Here are some recipes which I came across through the net, books, so on and few are my own experiments..

Thursday, 31 March 2011

Akki Rotti / ಅಕ್ಕಿ ರೊಟ್ಟಿ

Click here for English version.

ಅತ್ತೆ ಸ್ಪೆಷಲ್ ! ನಾನು ಅತ್ತೆಯಿಂದ ಕಲಿತ ಈ ರೊಟ್ಟಿ ನಮ್ಮ ಬಳಗದಲ್ಲೆಲ್ಲ ಈಗ ಜನಪ್ರಿಯ.. ನಾನು ಇಲ್ಲಿ ಆಲೂಗಡ್ಡೆ, ಕ್ಯಾರೆಟ್ ಇತ್ಯಾದಿ ತರಕಾರಿಗಳನ್ನು ಬಳಸಿದ್ದೇನೆ. ಬರೀ ಸೌತೆಕಾಯಿ ಮತ್ತು ಈರುಳ್ಳಿ ಬಳಸಿಯೂ ಈ ರೊಟ್ಟಿ ತಯಾರಿಸಬಹುದು.


ತಯಾರಿಸಲು ಬೇಕಾಗುವ ಸಮಯ: 1 1/4 ಘಂಟೆ
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:
ಅಕ್ಕಿಹಿಟ್ಟು - 2 ಲೋಟ
ಮಧ್ಯಮಗಾತ್ರದ ಸೌತೆಕಾಯಿ - 2
ಆಲೂಗಡ್ಡೆ - 1 
ಕ್ಯಾರೆಟ್ - 1 
ಮಧ್ಯಮಗಾತ್ರದ ಈರುಳ್ಳಿ - 2
ಹಸಿಮೆಣಸು - 4 ರಿಂದ 5 
ಹೆಚ್ಚಿದ ಕರಿಬೇವು - ಸ್ವಲ್ಪ
ರುಚಿಗೆ ತಕ್ಕಷ್ಟು ಉಪ್ಪು
ಎಣ್ಣೆ ಅಥವಾ ಬೆಣ್ಣೆ - ಸ್ವಲ್ಪ

ತಯಾರಿಸುವ ವಿಧಾನ:
ಮೊದಲು ತರಕಾರಿಗಳನ್ನು ತುರಿದುಕೊಳ್ಳಿ. ಹಸಿಮೆಣಸು, ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಕೊಳ್ಳಿ.
ತುರಿದ ತರಕಾರಿ, ಹೆಚ್ಚಿದ  ಹಸಿಮೆಣಸು, ಈರುಳ್ಳಿ ಮತ್ತು ಕರಿಬೇವನ್ನು ಉಪ್ಪು ಸೇರಿಸಿ ಕಲಸಿಕೊಳ್ಳಿ. ಇದಕ್ಕೆ ಅಕ್ಕಿಹಿಟ್ಟು ಸೇರಿಸಿ ಕಲಸಿಕೊಳ್ಳಿ. ಹಿಟ್ಟು ಸ್ವಲ್ಪ ತೆಳ್ಳಗೆ ಇರಲಿ. ಬೇಕಿದ್ದರೆ 1 ಸೌಟು ಮೊಸರು ಸೇರಿಸಿ ಹಿಟ್ಟನ್ನು ತೆಳ್ಳಗೆ ಮಾಡಿಕೊಳ್ಳಿ.
ನೀರಿನಂಶ ತುಂಬಾ ಕಡಿಮೆ ಎನ್ನಿಸಿದರೆ ಇನ್ನೂ ಸ್ವಲ್ಪ ಸೌತೆ ತುರಿ ಸೇರಿಸಿ ಕಲಸಿ.
15 - 20 ನಿಮಿಷದ ನಂತರ ಕಾದ ಕಾವಲಿಯಮೇಲೆ ರೊಟ್ಟಿಗಳನ್ನು ತಟ್ಟಿ, ಎಣ್ಣೆ ಅಥವಾ ಬೆಣ್ಣೆ ಸೇರಿಸಿ ಬೇಯಿಸಿ.
ಮಧ್ಯಮ ಉರಿಯಲ್ಲಿ ಸ್ವಲ್ಪ ಹೆಚ್ಚು ಸಮಯ ಬೇಯಿಸಿದರೆ ಈ ರೊಟ್ಟಿ ತಿನ್ನಲು ಹೆಚ್ಚು ರುಚಿ.
ರೊಟ್ಟಿ ಬಿಸಿ ಇರುವಾಗಲೇ ಬೆಣ್ಣೆ ಅಥವಾ ಬೆಲ್ಲ ಹಾಕಿಕೊಂಡು ತಿನ್ನಿ.

ಟಿಪ್ಸ್:
  • ರೊಟ್ಟಿ ತಟ್ಟಲು ಬಾಳೆ ಎಲೆ ಬಳಸಿದರೆ ಉತ್ತಮ. ಬಾಳೆ ಎಲೆ ಈ ರೊಟ್ಟಿಗೆ ವಿಶೇಷ ಪರಿಮಳ ಕೊಡುವುದಲ್ಲದೆ, ರೊಟ್ಟಿಗಳನ್ನು ತೆಳ್ಳಗೆ ಮಾಡಬಹುದು.

Tuesday, 22 March 2011

ರವಾ ರೊಟ್ಟಿ / Rava (Semolina) Rotti

Click here for English Version

ತರಕಾರಿಗಳನ್ನು ಹಾಕಿ ತಯಾರಿಸುವ ಈ ರೊಟ್ಟಿ, ಬೆಳಗಿನ ಉಪಾಹಾರ, ಸಂಜೆಯ ಸ್ನ್ಯಾಕ್ಸ್, ಟಿಫಿನ್ ಬಾಕ್ಸ್ ಎಲ್ಲಕ್ಕೂ ಚೆನ್ನಾಗಿರುತ್ತದೆ. ಮಲೆನಾಡಿನ ಶಿರಸಿ, ಸಾಗರ ಕಡೆಗಳಲ್ಲಿ ಇದನ್ನು ಹೆಚ್ಚಾಗಿ ತಯಾರಿಸುತ್ತಾರೆ.
 
ಸಾಮಗ್ರಿ
ಸೂಜಿ ರವಾ - ಅಂದಾಜು 3 ಕಪ್
ಈರುಳ್ಳಿ - 2 
ಹಸಿಮೆಣಸು 6 - 7 
ತೆಂಗಿನತುರಿ - 1 ಕಪ್
ಸಣ್ಣಗೆ ಹೆಚ್ಚಿದ ಕರಿಬೇವು - 1 ಟೀ ಸ್ಪೂನ್
ಮೊಸರು ಅಥವಾ ಮಜ್ಜಿಗೆ - ಸ್ವಲ್ಪ
ರುಚಿಗೆ ತಕ್ಕಷ್ಟು ಉಪ್ಪು
ಕ್ಯಾರೆಟ್, ಹಾಲುಗುಂಬಳ, ಬದನೆ ಅಥವಾ  ನಿಮ್ಮಿಷ್ಟದ ಯಾವುದೇ ತರಕಾರಿಗಳ ತುರಿ - ಒಂದರಿಂದ ಒಂದೂವರೆ ಕಪ್ 

ವಿಧಾನ 
ರವೆ, ತರಕಾರಿ ತುರಿ, ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸು, ಕರಿಬೇವು, ತೆಂಗಿನತುರಿ, ಉಪ್ಪು, ಎಲ್ಲವನ್ನೂ ಸೇರಿಸಿ ಕಲಸಿಕೊಳ್ಳಿ. ಹಿಟ್ಟು ತುಂಬಾ ಗಟ್ಟಿ ಎನಿಸಿದರೆ ಸ್ವಲ್ಪ ಮೊಸರು / ಮಜ್ಜಿಗೆ ಸೇರಿಸಿ ಕಲಸಿ, 20 ನಿಮಿಷ ಇಡಿ. ನಂತರ ಇದರಿಂದ ರೊಟ್ಟಿಗಳನ್ನು ತಟ್ಟಿ, ಕಾದ ತವೆಯ ಮೇಲೆ ಎಣ್ಣೆ ಹಾಕಿ ಬೇಯಿಸಿ. ಬಿಸಿ ಇರುವಾಗಲೇ ಬೆಣ್ಣೆಯೊಡನೆ ತಿನ್ನಿ.

    

ಚಿರೋಟಿ / Chiroti

Click here to read in English.

ಸಾಮಗ್ರಿ
ಮೈದಾಹಿಟ್ಟು - 2 ಕಪ್
ತುಪ್ಪ - ಸುಮಾರು ಕಾಲು ಕಪ್ ನಷ್ಟು
ಸಕ್ಕರೆಪುಡಿ
ಅಕ್ಕಿಹಿಟ್ಟು - 2 ಟೀ ಸ್ಪೂನ್
ನೀರು - ಸ್ವಲ್ಪ  
ಕರಿಯಲು ಎಣ್ಣೆ

ವಿಧಾನ
ಮೈದಾಹಿಟ್ಟಿಗೆ 3 - 4 ಚಮಚ ತುಪ್ಪ, ಸ್ವಲ್ಪ ನೀರು ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. 
ಅಕ್ಕಿಹಿಟ್ಟಿಗೆ ಸ್ವಲ್ಪ ತುಪ್ಪ ಸೇರಿಸಿ ಚೆನ್ನಾಗಿ ತಿಕ್ಕಿ ಬೆಣ್ಣೆಯಂತೆ ಮಾಡಿ. 
ಕಲಸಿದ ಮೈದಾಹಿಟ್ಟಿನಿಂದ ಉಂಡೆಗಳನ್ನು ಮಾಡಿಕೊಂಡು ಚಪಾತಿಯಂತೆ ಲಟ್ಟಿಸಿಕೊಳ್ಳಿ. 
ಲಟ್ಟಿಸಿದ ಚಪಾತಿಯಮೇಲೆ ಅಕ್ಕಿಹಿಟ್ಟು, ತುಪ್ಪದ ಮಿಶ್ರಣವನ್ನು ತೆಳ್ಳಗೆ ಸವರಿ, ಅದರಮೇಲೆ ಇನ್ನೊಂದು ಚಪಾತಿಯನ್ನಿಡಿ. ಅದರಮೇಲೆ ಪುನಃ ಮಿಶ್ರಣ ಸವರಿ, ಇನ್ನೊಂದು ಚಪಾತಿಯನ್ನಿಡಿ. ಇದೆ ರೀತಿ 3 - 4 ಚಪಾತಿಗಳನ್ನು ಒಂದರಮೇಲೊಂದು ಇಟ್ಟು, ಅಕ್ಕಿಹಿಟ್ಟಿನ ಮಿಶ್ರಣ ಸವರಿ, ಎಲ್ಲವನ್ನೂ ಸೇರಿಸಿ ಸುರುಳಿಯಾಗಿ ಮಡಿಚಿ. 
ಸುರುಳಿಯನ್ನು ಒಂದೇ ಅಳತೆಯ ಚಿಕ್ಕ ಭಾಗಗಳಾಗಿ ಕತ್ತರಿಸಿಕೊಳ್ಳಿ. ಕತ್ತರಿಸಿಕೊಂಡ ಹಿಟ್ಟಿನ ಭಾಗಗಳನ್ನು ಹಾಗೇ ತಟ್ಟಿ, ಪೂರಿಯಂತೆ ಲಟ್ಟಿಸಿ, ಹದವಾದ ಉರಿಯಲ್ಲಿ ಹೊಂಬಣ್ಣಕ್ಕೆ ಕರಿಯಿರಿ. ಇವನ್ನು ಸಕ್ಕರೆ ಪುಡಿಯಲ್ಲಿ ಹೊರಳಿಸಿ ತೆಗೆದು, ಪ್ಲೇಟ್ ನಲ್ಲಿಟ್ಟು ತಿನ್ನಲು ಕೊಡಿ.

Thursday, 17 March 2011

ಇನ್ ಸ್ಟಂಟ್ ರವಾ ದೋಸೆ / Instant Rava Dosa

Click Here for English Version.

ಅರ್ಜೆಂಟಾಗಿ ದೋಸೆ ಮಾಡಬೇಕೆಂದಾಗ ಇದನ್ನು ಟ್ರೈ ಮಾಡಬಹುದು. ಬಹಳ ಕಡಿಮೆ ಸಮಯದಲ್ಲಿ ತಯಾರಿಸಬಹುದಾದ ಈ ದೋಸೆ ತಿನ್ನಲೂ ಬಹಳ ರುಚಿಕರ. ಇದನ್ನು ನಾನು ವಾಹ್ ಚೆಫ್ ರವರ ವೆಬ್ ಸೈಟ್ ನಿಂದ ಕಲಿತದ್ದು..ವೀಡಿಯೊ ರೆಸಿಪಿಗಾಗಿ ಇಲ್ಲಿ  ಕ್ಲಿಕ್ ಮಾಡಿ. 
 
 

ಸಾಮಗ್ರಿ
1 ಕಪ್ ಸೂಜಿ ರವಾ
1 ಕಪ್ ಅಕ್ಕಿಹಿಟ್ಟು
1 / 2 ಕಪ್ ಮೈದಾಹಿಟ್ಟು
ಉಪ್ಪು
ಮೆಣಸಿನಕಾಳಿನ ಪುಡಿ (ತರಿತರಿಯಾಗಿರಲಿ) 
ಇಂಗು - ಸ್ವಲ್ಪ
ಜಜ್ಜಿಕೊಂಡ ಶುಂಠಿ - 1 / 2 ಟೀ ಸ್ಪೂನ್
ಸಣ್ಣಗೆ ಹೆಚ್ಚಿಕೊಂಡ ಹಸಿಮೆಣಸು - 1 ಟೀ ಸ್ಪೂನ್
ಜೀರಿಗೆ - 1 / 2 ಟೀ ಸ್ಪೂನ್

ವಿಧಾನ 
ಎಲ್ಲ ಸಾಮಗ್ರಿಗಳನ್ನೂ ಮಿಕ್ಸ್ ಮಾಡಿಕೊಂಡು, ನೀರು ಸೇರಿಸಿ ತೆಳ್ಳಗಿನ ಹಿಟ್ಟನ್ನು ತಯಾರಿಸಿಕೊಂಡು, ಕಾದ ಕಾವಲಿಯಮೇಲೆ ನೀರು ದೋಸೆಯಂತೆ ತೆಳ್ಳಗಿನ ದೋಸೆಗಳನ್ನು ಮಾಡಿ. ಹಿಟ್ಟನ್ನು ಹೆಚ್ಚು ಸಮಯ ಹಾಗೇ ಇಟ್ಟರೆ ದೋಸೆ ಮೆತ್ತಗಾಗಿಬಿಡುತ್ತದೆ.
ಇದನ್ನು ಚಟ್ನಿಯೊಡನೆ ಸರ್ವ್ ಮಾಡಿ.

ಮೈಕ್ರೋವೇವ್ ಪೇಡಾ / Microwave Peda

Click here for English version.


ಸಾಮಗ್ರಿ
ಮಿಲ್ಕ್ ಪೌಡರ್ - 2 ಕಪ್ (150 ಗ್ರಾಂ)
ಕಂಡೆನ್ಸಡ್ ಮಿಲ್ಕ್ - 1 ಟಿನ್ ( 400 ಗ್ರಾಂ)
ಬೆಣ್ಣೆ - 40 oz (113 ಗ್ರಾಂ)

ವಿಧಾನ
ಬೆಣ್ಣೆಯನ್ನು ಓವನ್ ನಲ್ಲಿ 1 - 2 ನಿಮಿಷ ಇಟ್ಟು ಕರಗಿಸಿಕೊಳ್ಳಿ. ಇದಕ್ಕೆ ಮಿಲ್ಕ್ ಪೌಡರ್ ಮತ್ತು ಕಂಡೆನ್ಸಡ್ ಮಿಲ್ಕ್ ಸೇರಿಸಿ ಗಂಟಿಲ್ಲದಂತೆ ಚೆನ್ನಾಗಿ ಕಲಸಿಕೊಳ್ಳಿ. ಇದನ್ನು ಮೈಕ್ರೋವೇವ್ ನಲ್ಲಿ 1 ನಿಮಿಷ ಬಿಸಿಗಿಟ್ಟು ಹೊರತೆಗೆದು, ಚೆನ್ನಾಗಿ ಕಲಸಿ ಪುನಃ 1 ನಿಮಿಷ ಮೈಕ್ರೋವೇವ್ ನಲ್ಲಿ ಬಿಸಿಗಿಡಿ. ಇದೇ ರೀತಿ 3 - 4 ಬಾರಿ ಬಿಸಿಮಾಡಿ, ಪೇಡೆ ಕಟ್ಟುವ ಹದ ಬಂದಾಗ ಹೊರತೆಗೆದು 15 - 20 ನಿಮಿಷ ತಣ್ಣಗಾಗಲು ಬಿಡಿ. ನಂತರ ಪೇಡೆಗಳನ್ನು ಮಾಡಿ, ಚೆನ್ನಾಗಿ ಸೆಟ್ ಆಗಲು 10 ನಿಮಿಷ ಫ್ರಿಜ್ ನಲ್ಲಿಟ್ಟು ಹೊರತೆಗೆಯಿರಿ.
 

 

Monday, 14 March 2011

ನಾನ್

Click here to read this recipe in English.

ಇದು ವಾಹ್ ಚೆಫ್ ರವರ ವೆಬ್ ಸೈಟ್ ನಿಂದ ಕಲಿತ ರೆಸಿಪಿ. ವಾಹ್ ಚೆಫ್ ರವರ ವಿಡಿಯೋ ರೆಸಿಪಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.

ಸಾಮಗ್ರಿ
ಮೈದಾಹಿಟ್ಟು - 3 ಕಪ್
ಡ್ರೈ ಯೀಸ್ಟ್ - 1 ಟೀ ಸ್ಪೂನ್
ಹಾಲು/ಮೊಸರು (ಬೇಕಿದ್ದರೆ) - 1 ಕಪ್
ಎಣ್ಣೆ 
ಉಪ್ಪು - ರುಚಿಗೆ ತಕ್ಕಷ್ಟು
ಸಕ್ಕರೆ - 1 / 2 ಟೀ ಸ್ಪೂನ್
ನೀರು - (ಅಂದಾಜು) 50 ಮಿ.ಲೀ.

ವಿಧಾನ
ಮೈದಾಹಿಟ್ಟನ್ನು ಜರಡಿಯಾಡಿಕೊಳ್ಳಿ. 
1 ಕಪ್ ನಷ್ಟು ಬೆಚ್ಚಗಿನ ನೀರನ್ನು ಯೀಸ್ಟ್ ಗೆ ಸೇರಿಸಿ. ಇದಕ್ಕೆ ಸಕ್ಕರೆ, ಉಪ್ಪು, ಎಣ್ಣೆ ಸೇರಿಸಿ ಕಲಕಿ. ಬೇಕಿದ್ದರೆ ಹಾಲು ಅಥವಾ ಮೊಸರನ್ನು ಸೇರಿಸಬಹುದು. ಈ ಮಿಶ್ರಣವನ್ನು ಮೈದಾಹಿಟ್ಟಿಗೆ ಸೇರಿಸಿ ಕಲಸಿ. ಮಿಶ್ರಣ ತೀರಾ ಮೆತ್ತಗೆ ಕೈಗಂಟುವಂತೆ ಇರಲಿ. ಇದಕ್ಕೆ 2 - 3 ಚಮಚ ಎಣ್ಣೆ ಸೇರಿಸಿ 15 - 20 ನಿಮಿಷ ಮುಚ್ಚಿಡಿ.
ನಂತರ ಕೈಗಳನ್ನು ಒಣ ಹಿಟ್ಟಿನಲ್ಲಿ ಅದ್ದಿಕೊಳ್ಳುತ್ತ ಕಲಸಿಟ್ಟ ಹಿಟ್ಟಿನ ಉಂಡೆಗಳನ್ನು ಮಾಡಿಕೊಳ್ಳಿ. ಇವನ್ನು ಒಂದು ಬಟ್ಟೆಯಿಂದ ಮುಚ್ಚಿಡಿ. ಒಂದೊಂದೇ ಉಂಡೆಯನ್ನು ಎರಡೂ ಕೈಗಳ ನಡುವೆ ಇಟ್ಟು ನಿಧಾನವಾಗಿ ಒಂದು ಕೈಯಿಂದ ಇನ್ನೊಂದು ಕೈಮೇಲೆ ತಟ್ಟುತ್ತ ರೊಟ್ಟಿಯಂತೆ ಮಾಡಿ. 
ಇದನ್ನು ಜಿಡ್ಡು ಸವರಿದ ತಟ್ಟೆಯಲ್ಲಿಟ್ಟು ಓವನ್ ನಲ್ಲಿ 450 ಡಿಗ್ರಿ ಅಥವಾ ಹೆಚ್ಚು ಉಷ್ಣತೆಯಲ್ಲಿ 2 ನಿಮಿಷ ಇಡಿ. ಹೊರತೆಗೆದು ನಾನ್ ನ್ನು ತಿರುವಿಹಾಕಿ ೩೦ ಸೆಕೆಂಡ್ ಕಾಲ ಬೇಯಿಸಿ ಹೊರತೆಗೆದು, ಬೆಣ್ಣೆ ಸವರಿ.
ಗಾರ್ಲಿಕ್ ನಾನ್ ಮಾಡಬೇಕೆಂದರೆ, ಉಂಡೆಗಳನ್ನು ಕೈಯಿಂದ ಸ್ವಲ್ಪ ಅಗಲಕ್ಕೆ ತಟ್ಟಿದನಂತರ ಬೆಳ್ಳುಳ್ಳಿ ಚೂರುಗಳನ್ನು ಅದರಮೇಲೆ ಹರಡಿ, ಕೈಯಿಂದ ಸ್ವಲ್ಪ ಪ್ರೆಸ್ ಮಾಡಿ. ನಾನ್ ಮಾಡಿ ಬೇಯಿಸಿ ಬೆಣ್ಣೆ ಸವರಿ. ಇದರಮೇಲೆ ಸ್ವಲ್ಪ ಚಾಟ್ ಮಸಾಲಾ ಉದುರಿಸಿಕೊಂಡು ತಿಂದುನೋಡಿ. 

ಓವನ್ ಇಲ್ಲದಿದ್ದರೆ, ತಯಾರಿಸಿಕೊಂಡ ನಾನ್ ನ್ನು ಒಂದು ಜಾಳಿಗೆಯಮೇಲೆ ಇಟ್ಟು, ಅದನ್ನು ಒಲೆಯ ಉರಿಗಿಂತ ಸ್ವಲ್ಪ ಎತ್ತರದಲ್ಲಿ ಹಿಡಿದು, ಎಲ್ಲ ಕಡೆಗೂ ಸಮನಾಗಿ ಶಾಖ ತಗಲುವಂತೆ ಕೈಯಿಂದ ಜಾಳಿಗೆಯನ್ನು ಆಚೀಚೆ ತಿರುಗಿಸುತ್ತ ಎರಡೂ ಕಡೆ ಬೇಯಿಸಿ, ಬಿಸಿ ಇರುವಾಗಲೇ ಬೆಣ್ಣೆ ಸವರಿ ತಿನ್ನಿ.

Saturday, 12 March 2011

ತೆಂಗಿನತುರಿ ಚಟ್ನಿ / Coconut chutney (Less cholesterol)

Click here for English version. 
 

ಸಾಮಗ್ರಿ
ತೆಂಗಿನತುರಿ - 3 / 4 ಕಪ್
ಹಸಿಮೆಣಸು 4 - 5 
ಕರಿಬೇವು 10 - 12 ಎಲೆಗಳು
ಚಿಕ್ಕ ಚೂರು ಶುಂಠಿ 
ಕೊತ್ತಂಬರಿ ಸೊಪ್ಪು 2 - 3 ದಂಟಿನದು
ಉಪ್ಪು
ಚಿಕ್ಕ ಚೂರು ಹುಣಸೆಹಣ್ಣು 
ಎಣ್ಣೆ, ಸಾಸಿವೆ

ವಿಧಾನ
ಬಾಣಲೆಯಲ್ಲಿ 1 ಚಮಚ ಎಣ್ಣೆ ಕಾಯಿಸಿ, ಹಸಿಮೆಣಸನ್ನು ಇಡಿಯಾಗಿ ಹುರಿದು, ಜೊತೆಗೆ ಶುಂಠಿ, ಕೊತ್ತಂಬರಿ ಸೊಪ್ಪು, ಕರಿಬೇವನ್ನು ಸೇರಿಸಿ ಸ್ವಲ್ಪ ಬಿಸಿಮಾಡಿ ಇಳಿಸಿ. ಇದನ್ನು ಹುಣಸೆಹಣ್ಣು, ತೆಂಗಿನತುರಿ, ಉಪ್ಪಿನೊಂದಿಗೆ ಸ್ವಲ್ಪ ನೀರು ಸೇರಿಸಿ ರುಬ್ಬಿಕೊಂಡು, ಸಾಸಿವೆಯ ಒಗ್ಗರಣೆ ಕೊಡಿ.
ತೆಂಗಿನತುರಿ ಕಡಿಮೆ ಬಳಸಬೇಕೆಂದರೆ ಅರ್ಧ ಕಪ್ ನಷ್ಟು ತೆಂಗಿನತುರಿಯನ್ನು ಮಾತ್ರ ಬಳಸಿ, 2 ಚಮಚದಷ್ಟು ಪುಟಾಣಿ ಬೇಳೆಯನ್ನು ಹಸಿಮೆಣಸಿನೊಡನೆ ಹುರಿದು ರುಬ್ಬುವಾಗ ಸೇರಿಸಿ.

ಪಾಲಕ್ ಸೊಪ್ಪಿನ ಪಲ್ಯ / Spinach Palya

Click here to see the English Version..

ಸಾಮಗ್ರಿ
ಪಾಲಕ್ ಸೊಪ್ಪು - 1 ಕಟ್ಟು
ಹಸಿಮೆಣಸು - 2
ತೆಂಗಿನತುರಿ - 4 ಟೀ ಚಮಚ
ಒಗ್ಗರಣೆಗೆ - ಉದ್ದಿನಬೇಳೆ, ಜೀರಿಗೆ, ಎಣ್ಣೆ, 1 ಒಣಮೆಣಸು
ಈರುಳ್ಳಿ - 1 ಹೆಚ್ಚಿದ್ದು
ಸಕ್ಕರೆ - 1 / 4 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ನಿಂಬೆರಸ - ಸ್ವಲ್ಪ 

ವಿಧಾನ 
ಪಾಲಕ್ ಸೊಪ್ಪನ್ನು ತೊಳೆದು ಹೆಚ್ಚಿಕೊಳ್ಳಿ. ಒಗ್ಗರಣೆಗೆ ಎಣ್ಣೆ, ಉದ್ದಿನಬೇಳೆ, ಒಣಮೆಣಸು, ಜೀರಿಗೆ ಹಾಕಿ ಚಟಗುಟ್ಟಿದನಂತರ ಹಸಿಮೆಣಸು ಸೇರಿಸಿ. ನಂತರ ಈರುಳ್ಳಿ ಸೇರಿಸಿ ಸ್ವಲ್ಪ ಹುರಿಯಿರಿ. ನಂತರ ಹೆಚ್ಚಿದ ಪಾಲಕ್ ಸೊಪ್ಪು ಸೇರಿಸಿ 7 - 8 ನಿಮಿಷ ಬೇಯಿಸಿ. ಇದಕ್ಕೆ ನೀರು ಸೇರಿಸಬೇಕಿಲ್ಲ. ಪಾಲಕ್ ಅರ್ಧ ಬೆಂದಾಗ ಅದಕ್ಕೆ ಉಪ್ಪು, ಸಕ್ಕರೆ ಸೇರಿಸಿ. ಉರಿಯಿಂದ ಇಳಿಸುವಾಗ ತೆಂಗಿನತುರಿ ಸೇರಿಸಿ ಕೆಳಗಿಳಿಸಿ. ನಂತರ ನಿಂಬೆರಸ ಸೇರಿಸಿ ಕೈಯಾಡಿಸಿ. ಇದು ಅನ್ನ ಹಾಗೂ ಚಪಾತಿಯೊಡನೆ ತಿನ್ನಲು ಚೆನ್ನಾಗಿರುತ್ತದೆ.

ಬೆಣ್ಣೆ ಬಿಸ್ಕಿಟ್ / Butter Biscuits

Click here to read in English..

ಸಾಮಗ್ರಿ:
ಬೆಣ್ಣೆ (ರೂಂ ಟೆಂಪರೇಚರ್'ನಲ್ಲಿ)  - 1 ಕಪ್
ಸಕ್ಕರೆಪುಡಿ - 1 ಕಪ್ (ಸುಮಾರು 3 / 4 ಕಪ್ ಸಕ್ಕರೆಯಿಂದ 1 ಕಪ್ ಸಕ್ಕರೆಪುಡಿ ಆಗುತ್ತದೆ)
ಏಲಕ್ಕಿ 4 - 5 
ಮೈದಾಹಿಟ್ಟು - ಎರಡೂವರೆಯಿಂದ 3 ಕಪ್

ವಿಧಾನ:
ಸಕ್ಕರೆ, ಏಲಕ್ಕಿಯನ್ನು ಒಟ್ಟಿಗೆ ಮಿಕ್ಸಿಯಲ್ಲಿ ಪುಡಿಮಾಡಿಕೊಳ್ಳಿ. ಬೆಣ್ಣೆಯನ್ನು ಚೆನ್ನಾಗಿ ಗಂಟಿಲ್ಲದಂತೆ ಬೀಟ್ ಮಾಡಿ. ಅದಕ್ಕೆ ಸ್ವಲ್ಪ ಸ್ವಲ್ಪವೇ ಸಕ್ಕರೆಪುಡಿ ಸೇರಿಸಿ ಬೀಟ್ ಮಾಡುತ್ತ ಕ್ರೀಮ್ ನಂತೆ ಮಾಡಿ. ನಂತರ ಅದಕ್ಕೆ ಹಿಡಿಸುವಷ್ಟು ಮೈದಾಹಿಟ್ಟು ಸೇರಿಸಿ ಚೆನ್ನಾಗಿ ನಾದಿ. ಹಿಟ್ಟು ಸ್ವಲ್ಪ ಮೆತ್ತಗಿರಲಿ. ಇದರಿಂದ ಚಿಕ್ಕ ಚಿಕ್ಕ ಉಂಡೆಗಳನ್ನು ಮಾಡಿಕೊಂಡು ತಟ್ಟಿ ಬಿಸ್ಕಿಟ್ ಆಕಾರಕ್ಕೆ ತನ್ನಿ. ಇದನ್ನು ಜಿಡ್ಡು ಸವರಿದ ಬೇಕಿಂಗ್ ಟ್ರೇಯಲ್ಲಿಟ್ಟು 200 ಡಿಗ್ರಿ ಸೆಂಟಿಗ್ರೇಡ್ ನಲ್ಲಿ ಪ್ರೀಹೀಟ್ ಮಾಡಿದ ಓವನ್ ನಲ್ಲಿ 20 - 25 ನಿಮಿಷ ಬೇಯಿಸಿ. ನಸುಗಂದುಬಣ್ಣಕ್ಕೆ ಬಂದಾಗ ತೆಗೆಯಿರಿ. ಬಿಸ್ಕಿಟ್ ಗಳನ್ನು ಟ್ರೇಯಿಂದ ಹೊರತೆಗೆದು ಆರಲುಬಿಟ್ಟು, ನಂತರ ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ.

Friday, 11 March 2011

ಅವರೆಕಾಳಿನ ಸಮೋಸ / Avarekaalu (hyacinth beans) Samosa

Click here to read in English..

ಸಾಮಗ್ರಿ:
ಅವರೇಕಾಳು  - 1 /2 ಕೆಜಿ
ಚಕ್ಕೆ, ಲವಂಗ, ಮರಾಠಿ ಮೊಗ್ಗು, ಧನಿಯಾ - 2 ಟೀ ಚಮಚ
ಕೊತ್ತಂಬರಿ ಸೊಪ್ಪು - 1 ಕಟ್ಟು
ಕರಿಮೆಣಸು - ಸ್ವಲ್ಪ
ಹಸಿಶುಂಠಿ - 1 /2 ಇಂಚು 
ಹಸಿಮೆಣಸಿನಕಾಯಿ - 10 
ಮೆಂತ್ಯ ಸೊಪ್ಪು - 2 ಕಟ್ಟು
ಮೈದಾಹಿಟ್ಟು - 1 /2 ಕೆಜಿ
ಬೆಣ್ಣೆ - ಸ್ವಲ್ಪ
ಅಡಿಗೆ ಸೋಡಾ - ಚಿಟಿಕೆ 
ಉಪ್ಪು - ರುಚಿಗೆ ತಕ್ಕಷ್ಟು  
ಕರಿಯಲು ಎಣ್ಣೆ

ವಿಧಾನ
ಅವರೇಬೀಜವನ್ನು ನೀರಿನಲ್ಲಿ ಹಿಸುಕಿ ಬೇಳೆ ಮಾಡಿಕೊಳ್ಳಿ. ಚಕ್ಕೆ, ಲವಂಗ, ಮರಾಠಿ ಮೊಗ್ಗು, ಧನಿಯಾ, ಮೆಣಸಿನಕಾಳು ಎಲ್ಲವನ್ನೂ ಹುರಿದು ಪುಡಿಮಾಡಿಕೊಳ್ಳಿ. ಹಸಿಮೆಣಸಿನಕಾಯಿ, ಹಸಿಶುಂಠಿಯನ್ನು ನುಣ್ಣಗೆ ರುಬ್ಬಿಕೊಳ್ಳಿ. ಮೆಂತೆಸೊಪ್ಪು, ಕೊತ್ತಂಬರಿ ಸೊಪ್ಪು ಸಣ್ಣದಾಗಿ ಹೆಚ್ಚಿಕೊಳ್ಳಿ. ಮೈದಾಹಿಟ್ಟಿಗೆ ಬೆಣ್ಣೆ, ಉಪ್ಪು, ಸೋಡಾ ಬೆರೆಸಿ ನೀರು ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿ. ಸ್ವಲ್ಪ ಎಣ್ಣೆಯಲ್ಲಿ ಅವರೆಕಾಳನ್ನು ಹಾಕಿ ಸ್ವಲ್ಪ ನೀರು ಚಿಮುಕಿಸಿ ಬೇಯಲು ಇಡಿ. ಅದು ಅರ್ಧ ಬೆಂದಮೇಲೆ ಪುಡಿಮಾಡಿಕೊಂಡ ಮಸಾಲೆ, ರುಬ್ಬಿಕೊಂಡ ಹಸಿಶುಂಠಿ, ಹಸಿಮೆಣಸಿನಕಾಯಿ, ಹೆಚ್ಚಿಟ್ಟುಕೊಂಡ ಸೊಪ್ಪು, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಪುನಃ ಬೇಯಿಸಿ. 
ಕಲಸಿಟ್ಟ ಮೈದಾಹಿಟ್ಟಿನಿಂದ ಅಂಗೈ ಅಗಲದ ಚಪಾತಿಗಳನ್ನು ಲಟ್ಟಿಸಿಕೊಂಡು ಅದರಲ್ಲಿ 2 ಟೀ ಚಮಚದಷ್ಟು ತಯಾರಿಸಿಟ್ಟ ಮಿಶ್ರಣವನ್ನಿರಿಸಿ ಅಡ್ಡಕ್ಕೆ ಮಡಿಚಿ. ಅದನ್ನು ಪುನಃ ಮಡಿಚಿ ತ್ರಿಕೋನಾಕಾರಕ್ಕೆ ತಂದು, ಕಾದ ಎಣ್ಣೆಯಲ್ಲಿ ಕರಿಯಿರಿ. ಬಿಸಿಯಾಗಿದ್ದಾಗಲೇ ತಿನ್ನಿ. 
ಇನ್ನೊಂದು ವಿಧದಲ್ಲಿಯೂ ಸಮೋಸಕ್ಕೆ ಚಪಾತಿಗಳನ್ನು ಲಟ್ಟಿಸಬಹುದು: ಹಿಟ್ಟಿನಿಂದ ಸ್ವಲ್ಪ ದೊಡ್ಡ ಉಂಡೆ ಮಾಡಿ, ಹದವಾದ ಚಪಾತಿಯಂತೆ ಲಟ್ಟಿಸಿಕೊಂಡು, ಚಪಾತಿಯನ್ನು ಸರಿಯಾಗಿ ಎರಡು ಭಾಗ ಮಾಡಿ. ಎರಡೂ ಭಾಗಗಳನ್ನು ಸುರುಳಿಯಾಗಿ ತ್ರಿಕೋನಾಕಾರಕ್ಕೆ ಮಡಿಚಿ (ಕಳ್ಳೆಕಾಯಿ ಪೊಟ್ಟಣದಂತೆ) ಅದರೊಳಗೆ ಪಲ್ಯವನ್ನಿಟ್ಟು ಹೊರಬರದಂತೆ ಸೀಲ್ ಮಾಡಿ, ಎಣ್ಣೆಯಲ್ಲಿ ಕರಿಯಿರಿ.   
Related Posts Plugin for WordPress, Blogger...