Here are some recipes which I came across through the net, books, so on and few are my own experiments..

Saturday, 28 January 2012

ಹಸಿ ಅರಿಶಿನದ ಗೊಜ್ಜು / Raw Turmeric Gojju

Click here for English version.

ಅನಾದಿಕಾಲದಿಂದಲೂ ಅರಿಶಿನ ಅರೋಗ್ಯ ಮತ್ತು ಸೌಂದರ್ಯದ ದೃಷ್ಟಿಯಿಂದ ತನ್ನದೇ ಆದ ಮಹತ್ವವನ್ನು ಹೊಂದಿದೆ. ಇದು ಹೊಂದಿರುವ ಔಷಧೀಯ ಗುಣಗಳಿಂದಾಗಿ ನಮ್ಮ ದಿನನಿತ್ಯದ ಅಡಿಗೆಯಲ್ಲಿ ಅರಿಶಿನವನ್ನು ಸಾಮಾನ್ಯವಾಗಿ ಬಳಸುತ್ತೇವೆ. ಇನ್ನು ಸೌಂದರ್ಯ ಸಾಧನಗಳಾದ ಕ್ರೀಮ್, ಲೋಶನ್, ಫೇಸ್ ಪ್ಯಾಕ್ ಇತ್ಯಾದಿಗಳ ತಯಾರಿಕೆಯಲ್ಲಿ ಅರಿಶಿನ ಎಷ್ಟು ಬಳಕೆಯಾಗುವುದೆಂದು ನಮಗೆಲ್ಲ ಗೊತ್ತೇ ಇದೆ. ಔಷಧೀಯ ದೃಷ್ಟಿಯಿಂದ ಹೇಳುವುದಾದರೆ ಅರಿಶಿನ ನಂಜು ನಿವಾರಕ ಮತ್ತು ಕಫ ನಿವಾರಕ. ಹೀಗಾಗಿ ಆಯುರ್ವೇದ ಔಷಧಗಳ ತಯಾರಿಕೆಯಲ್ಲಿ ಇದನ್ನು ಬಳಸುತ್ತಾರೆ. ಅರಿಶಿನದ ಉಪಯೋಗಗಳನ್ನು ಪಟ್ಟಿ ಮಾಡುತ್ತ ಹೋದರೆ ಎಷ್ಟು ದೊಡ್ಡ ಲಿಸ್ಟ್ ತಯಾರಾಗುವುದೋ ಗೊತ್ತಿಲ್ಲ!
ಈಗ ಗೊಜ್ಜಿನ ವಿಷಯಕ್ಕೆ ಬರೋಣ.. ಅಮ್ಮ ಊರಿನಿಂದ ಬರುವಾಗ ಅವರ ಹಿತ್ತಲಿನಲ್ಲಿ ಬೆಳೆದ ಹಸಿ ಅರಿಶಿನದ ಬೇರುಗಳನ್ನು ನಮಗೆಂದು ತಂದಿದ್ದರು. ಅವರಿಂದ ಕಲಿತು ನಾನು ತಯಾರಿಸಿದ ಗೊಜ್ಜು ಇದು. ಆರೋಗ್ಯದ ದೃಷ್ಟಿಯಿಂದಲೂ ಒಳ್ಳೆಯದು ಮತ್ತು ನಾಲಿಗೆಗೂ ಬಹಳ ರುಚಿ! ಫ್ರಿಜ್ ನಲ್ಲಿ ಇಟ್ಟುಕೊಂಡು ಒಂದು ವಾರದವರೆಗೂ ಬಳಸಬಹುದು.
 

ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು
ಸರ್ವಿಂಗ್ಸ್: 10 - 12 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಹಸಿ ಅರಿಶಿನ - 2 ಇಂಚಿನ 3 ಚೂರುಗಳು 
ಕಾಳುಮೆಣಸು 7 - 8 
ಉದ್ದಿನಬೇಳೆ - 1 ಚಮಚ 
ಸಾಸಿವೆ - 1/2 ಚಮಚ 
ಎಳ್ಳು - 1 ಚಮಚ


ಎಣ್ಣೆ - 2 ಚಮಚ
ತೆಂಗಿನತುರಿ - 1 ಕಪ್
ಹುಣಸೆಹಣ್ಣು - 1 - 1 1/2 ಚಮಚ (ರುಚಿಗೆ ತಕ್ಕಷ್ಟು)
ಬೆಲ್ಲ - ಸಿಹಿಯಾಗುವಷ್ಟು (ನಾನು 4 ಚಮಚ ಬೆಲ್ಲ ಮತ್ತು 3 ಚಮಚ ಸಕ್ಕರೆ ಬಳಸಿದ್ದೇನೆ)
ರುಚಿಗೆ ತಕ್ಕಷ್ಟು ಉಪ್ಪು   

ಮಾಡುವ ವಿಧಾನ:
ಅರಿಶಿನವನ್ನು ಸ್ವಚ್ಛವಾಗಿ ತೊಳೆದುಕೊಂಡು, ಒಂದು ಫೋರ್ಕ್ ನಿಂದ ಚುಚ್ಚಿ ತೂತುಗಳನ್ನು ಮಾಡಿಕೊಳ್ಳಿ. ಹೀಗೆ ಮಾಡುವುದರಿಂದ ಬೇಯಿಸುವುದಕ್ಕೆ ಅನುಕೂಲವಾಗುತ್ತದೆ.
ಅರಿಶಿನದ ಚೂರುಗಳನ್ನು ಬೆಂಕಿಗೆ ಹಿಡಿದು 4 - 5 ನಿಮಿಷ ಅಥವಾ ಸ್ವಲ್ಪ ಮೆತ್ತಗಾಗುವವರೆಗೆ ಸುಡಿ. ಇಲ್ಲವೇ ಇವನ್ನು ಸ್ವಲ್ಪ ನೀರು ಸೇರಿಸಿ ಕುಕ್ಕರ್ ನಲ್ಲಿ ಬೇಯಿಸಿಕೊಳ್ಳಿ.
ಸುಟ್ಟ ಅರಿಶಿನವನ್ನು ಒಮ್ಮೆ ತೊಳೆದುಕೊಂಡು, ಕಪ್ಪಗಾದ ತೆಳ್ಳಗಿನ ಸಿಪ್ಪೆಯನ್ನು ತೆಗೆದುಬಿಡಿ. ನಂತರ ಇವನ್ನು ಚಿಕ್ಕ ಚೂರುಗಳಾಗಿ ಹೆಚ್ಚಿಕೊಳ್ಳಿ.


ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಕಾಯಿಸಿಕೊಂಡು ಕಾಳುಮೆಣಸು ಹಾಕಿ ಚಟಪಟ ಎನ್ನುವವರೆಗೆ ಹುರಿಯಿರಿ. ನಂತರ ಇದಕ್ಕೆ ಉದ್ದಿನಬೇಳೆ, ಸಾಸಿವೆ ಮತ್ತು ಎಳ್ಳು ಸೇರಿಸಿ ಹುರಿದು ಇಳಿಸಿ.
ಹುರಿದ ಮಿಶ್ರಣ, ತೆಂಗಿನತುರಿ, ಅರಿಶಿನದ ಚೂರುಗಳು ಮತ್ತು ಹುಣಸೆಹಣ್ಣು ಇಷ್ಟನ್ನೂ ಮಿಕ್ಸಿಯಲ್ಲಿ ಸ್ವಲ್ಪ ನೀರಿನೊಂದಿಗೆ ನುಣ್ಣಗೆ ರುಬ್ಬಿಕೊಳ್ಳಿ.
ರುಬ್ಬಿದ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಬೆಲ್ಲ ಸೇರಿಸಿ ಐದು ನಿಮಿಷ ಕುದಿಸಿ, ಮಿಶ್ರಣ ದಪ್ಪಗಾದ ನಂತರ ಇಳಿಸಿ.
ಸ್ವಲ್ಪ ಸಿಹಿ ಮಿಶ್ರಿತವಾದ ಈ ಗೊಜ್ಜು ಅನ್ನದೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ.
ಈ ಗೊಜ್ಜು ಹೊರಗಡೆ ಇಟ್ಟರೆ 2 - 3 ದಿನ ಚೆನ್ನಾಗಿರುತ್ತದೆ. ಫ್ರಿಜ್ ನಲ್ಲಿ ಇಟ್ಟುಕೊಂಡು ವಾರದವರೆಗೂ ಬಳಸಬಹುದು.


Monday, 23 January 2012

ಬಾಳೆಹಣ್ಣಿನ ಮಫಿನ್ಸ್ (ಕಪ್ ಕೇಕ್ಸ್) / Banana Muffins (Cupcakes)

Click here for English version.
   
ಕಪ್ ಕೇಕ್ ತಯಾರಿಸಬೇಕೆಂದು ಮೌಲ್ಡ್ ಗಳನ್ನು ತಂದಿಟ್ಟುಕೊಂಡು ತುಂಬಾ ದಿನಗಳಾಗಿತ್ತು. ಹೊಸ ಓವನ್ ನಲ್ಲಿ ಏನಾದರೂ ಟ್ರೈ ಮಾಡೋಣವೆಂದು ಯೋಚಿಸಿದಾಗ ಈ ಮಫಿನ್ ಮೌಲ್ಡ್ ಗಳ ನೆನಪಾಯಿತು. ನಂತರ ಬಾಳೆಹಣ್ಣು ಬಳಸಿ ಕಪ್ ಕೇಕ್ ಮಾಡಿದೆ. ಅಂತೂ ಕಪ್ ಕೇಕ್ ತಯಾರಿಸುವ ನನ್ನ ಮೊದಲ ಪ್ರಯತ್ನ ಸಫಲವಾಯಿತು! <:-P
ಬಾಳೆಹಣ್ಣಿನ ಪರಿಮಳದೊಂದಿಗೆ ಮೆತ್ತಗಿನ ಕಪ್ ಕೇಕ್ ಗಳು ತಿನ್ನಲು ಬಹಳ ಚೆನ್ನಾಗಿದ್ದವು. ನಾವು ಸಂಜೆಯ ಟೀಯೊಡನೆ ಈ ಕಪ್ ಕೇಕ್ ಗಳನ್ನು ಸವಿದೆವು. ಬಾಳೆಹಣ್ಣು ಮತ್ತು ಮೈದಾ ಹಿಟ್ಟು ಬಳಸುವುದರಿಂದ ಇವನ್ನು ತಿಂದರೆ ಚೆನ್ನಾಗಿ ಹೊಟ್ಟೆಯೂ ತುಂಬುತ್ತದೆ. ಹೀಗಾಗಿ ಬೆಳದಿನ ತಿಂಡಿ ಅಥವಾ ಮಕ್ಕಳ ಸ್ನ್ಯಾಕ್ಸ್ ಡಬ್ಬಕ್ಕೆ ಈ ಮಫಿನ್ ಗಳು ಚೆನ್ನಾಗಿರುತ್ತವೆ. ಕಡಿಮೆ ಸಾಮಗ್ರಿಗಳನ್ನು ಬಳಸಿ ಸುಲಭದಲ್ಲಿ ತಯಾರಿಸಬಹುದಾದ ಈ ಮಫಿನ್ ಗಳನ್ನು ನೀವೂ ಮಾಡಿನೋಡಿ!


ಹಿಟ್ಟನ್ನು ತಯಾರಿಸಲು ಬೇಕಾಗುವ ಸಮಯ: 10 ನಿಮಿಷಗಳು 
ಬೇಕಿಂಗ್ ಟೈಮ್: 23 - 25 ನಿಮಿಷಗಳು 
ಈ ಅಳತೆಯಿಂದ 5 ದೊಡ್ಡ ಕಪ್ ಕೇಕ್ ಗಳನ್ನು ತಯಾರಿಸಬಹುದು
 
ಬೇಕಾಗುವ ಸಾಮಗ್ರಿಗಳು:
ಬಾಳೆಹಣ್ಣು (ದೊಡ್ಡದು) - 2 
ಮೈದಾಹಿಟ್ಟು - 1 1/2 ಕಪ್  
ಸಕ್ಕರೆ - 3/4 ಕಪ್ 
ಅಡಿಗೆ ಎಣ್ಣೆ - 1/4 ಕಪ್  
ಅಡಿಗೆ ಸೋಡಾ - 3/4 ಚಮಚ  
ಬೇಕಿಂಗ್ ಪೌಡರ್ - 1/2 ಚಮಚ  
ಚಿಟಿಕೆ ಉಪ್ಪು 
ವೆನಿಲ್ಲಾ ಎಸೆನ್ಸ್ - 1 ಚಮಚ 
ಅಲಂಕಾರಕ್ಕೆ ಗೋಡಂಬಿ ಚೂರುಗಳು  


ಮಾಡುವ ವಿಧಾನ:
ಮೈದಾಹಿಟ್ಟು, ಉಪ್ಪು, ಬೇಕಿಂಗ್ ಪೌಡರ್ ಮತ್ತು ಅಡಿಗೆ ಸೋಡಾ ಇಷ್ಟನ್ನೂ ಒಟ್ಟಿಗೆ ಸೇರಿಸಿ ಜರಡಿಯಾಡಿಕೊಳ್ಳಿ.
ಸಕ್ಕರೆಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿಮಾಡಿಕೊಳ್ಳಿ  
ಓವನ್ ನ್ನು 190 °C / 380 °F ಗೆ ಪ್ರೀ ಹೀಟ್ ಮಾಡಿಕೊಳ್ಳಿ.
ಬಾಳೆಹಣ್ಣನ್ನು ಮಧ್ಯಮಗಾತ್ರದ ಚೂರುಗಳಾಗಿ ಹೆಚ್ಚಿಕೊಂಡು ಮಿಕ್ಸಿಯಲ್ಲಿ ನೀರು ಸೇರಿಸದೆ ರುಬ್ಬಿ, ನುಣ್ಣಗಿನ ಪೇಸ್ಟ್ ತಯಾರಿಸಿಕೊಳ್ಳಿ.
ಬಾಳೆಹಣ್ಣಿನ ಪೇಸ್ಟ್ ನ್ನು ಒಂದು ಮಿಕ್ಸಿಂಗ್ ಬೌಲ್ ಗೆ ಹಾಕಿಕೊಂಡು ಅದಕ್ಕೆ ಸಕ್ಕರೆಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ನಂತರ ಇದಕ್ಕೆ ಬೇಕಿಂಗ್ ಪೌಡರ್ ಮತ್ತು ಅಡಿಗೆ ಸೋಡಾ ಸೇರಿಸಿ ನಿಧಾನವಾಗಿ ಕಲಕಿ, 2 ನಿಮಿಷ ಬಿಡಿ. ಅಷ್ಟರಲ್ಲಿ ಈ ಮಿಶ್ರಣ ನೊರೆಯಂತಾಗಿ ಉಬ್ಬಿಬರುತ್ತದೆ.
ಇದಕ್ಕೆ ಅಡಿಗೆ ಎಣ್ಣೆ ಮತ್ತು ವೆನಿಲ್ಲಾ ಎಸ್ಸೆನ್ಸ್ ಸೇರಿಸಿ ಕಲಕಿಕೊಂಡು, ಜರಡಿಯಾಡಿದ ಮೈದಾಹಿಟ್ಟನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸಿ, ಗಂಟಿಲ್ಲದಂತೆ ಮಿಕ್ಸ್ ಮಾಡಿ. ಮಿಶ್ರಣವನ್ನು ತುಂಬಾ ಕಲಕಬೇಡಿ ಮತ್ತು ನಿಧಾನವಾಗಿ ಮಿಕ್ಸ್ ಮಾಡಿ.
ಹಿಟ್ಟು ದೋಸೆ ಹಿಟ್ಟಿಗಿಂತ ಸ್ವಲ್ಪ ದಪ್ಪವಿರಲಿ. ತುಂಬಾ ದಪ್ಪವೆನಿಸಿದರೆ ಸ್ವಲ್ಪ ಹಾಲು ಸೇರಿಸಿ ಕಲಸಿ.
ಮಫಿನ್ ಮೌಲ್ಡ್ ಗಳ ಒಳಗೆ ಕಾಗದದ ಕಪ್ ಗಳನ್ನು ಜೋಡಿಸಿಕೊಳ್ಳಿ. ತಯಾರಿಸಿದ ಹಿಟ್ಟನ್ನು ಮಫಿನ್ ಕಪ್ ನ ಒಳಗೆ ಮುಕ್ಕಾಲು ಭಾಗದ ವರೆಗೆ ಹಾಕಿ. ಮಫಿನ್ ಗಳು ಉಬ್ಬಿ ಬರುವುದರಿಂದ ಮುಕ್ಕಾಲು ಭಾಗದ ತನಕ ಹಿಟ್ಟನ್ನು ಹಾಕಿದರೆ ಸಾಕು.
ಅಲಂಕಾರಕ್ಕೆ ಮೇಲಿನಿಂದ ಗೋಡಂಬಿ ಚೂರುಗಳನ್ನು ಉದುರಿಸಿ.
ಈ ಮಫಿನ್ ಗಳನ್ನು ಪ್ರೀ ಹೀಟ್ ಮಾಡಿದ ಓವನ್ ನಲ್ಲಿಟ್ಟು 20 - 25 ನಿಮಿಷ ಬೇಯಿಸಿ. ನಾನು ತಯಾರಿಸಿದ ಮಫಿನ್ ಗಳು ಸರಿಯಾಗಿ 23 ನಿಮಿಷಕ್ಕೆ ಚೆನ್ನಾಗಿ ಬೆಂದಿದ್ದವು.
ಮಫಿನ್ ಗಳು ಬೆಂದಿವೆಯೇ ಎಂದು ನೋಡಲು ಒಂದು ಚಾಕು ಅಥವಾ ಕಡ್ಡಿಯನ್ನು ಮಫಿನ್ ನ ಒಳತನಕ ಚುಚ್ಚಿನೋಡಿ. ಹಿಟ್ಟು ಕಡ್ಡಿಗೆ ಅಂಟಿಕೊಂಡಿಲ್ಲವಾದರೆ ಮಫಿನ್ ಗಳು ಬೆಂದಿವೆ ಎಂದರ್ಥ.      
ತಯಾರಾದ ಮಫಿನ್ ಗಳನ್ನು ಟೀ ಅಥವಾ ಕಾಫಿಯೊಡನೆ ಸವಿಯಿರಿ. ಬೆಳಗ್ಗಿನ ತಿಂಡಿ ಅಥವಾ ಮಕ್ಕಳ ಸ್ನ್ಯಾಕ್ಸ್ ಗೂ ಈ ಮಫಿನ್ ಗಳು ಚೆನ್ನಾಗಿರುತ್ತವೆ :)


Friday, 20 January 2012

ಹುಣಸೆಕಾಯಿ ತೊಕ್ಕು / Raw Tamarind Thokku

Click here for English version.
 
ನಮ್ಮೂರ ಕಡೆ ಹುಣಸೆ ಕಾಯಿ ಬೆಳೆಯುವ ಸೀಜನ್ ನಲ್ಲಿ ಸಾಮಾನ್ಯವಾಗಿ ಇಂಥ ತೊಕ್ಕನ್ನು ಮಾಡುತ್ತಾರೆ. ಇದನ್ನು ನೀರು ಹಾಕದೆ ರುಬ್ಬುವುದರಿಂದ ತಿಂಗಳುಗಟ್ಟಲೆ ಇಟ್ಟುಕೊಂಡು ಬಳಸಬಹುದು. ನಮ್ಮ ಮನೆಯಲ್ಲಿ ಊರಿಂದ ಬರುವಾಗ ತಂದ ಹುಣಸೆಕಾಯಿ ಸ್ವಲ್ಪ ಇತ್ತು. ಅಮ್ಮನ ಬಳಿ ತೊಕ್ಕು ಮಾಡುವ ವಿಧಾನವನ್ನು ಕೇಳಿಕೊಂಡು ತೊಕ್ಕು ತಯಾರಿಸಿದೆ! ನಮ್ಮವರಿಗಂತೂ ಇದು ತುಂಬ ಇಷ್ಟವಾಯಿತು. ಸ್ವಲ್ಪವೇ ಮಾಡಿದ್ದರಿಂದ ನಾಲ್ಕೈದು ದಿನದಲ್ಲೇ ತೊಕ್ಕು ಖಾಲಿ!! ಮತ್ತೆ ಹುಣಸೆಕಾಯಿ ಸಿಕ್ಕರೆ ಇಂಥದೇ ತೊಕ್ಕು ತಯಾರಿಸಬೇಕೆಂದು ಈಗಲೇ ಹೇಳಿಬಿಟ್ಟಿದ್ದಾರೆ ನಮ್ಮೆಜಮಾನರು! :D

 
ತಯಾರಿಸಲು ಬೇಕಾಗುವ ಸಮಯ: 40 - 45 ನಿಮಿಷಗಳು
ಸರ್ವಿಂಗ್ಸ್: 2 ಜನರಿಗಾದರೆ ಒಂದು ವಾರ ಸಾಕಾಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಹುಣಸೆಕಾಯಿ 5 - 6
ಖಾರ ಇರುವ ಹಸಿಮೆಣಸು - 3 (ಖಾರಕ್ಕೆ ತಕ್ಕಂತೆ)
ಮೆಂತ್ಯ - 1/2 ಚಮಚ 
ಜೀರಿಗೆ - 1 ಚಮಚ 
ಇಂಗು - ದೊಡ್ಡ ಚಿಟಿಕೆ 
ಉಪ್ಪು - ರುಚಿಗೆ ತಕ್ಕಷ್ಟು 

ಮಾಡುವ ವಿಧಾನ:
ಹುಣಸೆ ಕಾಯಿಯ ಬೀಜ, ಸಿಪ್ಪೆ ಮತ್ತು ನಾರನ್ನು ತೆಗೆದುಬಿಡಿ. ಈ ಕೆಲಸಕ್ಕೆ ಕನಿಷ್ಠ ಅರ್ಧ ಘಂಟೆಯನ್ನಾದರೂ ವ್ಯಯಿಸಿದ್ದೇನೆ ನಾನು!
ಸ್ವಚ್ಛಗೊಳಿಸಿದ ಹುಣಸೆ ಚೂರುಗಳನ್ನು ಉಳಿದೆಲ್ಲ ಸಾಮಗ್ರಿಗಳೊಡನೆ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ.
ರುಬ್ಬುವಾಗ ನೀರು ಸೇರಿಸಬೇಡಿ. ನಾನು ಸ್ವಲ್ಪವೇ ತೊಕ್ಕು ಮಾಡಿದ್ದರಿಂದ ಮಿಕ್ಸಿಯಲ್ಲಿ ತಿರುವುವಾಗ 1 ಚಮಚದಷ್ಟು ನೀರು ಸೇರಿಸಿದ್ದೇನೆ. ಫ್ರಿಜ್ ನಲ್ಲಿಡುವುದಾದರೆ ನೀರು ಸೇರಿಸಿ ರುಬ್ಬಿದರೆ ತೊಂದರೆಯಿಲ್ಲ.   
ತಯಾರಿಸಿದ ತೊಕ್ಕನ್ನು ಪ್ಲಾಸ್ಟಿಕ್ ಅಥವಾ ಗಾಜಿನ ಬಾಟಲಿಯಲ್ಲಿ ತುಂಬಿಟ್ಟು ಬಳಸಿ.

ಈ ತೊಕ್ಕು ಹೊರಗಡೆ ಇಟ್ಟರೆ 15 ವಾದರೂ ಚೆನ್ನಾಗಿರುತ್ತದೆ. ಫ್ರಿಜ್ ನಲ್ಲಿ ಇಡುವುದಾದರೆ 2 - 3 ತಿಂಗಳು ಇಟ್ಟುಕೊಂಡು ಬಳಸಬಹುದು.
ತೊಕ್ಕನ್ನು ಊಟದ ಜೊತೆ ಉಪ್ಪಿನಕಾಯಿಯಂತೆಯೂ ಬಳಸಬಹುದು ಅಥವಾ ಅನ್ನ ಮತ್ತು ಕೆಲವು ಹನಿ ಕೊಬ್ಬರಿ ಎಣ್ಣೆ (ಬೇಕಿದ್ದರೆ) ಹಾಕಿ ಕಲಸಿಕೊಂಡು ಬಳಸಬಹುದು. ಒಮ್ಮೆ ತಿಂದವರು ಇದರ ರುಚಿಯನ್ನು ಮರೆಯುವಂತೆಯೇ ಇಲ್ಲ!


ಟಿಪ್ಸ್:
  • ಖಾರಕ್ಕೆ ಹಸಿಮೆಣಸಿನ ಬದಲು ಒಣಮೆಣಸನ್ನೂ ಬಳಸಬಹುದು. ಹಳ್ಳಿಗಳ ಕಡೆ ಸಿಗುವ ಚೂರುಮೆಣಸು ಬಳಸಿದರೆ ಇನ್ನೂ ಒಳ್ಳೆಯದು.

Monday, 16 January 2012

ಮೆಂತ್ಯ ಸೊಪ್ಪಿನ ಅನ್ನ / Fenugreek Leaves Rice

Click here for English version.

ಮೆಂತ್ಯ ಸೊಪ್ಪನ್ನು ಮನೆಗೆ ತಂದೆನೆಂದರೆ ಯಾವಾಗಲೂ ನಾನು ತಯಾರಿಸುವ ಐಟಂ ಇದು. ಟಿಫಿನ್ ಬಾಕ್ಸ್ ಗೆ ಒಯ್ಯಲೂ ಚೆನ್ನಾಗಿರುತ್ತದೆ. ಮೊನ್ನೆ ತರಕಾರಿಗಳನ್ನು ತರಲು ಹೋದಾಗ ಫ್ರೆಶ್ ಆಗಿರುವ ಮೆಂತ್ಯ ಸೊಪ್ಪು ಸಿಕ್ಕಿತ್ತು. ನಾನು ಸಾಮಾನ್ಯವಾಗಿ ಮೆಂತ್ಯ, ಹರಿವೆ ಇತ್ಯಾದಿ ಯಾವುದೇ ಸೊಪ್ಪನ್ನು ತಂದರೂ ಅವನ್ನು ಆದಷ್ಟು ಫ್ರೆಶ್ ಇರುವಾಗಲೇ ಖಾಲಿ ಮಾಡಿಬಿಡುತ್ತೇನೆ. ಈ ಬಾರಿ ತಂದ ಮೆಂತೆ ಸೊಪ್ಪಿನಿಂದ ಒಂದು ದಿನ ಪರೋಟಾ ತಯಾರಿಸಿದೆ. ಮುಂದಿನ ಐಟಂ ಏನೆಂದು ನೀವು ಈಗಾಗಲೇ ಊಹಿಸಿರಬಹುದು.. ಮೆಂತ್ಯ ಸೊಪ್ಪಿನ ಅನ್ನ! ನಮ್ಮವರ ಲಂಚ್ ಬಾಕ್ಸ್ ಗೆ ತಯಾರಿಸಿದ ಸಿಂಪಲ್ ಮತ್ತು ಟೇಸ್ಟಿ ಮೆಂತ್ಯ ರೈಸ್ ರೆಸಿಪಿ ಇಲ್ಲಿದೆ:


ತಯಾರಿಸಲು ಬೇಕಾಗುವ ಸಮಯ: 25 - 30 ನಿಮಿಷಗಳು 
ಸರ್ವಿಂಗ್ಸ್: 1 

ಬೇಕಾಗುವ ಸಾಮಗ್ರಿಗಳು:  
ಅಕ್ಕಿ - 1 ಕಪ್ 
ಮೆಂತ್ಯ ಸೊಪ್ಪು - 1 ಕಟ್ಟು
ಒಗ್ಗರಣೆಗೆ: ಎಣ್ಣೆ - 2 ಚಮಚ, ತುಪ್ಪ - 3 ಚಮಚ, ಉದ್ದಿನಬೇಳೆ - 1/2 ಚಮಚ, ಸಾಸಿವೆ - 1/2 ಚಮಚ, ಹೆಚ್ಚಿದ ಹಸಿಮೆಣಸು - 2
ನಿಂಬೆಹಣ್ಣು - 1
ಸಕ್ಕರೆ - 1/2 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು
ತೆಂಗಿನತುರಿ - 3 ಚಮಚ 

ಮಾಡುವ ವಿಧಾನ:
ಅಕ್ಕಿಯನ್ನು ತೊಳೆದು 2 ಕಪ್ ನಷ್ಟು ನೀರು ಸೇರಿಸಿ ಉದುರಾಗಿ ಅನ್ನ ಮಾಡಿಕೊಳ್ಳಿ. ಅನ್ನವನ್ನು ಒಂದು ಪ್ಲೇಟ್ ನಲ್ಲಿ ಹರವಿ ತಣ್ಣಗಾಗಲು ಬಿಡಿ.
ಮೆಂತೆ ಸೊಪ್ಪನ್ನು ತೊಳೆದುಕೊಂಡು ಸಣ್ಣಗೆ ಹೆಚ್ಚಿಕೊಳ್ಳಿ.
ಬಾಣಲೆಯಲ್ಲಿ ಒಗ್ಗರಣೆಗಿಟ್ಟು ಎಣ್ಣೆ ಹಾಗೂ ತುಪ್ಪ ಹಾಕಿ ಬಿಸಿಮಾಡಿ. ಅದಕ್ಕೆ ಉದ್ದಿನಬೇಳೆ, ಸಾಸಿವೆ, ಹಸಿಮೆಣಸು ಸೇರಿಸಿ ಒಗ್ಗರಣೆ ಮಾಡಿ, ಹೆಚ್ಚಿದ ಮೆಂತೆ ಸೊಪ್ಪನ್ನು ಸೇರಿಸಿ ಸಣ್ಣ ಉರಿಯಲ್ಲಿ 7 - 8 ನಿಮಿಷ ಚೆನ್ನಾಗಿ ಹುರಿಯಿರಿ.
ನಂತರ ಇದಕ್ಕೆ ಅನ್ನ, ತೆಂಗಿನತುರಿ ಸೇರಿಸಿ ಬಿಸಿಯಾಗುವವರೆಗೆ ಕೈಯಾಡಿಸಿ ಒಲೆ ಆಫ್ ಮಾಡಿ.
ಮೆಂತೆ ಅನ್ನಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ ಮತ್ತು ನಿಂಬೆರಸ ಸೇರಿಸಿ ಮಿಕ್ಸ್ ಮಾಡಿ.
ರುಚಿಯಾದ ಮೆಂತೆ ಅನ್ನವನ್ನು ಹಾಗೇ ತಿನ್ನಬಹುದು ಇಲ್ಲವೇ ಉಪ್ಪಿನಕಾಯಿ ಮತ್ತು ಮೊಸರಿನೊಡನೆ ಸರ್ವ್ ಮಾಡಬಹುದು.


Monday, 9 January 2012

ಸಿಂಪಲ್ ಉಪ್ಪಿಟ್ಟು / Simple Upma

Click here for English version.

ನಾನು ಮನೆಯಲ್ಲಿ ತಿಂಡಿಗೆ ಉಪ್ಪಿಟ್ಟು ಮಾಡುವುದು ಬಹಳ ಅಪರೂಪ. ಹಾಸ್ಟೆಲ್ ಜೀವನ ಮುಗಿಸಿ ಬಂದವರಾದ್ದರಿಂದ ನಮಗಿಬ್ಬರಿಗೂ ಉಪ್ಪಿಟ್ಟು ಎಂದರೆ ಸ್ವಲ್ಪ ದೂರವೇ! :D ಆದರೆ ತರಕಾರಿ ಹಾಕದೆ ಬರೀ ಟೊಮೆಟೋ ಮತ್ತು ಈರುಳ್ಳಿ ಬಳಸಿ ನಮ್ಮೂರ ಕಡೆ ತಯಾರಿಸುವ ಉಪ್ಪಿಟ್ಟನ್ನು ಯಾವಾಗಲಾದರೊಮ್ಮೆ ತಯಾರಿಸುತ್ತೇನೆ. ಬೆಳಗಿನ ತಿಂಡಿ ಅಥವಾ ಸಂಜೆಯ ಸ್ನ್ಯಾಕ್ಸ್ ಟೈಮ್ ಗೆ ಈ ಉಪ್ಪಿಟ್ಟು ಚೆನ್ನಾಗಿರುತ್ತದೆ.
  

ತಯಾರಿಸಲು ಬೇಕಾಗುವ ಸಮಯ: 20 - 25 ನಿಮಿಷಗಳು 
ಸರ್ವಿಂಗ್ಸ್: ಇಬ್ಬರಿಗೆ ಆಗುತ್ತದೆ
 
ಬೇಕಾಗುವ ಸಾಮಗ್ರಿಗಳು:
ಸೂಜಿ ರವಾ - 1 1/2 ಕಪ್
ಟೊಮೆಟೋ - 2 
ಹಸಿಮೆಣಸು - 2 (ಖಾರಕ್ಕೆ ತಕ್ಕಂತೆ)
ಈರುಳ್ಳಿ - 1 
1 ನಿಂಬೆಹಣ್ಣು 
ಸಕ್ಕರೆ 2 - 3 ಚಮಚ 
ರುಚಿಗೆ ತಕ್ಕಷ್ಟು ಉಪ್ಪು 
ತೆಂಗಿನತುರಿ (ಬೇಕಿದ್ದರೆ) - 1/2 ಕಪ್ 
ಒಗ್ಗರಣೆಗೆ: ಎಣ್ಣೆ - 6 ಚಮಚ, ಉದ್ದಿನಬೇಳೆ - 1 ಚಮಚ, ಸಾಸಿವೆ - 1 ಚಮಚ, ಅರಿಶಿನ - 1/4 ಚಮಚ, ಕರಿಬೇವು 8 - 10 ಎಲೆಗಳು  


ಮಾಡುವ ವಿಧಾನ:
ಟೊಮೆಟೋ, ಈರುಳ್ಳಿ ಮತ್ತು ಹಸಿಮೆಣಸನ್ನು ಹೆಚ್ಚಿಟ್ಟುಕೊಳ್ಳಿ. 
4 ಕಪ್ ನಷ್ಟು ನೀರನ್ನು ಒಂದು ಪಾತ್ರೆಯಲ್ಲಿ ಕುದಿಯಲಿಡಿ.
ಒಂದು ದಪ್ಪ ತಳದ ಬಾಣಲೆಯಲ್ಲಿ ರವೆಯನ್ನು ಬಿಸಿಗಿಟ್ಟು, ನಸುಗಂದು ಬಣ್ಣ ಬರುವವರೆಗೆ ಹುರಿಯಿರಿ. ನಂತರ ಇದನ್ನು ಒಲೆಯಿಂದ ಇಳಿಸಿ ತಣ್ಣಗಾಗಲು ಬಿಡಿ.
ರವೆಯನ್ನು ಒಂದು ಬೌಲ್ ಗೆ ಹಾಕಿಟ್ಟು, ಪುನಃ ಬಾಣಲೆಯನ್ನು ಬಿಸಿಗಿಡಿ. ಕಾದ ಬಾಣಲೆಗೆ ಎಣ್ಣೆ, ಉದ್ದಿನಬೇಳೆ, ಸಾಸಿವೆ, ಅರಿಶಿನ, ಕರಿಬೇವು ಹಾಕಿ ಒಗ್ಗರಣೆ ಮಾಡಿ.
ಇದಕ್ಕೆ ಹೆಚ್ಚಿದ ಹಸಿಮೆಣಸು ಹಾಕಿ ಸ್ವಲ್ಪ ಹುರಿದುಕೊಂಡು ಹುರಿದ ರವೆ, ಹೆಚ್ಚಿದ ಟೊಮೆಟೋ ಮತ್ತು ಈರುಳ್ಳಿ ಸೇರಿಸಿ 3 - 4 ನಿಮಿಷ ಕೈಯಾಡಿಸಿ.
ನಂತರ ಇದಕ್ಕೆ 3 1/4 ಕಪ್ ನಷ್ಟು ಬಿಸಿನೀರನ್ನು ಸೇರಿಸಿ ಕೈಯಾಡಿಸಿ ಒಂದು ಪ್ಲೇಟ್ ಮುಚ್ಚಿ ಬೇಯಲು ಬಿಡಿ. 
2 ನಿಮಿಷದ ನಂತರ ಪ್ಲೇಟ್ ತೆರೆದು ಉಪ್ಪಿಟ್ಟು ಮಿಶ್ರಣವನ್ನು ಚೆನ್ನಾಗಿ ಕೈಯಾಡಿಸಿ. ಉಪ್ಪು, ಸಕ್ಕರೆ, ನಿಂಬೆರಸ, ತೆಂಗಿನತುರಿ ಸೇರಿಸಿ, ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಿ 2 - 3 ನಿಮಿಷ ಬೇಯಿಸಿ. ಫ್ಲೇವರ್ ಗೆ ಬೇಕಿದ್ದರೆ 1 ಚಮಚ ತುಪ್ಪ ಸೇರಿಸಿ.
ತಯಾರಾದ ಬಿಸಿ ಬಿಸಿ ಉಪ್ಪಿಟ್ಟನ್ನು ಟೀ ಯೊಡನೆ ಸವಿಯಿರಿ.


Friday, 6 January 2012

ಕಡಗ್ ಪುಳಿ / Kadag Puli

Click here for English version.

ಎಲ್ಲರಿಗೂ ಹೊಸ ವರ್ಷದ ಹಾರ್ದಿಕ ಶುಭಾಶಯಗಳು :) ಈ ಬಾರಿ ನಮ್ಮ ಹೊಸ ವರ್ಷದ ಆಚರಣೆ ಊರಿನಲ್ಲಿ. ಬೆಂಗಳೂರಿನ ಬ್ಯುಸಿ ಲೈಫ್ ಗೆ ವಿರಾಮ ಹೇಳಿ ಒಂದು ವಾರ ಊರು ಕಡೆ ಸುತ್ತಾಡಿ ಬಂದೆವು. ಹೊರಡುವಾಗ ಸುಮಾರು ಚಳಿ ಇದ್ದಿದ್ದರಿಂದ ಸ್ವೆಟರ್, ಶಾಲು ಇತ್ಯಾದಿಗಳನ್ನು ಜೊತೆಗೆ ಒಯ್ದಿದ್ದೆವು. ಆದರೆ ಅಲ್ಲಿ ನಾವು ಹೋದ ದಿನದಿಂದ ಬರೀ ಸೆಖೆ! ಅಲ್ಲಿಂದ ಬರುವಾಗ ಊರಿನ ತಿಂಡಿ ತಿನಿಸುಗಳ ಜೊತೆ ಇಲ್ಲಿಂದ ಒಯ್ದ ಚಳಿಗಾಲದ ಲಗೇಜ್ ಎಲ್ಲವನ್ನೂ ಹೊತ್ತುಕೊಂಡು ಭಾರದ ಬ್ಯಾಗ್ ಗಳೊಡನೆ ಮರಳಿದೆವು..ಊರಿಗೆ ಹೋಗಿ ಬಂದೆವೆಂದರೆ ಒಂದು ವಾರದತನಕ ಅಲ್ಲಿಯದೇ ನೆನಪು. ಮರಳಿ ಹೋಗಿಬಿಡಲೇ ಎನ್ನಿಸಿಬಿಡುತ್ತದೆ :) ಬಂದ ತಕ್ಷಣ ಆಫೀಸಿಗೆ ಹೋಗಬೇಕೆಂದರೆ ಇನ್ನೂ ಸಂಕಟ! ಆದರೆ ನನಗೀಗ ಆಫೀಸಿಗೆ ಹೋಗುವ ತಲೆಬಿಸಿ ಇಲ್ಲವಾದ್ದರಿಂದ ಕೊಂಚ ರಿಲೀಫ್ :)
ಕಡಗ್ ಪುಳಿ ಎಂದರೆ ಸಾಂಬಾರ್ ನ ಒಂದು ಬಗೆ. ಈ ಸಾರಿಗೆ ಬೇಳೆ ಹಾಕಬೇಕಿಲ್ಲ; ಹೀಗಾಗಿ ತಯಾರಿಸಲು ಬೇಕಾಗುವ ಸಮಯವೂ ಬಹಳ ಕಡಿಮೆ. ಸೌತೆಕಾಯಿ ಹಾಕಿ ಮಾಡಿದರೆ ಸೌತೆಕಾಯಿ ಮತ್ತು ಮಸಾಲೆ ಪರಿಮಳದೊಂದಿಗೆ ಈ ಸಾರು ಊಟಕ್ಕೆ ಒಳ್ಳೆಯ ರುಚಿ ಕೊಡುತ್ತದೆ.


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಸರ್ವಿಂಗ್ಸ್: 3 - 4 ಜನರಿಗೆ ಆಗುತ್ತದೆ
ಬೇಕಾಗುವ ಸಾಮಗ್ರಿಗಳು:
ಮೀಡಿಯಂ ಗಾತ್ರದ ಸೌತೆಕಾಯಿ - ಅರ್ಧ 
ತೆಂಗಿನತುರಿ - 1 1/2 ಕಪ್ 
ಸಾಸಿವೆ - 3/4 ಚಮಚ  
ಒಣಮೆಣಸು - 2 (ಖಾರಕ್ಕೆ ತಕ್ಕಂತೆ)
ಅರಿಶಿನ - 1/4 ಚಮಚ  
ಹುಣಸೆಹಣ್ಣು - 1 ಚಮಚ ಅಥವಾ ರುಚಿಗೆ ತಕ್ಕಷ್ಟು 
ಅಕ್ಕಿ - 1 ಚಮಚ 
ಚಿಟಿಕೆ ಇಂಗು  
ಸಕ್ಕರೆ ಅಥವಾ ಬೆಲ್ಲ - 1/2 ಚಮಚ   
ಉಪ್ಪು - ರುಚಿಗೆ ತಕ್ಕಷ್ಟು 
ಒಗ್ಗರಣೆಗೆ: ಎಣ್ಣೆ, ಸಾಸಿವೆ, ಕರಿಬೇವು

ಮಾಡುವ ವಿಧಾನ:
ಸೌತೆಕಾಯಿಯ ಸಿಪ್ಪೆ ತೆಗೆದು ಸಣ್ಣ ಹೋಳುಗಳಾಗಿ ಹೆಚ್ಚಿಕೊಳ್ಳಿ. ಇದಕ್ಕೆ ಒಂದೂವರೆ ಕಪ್ ನಷ್ಟು ನೀರು ಸೇರಿಸಿ ಬೇಯಿಸಿಕೊಳ್ಳಿ.
ತೆಂಗಿನತುರಿ, ಸಾಸಿವೆ, ಒಣಮೆಣಸು, ಅರಿಶಿನ, ಹುಣಸೆಹಣ್ಣು, ಇಂಗು, ತೊಳೆದ ಅಕ್ಕಿ, ಬೆಲ್ಲ, ಉಪ್ಪು ಎಲ್ಲವನ್ನೂ ಸೇರಿಸಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. 
ರುಬ್ಬಿದ ಪೇಸ್ಟ್ ನ್ನು ಬೆಂದ ಸೌತೆಕಾಯಿಗೆ ಸೇರಿಸಿ 4 - 5 ನಿಮಿಷ ಚೆನ್ನಾಗಿ ಕುದಿಸಿ. ಬೇಕಿದ್ದರೆ ಕುದಿಸುವ ಮೊದಲು ಸ್ವಲ್ಪ ನೀರು ಸೇರಿಸಿ.
ಒಗ್ಗರಣೆ ಸೌಟಿನಲ್ಲಿ ಎಣ್ಣೆ ಕಾಯಿಸಿ ಸಾಸಿವೆ, ಕರಿಬೇವಿನ ಒಗ್ಗರಣೆ ಮಾಡಿ ಸಾರಿನ ಮಿಶ್ರಣಕ್ಕೆ ಸೇರಿಸಿ. 
ಸಾರಿನ ರುಚಿ ನೋಡಿಕೊಂಡು ಉಪ್ಪು ಅಥವಾ ಸಕ್ಕರೆ ಬೇಕಿದ್ದರೆ ಸೇರಿಸಿ. ಹುಳಿ ಕಡಿಮೆಯಾದರೆ ಸ್ವಲ್ಪ ನಿಂಬೆರಸ ಸೇರಿಸಿ.
ಬಿಸಿ ಬಿಸಿ ಅನ್ನದೊಡನೆ ಈ ಕಡಗ್ ಪುಳಿಯನ್ನು ಸರ್ವ್ ಮಾಡಿ.


ಟಿಪ್ಸ್:
  • ಕಡಗ್ ಪುಳಿಗೆ ಸೌತೆಕಾಯಿಯ ಬದಲು ಬೂದುಗುಂಬಳಕಾಯಿಯನ್ನೂ ಬಳಸಬಹುದು.
Related Posts Plugin for WordPress, Blogger...