ್ಯವಾಗಿರಲಿಲ್ಲ. ಕಂದಮ್ಮಗಳ ಆರೋಗ್ಯ ಹಾಗೂ ಬೆಳವಣಿಗೆಗೆ ಸರಿಹೊಂದುವಂತೆ ಅವರ ಆಹಾರಕ್ರಮ ಇರಬೇಕಾಗುತ್ತದೆ. ನಾನು ಮಗಳಿಗೆ ರಾಗಿ ಸರಿ ತಯಾರಿಸುವಾಗ ಅನ್ನಿಸಿತು, ಇದನ್ನು ಬ್ಲಾಗ್ ನಲ್ಲಿ ಬರೆದರೆ ಅನೇಕ ಅಮ್ಮಂದಿರಿಗೆ ಉಪಯೋಗವಾದೀತೆಂದು.. ಹೀಗಾಗಿ ಈ ಪೋಸ್ಟ್!
ಈ ರಾಗಿ ಸರಿ / ಮಾಲ್ಟ್ ನ್ನು ನನ್ನ ಮಗಳಿಗೆ ಅವಳ 10ನೇ ತಿಂಗಳಿನಿಂದ ಕೊಡುತ್ತ ಬಂದಿದ್ದೇನೆ. ವಿವಿಧ ಧಾನ್ಯಗಳನ್ನು ಬಳಸಿ ತಯಾರಿಸುವ ಈ ರಾಗಿ ಮಾಲ್ಟ್ ಮಕ್ಕಳಿಗಷ್ಟೇ ಅಲ್ಲ, ದೊಡ್ಡವರಿಗೂ ಒಳ್ಳೆಯದು. ಈ ಮಾಲ್ಟ್ ಪೌಡರ್ ನ್ನು ದೊಡ್ಡ ಪ್ರಮಾಣದಲ್ಲಿ ತಯಾರಿಸಿ 4 - 5 ತಿಂಗಳುಗಳ ತನಕ ಇಟ್ಟುಕೊಂಡು ಬಳಸಬಹುದು. ಪುಟ್ಟ ಕಂದಮ್ಮಗಳಿಗೆ ತಯಾರಿಸುವುದಾದರೆ ಕಡಿಮೆ ಪ್ರಮಾಣದಲ್ಲಿ ತಯಾರಿಸಿಕೊಳ್ಳುವುದು ಒಳ್ಳೆಯದು. ರಾಗಿ ಸರಿ ಪೌಡರ್ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಅವಧಿ: 8 - 10 ದಿನಗಳು 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 
ಈ ಅಳತೆಯಿಂದ ಸುಮಾರು 2.5 kg ಯಷ್ಟು ಮಾಲ್ಟ್ ಪೌಡರ್ ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:
  • ರಾಗಿ ಕಾಳು - 1/2 kg
  • ಕುಚ್ಚಲಕ್ಕಿ - 1/4 kg
  • ಗೋಧಿ - 1/4 kg
  • ಹೆಸರುಕಾಳು - 125 gm
  • ಬಾದಾಮಿ - 125 gm
  • ಬಾರ್ಲಿ - 125 gm
  • ಜೋಳ - 125 gm
  • ಶೇಂಗಾ - 125 gm
  • ಲವಂಗ - 15 ಮೊಗ್ಗುಗಳು 
  • ಒಂದೆಲಗ (ಬೇಕಿದ್ದರೆ) - 15 ರಿಂದ 20

ತಯಾರಿಸುವ ವಿಧಾನ:
  • ರಾಗಿ, ಗೋಧಿ, ಹೆಸರುಕಾಳು ಇಷ್ಟನ್ನೂ ಬೇರೆಬೇರೆಯಾಗಿ ತೊಳೆದು ಒಂದು ದಿನ ನೀರಿನಲ್ಲಿ ನೆನೆಸಿಡಿ. ಮರುದಿನ ಚೆನ್ನಾಗಿ ತೊಳೆದು ನೀರನ್ನೆಲ್ಲ ಬಸಿದು, ಒದ್ದೆ ಬಟ್ಟೆಯಲ್ಲಿ ಕಟ್ಟಿ ಒಂದು ಪಾತ್ರೆಯಲ್ಲಿ ಇಡಿ. 1 - 2 ದಿನ ಇದನ್ನು ಹಾಗೇ ಇಟ್ಟು ಚೆನ್ನಾಗಿ ಮೊಳಕೆ ಬಂದ ನಂತರ ಬಿಸಿಲಿನಲ್ಲಿ ಬಟ್ಟೆ ಮುಚ್ಚಿ ಒಣಗಿಸಿ. 
  • ಅಕ್ಕಿ, ಬಾದಾಮಿ, ಬಾರ್ಲಿ, ಜೋಳ, ಶೇಂಗಾ ಇಷ್ಟನ್ನೂ ಬೇರೆಬೇರೆಯಾಗಿ ತೊಳೆದು ಬಿಸಿಲಿನಲ್ಲಿ ಬಟ್ಟೆ ಮುಚ್ಚಿಟ್ಟು ಒಣಗಿಸಿ.
  • ಇವೆಲ್ಲ ಧಾನ್ಯಗಳು ಚೆನ್ನಾಗಿ ಒಣಗಲು ಕನಿಷ್ಟ 3 - 4 ದಿನಗಳಾದರೂ ಬೇಕು.
  • ಒಂದೆಲಗವನ್ನು ಬೇರು ಸಹಿತ ಚೆನ್ನಾಗಿ ತೊಳೆದು ಬಿಸಿಲಿನಲ್ಲಿ ಚೆನ್ನಾಗಿ ಒಣಗಿಸಿ.
  • ಚೆನ್ನಾಗಿ ಒಣಗಿದ ಒಂದೊಂದೇ ಬಗೆಯ ಧಾನ್ಯಗಳನ್ನು ಒಂದು ದಪ್ಪ ತಳದ ಬಾಣಲೆಯಲ್ಲಿ ಹಾಕಿಕೊಂಡು ಸಣ್ಣ ಉರಿಯಲ್ಲಿ ಪರಿಮಳ ಬರುವತನಕ ಹುರಿಯಿರಿ. ಲವಂಗವನ್ನೂ ಒಂದೆರಡು ನಿಮಿಷ ಹುರಿದುಕೊಳ್ಳಿ. 
  • ತಣ್ಣಗಾದ ನಂತರ ಎಲ್ಲ ಸಾಮಗ್ರಿಗಳನ್ನೂ ಮಿಕ್ಸ್ ಮಾಡಿ. ಒಂದೆಲಗವನ್ನೂ ಇದರೊಡನೆ ಸೇರಿಸಿ. 
  • ಸಾಮಗ್ರಿಗಳನ್ನು ಗಿರಣಿಯಲ್ಲಿ ಕೊಟ್ಟು ಹಿಟ್ಟು ತಯಾರಿಸಿ ಇಲ್ಲವೇ ಮನೆಯಲ್ಲೇ ಮಿಕ್ಸಿಯಲ್ಲಿ ಪುಡಿಮಾಡಿ. ಮಿಕ್ಸಿಯಲ್ಲಿ ಪುಡಿಮಾಡಿದರೆ ಹಿಟ್ಟು ಸ್ವಲ್ಪ ತರಿತರಿಯಾಗಿರುತ್ತದೆ. 
  • ತಯಾರಾದ ಮಾಲ್ಟ್ ಪೌಡರ್ ನ್ನು ತಣ್ಣಗಾದ ನಂತರ ಗಾಳಿಯಾಡದ ಡಬ್ಬದಲ್ಲಿ ತುಂಬಿಟ್ಟು ಸ್ವಲ್ಪ ಸ್ವಲ್ಪವೇ ಹಿಟ್ಟನ್ನು ಹೊರಗೆ ತೆಗೆದಿಟ್ಟುಕೊಂಡು ಬಳಸಿ. 


ಮಾಲ್ಟ್ ತಯಾರಿಸುವ ವಿಧಾನ: 1 1/2 ಟೇಬಲ್ ಸ್ಪೂನ್ ಅಥವಾ ಅಗತ್ಯವಿರುವಷ್ಟು ಮಾಲ್ಟ್ ಪೌಡರ್ ನ್ನು ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಇದಕ್ಕೆ 3 ಟೇಬಲ್ ಸ್ಪೂನ್ ನಷ್ಟು ನೀರು ಸೇರಿಸಿ ಮಿಕ್ಸ್ ಮಾಡಿ. ಇದಕ್ಕೆ ಒಂದರಿಂದ ಒಂದೂವರೆ ಕಪ್ ನಷ್ಟು ಹಾಲು, ಕಾಲು ಚಮಚ ತುಪ್ಪ (ಬೇಕಿದ್ದರೆ) ಸೇರಿಸಿ ಆಗಾಗ್ಗೆ ಕೈಯಾಡಿಸುತ್ತ ಬಿಸಿಮಾಡಿ. ರುಚಿಗೆ ತಕ್ಕಷ್ಟು ಸಕ್ಕರೆ ಅಥವಾ ಬೆಲ್ಲ ಸೇರಿಸಿ. ಮಿಶ್ರಣ ಕುದಿಯತೊಡಗಿದಾಗ ಉರಿ ಆಫ್ ಮಾಡಿ. ತಣ್ಣಗಾದ ನಂತರ ಕುಡಿಯಲು ಕೊಡಿ.

ಟಿಪ್ಸ್:
  • ಮಾಲ್ಟ್ ಪುಡಿ ತಯಾರಿಸುವಾಗ ಸ್ವಲ್ಪ ಏಲಕ್ಕಿ ಸೇರಿಸಿದರೆ ಮಾಲ್ಟ್ ಸುವಾಸಿತವಾಗಿ ಕುಡಿಯಲು ಚೆನ್ನಾಗಿರುತ್ತದೆ. ಅಥವಾ ಸ್ವಲ್ಪ ಕೇಸರಿ ದಳಗಳನ್ನು ಬೇಕಿದ್ದರೂ ಸೇರಿಸಬಹುದು. 
  • ಇಡೀ ರಾಗಿ ಸಿಗದಿದ್ದರೆ ಅಂಗಡಿಯಲ್ಲಿ ಸಿಗುವ ರಾಗಿ ಹಿಟ್ಟನ್ನು ಬಳಸಬಹುದು. 
  • ಹೆಸರುಕಾಳು ಮತ್ತು ಗೋಧಿಯನ್ನು ಮೊಳಕೆ ಬರಿಸದೆ ಹಾಗೇ ಒಣಗಿಸಿಯೂ ಬಳಸಬಹುದು.

Wednesday, 29 October 2014

ಹಸಿರು ಬೀನ್ಸ್ ಪಲ್ಯ | Green Beans Palya | Green Beans Poriyal | French Beans Stir Fry

Click here for English version. 

ಹಸಿರು ಬೀನ್ಸ್, ಟೊಮೆಟೋ ಇತ್ಯಾದಿ ತರಕಾರಿಗಳು ಅಡುಗೆ ಮನೆಯಲ್ಲಿ ಇಲ್ಲದಿದ್ದರೆ ಎಷ್ಟೋ ಬಾರಿ ಅಡುಗೆ ಮಾಡುವುದು ಕಷ್ಟವೆನಿಸಿಬಿಡುತ್ತದೆ. ಮಾರ್ಕೆಟ್ ನಲ್ಲಿ ಯಾವಾಗಲೂ ಸಿಗುವ ಈ ತರಕಾರಿಗಳು ಸಾಂಬಾರ್, ಪಲ್ಯ, ರೈಸ್ ಐಟಂ ಮುಂತಾದ ಅಡುಗೆಗಳಿಗೆ ಬೇಕೇ ಬೇಕು. 
ಹಸಿರು ಬೀನ್ಸ್ ಬಳಸಿ ನಾನು ಸಾಮಾನ್ಯವಾಗಿ ತಯಾರಿಸುವ ಅಡುಗೆಗಳೆಂದರೆ ಸಾಂಬಾರ್, ಪಲ್ಯ, ಪಲಾವ್, ಹಶಿ ಇತ್ಯಾದಿ.
ನನ್ನ ಮಗಳಿಗೆ ಗ್ರೀನ್ ಬೀನ್ಸ್ ಎಂದರೆ ತುಂಬ ಇಷ್ಟ. ಹಸಿಯಾಗಿಯೇ ಬೀನ್ಸ್ ತಿನ್ನುವ ಅವಳು ಇದನ್ನು ಬಳಸಿ ಅಡುಗೆ ಮಾಡಿದರೆ ಖುಷಿಯಿಂದ ಊಟ ಮಾಡುತ್ತಾಳೆ. ಹೀಗಾಗಿ ನಮ್ಮ ಮನೆಯಲ್ಲಿ ತರಕಾರಿ ತರಲು ಹೋದೆವೆಂದರೆ ಹಸಿರು ಬೀನ್ಸ್ ತರಲೇಬೇಕು!
ಹಸಿರು ಬೀನ್ಸ್ ಪಲ್ಯ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು: 
  • ಹಸಿರು ಬೀನ್ಸ್ - 300 ಗ್ರಾಂ
  • ಒಣಮೆಣಸು - ಒಂದು ಮೆಣಸಿನ ಅರ್ಧಭಾಗ 
  • ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ)
  • ಉದ್ದಿನಬೇಳೆ - 1 ಟೀ ಸ್ಪೂನ್
  • ಸಾಸಿವೆ - 1/2 ಟೀ ಸ್ಪೂನ್
  • ಇಂಗು - ಚಿಟಿಕೆ
  • ಅರಿಶಿನ - 1/4 ಟೀ ಸ್ಪೂನ್
  • ಕರಿಬೇವು - 8,10 ಎಲೆಗಳು
  • ಉಪ್ಪು - ರುಚಿಗೆ ತಕ್ಕಷ್ಟು
  • ಆಮ್ ಚೂರ್ ಪೌಡರ್ - 1/2 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು
  • ಸಕ್ಕರೆ - 3/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು
  • ಎಣ್ಣೆ - 2 ಟೇಬಲ್ ಸ್ಪೂನ್
  • ತೆಂಗಿನತುರಿ (ಬೇಕಿದ್ದರೆ) - 2 ಅಥವಾ 3 ಟೇಬಲ್ ಸ್ಪೂನ್
  • ನೀರು - 1/2 ಕಪ್ ಅಥವಾ ಜಾಸ್ತಿ


ತಯಾರಿಸುವ ವಿಧಾನ:
  • ಹಸಿರು ಬೀನ್ಸ್ ನ್ನು ಸ್ವಚ್ಛಗೊಳಿಸಿ ಆದಷ್ಟು ತೆಳ್ಳಗೆ ಹೆಚ್ಚಿಕೊಳ್ಳಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ ಬಿಸಿಯಾದ ನಂತರ ಅದಕ್ಕೆ ಒಣಮೆಣಸಿನ ಚೂರುಗಳು, ಉದ್ದಿನಬೇಳೆ, ಸಾಸಿವೆ, ಇಂಗು, ಅರಿಶಿನ ಹಾಕಿ ಚಟಪಟ ಎಂದ ನಂತರ ಕರಿಬೇವಿನ ಎಲೆಗಳು ಮತ್ತು ಹೆಚ್ಚಿದ ಹಸಿಮೆಣಸು ಸೇರಿಸಿ ಒಂದು ನಿಮಿಷ ಕೈಯಾಡಿಸಿ.
  • ನಂತರ ಇದಕ್ಕೆ ಸಣ್ಣಗೆ ಹೆಚ್ಚಿದ ಹಸಿರು ಬೀನ್ಸ್ ಸೇರಿಸಿ ಕೈಯಾಡಿಸಿ. ಇದಕ್ಕೆ ಬೇಯಲು ಬೇಕಾಗುವಷ್ಟು ನೀರು ಸೇರಿಸಿ ಮುಚ್ಚಳ ಮುಚ್ಚಿ ಬೇಯಿಸಿ. ಬೀನ್ಸ್ ಇನ್ನೂ ಬೆಳೆದಿಲ್ಲವಾದರೆ ಬೇಯಿಸಲು ಕಡಿಮೆ ನೀರು ಸಾಕು. ಚೆನ್ನಾಗಿ ಬೆಳೆದ ಬೀನ್ಸ್ ಆದರೆ ಬೇಯಿಸಲು ಹೆಚ್ಚು ನೀರು ಬೇಕಾಗುತ್ತದೆ. 
  • ಪಲ್ಯದ ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತಿರಿ. ಮಿಶ್ರಣ ಅರ್ಧ ಬೆಂದ ನಂತರ ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, ಆಮ್ ಚೂರ್ ಪೌಡರ್ ಸೇರಿಸಿ.
  • ಹಸಿರು ಬೀನ್ಸ್ ಎಳೆಯದಾಗಿದ್ದರೆ 10 - 12 ನಿಮಿಷಗಳಲ್ಲಿ ಬೆಂದುಬಿಡುತ್ತದೆ. ಬೆಳೆದ ಬೀನ್ಸ್ ಆದರೆ ಪಲ್ಯ ಬೇಯಲು ಸ್ವಲ್ಪ ಜಾಸ್ತಿ ಸಮಯ ಬೇಕು. 
  • ಪಲ್ಯ ಪೂರ್ತಿ ಬೆಂದ ನಂತರ ಇದಕ್ಕೆ ತೆಂಗಿನತುರಿ ಸೇರಿಸಿ ಇನ್ನೂ 5 ನಿಮಿಷ ಬೇಯಿಸಿ ಉರಿ ಆಫ್ ಮಾಡಿ. 
  • ಈ ಪಲ್ಯ ಅನ್ನ, ರೊಟ್ಟಿ ಅಥವಾ ದೋಸೆಯೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ. 

Saturday, 11 October 2014

ಬ್ರೋಕ್ಲಿ ಫ್ರೈ | ಬ್ರೋಕ್ಲಿ ಪಲ್ಯ | Broccoli Stir Fry | Broccoli Palya

Click here for English version.

ಬ್ರೋಕ್ಲಿ - ಇದು ಹೂಕೋಸಿನಂತೆಯೇ ಇರುವ ಹಸಿರು ಬಣ್ಣದ ತರಕಾರಿ. ವಿಕಿಪೀಡಿಯಾದಲ್ಲಿ ಹೇಳುವಂತೆ, ವಿಟಾಮಿನ್ 'ಸಿ' ಹಾಗೂ ಡಯೆಟರಿ ಫೈಬರ್ ನ ಆಗರವಾಗಿರುವ ಈ ತರಕಾರಿ ಕ್ಯಾನ್ಸರ್ ತಡೆಯುವ ಗುಣಗಳನ್ನೂ ಹೊಂದಿದೆ. ಇಷ್ಟೆಲ್ಲ ಒಳ್ಳೆಯ ಅಂಶಗಳನ್ನು ಹೊಂದಿರುವ ಈ ತರಕಾರಿಯನ್ನು ಅನೇಕ ಬಗೆಯ ಅಡುಗೆಗಳಲ್ಲಿ ಬಳಸುವುದನ್ನು ಇತ್ತೀಚೆಗೆ ಅಭ್ಯಾಸ ಮಾಡಿಕೊಂಡಿದ್ದೇನೆ. 
ಸುಲಭದಲ್ಲಿ ತಯಾರಿಸಬಹುದಾದ ಬ್ರೋಕ್ಲಿ ಅಡಿಗೆ ವೆರೈಟಿಗಳಲ್ಲಿ ಬ್ರೋಕ್ಲಿ ಫ್ರೈ / ಪಲ್ಯವೂ ಒಂದು. ಅನೇಕ ದಿನಗಳಿಂದ ಈ ಫ್ರೈ ತಯಾರಿಸಿದಾಗ ಫೊಟೋ ಕ್ಲಿಕ್ಕಿಸಬೇಕೆಂದುಕೊಂಡಿದ್ದರೂ ಸಾಧ್ಯವಾಗಿರಲಿಲ್ಲ. ನಾನು ಫೊಟೋ ತೆಗೆಯಲೆಂದು ಏನಾದರೂ ಅಡಿಗೆ / ತಿಂಡಿಯನ್ನು ರೆಡಿಮಾಡಿಟ್ಟ ತಕ್ಷಣ ನನ್ನ ಪುಟ್ಟ ಮಗಳು ಅವಳ ಕೆಲಸಗಳನ್ನೆಲ್ಲ ಬದಿಗೊತ್ತಿ, ನನಗೆ ಸಹಾಯ(!) ಮಾಡಲು ಬಂದುಬಿಡುತ್ತಾಳೆ. ಅವಳನ್ನು ಕನ್ವಿನ್ಸ್ ಮಾಡಿ ಅಡಿಗೆಯ ಫೊಟೋ ತೆಗೆಯುವಷ್ಟರಲ್ಲಿ ನಾನು ಸುಸ್ತು! ಅಂತೂ ಹಿಂದಿನ ವೀಕೆಂಡ್ ಗೆ ಮಗಳು ಅಪ್ಪನ ಜತೆ ಆಟದಲ್ಲಿ ಬ್ಯುಸಿಯಾಗಿರುವ ಸಮಯದಲ್ಲಿ ಬ್ರೋಕ್ಲಿ ಫ್ರೈ ಫೊಟೋ ಕ್ಲಿಕ್ಕಿಸಿದ್ದಾಯಿತು!
ಬ್ರೋಕ್ಲಿಯಿಂದ ತಯಾರಿಸಬಹುದಾದ ಇನ್ನೂ ಅನೇಕ ಅಡಿಗೆಗಳನ್ನು ಬರೆಯಲಿಕ್ಕಿದೆ.. ಸದ್ಯಕ್ಕೆ ಸಿಂಪಲ್ಲಾದ ಹಾಗೂ ಬೇಗ ತಯಾರಿಸಬಹುದಾದ ಬ್ರೋಕ್ಲಿ ಫ್ರೈ ಅಥವಾ ಬ್ರೋಕ್ಲಿ ಪಲ್ಯದ ರೆಸಿಪಿಯನ್ನು ನಿಮ್ಮ ಮುಂದಿಡುತ್ತಿದ್ದೇನೆ, ಇಷ್ಟವಾಗುವುದೋ ನೋಡಿ!


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು 
ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಸುಲಭ 

ಬೇಕಾಗುವ ಸಾಮಗ್ರಿಗಳು:
  • ಮೀಡಿಯಮ್ ಸೈಜಿಗೆ ಕಟ್ ಮಾಡಿದ ಬ್ರೋಕ್ಲಿ ಚೂರುಗಳು - 3 ಕಪ್ 
  • ಈರುಳ್ಳಿ - 1 ಚಿಕ್ಕದು
  • ಜಜ್ಜಿದ ಶುಂಠಿ, ಬೆಳ್ಳುಳ್ಳಿ - 1/2 ಟೀ ಚಮಚ 
  • ಅಚ್ಚಮೆಣಸಿನಪುಡಿ - 1 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು 
  • ಅರಿಶಿನ - 1/2 ಟೀ ಚಮಚ
  • ರುಚಿಗೆ ಉಪ್ಪು
  • ಎಣ್ಣೆ - 1 ಟೇಬಲ್ ಚಮಚ


ತಯಾರಿಸುವ ವಿಧಾನ: 
  • ಈರುಳ್ಳಿಯನ್ನು ಮೀಡಿಯಂ ಸೈಜಿನ ಚೂರುಗಳಾಗಿ ಹೆಚ್ಚಿಕೊಳ್ಳಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿಕೊಂಡು ಅದಕ್ಕೆ ಜಜ್ಜಿದ ಶುಂಠಿ - ಬೆಳ್ಳುಳ್ಳಿ ಸೇರಿಸಿ ಸ್ವಲ್ಪ ಕೆಂಪಗೆ ಹುರಿಯಿರಿ. 
  • ಇದಕ್ಕೆ ಹೆಚ್ಚಿದ ಈರುಳ್ಳಿ ಸೇರಿಸಿ, ಈರುಳ್ಳಿಯ ಬಣ್ಣ ಬದಲಾಗುವವರೆಗೆ ಹುರಿಯಿರಿ. 
  • ನಂತರ ಇದಕ್ಕೆ ಬ್ರೋಕ್ಲಿ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಮುಚ್ಚಳ ಮುಚ್ಚಿ ಬೇಯಿಸಿ. 
  • ಬ್ರೋಕ್ಲಿ ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತಿರಿ. ಬ್ರೋಕ್ಲಿ ಮುಕ್ಕಾಲು ಭಾಗ ಬೆಂದಾಗ ಇದಕ್ಕೆ ಅಚ್ಚಮೆಣಸಿನಪುಡಿ, ಅರಿಶಿನ ಪುಡಿ ಸೇರಿಸಿ ಕೈಯಾಡಿಸಿ 2 - 3 ನಿಮಿಷ ಬೇಯಿಸಿ ಉರಿ ಆಫ್ ಮಾಡಿ. 
  • ಬಿಸಿ ಬಿಸಿ ಬ್ರೋಕ್ಲಿ ಫ್ರೈ ನ್ನು ಊಟದೊಡನೆ ಸರ್ವ್ ಮಾಡಿ ಅಥವಾ ಹಾಗೆಯೇ ಬೇಕಿದ್ದರೂ ತಿನ್ನಬಹುದು. 

Sunday, 21 September 2014

ಕರಬೂಜ ಹಣ್ಣಿನ ಪಾಯಸ | Muskmelon Payasa | Cantaloupe Kheer | Karabooja Hannina Payasa

Click here for English version.

ಕರಬೂಜ ಹಣ್ಣು ಎಂದ ತಕ್ಷಣ ನನಗೆ ನೆನಪಾಗುವುದು ಡಯೆಟ್. ನಾವು ಡಯೆಟ್ ಪ್ರಿಯರಲ್ಲ, ಆದರೆ ಕರಬೂಜ ಹಣ್ಣು ನಮಗೆ ಪ್ರಿಯ! ಸೆಖೆಯ ದಿನಗಳಲ್ಲಿ ಈ ಹಣ್ಣಿನ ಬಳಕೆ ಎಲ್ಲರಿಗೂ ಬಹಳ ಒಳ್ಳೆಯದು. ನಾನು ಕೇಳಿದಂತೆ, ಕರಬೂಜ ಹಣ್ಣು ವಿಟಾಮಿನ್ 'ಎ' ಮತ್ತು 'ಸಿ', ಫೋಲಿಕ್ ಆಸಿಡ್, ಪೊಟಾಷಿಯಂ ಮುಂತಾದ ಅಗತ್ಯ ಖನಿಜಾಂಶಗಳ ಆಗರ. ನಮ್ಮ ದೇಹದಲ್ಲಿ ನೀರಿನಂಶ ಕಾಯ್ದುಕೊಳ್ಳುವುದಕ್ಕೂ ಇದು ಸಹಕಾರಿ. ಕರಬೂಜ ಹಣ್ಣನ್ನು ಕತ್ತರಿಸಿಕೊಂಡು ಹಾಗೆಯೇ ತಿಂದರೂ ಚೆನ್ನಾಗಿರುತ್ತದೆ ಅಥವಾ ಪಾಯಸ, ಜ್ಯೂಸ್ ಮಾಡಿಕೊಂಡೂ ಸವಿಯಬಹುದು. 
ಕರಬೂಜ ಹಣ್ಣಿನ ಪಾಯಸ ತಯಾರಿಸುವ ವಿಧಾನ ಇಲ್ಲಿದೆ. ರುಚಿಕರವಾದ ಈ ಪಾಯಸ ತಯಾರಿಸಲು ಹೆಚ್ಚಿನ ಶ್ರಮವೇನೂ ಬೇಕಿಲ್ಲ. ಈ ಪಾಯಸವನ್ನು ತಯಾರಿಸಿದ ತಕ್ಷಣವೇ ಸವಿಯಬಹುದು.. ಫ್ರಿಜ್ ನಲ್ಲಿಟ್ಟು ತಣ್ಣಗಾದ ನಂತರ ಕುಡಿದರೆ ಇನ್ನೂ ಹೆಚ್ಚು ರುಚಿ!


ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು
ಫ್ರಿಜ್ ನಲ್ಲಿ ಇಡಬೇಕಾದ ಸಮಯ: 1 ಘಂಟೆ
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಸುಲಭ

ಬೇಕಾಗುವ ಸಾಮಗ್ರಿಗಳು: 
  • ಕರಬೂಜ ಹಣ್ಣು - ಮೀಡಿಯಂ ಸೈಜ್ ಹಣ್ಣಿನ ಕಾಲು ಭಾಗ 
  • ಕುದಿಸಿ ಆರಿಸಿದ ಹಾಲು - 2 ಕಪ್ 
  • ಸಕ್ಕರೆ - 1/2 ಕಪ್ ಅಥವಾ ಸಿಹಿಯಾಗುವಷ್ಟು 
  • ಉಪ್ಪು - ಚಿಟಿಕೆ 
  • ಏಲಕ್ಕಿ ಪುಡಿ - 1/2 ಟೀ ಚಮಚ

ತಯಾರಿಸುವ ವಿಧಾನ:
  • ಕರಬೂಜ ಹಣ್ಣಿನ ಸಿಪ್ಪೆ ಮತ್ತು ಬೀಜವನ್ನು ತೆಗೆದು, ಉಳಿದ ಭಾಗವನ್ನು ತುರಿಯುವ ಮಣೆಯಲ್ಲಿ ತುರಿದುಕೊಳ್ಳಿ.
  • ಇದಕ್ಕೆ ಹಾಲು, ಸಕ್ಕರೆ, ಚಿಟಿಕೆ ಉಪ್ಪು ಮತ್ತು ಏಲಕ್ಕಿ ಪುಡಿ ಸೇರಿಸಿ ಮಿಕ್ಸ್ ಮಾಡಿ. 
  • ತಯಾರಾದ ಪಾಯಸವನ್ನು ಹಾಗೆಯೇ ಸವಿಯಬಹುದು ಇಲ್ಲವೇ ಫ್ರಿಜ್ ನಲ್ಲಿಟ್ಟು ತಣ್ಣಗಾದ ನಂತರ ಸರ್ವ್ ಮಾಡಬಹುದು.


ಟಿಪ್ಸ್:
  • ಬೆಲ್ಲ ಇಷ್ಟಪಡುವವರು ಈ ಪಾಯಸಕ್ಕೆ ಸಕ್ಕರೆಯ ಬದಲು ಬೆಲ್ಲ ಬಳಸಬಹುದು. 
  • ಅರ್ಜೆಂಟ್ ಆಗಿ ತಣ್ಣಗಿನ ಪಾಯಸ ತಯಾರಿಸಬೇಕೆಂದರೆ ಹಾಲನ್ನು ಮೊದಲೇ ಫ್ರಿಜ್ ನಲ್ಲಿಟ್ಟು ತಣ್ಣಗೆ ಮಾಡಿಕೊಂಡು ಪಾಯಸಕ್ಕೆ ಬಳಸಿ.

Tuesday, 26 August 2014

ಮೋದಕ । Modak

Click here for English version.

ಗಣೇಶ ಚತುರ್ಥಿಯ ಸ್ಪೆಷಲ್ ತಿಂಡಿಗಳಲ್ಲಿ ಮೋದಕವೂ ಒಂದು. ಮೋದಕ ಹಾಗೂ ಪಂಚಕಜ್ಜಾಯ ಇವೆರಡೂ ಗಣಪತಿಗೆ ಅತ್ಯಂತ ಪ್ರಿಯವಾದ ತಿನಿಸುಗಳೆಂದು ಹಿರಿಯರು ಹೇಳುತ್ತಾರೆ. ಈ ಮಾತು ಎಷ್ಟರ ಮಟ್ಟಿಗೆ ಸತ್ಯವೋ ಗೊತ್ತಿಲ್ಲ, ಆದರೆ ಹಬ್ಬದಲ್ಲಿ ತಯಾರಿಸುವ ಎಲ್ಲ ತಿಂಡಿಗಳೂ ನಮ್ಮ ನಾಲಿಗೆಗೆ ರುಚಿಕರವಂತೂ ಹೌದು! 
ಚೌತಿ ಹಬ್ಬದ ತಯಾರಿ ನಮ್ಮ ಮನೆಯಲ್ಲಿ ಈಗಾಗಲೇ ಶುರುವಾಗಿದೆ. ನಾನು ಯಾವಾಗಲೂ ಮೋದಕ ತಯಾರಿಸುವಾಗ ಹೊದಿಕೆಗೆ ಅಕ್ಕಿಹಿಟ್ಟನ್ನು ಬಳಸುತ್ತಿದ್ದೆ. ಈ ಬಾರಿ ನನ್ನ ಅಕ್ಕ ಹೇಳಿದಂತೆ ಅಕ್ಕಿ ಹಿಟ್ಟಿನ ಬದಲು ಮೈದಾ ಹಿಟ್ಟನ್ನು ಬಳಸಿದೆ. ಗರಿಗರಿಯಾದ ಮೇಲು ಹೊದಿಕೆಯ ಸಿಹಿಯಾದ ಮೋದಕ ನಮಗೆಲ್ಲ ತುಂಬ ಇಷ್ಟವಾಯಿತು. ರುಚಿಕರವಾದ ಈ ಮೋದಕವನ್ನು ಹಬ್ಬಕ್ಕೆ ನೀವೂ ತಯಾರಿಸಿ ನೋಡಿ! 


ತಯಾರಿಸಲು ಬೇಕಾಗುವ ಸಮಯ: 1 1/2 ಘಂಟೆ 
ಡಿಫಿಕಲ್ಟಿ ಲೆವೆಲ್: ಕಷ್ಟಕರ 
ಈ ಅಳತೆಯಿಂದ 30 ಮೋದಕಗಳನ್ನು ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:
  • ಕರಿಯಲು ಎಣ್ಣೆ 
- ಸ್ಟಫಿಂಗ್ ಗೆ:
  • ಸಕ್ಕರೆ - 1 1/2 ಕಪ್ (ಅಥವಾ ಸಿಹಿಯಾಗುವಷ್ಟು)
  • ಬೆಲ್ಲ (ಬೇಕಿದ್ದರೆ) - 1 ಟೇಬಲ್ ಚಮಚ
  • ಕೊಬ್ಬರಿತುರಿ / ತೆಂಗಿನತುರಿ - 3 ಕಪ್ 
  • ನೀರು - 1 ಕಪ್ 
  • ಎಳ್ಳು - 2 ಟೇಬಲ್ ಚಮಚ
  • ಏಲಕ್ಕಿ ಪುಡಿ - 3/4 ಟೀ ಚಮಚ

- ಮೇಲು ಹೊದಿಕೆಗೆ:
  • ಮೈದಾಹಿಟ್ಟು - 3 ಕಪ್ 
  • ಉಪ್ಪು - ಒಂದು ದೊಡ್ಡ ಚಿಟಿಕೆ
  • ತುಪ್ಪ - 1 1/2 ಟೀ ಚಮಚ 
  • ನೀರು - 1 ಕಪ್ (ಅಂದಾಜು)

ತಯಾರಿಸುವ ವಿಧಾನ:
  • ಮೈದಾ ಹಿಟ್ಟಿಗೆ ಉಪ್ಪು, ತುಪ್ಪ ಸೇರಿಸಿ ಕೈಯಲ್ಲಿ ಚೆನ್ನಾಗಿ ಮಿಕ್ಸ್ ಮಾಡಿ. 3 - 4 ನಿಮಿಷ ಚೆನ್ನಾಗಿ ಮಿಕ್ಸ್ ಮಾಡಿಕೊಂಡು ಇದಕ್ಕೆ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸುತ್ತ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ಹಿಟ್ಟು ಮೆತ್ತಗಿದ್ದು, ಕೈಗಳಿಗೆ ಅಂಟದಂತಿರಲಿ. ಈ ಹಿಟ್ಟನ್ನು ದೊಡ್ಡ ಉಂಡೆ ಮಾಡಿ ಒಂದು ಪಾತ್ರೆಯಲ್ಲಿಟ್ಟು ಮುಚ್ಚಳ ಮುಚ್ಚಿ 15 - 20 ನಿಮಿಷ ಇಡಿ.
  • ಒಂದು ದಪ್ಪ ತಳದ ಪಾತ್ರೆಯಲ್ಲಿ ತೆಂಗಿನತುರಿ / ಕೊಬ್ಬರಿತುರಿ, ಸಕ್ಕರೆ, ಬೆಲ್ಲ (ಬೇಕಿದ್ದರೆ) ಹಾಗೂ ನೀರು ಹಾಕಿ ಕುದಿಯಲು ಬಿಡಿ. 
  • ಎಳ್ಳನ್ನು ಸಣ್ಣ ಉರಿಯಲ್ಲಿ ಕೆಂಪಗೆ ಹುರಿದು ಇಟ್ಟುಕೊಳ್ಳಿ.
  • ತೆಂಗಿನತುರಿ ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತ, ನೀರಿನಂಶವೆಲ್ಲ ಆರುವವರೆಗೆ ಬಿಡಿ. ನಂತರ ಇದಕ್ಕೆ ಹುರಿದ ಎಳ್ಳು, ಏಲಕ್ಕಿಪುಡಿ ಸೇರಿಸಿ ಉರಿಯನ್ನು ಆಫ್ ಮಾಡಿ.
  • ಕಲಸಿಟ್ಟ ಮೈದಾ ಹಿಟ್ಟನ್ನು ತೆಗೆದುಕೊಂಡು ಒಂದೇ ಅಳತೆಯ ಚಿಕ್ಕ ಚಿಕ್ಕ ಉಂಡೆಗಳನ್ನು ಮಾಡಿಕೊಳ್ಳಿ. ಒಂದೊಂದೇ ಉಂಡೆಯನ್ನು ತೆಗೆದುಕೊಂಡು ಒಣ ಹಿಟ್ಟಿನಲ್ಲಿ ಹೊರಳಿಸಿಕೊಂಡು ಸಾಧ್ಯವಾದಷ್ಟು ತೆಳ್ಳಗೆ ವೃತ್ತಾಕಾರಕ್ಕೆ ಲಟ್ಟಿಸಿ.
  • ಲಟ್ಟಿಸಿದ ಪುಟ್ಟ ರೊಟ್ಟಿಯೊಳಗೆ ಒಂದು ಟೇಬಲ್ ಚಮಚದಷ್ಟು ತೆಂಗಿನತುರಿ ಮಿಶ್ರಣವನ್ನು ಹಾಕಿ. ರೊಟ್ಟಿಯ ಅಂಚುಗಳನ್ನು ಒಟ್ಟಿಗೆ ಸೇರಿಸಿ ನಾಜೂಕಾಗಿ ಬೆಸೆದು ಮೋದಕದ ಆಕಾರ ಕೊಡಿ. 
  • ತಯಾರಿಸಿದ ಮೋದಕಗಳನ್ನು ಕಾದ ಎಣ್ಣೆಯಲ್ಲಿ ಹೊಂಬಣ್ಣಕ್ಕೆ ಕರಿದು ತೆಗೆಯಿರಿ. 


ಟಿಪ್ಸ್:
  • ಮೋದಕ ತಯಾರಿಸಲು ತಾಜಾ ತೆಂಗಿನತುರಿಯನ್ನು ಬಳಸಬಹುದು ಅಥವಾ ಒಣಕೊಬ್ಬರಿ ತುರಿಯನ್ನೂ ಬಳಸಬಹುದು.
  • ಮೋದಕ ತಯಾರಿಸಲು ಸಕ್ಕರೆಯ ಬದಲು ಬೆಲ್ಲವನ್ನೂ ಬಳಸಬಹುದು. ಬೆಲ್ಲ ಬಳಸಿ ತಯಾರಿಸಿದರೆ ಮೋದಕ ಇನ್ನೂ ರುಚಿ!
  • ಎಲ್ಲ ಕಡೆ ಒಂದೇ ಬಣ್ಣ ಬರಲು ಮೋದಕಗಳನ್ನು ಕರಿಯುವಾಗ ಪದೇ ಪದೇ ಅವನ್ನು ಸೌಟಿನಿಂದ ಕೈಯಾಡಿಸುತ್ತಿರಿ.

Friday, 15 August 2014

ಹದಿಗಡ್ಡೆ ಪಲ್ಯ | ಹಲಸಿನ ಅಡುಗೆಗಳು | Hadigadde Palya | Raw Jack Fruit Recipes

Click here for English version.

ಹಲಸಿನ ಸೀಜನ್ ನಲ್ಲಿ ಊರಿಗೆ ಹೋದಾಗ ನಾನು ಸವಿದ ಅಡಿಗೆಗಳಲ್ಲಿ ಈ ಪಲ್ಯವೂ ಒಂದು. ಹದಿಗಡ್ಡೆ ಎಂದರೆ ಚೆನ್ನಾಗಿ ಬಲಿತ ಹಲಸಿನ ಕಾಯಿಯ ಬೀಜದ ಹೊರಭಾಗದಲ್ಲಿರುವ ಮೆತ್ತಗಿನ ಸಿಪ್ಪೆ. ಹಲಸಿನ ಕಾಯಿಯ ಪ್ರತಿಯೊಂದು ಭಾಗವೂ ಒಂದಿಲ್ಲೊಂದು ರೀತಿಯಲ್ಲಿ ಬಳಕೆಗೆ ಉಪಯುಕ್ತವಾಗಿದೆ. ಇದರ ತೊಳೆ, ಬೀಜ, ಬೀಜದ ಹೊರಗಿನ ಮೆತ್ತಗಿನ ಸಿಪ್ಪೆ (ಹದಿಗಡ್ಡೆ) ಇವೆಲ್ಲ ನಮ್ಮ ಆಹಾರವಾಗಿ ಬಳಕೆಯಾದರೆ, ಇದರ ಹೊರಗಿನ ಗಟ್ಟಿಯಾದ ಸಿಪ್ಪೆ, ಇತ್ಯಾದಿ ಭಾಗಗಳು ಜಾನುವಾರುಗಳಿಗೆ ಒಳ್ಳೆಯ ಮೇವು. 
ಹದಿಗಡ್ಡೆಯನ್ನು ಅಡುಗೆಗೆ ಬಳಸುವುದು ಹೆಚ್ಚಿನ ಜನರಿಗೆ ಗೊತ್ತಿಲ್ಲ. ನಮ್ಮ ಮನೆಯಲ್ಲಿ ಒಮ್ಮೆ ಹದಿಗಡ್ಡೆಯನ್ನು ಪಲ್ಯಕ್ಕೆಂದು ಬಿಡಿಸುತ್ತಿದ್ದರಂತೆ. ಆಗ ಮನೆಗೆ ಬಂದಿದ್ದ ದೂರದ ನೆಂಟರೊಬ್ಬರು 'ಅಯ್ಯೋ, ಇದನ್ನೂ ನೀವು ಅಡುಗೆಗೆ ಬಳಸುತ್ತೀರಾ?' ಎಂದು ಮುಖ ಹಿಂಡಿದ್ದರಂತೆ. ನಂತರ ಈ ಪಲ್ಯದ ರುಚಿ ನೋಡಿದ ಅವರು ಪಲ್ಯವನ್ನು ಮತ್ತೆ ಮತ್ತೆ ಹಾಕಿಸಿಕೊಂಡು ಉಂಡದ್ದನ್ನು ನಮ್ಮ ಮನೆಯಲ್ಲಿ ಈಗಲೂ ನೆನಪಿಸಿಕೊಳ್ಳುತ್ತಾರೆ. 
ಹಲಸಿನಕಾಯಿಯ ಚಿಪ್ಸ್, ಹಪ್ಪಳ ತಯಾರಿಸುವಾಗ ಹದಿಗಡ್ಡೆಯನ್ನೂ ಬಿಡಿಸಿಕೊಂಡು ಅದರ ಪಲ್ಯವನ್ನು ತಯಾರಿಸುತ್ತಾರೆ. ಸುಲಭದಲ್ಲಿ ತಯಾರಿಸಬಹುದಾದ ಈ ಪಲ್ಯ ಊಟಕ್ಕೆ ಬಹಳ ರುಚಿ!  


ತಯಾರಿಸಲು ಬೇಕಾಗುವ ಸಮಯ: 15 - 20 ನಿಮಿಷಗಳು
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಸುಲಭ 

ಬೇಕಾಗುವ ಸಾಮಗ್ರಿಗಳು:
  • ಎಣ್ಣೆ - 8 ಟೇಬಲ್ ಚಮಚ
  • ಸಣ್ಣಗೆ ಹೆಚ್ಚಿದ ಹದಿಗಡ್ಡೆ - 3 1/2 ಕಪ್
  • ಉದ್ದಿನಬೇಳೆ - 1 1/2 ಟೇಬಲ್ ಚಮಚ
  • ಇಂಗು - ಚಿಟಿಕೆ
  • ಸಾಸಿವೆ - 1 ಟೇಬಲ್ ಚಮಚ
  • ಸಾಂಬಾರ್ ಪುಡಿ - 2 ಟೇಬಲ್ ಚಮಚ
  • ಉಪ್ಪು - ರುಚಿಗೆ ತಕ್ಕಷ್ಟು
  • ಆಮ್ ಚೂರ್ ಪುಡಿ - ರುಚಿಗೆ ತಕ್ಕಷ್ಟು
  • ಸಕ್ಕರೆ - 1/2 ಟೀ ಚಮಚ 
  • ತೆಂಗಿನತುರಿ - 1/2 ಕಪ್


ತಯಾರಿಸುವ ವಿಧಾನ:
  • ಒಂದು ದಪ್ಪ ತಳದ ಬಾಣಲೆಯಲ್ಲಿ 8 ಟೇಬಲ್ ಚಮಚದಷ್ಟು ಎಣ್ಣೆ ಕಾಯಿಸಿಕೊಳ್ಳಿ. ಇದಕ್ಕೆ ಉದ್ದಿನಬೇಳೆ, ಇಂಗು, ಸಾಸಿವೆ ಹಾಕಿ ಒಗ್ಗರಣೆ ಮಾಡಿಕೊಳ್ಳಿ. 
  • ಒಗ್ಗರಣೆ ಮಿಶ್ರಣಕ್ಕೆ ಸಾಂಬಾರ್ ಪುಡಿ ಸೇರಿಸಿ ಒಮ್ಮೆ ಕೈಯಾಡಿಸಿ. ಇದಕ್ಕೆ ಸಣ್ಣಗೆ ಹೆಚ್ಚಿದ ಹದಿಗಡ್ಡೆ ಚೂರುಗಳನ್ನು ಸೇರಿಸಿ. ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ ಹಾಗೂ ಆಮ್ ಚೂರ್ ಪುಡಿ ಸೇರಿಸಿ ಮಿಕ್ಸ್ ಮಾಡಿ. 
  • ಪಲ್ಯದ ಮಿಶ್ರಣವನ್ನು ನೀರು ಸೇರಿಸದೆ, ಮುಚ್ಚಳ ಮುಚ್ಚಿ ಮಧ್ಯಮ ಉರಿಯಲ್ಲಿ ಬೇಯಿಸಿ. ಆಗಾಗ್ಗೆ ಕೈಯಾಡಿಸುತ್ತಿರಿ. 
  • ಪಲ್ಯ ಬೆಂದ ನಂತರ ಇದಕ್ಕೆ ತೆಂಗಿನತುರಿ ಸೇರಿಸಿ 3 - 4 ನಿಮಿಷ ಬಿಸಿಮಾಡಿ ಇಳಿಸಿ.
  • ರುಚಿಕಟ್ಟಾದ ಪಲ್ಯವನ್ನು ಅನ್ನ ಅಥವಾ ರೊಟ್ಟಿಯೊಡನೆ ಸವಿದುನೋಡಿ!

Saturday, 5 July 2014

ಹಲಸಿನಕಾಯಿ ತೆಳ್ಳೇವು | ಹಲಸಿನಕಾಯಿ ಪೇಪರ್ ದೋಸೆ | Halasinakayi Tellevu | Raw Jack Fruit Paper Dosa

Click here for English version.

' ತೆಳ್ಳೇವು' - ಇದು ಹವ್ಯಕರ ಸಿಗ್ನೇಚರ್ ಡಿಶ್. ಹಳ್ಳಿಗಳ ಕಡೆ ಹೆಚ್ಚಿನ ಹವ್ಯಕರ ಮನೆಗಳಲ್ಲಿ ಬೆಳಗ್ಗಿನ ತಿಂಡಿಗೆ ಸಾಮಾನ್ಯವಾಗಿ  ತೆಳ್ಳೇವು ತಯಾರಿಸುತ್ತಾರೆ. ಅಗಲವಾದ ದೋಸೆ ಕಾವಲಿಯ ಮೇಲೆ ಪೇಪರ್ ನಷ್ಟು ತೆಳ್ಳಗಿನ ಈ ದೋಸೆ ತಯಾರಿಸುವುದೂ ಒಂದು ಕಲೆಯೇ!
ಬೇರೆ ಬೇರೆ ತರಕಾರಿಗಳನ್ನು ಬಳಸಿ ವಿವಿಧ ಬಗೆಯ ತೆಳ್ಳೇವು ತಯಾರಿಸಬಹುದು. ಮೊಗೆಕಾಯಿ ಹಾಗೂ ಸೌತೆಕಾಯಿ ತೆಳ್ಳೇವು ತಯಾರಿಸಲು ಹೆಚ್ಚಾಗಿ ಬಳಕೆಯಾಗುತ್ತವೆ. ತೆಳ್ಳೇವು ಪ್ರಿಯರು ಹಲಸಿನಕಾಯಿ ಸೀಜನ್ ನಲ್ಲಿ ಒಮ್ಮೆಯಾದರೂ ಹಲಸಿನಕಾಯಿಯ ತೆಳ್ಳೇವು ತಯಾರಿಸುತ್ತಾರೆ. ಹಲಸಿನಕಾಯಿಯ ತೆಳ್ಳೇವು ತಿನ್ನಲು ಬಹಳ ರುಚಿ. ಚೆನ್ನಾಗಿ ಬೆಳೆದ ಹಲಸಿನಕಾಯಿಯ ತೊಳೆಗಳನ್ನು ಬಿಡಿಸಿ ರುಬ್ಬಿಕೊಂಡು ಆಗಿಂದಾಗ್ಗೆ ದೋಸೆ (ತೆಳ್ಳೇವು) ತಯಾರಿಸಬೇಕು. ತೆಳ್ಳೇವು ತಯಾರಿಸುವ ಮೊದಲು ಇಷ್ಟೆಲ್ಲಾ ಕೆಲಸ ಇರುವುದರಿಂದ ಈ  ತೆಳ್ಳೇವನ್ನು ಸಾಯಂಕಾಲದ ತಿಂಡಿಗೆ ತಯಾರಿಸುವುದು ಹೆಚ್ಚು ಅನುಕೂಲ.
ನಾನಂತೂ ಹಲಸಿನಕಾಯಿ ತೆಳ್ಳೇವು ತಿನ್ನದೇ ತುಂಬಾ ವರ್ಷಗಳೇ ಆಗಿಬಿಟ್ಟಿದ್ದವು. ಈ ವರ್ಷ ಹಲಸಿನ ಸೀಜನ್ ನಲ್ಲಿ ಊರಿಗೆ ಹೋಗಿದ್ದರಿಂದ ಈ ತೆಳ್ಳೇವು ಸವಿಯುವ ಭಾಗ್ಯ ಸಿಕ್ಕಿತು. ಕಾಯಿ ಚಟ್ನಿ ಹಾಗೂ ಜೇನುತುಪ್ಪದೊಡನೆ ಹಲಸಿನಕಾಯಿ  ತೆಳ್ಳೇವು ತಿಂದರೆ ಅದರ ರುಚಿಯನ್ನು ಯಾರೂ ಮರೆಯುವಂತಿಲ್ಲ!
ತೆಳ್ಳೇವು ತಯಾರಿಸುವ ವಿಡಿಯೋ ವನ್ನು ನಾನು ಈ ಹಿಂದೆ ಬರೆದ 'ತೆಳ್ಳೇವು' ರೆಸಿಪಿಯಲ್ಲಿ ಹಾಕಿದ್ದೆ. ವಿಡಿಯೋ ರೆಸಿಪಿ ನೋಡಲು ಇಲ್ಲಿ ಕ್ಲಿಕ್ ಮಾಡಿ.


ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ
ಸರ್ವಿಂಗ್ಸ್: 5 - 6 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಕಷ್ಟಕರ
ಬೇಕಾಗುವ ಸಾಮಗ್ರಿಗಳು:
  • 1 ಮೀಡಿಯಂ ಸೈಜಿನ ಹಲಸಿನಕಾಯಿ
  • ರುಚಿಗೆ ಉಪ್ಪು
  • ನೀರು

ತಯಾರಿಸುವ ವಿಧಾನ:
  • ಹಲಸಿನಕಾಯಿ ತೊಳೆಗಳನ್ನು ಬಿಡಿಸಿ ಬೀಜ ಬೇರ್ಪಡಿಸಿಕೊಂಡು, ತೊಳೆಗಳನ್ನು ಸಣ್ಣ ಚೂರುಗಳಾಗಿ ಹೆಚ್ಚಿಕೊಳ್ಳಿ.
  • ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಒರಳಿನಲ್ಲಿ ನುಣ್ಣಗೆ ರುಬ್ಬಿ.
  • ರುಬ್ಬುವಾಗ ಸ್ವಲ್ಪ ನೀರು ಬೇಕಿದ್ದರೆ ಸೇರಿಸಿ. ಹಿಟ್ಟಿನ ಹದ ದೋಸೆ ಹಿಟ್ಟಿಗಿಂತ ಸ್ವಲ್ಪ ಮಂದವಾಗಿರಲಿ.
  • ಒಂದು ಸೌಟಿನಷ್ಟು ಹಿಟ್ಟನ್ನು ಕಾದ ಕಾವಲಿಯಮೇಲೆ ತೆಳ್ಳಗೆ ಹರಡಿ, ಮೀಡಿಯಮ್ ಉರಿಯಲ್ಲಿ ಗರಿಯಾಗಿ ಬೇಯಿಸಿ ತೆಗೆಯಿರಿ.
  • ಬಿಸಿಬಿಸಿ ದೋಸೆಯನ್ನು ಕಾಯಿ ಚಟ್ನಿ ಹಾಗೂ ಜೇನುತುಪ್ಪದೊಡನೆ ಸವಿಯಿರಿ!


ಟಿಪ್ಸ್:
  • ತಯಾರಿಸಿದ ಹಿಟ್ಟನ್ನು ತಕ್ಷಣವೇ ಬಳಸಿ. ಹಿಟ್ಟನ್ನು ತುಂಬ ಹೊತ್ತು ಇಟ್ಟರೆ ದೋಸೆ ಚೆನ್ನಾಗಿ ಬರುವುದಿಲ್ಲ.
  • ಹಿಟ್ಟನ್ನು ರುಬ್ಬಿದ ಸ್ವಲ್ಪ ಸಮಯದ ನಂತರ  ತೆಳ್ಳೇವು ತಯಾರಿಸಲು ಚೆನ್ನಾಗಿ ಬರದಿದ್ದರೆ ಹಿಟ್ಟನ್ನು ಇನ್ನೊಮ್ಮೆ ಒರಳಿನಲ್ಲಿ ರುಬ್ಬಿ ಬಳಸಿ.
  • ಎಲ್ಲ ಹಲಸಿನಕಾಯಿಗಳೂ ತೆಳ್ಳೇವು ತಯಾರಿಸಲು ಸೂಕ್ತವಲ್ಲ. ಹೀಗಾಗಿ ಒಮ್ಮೊಮ್ಮೆ ತೆಳ್ಳೇವು ತಯಾರಿಸುವುದು ಕಷ್ಟವಾಗಿ, ಸ್ವಲ್ಪ ದಪ್ಪಗಿನ ದೋಸೆ ತಯಾರಿಸುವ ಸಂಭವವೂ ಇರುತ್ತದೆ. 
  • ಈ ತೆಳ್ಳೇವಿಗೆ ಹಿಟ್ಟು ರುಬ್ಬಲು ಮಿಕ್ಸಿ ಸೂಕ್ತವಲ್ಲ. ಒರಳು ಅಥವಾ ಗ್ರೈಂಡರ್ ನಲ್ಲಿ ರುಬ್ಬಿದರೆ ಮಂದನೆಯ ಹಿಟ್ಟನ್ನು ತಯಾರಿಸಬಹುದು. 

Tuesday, 10 June 2014

ಅಮಟೆಕಾಯಿ ಚಟ್ನಿ | ಅಂಬಟೆಕಾಯಿ ಚಟ್ನಿ | Amatekayi Chutney | Ambatekayi Chutney |

Click here for English version.

ಅಮಟೆಕಾಯಿ (ಅಂಬಟೆಕಾಯಿ) ಗ್ರಾಮೀಣ ಭಾಗದ ಜನರಿಗೆ ಚಿರಪರಿಚಿತವಾದ ತರಕಾರಿ. ಮಾವಿನಕಾಯಿ, ಹುಣಸೆಕಾಯಿಗಳಂತೆಯೇ ತುಂಬ ಹುಳಿಯಾಗಿರುವ ಈ ಕಾಯಿಯಿಂದ ಬಗೆಬಗೆಯ ಮೇಲೋಗರ, ಗೊಜ್ಜು, ಚಟ್ನಿ, ಉಪ್ಪಿನಕಾಯಿಗಳನ್ನು ತಯಾರಿಸುತ್ತಾರೆ. ಊರಿನಿಂದ ದೂರವಿರುವಾಗ ನಾವು ಮಿಸ್ ಮಾಡಿಕೊಳ್ಳುವ ತರಕಾರಿಗಳಲ್ಲಿ ಇದೂ ಒಂದು.
ಅಮಟೆಕಾಯಿಯ ಸಾರು (ಅಮಟಿ) ತಯಾರಿಸುವ ವಿಧಾನವನ್ನು ಬಹಳ ದಿನಗಳ ಹಿಂದೆಯೇ ಬರೆದಿದ್ದೆ. ಅಮಟೆಕಾಯಿಯ ಚಟ್ನಿ ಮಾಡುವ ವಿಧಾನ ಇಲ್ಲಿದೆ..


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು 
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಸುಲಭ

ಬೇಕಾಗುವ ಸಾಮಗ್ರಿಗಳು:
  • ಮೀಡಿಯಮ್ ಸೈಜಿನ ಅಮಟೆಕಾಯಿ - 1
  • ತೆಂಗಿನತುರಿ - 1 ಕಪ್ 
  • ಹಸಿಮೆಣಸು - 2
  • ರುಚಿಗೆ ಉಪ್ಪು 
  • ನಿಂಬೆಹಣ್ಣು - ಅರ್ಧ ಭಾಗ 
  • ನೀರು - 1 ಕಪ್  
ಒಗ್ಗರಣೆಗೆ: ಎಣ್ಣೆ - 1 ಟೀ ಸ್ಪೂನ್, ಸಾಸಿವೆ - 3/4 ಟೀ ಸ್ಪೂನ್

ಮಾಡುವ ವಿಧಾನ:
  • ಓಟೆಯನ್ನು ಬಿಟ್ಟು ಅಮಟೆಕಾಯಿಯನ್ನು ಮೀಡಿಯಂ ಸೈಜಿನ ಚೂರುಗಳಾಗಿ ಹೆಚ್ಚಿಕೊಳ್ಳಿ.  
  • ಪಾತ್ರೆಯಲ್ಲಿ 1 ಕಪ್ ನಷ್ಟು ನೀರು ಹಾಕಿ ಅಮಟೆಕಾಯಿ ಚೂರುಗಳು ಮತ್ತು ಹಸಿಮೆಣಸನ್ನು ಅದರಲ್ಲಿ ಹಾಕಿ ಅರೆಬರೆ ಮುಚ್ಚಿ 5 ನಿಮಿಷ ಬೇಯಿಸಿ.
  • ಬೆಂದ ಮಿಶ್ರಣ ಸ್ವಲ್ಪ ತಣ್ಣಗಾದ ನಂತರ ಅದಕ್ಕೆ ತೆಂಗಿನತುರಿ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಮಿಕ್ಸಿಯಲ್ಲಿ ಸ್ವಲ್ಪ ತರಿಯಾಗಿ ರುಬ್ಬಿ. ಅಮಟೆಕಾಯಿ ಚೂರು ಬೇಯಿಸಿದ ನೀರು ಉಳಿದಿದ್ದರೆ ರುಬ್ಬುವಾಗ ಅದೇ ನೀರನ್ನು ಬಳಸಿ. 
  • ಚಟ್ನಿಯ ರುಚಿ ನೋಡಿಕೊಂಡು ರುಚಿಗೆ ತಕ್ಕಷ್ಟು ನಿಂಬೆರಸ ಸೇರಿಸಿ ಮಿಕ್ಸ್ ಮಾಡಿ. 
  • ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಕಾಯಿಸಿ ಸಾಸಿವೆ ಸಿಡಿಸಿ ಒಗ್ಗರಣೆ ಮಾಡಿ ರುಬ್ಬಿಟ್ಟ ಚಟ್ನಿಗೆ ಸೇರಿಸಿ.
  • ತಯಾರಾದ ಅಮಟೆಕಾಯಿ ಚಟ್ನಿಯನ್ನು ಅನ್ನದೊಡನೆ ಸವಿಯಿರಿ!

Saturday, 10 May 2014

ಸಬ್ಬಸಿಗೆ ಸೊಪ್ಪಿನ ಪಲ್ಯ | Sabbasige Soppina Palya | Dill Leaves Stri Fry

Click here for English version.

ಹಸಿರು ತರಕಾರಿ ಮತ್ತು ಸೊಪ್ಪುಗಳು ನಮ್ಮ ದೇಹಕ್ಕೆ ಅಗತ್ಯವಾದ ವಿವಿಧ ಪೋಷಕಾಂಶಗಳ ಆಗರವಾಗಿವೆ. ಶಾಕಾಹಾರಿಗಳಿಗಂತೂ ಅಗತ್ಯವಿರುವ ಎಲ್ಲ ಪೋಷಕಾಂಶಗಳೂ ಸೊಪ್ಪು, ತರಕಾರಿಗಳಿಂದಲೇ ಸಿಗಬೇಕು. ಹೀಗಾಗಿ ನಮ್ಮ ನಿತ್ಯದ ಆಹಾರದಲ್ಲಿ ಹಣ್ಣುಗಳ ಜತೆಗೆ ಸೊಪ್ಪು, ತರಕಾರಿಗಳ ಸೇವನೆಯೂ ಅತ್ಯವಶ್ಯ. ಪಾಲಕ್, ಸಬ್ಬಸಿಗೆ, ಹರಿವೆ ಇತ್ಯಾದಿ ಸೊಪ್ಪುಗಳು ಊಟಕ್ಕೂ ರುಚಿಕರ ಹಾಗೆಯೇ ಆರೋಗ್ಯಕ್ಕೂ ಹಿತಕರ. 
ಸಬ್ಬಸಿಗೆ ಸೊಪ್ಪು ಕ್ಯಾಲ್ಶಿಯಂ, ಫೋಲಿಕ್ ಆಸಿಡ್, ಇತ್ಯಾದಿ ಖನಿಜಾಂಶಗಳ ಆಗರ. ಬಾಳಂತಿಯರಿಗಂತೂ ನಿತ್ಯದ ಆಹಾರದಲ್ಲಿ ಸಬ್ಬಸಿಗೆ ಸೊಪ್ಪಿನ ಬಳಕೆ ಬಹಳ ಒಳ್ಳೆಯದು. ನನ್ನ ಬಾಳಂತನದ ವೇಳೆಯಲ್ಲಿ ಅಮ್ಮ ಸಬ್ಬಸಿಗೆ ಸೊಪ್ಪಿನ ಪಲ್ಯ, ತೊವ್ವೆ, ಇತ್ಯಾದಿ ವಿವಿಧ ಅಡಿಗೆಗಳನ್ನು ಮಾಡುತ್ತಿದ್ದರು. ಹೀಗಾಗಿ ಮಗು ಹುಟ್ಟಿದ ನಂತರ ನನ್ನ ಅಡಿಗೆ ಕಲೆಕ್ಷನ್ ಗೆ ಅನೇಕ ಹೊಸ ಅಡಿಗೆಗಳು ಸೇರಿವೆ!
ಸಬ್ಬಸಿಗೆ ಸೊಪ್ಪಿನ ಪಲ್ಯ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ..


ತಯಾರಿಸಲು ಬೇಕಾಗುವ ಸಮಯ: 15 ನಿಮಿಷಗಳು
ಸರ್ವಿಂಗ್ಸ್: 4 - 5
ಡಿಫಿಕಲ್ಟಿ ಲೆವೆಲ್: ಸುಲಭ

ಬೇಕಾಗುವ ಸಾಮಗ್ರಿಗಳು:
  • ಸಬ್ಬಸಿಗೆ ಸೊಪ್ಪು - 1 ದೊಡ್ಡ ಕಟ್ಟು 
  • ಉದ್ದಿನಬೇಳೆ - 1 ಟೀ ಸ್ಪೂನ್       
  • ಸಾಸಿವೆ - 3/4 ಟೀ ಸ್ಪೂನ್
  • ಚಿಟಿಕೆ ಇಂಗು 
  • ತೆಂಗಿನತುರಿ - 2 ಟೇಬಲ್ ಸ್ಪೂನ್ (ಬೇಕಿದ್ದರೆ)
  • ಆಮ್ ಚೂರ್ ಪುಡಿ - 1/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 
  • ಮಸಾಲಾ ಪುಡಿ - 3 1/2 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು (ಟಿಪ್ಸ್ ನೋಡಿ)
  • ಸಕ್ಕರೆ - 3/4 ಟೇಬಲ್ ಸ್ಪೂನ್
  • ರುಚಿಗೆ ತಕ್ಕಷ್ಟು ಉಪ್ಪು 
  • ಎಣ್ಣೆ - 4 ಟೇಬಲ್ ಸ್ಪೂನ್

ತಯಾರಿಸುವ ವಿಧಾನ:
  • ಸಬ್ಬಸಿಗೆ ಸೊಪ್ಪನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದು, ಸಣ್ಣಗೆ ಹೆಚ್ಚಿಕೊಳ್ಳಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ 4 ಟೇಬಲ್ ಸ್ಪೂನ್ ನಷ್ಟು ಎಣ್ಣೆ ಕಾಯಿಸಿ ಅದಕ್ಕೆ ಉದ್ದಿನಬೇಳೆ, ಇಂಗು, ಸಾಸಿವೆ ಹಾಕಿ ಒಗ್ಗರಣೆ ಮಾಡಿ. 
  • ಒಗ್ಗರಣೆ ಚಟಪಟ ಎಂದಾಗ ಇದಕ್ಕೆ ಮಸಾಲಾ ಪುಡಿ ಸೇರಿಸಿ. ಜೊತೆಗೇ ಹೆಚ್ಚಿದ ಸಬ್ಬಸಿಗೆ ಸೊಪ್ಪನ್ನು ಸೇರಿಸಿ ಕೈಯಾಡಿಸಿ. 
  • ಪಲ್ಯದ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, ಆಮ್ ಚೂರ್ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಬಾಣಲೆಗೆ ಮುಚ್ಚಳವನ್ನು ಅರೆಬರೆ ಮುಚ್ಚಿ ಪಲ್ಯವನ್ನು 5 ನಿಮಿಷ ಬೇಯಿಸಿ. ನಡುವೆ ಒಂದೆರಡು ಬಾರಿ ಮಿಶ್ರಣವನ್ನು ಕೈಯಾಡಿಸಿ.
  • ಪಲ್ಯ ಬೆಂದ ನಂತರ ಇದಕ್ಕೆ 2 ಟೇಬಲ್ ಸ್ಪೂನ್ ನಷ್ಟು ತೆಂಗಿನತುರಿ ಸೇರಿಸಿ ಚೆನ್ನಾಗಿ ಬಿಸಿಮಾಡಿ ಉರಿಯನ್ನು ಆಫ್ ಮಾಡಿ. 
  • ರುಚಿಕಟ್ಟಾದ ಸಬ್ಬಸಿಗೆ ಸೊಪ್ಪಿನ ಪಲ್ಯವನ್ನು ಅನ್ನ ಇಲ್ಲವೇ ಚಪಾತಿಯೊಡನೆ ಸವಿಯಿರಿ!

 ಟಿಪ್ಸ್:
  • ಈ ಪಲ್ಯಕ್ಕೆ ಸಾರಿನ ಪುಡಿ ಅಥವಾ ಯಾವುದೇ ಬಗೆಯ ಪಲ್ಯದ ಪುಡಿಯನ್ನು ಬಳಸಬಹುದು. ಖಾರಕ್ಕೆ ಅನುಗುಣವಾಗಿ ಪುಡಿಯ ಪ್ರಮಾಣವನ್ನು ಅಡ್ಜೆಸ್ಟ್ ಮಾಡಿಕೊಳ್ಳಿ.

Friday, 21 March 2014

ಹುಳಿಲು । ಬಾಳೆ ದಿಂಡಿನ ಸಲಾಡ್ । Hulilu | Plantain Stem Salad

Click here for English version.

ಹಳ್ಳಿಗಳ ಕಡೆ ಬೆಳೆಯುವ ಹೆಚ್ಚಿನ ಗಿಡಗಂಟಿ - ಸೊಪ್ಪುಗಳು ಔಷಧವಾಗಿ, ಅಥವಾ ಅಡುಗೆಗೆ ಅಥವಾ ಇನ್ನಾವುದೋ ರೀತಿಯಲ್ಲಿ ಬಳಕೆಗೆ ಉಪಯುಕ್ತವಾಗಿರುತ್ತವೆ. ಪೇಟೆಯಿಂದ ತರಕಾರಿಗಳನ್ನು ಕೊಂಡು ತಾರದೆಯೇ ಥರಾವರಿ ಅಡುಗೆಗಳನ್ನು ಮಾಡಿಬಿಡುತ್ತಾರೆ ಹಳ್ಳಿಗಳ ಜನರು! ಸುಲಭದಲ್ಲಿ ದೊರೆಯುವ ಈ ತರಕಾರಿ, ಸೊಪ್ಪುಗಳು ಆರೋಗ್ಯದ ದೃಷ್ಟಿಯಿಂದಲೂ ಬಹಳ ಒಳ್ಳೆಯದು.
ಬಾಳೆ ಕಾಯಿ ಹಾಗೂ ಬಾಳೆ ಹಣ್ಣನ್ನು ನಾವೆಲ್ಲ ಸಾಮಾನ್ಯವಾಗಿ ಬಳಸುತ್ತೇವೆ. ಬಾಳೆ ಮರದ ದಿಂಡನ್ನು ಕೂಡ ಅಡುಗೆಗೆ ಬಳಸಬಹುದು. ನಾನು ಕೇಳಿದಂತೆ, ಬಾಳೆದಿಂಡು ಮೂತ್ರಕೋಶದಲ್ಲಿ ಕಲ್ಲು ಬೆಳೆಯುವ ಸಮಸ್ಯೆಗೆ ಒಳ್ಳೆಯ ಔಷಧ. ಹಾಗೆಯೇ ಹೊಟ್ಟೆನೋವು ಮತ್ತು ಕೆಮ್ಮಿನ ಬಾಧೆಗೂ ರಾಮಬಾಣ. ಇಷ್ಟೆಲ್ಲಾ ಉಪಯುಕ್ತತೆಗಳನ್ನು ಹೊಂದಿರುವ ಬಾಳೆದಿಂಡು ತರಕಾರಿ ಮಾರುಕಟ್ಟೆಯಲ್ಲೂ ಆರಾಮಾಗಿ ಸಿಗುತ್ತದೆ.
ಬಾಳೆ ದಿಂಡಿನಿಂದ ಸಲಾಡ್ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ. 'ಹುಳಿಲು' ಎನ್ನುವುದು ಈ ಸಲಾಡ್ ನ ಸಾಂಪ್ರದಾಯಿಕ ಹೆಸರು. ಬಾಯಿಗೆ ರುಚಿಕರ ಹಾಗೂ ಆರೋಗ್ಯಕ್ಕೆ ಒಳ್ಳೆಯದಾದ ಬಾಳೆದಿಂಡಿನ ಸಲಾಡ್ ನ್ನು ನೀವೂ ತಯಾರಿಸಿ ನೋಡಿ!


ತಯಾರಿಸಲು ಬೇಕಾಗುವ ಸಮಯ: 15 - 20 ನಿಮಿಷಗಳು 
ಸರ್ವಿಂಗ್ಸ್: 4 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಸುಲಭ 

ಬೇಕಾಗುವ ಸಾಮಗ್ರಿಗಳು:
  • ಬಾಳೆ ದಿಂಡು - 1 ಚಿಕ್ಕದು
  • ಶುಂಠಿ - 1 ಇಂಚು
  • ಹಸಿಮೆಣಸು - 1
  • ನಿಂಬೆಹಣ್ಣು - ಅರ್ಧಭಾಗ
  • ಗಟ್ಟಿ ಮೊಸರು - 1/2 ಕಪ್
  • ಉಪ್ಪು - 1/2 ಟೀ ಚಮಚ ಅಥವಾ ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
  • ಬಾಳೆ ದಿಂಡನ್ನು ತೆಳ್ಳಗಿನ ಸ್ಲೈಸ್ ಗಳಾಗಿ ಕತ್ತರಿಸಿ, ಅದರ ನಾರನ್ನು ತೆಗೆದುಬಿಡಿ. ನಂತರ ಈ ಸ್ಲೈಸ್ ಗಳನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಹೆಚ್ಚಿದ ಬಾಳೆ ದಿಂಡು 1 ಕಪ್ ನಷ್ಟು ಇದ್ದರೆ ಸಾಕು. 
  • ಶುಂಠಿ  ಮತ್ತು ಹಸಿಮೆಣಸನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಬೇಕಿದ್ದರೆ ಇವನ್ನು ಜಜ್ಜಿಕೊಳ್ಳಲೂಬಹುದು. 
  • ಒಂದು ಮಿಕ್ಸಿಂಗ್ ಬೌಲ್ ನಲ್ಲಿ ಹೆಚ್ಚಿದ ಬಾಳೆ ದಿಂಡು, ಶುಂಠಿ, ಹಸಿಮೆಣಸು, ಮೊಸರು, ಉಪ್ಪು ಎಲ್ಲವನ್ನೂ ಸೇರಿಸಿ ಮಿಕ್ಸ್ ಮಾಡಿ. ಇದಕ್ಕೆ ರುಚಿಗೆ ತಕ್ಕಷ್ಟು ನಿಂಬೆರಸ ಸೇರಿಸಿದರೆ ರುಚಿಕರವಾದ ಹುಳಿಲು / ಬಾಳೆ ದಿಂಡಿನ ಸಲಾಡ್ ಸವಿಯಲು ಸಿದ್ಧ!


ಟಿಪ್ಸ್:
  • ಹೆಚ್ಚಿಟ್ಟ ಬಾಳೆದಿಂಡು ಕಪ್ಪಾದರೆ ಹೆದರಬೇಡಿ. ನಿಂಬೆರಸ ಸೇರಿಸಿದಾಗ ಅದು ಪುನಃ ಮೊದಲಿನ ಬಣ್ಣಕ್ಕೆ ಬರುತ್ತದೆ. 

Friday, 28 February 2014

ಫ್ರೂಟ್ ಸ್ಯಾಂಡ್ ವಿಚ್ | Fruit Sandwich

Click here to read in English.

ನಮಗೆಲ್ಲ ಗೊತ್ತಿರುವಂತೆ ಹಣ್ಣುಗಳು ನಮ್ಮ ದೇಹಕ್ಕೆ ಬೇಕಾದ ವಿವಿಧ ಪೋಷಕಾಂಶಗಳ ಆಗರ. ಹಣ್ಣುಗಳನ್ನು ಇಷ್ಟಪಡುವವರಿಗಂತೂ ವರ್ಷವಿಡೀ ಒಂದಲ್ಲಾ ಒಂದು ಹಣ್ಣಿನ ಸೀಜನ್ ಇದ್ದೇ ಇರುತ್ತದೆ. ಈಗಂತೂ ಆಯಾ ಹಣ್ಣಿನ ಸೀಜನ್ ನಲ್ಲಿ ಹಣ್ಣಿನ ಮೇಳಗಳು ನಡೆಯುವುದು ಸಾಮಾನ್ಯ. ನಾವಂತೂ ಈ ವರ್ಷದ ದ್ರಾಕ್ಷಿ ಸೀಜನ್ ನ್ನು ಚೆನ್ನಾಗಿ ಎಂಜಾಯ್ ಮಾಡಿದೆವು! ಯಾವಾಗಲೂ ತಯಾರಿಸುವ ಫ್ರೂಟ್ ಸಲಾಡ್, ಐಸ್ ಕ್ರೀಮ್ ಹೊರತಾಗಿ ಇನ್ನೇನಾದರೂ ಹೊಸದನ್ನು ಟ್ರೈ ಮಾಡಲು ಯೋಚಿಸಿದಾಗ ತುಂಬಾ ದಿನಗಳ ಹಿಂದೆ ರೆಸ್ಟುರಾಂಟ್ ಒಂದರಲ್ಲಿ ಸವಿದಿದ್ದ ಫ್ರೂಟ್ ಸ್ಯಾಂಡ್ ವಿಚ್ ನೆನಪಾಯಿತು.
ಸಲಾಡ್ ಮತ್ತು ಐಸ್ ಕ್ರೀಮ್ ಗಳಿಗೆ ದ್ರಾಕ್ಷಿ ಹಣ್ಣಿನ ಜತೆಗೆ ಪೈನಾಪಲ್ ಒಳ್ಳೆಯ ಕಾಂಬಿನೇಶನ್. ಅದೃಷ್ಟಕ್ಕೆ ನನ್ನ ಬಳಿ ಈ ಎರಡೂ ಹಣ್ಣುಗಳಿದ್ದವು! ಕ್ರೀಮ್ ನ ಜತೆಗೆ ಈ ಎರಡು ಹಣ್ಣುಗಳನ್ನು ಬಳಸಿ ತಯಾರಿಸಿದ ಸ್ಯಾಂಡ್ ವಿಚ್ ಸೂಪರ್ಬ್ ಆಗಿತ್ತು!
ಬಹಳ ಸುಲಭದಲ್ಲಿ ತಯಾರಿಸಬಹುದಾದ ಈ ಸ್ಯಾಂಡ್ ವಿಚ್ ನ್ನು ನೀವೂ ತಯಾರಿಸಿ ನೋಡಿ. ಸ್ಯಾಂಡ್ ವಿಚ್ ತಯಾರಿಸುವ ಮೊದಲು ಒಂದು ಚಿಕ್ಕ ಸಲಹೆ: ಈ ರೆಸಿಪಿಗೆ ಬಳಸುವ ಎಲ್ಲ ಸಾಮಗ್ರಿಗಳನ್ನೂ ಮೊದಲೇ ಫ್ರಿಜ್ ನಲ್ಲಿಟ್ಟಿರಿ. ಏಕೆಂದರೆ ಫ್ರೂಟ್ ಸ್ಯಾಂಡ್ ವಿಚ್ ತಣ್ಣಗಿದ್ದಾಗಲೇ ತಿನ್ನಲು ಚೆನ್ನಾಗಿರುತ್ತದೆ!


ತಯಾರಿಸಲು ಬೇಕಾಗುವ ಸಮಯ: 30 - 35 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್
ಈ ಅಳತೆಯಿಂದ 8 ಫ್ರೂಟ್ ಸ್ಯಾಂಡ್ ವಿಚ್ ಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:
  • ಸ್ವೀಟ್ ಬ್ರೆಡ್ - 16 ಸ್ಲೈಸ್ ಗಳು ( ಸ್ವೀಟ್ ಬ್ರೆಡ್ ಸಿಗದಿದ್ದರೆ ಸ್ಯಾಂಡ್ ವಿಚ್ ಬ್ರೆಡ್ ಬಳಸಬಹುದು)
  • ಮೀಡಿಯಮ್ ಅಥವಾ ಚಿಕ್ಕ ಚೂರುಗಳಾಗಿ ಹೆಚ್ಚಿದ ಪೈನಾಪಲ್ - 2 ಕಪ್
  • ದ್ರಾಕ್ಷಿ ಹಣ್ಣು - 2 ಕಪ್
  • ಸಕ್ಕರೆ ಪುಡಿ - 1/4 ಕಪ್
  • ನೀರು - 1 ಕಪ್
  • ಫ್ರೆಶ್ ಕ್ರೀಮ್ - 200 ಗ್ರಾಂ

ತಯಾರಿಸುವ ವಿಧಾನ:
  • 1 ಕಪ್ ನೀರಿಗೆ 3 ಟೀ ಚಮಚದಷ್ಟು ಸಕ್ಕರೆ ಪುಡಿ ಸೇರಿಸಿ ಕದಡಿಕೊಳ್ಳಿ. 
  • ಫ್ರೆಶ್ ಕ್ರೀಮ್ ನ್ನು ಚೆನ್ನಾಗಿ ಬೀಟ್ ಮಾಡಿ ವಿಪ್ಪಿಂಗ್ ಕ್ರೀಮ್ ತಯಾರಿಸಿ. ಇದಕ್ಕೆ ರುಚಿಗೆ ತಕ್ಕಷ್ಟು ಸಕ್ಕರೆ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದನ್ನು ಬಳಸುವವರೆಗೆ ಫ್ರಿಜ್ ನಲ್ಲಿಟ್ಟಿರಿ.
  • 2 ಬ್ರೆಡ್ ಸ್ಲೈಸ್ ಗಳನ್ನು ತೆಗೆದುಕೊಳ್ಳಿ. ಇದರ ಎರಡೂ ಮೇಲ್ಮೈಗೂ 2 - 3 ಚಮಚದಷ್ಟು ಸಕ್ಕರೆ ನೀರನ್ನು ಚಿಮುಕಿಸಿ.
  • ಒಂದು ಬ್ರೆಡ್ ನ ಮೇಲೆ ಒಂದು ದಪ್ಪ ಪದರ ವಿಪ್ಪಿಂಗ್ ಕ್ರೀಮ್ ನ್ನು ಹರಡಿ. ಇದರಮೇಲೆ ಪೈನಾಪಲ್ ಚೂರುಗಳು ಮತ್ತು ದ್ರಾಕ್ಷಿ ಹಣ್ಣುಗಳನ್ನು ಧಾರಾಳವಾಗಿ ಉದುರಿಸಿ.
  • ಇದರ ಮೇಲೆ ಇನ್ನೊಂದು ಬ್ರೆಡ್ ಸ್ಲೈಸ್ ಇಟ್ಟರೆ ಸವಿಯಾದ ಕೂಲ್ ಕೂಲ್ ಸ್ಯಾಂಡ್ ವಿಚ್ ಸವಿಯಲು ಸಿದ್ಧ! 


ಟಿಪ್ಸ್:
  • ಸ್ಯಾಂಡ್ ವಿಚ್ ತಯಾರಿಸುವ ಮೊದಲು ಇದಕ್ಕೆ ಬಳಸುವ ಸಾಮಗ್ರಿಗಳನ್ನು ಫ್ರಿಜ್ ನಲ್ಲಿಟ್ಟು ತಣ್ಣಗೆ ಮಾಡಿಕೊಳ್ಳಿ. ಏಕೆಂದರೆ ಈ ಸ್ಯಾಂಡ್ ವಿಚ್ ತಣ್ಣಗಿದ್ದಾಗಲೇ ತಿನ್ನಲು ಚೆನ್ನ!

Saturday, 1 February 2014

ಆರೇಂಜ್ ಶಾರ್ಟ್ ಬ್ರೆಡ್ | ಆರೇಂಜ್ ಬಿಸ್ಕಿಟ್ | Orange Shortbread | Orange Biscuits

Click here for English version.

ಕೆಲ ದಿನಗಳ ಹಿಂದೆ ಸುಪರ್ ಮಾರ್ಕೆಟ್ ನಿಂದ ತಂದ ಮೈದಾ ಹಿಟ್ಟಿನ ಪ್ಯಾಕೆಟ್ ಮೇಲೆ ಒಂದು ರೆಸಿಪಿ ಇತ್ತು. ಆರೇಂಜ್ ಝೆಸ್ಟ್ ಬಳಸಿ ಬಿಸ್ಕಿಟ್ ತಯಾರಿಸುವ ವಿಧಾನ ಅಲ್ಲಿತ್ತು. ಆರೇಂಜ್ ಝೆಸ್ಟ್ ಎಂದರೆ ಮತ್ತೇನಿಲ್ಲ, ಕಿತ್ತಳೆ ಹಣ್ಣಿನ ಹೊರಭಾಗದ ಸಿಪ್ಪೆಯನ್ನು ತುರಿದು ಅದನ್ನು ಬಿಸ್ಕಿಟ್, ಕೇಕ್ ಇತ್ಯಾದಿ ತಿಂಡಿಗಳನ್ನು ತಯಾರಿಸಲು ಬಳಸುತ್ತಾರೆ. ಇದು ತಿಂಡಿಗಳಿಗೆ ಒಳ್ಳೆಯ ಪರಿಮಳ ಕೊಡುತ್ತದೆ. ನಾನಿನ್ನೂ ಆರೇಂಜ್ ಝೆಸ್ಟ್ ಬಳಸಿ ಯಾವುದೇ ತಿಂಡಿಗಳನ್ನು ತಯಾರಿಸಿರಲಿಲ್ಲ. ಹಿಟ್ಟಿನ ಪ್ಯಾಕೆಟ್ ಮೇಲಿನ ರೆಸಿಪಿ ಚೆನ್ನಾಗಿರುವಂತೆ ಕಂಡಿತು, ಹಾಗೇ ಟ್ರೈ ಮಾಡಿದ್ದಾಯಿತು. ಕಿತ್ತಳೆ ಪರಿಮಳದ ಗರಿಗರಿಯಾದ ಬಿಸ್ಕಿಟ್ ಗಳು ನಮಗೆ ಬಹಳ ಇಷ್ಟವಾದವು!
ಬಹಳ ಸುಲಭವಾಗಿ ತಯಾರಿಸಬಹುದಾದ ಈ ಬಿಸ್ಕಿಟ್ ಗೆ ನಿಮ್ಮಿಷ್ಟದ ಯಾವುದೇ ಆಕಾರ ಕೊಡಬಹುದು. ನಾನು ಒಂದಷ್ಟು ಬಿಸ್ಕಿಟ್ ಗಳನ್ನು ಆಯತಾಕಾರದಲ್ಲಿ ತಯಾರಿಸಿದೆ ಮತ್ತು ಇನ್ನು ಸ್ವಲ್ಪವನ್ನು ಚಿಕ್ಕ ಸ್ಟಿಕ್ ಗಳಂತೆ ತಯಾರಿಸಿದೆ. ಚಿಕ್ಕ ಮಕ್ಕಳಿಗೆ ಹಲ್ಲು ಬರುವ ಸಮಯದಲ್ಲಿ ಸಾಮಾನ್ಯವಾಗಿ ಏನೇ ಸಿಕ್ಕಿದರೂ ಕಚ್ಚುತ್ತಿರುತ್ತಾರೆ. ಅಂಗಡಿಯಲ್ಲಿ ಸಿಗುವ ಟೀತಿಂಗ್ ಬಿಸ್ಕಿಟ್, ರಸ್ಕ್ ಗೆ ಬದಲಾಗಿ ಮನೆಯಲ್ಲೇ ತಯಾರಿಸಿದ ಈ ಬಿಸ್ಕಿಟ್ ಗಳನ್ನು ಅವರಿಗೆ ಕೊಡಬಹುದು.
ಆರೇಂಜ್ ಶಾರ್ಟ್ ಬ್ರೆಡ್ (ಬಿಸ್ಕಿಟ್) ತಯಾರಿಸುವ ವಿಧಾನ ಇಂತಿದೆ:

ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಮೀಡಿಯಂ
ಈ ಅಳತೆಯಿಂದ ಸುಮಾರು 25 ಬಿಸ್ಕಿಟ್ ಗಳನ್ನು ತಯಾರಿಸಬಹುದು


ಬೇಕಾಗುವ ಸಾಮಗ್ರಿಗಳು:
  • 2 ಜ್ಯೂಸ್ ಆರೇಂಜ್ ನ ಸಿಪ್ಪೆ - ತುರಿದದ್ದು
  • ಸಕ್ಕರೆ - 1/2 ಕಪ್ (ಸಿಹಿ ಬೇಕಿದ್ದರೆ 2 ಟೀ ಸ್ಪೂನ್ ಜಾಸ್ತಿ ಹಾಕಿ)
  • ಮೈದಾ ಹಿಟ್ಟು - 3 ಕಪ್ (ಅಂದಾಜು)
  • ಬೆಣ್ಣೆ - 125 ಗ್ರಾಂ

ತಯಾರಿಸುವ ವಿಧಾನ:
  • ಸಕ್ಕರೆಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ.
  • ರೂಮ್ ಟೆಂಪರೇಚರ್ ನಲ್ಲಿರುವ ಬೆಣ್ಣೆಯನ್ನು ಒಂದು ಪಾತ್ರೆಯಲ್ಲಿ ಹಾಕಿಕೊಂಡು ಚೆನ್ನಾಗಿ ಬೀಟ್ ಮಾಡಿ. ಇದಕ್ಕೆ ಸಕ್ಕರೆ ಪುಡಿ ಸೇರಿಸಿ ಬೀಟ್ ಮಾಡಿ ಕ್ರೀಮ್ ನಂತೆ ಮಾಡಿ. ಇದಕ್ಕೆ ಆರೇಂಜ್ ಝೆಸ್ಟ್ ಸೇರಿಸಿ ಮಿಕ್ಸ್ ಮಾಡಿ. 
  • ಬೆಣ್ಣೆ ಮಿಶ್ರಣಕ್ಕೆ ಮೈದಾ ಹಿಟ್ಟನ್ನು ಸ್ವಲ್ಪ ಸ್ವಲ್ಪವಾಗಿ ಹಾಕಿ ಕಲಸಿ ಮೆತ್ತಗಿನ ಹಿಟ್ಟನ್ನು ತಯಾರಿಸಿಕೊಳ್ಳಿ. ಮಿಶ್ರಣ ಉಂಡೆ ಕಟ್ಟುವ ಹದಕ್ಕೆ ಬರುವತನಕ ಮೈದಾ ಹಿಟ್ಟನ್ನು ಸೇರಿಸಿ. ಹಿಟ್ಟನ್ನು ನಾದಿ ಒಂದು ದೊಡ್ಡ ಉಂಡೆಯನ್ನು ತಯಾರಿಸಿಕೊಳ್ಳಿ.
  • ಲಟ್ಟಿಸುವ ಜಾಗಕ್ಕೆ ಒಣ ಹಿಟ್ಟನ್ನು ಉದುರಿಸಿಕೊಂಡು ಲಟ್ಟಣಿಗೆಯ ಸಹಾಯದಿಂದ ಹಿಟ್ಟಿನ ಉಂಡೆಯನ್ನು ಲಟ್ಟಿಸಿ ಬೇಕಾದ ಆಕಾರಕ್ಕೆ ಕತ್ತರಿಸಿ. ಇಲ್ಲವೇ ನಿಮಗೆ ಬೇಕಾದ ಆಕಾರಕ್ಕೆ ಈ ಬಿಸ್ಕಿಟ್ ತಯಾರಿಸಬಹುದು.
  • ಬಿಸ್ಕಿಟ್ ಗಳನ್ನು 170°C ಗೆ ಪ್ರೀ ಹೀಟ್ ಮಾಡಿದ ಓವನ್ ನಲ್ಲಿ 15 - 20 ನಿಮಿಷ ಅಥವಾ ಹೊಂಬಣ್ಣ ಬರುವವರೆಗೆ ಬೇಯಿಸಿ 5 ನಿಮಿಷದ ನಂತರ ಓವನ್ ನಿಂದ ಹೊರತೆಗೆಯಿರಿ.
  • ಈ ಬಿಸ್ಕಿಟ್ ಗಳು ತಣ್ಣಗಾದ ನಂತರ ಚೆನ್ನಾಗಿ ಗರಿಗರಿಯಾಗುತ್ತವೆ. ಟೀ ಅಥವಾ ಕಾಫಿಯೊಡನೆ ಸವಿಯಲು ಬಹಳ ಚೆನ್ನಾಗಿರುತ್ತದೆ.  

Tuesday, 14 January 2014

ಡೊಳ್ಳು ಮೆಣಸಿನಕಾಯಿ ಪಲ್ಯ । ಕ್ಯಾಪ್ಸಿಕಂ ಪಲ್ಯ | Capsicum Palya | Capsicum Stir Fry

Click here for English version.

ಎಲ್ಲರಿಗೂ ಹೊಸ ವರ್ಷದ ಶುಭಾಶಯಗಳು! ನಮಗಂತೂ ಊರಿನ ಪ್ರವಾಸದಲ್ಲಿ ರಜಾ ದಿನಗಳು ಹೇಗೆ ಕಳೆದವೋ ಗೊತ್ತೇ ಆಗಲಿಲ್ಲ. ಊರಲ್ಲಿ ಎಲ್ಲರೂ ನಮಗಿಂತ ಹೆಚ್ಚಾಗಿ ಜೊತೆಗೆ ಬರುವ ನಮ್ಮ ಮಗಳನ್ನು ನೋಡಲು ಕಾತುರರಾಗಿರುತ್ತಾರೆ. ಅವಳಿಗೂ ಅಷ್ಟೇ, ಎಲ್ಲರ ಜೊತೆ ಆಟ ಆಡುವುದು, ನಾಯಿ, ದನ - ಕರುಗಳನ್ನು ನೋಡುವುದೆಂದರೆ ಖುಷಿಯೋ ಖುಷಿ! ಇತ್ತೀಚೆಗಷ್ಟೇ ನಡೆಯಲು ಪ್ರಾರಂಭಿಸಿರುವ ಅವಳ ಹೆಜ್ಜೆಗಳು ಊರಿನ ಪ್ರವಾಸದಿಂದ ಇನ್ನೂ ಧೃಢವಾಗಿವೆ.
ಇನ್ನು ಅಡಿಗೆಯ ವಿಷಯಕ್ಕೆ ಬರೋಣ! ಎಲ್ಲ ಸೀಜನ್ ನಲ್ಲೂ ಸಿಗುವ ತರಕಾರಿಗಳಲ್ಲಿ ಡೊಳ್ಳು ಮೆಣಸಿನಕಾಯಿ ಕೂಡ ಒಂದೆನಿಸುತ್ತದೆ. ಮನೆಗೆ ಈ ತರಕಾರಿಯನ್ನು ತಂದಾಗ ಹೆಚ್ಚಿನ ಸಲ ನಾನು ತಯಾರಿಸುವುದು ಸ್ಟಫ್ಡ್ ಕ್ಯಾಪ್ಸಿಕಂ. ಆದರೆ ಅಮ್ಮ ತಯಾರಿಸುವ ಬಾಯಲ್ಲಿ ನೀರೂರಿಸುವ ಡೊಳ್ಳು ಮೆಣಸಿನಕಾಯಿ (ಕ್ಯಾಪ್ಸಿಕಂ) ಪಲ್ಯ ನಮ್ಮ ಮನೆಯಲ್ಲೂ ಒಮ್ಮೊಮ್ಮೆ ತಯಾರಾಗುತ್ತದೆ. ಮಸಾಲೆ ಪದಾರ್ಥಗಳನ್ನು ಕುಟ್ಟಿ ಹಾಕಿ ಮಾಡುವ ಈ ಪಲ್ಯ ಅನ್ನ ಹಾಗೂ ಚಪಾತಿಯೊಡನೆ ಒಳ್ಳೆಯ ಕಾಂಬಿನೇಶನ್!   
 

ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು
ಸರ್ವಿಂಗ್ಸ್: 4 - 5 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಮಧ್ಯಮ

ಬೇಕಾಗುವ ಸಾಮಗ್ರಿಗಳು:
  • ಮೀಡಿಯಮ್ ಸೈಜ್ ನ ಡೊಳ್ಳು ಮೆಣಸಿನಕಾಯಿ - 2   
  • ರುಚಿಗೆ ತಕ್ಕಷ್ಟು ಉಪ್ಪು 
  • ಆಮ್ ಚೂರ್ ಪೌಡರ್ - 1 1/2 ಟೀ ಚಮಚ
  • ಸಕ್ಕರೆ - 1 ಟೀ ಚಮಚ

- ಮಸಾಲಾ ಪುಡಿಗೆ:
  • ಚಕ್ಕೆ - 1 ಇಂಚಿನ ಚೂರು
  • ಲವಂಗ - 4
  • ಒಣಮೆಣಸು - 10 ರಿಂದ 12
  • ಒಣ ಕೊಬ್ಬರಿ ತುರಿ - 1 ಕಪ್ 
  • ಕಡಲೆಬೇಳೆ - 4 ಟೇಬಲ್ ಚಮಚ 
  • ಉದ್ದಿನಬೇಳೆ - 2 ಟೀ ಚಮಚ 
  • ಮೆಂತ್ಯ - 3/4 ಟೀ ಚಮಚ
  • ಕೊತ್ತಂಬರಿ - 1 1/2 ಟೀ ಚಮಚ
  • ಜೀರಿಗೆ - 3/4 ಟೀ ಚಮಚ
  • ಸಾಸಿವೆ - 1/2 ಟೀ ಚಮಚ
  • ಒಂದು ದೊಡ್ಡ ಚಿಟಿಕೆ ಇಂಗು 
  • ಅರಿಶಿನ - 1/2 ಟೀ ಚಮಚ
  • ಎಣ್ಣೆ - 1 1/2 ಟೀ ಚಮಚ

- ಒಗ್ಗರಣೆಗೆ:
  • ಎಣ್ಣೆ - 4 ಟೇಬಲ್ ಚಮಚ 
  • ಉದ್ದಿನಬೇಳೆ - 1 1/2 ಟೀ ಚಮಚ
  • ಸಾಸಿವೆ - 1 ಟೀ ಚಮಚ
  • ಅರಿಶಿನ - 1/4 ಟೀ ಚಮಚ


ಮಾಡುವ ವಿಧಾನ: 
  • ಡೊಳ್ಳು ಮೆಣಸಿನಕಾಯಿಯನ್ನು ಮಧ್ಯಮ ಗಾತ್ರದ ಚೂರುಗಳಾಗಿ ಹೆಚ್ಚಿಕೊಳ್ಳಿ. 
  • ಮಸಾಲಾ ಪುಡಿಗೆ ಒಣಕೊಬ್ಬರಿ ತುರಿ ಹೊರತಾಗಿ ಉಳಿದೆಲ್ಲ ಸಾಮಗ್ರಿಗಳನ್ನು ಎಣ್ಣೆಯಲ್ಲಿ ಹುರಿದುಕೊಂಡು ಮಿಕ್ಸಿಯಲ್ಲಿ ತರಿಯಾಗಿ ಪುಡಿಮಾಡಿಕೊಳ್ಳಿ. ಕೊನೆಯಲ್ಲಿ ಒಣಕೊಬ್ಬರಿ ತುರಿ ಸೇರಿಸಿ 4 - 5 ಸೆಕೆಂಡ್ ಕಾಲ ಮಿಕ್ಸಿಯಲ್ಲಿ ತರಿಯಾಗಿ ಪುಡಿಮಾಡಿ.
  • ಒಂದು ದಪ್ಪ ತಳದ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಒಗ್ಗರಣೆಗೆ ಮೇಲೆ ಹೇಳಿದ ಸಾಮಗ್ರಿಗಳನ್ನು ಹಾಕಿ ಒಗ್ಗರಣೆ ಮಾಡಿಕೊಳ್ಳಿ. ಇದಕ್ಕೆ ಹೆಚ್ಚಿದ ಡೊಳ್ಳು ಮೆಣಸಿನಕಾಯಿ ಚೂರುಗಳನ್ನು ಸೇರಿಸಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, ಆಮ್ ಚೂರ್ ಪೌಡರ್ ಸೇರಿಸಿ ಕೈಯಾಡಿಸಿ. 
  • ಬಾಣಲೆಗೆ ಒಂದು ಪ್ಲೇಟ್ ನ್ನು ಅರೆಬರೆ ಮುಚ್ಚಿ ಮೆಣಸಿನಕಾಯಿ ಚೂರುಗಳು ಮೆತ್ತಗಾಗುವವರೆಗೆ ಬೇಯಿಸಿ. ಪಲ್ಯದ ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತಿರಿ. 
  • ಪಲ್ಯದ ಮಿಶ್ರಣ ಚೆನ್ನಾಗಿ ಬೆಂದ ನಂತರ ಮೊದಲೇ ತಯಾರಿಸಿಟ್ಟ ಮಸಾಲಾ ಪುಡಿಯನ್ನು ಸೇರಿಸಿ ಉರಿಯನ್ನು ಆಫ್ ಮಾಡಿದರೆ ರುಚಿಕರವಾದ ಪಲ್ಯ ಸವಿಯಲು ಸಿದ್ಧ!
Related Posts Plugin for WordPress, Blogger...