Here are some recipes which I came across through the net, books, so on and few are my own experiments..

Wednesday, 31 August 2011

ಎಳ್ಳುಂಡೆ / Sesame Seeds Laddoo

Click here for English version.

ನೀವೆಲ್ಲರೂ ನನ್ನಂತೆಯೇ ಹಬ್ಬದ ತಯಾರಿಯಲ್ಲಿ ತೊಡಗಿರಬಹುದು.. ನಾಳೆಯೇ ಗಣೇಶ ಚತುರ್ಥಿ! ಹಬ್ಬದ ಗಡಿಬಿಡಿಯಲ್ಲಿ ಈ ಪೋಸ್ಟಿಂಗ್ ಏಕೆ ಗೊತ್ತಾ? ಇದೆ, ಇದೆ, ದೇರ್ ಈಸ್ ಸಂಥಿಂಗ್ ಸ್ಪೆಷಲ್! ;) ಅದೇನೆಂದರೆ ಕಳೆದ ಕೆಲವು ತಿಂಗಳುಗಳಿಂದ ಬ್ಲಾಗ್ ನಲ್ಲಿ ಪ್ರತಿ ತಿಂಗಳೂ 11 ಅಡಿಗೆಗಳನ್ನು ಹಾಕುತ್ತಾ ಬಂದಿದ್ದೇನೆ. ಈ ತಿಂಗಳ ಟಾರ್ಗೆಟ್ ಮುಗಿಸಲು ನನ್ನ ಕೆಲಸಗಳ ನಡುವೆ ಬಿಡುವು ಮಾಡಿಕೊಂಡು ಈ ಪೋಸ್ಟಿಂಗ್ ಮಾಡಬೇಕಾಯಿತು :) 
ನಮ್ಮ ಮನೆಯಲ್ಲಿ ಹಬ್ಬದ ತಯಾರಿಗಳು ಇಂದೇ ಶುರುವಾಗಿವೆ. ನಾಳೆ ಒಬ್ಬಳೇ ಎಲ್ಲವನ್ನೂ ಮಾಡಲು ಕಷ್ಟ ಅಲ್ಲವೇ? ಅದಕ್ಕೆ! ಹಬ್ಬಕ್ಕೆಂದು ತಯಾರಿಸಿದ ಎಳ್ಳುಂಡೆಯ ರೆಸಿಪಿಯನ್ನು ನಿಮ್ಮೊಡನೆ ಈಗ ಹಂಚಿಕೊಳ್ಳಲಿದ್ದೇನೆ. ಊರಲ್ಲಿ ನನ್ನ ಅತ್ತೆ ಒಬ್ಬರಿದ್ದಾರೆ, ಅವರ ಮನೆಯಲ್ಲಿ ಪ್ರತಿ ತಿಂಗಳೂ ಸಂಕಷ್ಟಹರ ಚತುರ್ಥಿಯನ್ನು ಆಚರಣೆ ಮಾಡುತ್ತಾರೆ. ನಮಗೆಲ್ಲ ಅವರು ತಯಾರಿಸುವ ಎಳ್ಳುಂಡೆ ಬಹುದೊಡ್ಡ ಆಕರ್ಷಣೆ. ಅದರ ರುಚಿ ಎಷ್ಟೆಂದರೆ ನಾವೆಲ್ಲ ಪೂಜೆ ಮುಗಿಯುವುದನ್ನೇ ಕಾಯುತ್ತಿರುತ್ತಿದ್ದೆವು, ಎಳ್ಳುಂಡೆ ತಿನ್ನಬೇಕೆಂದು! ಅವರ ಕೆಲವು ಟಿಪ್ಸ್ ಗಳನ್ನು ನಾನೂ ಇಲ್ಲಿ ಅಳವಡಿಸಿಕೊಂಡಿದ್ದೇನೆ. ಆದರೆ ಊರಲ್ಲಿ ಸಿಗುವ ತೆಳ್ಳಗಿನ, ಆಲೆಮನೆ ಬೆಲ್ಲವನ್ನು ಬಳಸಿ ಮಾಡಿದರೆ ಎಳ್ಳುಂಡೆಯ ರುಚಿ ಇನ್ನೂ ಹೆಚ್ಚು!


ತಯಾರಿಸಲು ಬೇಕಾಗುವ ಸಮಯ: 40 ನಿಮಿಷಗಳು
ಇಲ್ಲಿ ಹೇಳಿದ ಅಳತೆಯಿಂದ ಸುಮಾರು 20 - 21 ಎಳ್ಳುಂಡೆಗಳನ್ನು ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು:
ಪುಡಿ ಬೆಲ್ಲ - ಒಂದೂಕಾಲು ಕಪ್
ಎಳ್ಳು - ಒಂದೂಕಾಲು ಕಪ್
ಏಲಕ್ಕಿ - 1  
ಚಿಟಿಕೆ ಅಡಿಗೆ ಸೋಡಾ
ಸ್ವಲ್ಪ ನೀರು


ಮಾಡುವ ವಿಧಾನ:
ಬಾಣಲೆಯಲ್ಲಿ ಎಳ್ಳನ್ನು ಹಾಕಿಕೊಂಡು ಪರಿಮಳ ಬರುವಂತೆ ಸ್ವಲ್ಪ ಕೆಂಪಗೆ ಹುರಿದುಕೊಳ್ಳಿ.
ಬೆಲ್ಲಕ್ಕೆ ಸ್ವಲ್ಪ ನೀರು ಸೇರಿಸಿ ಕುದಿಯಲಿಡಿ.
ಏಲಕ್ಕಿಯನ್ನು ನುಣ್ಣಗೆ ಪುಡಿಮಾಡಿಕೊಳ್ಳಿ.
ಹುರಿದ ಎಳ್ಳನ್ನು ಮಿಕ್ಸಿಯಲ್ಲಿ ಕೇವಲ 1 - 2 ಸೆಕೆಂಡುಗಳ ಕಾಲ ತಿರುವಿ, ಸ್ವಲ್ಪ ಪುಡಿಮಾಡಿಕೊಳ್ಳಿ.
ಬೆಲ್ಲ ದಪ್ಪಗೆ ಒಂದೆಳೆ ಪಾಕ ಬರುವತನಕ ಕುದಿಸಿ, ಅದಕ್ಕೆ ಅಡಿಗೆ ಸೋಡಾ, ಎಳ್ಳು, ಏಲಕ್ಕಿಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
ಮಿಶ್ರಣವನ್ನು ಉರಿಯಿಂದ ಇಳಿಸಿ, ಸ್ವಲ್ಪ ಬೆಚ್ಚಗಿರುವಾಗಲೇ ಚಿಕ್ಕ ಚಿಕ್ಕ ಉಂಡೆಗಳನ್ನು ಮಾಡಿ.
ಗಣಪತಿಯ ನೈವೇದ್ಯಕ್ಕೆ ಇಡುವ ಮುಖ್ಯವಾದ ಪದಾರ್ಥಗಳಲ್ಲಿ ಈ ಎಳ್ಳುಂಡೆಯೂ ಒಂದು.
ಎಲ್ಲರಿಗೂ ಗಣೇಶ ಚತುರ್ಥಿ ಹಬ್ಬದ ಹಾರ್ದಿಕ ಶುಭಾಶಯಗಳು :)


Tuesday, 30 August 2011

ರವಾ ದೋಸೆ / Semolina Dosa

Click here for English version.

ನಮ್ಮ ಮನೆಯಲ್ಲಿ ಸಾಮಾನ್ಯವಾಗಿ ಹಬ್ಬ - ಹರಿದಿನಗಳಂದು ಬೆಳಗಿನ ತಿಂಡಿಗೆ ಈ ದೋಸೆಯನ್ನು ಮಾಡುತ್ತಾರೆ. ದೋಸೆ ಎಂದ ತಕ್ಷಣ ಅದಕ್ಕೆ ಹಿಟ್ಟನ್ನು ತಯಾರಿಸಲು ಅಕ್ಕಿ ಬೇಕೇ ಬೇಕು. ಆದರೆ ಈ ರವಾ ದೋಸೆಯನ್ನು ಅಕ್ಕಿಯನ್ನು ಬಳಸದೆಯೇ ತಯಾರಿಸಲಾಗುತ್ತದೆ. ಈ ದೋಸೆಗೆ ಹಿಟ್ಟನ್ನು ತಯಾರಿಸುವ ವಿಧಾನ ಇಡ್ಲಿ ಹಿಟ್ಟಿನ ತಯಾರಿಕೆಯನ್ನೇ ಹೋಲುತ್ತದೆ. 

 
ತಯಾರಿಸಲು ಬೇಕಾಗುವ ಸಮಯ: 30 ನಿಮಿಷಗಳು
ಹಿಟ್ಟು ಹುದುಗುಬರಲು ಬೇಕಾಗುವ ಸಮಯ: 7 - 8 ಘಂಟೆ
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ
 
ಬೇಕಾಗುವ ಸಾಮಗ್ರಿಗಳು:
ಉದ್ದಿನಬೇಳೆ - 1 / 2 ಕಪ್ (2 - 3 ಘಂಟೆ ನೀರಿನಲ್ಲಿ ನೆನೆಸಿಕೊಳ್ಳಿ)
ಸೂಜಿ ರವಾ - 2 ಕಪ್ 
ರುಚಿಗೆ ತಕ್ಕಷ್ಟು ಉಪ್ಪು
 
ಮಾಡುವ ವಿಧಾನ:
ನೀರಿನಲ್ಲಿ ನೆನೆಸಿದ ಉದ್ದಿನಬೇಳೆಯನ್ನು ಚೆನ್ನಾಗಿ ತೊಳೆದುಕೊಂಡು ಸ್ವಲ್ಪ ನೀರು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.
ರವೆಯನ್ನು ಸ್ವಲ್ಪ ನೀರು ಸೇರಿಸಿ ತೊಳೆದು, ನೀರನ್ನೆಲ್ಲ ಚೆಲ್ಲಿಬಿಡಿ. 
ರುಬ್ಬಿದ ಹಿಟ್ಟಿಗೆ ತೊಳೆದ ರವೆಯನ್ನು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿ. ಹಿಟ್ಟು ತೆಳ್ಳಗೆನಿಸಿದರೆ ಇನ್ನೂ ಸ್ವಲ್ಪ ರವೆ ಸೇರಿಸಿಕೊಳ್ಳಬಹುದು.
ದೋಸೆ ಹಿಟ್ಟನ್ನು ಬೆಚ್ಚಗಿನ ಸ್ಥಳದಲ್ಲಿ 7 - 8 ಘಂಟೆಕಾಲ ಅಥವಾ ರಾತ್ರಿಯಿಡೀ ಇಡಿ.

 
ಹಿಟ್ಟಿಗೆ ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿಕೊಂಡು ಕಾದ ಕಾವಲಿಯಮೇಲೆ ದೋಸೆ ಹಾಕಿ.
ದೋಸೆಯನ್ನು ಬೇಯಿಸುವಾಗ ಬೇಕಿದ್ದರೆ ಸ್ವಲ್ಪ ಎಣ್ಣೆ ಅಥವಾ ತುಪ್ಪವನ್ನು ಸೇರಿಸಬಹುದು.
ಬಿಸಿ ಬಿಸಿ ದೋಸೆಯನ್ನು ಚಟ್ನಿ ಅಥವಾ ನಿಮ್ಮಿಷ್ಟದ ಸೈಡ್ ಡಿಶ್ ನೊಡನೆ ತಿನ್ನಿ.


Monday, 29 August 2011

ಕಳಲೆ ಬಜ್ಜಿ / Bamboo shoot Bajji (Fritters)

Click here for English version.

ಕಳಲೆಯಿಂದ ತಯಾರಿಸುವ ವೆರೈಟಿಗಳಲ್ಲಿ ಈ ಬಜ್ಜಿಯೂ ಒಂದು. ಇದೂ ಕೂಡ ಅಕ್ಕನಿಂದ ಕಲಿತ ಅಡಿಗೆ! ಸ್ನ್ಯಾಕ್ಸ್ ಟೈಮ್ ಗೆ ಕಳಲೆಯ ಬಜ್ಜಿ ತುಂಬಾ ಚೆನ್ನಾಗಿರುತ್ತದೆ. ಉಪ್ಪಿನಲ್ಲಿ ಹಾಕಿಟ್ಟ ಕಳಲೆಯಿಂದಲೂ ಈ ಬಜ್ಜಿಯನ್ನು ತಯಾರಿಸಬಹುದು.


ತಯಾರಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು
ಸರ್ವಿಂಗ್ಸ್: 2
 
ಬೇಕಾಗುವ ಸಾಮಗ್ರಿಗಳು:
ಕಳಲೆ - 3/4 ಬೌಲ್ (ನೀರನ್ನು ಹಿಂಡಿ ತೆಗೆದದ್ದು)
ಕಡಲೆಹಿಟ್ಟು - 3/4 ಕಪ್ 
ಅಕ್ಕಿಹಿಟ್ಟು 2 - 3 ಚಮಚ 
ಮೆಣಸಿನ ಪುಡಿ - 2 ಚಮಚ
ಉಪ್ಪು 
ಕರಿಯಲು ಎಣ್ಣೆ

ಮಾಡುವ ವಿಧಾನ:
ಕಳಲೆಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ.
ಹೆಚ್ಚಿದ ಕಳಲೆಯನ್ನು ಬಾಣಲೆಯಲ್ಲಿ 7 - 8 ನಿಮಿಷ ಹುರಿದುಕೊಳ್ಳಿ.
ಹುರಿದ ಕಳಲೆ, ಕಡಲೆಹಿಟ್ಟು, ಅಕ್ಕಿಹಿಟ್ಟು, ಮೆಣಸಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಸ್ವಲ್ಪ ನೀರು ಸೇರಿಸಿ ಸ್ವಲ್ಪ ಗಟ್ಟಿಯಾಗಿ ಹಿಟ್ಟನ್ನು ತಯಾರಿಸಿಕೊಳ್ಳಿ.
ಹಿಟ್ಟನ್ನು ಕಾದ ಎಣ್ಣೆಯಲ್ಲಿ ಚಿಕ್ಕ ಉಂಡೆಗಳಂತೆ ಬಿಟ್ಟು ಕರಿಯಿರಿ.
ಬಜ್ಜಿ ಬಿಸಿ ಇರುವಾಗಲೇ ಟೀ ಯೊಡನೆ ಸವಿಯಿರಿ.


ಟಿಪ್ಸ್:
  • ಬಜ್ಜಿ ಮೆತ್ತಗೆನಿಸಿದರೆ ಇನ್ನೂ ಸ್ವಲ್ಪ ಅಕ್ಕಿಹಿಟ್ಟು ಸೇರಿಸಿ. ಬಜ್ಜಿ ಗರಿಗರಿಯಾಗಿ ಬರುತ್ತದೆ.

Wednesday, 24 August 2011

ಆಲೂ ಕ್ಯಾಪ್ಸಿಕಂ ಡ್ರೈ ಕರ್ರಿ / Aloo Capsicum dry curry

Click here for English version.

ನನ್ನ ಇಷ್ಟದ ತರಕಾರಿಗಳಲ್ಲಿ ಕ್ಯಾಪ್ಸಿಕಂ ಕೂಡ ಒಂದು. ಸಾಮಾನ್ಯವಾಗಿ ಮನೆಯಲ್ಲಿ ಅದರ ಸ್ಟಾಕ್ ಇದ್ದೇ ಇರುತ್ತದೆ. ಯಾವುದೇ ಅಡುಗೆಗೆ ಕ್ಯಾಪ್ಸಿಕಂ ಬಳಸಿದರೂ ಅದರ ವಿಶಿಷ್ಟ ಪರಿಮಳ ಅಡಿಗೆಯ ರುಚಿಯನ್ನು ಹೆಚ್ಚಿಸುತ್ತದೆ. ಕ್ಯಾಪ್ಸಿಕಂ ನ್ನು ಇತರ ತರಕಾರಿಗಳಂತೆ ಹೆಚ್ಚು ಬೇಯಿಸಬಾರದು. ಅಡಿಗೆಯ ಕೊನೆಯಲ್ಲಿ ಕ್ಯಾಪ್ಸಿಕಂ ಚೂರುಗಳನ್ನು ಸೇರಿಸಿ 5 - 6 ನಿಮಿಷ ಬೇಯಿಸಿಬಿಟ್ಟರೆ ಸಾಕು; ಕ್ಯಾಪ್ಸಿಕಂ ಹದವಾಗಿ ಬೆಂದು, ಅದರ ಪರಿಮಳ ಅಡಿಗೆಯಲ್ಲಿ ಸೇರಿಕೊಂಡಿರುತ್ತದೆ.
ಈ ಕರ್ರಿಯನ್ನು ನಾನು ಅಕ್ಕನಿಂದ ಕಲಿತದ್ದು. ಕ್ಯಾಪ್ಸಿಕಂ ಜೊತೆಗೆ ಮೆಂತೆಯ ಪರಿಮಳವೂ ಸೇರಿ ಒಂದು ವಿಶಿಷ್ಟ ರುಚಿ ಇದರದು. ರೊಟ್ಟಿ ಹಾಗೂ ಅನ್ನದೊಡನೆ ಒಳ್ಳೆಯ ಕಾಂಬಿನೇಶನ್.


ತಯಾರಿಸಲು ಬೇಕಾಗುವ ಸಮಯ: 1 / 2 ಘಂಟೆ
ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
1 ಮಧ್ಯಮಗಾತ್ರದ ಕ್ಯಾಪ್ಸಿಕಂ
1 ಮಧ್ಯಮಗಾತ್ರದ ಆಲೂಗಡ್ಡೆ 
ಮೆಂತ್ಯ - 1 ಟೀ ಸ್ಪೂನ್
ಹಸಿಮೆಣಸು - 1 
ಶುಂಠಿ - 1 ಇಂಚು 
ರುಚಿಗೆ ತಕ್ಕಷ್ಟು ಉಪ್ಪು
ಎಣ್ಣೆ - 2 ಚಮಚ

ಮಾಡುವ ವಿಧಾನ:
ಆಲೂಗಡ್ಡೆ ಸಿಪ್ಪೆ ತೆಗೆದು, ಆಲೂಗಡ್ಡೆ ಮತ್ತು ಕ್ಯಾಪ್ಸಿಕಂ ಎರಡನ್ನೂ ಸ್ವಲ್ಪ ತೆಳ್ಳಗೆ ಚಿಕ್ಕ ಚೂರುಗಳಾಗಿ ಹೆಚ್ಚಿಕೊಳ್ಳಿ. ಹಸಿಮೆಣಸನ್ನೂ ಹೆಚ್ಚಿಟ್ಟುಕೊಳ್ಳಿ.


ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ ಕಾದನಂತರ ಮೆಂತ್ಯ ಸೇರಿಸಿ ಸ್ವಲ್ಪ ಹುರಿದುಕೊಂಡು ನಂತರ ಹೆಚ್ಚಿದ ಹಸಿಮೆಣಸು, ಆಲೂಗಡ್ಡೆ ಸೇರಿಸಿ ಮಿಕ್ಸ್ ಮಾಡಿ. ಬಾಣಲೆಗೆ ಮುಚ್ಚಳ ಮುಚ್ಚಿ ಆಲೂಗಡ್ಡೆ ಬೇಯಲು ಬಿಡಿ. ತಳ ಹಿಡಿಯದಂತೆ ಆಗಾಗ್ಗೆ ಕೈಯಾಡಿಸುತ್ತಿರಿ. 
ಆಲೂಗಡ್ಡೆ ಮುಕ್ಕಾಲುಭಾಗ ಬೆಂದ ನಂತರ ಇದಕ್ಕೆ ಹೆಚ್ಚಿದ ಕ್ಯಾಪ್ಸಿಕಂ, ರುಚಿಗೆ ತಕ್ಕಷ್ಟು ಉಪ್ಪುಮತ್ತು ಜಜ್ಜಿದ ಶುಂಠಿಯನ್ನು  ಸೇರಿಸಿ, ಮುಚ್ಚಳ ಮುಚ್ಚಿ ನಾಲ್ಕೈದು ನಿಮಿಷ ಬೇಯಿಸಿ ಇಳಿಸಿ.
ಇದು ಅನ್ನ, ರೊಟ್ಟಿ, ಚಪಾತಿಯೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ.


ಟಿಪ್ಸ್:
  • ಕ್ಯಾಪ್ಸಿಕಂ ನ್ನು ಜಾಸ್ತಿ ಹೊತ್ತು ಬೇಯಿಸಬೇಡಿ. ಅದರ ಕುರ್ರುಂ ಕುರ್ರುಂ ಕ್ರಂಚಿನೆಸ್ ಉಳಿದಿದ್ದರೆ ತಿನ್ನಲು ಚೆನ್ನಾಗಿರುತ್ತದೆ.

Monday, 22 August 2011

ಪೈನಾಪಲ್ ಜ್ಯಾಮ್ / Pineapple Jam

Click here for English version.

ಪೈನಾಪಲ್ ಎಂದರೆ ಸಾಮಾನ್ಯವಾಗಿ ಎಲ್ಲರಿಗೂ ಇಷ್ಟವೇ. ಎಷ್ಟೊಂದು ವಿಧಗಳಲ್ಲಿ ನಾವು ಅದರ ರುಚಿಯನ್ನು ನೋಡಿಯೇ ಇರುತ್ತೇವೆ. ಹಣ್ಣಿನ ಸಿಪ್ಪೆ ತೆಗೆದು ಹಾಗೇ ಹೆಚ್ಚಿಕೊಂಡು ತಿನ್ನಲೂ ಚೆನ್ನಾಗಿರುತ್ತದೆ. ಇದನ್ನು ಬಳಸಿ ಅನೇಕ ಬಗೆಯ ಅಡಿಗೆಗಳು, ಪಾನೀಯಗಳು ಮತ್ತು ಸಿಹಿ ತಿಂಡಿಗಳನ್ನು ತಯಾರಿಸುತ್ತಾರೆ.
ತುಂಬ ದಿನಗಳ ಹಿಂದೆ ಪೈನಾಪಲ್ ಜ್ಯಾಮ್ ಮಾಡಿದಾಗ ತೆಗೆದಿಟ್ಟ ಫೋಟೋ ಹಾಗೇ ಇತ್ತು. ಹಾಗಾಗಿ ಇವತ್ತಿನ ಪೋಸ್ಟಿಂಗ್ ಗೆ ಜ್ಯಾಮ್ ತಯಾರಿಸುವ ವಿಧಾನವನ್ನೇ ಹಾಕೋಣವೆನಿಸಿತು. ಈ ಜ್ಯಾಮ್ ನ್ನು ಬ್ರೆಡ್ ಗೆ ಸವರಿಕೊಂಡು ತಿನ್ನಬಹುದು, ಅಲ್ಲದೆ ದೋಸೆ ಅಥವಾ ಚಪಾತಿಯೊಡನೆ ಹಾಕಿಕೊಳ್ಳಲೂ ಚೆನ್ನಾಗಿರುತ್ತದೆ. ಜ್ಯಾಮ್ ರುಚಿಯೆಂದು ಬಹಳ ತಿನ್ನಬೇಡಿ; ಏಕೆಂದರೆ ಅತಿಯಾಗಿ ತಿಂದರೆ ಪೈನಾಪಲ್ ಉಷ್ಣಕಾರಕ :-&


ತಯಾರಿಸಲು ಬೇಕಾಗುವ ಸಮಯ: 30 - 35 ನಿಮಿಷಗಳು

ಬೇಕಾಗುವ ಸಾಮಗ್ರಿಗಳು:
ಸಿಪ್ಪೆ ತೆಗೆದು ತುರಿದುಕೊಂಡ ಪೈನಾಪಲ್ - 5 1 / 2  ಲೋಟ (ರಸವನ್ನೂ ಸೇರಿಸಿ)
ಸಕ್ಕರೆ - 4 1 / 2 ಲೋಟ (ಪೈನಾಪಲ್ ನ ಸಿಹಿ ಅಂಶವನ್ನು ನೋಡಿಕೊಂಡು ಹಾಕಿ)
ಏಲಕ್ಕಿ 2 - 3
ನಿಂಬೆಹಣ್ಣು - 2
ಕಾಳುಮೆಣಸಿನ ಪುಡಿ (ಬೇಕಿದ್ದರೆ) - 1 / 4 ಚಮಚ

ಮಾಡುವ ವಿಧಾನ:
ಪೈನಾಪಲ್ ತುರಿ, ಸಕ್ಕರೆ, ನಿಂಬೆರಸ ಇಷ್ಟನ್ನೂ ಸೇರಿಸಿ ಹದವಾದ ಉರಿಯಲ್ಲಿ ಕುದಿಯಲಿಡಿ.
ಮಿಶ್ರಣ ಚೆನ್ನಾಗಿ ಕುದಿದು ಸ್ವಲ್ಪ ಗಟ್ಟಿಯಾಗಿ ಜೇನುತುಪ್ಪದ ಹದಕ್ಕೆ ಬಂದಾಗ ಅದಕ್ಕೆ ಕಾಳುಮೆಣಸಿನ ಪುಡಿ ಮತ್ತು ಏಲಕ್ಕಿ ಪುಡಿ ಸೇರಿಸಿ ಉರಿಯಿಂದ ಇಳಿಸಿ ಮುಚ್ಚಿಡಿ.
ಜ್ಯಾಮ್ ತಣ್ಣಗಾದ ನಂತರ ಗಾಳಿಯಾಡದ ಕಂಟೇನರ್ ಗೆ ಹಾಕಿಡಿ. ಚೆನ್ನಾಗಿ ಕುದಿಸಿಟ್ಟರೆ ಇದು 2 ತಿಂಗಳವರೆಗೂ ಚೆನ್ನಾಗಿರುತ್ತದೆ.
ಈ ಜ್ಯಾಮ್ ನ್ನು ಬ್ರೆಡ್, ದೋಸೆ ಅಥವಾ ಚಪಾತಿಯೊಡನೆ ಹಾಕಿಕೊಂಡು ತಿನ್ನಬಹುದು.


ಟಿಪ್ಸ್:
  •  ಪೈನಾಪಲ್ ಸಿಪ್ಪೆ ತೆಗೆದನಂತರ ಹಣ್ಣಿನ ಮಧ್ಯದಲ್ಲಿರುವ ಗಟ್ಟಿ ಭಾಗವನ್ನೂ ತೆಗೆದು, ನಂತರವೇ ತುರಿಯಿರಿ.
  • ಸಾಮಾನ್ಯವಾಗಿ ಪೈನಾಪಲ್ ಜ್ಯಾಮ್ ಗೆ ಸಕ್ಕರೆ ಜಾಸ್ತಿ ಬೇಕು. ಪೈನಾಪಲ್ ತುಂಬ ಸಿಹಿಯಾಗಿದ್ದರೆ ಸಕ್ಕರೆಯ ಪ್ರಮಾಣವನ್ನು ಸ್ವಲ್ಪ ಕಡಿಮೆ ಮಾಡಬಹುದು.

Wednesday, 17 August 2011

ಕಳಲೆ ಪಲ್ಯ / Spiced Bamboo shoot (Kalale Palya)

Click here for English version.

ಸಾಮಾನ್ಯವಾಗಿ ಮಳೆಗಾಲ ಬಂತೆಂದರೆ ಸಾಕು, ಹಳ್ಳಿಗಳ ಕಡೆ ಕಳಲೆಯ ಸೀಸನ್ ಶುರುವಾಗುತ್ತದೆ. ಒಂದು ಮುಖ್ಯವಾದ ವಿಷಯವೆಂದರೆ ಕಳಲೆಯನ್ನು ಫ್ರೆಶ್ ಆಗಿ ಬಳಸುವಂತಿಲ್ಲ; ಇದನ್ನು ನಮಗೆ ಬೇಕಾದಂತೆ ಹೆಚ್ಚಿಕೊಂಡು 2 - 3 ದಿನ ನೀರಿನಲ್ಲಿ ನೆನೆಸಿಟ್ಟು (ನೀರನ್ನು ದಿನವೂ ಬದಲಾಯಿಸಬೇಕು) ನಂತರವೇ  ಅಡಿಗೆಗೆ ಬಳಸಬಹುದು. ನೀವು ಕಳಲೆ ಪ್ರಿಯರಾದರೆ ಇದನ್ನು ಉಪ್ಪುನೀರಿನಲ್ಲಿ ಹಾಕಿಟ್ಟುಕೊಂಡು ವರ್ಷವಿಡೀ ಬಳಸಬಹುದು! ನಾವು ಇಲ್ಲಿನ ಚೈನೀಸ್ ಶಾಪ್ ಗಳಲ್ಲಿ ಕ್ಯಾನ್ ಗಳಲ್ಲಿ ದೊರೆಯುವ ಕಳಲೆಯನ್ನು ತಂದಿಟ್ಟುಕೊಂಡು ಬಳಸುತ್ತೇವೆ. ಕಳಲೆಯಿಂದ ತಯಾರಿಸುವ ಅಡಿಗೆಗಳು ಬಹಳ ರುಚಿ. ಅದರಲ್ಲೂ ಕಳಲೆಯ ಪಲ್ಯವಂತೂ.. ಬೊಂಬಾಟ್! 


ತಯಾರಿಸಲು ಬೇಕಾಗುವ ಸಮಯ: 1 1 / 4 ಘಂಟೆ

ಬೇಕಾಗುವ ಸಾಮಗ್ರಿಗಳು:
ಕಳಲೆ - 2 lb (4 lb ಅಥವಾ 64 oz ಕ್ಯಾನ್ ನಲ್ಲಿ ಅರ್ಧದಷ್ಟನ್ನು ಬಳಸಿದ್ದೇನೆ)
ಉದ್ದಿನಬೇಳೆ - 1 / 2 ಚಮಚ
ಸಾಸಿವೆ - 1 / 2 ಚಮಚ
ಚಿಟಿಕೆ ಇಂಗು
ಒಣಮೆಣಸು - 2
ಹಸಿಮೆಣಸು - 3 
ಚಿಟಿಕೆ ಅರಿಶಿನ
ಎಣ್ಣೆ 2 - 3 ಚಮಚ
ನಿಂಬೆಹಣ್ಣು - 1
ರುಚಿಗೆ ತಕ್ಕಷ್ಟು ಉಪ್ಪು
  
ಮಾಡುವ ವಿಧಾನ:
ಕಳಲೆಯನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದು ನೀರಿನಂಶವನ್ನು ಹಿಂಡಿ ತೆಗೆದುಬಿಡಿ.
ನೀರನ್ನೆಲ್ಲ ಹಿಂಡಿ ತೆಗೆದ ಕಳಲೆಯನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ.
ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ ಕಾದ ನಂತರ ಒಣಮೆಣಸಿನ ಚೂರುಗಳು, ಉದ್ದಿನಬೇಳೆ, ಸಾಸಿವೆ, ಚಿಟಿಕೆ ಇಂಗು, ಅರಿಶಿನ ಹಾಕಿ ಚಟಗುಡಿಸಿ, ಹಸಿಮೆಣಸಿನ ಚೂರುಗಳನ್ನು ಸೇರಿಸಿ. 
ನಂತರ ಇದಕ್ಕೆ ಸಣ್ಣಗೆ ಹೆಚ್ಚಿಕೊಂಡ ಕಳಲೆ ಮತ್ತು ಉಪ್ಪನ್ನು ಸೇರಿಸಿ ಸ್ವಲ್ಪ ಕಡಿಮೆ ಉರಿಯಲ್ಲಿ 35 - 40 ನಿಮಿಷ ಹುರಿಯಿರಿ. 
ಕಳಲೆ ಚೆನ್ನಾಗಿ ಹುರಿದ ನಂತರ ಇದಕ್ಕೆ ರುಚಿಗೆ ತಕ್ಕಷ್ಟು ನಿಂಬೆರಸ ಸೇರಿಸಿ ಉರಿಯಿಂದ ಇಳಿಸಿ.
ಈ ಪಲ್ಯ ಊಟಕ್ಕೆ ಹಾಕಿಕೊಳ್ಳಲು ಸೊಗಸಾಗಿರುತ್ತದೆ. ಚೆನ್ನಾಗಿ ಹುರಿದಿರುವುದರಿಂದ 2 - 3 ದಿನಗಳವರೆಗೂ ಕೆಡದೆ ಉಳಿಯುತ್ತದೆ.


ಟಿಪ್ಸ್:
  • ನಾನು ಇಲ್ಲಿ ಕ್ಯಾನ್ ನಲ್ಲಿ ಬರುವ ಕಳಲೆಯನ್ನು ಬಳಸಿದ್ದೇನೆ. ಹೀಗಾಗಿ ಇದನ್ನು ಪುನಃ ನೀರಿನಲ್ಲಿ ನೆನೆಸಿಡುವ ಅಗತ್ಯವಿಲ್ಲ. ಫ್ರೆಶ್ ಕಳಲೆಯನ್ನು ಬಳಸುವುದಾದರೆ 2 ದಿನ ನೀರಿನಲ್ಲಿ ನೆನೆಸಿಕೊಂಡು ಬಳಸಿ.

Monday, 15 August 2011

ತರಕಾರಿ ಪೊಂಗಲ್ / Veg. Pongal

Click here for English Version.

ಪೊಂಗಲ್ ಎಂದರೆ ಮಕರ ಸಂಕ್ರಾಂತಿಗೆ ತಯಾರಿಸುವ ವಿಶೇಷ ತಿನಿಸು. ಇದರ ಮೂಲ ತಮಿಳುನಾಡು. ನಾನು ಪೊಂಗಲ್ ನ ರುಚಿ ನೋಡಿದ್ದು ನನ್ನ ಕಾಲೇಜ್ ಜೀವನ ಮುಗಿಸಿ ಬೆಂಗಳೂರಿಗೆ ಬಂದ ನಂತರವೇ.. ಅಲ್ಲಿಯವರೆಗೂ ಪೊಂಗಲ್ ಎಂದರೆ ಹೇಗಿರುವುದೆಂದು ಗೊತ್ತೇ ಇರಲಿಲ್ಲ! ಏಕೆಂದರೆ ನಮ್ಮ ಮನೆಯಲ್ಲಿ ಇದನ್ನು ತಯಾರಿಸುವ ಪರಿಪಾಠವಿಲ್ಲ. ಪೊಂಗಲ್ ನಲ್ಲಿ ಎರಡು ಬಗೆ: ಸಿಹಿ ಪೊಂಗಲ್ ಮತ್ತು ಸಪ್ಪೆ (ವೆಣ್) ಪೊಂಗಲ್. ತರಕಾರಿ ಪೊಂಗಲ್ ಎಂದರೆ ಸಪ್ಪೆ ಪೊಂಗಲ್ ಗೆ ಒಂದಿಷ್ಟು ತರಕಾರಿ, ಹಸಿಮೆಣಸು ಇತ್ಯಾದಿಗಳನ್ನು ಸೇರಿಸಿ ತಯಾರಿಸಿದ್ದು. ಊಟಕ್ಕೆ ಅಥವಾ ಲಂಚ್ ಬಾಕ್ಸ್ ಗೆ ಚೆನ್ನಾಗಿರುತ್ತದೆ.


ಸರ್ವಿಂಗ್ಸ್ - 3
ತಯಾರಿಸಲು ಬೇಕಾಗುವ ಸಮಯ: 45- 50 ನಿಮಿಷಗಳು

ಬೇಕಾಗುವ ಸಾಮಗ್ರಿಗಳು:
ಹೆಸರುಬೇಳೆ - 3 / 4 ಕಪ್ 
ಅಕ್ಕಿ - 1 ಕಪ್
ಹೆಚ್ಚಿದ ತರಕಾರಿಗಳು ಕ್ಯಾರೆಟ್, ಬೀನ್ಸ್, ಕ್ಯಾಪ್ಸಿಕಂ - ಒಂದೂವರೆ ಕಪ್ 
ಹಸಿಮೆಣಸು - 3 
ಒಗ್ಗರಣೆಗೆ: ಎಣ್ಣೆ / ತುಪ್ಪ, ಜೀರಿಗೆ, ಸಾಸಿವೆ, ಇಂಗು
ಅರಿಶಿನ - 1 / 4 ಚಮಚ 
ಹಾಲು - ಒಂದರಿಂದ ಒಂದೂವರೆ ಕಪ್
ಹೆಚ್ಚಿದ ಈರುಳ್ಳಿ - ಸ್ವಲ್ಪ (ಬೇಕಿದ್ದರೆ)
ಕರಿಬೇವು
ಗೋಡಂಬಿ (ಬೇಕಿದ್ದರೆ)
ನಿಂಬೆಹಣ್ಣು - 1 
ಉಪ್ಪು
ಶುಂಠಿ - 1 ಇಂಚು
ತೆಂಗಿನತುರಿ - 1 / 4 ಕಪ್
ತುಪ್ಪ - 2 ಚಮಚ 

ಮಾಡುವ ವಿಧಾನ:
ಹೆಸರುಬೇಳೆಯನ್ನು ಹದವಾದ ಉರಿಯಲ್ಲಿ ಹೊಂಬಣ್ಣಕ್ಕೆ ಬರುವತನಕ ಹುರಿಯಿರಿ.
ಹುರಿದ ಬೇಳೆಗೆ ನೀರು ಸೇರಿಸಿ ಬೇಳೆಯನ್ನು ತೊಳೆದುಕೊಳ್ಳಿ. ಇದಕ್ಕೆ ತೊಳೆದ ಅಕ್ಕಿ, 2 ಚಮಚದಷ್ಟು ತುಪ್ಪ, ಅರಿಶಿನ, ಹೆಚ್ಚಿದ ತರಕಾರಿಗಳು, ಸುಮಾರು 6 ಕಪ್ ನಷ್ಟು ನೀರು ಸೇರಿಸಿ ಕುಕ್ಕರ್ ನಲ್ಲಿ ಮೂರು ವಿಸಿಲ್ ಆಗುವತನಕ ಬೇಯಿಸಿ.
ನಂತರ ಕುಕ್ಕರ್ ಮುಚ್ಚಳ ತೆರೆದು, ಬೆಂದ ಮಿಶ್ರಣಕ್ಕೆ ಹಾಲು, ಹೆಚ್ಚಿದ ಹಸಿಮೆಣಸು, ಜಜ್ಜಿಕೊಂಡ ಶುಂಠಿ, ರುಚಿಗೆ ತಕ್ಕಷ್ಟು ಉಪ್ಪು, ನಿಂಬೆರಸ, ಹೆಚ್ಚಿದ ಈರುಳ್ಳಿ, ಕರಿಬೇವು, ತೆಂಗಿನತುರಿ ಎಲ್ಲವನ್ನೂ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಬೇಕಿದ್ದರೆ ಸ್ವಲ್ಪ ನೀರನ್ನೂ ಸೇರಿಸಿ. 
ಪೊಂಗಲ್ ಮಿಶ್ರಣವನ್ನು ಆಗಾಗ್ಗೆ ಕೈಯಾಡಿಸುತ್ತ, ಕುದಿ ಬರುವತನಕ ಬಿಸಿಮಾಡಿ ಇಳಿಸಿ.
ಕೊನೆಯಲ್ಲಿ ತುಪ್ಪ ಅಥವಾ ಎಣ್ಣೆಯಲ್ಲಿ ಗೋಡಂಬಿ, ಸಾಸಿವೆ, ಜೀರಿಗೆ, ಇಂಗಿನ ಒಗ್ಗರಣೆ ಮಾಡಿ ಸೇರಿಸಿ. 
ಬಿಸಿ ಇರುವಾಗಲೇ ಕರಿದ ಹಪ್ಪಳದೊಡನೆ ಸರ್ವ್ ಮಾಡಿ.


Thursday, 11 August 2011

ಉದ್ದಿನಬೇಳೆ ಚಕ್ಕುಲಿ / Urad Dal Chakli

Click here for English version.

ತಯಾರಿಸಲು ತುಂಬ ಸಿಂಪಲ್ ಮತ್ತು ತಿನ್ನಲು ಬಹಳ ಸೂಪರ್ಬ್ ಆಗಿರುವ ಚಕ್ಕುಲಿ ಇದು. ತಿನ್ನಲು ಶುರು ಮಾಡಿದರೆ ಸಾಕು ಎನ್ನಿಸುವುದೇ ಇಲ್ಲ! ಟೀಯೊಡನೆ ಅಥವಾ ಪ್ರವಾಸ, ಪಿಕ್ನಿಕ್ ಗಳಿಗೆ ಹೋಗುವಾಗ ಒಯ್ಯಲು ಚೆನ್ನಾಗಿರುತ್ತದೆ. ಕೆಂಪಗೆ ಗರಿಗರಿಯಾಗಿರುವ ಚಕ್ಕುಲಿಗಳು ಬಹಳ ರುಚಿ ಕೂಡ. ತಯಾರಿಸಲು ಹೆಚ್ಚು ಶ್ರಮವೇನೂ ಇಲ್ಲ.. ನೀವೂ ಟ್ರೈ ಮಾಡಿ ನೋಡಿ!
 
ತಯಾರಿಸುವ ಸಮಯ: 1 ಘಂಟೆ
ಈ ಅಳತೆಯಿಂದ ಸುಮಾರು 25 - 30 ಚಕ್ಕುಲಿಗಳನ್ನು ತಯಾರಿಸಬಹುದು.

ಬೇಕಾಗುವ ಸಾಮಗ್ರಿಗಳು:
ಉದ್ದಿನಬೇಳೆ - 3 / 4 ಕಪ್
ಅಕ್ಕಿ ಹಿಟ್ಟು - ಎರಡೂವರೆಯಿಂದ ಮೂರು ಕಪ್
ಮೆಣಸಿನಪುಡಿ - 2 ಟೀ ಚಮಚ
ಓಮ, ಜೀರಿಗೆ - 1 ಟೀ ಚಮಚ
ಕರಿಯಲು ಎಣ್ಣೆ
ರುಚಿಗೆ ತಕ್ಕಷ್ಟು ಉಪ್ಪು


ಮಾಡುವ ವಿಧಾನ:
ಉದ್ದಿನಬೇಳೆಯನ್ನು ನೀರು ಸೇರಿಸಿ ಕುಕ್ಕರ್ ನಲ್ಲಿ ಬೇಯಿಸಿಕೊಂಡು, ತಣ್ಣಗಾದನಂತರ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. 
ಬೇಯಿಸುವಾಗ ಜಾಸ್ತಿ ನೀರನ್ನು ಸೇರಿಸಿದ್ದರೆ ರುಬ್ಬುವಾಗ ಹೆಚ್ಚಿನ ನೀರನ್ನು ತೆಗೆದುಬಿಡಿ. ತಯಾರಿಸಿದ ಹಿಟ್ಟು ದೋಸೆ ಹಿಟ್ಟಿನ ಹದದಲ್ಲಿರಲಿ.
ರುಬ್ಬಿಕೊಂಡ ಉದ್ದಿನ ಹಿಟ್ಟಿಗೆ ಉಪ್ಪು, ಮೆಣಸಿನಪುಡಿ, ಓಮ, ಜೀರಿಗೆ, ಅಕ್ಕಿಹಿಟ್ಟು ಸೇರಿಸಿ ಚಪಾತಿ ಹಿಟ್ಟಿನಂತೆ ಕಲಸಿಕೊಳ್ಳಿ.
ಕಲಸಿಕೊಂಡ ಹಿಟ್ಟನ್ನು ಚಕ್ಕುಲಿ ಒರಳಿನಲ್ಲಿ ಒತ್ತಿ, ಚಕ್ಕುಲಿಗಳನ್ನು ತಯಾರಿಸಿ ಕಾದ ಎಣ್ಣೆಯಲ್ಲಿ ಗರಿಯಾಗಿ ಕರಿದು ತೆಗೆಯಿರಿ.  


ಟಿಪ್ಸ್: 
  • ಚಕ್ಕುಲಿ ಒರಳಿಗೆ ಎಣ್ಣೆ ಸವರಿಕೊಂಡು ನಂತರ ಹಿಟ್ಟನ್ನು ಹಾಕಿ. ಇದರಿಂದ ಹಿಟ್ಟು ಚಕ್ಕುಲಿ ಒರಳಿಗೆ ಹೆಚ್ಚು ಅಂಟಿಕೊಳ್ಳುವುದಿಲ್ಲ. ಇದರಿಂದ ಚಕ್ಕುಲಿ ಒರಳನ್ನು ತೊಳೆಯುವುದಕ್ಕೂ ಸುಲಭವಾಗುತ್ತದೆ.

Monday, 8 August 2011

ಸ್ಪೆಷಲ್ ಮೊಸರನ್ನ / Curd Rice..in a different way!

Click here for English version.

ನನ್ನವರು ಅಡಿಗೆ ಮನೆಗೆ ಕಾಲಿಡುವುದು ಬಹಳ ಅಪರೂಪ. ಅವರೇ ಅಡಿಗೆ ಮಾಡುವುದಾದರೆ ಏನಾದರೂ ಹೊಸ ಹೊಸ ಪ್ರಯೋಗಗಳನ್ನು ಮಾಡುತ್ತಿರುತ್ತಾರೆ. ನಾನು ಮನೆಯಲ್ಲಿ ಇಲ್ಲದಾಗ ಒಂದು ದಿನ ಲಂಚ್ ಬಾಕ್ಸ್ ಗೆ ಹಾಕಿಕೊಂಡು ಹೋಗಲು ತರಕಾರಿ, ಹಣ್ಣುಗಳನ್ನು ಹಾಕಿ ಮೊಸರನ್ನ ತಯಾರಿಸಿದ್ದರಂತೆ. ಅದು ಬಹಳ ಚೆನ್ನಾಗಿ ಬಂತೆಂದು, ಇನ್ನೊಂದು ದಿನ ನನಗೂ ಅದರ ರುಚಿಯನ್ನು ತೋರಿಸಿಯಾಯಿತು. ನಿಜಕ್ಕೂ ತುಂಬ ಚೆನ್ನಾಗಿತ್ತು ಮೊಸರನ್ನ! ಈಗ ನಾನು ಯಾವಾಗಲಾದರೂ ಮೊಸರನ್ನವನ್ನು ತಯಾರಿಸಿದರೆ ಅವರು ಹೇಳುವ ಮಾತು - 'ಚೆನ್ನಾಗಿದೆ, ಆದರೆ ನಾನು ಮಾಡಿದಷ್ಟು ಚೆನ್ನಾಗಿ ಬಂದಿಲ್ಲ!' ನಾನು ಏನು ಹೇಳಲು ಸಾಧ್ಯ ಅಲ್ಲವೇ? ಏಕೆಂದರೆ ಈ ಮೊಸರನ್ನದ ಕಾಪಿ ರೈಟ್ ಅವರದು!! (*)


ಸರ್ವಿಂಗ್ಸ್: 2 
ತಯಾರಿಸುವ ಸಮಯ: 15 ನಿಮಿಷಗಳು
 
ಬೇಕಾಗುವ ಸಾಮಗ್ರಿಗಳು:
ಅನ್ನ - 1 1 /4 ಲೋಟ ಅಕ್ಕಿಯದು 
ಕ್ಯಾರೆಟ್ - ಅರ್ಧ
ಗ್ರಾನಿ ಸ್ಮಿತ್ ಆಪಲ್ (ಹಸಿರು ಬಣ್ಣದ ಸ್ವಲ್ಪ ಹುಳಿ ಇರುವ ಸೇಬು) - ಅರ್ಧ
ಹಸಿಮೆಣಸು - 2 
ಕರಿಬೇವು 
ಶುಂಠಿ - 1 ಇಂಚು
ಅರಿಶಿನ - 1 / 4 ಚಮಚ
ಮೆಣಸಿನ ಪುಡಿ - 1 / 4 ಚಮಚ (ಬೇಕಿದ್ದರೆ)
ಗೋಡಂಬಿ - ಸ್ವಲ್ಪ  
ಉಪ್ಪು
ಗಟ್ಟಿ ಮೊಸರು - 1 ಬೌಲ್ 
ಒಗ್ಗರಣೆಗೆ: ಎಣ್ಣೆ, ಉದ್ದಿನಬೇಳೆ, ಸಾಸಿವೆ

ಮಾಡುವ ವಿಧಾನ:
ಮೊದಲು ಕ್ಯಾರೆಟ್ ತುರಿದುಕೊಳ್ಳಿ. ಸೇಬು ಹಣ್ಣನ್ನು ಚಿಕ್ಕದಾಗಿ ಹೆಚ್ಚಿಕೊಳ್ಳಿ.
ಅನ್ನವನ್ನು ಒಂದು ಪ್ಲೇಟ್ ನಲ್ಲಿ ಹರವಿ ತಣ್ಣಗಾಗಲು ಬಿಡಿ.
ಒಂದು ಪಾತ್ರೆಯಲ್ಲಿ ಅನ್ನ, ಮೊಸರು, ಜಜ್ಜಿದ ಶುಂಠಿ, ಉಪ್ಪು, ಕ್ಯಾರೆಟ್ ತುರಿ, ಹೆಚ್ಚಿದ ಸೇಬು, ರುಚಿಗೆ ತಕ್ಕಷ್ಟು ಮೆಣಸಿನ ಪುಡಿ ಸೇರಿಸಿ ಕಲಸಿಕೊಳ್ಳಿ. ಬೇಕಿದ್ದರೆ ಕಲಸುವಾಗ ಸ್ವಲ್ಪ ನೀರು ಸೇರಿಸಿ.
ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ, ಗೋಡಂಬಿ, ಉದ್ದಿನಬೇಳೆ, ಸಾಸಿವೆ, ಅರಿಶಿನ ಹಾಕಿ ಚಟಗುಟ್ಟಿದ ನಂತರ ಹೆಚ್ಚಿದ ಹಸಿಮೆಣಸು, ಕರಿಬೇವು ಸೇರಿಸಿ.
ಒಗ್ಗರಣೆಯನ್ನು ಮೊದಲು ತಯಾರಿಸಿಕೊಂಡ ಮೊಸರನ್ನಕ್ಕೆ ಸೇರಿಸಿ ಕಲಸಿ.
ಮೊಸರು ಹುಳಿ ಇಲ್ಲದಿದ್ದರೆ ಬೇಕಿದ್ದರೆ ಸ್ವಲ್ಪ ನಿಂಬೆರಸ ಸೇರಿಸಿ ಕಲಸಿದರೆ ಚೆನ್ನಾಗಿರುತ್ತದೆ.


Thursday, 4 August 2011

ಪಾಪ್ ಕಾರ್ನ್ / Pop Corn

Click here for English version.

ವೀಕೆಂಡ್ ಗೆ ಮೂರು ದಿನ ರಜಾ ಇತ್ತು ಕಳೆದ ವಾರ. ಅದಕ್ಕೇ ಒಂದು ದಿನ ಎಲ್ಲಾದರೂ ಟ್ರಿಪ್ ಗೆ ಹೋಗೋಣವೆಂದು ಪ್ಲಾನ್ ಮಾಡಿದ್ದೆವು. ಇತ್ತೀಚಿಗೆ ಎಲ್ಲೂ ಹೋಗಿರದ ಕಾರಣ ನಮಗೂ ಚೇಂಜ್ ಬೇಕಿತ್ತು. ಟ್ರಿಪ್ ಎಂದಮೇಲೆ ಏನಾದರೂ ಕುರುಕಲು ತಿಂಡಿಗಳೂ ಜೊತೆಗೆ ಇರಬೇಕಲ್ಲ? ಕೇವ್ಸ್ ನ ದೂರ ಪ್ರಯಾಣದ ಹಾದಿಗೆ ಮನೆಯಲ್ಲೇ ತಯಾರಿಸಿದ ಪಾಪ್ ಕಾರ್ನ್ ಜೊತೆಯಾಯಿತು..
ಪಾಪ್ ಕಾರ್ನ್ ನ್ನು ಮನೆಯಲ್ಲೇ ಬಹಳ ಸುಲಭವಾಗಿ ಕಡಿಮೆ ಸಮಯದಲ್ಲಿ ತಯಾರಿಸಬಹುದು. ಯಾರಾದರೂ ಮನೆಗೆ ಬಂದಾಗ, ಅಥವಾ ಅರ್ಜೆಂಟ್ ಆಗಿ ಏನಾದರೂ ಕುರುಕಲು ತಿಂಡಿ ಬೇಕೆನಿಸಿದಾಗ ಥಟ್ ಎಂದು ಪಾಪ್ ಕಾರ್ನ್ ರೆಡಿ ಮಾಡಬಹುದು! ಇಲ್ಲಿದೆ ನೋಡಿ ಪಾಪ್ ಕಾರ್ನ್ ತಯಾರಿಸುವ ವಿಧಾನ.. 


ಬೇಕಾಗುವ ಸಮಯ: 20 ನಿಮಿಷ
ಸರ್ವಿಂಗ್: 3 - 4 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಜೋಳದ ಬೀಜ (Popping Corn) -1/ 2 ಕಪ್
ಆಲಿವ್ ಆಯಿಲ್ - ಸ್ವಲ್ಪ
ಉಪ್ಪು
ಪೆಪ್ಪರ್ ಪೌಡರ್ 


ಮಾಡುವ ವಿಧಾನ:
ಒಂದು ಬಾಣಲೆಯಲ್ಲಿ ಎರಡು ಚಮಚ ಎಣ್ಣೆ ಹಾಕಿ ಚೆನ್ನಾಗಿ ಕಾಯಿಸಿ.
ಎಣ್ಣೆ ಕಾದು, ಹೊಗೆ ಬರುವಂತಾದಾಗ ಅದಕ್ಕೆ 4 - 5 ಚಮಚ ಜೋಳವನ್ನು ಹಾಕಿ, ಒಂದು ಪ್ಲೇಟ್ ಮುಚ್ಚಿ.
ಮುಚ್ಚಳ ಮುಚ್ಚಿ ಒಂದು ನಿಮಿಷದೊಳಗೇ ಪಾಪ್ ಕಾರ್ನ್ ಸಿಡಿಯುವ ಸದ್ದು ಕೇಳತೊಡಗುತ್ತದೆ.
ಒಂದೆರಡು ಬಾರಿ ಮರದ ಸೌಟಿನಿಂದ ಪಾಪ್ ಕಾರ್ನ್ ನ್ನು ಮಿಕ್ಸ್ ಮಾಡಿ.
ತಯಾರಾದ ಪಾಪ್ ಕಾರ್ನ್ ಗೆ ಸ್ವಲ್ಪ ಉಪ್ಪು, ಬೇಕಿದ್ದರೆ ಸ್ವಲ್ಪ ಪೆಪ್ಪರ್ ಪೌಡರ್ ಸೇರಿಸಿ ಮಿಕ್ಸ್ ಮಾಡಿ.
ನಿಮಗೆ ಬೇಕಾದಷ್ಟು ಪಾಪ್ ಕಾರ್ನ್ ನ್ನು ಇದೇ ಸ್ಟೆಪ್ ಗಳನ್ನು ಅನುಸರಿಸಿ ತಯಾರಿಸಿಕೊಳ್ಳಿ.


ಟಿಪ್ಸ್:
  • ಆಲಿವ್ ಆಯಿಲ್ ಬದಲಾಗಿ ಸನ್ ಫ್ಲವರ್ ಆಯಿಲ್ ಅಥವಾ ಬೆಣ್ಣೆಯನ್ನೂ ಬಳಸಬಹುದು.
  • ಕಾದ ಎಣ್ಣೆಗೆ ಸ್ವಲ್ಪ ಅರಿಶಿನವನ್ನೂ ಸೇರಿಸಿ ಹಳದಿ ಮಿಶ್ರಿತ ಪಾಪ್ ಕಾರ್ನ್ ತಯಾರಿಸಬಹುದು.

Wednesday, 3 August 2011

ಬಸಳೆ ಸೊಪ್ಪಿನ ಕರಕಲಿ / Malabar Spinach Curry (Karakali)

Click here for English version.

ಇದೊಂದು ಹವ್ಯಕರ ಸಾಂಪ್ರದಾಯಿಕ ಅಡುಗೆ. ಕರಕಲಿ ಎಂದರೆ ಒಂದು ಬಗೆಯ ಗೊಜ್ಜು. ಅನ್ನದೊಡನೆ ಕಲಸಿಕೊಳ್ಳಲು, ಅದರಲ್ಲೂ ಖಾರ ಪ್ರಿಯರಿಗೆ ಬಹಳ ಇಷ್ಟವಾಗುತ್ತದೆ. ಮಳೆಗಾಲದ ದಿನಗಳಲ್ಲಿ ಇಂತಹ ಅಡಿಗೆ ಪದಾರ್ಥಗಳು ಊಟದ ರುಚಿಯನ್ನು ಹೆಚ್ಚಿಸುತ್ತವೆ.
ಹೇಳಲು ಮರೆತೆ, ಈ ಬಸಳೆ ಸೊಪ್ಪು ನಮ್ಮ ಬಾಲ್ಕನಿಯಲ್ಲೇ ಬೆಳೆದದ್ದು.. :) ವಿಟಾಮಿನ್ 'ಎ' ಮತ್ತು 'ಸಿ'ಗಳ ಆಗರವಾಗಿರುವ ಈ ಸೊಪ್ಪು ಆರೋಗ್ಯಕ್ಕೆ ತುಂಬ ಒಳ್ಳೆಯದು. ಬಸಳೆ ಸೊಪ್ಪಿನ ಸಾಂಬಾರ್ ಕೂಡ ಬಹಳ ಚೆನ್ನಾಗಿರುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 45 - 50 ನಿಮಿಷಗಳು 

ಬೇಕಾಗುವ ಸಾಮಗ್ರಿಗಳು:
ಬಸಳೆ ಸೊಪ್ಪು - 1 ಕಟ್ಟು 
ಒಣಮೆಣಸು - 3 (ಖಾರಕ್ಕೆ ತಕ್ಕಂತೆ)
ನೀರು - 1 / 2 ಲೋಟ
ಒಗ್ಗರಣೆಗೆ: ಎಣ್ಣೆ - 2 ಚಮಚ, ಉದ್ದಿನಬೇಳೆ - 1 / 2 ಚಮಚ, ಸಾಸಿವೆ - 1 / 4 ಚಮಚ, ಇಂಗು, ಚಿಟಿಕೆ ಅರಿಶಿನ 
ಉಪ್ಪು - ರುಚಿಗೆ ತಕ್ಕಷ್ಟು 
ಆಮ್ ಚೂರ್ ಪೌಡರ್ - 1 / 2 ಚಮಚ
ಜಜ್ಜಿದ ಬೆಳ್ಳುಳ್ಳಿ - 1 ಚಮಚ

ಮಾಡುವ ವಿಧಾನ:
ಬಸಳೆ ಸೊಪ್ಪನ್ನು ಚೆನ್ನಾಗಿ ತೊಳೆದುಕೊಂಡು, ಸಣ್ಣಗೆ ಹೆಚ್ಚಿಕೊಳ್ಳಿ.


ಬಾಣಲೆಯಲ್ಲಿ 2 ಚಮಚ ಎಣ್ಣೆ ಕಾಯಿಸಿ ಒಣಮೆಣಸು, ಉದ್ದಿನಬೇಳೆ, ಸಾಸಿವೆ, ಇಂಗು, ಅರಿಶಿನ ಹಾಕಿ ಒಗ್ಗರಣೆ ಮಾಡಿಕೊಂಡು, ಸಣ್ಣಗೆ ಹೆಚ್ಚಿದ ಬಸಳೆ ಸೊಪ್ಪನ್ನು ಸೇರಿಸಿ.
ಇದಕ್ಕೆ ಅರ್ಧ ಲೋಟದಷ್ಟು ನೀರು, ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್ ಸೇರಿಸಿ ಒಂದು ಪ್ಲೇಟ್ ಮುಚ್ಚಿ ಬೇಯಿಸಿ.
ಆಗಾಗ್ಗೆ ಮುಚ್ಚಳ ತೆರೆದು ಕೈಯಾಡಿಸುತ್ತಿರಿ. ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಿ.
ಸುಮಾರು 25 - 30 ನಿಮಿಷ ಬೇಯಿಸುವಷ್ಟರಲ್ಲಿ ಸೊಪ್ಪು ಬೆಂದು ಚೆನ್ನಾಗಿ ಕರಗಿರುತ್ತದೆ. ಕರಗಿಲ್ಲವಾದರೆ ಮಿಶ್ರಣವನ್ನು ಮಿಕ್ಸಿಯಲ್ಲಿ ಒಮ್ಮೆ ರುಬ್ಬಿಕೊಳ್ಳಿ.
ಕೊನೆಯಲ್ಲಿ ಇದಕ್ಕೆ ಬೆಳ್ಳುಳ್ಳಿ ಒಗ್ಗರಣೆ ಮಾಡಿ. ಬಿಸಿ ಅನ್ನದೊಡನೆ ಹಾಕಿಕೊಂಡು ಊಟ ಮಾಡಿ.
ಈ ಕರಕಲಿಯನ್ನು 2 ದಿನ ಇಟ್ಟುಕೊಂಡು ಬಳಸಬಹುದು. 
Related Posts Plugin for WordPress, Blogger...